Beto Landa Mbandu ya Longi ya Nene Ntangu Beto Kesadila Mukanda Biblia Kelongaka
1. Inki mutindu Yezu vandaka kulonga?
1 Yezu, Longi ya Nene, vandaka kutendula ntangu yonso mambu na mutindu mosi ya pete mpi ya pwelele. Sambu na kupusa bawi na yandi na kuyindula, bantangu yankaka yandi vandaka kuyantika ntete na kuyula bo mabanza na bo. (Mat. 17:24-27) Yandi vandaka kubenda dikebi na Ndinga ya Nzambi. (Mat. 26:31; Mar. 7:6) Yandi vandaka kukeba sambu na kupesa ve balongoki na yandi bansangu mingi kuluta, sambu yandi zabaka nde bo talanda na kulonguka. (Yoa. 16:12) Yezu vandaka mpi kusosa kuzaba kana balongoki na yandi vandaka kukwikila mpi kubakisa mambu yina yandi vandaka kulonga bo. (Mat. 13:51) Bo mebasisaka mukanda Biblia Kelongaka sambu na kusadisa beto na kulonga mpi bonso yandi.
2. Na nki mitindu beto lenda sadila bangyufula yina kele na luyantiku ya konso kapu?
2 Bangyufula ya Luyantiku: Ntangu nge keyantika kapu mosi, yo kele mbote na kubenda dikebi ya longoki na bangyufula ya luyantiku yina kele na nsi ya ntu-dyambu. Yula longoki bangyufula yango sambu na kutedimisa mpusa na yandi. To nge lenda lomba yandi na kusala mwa bakomantere ya nkufi na bangyufula yango. Mfunu kele ve ya kutubila bakomantere ya yandi kepesa na bunda to na kusungika konso ngindu ya mbi ya yandi kepesa. Nge lenda pesa yandi kaka mersi sambu na bangindu na yandi mpi beno yantika kutadila dilongi ya beno kezola kutadila. Bakomantere ya yandi tapesa na bangyufula yina ya luyantiku tasadisa nge na kuzaba kana nge fwete tula dikebi mingi na ngindu mosi ya dilongi ya beno kelonguka.
3. Inki mutindu beto lenda longuka na mutindu mosi ya pete?
3 Baverse: Kulonguka fwete simbama na Biblia. (Baeb. 4:12) Kansi, yo kele ve mfunu na kutanga konso verse ya bo mepesa. Tula dikebi na baverse yina kesimbaka balukwikilu na beto. Mfunu kele ve ya kutanga baverse yina kepesaka kaka bansangu. Mukanda Biblia Kelongaka kemonisaka kyeleka na mutindu mosi ya kukonda mindondo. Longa na mutindu ya pete. Tula dikebi na bangindu ya mfunu, mpi buya kikalulu ya kutubila mingi mambu ya fyotifyoti to ya kukotisa kukonda mfunu masolo yankaka ya ketadila ve mambu ya beno kelonguka.
4. Na ntangu beto kelonguka, inki mutindu beto lenda zaba kana beto fwete tadila to ve malongi ya appendice?
4 Appendice: Appendice kele ti masolo 14 yina kepesa bangindu ya ngika na ntu-dyambu ya nene. Beno lenda tadila to ve masolo yango na ntangu beno kelonguka. Sambu na masolo yankaka, nge lenda baka lukanu ya kusyamisa longoki na kutanga malongi yango yandi mosi, mingimingi kana yandi kebakisa mpi kendima mambu yina kele na disolo ya beno kelonguka. Mu mbandu, kana longoki kekwikilaka dezia nde Yezu kele Mesia, mfunu kele ve ya kutadila ti yandi disolo “Yezu Kristu Kele Mesia ya Lusilu” na ntangu beto kelonguka kapu ya 4, “Yezu Kristu Kele Nani?” Bantangu yankaka, yo lenda vanda mfunu na kubaka ntangu ya kutadila malongi ya appendice to kamwa kitini na yo.
5. Kana beto pona na kutadila malongi ya appendice, inki mutindu beto lenda sala yo?
5 Kana nge pona na kutadila malongi ya appendice, nge lenda yidika bangyufula na ntwala mpi kutadila baparagrafe ti longoki kaka mutindu nge kesalaka ntangu beno kelongukaka. To, na kutadila bampusa ya longoki, nge lenda baka mwa minuta na ntangu beno kelonguka sambu na kutadila malongi yango ti yandi. Yo tasadisa nge na kuzaba kana yandi kebakisa malongi yina yandi mosi ketanga.
6. Inki mutindu beno lenda sadila lupangu ya mvutukilu yina kele na nsuka ya konso kapu?
6 Lupangu ya Mvutukila: Lupangu yina kele na nsuka ya konso kapu kele ti bansa yina kepesaka mbala mingi mvutu na bangyufula ya luyantiku. Nge lenda sadila bansa yina sambu na kuvutukila bangindu ya mfunu ya kapu. Bansamuni yankaka memonaka nde yo kele mbote na kutanga ti longoki konso nsa mpi ziku baverse yina kevandaka na nima ya nsa yango. Na nima, bo keyulaka longoki na kutendula na bunkufi mutindu baverse yina kemonisa bukyeleka ya mambu yina nsa yango ketuba. Metode yai kesadisaka longi na kumona kana longoki kebakisa mbote bangindu ya mfunu ya dilongi mpi mutindu Biblia kesimba ngindu yango, mpi kana yandi kendima malongi yango. Yo kelongaka mpi longoki na kuzaba mutindu ya kusadila Biblia sambu na kutendula kyeleka na bantu yankaka.
7. Inki mutindu beto lenda sadila mukanda Biblia Kelongaka sambu na kulungisa mukumba na beto?
7 Mutindu ya kuluta mbote ya kulungisa mukumba na beto ya kulonga bantu mpi kukumisa bo balongoki kele ya kulanda bametode ya kulongila ya Yezu. (Mat. 28:19, 20) Mukanda Biblia Kelongaka lenda sadisa beto na kusala yo. Sadila yo mbote sambu na kulonga bankaka kyeleka na mutindu mosi ya pwelele, ya pete, mpi ya mbote.