Pesa Kivuvu na Bansukami
1 Yezu vandaka kutudila bansukami dikebi mingi. Bantangu yankaka, yandi salaka bidimbu ya nkumbwa sambu na kupesa bansukami bima ya kinsuni mpi kubelula bantu ya maladi. Kansi kisalu na yandi ya ntetentete kuvandaka ya kuzabisa bo “nsangu ya mbote.” (Mat. 11:5) Bubu yai, kisalu ya kusamuna kelanda na kunatila bansukami ti bantu yankaka mambote.—Mat. 24:14; 28:19, 20.
2 Kivuvu ya Kyeleka: Mbala mingi, bamfumu ya mabundu ya Kikristu kesilaka bansukami nde bo takuma bamvwama kana bo kepesa makabu mingi na nzo-Nzambi. Kansi, Biblia kelonga nde kaka Kimfumu ya Nzambi mpamba tamanisa kinsukami ti bampasi yonso ya bantu. (Nk. 9:19; 145:16; Yez. 65:21-23) Na ntangu beto kesongaka bansukami mambu yina Biblia kelongaka mpenza, beto kepesaka bo kivuvu mpi kesadisaka bo na kulungisa bampusa na bo ya kimpeve.—Mat. 5:3.
3 Bafarize ya ntangu ya Yezu vandaka kuvweza bansukami mpi kubinga bo nde ‘am-ha·’aʹrets, to “bantu ya insi.” Kansi, Yezu vandaka kumona nde “luzingu na bo kele mfunu mingi.” (Nk. 72:13, 14) Beto lenda landa mbandu ya Yezu mpi kuditula na kisika na bo sambu na ‘kusadila bo mambu ya mbote.’ (Bing. 14:31) Beto fwete monaka ve mpamba bantu yina kezingaka na bakartie yina bansukami kevandaka mingi to kubuya kuzabisa bo nsangu. Bantu mingi yina kendimaka nsangu ya Kimfumu kevandaka bansukami.
4 Sadisa Bansukami Ntangu Yai: Kulonga minsiku ya Biblia na bansukami ya teritware na beto kesadisaka bo mpi na kufyotuna malanda ya kinsukami ntangu yai. Mu mbandu, Biblia kebuyisaka kulauka malafu, bansaka ya mbongo, bumolo, kunwa makaya, mpi bikalulu yankaka yina kekumisaka bantu bansukami. (Bing. 6:10, 11; 23:21; 2 Kor. 7:1; Ef. 5:5) Masonuku kesyamisa beto na kuvanda masonga mpi na kusala “na ntima mosi ya mbote.” Yai kele bikalulu yina bamfumu ya kisalu kesosaka na bantu ya kisalu. (Kol. 3:22, 23; Baeb. 13:18) Na nsosa mosi ya bo salaka, bamfumu mingi ya kisalu kutangaka masonga ti kwikama na kati ya bikalulu yina bo kezolaka kumona mingi na bantu ya kesosa kisalu.
5 Yehowa kekudibanzaka sambu na bampasi ya bansukami. Ntama mingi ve Yezu Kristu tagulusa “bantu ya mawa yina ke didila yandi.” (Nk. 72:12) Ntangu beto kekinga kilumbu yina, beto kele ti dibaku ya kupesa bansukami mpi bantu yankaka kikesa, ti nsangu ya kivuvu yina Biblia kepesa.