Inki Nge Lenda Tuba na Ntwala ya Kupesa Baperiodike

(Sadila periodike ya Kifalansa kana yo kele ve na Kikongo)

Nzozulu ya Nkengi Yuni 15

“Keti nge kemonaka nde bubu yai bantu mingi keponaka bo mosi mambu yina kele mbote mpi mbi? [Bika muntu yango kupesa mvutu.] Tala mbandu ya lutwadisu mosi ya kesobaka ve ya beto kekuta na Biblia. [Tanga verse mosi na kati ya baverse yina kele na balutiti 6-7.] Zulunalu yai ketendula mutindu beto kebakaka mambote kana beto kendima minsiku ya bikalulu ya mbote ya Biblia.”

Réveillez-vous! Yuni

“Beto yonso kevandaka na mfunu ya mbongo sambu na kuzinga. Keti nge keyindula nde muntu lenda kudiyangisa mingi kibeni na yina metala kuzwa mbongo? [Bika muntu yango kupesa mvutu.] Tala mambu yina verse yai ketuba sambu na yina metala kusosa bimvwama. [Tanga 1 Timoteo 6:10.] Zulunalu yai kepesa mwa bangindu ya mfunu ya mefwana na kusadila ya kemonisa mutindu muntu lenda kumisa luzingu na yandi pete mpi kuzinga ti mbongo fyoti.”

Nzozulu ya Nkengi Yuli 1

“Keti nge mekudiyulaka dezia sambu na nki bo kenyokulaka bantu sambu na insi na bo, mpusu na bo ya nitu, to ndinga na bo? [Bika muntu yango kupesa mvutu.] Tala kikuma ya bo kepesa awa. [Tanga 1 Yoane 4:20.] Zulunalu yai kepesa mvutu na ngyufula, Keti bantu ya bikanda yonso lenda zinga na bumosi?”

Réveillez-vous! Yuli

“Na kuswaswana ti bambisi yina kesalaka mambu kaka na mawi, bantu kevandaka ti mayele ya kupona minsiku yina tatwadisa luzingu na bo. Inki kisika nge keyindula nde beto lenda zwa lutwadisu ya mefwana na kutudila ntima? [Bika muntu yango kupesa mvutu. Na nima tanga Nkunga 119:105.] Zulunalu yai ketendula nde lutwadisu ya beto kebakaka na Biblia kele ya kuzanguka mpenza.”