Longa Bantu Yina Kezabaka Ve Kutanga Mbote

1. Inki mpasi beto lenda kutana na yo na kisalu ya kusamuna?

¹ Ntangu beto kesalaka kisalu na beto ya kusamuna, bantangu yankaka yo kevandaka mpasi na kulonga kyeleka na bantu yina ketangaka ve mbote. Inki beto lenda sala?

2. Inki mutindu mpi sambu na nki beto kemonisaka luzitu na bantu yina kezabaka ve kutanga mbote?

² Zitisa Bo: Sambu na Yehowa, dyambu ya mfunu kele nkadilu ya ntima ya muntu, kansi ve banzo-nkanda ya yandi mesalaka. (1 Sam. 16:7; Bing. 21:⁠2) Yo yina, beto fwete mona ve mpamba bantu yina mezaba ve kutanga mbote. Bantu ya mutindu yina tandima lusadisu na beto kukonda mpasi kana beto kemonisila bo luzitu mpi kukanga-ntima. (1 Pie. 3:​15, 16) Yo lenda tendula nde beto buya kukangama kaka nde muntu yango kutanga verse to paragrafe mosi. Ntangu muntu kelanda na kulonguka bakyeleka ya mfunu ya Biblia, yandi lenda kuma ti mpusa ya ngolo ya kutomisa mayele na yandi ya kutanga na mpila nde yandi baka kyese ya kutanga Ndinga ya Nzambi na ndinga ya nsi-nsi “mpimpa ti mwini.”​—⁠Nk. 1:​2, 3.

3. Inki bametode ya kulongila beto lenda sadila na kulonga bantu yina kezabaka ve kutanga mbote?

³ Bametode ya Kusadila Sambu na Kulonguka ya Biblia: Bifwanisu kele kisadilu ya mbote sambu na kulonga bantu mpi kusadisa bo na kuyibuka mambu ya bo kelonguka. Nge lenda yula longoki mambu yina yandi kemona na kifwanisu yina kele na mukanda ya beno kesadila. Na nima sadila bangyufula ya sikisiki sambu na kusadisa yandi na kubakisa mambu yina kifwanisu kelonga. Sadila baverse yina kelonga mambu ya sikisiki ya nge kezola kutubila ya kele na kifwanisu. Nge lenda sadila mpi bifwanisu sambu na kusala mvutukilu ya dilongi. Kulonga ve mambu mingi na mbala mosi. Nyata ntu-dyambu mpi mambu ya mfunu ya dilongi, mpi kukotisa ve mambu yankaka yina dilongi ketubila ve. Tanga baverse mbala mosi na Biblia, mpi sadila bangyufula sambu na kuzikisa nde longoki kebakisa mambu yina beno mekatuka kutanga. Yo lenda yedisa mpusa na yandi ya kutomisa mutindu na yandi ya kutanga na mpila nde yandi sosa kulonguka yandi mosi bakyeleka mingi ya Biblia.

4. Inki mutindu beto lenda sadisa longoki na beto na kutomisa mutindu na yandi ya kutanga?

⁴ Bisadilu Sambu na Kutomisa Kutanga: Bantu yina kezabaka ve kutanga mbote to bayina kuzwaka ve dibaku ya kulonguka na kutanga mbotembote lenda bakisa mpi kusimba mambu mbote mpenza. Nge lenda syamisa bantu yina na kusadila bakaseti ya kuwidikila ya mikanda na beto. Kuwidikila na dikebi muntu yina ketanga mpi kulanda lutangu yina na mukanda na yandi, mpi kuvutukila bangogo yina na ndinga ya nsi-nsi, tasadisa muntu yango na kutomisa kutanga na yandi. Kamukanda Longuka Kutanga ti Kusonika lenda sadisa yandi mpi. Na bisika yankaka, bankuluntu lenda yidika mpi banzo-nkanda ya kutanga na dibundu. Bangindu yai ya mfunu lenda sadisa beto na kusadisa bantu yina mezaba ve kutanga mbote na kubakisa “mukanda ya Nzambi,” yina lenda pesa bo mayele yina tagulusa bo.​—⁠2 Tim. 3:⁠15.