Kubika Fyoti Kimfumu ya Nzambi Tagulusa Bantu

“Kimfumu na nge kwisa, luzolo na nge kusalama awa na ntoto bonso na zulu.”​—MAT. 6:10.

1. Inki kuvandaka malongi ya mfunu ya Yezu?

NTANGU Yezu Kristu kusalaka Disolo na yandi na Zulu ya Ngumba, yandi tubilaka mpi kisambu ya mbandu yina kuvukisaka malongi na yandi ya mfunu. Yandi longaka balongoki na yandi na kusamba Nzambi nde: “Kimfumu na nge kwisa, luzolo na nge kusalama awa na ntoto bonso na zulu.” (Mat. 6:9-13) Yandi “kwendaka kutambula na babwala ya nene ti na babwala ya fioti. Yandi vandaka kulonga nsangu ya mbote ya Kimfumu ya Nzambi.” (Luka 8:1) Kristu kulongisilaka balongoki na yandi nde: ‘Beno landa kaka na kusosa ntete Kimfumu ya Nzambi ti mambu yina ya yandi ke zolaka.’ (Mat. 6:33) Na ntangu nge kelonguka disolo yai, sosa mitindu ya kusadila malongi yango na kisalu na nge ya kusamuna. Mu mbandu, tadila mutindu nge lenda pesa mvutu na bangyufula yai: Inki kele mfunu ya nsangu ya Kimfumu? Bantu ke na mfunu nde bo gulusa bo na nki? Mpi nki mutindu Kimfumu ya Nzambi tagulusa bantu?

2. Inki kele mfunu ya nsangu ya Kimfumu?

² Yezu kutubaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Mat. 24:14) Nsangu ya mbote ya metala Kimfumu ya Nzambi kele mfunu mingi kibeni. Yo kele mpenza nsangu ya kuluta mfunu na nsi-ntoto ya mvimba! Na mabundu kuluta 100 000 ya Bambangi ya Yehowa na ntoto ya mvimba, bansadi ya Nzambi kiteso ya bamilio nsambwadi kesala kisalu yai ya kusamuna na kiteso yina mesalamaka ntete ve, disongidila kuzabisa bankaka nde Kimfumu meyantikaka kuyala. Kutulama ya Kimfumu yango kele nsangu ya mbote sambu yo ketendula nde Nzambi metula guvernema mosi na zulu yina tatwadisa mambu yonso ya ntoto. Na nsi ya luyalu ya Kimfumu yango, luzolo ya Nzambi tasalama na ntoto bonso na zulu.

3, 4. Inki mambu tasalama ntangu luzolo ya Nzambi tasalama na ntoto?

³ Inki takumina bantu ntangu luzolo ya Nzambi tasalama na ntoto? Yehowa “ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.” (Kus. 21:4) Bantu tabelaka ve mpi tafwaka ve sambu na masumu ti kukonda kukuka yina beto mebakaka na Adami. Bantu ya mefwaka yina kele na mabanza ya Nzambi tazwa dibaku ya kuzinga mvula na mvula, sambu Biblia kesila nde: “Bantu ya mbote ti bantu ya [kukonda lunungu, NW] ta telama na lufwa.” (Bis. 24:15) Bitumba, maladi, to nzala tavanda dyaka ve, mpi ntoto takituka paladisu. Ata bambisi yina kele ya makasi ntangu yai tavanda na ngemba ti bantu mpi bo na bo.​—Nk. 46:10; 72:16; Yez. 11:6-9; 33:24; Luka 23:43.

⁴ Ntangu beto ketadila balusakumunu yai ya kitoko yina luyalu ya Kimfumu tanata, mpila ya kuyituka kele ve na kumona nde mbikudulu mosi ya Biblia kesadila bangogo yai ya kepesa kikesa sambu na kutubila luzingu na ntangu yina: “Bantu yina ke kudikulumusaka, bo ta zinga mbote na ngemba mpenza na ntoto.” Kansi, nki takumina bantu yina kesalaka mubulu? Masonuku ketuba nde: “Kubika fioti kaka bantu ya mbi ta vila.” Kansi, “bantu yina ke tulaka ntima na Mfumu Nzambi bo ta zinga na ngemba na ntoto.”​—Nk. 37:9-11.

5. Inki takumina ngidika ya bima ya ntangu yai?

⁵ Sambu mambu yai yonso kusalama, ngidika ya bima ya ntangu yai ti baluyalu, mabundu, mpi mumbungu na yo fwete katuka. Yo yina mpenza dyambu guvernema ya zulu tasala. Nzambi kupesaka profete Daniele mpeve sambu na kubikula nde: “Ntangu ya bantotila yina [ya bubu yai] ta yala, Nzambi ya zulu ta tula ntotila mosi [na zulu] yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.” (Dan. 2:44) Ebuna, Kimfumu ya Nzambi yina kele guvernema ya mpa na zulu tayala ngidika ya mpa ya bantu na ntoto. ‘Zulu ya mpa ti ntoto ya mpa’ tavanda kisika yina “bantu yonso ta lemfuka kaka na Nzambi konso ntangu.”​—2 Pie. 3:13.

Bantu Ke na Mfunu ya Ngolo ya Luguluku Ntangu Yai

6. Inki mutindu Biblia ketendula mambi ya nsi-ntoto yai ya nku?

⁶ Ntangu Satana, Adami, ti Eva kukolamaka na Nzambi na mutindu bo zolaka kupona bo mosi mambu ya mbote mpi ya mbi, bampasi kuyantikaka na luzingu ya dibuta ya bantu. Na ntwala ya Mvula ya Ngolo yina kunokaka na ntoto ya mvimba, bamvula kuluta 1 600 na nima, “bantu vandaka kusala mambu ya mbi mingi, ntangu yonso bo vandaka kaka na bangindu ya mbi mpenza na ntima na bo.” (Kuy. 6:5) Kiteso ya bamvula 1 300 na nima, Salomo kumonaka nde mambu kuvandaka mbi mpenza, na mpila nde yandi sonikaka: ‘Mono tubaka nde bantu yina me fwaka ke mbote kuluta bantu yina ke na moyo. Nkutu bantu yina me butukaka ntete ve, me monaka mpi ntete ve mbi ya ntoto yai, bo bantu me luta bantu yina yonso zole na mbote.’ (Lo. 4:2, 3) Kiteso ya bamvula 3 000 dyaka na nima, disongidila na ntangu na beto, mambi kelanda kaka na kukuma mingi.

7. Sambu na nki bantu ke na mfunu ya ngolo ya luguluku ya Nzambi ntangu yai?

⁷ Ata yo kele kyeleka nde mambi kuyantikaka ntama, bantu ke na mfunu ya ngolo ya luguluku ya Kimfumu ya Nzambi ntangu yai kuluta bantangu yonso yankaka. Mambu yina kusalamaka na bamvula 100 ya meluta kuvandaka mbi mpenza kuluta yina mesalamaka dezia, mpi yo kelanda kaka na kubeba. Mu mbandu, rapore mosi ketuba nde: “Ntalu ya bantu yina kufwaka na mvita na mvu-nkama [ya 20] meluta mbala tatu ntalu ya bantu yina kufwaka na bamvita yonso yina kusalamaka banda na mvu-nkama ya ntete ya Ntangu na Beto tii na 1899.” Banda na mvu 1914, bantu kuluta bamilio 100 mefwaka na bamvita. Ansiklopedi mosi ketuba nde na mvita ya zole ya nsi-ntoto ya mvimba, ziku bantu kuluta bamilio 60 kufwaka. Sambu makanda yankaka kele ntangu yai ti minduki ya nikleyere, bo lenda fwa kitini ya nene ya nsi-ntoto. Mpi ata siansi ti kimunganga keyela mpenza, konso mvula bana kiteso ya bamilio tanu kelanda na kufwa na nzala.​—Tala kapu 9 ya mukanda Inki Biblia Kelongaka Mpenza?

8. Luyalu ya bamvula mingi ya bantu memonisaka mpenza inki?

⁸ Bikesa yina bantu kesalaka sambu na kumanisa mambi kenunga ve. Bimvuka ya politiki, ya mumbungu mpi ya mabundu ya nsi-ntoto yai menungaka ve ata fyoti na kulungisa bampusa ya mfunu yina bantu kevandaka na yo ya kuvanda na ngemba, kuzinga mbote mpi kuvanda ti mavimpi ya mbote. Na kisika ya kumanisa makambu ya nene yina bantu kekutana na yo ntangu yai, bimvuka yai keyika bampasi yango. Ya kyeleka, luyalu ya bamvula mingi ya bantu memonisaka bukyeleka ya bangogo yai: “Ke na muntu ve lenda songa nzila na makulu na yandi ntangu yandi ke tambula.” (Yer. 10:23) Ee, “bantu ya nkaka kele bamfumu ebuna bankaka ke mona mpasi na maboko na bo.” (Lo. 8:9) Dyaka, “bima yonso ya Nzambi salaka ke dila ngolo, yo ke mona mpasi bonso nkento yina ke zola kubuta.”​—Roma 8:22.

9. Inki mambu Bakristu ya kyeleka kevingila na kumona na ‘bilumbu yai ya nsuka’?

⁹ Sambu na yina metala ntangu na beto, Biblia kutubaka nde: “Na bilumbu ya nsuka ta vanda mpasi mingi.” Na nima ya kutendula mambu yina tasalama na bilumbu ya nsuka na nsi ya luyalu ya bantu, mbikudulu yango ketuba nde: “Bantu ya mbi ti bantu ya luvunu, mbi na bo ta kwisa mingi.” (Tanga 2 Timoteo 3:1-5, 13.) Yai kele mambu yina Bakristu kevingila kumona, sambu “nsi-ntoto kele na maboko ya muntu ya mbi,” Satana. (1 Yoa. 5:19) Kansi, nsangu ya mbote kele nde kubika fyoti Nzambi tagulusa bantu yina kezolaka yandi. Yandi tagulusa bo na nsi ntoto yai ya kelanda kaka na kubeba.

Nto ya Luguluku Mosi Kaka ya Kutudila Ntima

10. Sambu na nki Yehowa kele Nto ya luguluku mosi kaka ya kutudila ntima?

¹⁰ Ntangu nge kesamuna nsangu ya mbote, tendudila bawi na nge nde Yehowa kele Nto ya luguluku mosi kaka ya kutudila ntima. Yandi mosi mpamba kele ti ngolo mpi luzolo ya kugulusa bansadi na yandi na mambu yonso ya mbi. (Bis. 4:24, 31; Kus. 4:11) Beto lenda tula mpenza kivuvu nde ntangu yonso Yehowa tagulusa bantu na yandi mpi talungisa balukanu na yandi, sambu yandi silaka nde: “Ya kieleka, yo ta vanda kaka mutindu mono me yindulaka . . . , yo ta bwa kaka.” Ndinga na yandi ta “vutuka ve mpamba na [yandi] kana yo me sala ve ntete luzolo na [yandi].”​—Tanga Yezaya 14:24, 25; 55:10, 11.

11, 12. Inki lusilu Nzambi mepesaka na bansadi na yandi?

¹¹ Yehowa mesilaka nde yandi tagulusa bansadi na yandi ntangu yandi tapesa bantu ya mbi ndola. Ntangu yandi tindaka profete Yeremia na kutuba ti kikesa yonso na bantu yina vandaka kusala masumu ya nene, Nzambi kutubaka nde: “Kutina bo boma ve.” Sambu na nki? “Sambu mono ta vanda na nge, mono ta keba nge.” (Yer. 1:8) Mutindu mosi, ntangu fyoti na ntwala nde Yehowa kufwa bantu ya mbi ya Sodome ti Gomore, yandi tindaka bawanzyo zole sambu na kubasisa Loti ti dibuta na yandi mpi kunata bo na kisika ya mbote. “Ebuna Mfumu Nzambi bwisaka tiya ya ngolo na zulu ya babwala Sodome ti Gomore.”​—Kuy. 19:15, 24, 25.

¹² Ata bantu yina kesala luzolo na yandi kele na nsi-ntoto ya mvimba, Yehowa lenda gulusa bo. Ntangu yandi fwaka nsi-ntoto ya mbi ya ntama na Mvula ya Ngolo, yandi “gulusaka kaka Noa yina vandaka kulonga malongi ya Nzambi, ti bantu ya nkaka nsambwadi.” (2 Pie. 2:5) Yehowa tagulusa dyaka bantu ya mbote ntangu yandi tafwa nsi-ntoto yai ya mbi. Ndinga na yandi ketuba nde: “Beno bantu yina ke tulaka ntima na Mfumu Nzambi, . . . beno kwisa na yandi. Beno sala mambu yina kele mbote, beno kudikulumusa; mbala ya nkaka beno ta baka ndola ve kilumbu Mfumu Nzambi ta songa makasi na yandi.” (Sof. 2:3) Na nima, ntangu Yehowa tafwa nsi-ntoto ya mvimba, “bantu ya mbote ti ya kieleka ta zinga na ntoto na beto yai; kansi bantu yonso ya mbi, Nzambi ta katula bo na ntoto.”​—Bing. 2:21, 22.

13. Inki mutindu Yehowa tagulusa bansadi na yandi yina mefwaka?

¹³ Kansi, bansadi mingi ya Nzambi mefwaka dezia sambu na maladi, minyokudi, mpi bikuma yankaka. (Mat. 24:9) Ebuna, nki mutindu bantu yai yonso taguluka? Mutindu beto tubilaka yo na ntwala, “bantu ya mbote ti bantu ya [kukonda lunungu, NW] ta telama na lufwa.” (Bis. 24:15) Yo kepesa kikesa mpenza na kuzaba nde ata kima mosi ve lenda kanga Yehowa nzila na kugulusa bansadi na yandi!

Guvernema Mosi ya Lunungu

14. Sambu na nki beto ketula ntima nde Kimfumu ya Nzambi kele ya lunungu?

¹⁴ Na kisalu na nge ya kusamuna, nge lenda tendudila bawi na nge nde Kimfumu ya Yehowa yina kele na zulu kele ya lunungu. Yo kele mutindu yina sambu yo kemonisa bikalulu ya kitoko ya Nzambi, bonso lunungu mpi zola. (Kul. 32:4; 1 Yoa. 4:8) Nzambi mepesaka Kimfumu yango na maboko ya Yezu Kristu, yina mefwana mpenza na kuyala ntoto. Yehowa mebakaka mpi lukanu ya kubaka Bakristu ya kupakulama 144 000 na ntoto mpi kunata bo na zulu sambu na kuyala ti Kristu mpi kutwadisa mambu na ntoto.​—Kus. 14:1-5.

15. Monisa luswaswanu yina kele na kati ya luyalu ya Kimfumu ya Nzambi ti ya bantu.

¹⁵ Luyalu ya Yezu ti bantu 144 000 taswaswana mpenza ti luyalu ya bantu ya kukonda kukuka! Mbala mingi, bamfumu ya ngidika yai ya bima kevandaka nku mpi kepusaka bantu na bo na bamvita yina kefwaka bamilio ya bantu. Mpila ya kuyituka kele ve na kumona nde Masonuku kelongisila beto na kutula ve ntima na bantu yina “lenda gulusa . . . ve.” (Nk. 146:3) Kansi, Kristu tayala mpenza na zola yonso! Yandi tubaka nde: “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno ntangu ya kupema. Beno baka kilo na mono, beno nata yo; beno vanda balonguki na mono, sambu mono kele muntu ya pima, mono kele muntu ya ntima ya mbote; ebuna beno ta zaba kupema. Kilo yina ya mono ta pesa beno yo kele mpasi ve na kunata yo, sambu yo kele kilo mingi ve.”​—Mat. 11:28-30.

Kubika Fyoti Bilumbu ya Nsuka Kusuka!

16. Inki mutindu bilumbu yai ya nsuka tasuka?

¹⁶ Nsi-ntoto yai mekuma na bilumbu ya nsuka, to “na nsuka” ya ngidika ya bima, banda na mvu 1914. (Mat. 24:3) Ntangu yai, kubika fyoti mpenza, mpasi yina Yezu kubingaka nde ‘mpasi ya nene’ tabwa. (Tanga Matayo 24:21.) Mpasi yina ya mebwaka ntete ve tatula nsuka na nsi-ntoto ya mvimba ya Satana. Kansi, nki mutindu mpasi ya nene tayantika? Nki mutindu yo tasuka?

17. Biblia kemonisa nde nki tasalama ntangu mpasi ya nene tayantika?

¹⁷ Mpasi ya nene tayantika na kintulumukina. Ya kyeleka, “kilumbu” ya Yehowa takwisa na kintulumukina, ntangu ‘bantu tatuba nde: “Beto ke na ngemba, mambu yonso kele mbote.”’ (Tanga 1 Tesalonika 5:2, 3.) Mpasi yango tayantika ntangu makanda tayindula nde bo kele penepene ya kuyidika makambu na bo ya nene. Lufwa ya kintulumukina ya ‘Babilone ya Nene,’ kintinu ya mabundu ya luvunu ya nsi-ntoto ya mvimba, tayitukisa bantu ya nsi-ntoto. Bamfumu mpi bantu yankaka tayituka ntangu Babilone ya Nene tabaka ndola.​—Kus. 17:1-6, 18; 18:9, 10, 15, 16, 19.

18. Inki Yehowa tasala ntangu Satana tanwanisa bansadi na Yandi?

¹⁸ Na ntangu mosi ya mfunu, “bidimbu ta monika na ntangu, na ngonda ti na bambwetete,” mpi “kidimbu yina ke songa nde Mwana-muntu me kwisa yo ta monika na zulu.” Ebuna, beto lenda ‘nangula ntu na beto, sambu ntangu ya Nzambi ta gulusa beto ta vanda me kuma penepene.’ (Luka 21:25-28; Mat. 24:29, 30) Na nima, Satana to Gogi, tanwanisa bantu ya Nzambi. Kansi, Yehowa ketuba mutindu yai sambu na bantu yina tanwanisa bansadi na yandi: “Konso muntu yina kesimba beno, yandi ketula musapi na disu na mono.” (Zak. 2:8, NW) Yo yina, bikesa yina Satana tasala sambu na kufwa bo tanunga ve. Sambu na nki? Sambu Yehowa Nkwa Kimfumu tasala mambu kukonda kusukinina sambu na kugulusa bansadi na yandi.​—Ezek. 38:9, 18.

19. Sambu na nki beto lenda tula ntima nde bawanzyo yina kelungisaka bandola ya Nzambi tafwa ngidika ya Satana?

¹⁹ Ntangu Nzambi tabaka mambu ya makanda na maboko, ‘bo ta zaba nde yandi kele Mfumu Nzambi.’ (Ezek. 36:23) Yandi tatinda bawanzyo na yandi yina kelungisaka bandola na yandi, disongidila bigangwa ya kimpeve mingi kibeni yina Yezu Kristu tatwadisa, sambu na kufwa kitini ya ngidika ya Satana yina tabikala. (Kus. 19:11-19) Kana beto yibuka nde, wanzyo mosi kaka kufwaka bambeni ya Nzambi “mile nkama mosi makumi nana na tanu” na mpimpa mosi mpamba, beto lenda tula ntima nde bawanzyo mingi tafwa kukonda mpasi konso kitini ya ngidika ya Satana ntangu mpasi ya nene tasuka na Armagedoni. (2 Bant. 19:35; Kus. 16:14, 16) Bo talosa Satana ti bademo na yandi na dibulu ya nda sambu na bamvula funda. Nsukansuka, bo tafwa bo.​—Kus. 20:1-3.

20. Inki Yehowa talungisa na nzila ya Kimfumu?

²⁰ Na ntangu yina, mambi tavanda dyaka ve na ntoto, mpi bantu ya lunungu tazinga kimakulu na ntoto yai. Yehowa tamonisa mpenza nde yandi kele Ngulusi ya Nene. (Nk. 145:20) Na nzila ya Kimfumu, yandi tanwanina nswa na yandi ya kuyala, tasantisa zina na yandi ya santu, mpi talungisa lukanu na yandi ya nene sambu na ntoto. Bika nde kisalu na nge ya kusamuna kunatila nge kyese mingi na ntangu nge kezabisa bantu nsangu yai ya mbote mpi kesadisa bayina kele ya kuyilama “sambu na kuvanda na moyo ya mvula na mvula” na kubakisa nde kubika fyoti Kimfumu ya Nzambi tagulusa bantu!​—Bis. 13:48.

Keti Nge Keyibuka?

• Inki mutindu Yezu kumonisaka mfunu ya Kimfumu?

• Sambu na nki bantu ke na mfunu ya ngolo ya luguluku ntangu yai kuluta bantangu yonso?

• Inki mambu beto lenda vingila kumona na nsungi ya mpasi ya nene?

• Inki mutindu Yehowa kemonisa nde yandi kele Ngulusi ya Nene?

[Bifwanisu ya kele na lutiti 16]

Ndinga ya Nzambi kutubilaka kisalu ya kusamuna ya mesalamaka ntete ve na nsi-ntoto ya mvimba, yina tasalama na ntangu na beto

[Kifwanisu ya kele na lutiti 18]

Mutindu Yehowa kugulusaka Noa ti dibuta na yandi, Yandi lenda gulusa beto

[Kifwanisu ya kele na lutiti 20]

Yehowa “ta kusula mansanga yonso na meso . . . , lufwa tavandaka diaka ve.”​—Kus. 21:4