Kapu 68

Malongi ya Nkaka na Kilumbu ya Nsambwadi

KILUMBU ya nsuka ya Nkinsi ya Bisasa, kilumbu ya nsambwadi, memana ntete ve. Yezu kele na kulonga na ndambu mosi ya tempelo ya kebingamaka “kibumbilu.” (NW) Yau kemonana nde yau kele na ndambu yai ya bau kebingaka Kibansala ya Bankento kisika bakesi ya bantu ketudilaka makabu na bau kele.

Konso mpimpa na ntangu ya nkinsi, kele ti mwinda mosi ketulamaka na ndambu yai ya tempelo. Bau metulaka makunzi iya ya nda ya minda, konso dikunzi ti malonga ya nene iya ya kufuluka na mafuta. Mafuta ya kepela na malonga 16, kele ngolo sambu na kupesa nsemo ntama kibeni na banzyunga na mpimpa. Mambu ya Yezu ketuba ntangu yai lenda kuyibusa bawi na yandi nsemo yai. Yezu ketuba nde: “Mono kele mwinda [ya inza, NW]. Muntu yina ke landaka mono yandi ta tambula na mpimpa ata mbala mosi ve, kansi yandi ta vanda na mwini yina ke pesaka moyo.”

Bafarize kebuya nde: “Nge ke tuba kitemwe sambu na nge mosi; kitemwe na nge kele ya kieleka ve.”

Sambu na kupesa mvutu, Yezu ketuba nde: “Ata mono ke tuba kitemwe sambu na mono mosi, kitemwe na mono kele ya kieleka, sambu mono zaba wapi mono me katukaka mpi wapi mono ke kwenda. Kansi beno, beno zaba ve wapi mono me katukaka, wapi mono ke kwenda.” Yandi keyika nde: “Mono ke tuba kitemwe sambu na mono mosi, Tata yina tindaka mono ke tuba kitemwe sambu na mono.”

Bafarize keyufula nde: “Tata na nge kele wapi?”

Yezu kevutula nde: “Beno zaba ata mono ve, ata Tata na mono ve. Kana beno zabaka mono, beno zolaka kuzaba mpi Tata na mono.” Ata nkutu Bafarize kezola kaka kukanga Yezu, ata muntu mosi ve kesimba yandi.

Yezu ketuba dyaka nde: “Mono ke kwenda. . . . Beno lenda kwisa kukuma ve na kisika ya mono ke kwenda.”

Ntangu Bayuda mewa mambu yai, bau meyantika na kuyufula nde: “Yandi ta kudifwa yandi mosi? Sambu yandi ke tuba nde: ‘Beno lenda kwisa kukuma ve na kisika ya mono ke kwenda!’ ”

Yezu ketendula nde: “Beno me katukaka awa na nsi-ntoto, kansi mono me katukaka na zulu. Beno kele bantu ya nsi-ntoto yai, kansi mono kele muntu ya nsi-ntoto yai ve.” Na nima yandi keyika nde: “Kana beno ndima ve nde ‘Mono kele [yandi, NW],’ beno ta fwa na masumu na beno.”

Ya kyeleka, Yezu ketubila luzingu na yandi na ntwala ya kukuma muntu mpi kusilama na yandi bonso Mesia, to Kristu. Ata mpila yina, bau keyufula yandi, na luvwezo yonso nde: “Nge kele nani?”

Sambu bau kebuya yandi, Yezu kevutula nde: “Mutindu mono ke songa beno katuka na luyantiku.” Kansi yandi kelanda na kutuba nde: “Muntu yina tindaka mono ke tubaka mambu ya kieleka; mono ke tuba na bantu yonso kaka mambu yina ya mono longukaka na yandi.” Yezu keyika nde: “Ntangu beno ta nangula Mwana-muntu, beno ta zaba nde [mono kele yandi, NW]; beno ta zaba mpi nde mono ke salaka kima ve na ngolo na mono mosi, kansi mono ke tubaka kaka mambu yina ya Tata longaka mono. Muntu yina tindaka mono kele ti mono . . . yandi ke bikisaka mono mono mosi ve, sambu ntangu yonso mono ke salaka mambu yina ke pesaka yandi kiese.”

Ntangu Yezu ketuba mambu yai, bantu mingi kekwikila na yandi. Na bantu yango yandi ketuba nde: “Kana beno ke landa malongi na mono, ya kieleka beno kele balonguki na mono; beno ta zaba mambu yina kele ya kieleka, ebuna mambu yina ta katula beno na kimpika.”

Bambeni na yandi kevutula nde: “Beto kele bantu ya dikanda ya Abrahami, beto me vandaka ntete ve ata bampika ya muntu mosi. Nki mutindu nge lenda tubila beto nde: ‘Beno ta katuka na kimpika’?”

Ata nkutu Bayuda mevandaka mbala mingi na nsi ya luyalu ya bunzenza, bau kendima ve kimfumu ata munyokudi mosi. Bau kebuya na kubingama bampika. Kansi Yezu memonisa nde bau kele mpenza bampika. Na inki mutindu? Yezu ketuba nde: “Mono ke tubila beno mambu ya kieleka: Konso muntu yina ke salaka masumu, yandi kele mpika ya masumu.”

Na kubuyaka kundima kimpika na bau ya masumu, Bayuda kekuditula na kigonsa ya ngolo. Yezu ketendula nde: “Mpika ke zingaka na nzo ya mfumu na yandi ntangu yonso ve, kansi mwana ya mfumu muntu ke zingaka muna ntangu yonso.” Sambu mpika kevandaka ve ata ti nswa ya difwa, yandi lenda kuvanda na kigonsa ya kukulama konso ntangu yina. Kaka mwana ya kubuta to ya kusansa na kati ya nzo kebikalaka “ntangu yonso,” disongidila, ntangu yonso ya yandi kezinga.

Yezu kelanda nde: “Kana Mwana kukatula beno na kimpika, beno ta vanda diaka bampika ve.” Yau yina, kyeleka ya kekatulaka bantu na kimpika kele kyeleka yina metala Mwana, Yezu Kristu. Muntu yonso lenda kukatulama na kimpika ya disumu yina kenataka lufwa kaka na nsadisa ya kimenga ya luzingu na yandi ya kukuka ya kimuntu. Yoane 8:​12-36.

▪ Na wapi Yezu kelonga na kilumbu ya nsambwadi? Inki kesalama na mpimpa na kisika yina, mpi inki mutindu dyambu yai kewakana ti malongi ya Yezu?

▪ Inki Yezu metuba na yina metala kisina na yandi mpi inki dyambu yai fwete kusonga sambu na yina metala yandi?

▪ Na inki mutindu Bayuda kele bampika, kansi inki kyeleka takatula bau na kimpika?