Sadila Mbote-Mbote Mambu ya Kele na Mukanda Biblia Kelongaka

Kana longoki ya Biblia ke landa na kulonguka mambu yina Biblia ke longaka mpenza mpi ke sadila mambu yango, yandi ta yela na kimpeve mpi ta buta mbuma. (Nk. 1:1-3) Kana beto ke sadila mbote mambu ya nkaka ya kele na mukanda Biblia Kelongaka, beto lenda sadisa longoki na beto na kuyela na kimpeve.

Bangiufula ya Luyantiku: Konso kapu ke yantikaka ti bangiufula ya bo me pesa mvutu na kapu yango. Nge lenda tangila muwi bangiufula yango sambu na kutedimisa mpusa na yandi na mambu yina beno ke zola kulonguka. To nge lenda lomba yandi na kupesa mvutu ya nkufi na konso ngiufula. Kana yandi me pesa mvutu ya mbi, yo kele ve mfunu na kusungika yandi na ntangu yina. Bamvutu na yandi ta sadisa nge na kuzaba mambu ya nge fwete tudila dikebi ya mingi.​—Bing. 16:23; 18:13.

Appendice: Kana longoki ke bakisa mambu ya beno ke longuka mpi ke ndima yo, siamisa yandi na kutanga yandi mosi mambu ya kele na appendice ya dilongi ya beno ke tadila. Na mbala ya nima, nge lenda baka mwa minuta sambu na kuzaba kana yandi bakisaka mambu yango. Kansi, kana nge ke mona nde appendice yango ta sadisa yandi, nge fwete baka mwa minuta ntangu beno ke longuka sambu na kutadila ti yandi appendice ya mvimba to kitini. Beno ta tanga baparagrafe ya appendice mpi nge ta yula yandi bangiufula ya nge yidikaka na ntwala.

Lupangu ya Mvutukilu: Lupangu ya mvutukilu yina kele na nsuka ya konso kapu kele ti bansa yina ke pesa bamvutu na bangiufula ya luyantiku ya kapu. Nge lenda sadila mambu yai sambu na kuzaba kana longoki me bakisa mpi kana yandi lenda tendula bangindu ya mfunu ya dilongi yango. Beno tanga konso nsa ti verse ya kele na lweka na yo. Na nima, lomba longoki na kusadila verse to baverse ya nsa yango sambu na kutendula kikuma yina ngindu yango kele ya kieleka.​—Bis. 17:2, 3.