Bimvwama Lenda Vanda ya Nge!
1. Sambu na nki beto fwete tadila kisalu ya kimupasudi-nzila ya ntangu yonso?
1 Keti nge kesosa kyese ya mingi na luzingu na nge? Keti nge kezwaka kyese yina kekatukaka na kusadisa bankaka? Keti nge kele na mpusa ya kuyedisa kisalu ya nge kesadilaka Yehowa? Kana mvutu na nge kele ee na bangyufula yai, nge fwete tadila kisalu ya kimupasudi-nzila ya ntangu yonso. Ya kyeleka, beto fwete tadila mikumba ya dibuta ti yankaka yina Masonuku kepesa, mpi mambu ya metala mavimpi, kimununu to maladi.
2. Tanga mwa bimvwama ya kimpeve yina bapasudi-nzila ya ntangu yonso kebakaka.
2 Masonama ya kupemama na Nzambi yina Salomo sonikaka kewakanisa balusakumunu ya Yehowa ti bimvwama ya kinsuni. (Bing. 10:22) Bubu yai, balusakumunu ya Yehowa kenataka ntetentete bimvwama ya kimpeve. Bapasudi-nzila ya ntangu yonso mefulukaka ti bimvwama ya mutindu yai. Mu mbandu, bo mezwaka kyese ya mingi yina kekatukaka na kupesa bankaka na mutindu bo kesumbaka “ntangu” yina bo lendaka kulutisa na kusala mambu na bo. (Kol. 4:5; Bis. 20:35) Yehowa kemonaka mpi kesepelaka ti kisalu na bo ya mpasi mpi ya zola. ‘Bimvwama’ ya mutindu yai ya bo me ‘bumbaka na zulu’ tamana ve valere ata fioti. (Mat. 6:20; Baeb. 6:10) Dyaka, mutindu bapasudi-nzila kelanda na kuvanda ti disu ya petepete mpi ketula kivuvu nde Yehowa tapesa bo bima yina bo kele na yo mfunu na luzingu, bangwisana na bo ti yandi kekumaka ngolo.—Mat. 6:22, 25, 32; Baeb. 13:5, 6.
3. Inki luswaswanu kele na kati ya kulanda bimvwama ya kimpeve ti kulanda bimvwama ya kinsuni?
3 Mbala mingi, kulanda bimvwama ya kinsuni kenataka na “nzala mingi ya buzoba ti ya mbi.” (1 Tim. 6:9, 10; Yak. 5:1-3) Yo kele mpidina ve sambu na balusakumunu ya Yehowa. Kulutisa ntangu na bo mingi na kisalu ya kusamuna kesadisaka bapasudi-nzila ya ntangu yonso na kutanina bukatikati ya kimpeve mpi kutula dikebi na bo na mambu ya kuluta mfunu. (Filp. 1:10) Mpangi mosi kubikaka kisalu na yandi ya enzeniere yina vandaka kudya yandi ntangu mingi, sambu na kusala kisalu ya kimupasudi-nzila. Yandi tubaka nde: “Kisalu na mono vandaka kupesa mono susi mingi. Kansi yo kele mpidina ve sambu na kisalu ya kimupasudi-nzila. Sesepi yai, mu ke na kusadisa bantu mpi kulonga bo kyeleka. Kisalu yai kepesaka mono kyese mingi kibeni mpi yo kele kitoko mpenza.”
4. Inki mutindu bapasudi-nzila ya ntangu yonso kebakaka balusakumunu na ntangu bo kenatilaka bankaka lusakumunu?
4 Balusakumunu Sambu na Bankaka: Bubu yai, muntu yonso kekutana ti “bantangu ya mpasi.” (2 Tim. 3:1, NW) Bantu ya bisika yonso kele mpenza na mfunu ya kivuvu. Bansamuni ya Kimfumu kesepelaka na kumona nde luse ya bantu yina kuvandaka ya kukonda kivuvu lenda kuma ti kivuvu ntangu bo mendima nsangu ya mbote. Bapasudi-nzila ya ntangu yonso, yina kelutisaka bangunga kuluta 800 konso mvula na kisalu yai ya kegulusaka luzingu, kevandaka na kyese mingi mpenza!—1 Tim. 4:16.
5, 6. Inki lenda sadisa nge na kukuma mupasudi-nzila ya ntangu yonso?
5 Keti nge me bakaka ntangu ya kuyindula kana nge lenda sala bonso mupasudi-nzila ya ntangu yonso? Yo lenda lomba kusumba “ntangu ya mbote” na bisalu ya kele mfunu fioti. (Ef. 5:15, 16) Bantu mingi mesalaka buna mpi mekumisaka luzingu na bo pete, yo mesadisaka bo na kubaka ndambu ya ntangu na kisalu na bo ya kinsuni sambu na kulutisa ntangu mingi na mambote ya Kimfumu. Keti nge lenda yidika mambu to bisalu na nge sambu na kuvukana ti bo?
6 Lomba Yehowa mayele sambu na kusala manaka ya mbote. (Yak. 1:5) Inki balusakumunu nge lenda vingila na kubaka? Bimvwama mingi ya kimpeve! Yehowa tapesa nge mpi bima ya kinsuni yina nge kele na yo mfunu. (Mat. 6:33) Bayina kemekaka Yehowa na mambu yai tabaka “mambote mingi-mingi bonso mvula.”—Mal. 3:10.