Keti Nge Mesalaka Dezia Kisalu ya Kimupasudi-Nzila ya Ntangu Yonso?

1. Inki dibaku bantu mingi mezwaka, kansi inki mekuminaka bankaka na kati na bo?

¹ Na nsungi ya bamvula mingi, mafunda ya bantu mezwaka dibaku ya ‘kulonga mpi kuzabisa nsangu ya mbote’ bonso baministre ya ntangu yonso. (Bis. 5:42) Kansi, bankaka meyambulaka kisalu ya kimupasudi-nzila sambu na bikuma ya kuswaswana. Kana nge mesalaka dezia kisalu ya kimupasudi-nzila ya ntangu yonso, keti nge ketadilaka luzingu na nge ya ntangu yai sambu na kuzaba kana nge lenda vutukila kisalu ya kimupasudi-nzila?

2. Sambu na inki bantu yina kuvandaka ntete bapasudi-nzila fwete tadila luzingu na bo bubu yai?

² Luzingu Kesobaka: Yo lenda vanda nde mambu yina kusalaka nde nge yambula kisalu ya kimupasudi-nzila kele dyaka ve. Mu mbandu, kana nge yambulaka kisalu ya kimupasudi-nzila sambu nge vandaka kukuka ve kulungisa bangunga 90 ya bo vandaka kulomba konso ngonda, keti nge lenda vutukila kisalu ya kimupasudi-nzila, awa ya bo mekumaka kulomba bangunga 70? Ebuna bubu yai, keti kisalu na nge ya kinsuni to mikumba na nge ya dibuta kebakaka nge dyaka ve ntangu mingi? Mpangi-nkento mosi ya kuyambulaka kisalu ya kimupasudi-nzila sambu na maladi kuvutukilaka yo dyaka ntangu yandi kumaka ti bamvula 89. Yandi salaka kiteso ya mvula mosi ti ndambu kukonda kukwenda na lupitalu, yo yina yandi monaka nde mavimpi na yandi lendaka kupesa yandi nzila ya kusala dyaka kisalu ya kimupasudi-nzila!

3. Inki mutindu bantu ya dibuta lenda wakana sambu na kusadisa muntu mosi ya dibuta na bo na kukuma mupasudi-nzila?

³ Ziku nge mesalaka ntete ve kisalu ya kimupasudi-nzila, kansi muntu mosi na dibuta na nge kubikaka yo sambu na kusadisa muntu mosi ya dibuta, mu mbandu kibuti mosi ya mununu. (1 Tim. 5:4, 8) Kana yo ke mpidina, keti nge to muntu yankaka na dibuta lenda sadisa mpangi yina? Sambu na nki ve kusolula mambu yango na dibuta? (Bing. 15:22) Kana bantu yonso ya dibuta kusala na kuwakana sambu na kusadisa mosi na kati na bo na kukuma mupasudi-nzila, bo yonso tavanda na kyese.

4. Inki nge lenda sala bubu yai kana nge kekuka ve kuvutukila kisalu ya kimupasudi-nzila?

⁴ Kulemba nitu ve kana bubu yai luzingu na nge kepesa nge ve nzila ya kuvutukila kisalu ya kimupasudi-nzila. Luzolo na nge sambu na kusala yo tasepedisa Yehowa. (2 Kor. 8:12) Na kisalu na nge ya kusamuna bubu yai, sadila mayele yina nge bakaka ntangu nge vandaka mupasudi-nzila. Samba sambu na mpusa na nge yina, mpi tula dikebi na mabaku yina nge kele na yo ya kusoba luzingu na nge. (1 Yoane 5:14) Ziku, na bilumbu kekwisa, Yehowa takangudila nge kyelo ya nene yina kepesa nzila na “kusala kisalu ya mbote ti ya mfunu” sambu nge mona dyaka kyese ya kisalu ya kimupasudi-nzila ya ntangu yonso!​—1 Kor. 16:9.