“Lungisa Mbotembote Kisalu na Nge”

“Lungisa mbotembote kisalu na nge.”​—2 TIMOTEO 4:5, NW.

1, 2. Ata Bakristu yonso kele baevanzelizatere, inki Masonuku kelomba na bankuluntu?

KETI nge kele nsamuni ya Kimfumu? Kana yo kele buna, pesa Yehowa Nzambi mersi sambu na dikabu yai ya kitoko. Keti nge kele nkuluntu na dibundu? Yo kele dikabu ya ngika ya mekatuka na Yehowa. Kansi, beto fwete vila ve nde kusala banzo-nkanda ya kinsuni to kuzaba kutuba mbote kekumisaka beto ve baministre to bankengi ya kufwana na dibundu. Yehowa muntu kekumisaka beto baministre ya kufwana, mpi yo kele sambu babakala yankaka na kati na beto kelungisaka minsiku ya Masonuku yo yina bo kele ti dibaku ya kusala bonso bankengi.​—2 Korinto 3:5, 6; 1 Timoteo 3:1-7.

² Bakristu yonso ya mekudipesaka na Nzambi kesalaka kisalu ya baevanzelizatere, kansi mingimingi bankengi, to bankuluntu, bantu fwete pesa mbandu ya mbote na kisalu ya kusamuna. Nzambi, Kristu, mpi Bambangi ya Yehowa yankaka kesepelaka na bankuluntu yina “ke salaka ngolo na kupesa malongi ti na kulonga bantu.” (1 Timoteo 5:17; Efezo 5:23; Baebreo 6:10-12) Ntangu yonso, malongi ya nkuluntu fwete tunga kimpeve ya bawi na yandi, sambu ntumwa Polo kusongaka nkengi Timoteo nde: “Na bilumbu ke kwisa na ntwala, bantu ta zola diaka ve kuwa malongi ya kieleka, kansi bo ta landaka mabanza na bo mosi, bo ta bakaka balongi ya nkaka mingi sambu na kulonga bo konso mambu yina ya bo zola wa. Bo ta waka diaka mambu ya kieleka ve, kansi bo ta tulaka makutu na bo mingi na kuwa bingana ya luvunu. [Kansi nge, tanina mabanza na nge na mambu yonso, kanga ntima na bampasi, sala kisalu ya evanzelizatere, lungisa mbotembote kisalu na nge, NW].”​—2 Timoteo 4:3-5.

3. Inki mambu fwete salama na mpila nde malongi ya luvunu kutula ve kimpeve ya dibundu na kigonsa?

³ Sambu na kuzikisa nde malongi ya luvunu ketula ve kimpeve ya dibundu na kigonsa, nkengi fwete landa ndongisila ya Polo ya ketuba nde: “Tanina mabanza na nge na mambu yonso, . . . lungisa mbotembote kisalu na nge.” (2 Timoteo 4:5, NW) Ya kyeleka, nkuluntu fwete ‘lungisa mbotembote kisalu na yandi.’ Yandi fwete lungisa kisalu na yandi na mutindu mosi ya kulunga. Nkuluntu yina kesalaka mbote kisalu na yandi ya kusamuna ketulaka dikebi ya kufwana na mikumba na yandi yonso, yandi kevilaka ve ata kima mosi to kelungisaka yo ve ndambu mpamba. Muntu ya mutindu yina kevandaka ya kwikama ata na mambu ya fyoti.​—Luka 12:48; 16:10.

4. Inki lenda sadisa beto na kulungisa mbotembote kisalu ya kusamuna?

⁴ Kulungisa mbotembote kisalu na beto ya kusamuna kelombaka ve kaka kuvanda ti ntangu mingi, kansi yo kelombaka kusadila ntangu mbote. Kuvanda ti programe mosi ya bukatikati lenda sadisa Bakristu yonso na kulungisa mambu mingi na kisalu ya kusamuna. Sambu na kulutisa ntangu mingi na kisalu ya bilanga, nkuluntu fwete yidika mambu na yandi mbote na mpila nde yo wakana ti manaka na yandi mpi yandi fwete zaba mambu ya yandi lenda pesa na muntu yankaka mpi mutindu muntu yina fwete sala yo. (Baebreo 13:17) Na kutuba ya mbote, nkuluntu yina kekudizitisaka kesalaka mpi dikabu na yandi, bonso Nehemia yina kupesaka maboko sambu na kutunga dyaka bibaka ya Yeruzalemi. (Nehemia 5:16) Bansadi yonso ya Yehowa mpi fwete salaka mbala na mbala kisalu ya kusamuna Kimfumu.​—1 Korinto 9:16-18.

5. Inki mutindu beto fwete tadilaka kisalu ya kusamuna?

⁵ Beto bansamuni ya Kimfumu yina metulamaka na zulu, beto kele ti kisalu mosi ya kyese kibeni! Ya kyeleka, beto kezolaka mpenza dikabu ya beto kele na yo ya kulonga nsangu ya mbote na bantu ya ntoto ya mvimba na ntwala nde nsuka kukwisa. (Matayo 24:14) Ata beto kele bantu ya kukonda kukuka, bangogo yai ya Polo lenda pesa beto kikesa: “Beto bantu ke na kimvwama [ya kisalu ya kusamuna] yina ya mambu ya Nzambi, beto kele bonso mabungu ya kukonda ngolo ya bo ke salaka na ntoto. Beto kele mpidina sambu na kusonga na bantu nde Nzambi muntu ke na ngolo ya nene kansi beto ve.” (2 Korinto 4:7) Ee, beto lenda sala kisalu ya Nzambi kendima, kansi beto lenda sala yo kaka ti ngolo mpi mayele yina Yandi kepesaka.​—1 Korinto 1:26-31.

Monisa Lukumu ya Nzambi

6. Inki luswaswanu kele na kati ya Izraele ya kinsuni ti ya kimpeve?

⁶ Polo ketubila Bakristu ya kupakulama ntangu yandi ketuba nde Nzambi “mekumisaka beto bantu ya kufwana mpenza sambu na kuvanda baministre ya kuwakana mosi ya mpa.” (NW) Ntumwa kemonisa luswaswanu na kati ya kuwakana ya mpa ya Nzambi kusalaka ti Izraele ya kimpeve na nzila ya Yezu Kritu ti kuwakana ya ntama ya Nsiku yina Yandi salaka ti Izraele ya kinsuni na nzila ya Moize. Polo keyika nde ntangu Moize kwisaka kukulumuka na Ngumba ya Sinai ti matadi yina kuvandaka ti Bansiku Kumi, ilungi na yandi vandaka kupela mpenza bonso tiya na mpila nde bantu ya Izraele kukaka ve kutala yo ntangu mingi. Kansi, na nima, kima mosi ya mpasi kusalamaka sambu “bo vandaka kubakisa ve” mpi lele mosi kukangaka ntima na bo. Kansi, ntangu muntu kebalulaka ntima mpi kekudipesaka mvimba na Yehowa, lele yina kekatukaka. Na nima, Polo kutubilaka kisalu ya bo mepesaka bantu yina kele na kuwakana ya mpa. Yandi ketuba nde: “Beto bantu yonso yina ke na lele ve na meso, lukumu ya Mfumu ke monikaka na ilungi na beto bonso na tala-tala.” (2 Korinto 3:6-8, 14-18; Kubasika 34:29-35) Bubu yai, “mameme ya nkaka” ya Yezu kele mpi ti dikabu ya kumonisa lukumu ya Yehowa.​—Yoane 10:16.

7. Inki mutindu bantu lenda monisa lukumu ya Nzambi?

⁷ Kana muntu mosi ve lenda mona ilungi ya Nzambi mpi kuzinga dyaka, inki mutindu bantu ya kukonda kukuka lenda monisa lukumu ya Nzambi? (Kubasika 33:20) Ya kyeleka, Yehowa kele muntu ya lukumu kaka ve, kansi Yandi kele mpi ti lukanu ya lukumu sambu na kunwanina nswa na yandi ya kuvanda mfumu na nzila ya Kimfumu na yandi. Bakyeleka ya ketubila Kimfumu yango kele ndambu ya “bisalu ya nene ya Nzambi” yina bantu ya kuzwaka mpeve santu na Pantekoti ya 33 T.B. yantikaka kulonga. (Bisalu 2:11) Na lutwadisu ya mpeve, bo lendaka kuka na kulungisa mbotembote kisalu ya bo pesaka bo.​—Bisalu 1:8.

8. Inki lukanu Polo kubakaka na yina metala kisalu ya kusamuna?

⁸ Polo kubakaka lukanu ya kubika ve ata kima mosi yo kanga yandi nzila ya kulungisa mbotembote kisalu na yandi ya kusamuna. Yandi sonikaka nde: “Nzambi me pesaka beto kisalu yai sambu yandi ke wilaka beto mawa; yo yina beto fweti vanda na kikesa. Beto me losaka mambu yonso ya kinsweki ti ya nsoni; beto ke kusaka bantu ve, beto ke pindulaka mambu ya Nzambi ve. Kansi mambu ya beto ke salaka beto ke bumbaka yo ve sambu yo kele ya kieleka, beto ke salaka yo na meso ya bantu yonso ti na meso ya Nzambi. Mambu yina ya beto ke salaka, beto ke salaka yo na mpila nde konso muntu kundima yo na ntima na yandi.” (2 Korinto 4:1, 2) Kyeleka ke na kumonana mpi nsemo ya kimpeve ke na kupanzana na nsadisa ya kima yina Polo kebinga nde: “kisalu yai.”

9, 10. Inki mutindu beto lenda monisa lukumu ya Yehowa?

⁹ Na yina metala Nto ya nsemo ya beto kemonaka mpi ya kimpeve, Polo kesonika nde: “Nzambi yina tubaka nde: ‘Mwinda kupela na mpimpa.’ Yandi muntu tulaka mwinda na ntima na beto sambu yo pela, yo songa beto mayele ya kuzaba lukumu ya Nzambi, lukumu yina ke monikaka na ilungi ya Kristo.” (2 Korinto 4:6; Kuyantika 1:2-5) Sambu beto kele ti dikabu ya kuluta nene ya kuvanda baministre ya Nzambi, bika beto tanina bunkete na beto na mpila nde beto monisa lukumu ya Yehowa bonso bitalatala.

¹⁰ Bantu yina kele na mpimpa na kimpeve lenda mona ve lukumu ya Yehowa to nsemo na yo na ilungi ya Yesu Kristu, Moize ya Nene. Kansi beto bantu kele bansadi ya Yehowa, beto kebakaka nsemo ya lukumu na Masonuku mpi beto kepanzaka yo na bantu yankaka. Bantu yina kele ntangu yai na mpimpa ya kimpeve kele na mfunu ya nsemo ya kekatukaka na Nzambi sambu na kuguluka na lufwa. Yo yina, na kyese mpi kikesa kibeni, beto kelemfukaka na ntuma ya Nzambi ya kupedisa mwinda na beto na kisika ya mpimpa sambu na lukumu ya Yehowa.

Mwinda na Beno Fwete Pela na Kulonguka Biblia ti Bantu

11. Inki Yezu kutubaka na yina metala kupedisa mwinda na beto, mpi inki kele mutindu mosi ya kusala yo na kisalu na beto ya kusamuna?

¹¹ Yezu kutubilaka balongoki na yandi nde: “Beno kele . . . mwinda sambu na bantu. Bwala yina kele na zulu ya ngumba, yo lenda bumbana ve. Bo ke pedisaka mwinda ve sambu na kufika yo kantini; kansi bo ke tulaka yo na zulu ya mesa. Kuna, yo ke pelaka sambu na bantu yonso kele na kati ya nzo. Mutindu mosi mpi, mwinda na beno fweti pela na meso ya bantu. Mpidina bo ta mona mambu ya mbote ya beno ke salaka, ebuna bo ta pesa lukumu na Tata na beno kele na zulu.” (Matayo 5:14-16) Bikalulu na beto ya mbote lenda pusa bantu yankaka na kupesa Nzambi lukumu. (1 Piere 2:12) Mitindu ya kuswaswana ya kisalu na beto ya kievanzelizatere kepesaka beto mabaku mingi ya kubika nde nsemo na beto kupela. Mosi na kati ya balukanu na beto ya mfunu kele ya kumonisa nsemo ya kimpeve ya kekatukaka na Ndinga ya Nzambi, ya beto kesalaka ntangu beto ketwadisaka kulonguka ya Biblia ya mbote ti bantu. Yai kele mutindu mosi ya kuluta mfunu ya kulungisa kisalu na beto mbotembote. Inki bangindu lenda sadisa beto na kutwadisa kulonguka ya Biblia yina tasimba ntima ya bantu yina kesosaka kyeleka?

12. Inki kuwakana kele na kati ya kisambu ti kusala kisalu ya kutwadisa kulonguka Biblia ti bantu?

¹² Kusamba Yehowa sambu na dyambu yai kemonisaka mpusa na beto ya ngolo ya kutwadisa kulonguka ya Biblia. Yo kemonisaka mpi nde beto kebakisa mfunu ya kusadisa bantu yankaka na kuzwa nzayilu ya Nzambi. (Ezekiele 33:7-9) Beto fwete tula ntima nde Yehowa tapesa mvutu na bisambu na beto mpi yandi tasakumuna bikesa ya masonga ya beto kesala na kisalu ya kusamuna. (1 Yoane 5:14, 15) Kansi beto kesambaka kaka ve sambu na kuzwa muntu ya kulonguka ti yandi Biblia. Na nima ya kuyantika kulonguka ti muntu, kusamba mpi kuyindulula sambu na bampusa ya sikisiki ya longoki ya Biblia tasadisa beto na kutwadisa konso kulonguka na mutindu mosi ya mbote.​—Roma 12:12.

13. Inki lenda sadisa beto na kutwadisa kulonguka ya Biblia ya mbote ti bantu?

¹³ Sambu na kutwadisa mbote kulonguka ya Biblia ti bantu, beto fwete kudibongisa mbote sambu na konso kulonguka. Kana beto kemona nde beto kekuka mpenza ve, beto lenda baka lusadisu na kutalaka mutindu Nkengi ya Kulonguka ya Mukanda ya Dibundu ketwadisaka dilongi ya konso mposo. Bantangu yankaka, beto lenda kwenda kusamuna ti bansamuni ya Kimfumu yina mebakaka bambuma ya mbote na kutwadisa kulonguka ya Biblia ti bantu. Kansi, bikalulu mpi bametode ya kulongila ya beto fwete tadila mingimingi ti dikebi yonso kele ya Yezu Kristu.

14. Inki mutindu beto lenda simba ntima ya longoki ya Biblia?

¹⁴ Yezu vandaka kumona kyese na kusala luzolo ya Tata na yandi ya zulu mpi na kutubila bantu yankaka mambu ya metala Nzambi. (Nkunga 40:9) Yandi vandaka muntu ya mawete mpi yandi nungaka na kusimba ntima ya bantu yina vandaka kuwidikila yandi. (Matayo 11:28-30) Yo yina, beto sala ngolo na kusimba ntima ya bantu ya beto kelongukaka ti bo Biblia. Sambu na kusala yo, beto fwete vanda ti luzingu ya konso longoki na mabanza na ntangu beto kekudibongisa sambu na konso kulonguka. Mu mbandu, kana bantu meyikanaka ve na Biblia na kisika yandi meyelaka, yo lenda lomba nde beto ndimisa yandi nde Biblia ketubaka kyeleka. Yo yina yo talomba nde beto tanga baverse mingi mpi beto tendula yo.

Sadisa Balongoki na Kubakisa Bingana

15, 16. (a) Inki mutindu beto lenda sadisa longoki ya kebakisa ve kingana mosi ya Biblia kesadila? (b) Inki beto lenda sala kana mukanda na beto mosi kesadila kingana mosi ya longoki ya Biblia kemona mpasi na kubakisa?

¹⁵ Ziku longoki ya Biblia meyikanaka ve ti kingana mosi buna ya kele na Masonuku. Mu mbandu, mbala yankaka yandi kebakisa ve ntendula ya mambu ya Yezu zolaka kutuba ntangu yandi tubilaka kutula mwinda na zulu ya mesa. (Marko 4:21, 22, NW) Yezu vandaka kutubila mwinda ya ntangu ya ntama yina vandaka kupela na nsadisa ya kamwa nsinga mosi ti mafuta. Bo vandaka kutula mwinda ya mutindu yina na zulu ya dikunzi mosi ya sipesiali na mpila nde yo temuna kitini mosi ya nzo. Sambu na kubakisa pwelele kingana ya Yezu, yo lenda lomba kusala bansosa na bangogo “Lampe” mpi “Porte-lampe” na mukanda bonso Étude perspicace des Écritures.a Kansi yo kepesaka kyese mingi na kunatila longoki ya Biblia ntendula mosi ya yandi tabakisa mpi tasepela na yo!

¹⁶ Kisadilu mosi ya kulongukila Biblia lenda sadila kingana mosi ya longoki lenda mona mpasi na kubakisa. Baka ntangu sambu na kutendula yo, to sadila kingana yankaka yina ketubila dyambu ya mutindu mosi. Ziku, mukanda mosi kenyata ngindu nde kuvanda ti nkwelani ya mbote mpi kusala bikesa kumosi kele mfunu na makwela. Sambu na kutendula dyambu yai, nge lenda tubila muntu mosi ya kesala nsaka ya kulela na nsinga, yandi mebika nsinga, metandula maboko na yandi kukonda kusimba nsinga mpi yandi mekudibikisa na muntu yankaka ya kesala mpi nsaka yina ya kulela na nsinga sambu na kusimba yandi. Nge lenda fwanisa dyaka mfunu ya kuvanda na nkwelani ya mbote mpi ya kusala bikesa kumosi ti mutindu bantu ya kesalaka na masuwa kesalaka kumosi sambu na kupesana bakarton na ntangu bo kekitisaka bima na masuwa.

17. Inki malongi beto lenda baka na Yezu na yina metala bingana?

¹⁷ Yo lenda lomba nde beto kudibongisa na ntwala sambu na kusadila mbandu yankaka. Kansi yo kele mutindu mosi ya kumonisa dikebi na beto na longoki ya Biblia. Yezu kusadilaka bingana ya pete sambu na kutendula pwelele mambu ya mpasi. Disolo na yandi na Zulu ya Ngumba kele ti bambandu ya kemonisa dyambu yai mpi Biblia kesonga nde malongi na yandi kuvandaka na bupusi ya mbote na bawi na yandi. (Matayo 5:1–7:29) Yezu vandaka kutendula mambu na kukanga ntima yonso sambu yandi vandaka kutula mpenza dikebi na bantu yankaka.​—Matayo 16:5-12.

18. Yo kelomba kusala inki na yina metala baverse yina bo mesonika ve bangogo na yo na mikanda na beto?

¹⁸ Dikebi ya beto ketulaka na bantu yankaka tapusa beto na ‘kuyindula ti bo na Masonuku.’ (Bisalu 17:2, 3, NW) Yo kelombaka kulonguka kumosi ti bisambu mpi kusadila na mayele yonso mikanda yina “nsadi ya kwikama” (NW) mebasisaka. (Luka 12:42-44) Mu mbandu, mukanda Nzayilu ya Kenataka na Luzingu ya Mvula na Mvula kevutukilaka baverse mingi mutindu yo ke na Biblia.b Kansi, sambu kisika kele ve mingi na mukanda yai, baverse yankaka bo mesonika ve bangogo na yo. Ntangu ya kulonguka ya Biblia, yo kele mfunu na kutanga mpi kutendula ata ndambu ya baverse yango. Na kutuba ya mbote, malongi na beto kekatukaka na Ndinga ya Nzambi, mpi Ndinga ya Nzambi kele ti ngolo mingi. (Baebreo 4:12) Sadila Biblia na konso kulonguka, sadilaka mbala mingi baverse ya kele na baparagrafe. Sadisa longoki na kubakisa mambu ya Biblia ketuba na yina metala dyambu to kikalulu mosi buna. Sala ngolo na kumonisa yandi mutindu ya yandi tabaka mambote na kulemfukila Nzambi.​—Yezaya 48:17, 18.

Yula Bangyufula ya Kepusaka na Kuyindula

19, 20. (a) Sambu na nki beto fwete sadila bangyufula ya kelomba nde muntu kupesa ngindu na yandi na ntangu beto ketwadisa kulonguka ya Biblia na nzo? (b) Inki beto lenda sala kana yo kelomba nde beto tadila dyaka mbotembote dyambu mosi?

¹⁹ Mutindu ya mbote ya Yezu kusadilaka bangyufula kusadisaka bantu na kuyindula. (Matayo 17:24-27) Kana beto yula longoki ya Biblia bangyufula yina kelomba nde yandi pesa ngindu na yandi kukonda kupesa yandi nsoni, bamvutu na yandi lenda monisa mambu ya yandi keyindula na yina metala dyambu mosi buna. Beto lenda mona nde yandi kele kaka ti bangindu yina kele ve na Masonuku. Mu mbandu, mbala yankaka yandi kekwikilaka na Butatu Busantu. Na kapu ya 3 mukanda Nzayilu kemonisa nde bangogo “Butatu Busantu” kele ve na Biblia. Mukanda yango kevutukila bangogo ya baverse mpi kepesa baverse yankaka ya kesonga nde Yehowa ti Yezu kele bantu zole ya kuswaswana mpi nde mpeve santu kele ngolo ya kisalu ya Nzambi, kansi yo kele muntu ve. Mbala yankaka, kutanga mpi kutubila baverse yai ya Biblia lenda fwana. Kansi nki nge fwete sala kana yo kelomba dyaka mingi? Ziku, na nima ya kulonguka yina talanda, nge lenda lutisa mwa ntangu yankaka sambu na kutubila dyambu yango mbote mutindu mikanda yankaka ya Bambangi ya Yehowa ketendula yo, mu mbandu kamukanda Keti Beto Fwete Kwikila na Butatu Busantu? Na nima, beto lenda vutukila kulonguka na bunkufi na nsadisa ya mukanda Nzayilu.

²⁰ Yindula nde mvutu ya longoki na ngyufula yina kelomba nde muntu kupesa ngindu na yandi kuyitukisa nge to kupesa nge mawa. Kana kulonguka ketubila dyambu mosi ya kesimba mpenza luzingu ya muntu bonso kunwa makaya, beto lenda pesa ngindu nde beto landa na kulonguka, ebuna beto tatubila dyambu yango na nima. Kana beto kezaba nde longoki kelanda kaka na kunwa makaya, yo tasadisa beto na kusosa kuzwa mambu ya mebasikaka na mikanda yina lenda sadisa yandi na kuyela na kimpeve. Ntangu ya beto kesala ngolo sambu na kusimba ntima ya longoki, beto lenda samba nde Yehowa kusadisa yandi na kuyela na kimpeve.

21. Inki lenda salama kana beto wakanisa bametode na beto ya kulongila ti bampusa ya sikisiki ya longoki ya Biblia?

²¹ Kana beto kekudibongisa mbote mpi kelomba lusadisu ya Yehowa, ntembe kele ve nde beto takuka na kusala na mpila nde bametode na beto ya kulongila kuwakana ti bampusa ya sikisiki ya longoki ya Biblia. Mutindu ntangu keluta, beto lenda kuka kusadisa yandi na kuyedisa zola ya mingi sambu na Nzambi. Beto lenda nunga mpi na kusadisa yandi na kuzitisa mpi na kumonisa ntonda mingi sambu na organizasio ya Yehowa. Yo kepesaka kyese kibeni ntangu balongoki ya Biblia kendimaka nde ‘ya kyeleka, Nzambi kele ti beto!’ (1 Korinto 14:24, 25) Yo yina, bika nde beto twadisa mbote kulonguka ya Biblia mpi beto sala yonso ya beto lenda sala sambu na kusadisa bantu yankaka na kukuma balongoki ya Yezu.

Kimvwama Mosi ya Beto Fwete Zola Mpenza

22, 23. Inki beto kele na yo mfunu sambu na kulungisa mbotembote kisalu na beto?

²² Sambu na kulungisa mbotembote kisalu na beto ya kusamuna, beto fwete tula ntima na ngolo yina Nzambi kepesaka. Polo vandaka kutubila kisalu ya kusamuna ntangu yandi sonikilaka bampangi Bakristu ya kupakulama nde: “Kansi beto bantu ke na kimvwama yina ya mambu ya Nzambi, beto kele bonso mabungu ya kukonda ngolo ya bo ke salaka na ntoto. Beto kele mpidina sambu na kusonga na bantu nde Nzambi muntu ke na ngolo ya nene kansi beto ve.”​—2 Korinto 4:7.

²³ Beto vanda bapakulami to “mameme ya nkaka,” beto kele bonso mabungu ya kukonda ngolo ya bo kesalaka na ntoto. (Yoane 10:16) Kansi, Yehowa lenda pesa beto ngolo ya beto kele na yo mfunu sambu na kulungisa mikumba na beto, ata bampasi yina bo kenatila beto kuvanda nki mutindu. (Yoane 16:13; Filipi 4:13) Yo yina, bika beto tula ntima yonso na Yehowa, beto zola mpenza kimvwama ya kisalu ya beto kele na yo, mpi beto lungisa mbotembote kisalu na beto.

[Banoti na nsi ya lutiti]

Inki Mvutu Nge Tapesa?

• Inki bankuluntu lenda sala sambu na kulungisa mbotembote kisalu na bo?

• Inki mutindu beto lenda tomisa mpenza mutindu na beto ya kulonguka Biblia ti bantu na nzo?

• Inki nge tasala kana longoki ya Biblia kebakisa ve kingana mosi to kana yandi kele ti mfunu ya bantendula yankaka sambu na dyambu mosi buna?

[Kifwanisu ya kele na lutiti 18]

Bakristu yina kele bankuluntu kelongaka na dibundu mpi kesadisaka na kulonga Bakristu yankaka na kisalu ya kusamuna

[Kifwanisu ya kele na lutiti 20]

Kutwadisa mbote kulonguka ya Biblia na nzo kele mutindu mosi ya kupedisa nsemo na beto