Longa na Mutindu ya Pete

Mambu ya Yezu Salaka

VIDEO: Yezu Ke Monisa Dikebi ya Tata na Beto Ke Monisilaka Beto

1. Tala VIDEO, to tanga Matayo 6:25-27. Na nima, tadila bangiufula yai:

1. Inki mbandu Yezu pesaka sambu na kumonisa nde Yehowa ke tudilaka beto dikebi?

2. Ata Yezu zabaka mambu mingi ya me tala bandeke, nki diambu ya pete yandi tubilaka? Sambu na nki yo vandaka mutindu mosi ya mbote ya kulonga?

Mbandu ya Yezu Ke Longa Beto Inki?

2. Kana beto ke longa na mutindu ya pete, bantu ta yibuka mambu ya beto longaka bo mpi beto ta simba ntima na bo.

Landa Mbandu ya Yezu

3. Kutuba ve mingi. Na kisika ya kusonga longoki mambu yonso nge me zaba sambu na disolo yina, sadila kaka malongi yina bo me tula na mukanda ya beno ke longuka. Na nima ya kuyula ngiufula, bikila longoki ntangu ya kupesa mvutu. Kana yandi me zwa ve mvutu to yandi me pesa mvutu yina ke wakana ve ti malongi ya Biblia, yula bangiufula ya nkaka yina ta sadisa yandi na kuyindula diambu yango. Kana longoki na nge me bakisa dibanza ya mfunu, beno luta na kitini ya ke landa.

4. Sadila malongi ya longoki me zaba sambu na kusadisa yandi na kubakisa malongi ya mpa. Mu mbandu, na ntwala ya kulonguka dilongi ya lufutumuku, nge lenda vutukila na bunkufi mambu ya longoki me zaba na yina me tala bafwa.

5. Sadila bambandu na mayele. Na ntwala ya kusadila mbandu mosi, kudiyula nde:

1. ‘Keti mbandu yai kele pete?’

2. ‘Keti longoki na mono ta bakisa yo kukonda mpasi?’

3. ‘Keti yo ta sadisa yandi na kuyibuka dilongi ya mfunu​—kansi ve kaka mbandu yango?’