Keti Nge Lenda Kota na “Kyelo Mosi ya Nene Yina Kenataka na Kisalu”?
1. Inki “kyelo mosi ya nene yina kenataka na kisalu” bo mekangudilaka beto?
1 Ntangu bo kangudilaka ntumwa Polo “kyelo mosi ya nene yina kenataka na kisalu,” (NW) yandi sadilaka dibaku yina na kyese yonso sambu na kupesa maboko na mambote ya Kimfumu sambu yo kwenda na ntwala, ata yandi vandaka ti bambeni mingi. (1 Kor. 16:9) Bubu yai, na ntoto ya mvimba, bansamuni ya Kimfumu kiteso ya 642000 mekotaka na kyelo mosi ya nene yina kenataka na kisalu na kukumaka bapasudi-nzila ya ntangu yonso.
2. Sambu na nki yo kele mbote na kutadilaka luzingu na beto mbala na mbala?
2 Luzingu Kesobaka: Ata luzingu na beto ya ntangu yai lenda pesa beto ve nzila ya kusala mingi, yo kesobaka. Yo yina, yo kele mbote nde beto tadilaka mbala na mbala luzingu na beto, kansi beto fwete kinga kaka ve ntangu ya kuluta mbote. (Lo. 11:4) Keti nge kele leke yina kezola kumanisa nzo-nkanda ntama mingi ve? Keti nge kele kibuti yina ntama mingi ve bana na nge tayantika kukwenda na nzo-nkanda? Keti mebika fyoti nde nge baka pansio? Bansoba ya mutindu yai lenda bikila nge ntangu mingi mpi kupesa nge nzila ya kusala kisalu ya kimupasudi-nzila ya ntangu yonso. Mpangi-nkento mosi yina kuvandaka ntete maladi kubakaka lukanu ya kusala kisalu ya kimupasudi-nzila ntangu yandi kumaka ti bamvula 89. Sambu na nki? Sambu yandi salaka mvula mosi ti ndambu kukonda kukwenda na lupitalu, yandi yindulaka nde mavimpi na yandi tapesa yandi nzila ya kusala kisalu ya kimupasudi-nzila.
3. Inki bansoba bampangi yankaka mesalaka sambu na kusala kisalu ya kimupasudi-nzila ya ntangu yonso?
3 Lukanu ya ntete ya Polo kuvandaka ya kukwenda kutala bampangi na yandi na Korinto. Ata mpidina, yandi sobaka bapula na yandi sambu na kulonga nsangu ya mbote. Bampangi mingi yina kele bapasudi-nzila ya ntangu yonso bubu yai kusalaka bansoba mingi na ntwala ya kukuma bapasudi-nzila. Bankaka kukumisaka luzingu na bo pete tii na kiteso ya kundima kaka mwa kisalu ya ntangu fyoti yina lenda sadisa bo na kusumba mwa bima fyoti ya kuzingila yina bo kele na yo mfunu. Bo mebakaka kyese na kisalu yai ya bo kesalaka. (1 Tim. 6:6-8) Bankwelani yankaka mesalaka bansoba na luzingu na bo na mpila nde bakala mpamba muntu kesalaka kisalu ya kinsuni, ebuna yo kepesaka nkento dibaku ya kusala kisalu ya kimupasudi-nzila.
4. Inki beto lenda sala kana beto kezaba ve kana beto lenda lungisa bangunga ya bo kelombaka?
4 Kukatula ve nswalu ngindu ya kusala kisalu ya kimupasudi-nzila, sambu nge kewa boma nde nge takuka ve kulungisa bangunga ya bo kelombaka. Yo kelomba nde nge sala bangunga zole ti mwa ndambu konso kilumbu. Kana nge kezaba ve kana nge lenda kuka to ve, meka na kusala kisalu ya kimupasudi-nzila nsadisi sambu na ngonda mosi to bangonda zole, ti lukanu ya kulungisa bangunga 70. Yo tasadisa nge na kubaka kyese yina kekatukaka na kisalu ya kimupasudi-nzila. (Nk. 34:9) Solula ti bampangi yina kele bapasudi-nzila, mbala yankaka bo menungaka mambu ya mpasi ya mefwanana ti yina ya nge kele na yo. (Bing. 15:22) Lomba Yehowa na kusakumuna bikesa ya nge kesala sambu na kuyedisa kisalu na nge ya kusamuna.—1 Yoa. 5:14.
5 Kisalu Mosi ya Mefwana na Kusala: Kusala kisalu ya kimupasudi-nzila ya ntangu yonso kenataka balusakumunu mingi. Yo tasadisa nge na kubaka kyese ya kuluta mingi yina kekatukaka na kupesa mingi. (Bis. 20:35) Yo tatomisa mayele na nge ya kuzabisa kyeleka ya Ndinga ya Nzambi mbotembote. (2 Tim. 2:15) Yo tapesa nge mabaku mingi ya kumona mutindu Yehowa kesadisa nge. (Bis. 11:21; Filp. 4:11-13) Yo tasadisa nge mpi na kuyedisa bikalulu ya kimpeve, bonso kukanga ntima mpi yo tasadisa nge na kukwenda penepene ya Yehowa. (Yak. 4:8) Keti nge lenda kota na kyelo yai ya nene ya kenataka na kisalu mpi kukuma mupasudi-nzila ya ntangu yonso?
5. Sambu na nki yo mefwana nde beto sala kisalu ya kimupasudi-nzila ya ntangu yonso?