BAMVUTU NA BANGIUFULA YA BIBLIA

Kikalulu ya kusala mambu ya mbi katukaka na wapi?

Ya kieleka, bantu ke zolaka kuzinga na ngemba, kuvanda masonga mpi kusala mambu ya mbote. Kansi, sambu na nki beto ke monaka mbala mingi mambu ya mubulu, ya kukonda lunungu mpi ya nku? Bubu yai, bansangu ya ke pesa bantu mpasi kele mingi. Keti kele ti muntu ya ke pusaka bantu na kusala mambu ya mbi?​—Tanga 1 Yoane 5:19.

Keti Nzambi gangaka bantu ti kikalulu ya kusala mambu ya mbi? Ve. Yehowa Nzambi gangaka bantu na kifwani na yandi. Yandi gangaka bo ti kikalulu ya kulanda mbandu ya zola na yandi. (Kuyantika 1:27; Yobi 34:10) Nzambi me pesaka mpi bantu kimpwanza ya kupona. Ntangu bibuti na beto ya ntete ponaka kusala mambu ya mbi, bo buyaka kulanda mbandu ya Nzambi mpi bo kumaka bantu ya kukonda kukuka. Beto me bakaka kikalulu ya kusala masumu na bo.​—Tanga Kulonga 32:4, 5.

Keti kikalulu ya kusala mambu ya mbi ta suka?

Nzambi ke zolaka nde beto telamina bikalulu yina ke pusaka beto na kusala mambu ya mbi. (Bingana 27:11) Yo yina, yandi ke longaka beto mutindu ya kubuya kusala mambu ya mbi mpi mutindu ya kuzwa kiese ya kieleka. Ata yandi ke salaka mutindu yai, beto lenda landa ve mbandu ya zola na yandi na mutindu ya kukuka bubu yai.​—Tanga Nkunga 32:8.

Ata bubu yai mambu ya mbi kele mingi, Nzambi ke pesaka nzila nde yo salama na mwa ntangu fioti sambu bantu yonso kumona malanda na yo. (2 Piere 3:7-9) Ntama mingi ve, ntoto ta fuluka ti bantu ya ke zinga na kiese mpi ya ke lemfukila Nzambi.​—Tanga Nkunga 37:9-11.