Kapu 65

Nzyetolo ya Kinsweki na Yeruzalemi

YAI kele automne ya mvu 32 T.B., mpi Nkinsi ya Bisasa mefinama. Yezu mesala mingi kisalu na yandi na Galilea kubanda na Paki ya mvu 31 T.B., ntangu Bayuda kumekaka na kufwa yandi. Ngatu, kubanda ntangu yina, Yezu mekwendaka na Yeruzalemi mbala tatu kaka sambu na kuvanda na bankinsi tatu ya Bayuda yina kesalamaka konso mvula.

Bampangi ya Yezu kepusa yandi ntangu yai nde: “Katuka awa, kwenda na ntoto ya Yudea.” Yeruzalemi kele mbanza ya nene ya Yudea mpi mavula ya lusambu ya insi yonso. Bampangi na yandi keyindula nde: “Ata muntu mosi ve lenda bumba mambu yina ya yandi ke sala, kana yandi zola kuzabana.”

Ata nkutu Yakobo, Simoni, Yozefi, ti Yuda kekwikila ve nde mbuta na bau, Yezu, kele mpenza Mesia, bau kezola nde yandi kumonisa ngolo na yandi ya bimangu na bantu yina yonso kele ya kuvukana na nkinsi. Kansi, Yezu kezaba kigonsa. Yandi ketuba nde: “Bantu ya nsi-ntoto lenda menga beno ve, kansi bo ke mengaka mono, sambu mono ke tubaka nde mambu ya bo ke salaka kele ya mbi.” Ebuna Yezu metubila bampangi na yandi nde: “Beno kwenda ka beno na nkinsi. Mono ke kwenda na nkinsi yai ve.”

Nkinsi ya Bisasa kesalaka bilumbu nsambwadi. Na kilumbu ya nana yau kesukaka ti bisalu yina kesalamaka na ntwala ya bantu yonso. Nkinsi yango kevandaka na nsuka ya mvula ya bilanga mpi yau kele ntangu ya kyese mingi mpi ya kuvutula matondo. Bilumbu mingi na nima ya kukatuka ya bampangi ya Yezu sambu na kuvukana ti ntalu ya kuluta mingi ya bantu yina kesala nzyetolo, yandi ti balongoki na yandi mekwenda na kinsweki, nkatu bantu kumona bau. Bau mebaka nzila yina kelutila na Samaria, na kisika ya kubaka yina ya bantu mingi kekwendila penepene ti Nzadi ya Yordani.

Sambu Yezu ti bankundi na yandi fwete kuvanda na mfunu ya bisika ya kulala na bwala mosi ya Samaria, Yandi meyitisa bangenzi sambu na kusala bangidika. Kansi, bantu mebuya na kusala ata kima mosi sambu na Yezu na nima ya kuzaba nde yandi kekwenda na Yeruzalemi. Na nsoni yonso, Yakobo, ti Yoane keyufula nde: “Mfumu, keti nge zola nde beto binga tiya na zulu, yo kwisa kufwa bantu yai yonso?” Yezu menganina bau sambu bau mepesa ngindu ya kusala kima ya mutindu yina, mpi bau mekwenda na bwala ya nkaka.

Na ntangu bau ketambula na nzila, longi mosi ya Bansiku metubila Yezu nde: “Longi mono fweti landa nge konso kuna ya nge ke kwenda.”

Yezu mevutula nde: “Bamikengi ke na mabulu na bo sambu na kulala, bandeke ke na babuyamba na bo, kansi Mwana-muntu ke na kisika ve ya yandi lenda kwenda kulala.” Yezu kele na kutendula nde longi ya Bansiku yina tamona mpasi kana yandi kukuma landi na Yandi. Mpi yau kemonana bonso nde longi ya Bansiku yango kele lulendo mingi kibeni na kundima luzingu ya mutindu yai.

Yezu metubila muntu ya nkaka nde: “Kwisa landa mono.”

Muntu yango mevutula nde: “Mfumu, pesa mono ntete nzila, mono kwenda kuzika tata na mono.”

Yezu mevutula nde: “Bika bantu yina me fwaka bo zika bantu na bo yina me fwa. Kansi nge, nge kwenda kuzabisa nsangu ya Kimfumu ya Nzambi.” Na ntembe ve, tata ya muntu yai mefwa ntete ve, sambu kana yandi vandaka ya kufwa, yau zolaka kusalama ve nde mwana na yandi kuvanda awa sambu na kuwidikila Yezu. Yau kemonana nde mwana yango kele na kulomba ntangu sambu na kuvingila lufwa ya tata na yandi. Yandi kele ve ya kubongisama sambu na kutula Kimfumu ya Nzambi na kisika ya ntete na luzingu na yandi.

Ntangu bau kefula na kutambula na nzila sambu na kukwenda na Yeruzalemi, muntu ya nkaka metubila Yezu nde: “Mfumu, mono ta kwisa kulanda nge. Kansi pesa mono ntete nzila na kwenda kupesa fami na mono mbote ya nsuka.”

Sambu na kupesa mvutu Yezu ketuba nde: “Muntu yina me baka nsengo, . . . kana yandi tala na nima, yandi me fwana ve na Kimfumu ya Nzambi.” Bayina tavanda balongoki ya Yezu fwete kutula meso na bau na kisalu ya Kimfumu. Kaka mutindu mubundudi lenda kusala mbumba na lweka kana yandi kelanda ve na kutala ya kusungama na ntwala, mutindu mosi mpi konso muntu yina ketala na nima na ngidika ya bima yai, yandi lenda kugambuka kukonda mpasi na nzila yina kenataka na luzingu ya mvula na mvula. Yoane 7:​2-10; Luka 9:​51-62; Matayo 8:​19-22.

▪ Banani kele bampangi ya Yezu, mpi inki bau keyindula sambu na yandi?

▪ Sambu na inki bantu ya Samaria memonisa kikalulu ya kukonda kuyamba, mpi inki Yakobo ti Yoane kezola kusala?

▪ Tanga masolo tatu ya Yezu mesolula ti bantu na nzila, mpi inki mutindu yandi metubila mingi mfunu ya kisalu ya kuditambika?