“Nge Tavanda Mupasudi-Nzila Mosi ya Mbote!”
1. Inki mutindu mpangi-nkento mosi kuyindulaka na yina metala kisalu na yandi ya kimupasudi-nzila?
1 Mpangi-nkento Kathe B. Palm kutubaka nde: “Mu lendaka ve kuzwa kisalu yankaka yina zolaka kupesa mono kyese mingi to yina zolaka kunatila mono mambote mingi na kimpeve.” Yandi lutisaka bamvula mingi bonso mupasudi-nzila ya kukonda bwimi na kuta kimbangi na insi ya mvimba ya Chili, na Amerika ya Sudi. Na nima ya kuyindula luzingu ya mbote ya bantu yina kele na kisalu ya ntangu yonso, ziku muntu mosi mezabisaka nge nde: “Nge tavanda mupasudi-nzila mosi ya mbote!”
2. Tendula sambu na nki beto kebakaka kyese mingi na bisalu ya kimpeve.
2 Mutindu ya Luzingu ya Kepesaka Kyese: Mbandu na beto, Yezu, kubakaka kikesa ya kyeleka na kusalaka luzolo ya Tata na yandi. (Yoa. 4:34) Yo yina, yandi longaka balongoki na yandi na masonga yonso nde kyese ya kyeleka kekatukaka na kusala bisalu yina ketadila lusambu ya Yehowa. Beto kesepelaka ntangu luzingu na beto kevandaka ya kufuluka ti bisalu yina kesalaka nde Yehowa kundima beto. Dyaka, na ntangu beto kepesa ntangu, ngolo, mpi bima na beto mingi sambu na kusadisa bankaka, beto kekumisaka kyese na beto mingi.—Bis. 20:31, 35.
3. Inki kyese beto lenda baka kana beto kesala mingi na kisalu ya kusamuna?
3 Kana beto kelutisa ntangu mingi na kisalu ya kusamuna, beto tavanda ti mabaku mingi ya kubaka kyese ya kuyantika mpi ya kutwadisa kulonguka ya Biblia. Ata bisika yina bawi mingi kemonisaka ve dikebi, na ntangu beto kekumaka ti eksperiansi mpi mayele mingi na kisalu ya kusamuna, beto lenda mona nde teritware na beto kebuta bambuma mingi kuluta mutindu beto vandaka kuyindula ntete. Bapasudi-nzila lenda sadila kimvwama ya malongi yina bo kebakaka na Nzo-Nkanda ya Kisalu ya Kimupasudi-Nzila, yina bo lenda kota na nima ya kusala kisalu ya kimupasudi-nzila na kiteso ya mvula mosi. (2 Tim. 2:15) Na ntangu beto kekwamina, beto lenda kuna mpenza bankeni ya kyeleka yina tabuta bambuma na nima.—Lo. 11:6.
4. Baleke yina kekuma penepene ya kubaka diplome fwete tadila inki?
4 Baleke: Na ntangu beno ke na kumanisa nzo-nkanda, keti beno meyindula dezia na dikebi yonso makwisa na beno? Tii bubu yai, beno kesalaka manaka na beno mingimingi na kutadila manaka ya nzo-nkanda. Na nima ya kubaka diplome, inki mutindu beno tasadila ntangu yina beno vandaka kusadila ntete sambu na nzo-nkanda? Na kisika ya kusosa kusala kisalu ya kinsuni ya ntangu yonso, sambu na nki ve kutadila na kisambu lukanu ya kusala kisalu ya kimupasudi-nzila ya ntangu yonso? Mayele yina beno talonguka—na kuta kimbangi na bantu ya bisika ya kuswaswana, na kununga bigonsa ya beno kekutana ti yo, na kuyedisa kikalulu ya kudiyala mpi mayele ya kulongila—tanatila beno mambote luzingu ya mvimba.
5. Inki mutindu bibuti mpi dibundu lenda syamisa bampangi na kusala kisalu ya kimupasudi-nzila?
5 Bibuti, keti beno kelungisa mukumba na beno na kusadisaka bana na beno na kuvanda ti lukanu ya kusala kisalu ya ntangu yonso? Bangogo mpi mbandu na beno ya mbote lenda sala mambu mingi sambu na kusadisa bo na kutula mambote ya Kimfumu na kisika ya ntete. (Mat. 6:33) Ray, yina kubandaka kisalu ya kimupasudi-nzila na nima ya kubaka diplome, keyibuka nde: “Mama na mono vandaka kuyindula ntangu yonso nde kusala bonso mupasudi-nzila kenataka na luzingu ya kyese kuluta.” Na bangogo mpi na lusadisu na bo, bantu yonso na dibundu lenda syamisa bankaka na kusala kisalu ya kimupasudi-nzila. Jose, yina kezingaka na Espagne, ketuba nde: “Dibundu na mono vandaka kutadila kisalu ya kimupasudi-nzila bonso kisalu ya kuluta mbote sambu na baleke. Mambu ya bo vandaka kutuba mpi mutindu bo vandaka kusepela na kisalu ya kimupasudi-nzila kumosi ti lusadisu na bo ya mbote kusalaka nde yo vanda pete sambu mu yantika kusala kisalu ya kimupasudi-nzila.”
6. Inki beto lenda sala kana ntangu yai beto kele ve ti mpusa ya kusala kisalu ya kimupasudi-nzila?
6 Kununga Bigonsa: Kansi, inki nge lenda sala kana nge ketuba nde, ‘mu kele ve na mpusa ya kusala kisalu ya kimupasudi-nzila.’ Kana yai kele mutindu nge vandaka kuyindula ntete, samba Yehowa na yina metala mutindu nge keyindula mpi zabisa yandi nde, ‘mu kezaba ve kana kisalu ya kimupasudi-nzila kele sambu na munu, kansi mu kezola kusala mambu yina kepesa nge kyese.’ (Nk. 62:9; Bing. 23:26) Na nima, sosa lutwadisu na yandi na nzila ya Ndinga mpi organizasio na yandi. Bapasudi-nzila mingi ya ntangu yonso “kumekaka” (NW) ntete na kusala bonso bapasudi-nzila nsadisi, mpi kyese yina bo bakaka kupusaka bo na kusala kisalu ya ntangu yonso.—Nk. 34:9.
7. Inki mutindu beto lenda nunga badute ya kemonisa nde beto lenda kuka ve kulungisa bangunga 70 ya bo kelombaka konso ngonda?
7 Inki nge tasala kana nge kezaba ve kana nge talungisa bangunga 70 yina bo kelombaka konso ngonda? Sambu na nki ve kusolula ti bapasudi-nzila yina kele ti luzingu ya mutindu mosi ti nge? (Bing. 15:22) Na nima, sala bamanaka mingi yina nge lenda sadila. Nge lenda mona nde kusumba ntangu na bisalu ya kukonda mfunu sambu na kusala kisalu ya kusamuna kele pete mingi kuluta mutindu nge vandaka kuyindula ntete.—Ef. 5:15, 16, NW.
8. Sambu na inki beto fwete tadila mbala na mbala mambu ya luzingu na beto?
8 Tadila Yo ti Mabanza ya Mpa: Mbala mingi mambu ya luzingu kesobaka. Yo kele mbote na kutadila luzingu na beto mbala na mbala. Mu mbandu, keti nge tabaka pansio ntama mingi ve? Randy, yina kubakaka pansio na ntwala, ketuba nde: “Desizio yai mesadisaka mono na kuyantika kisalu ya kimupasudi-nzila ya ntangu yonso ti nkento na mono, mpi yo mepesaka mono dibaku ya kukwenda kusala kisika yina mpusa kele mingi. Desizio yina menatilaka mono balusakumunu mingi kibeni, kansi lusakumunu ya kuluta nene ya mu mebakaka kele kansansa ya mbote.”
9. Inki bankwelani fwete tadila?
9 Na nima ya kuditadila mbote-mbote, bankwelani yankaka memonaka nde yo kele ve mfunu nde bo zole kusala kisalu ya kinsuni ya ntangu yonso. Ya kyeleka, yo lenda lomba nde dibuta kukumisa luzingu na bo kukonda mindondo, kansi kibansa yina kele mfunu. John, yina nkento na yandi kuyambulaka kisalu ya kinsuni ya ntangu yonso ntama mingi ve sambu na kuyedisa kisalu na yandi ya kusamuna, ketuba nde: “Yo kele ve ti mambu ya mbote kuluta kuzaba nde nkento na mono ke na kusala mambu ya kimpeve kilumbu ya mvimba.”
10. Inki kepusaka Bakristu na kusala kisalu ya kimupasudi-nzila?
10 Mutindu ya Kumonisa Zola mpi Lukwikilu: Yehowa mesalaka nde kisalu ya kusamuna kuvanda kisalu ya kuluta mfunu yina konso muntu na kati na beto lenda sala. Ngidika yai ya ntama tafwa ntama mingi ve, mpi kaka bantu yina kesambaka na zina ya Yehowa mpamba bantu taguluka. (Roma 10:13) Ntima ya mefuluka na zola sambu na Nzambi mpi ntonda sambu na mambu ya yandi mesalaka sambu na beto, tapusa beto na kulemfuka na mukumba yina Mwana na yandi kupesaka beto ya kusamuna na kikesa yonso. (Mat. 28:19, 20; 1 Yoa. 5:3) Dyaka, kukwikila nde beto kezinga mpenza na bilumbu ya nsuka tapusa beto na kusala yonso ya beto lenda sala na kisalu ya kusamuna awa ya ntangu kele ntete, na kisika ya kusadila nsi-ntoto na mambu yonso.—1 Kor. 7:29-31.
11. Inki mutindu nge fwete tadila mambu kana muntu mosi kusonga nge nde nge tavanda mupasudi-nzila mosi ya mbote?
11 Kusala kisalu ya kimupasudi-nzila ya ntangu yonso kele ve kaka dyambu ya ketadila kulutisa bangunga mingi na kisalu ya kusamuna; yo kele mutindu ya kumonisa kukangama na beto na Nzambi. Yo yina, kana muntu mosi kusonga nge nde nge tavanda mupasudi-nzila mosi ya mbote, mona nde yandi kesikisa nge. Mpi tadila na kisambu kana nge lenda vukana ti bantu yina kesalaka kisalu yai ya kepesaka kyese.
[Bangogo sambu na kubenda dikebi ya kele na lutiti 4]
Bibuti, keti beno kelungisa mukumba na beno na kusadisaka bana na beno na kuvanda ti lukanu ya kusala kisalu ya ntangu yonso?
[Bangogo sambu na kubenda dikebi ya kele na lutiti 5]
Yehowa mesalaka nde kisalu ya kusamuna kuvanda kisalu ya kuluta mfunu yina konso muntu na kati na beto lenda sala.