Mutindu Beto Lenda Sadisa Bantu Yina Ke Tangaka Mbote Ve

1. Inki bampasi beto ke kutanaka ti yo ntangu beto ke longuka Biblia ti bantu yina ke tangaka mbote ve?

¹ Bawi yina ke tangaka mbote ve lenda sepela ti mambu ya kimpeve, kansi Biblia mpi mikanda ya nkaka lenda pesa bo boma. Kupesa bantu yai mukanda Biblia Kelongaka mingi-mingi na luyantiku lenda sadisa bo mpenza ve. Inki mutindu beto lenda sadisa bantu ya mutindu yai na kimpeve? Beto yulaka bansamuni ya bansi kuluta 20 yina kele ti eksperiansi na kuzabisa beto mambu yina bo ke salaka. Mambu yango kele na baparagrafe ya ke landa.

2. Inki bisadilu kele mfunu sambu na kusadisa muntu yina ke tangaka mbote ve?

² Kana longoki ya Biblia ke kuka ve kutanga, nge lenda yantika kusolula ti yandi na kamukanda Widikila Nzambi to Widikila Nzambi mpi Zinga Mvula na Mvula. Mupasudi-nzila mosi ya États-Unis ke songaka muntu tumikanda yai zole mpi ke lombaka muntu yango na kupona kamukanda yina yandi me zola. Biro ya filiale ya Kenya ke tuba nde bisadilu yai ke vandaka mbote kibeni na Afrika sambu bo ke longaka bantu mambu na nzila ya bankenda na kisika ya kusolula ti bo na nsadisa ya bangiufula mpi bamvutu. Muntu ya me longukaka lenda ndima kutanga kukonda mpasi mpi lenda ndima nde bo yula yandi bangiufula, kansi metode yai lenda vanda mpasi sambu na muntu yina me longukaka mingi ve. Kana balongoki ke tanga mwa ndambu, bansamuni mingi ke yantikaka kulonguka ti bo na tumikanda Nsangu ya Mbote ya Mekatuka na Nzambi!, Nge Lenda Vanda Nduku ya Nzambi! to diaka na Mukanda ya Bankenda ya Bible.

3. Inki mambu ta sadisa beto na kulonga mbote bantu yina me longukaka ve?

³ Beto Sikisa Bo: Bantu yina me longukaka ve lenda wa nsoni mpi mingi ke kudimonaka mpamba. Kusadisa bo na kudiwa mbote kele mpi kitambi ya ntete ya kulonga bo kieleka. Bantu mingi ya ke zabaka ve kutanga ke vandaka ngangu mpi lenda longuka mbote. Zitisa bo mpi pesa bo lukumu. (1 Pie. 3:15) Bo ta landa na kulonguka kana bo ke mona nde bikesa na bo kele ve ya mpamba mpi nde bo ke yela na kimpeve. Yo yina, sikisa bo na masonga yonso.

4. Inki mutindu beto lenda siamisa bantu yina ke tangaka mbote ve na kuyidika masolo ya bo ta longuka?

⁴ Ata longoki ke tanga mbote ve, siamisa yandi na kuyidika disolo yina beno ta longuka. Bansamuni ya nkaka na Afrika ya Sudi ke siamisaka balongoki na bo na kulomba bantu ya dibuta to banduku na bo yina ke tangaka mbote na kusadisa bo. Nsamuni mosi ya Grande-Bretagne ke siamisaka balongoki na yandi na kuyidika disolo. Yandi ke pesaka bo mukanda na yandi mpi bo ke sadilaka yo sambu na kulonguka mwa baparagrafe sambu bo bakisa nde yo kele mpasi ve na kuzwa bamvutu kana yo kele ya kutenda. Mpangi-bakala mosi na Inde ke siamisaka balongoki na kutala bifwanisu yina kele na dilongi ya bo ta longuka na mposo ya ke landa mpi kuyindulula yo na ntwala.

5. Inki mutindu beto lenda monisa ntima-nda ntangu beto ke longuka ti muntu?

⁵ Beto Vanda Ntima-Nda: Ata nge ke sadila nki mukanda, tubila bangindu ya mfunu mpi sadisa longoki na nge na kubakisa yo mbote. Na luyantiku, yo lenda vanda mbote kuluta na kusolula ti yandi minuta 10 to 15. Kulonga yandi ve mambu mingi, beno lenda tadila mwa baparagrafe na konso kitini. Vanda ntima-nda kana longoki ke tanga malembe-malembe. Ntembe kele ve nde yandi ta tomisa mutindu na yandi ya kutanga ntangu yandi ke yedisa ntonda na yandi sambu na Yehowa. Sambu na kusadisa longoki na nge mutindu yai, yo kele mbote na kubingisa yandi na balukutakanu tuka na luyantiku.

6. Inki mutindu beto lenda sadisa bantu na kuzaba kutanga?

⁶ Kana balongoki ya Biblia me zaba kutanga, bo ta yela nswalu na kimpeve. (Nk. 1:1-3) Mwa minuta fioti na nima ya kulonguka, bansamuni mingi ke sadilaka mukanda Longuka Kutanga ti Kusonika sambu na kusadisa balongoki na bo. Kana longoki me lemba nitu, nge lenda benda dikebi na yandi na mambu yina yandi ke kuka kulonguka sambu na kusadisa yandi na kuditudila ntima. Ndimisa yandi nde Yehowa ta sakumuna bikesa na yandi mpi siamisa yandi na kusamba sambu Nzambi kusadisa yandi. (Bing. 16:3; 1 Yoa. 5:14, 15) Bansamuni ya nkaka na Grande-Bretagne ke siamisaka balongoki na bo na kuvanda ti bukati-kati ntangu bo ke kuditudila balukanu, mu mbandu kuzaba ntete alfabe, na nima kusosa mpi kutanga baverse yina bo me siamisa na kutanga, mpi na nsuka, kutanga mikanda ya me simbama na Biblia yina bo me balula na bangogo ya pete. Mbala mingi, kusadisa bantu na kuzaba kutanga ke lombaka kaka ve kulonga bo mutindu ya kutanga kansi yo ke lombaka mpi kupesa bo mpusa ya kusala yo.

7. Sambu na nki beto fwete buya ve kulonga kieleka na bantu yina ke tangaka mbote ve?

⁷ Yehowa ke monaka ve mpamba bantu yina me longukaka ve. (Yobi 34:19) Yehowa ke talaka ntima ya muntu. (1 Bans. 28:9) Yo yina, kubuya ve kulonga kieleka na bantu yina ke tangaka mbote ve. Nge kele ti bisadilu mingi ya mbote yina nge lenda yantikila. Nsuka-nsuka, nge lenda kotisa yandi na mukanda Biblia Kelongaka sambu na kusadisa yandi na kubakisa mbote-mbote Masonuku.