BAMVUTU NA BANGIUFULA YA BIBLIA
Luzingu ya bantu ta vanda nki mutindu na bilumbu ke kwisa?
Inki mutindu lufwa ya Yezu me pesaka nzila na kimvuka mosi ya bantu yina ta kudibanzaka sambu na bantu ya nkaka?
Ntembe kele ve nde bantu ta landa kaka na kukwenda na ntwala na mambu ya siansi. Keti bo lenda sala kimvuka mosi ya bantu yina ta kudibanzaka sambu na bantu ya nkaka? Ve. Bubu yai, lukasi mpi bwimi me fuluka na nsi-ntoto. Kansi, Nzambi ke kana kusala mambu ya mbote sambu na bantu.—Tanga 2 Piere 3:13.
Ndinga ya Nzambi ke tuba nde na bilumbu ke kwisa, kimvuka mosi ya bantu na ntoto ya mvimba ta zolanaka bo na bo. Bantu ta zinga na lutaninu mpi muntu mosi ve ta sala bo mbi.—Tanga Mika 4:3, 4.
Inki mutindu Nzambi ta katula bwimi?
Na luyantiku, Nzambi gangaka ve muntu ti kikalulu ya bwimi. Kansi, ntangu muntu ya ntete buyaka kulemfukila Nzambi, yandi vidisaka luzingu ya kukuka. Beto bakaka kikalulu ya bwimi na muntu yina. Kansi, Nzambi ta sadila Yezu sambu bantu kuvutuka diaka bantu ya kukuka.—Tanga Baroma 7:21, 24, 25.
Nzambi zolaka nde Yezu kutambika luzingu na yandi sambu na kukatula bantu na bupusi ya mbi ya disumu ya muntu ya ntete. (Baroma 5:19) Yezu me pesaka bantu kivuvu ya kuzinga mbote na bilumbu ke kwisa sambu yandi ta katula kikalulu ya bwimi yina ke pusaka bantu na kusala mambu ya mbi.—Tanga Nkunga 37:9-11.