Kufimpa “Mambu ya Mudindu ya Nzambi”

“Mpeve kefimpaka mambu yonso, ata mambu ya mudindu ya Nzambi.”​—1 KORINTO 2:10, NW.

1. Tanga mwa bakyeleka yina kesepedisaka balongoki ya mpa ya Biblia.

MINGI na kati na beto ya kele na dibundu ya Bukristu lenda yibuka kyese yina beto waka na ntangu beto longukaka kyeleka na mbala ya ntete. Beto bakisaka ntendula ya zina ya Yehowa, sambu na nki yandi mepesaka nzila na bampasi, sambu na nki bantu mingi kekwenda na zulu, mpi nki mambu yandi tasala na bilumbu kekwisa sambu na bantu ya kwikama. Ziku na ntwala beto vandaka kutanga Biblia, kansi beto vandaka kubakisa ve mambu yai sambu yo vandaka ya kubumbana, mutindu yo kele ya kubumbana sambu na bantu mingi bubu yai. Beto vandaka bonso muntu ya kesosa kutala bima ya kitoko na kati ya nzadi (récif corallien). Kana yandi kele ve na maneti yina bantu kesadilaka sambu na kutala na nsi ya masa, yandi tamona ve bima mingi ya kitoko. Kansi, kana yandi kele na maneti ya kufwana, yandi tavanda na kyese ya kumona sambu na mbala ya ntete matadi ya ntalu ya kengenga, bambisi ya mutindu na mutindu ti yankaka yina kevandaka bonso bintuntu, mpi bigangwa yankaka ya kuyituka yina kevandaka na masa. Mutindu mosi, ntangu muntu kusadisaka beto na mbala ya ntete na kubakisa Masonuku, beto monaka “mambu ya mudindu ya Nzambi” kansi kukonda kubakisa yo.​—1 Korinto 2:8-10, NW.

2. Sambu na nki kulonguka Ndinga ya Nzambi lenda pesa beto kyese ntangu yonso?

² Keti beto fwete suka kaka na nzayilu yina ya zuluzulu? Na kati ya “mambu ya mudindu ya Nzambi,” beto lenda tanga mayele ya Nzambi yina yandi kemonisaka na Bakristu na nzila ya mpeve santu, kansi yina kele ya kubumbana na bantu yankaka. (1 Korinto 2:7) Ya kyeleka, mayele ya Nzambi kele ve na nsuka. Ata mpidina, kulonguka yo na mudindu kepesaka beto kyese mpenza! Beto tabakisaka ve ata fyoti banzila yonso ya Nzambi, kansi kana beto landa na kusosa “mambu ya mudindu ya Nzambi,” beto tavanda ntangu yonso ti kyese yina beto waka ntangu beto longukaka na mbala ya ntete malongi ya mfunu ya Biblia.

3. Sambu na nki beto fwete bakisa mbotembote bikuma ya lukwikilu na beto?

³ Sambu na nki beto fwete bakisa ‘mambu yina ya mudindu’? Kubakisa mambu ya beto kekwikilaka mpi sambu na nki beto kekwikilaka na yo, disongidila bikuma ya kesimbaka lukwikilu na beto, kekumisaka lukwikilu to kivuvu na beto ngolo. Masonuku kesonga beto na kusadila mayele na beto ya kuyindula sambu na ‘kuzaba mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve.’ (Roma 12:1, 2) Kubakisa sambu na nki Yehowa kelomba beto na kuzinga na mutindu mosi buna kekumisaka ngolo lukanu na beto ya kulemfukila yandi. Yo yina, nzayilu ya “mambu ya mudindu” lenda pesa beto ngolo ya kununga mpukumuna ya kusala mambu yina bansiku kebuyisaka mpi yo lenda pusa beto na kusala “mambu ya mbote.”​—Tito 2:14.

4. Kulonguka Biblia kelombaka inki?

⁴ Kubakisa mambu ya mudindu kelombaka nde beto longuka. Kansi, kulonguka ketendula ve kutanga kima mosi na zuluzulu. Yo kelombaka kutadila mambu ya beto ketanga na dikebi sambu na kumona mutindu yo kewakana ti yina beto kezabaka dezia. (2 Timoteo 1:13) Yo kelombaka kubakisa bikuma ya mambu yina beto ketanga. Kulonguka Biblia kelombaka kuyindulula mutindu beto lenda sadila mambu yina beto kelonguka sambu na kubaka badesizio ya mbote mpi kusadisa bankaka. Dyaka, sambu ‘bo sonikaka mambu yonso ya kele na Mukanda ya Nzambi na ngolo na yandi mpi yo kele mfunu,’ kulonguka na beto fwete tadila mpi “mambu yina yonso ya Nzambi ke tubaka.” (2 Timoteo 3:16, 17; Matayo 4:4) Kulonguka Biblia kelombaka kusala kikesa kibeni! Kansi, yo kepesaka mpi kyese. Yo kele ve mpasi mingi na kubakisa “mambu ya mudindu ya Nzambi.”

Yehowa Kesadisaka Bantu ya Kudikulumusa na Kubakisa

5. Nani lenda bakisa “mambu ya mudindu ya Nzambi”?

⁵ Ata nge vandaka ve mayele mingi na nzo-nkanda mpi nge kevandaka ve ti kikalulu ya kulonguka, nge fwete yindula ve nde nge lenda bakisa ve “mambu ya mudindu ya Nzambi.” Ntangu Yezu kuvandaka na ntoto, Yehowa kuzabisaka ve lukanu na yandi na bantu ya mayele mpi ya melongukaka mingi, kansi na bantu ya mfunu mingi ve mpi ya me longukaka mingi ve yina kuvandaka bantu ya kudikulumusa mpi ya kundimaka nde nsadi ya Nzambi kulonga bo. Kana beto fwanisa bo ti bantu yina kulongukaka mingi, bantu yai ya kudikulumusa kuvandaka bonso bana. (Matayo 11:25; Bisalu 4:13) Sambu na yina metala “mambu mpenza ya Nzambi me yidikilaka bantu yina ke zolaka yandi,” ntumwa Polo kusonikilaka bampangi na yandi Bakristu nde: “Nzambi zabisaka beto mayele na yandi na lusadisu ya mpeve-santu. [Mpeve kefimpaka mambu yonso, ata mambu ya mudindu ya Nzambi, NW].”​—1 Korinto 2:9, 10.

6. Mambu yina kele na 1 Korinto 2:10 ketendula inki?

⁶ Inki mutindu mpeve ya Nzambi kefimpaka “mambu yonso, ata mambu ya mudindu ya Nzambi”? Na kisika ya kupesa konso Mukristu mbona-meso, Yehowa kesadilaka mpeve na yandi sambu na kutwadisa organizasio na yandi. Mpeve yango kesadisaka bansadi ya Nzambi yina kele na bumosi na kubakisa Biblia. (Bisalu 20:28; Efezo 4:3-6) Na ntoto ya mvimba, mabundu yonso kevandaka ti programe ya mutindu mosi ya kulonguka Biblia. Na nsungi ya bamvula mingi, bo metadilaka malongi ya kuswaswana ya Biblia. Mpeve santu kesadisaka bantu na nzila ya dibundu na kuvanda ti nkadilu ya mefwana sambu na kubakisa “mambu ya mudindu ya Nzambi.”​—Bisalu 5:32.

“Mambu ya Mudindu ya Nzambi”

7. Sambu na nki bantu mingi kebakisaka ve “mambu ya mudindu ya Nzambi”?

⁷ Beto fwete yindula ve nde “mambu ya mudindu ya Nzambi” kele kaka mambu yina kevandaka mpasi na kubakisa. Kana bantu mingi kezaba ve “mambu ya mudindu ya Nzambi,” yo kele ve sambu yo ke mpasi mingi na kubakisa mayele ya Nzambi, kansi sambu Satana kekusaka bantu na kubuya lusadisu yina Yehowa kepesaka na nzila ya organizasio na yandi.​—2 Korinto 4:3, 4.

8. Inki mambu ya mudindu Polo vandaka kutubila na kapu ya tatu ya mukanda na yandi na Bakristu ya Efezo?

⁸ Kapu ya tatu ya mukanda ya Polo na Bakristu ya Efezo kemonisa nde bakyeleka mingi yina bantu ya Yehowa kebakisaka mbote kele na kati ya “mambu ya mudindu ya Nzambi.” Mu mbandu, ntendula ya Nkuna ya lusilu, kuponama ya bantu yina kele ti kivuvu ya kuzinga na zulu, mpi Kimfumu ya Mesia. Polo kusonikaka nde: “Na ntangu ya ntete, Nzambi vandaka kuzabisa bantu mambu yina ve, kansi ntangu yai yandi me zabisaka yo na bantumwa na yandi ti na baprofete na yandi, na lusadisu ya mpeve na yandi. Mambu yango yo yai: sambu na Yesu Kristo, bantu yina kele Bayuda ve bo ke bakaka mambote ya Nzambi kisika mosi ti Bayuda; bo kele ntangu yai nitu mosi ti Bayuda, ebuna mambu yina ya Nzambi tubaka nde yandi ta pesa bantu na yandi, bo ke bakaka yo mpi kisika mosi ti Bayuda.” Polo kutubaka nde Nzambi kupesaka yandi mukumba ya “kusonga bantu yonso mutindu yandi ta sala mambu yina ya yandi vandaka kubumba, katuka na luyantiku.”​—Efezo 3:5-9.

9. Sambu na nki kubakisa “mambu ya mudindu ya Nzambi” kele dibaku ya nene?

⁹ Polo landaka na kutendula nde luzolo ya Nzambi kele mpi nde “sambu na Dibundu, bawanzio yina ke na kiyeka ya kuyala ntangu yai na zulu, bo ke na mpila ya kuzaba mayele ya mutindu na mutindu ya Nzambi.” (Efezo 3:10) Bawanzyo kebakaka mambote ntangu bo ketalaka mpi kebakisaka mayele yina Yehowa kesadilaka sambu na kutwadisa dibundu ya Bukristu. Beto kele mpenza na dibaku ya nene ya kubakisa mambu yina bawanzyo ketudilaka dikebi. (1 Piere 1:10-12) Na nima, Polo ketuba nde beto, kumosi ti basantu yonso, fwete sala ngolo sambu na kubakisa na mabanza ‘bunene’ ya lukwikilu na beto. (Efezo 3:11, 18) Ntangu yai, bika beto tadila bambandu ya mambu ya mudindu yina mbala yankaka beto metadilaka ntete ve.

Bambandu ya Mambu ya Mudindu

10, 11. Na kuwakana ti Masonuku, inki ntangu Yezu kukumaka kitini ya ntete ya “nkuna” ya “nkento” ya kifwani ya Nzambi?

¹⁰ Beto kezaba nde Yezu kele kitini ya ntete ya “nkuna” ya “nkento” ya kifwani ya Nzambi yina bo ketubila na Kuyantika 3:15 (NW). Sambu na kuyedisa nzayilu na beto, beto lenda kudiyula nde: ‘Inki ntangu Yezu kumaka Nkuna ya lusilu? Keti yo vandaka na ntwala nde yandi kwisa na ntoto? Na ntangu yandi butukaka bonso muntu? Na ntangu yandi bakaka mbotika, to na ntangu yandi futumukaka?’

¹¹ Nzambi kusilaka nde kitini ya zulu ya organizasio na yandi yina mbikudulu kebingaka nde “nkento” na yandi tabuta nkuna yina tatatika nyoka na ntu. Kansi, bamvula mingi kulutaka, nkento ya Nzambi kubutaka ve nkuna yina kufwanaka sambu na kufwa Satana ti bisalu na yandi. Yo yina, mbikudulu ya Yezaya kubingaka nkento yango nde “mukobo” yina kele na “mawa.” (Yezaya 54:1, 5, 6) Nsukansuka, Yezu kubutukaka na Betelemi. Kansi, yo vandaka kaka na nima ya mbotika na yandi, ntangu yandi pakulamaka na mpeve sambu na kukuma mwana ya kimpeve ya Nzambi, ya Yehowa kutubaka nde: “Yai kele Mwana na mono.” (Matayo 3:17; Yoane 3:3) Na ntangu yina, kitini ya ntete ya “nkuna” ya nkento kumonanaka. Na nima, balongoki ya Yezu mpi kupakulamaka na mpeve santu. Nsukansuka, “nkento” ya Yehowa, yina kudiwaka na nsungi ya bamvula mingi bonso nkento yina ‘kebutaka bana ve,’ lendaka ‘kuyimba na kiese.’​—Yezaya 54:1; Galatia 3:29.

12, 13. Inki baverse kemonisa nde Bakristu yonso ya kupakulama yina kezinga na ntoto kesala kimvuka ya “mpika ya kwikama ti ya mayele”?

¹² Mbandu ya zole ya mambu ya mudindu yina Nzambi mezabisaka beto bantu ketadila lukanu ya Nzambi ya kupona bantu 144 000 na ntoto. (Kusonga 14:1, 4) Beto kendimaka dilongi ya ketubaka nde bapakulami yonso yina kezinga na konso ntangu yina kesala kimvuka ya “mpika ya kwikama ti ya mayele” yina Yezu kutubaka nde yandi tapesaka “madia” na ntangu ya mbote na bantu ya kisalu ya nzo na yandi. (Matayo 24:45, NW) Inki baverse ya Biblia kemonisa nde ntendula yai kele ya mbote? Keti Yezu vandaka kutuba nde Bakristu yonso tapesaka bampangi na yandi madya ya kimpeve?

¹³ Nzambi kusongaka dikanda ya Izraele nde: “Beno kele bambangi na mono, . . . ee, nsadi na mono ya mono meponaka.” (Yezaya 43:10, NW) Kansi, na Nisani 11 ya mvu 33 T.B., Yezu kutubilaka bamfumu ya Izraele nde Nzambi kubuyaka dikanda na bo na kuvanda nsadi na Yandi. Yandi tubaka nde: “Nzambi ta katula beno Kimfumu na yandi, ebuna yandi ta pesa yo na [dikanda, NW] yina ta salaka bisalu ya Kimfumu.” Yezu kutubaka na bantu nde: “Ntangu yai, bwala na beno ta bika yo mosi kaka.” (Matayo 21:43; 23:38) Dikanda ya Izraele yina kuvandaka mpika ya Yehowa kuvandaka dyaka ve ya kwikama mpi mayele. (Yezaya 29:13, 14) Kaka kilumbu yina, Yezu kuyulaka nde: “Nani kele mpenza mpika ya kwikama mpi ya mayele?” Na kutuba ya mbote, yandi vandaka kuyula nde, ‘Inki dikanda ya mayele yina tayinga Izraele sambu na kuvanda mpika ya kwikama ya Nzambi?’ Ntumwa Piere kupesaka mvutu ntangu yandi tubilaka Bakristu ya kupakulama nde: “Beno kele . . . ‘dikanda ya santu, bantu ya fwete vanda dikabu ya kuswaswana.’” (1 Piere 1:4; 2:9, NW) Dikanda yina ya kimpeve, “Israele ya Nzambi,” kukumaka mpika ya Yehowa. (Galatia 6:16) Kaka mutindu bantu ya Izraele yonso ya ntama kuvandaka “nsadi” mosi, Bakristu yonso ya kupakulama yina kezinga na ntoto na konso ntangu yina kele “mpika ya kwikama ti ya mayele.” Beto kele na dibaku ya nene kibeni ya kubaka “madia” na nzila ya mpika yina ya Nzambi!

Kulonguka Biblia Lenda Pesa Nge Kyese

14. Sambu na nki kulonguka Biblia kepesaka kyese mingi kuluta kutanga na zuluzulu?

¹⁴ Ntangu beto kebakaka ntendula mosi ya mpa ya Masonuku, beto kevandaka na kyese mpenza na mutindu yo kekumisaka lukwikilu na beto ngolo. Na kisika ya kutanga na zuluzulu, kulonguka Biblia lenda pesa kyese kibeni. Yo yina, na ntangu nge ketanga mikanda ya ketendulaka Biblia, kudiyula nde: ‘Inki luswaswanu kele na kati ya ntendula ya bo mepesa awa ti yina ya bo mepesaka dezia na dyambu yai? Inki baverse to bangindu yankaka ya mu lenda yindula yina lenda sadisa munu na kusimba bangindu ya bo metula awa?’ Kana yo kelomba nde nge sala bansosa yankaka, sonika ngyufula yina ya nge tazola kubaka mvutu na yo, mpi tadila yo ntangu nge talonguka na mbala kekwisa.

15. Inki mambu ya kulonguka lenda pesa nge kyese, mpi nki mutindu yo lenda natila nge mambote yina tazinga mingi?

¹⁵ Inki mambu ya kulonguka lenda pesa nge kyese ya kusala bansosa? Kusosa kutadila na mudindu mambu bonso bangwakana ya kuswaswana yina Nzambi mesalaka sambu na mambote ya bantu tasadisa nge na kubakisa mambu mingi. Nge lenda kumisa lukwikilu na nge ngolo kana nge kelonguka bambikudulu ya ketadila Yezu Kristu, to ketadila baverse yonso ya mukanda mosi ya Biblia yina kele ti bambikudulu. Kutadila disolo ya Bambangi ya Yehowa ya bubu yai na mukanda Les Témoins de Jéhovah : Prédicateurs du Royaume de Dieu, kana beno kele ti mukanda yai na ndinga na beno, kekumisaka mpi lukwikilu ngolo.a Mpi ntembe kele ve nde kuvutukila “Bangyufula ya Batangi” yina kebasikaka na Nzozulu ya Nkengi lenda sadisa nge na kubakisa ntendula ya baverse yankaka. Tala mutindu bo keyidikaka bangindu sambu na kutendula Masonuku. Yo tasadisa nge na kutomisa mayele na nge ya “kuswasisa mambu” mpi ya kuyedisa luswasukusu. (Baebreo 5:14) Na ntangu nge kelonguka, sonikaka mambu ya mfunu na kati ya Biblia na nge to na papie na mpila nde mambu ya nge melonguka kunatila nge, ti bantu yina nge lenda sadisa, mambote yina tazinga mingi.

Sadisa Baleke na Kusepela na Kulonguka ya Biblia

16. Inki mutindu beno lenda sadisa baleke na kusepela na kulonguka ya Biblia?

¹⁶ Bibuti lenda sala mingi sambu na kupesa bana na bo mpusa ya madya ya kimpeve. Kumona ve mpamba mayele yina bana kevandaka na yo ya kubakisa mambu ya mudindu. Kana beno lomba bana na kusala bansosa na disolo mosi buna ya beno tatadila na kulonguka ya dibuta, beno lenda yula bo bangyufula na mambu ya bo longukaka. Kulonguka na dibuta lenda lomba mpi kusala bansonga sambu na kusadisa bana na kuzaba mutindu ya kuzabisa bankaka mambu ya bo kekwikilaka mpi sambu bo kuka na kumonisa nde mambu ya bibuti kelongaka bo kele kyeleka. Dyaka, beno lenda sadila kamukanda ‘ Voyez le bon pays ‘b sambu na kulonga bana bisika mpi bansi yina Biblia ketubilaka, mpi sambu na kumonisa bana bisika yina baverse ya beno ketanga na lutangu ya Biblia ya konso mposo ketubila.

17. Sambu na nki beto fwete vanda na bukatikati na mambu ya kutadila na kulonguka na beto ya Biblia?

¹⁷ Mambu ya kutadila na kulonguka na nge ya Biblia lenda sepedisa nge mpi kukumisa lukwikilu na nge ngolo, kansi keba sambu na kubika ve nde bansosa yankaka ya nge kesala kubaka ntangu ya nge metula sambu na kuyidika balukutakanu. Balukutakanu kele mutindu yankaka ya Yehowa kelongaka beto na nzila ya “mpika ya kwikama mpi ya mayele.” Kansi, kusala bansosa lenda sadisa nge na kupesa bakomantere ya mbote, mu mbandu na Kulonguka ya Mukanda ya Dibundu to na bantendula ya mfunu ya lutangu ya Biblia ya mposo na mposo sambu na Nzo-Nkanda ya Kisalu ya Teokrasi.

18. Sambu na nki kusala bikesa na kulonguka “mambu ya mudindu ya Nzambi” kele mfunu?

¹⁸ Kulonguka Ndinga ya Nzambi na mudindu lenda sadisa nge na kupusana penepene na Yehowa. Sambu na kumonisa mfunu ya kulonguka ya mutindu yina, Biblia ketuba nde: “Mayele ketaninaka mutindu mbongo ketaninaka, kansi mbote ya nzayilu kele nde mayele ketaninaka bankwa na yo na luzingu.” (Longi 7:12, NW) Yo yina, kusala bikesa sambu na kubakisa mbote mambu ya kimpeve kele mfunu. Sambu na muntu yina kelanda na kufimpa Ndinga ya Nzambi, Biblia kesila nde: “Nge ta zaba . . . Nzambi.”​—Bingana 2:4, 5.

[Banoti na nsi ya lutiti]

Keti Nge Lenda Tendula?

• Tanga “mambu ya mudindu ya Nzambi.”

• Sambu na nki beto fwete landa na kulonguka mambu ya mudindu?

• Sambu na nki Bakristu yonso lenda baka kyese na kubakisa “mambu ya mudindu ya Nzambi”?

• Inki mutindu “mambu ya mudindu ya Nzambi” lenda natila nge mambote mingi?

[Kifwanisu ya kele na lutiti 28]

Inki ntangu Yezu kukumaka Nkuna ya lusilu?

[Kifwanisu ya kele na lutiti 31]

Bibuti lenda lomba bana na bo na kusala bansosa na disolo mosi ya bo tatadila na kulonguka ya dibuta