Inki Biblia Ke Longa Beto?—Mutindu ya Kusadila Yo

Mukanda Ke Longa Beto mpi Biblia Ke Longaka kele kiteso mosi. Mikanda yai zole ya ke sadisaka beto na kulonga bantu, ke tubila bakieleka ya kiteso mosi mpi na ndonga mosi. Kansi mukanda Ke Longa Beto ke sadila bangogo mpi bangindu ya pete. Bo me basisa yo sambu na bantu yina lenda vanda ti mpasi sambu na kubakisa mukanda Biblia Ke Longaka. Na kisika ya appendice, mukanda Ke Longa Beto kele ti banoti na nsuka; banoti yina ke pesa bantendula ya pete ya bangogo mpi bangindu yina bo me sadila na masolo. Bakapu kele ve ti bangiufula ya luyantiku to balupangu ya mvutukilu. Kansi, na nsuka ya konso kapu, yo ke tubila na bunkufi bakieleka ya Biblia yina bo tendulaka na kapu yina. Mutindu beto ke kabulaka mukanda, Biblia Ke Longaka, beto lenda kabula mpi mukanda Ke Longa Beto ntangu yonso, ata kana yo kele ve mukanda ya beto ke kabula na ngonda yina. Inki mutindu beto lenda sadila mambu ya mfunu ya mukanda, Ke Longa Beto ntangu beto ke longuka Biblia ti muntu?

MVUTUKILU: Metode ya kutanga ntete paragrafe mpi na nima kuyula ngiufula yina beto ke sadilaka dezia na mukanda Biblia Ke Longa Beto ntangu beto ke longukaka Biblia ti bantu ta simba sambu na bantu mingi. Kansi, yindula nde longoki me zaba ve ndinga mbote to yandi ke tanga mbote ve. Kana yo kele mutindu yina, nge lenda sadila mukanda Ke Longa Beto. Nge lenda sadila mvutukilu ya kapu sambu na kulonguka ti yandi mpi nge siamisa yandi na kutanga kapu yina yandi mosi. Nge lenda longa kieleka mosi ya Biblia na kulonguka ya Biblia yina lenda baka minuta kiteso ya 15. Sambu bamvutukilu kele ve ti mambu yonso yina kele na bakapu, longi fwete kudibongisa mbote mpi kutadila bampusa ya longoki. Kana longi ke twadisa kulonguka na nsadisa ya mambu yina kele na kapu, yandi lenda sadila bangindu ya mvutukilu sambu na kuvutukila mambu.

BANOTI: Bo me tula bangogo mpi bangindu yina kele na banoti na ndonga yina yo kele na bakapu. Longi lenda pona kana bo ta tadila banoti ya mukanda Ke Longa Beto ntangu bo ke longuka to ve.