Mbandu ya Bangogo ya Kukotila na Masolo

(Sadila periodike ya Kifalansa kana yo kele ve na Kikongo)

Kuyantika Kulonguka ti Muntu na Sabala ya Ntete ya Ngonda ya Februari

“Bantu yina beto me solula ti bo ke pesa mabanza ya kuswaswana sambu na Biblia. Bantu ya nkaka ke ndima nde yo kele Ndinga ya Nzambi, kansi bankaka ke mona yo bonso mikanda yonso ya nkaka. Ebuna nge, nge ke monaka yo nki mutindu?” Bika muntu yango kupesa mvutu. Songa yandi lutiti ya nsuka ya Nzozulu ya Nkengi ya Februari 1 mpi beno tadila malongi yina kele na nsi ya ngiufula ya ntete mpi beno tanga ata verse mosi ya bo me vutukila ve bangogo na yo. Pesa muwi bazulunalu, mpi baka bangidika sambu na kuvutukila yandi mpi kutadila ngiufula ya ke landa.

Nzozulu ya Nkengi Februari 1

“Bantu mingi ke zolaka nde bitumba kumana. Keti nge ke yindula nde bantu lenda zinga na ngemba na nsi-ntoto? [Bika muntu yango kupesa mvutu.] Tala lusilu ya kele na Masonuku. [Tanga Nkunga 46:10.] Yo ke benda dikebi na kuzaba nde mambu yina salamaka na Mvita ya Ntete ya Ntoto ya Mvimba mpi yina salamaka na nima na yo ke ndimisa beto nde ntama mingi ve Nzambi ta lungisa mbikudulu yai mpi ta manisa bitumba kimakulu. Zulunalu yai ke tendula mambu yango.”

Réveillez-vous ! Februari

“Beto me kwisa kutala nge mwa fioti sambu na kusolula dikambu mosi ya ke tadila bantu yonso. Yo ke monana nde bantu ke zwaka diaka ve ntangu ya kusala mambu yonso. Keti nge ke yindula nde manaka na beto kele ya kufuluka sambu beto kele ti mambu mingi ya kusala to sambu beto ke sadilaka ve ntangu na beto mbote? [Bika muntu yango kupesa mvutu.] Bantu mingi ke zabaka ve nde Biblia ke pesaka bandongisila ya mfunu yina lenda sadisa beto na kusadila mbote ntangu na beto. Mbandu mosi yo yai. [Tanga Bafilipi 1:10a.] Zulunalu yai ke tubila mitindu iya yina me sadisaka bantu mingi na kusadila ntangu na bo na mayele yonso.”