Balukutakanu na Beto ya Distrike—Kimbangi ya Ngolo Sambu na Kyeleka
1. Bankinsi yina vandaka kusalama na bansungi vandaka kupesa bantu ya Izraele dibaku ya kuyindulula mpi kutadila inki bakyeleka ya kimpeve ya mfunu?
1 Bantu ya Izraele vandaka kuvukana mbala tatu konso mvula sambu na kusala bankinsi ya bansungi. Ata nsiku vandaka kulomba babakala mpamba na kukwenda na bankinsi yango, mbala mingi mabuta ya mvimba vandaka kukwenda na Yeruzalemi sambu na kuvukana na balukutakanu yina ya kyese. (Kul. 16:15, 16) Balukutakanu ya mutindu yina vandaka kupesa bo mabaku ya kuyindulula mpi ya kutadila bakyeleka ya mfunu ya kimpeve. Inki kele mwa bakyeleka yango? Kyeleka mosi kele nde Yehowa kekabaka mpi yandi kele Mupesi-Bima ya zola. (Kul. 15:4, 5) Kyeleka yankaka kele nde beto lenda tula ntima na lutwadisu mpi lutaninu na yandi. (Kul. 32:9, 10) Bantu ya Izraele lendaka mpi kuyindulula dyambu yai: sambu bo vandaka bantu yina Yehowa ponaka sambu na zina na yandi, yo lombaka nde bo monisa mbote-mbote lunungu na yandi. (Kul. 7:6, 11) Bubu yai beto kebakaka mpi mambote ya mutindu mosi na balukutakanu na beto ya distrike ya konso mvula.
2. Inki mutindu manaka ya lukutakanu ya distrike kepesaka nsemo na kyeleka?
2 Manaka ya Kepesaka Nsemo na Kyeleka: Na balukutakanu na beto ya distrike, beto kelandaka ti kyese badiskure, badrame, bansonga, mpi ba-interview ya kesadisaka beto na kubakisa mpi kusadila mbote-mbote bakyeleka ya Biblia. (Yoa. 17:17) Mambu mingi mesalama dezia sambu na lukutakanu ya distrike yai kefinama. Organizasio ya Yehowa keyidika manaka mosi yina tatadila mpi tatubila mambu ya bantu kele na yo mfunu bubu yai na ntoto ya mvimba. (Mat. 24:45-47) Keti nge kele ti mpusa ya ngolo ya kumona mpi ya kuwa mambu to masolo yina tasalama?
3. Inki beto fwete sala sambu na kubaka mambote na manaka ya lukutakanu?
3 Ya kyeleka, beto tabaka mambote mingi kibeni kana beto kele pana mpi ketula dikebi ya ngolo bilumbu yonso tatu. Kana nge melomba ntete ve konzie na mfumu na nge ya kisalu, sala yo ntangu yai. Baka bangidika sambu na kupema mbote-mbote konso mpimpa; mpidina, nge lenda landa manaka mbote. Bantu yankaka kemonaka nde kutala mutubi mpi kusonika mwa mambu ya mfunu kesadisaka bo na kulanda na dikebi yonso. Kubika ve nde telefone na nge to apareyi yankaka kukatula nge to bantu yankaka dikebi. Kusosa ve kusolula, kutinda ba message na telefone ntangu manaka kesalama.
4. Inki mutindu bibuti lenda sadisa bana na bo na kubaka mambote ntangu lukutakanu kesalama?
4 Na bamvula ya Kisabatu, ntangu mabuta ya Izraele vandaka kuvukana sambu na kuwa Nsiku yina bo vandaka kutanga na Nkinsi ya Bisasa, bo vandaka kukwenda ti “bana” na bo, mpidina bo ‘lendaka kuwa mpi kuzaba yo.’ (Kul. 31:12) Yo kepesaka kikesa na kumona mabuta mevanda kisika mosi na lukutakanu mpi bana-fyoti kelanda na dikebi yonso mpenza! Ntangu beno tavutuka na banzo na nkokila, yo tavanda mbote na kutadila mpi kutubila bangindu ya beno sonikaka na lukutakanu mpi yina kusepedisaka beno mingi. “Bana [kevandaka] na kikalulu ya kusala mambu ya buzoba”; yo yina na ntangu ya kupema, yo tavanda mbote nde bibuti kukengila bana na bo, yika mpi bayina mekuma batoko na kisika ya kubika bo na ‘kusala mambu na bo mosi.’—Bing. 22:15; 29:15.
5. Inki mutindu bikalulu na beto ya mbote takumisa kyeleka?
5 Bikalulu na Beto ya Mbote Kekumisaka Kyeleka: Bikalulu na beto ya mbote kekumisaka kyeleka ntangu beto kele na mbanza yina lukutakanu kesalama. (Tito 2:10) Bapolisi mpi bamfumu yankaka monaka mutindu kimvuka mosi vandaka kulanda minsiku ya bukristu, mpi kumonisa ntima-nda mpi bumbote na bantu yonso. (Kol. 4:6) Na mvula meluta, mfumu mosi ya bansaka (sports et loisires) ya bwala mosi yina lukutakanu vandaka kusalama sonikilaka biro ya filiale nde: “Mu kezola kusikisa beno sambu na bikalulu ya mbote mpi bunkete ya bantu na beno na nsungi ya lukutakanu yai ya distrike.”
6. Inki mutindu beto lenda kumisa kyeleka na kulwata na beto ntangu beto kele na mbanza yina lukutakanu kesalama?
6 Kulwata makaro na beto ya lukutakanu ya distrike kesadisaka kaka ve na kupanza nsangu ya lukutakanu to kusadisa beto na kuzaba bawi yankaka, kansi mpi na kuta kimbangi na bantu yina ketala. Bantu ya mbanza yina lukutakanu kesalama tamona nde bantu yina kele ti makaro ya lukutakanu melwata bilele ya mbote ti bukatikati, kansi ve bilele ya mbi mpi ya ketedimisa mpusa ya kuvukisa nitu, mutindu bantu mingi ya nsi-ntoto kelwataka. (1 Tim. 2:9, 10) Yo yina, beto fwete tula dikebi na bilele na beto mpi na mutindu na beto ya kuyidika nitu ntangu beto kele na mbanza yina lukutakanu kesalama. Kulwata bilele ya nkufi to polo tapesa ve lukumu na kyeleka. Ata ntangu lukutakanu kesalama na stade mosi ya kukonda ludi, bilele na beto fwete vanda ya mbote. Kana na nima ya lukutakanu beto kezola kulwata bilele yankaka sambu na kukwenda na restora, beto fwete yibuka nde beto kele kaka bawi yina mekwisa na lukutakanu mpi beto fwete lwata ve bilele ya kisaka-saka.
7. Tubila mutindu mosi yina beto lenda sepela ti bumosi na beto ya Bukristu na nsungi ya lukutakanu ya distrike.
7 Na bankinsi yina ya bansungi, bantu ya Izraele vandaka na kyese ya kuvukana mpi kupesana kikesa ti bansambidi yankaka yina vandaka kukatuka na makanda mpi na bansi yankaka; yo sadisaka bo mpi na kuvanda na bumosi. (Bis. 2:1, 5) Na nsungi ya lukutakanu ya distrike, kimpangi na beto ya Bukristu, yina beto lenda fwanisa ve ti kima yankaka, kemonanaka pwelele mpenza. Mbala mingi, dyambu yai ya kesepedisa mingi ya paladisu na beto ya kimpeve keyitukisaka bantu. (Nk. 133:1) Na ntangu ya kupema, olie ya kukwenda kusumba madia na nganda ya kisika ya lukutakanu, yo tavanda mbote mingi mpenza na kunata mwa madya na beto mosi mpi kusadila mbote mabaku yina beto kele na yo ya kukutana mpi kusolula ti bampangi ya babakala mpi ya bankento yina mevanda na lweka na beto!
8. Inki bikuma kepusaka beto na kusala kisalu ya luzolo ya mbote kana mpila kele?
8 Mbala mingi, mutindu beto kesalaka balukutakanu na beto ya distrike na ndonga mpi keyidikaka mambu mbote-mbote kebendaka dikebi ya bantu yina ketalaka, mingi-mingi kana bo mezaba nde bantu kesala bisalu yina yonso kele bampangi ya luzolo ya mbote. Keti nge lenda kudipesa “na luzolo na [nge] mosi” sambu na kusala na lukutakanu ya distrike? (Nk. 110:3) Mbala mingi mabuta ya mvimba kepesaka maboko na bisalu ya luzolo ya mbote sambu na kulonga bana na bo na kusadisa bankaka. Kana nge kevandaka nsoni-nsoni, kusala na lukutakanu ya distrike kele mutindu ya mbote ya kukutana ti bampangi yankaka. Mpangi-nkento mosi tubaka nde: “Katula dibuta na mono mpi mwa banduku na mono, mono zabaka ve bantu mingi kuna. Kansi ntangu mono pesaka maboko na kisalu ya kutula bunkete, mono kutanaka ti bampangi mingi ya babakala mpi ya bankento. Yo vandaka dyambu mosi ya kitoko mpenza!” Kusala kinduku ti bampangi mingi ntangu beto kekwenda na lukutakanu ya distrike tapesa beto kyese mingi. (2 Kor. 6:12, 13) Kana nge mesalaka ntete ve kisalu ya luzolo ya mbote, zabisa bankuluntu ya dibundu na beno na kusonga nge mambu yina nge fwete lungisa sambu na kusala yo.
9. Inki mutindu beto lenda bingisa bantu yankaka na kukwisa na lukutakanu ya distrike?
9 Bingisa Bankaka na Kuwa Kyeleka: Bonso na bamvula yina meluta, bamposo tatu na ntwala ya kusala lukutakanu na beto ya distrike, beto tasala kampanye sambu na kubingisa bantu na kuvukana ti beto. Mabundu fwete kabula baemvitasio na teritware na bo ya mvimba, kana mpila kele. (Tala lupangu “Inki Mutindu Beto Takabula Baemvitasio?”) Baemvitasio yonso yina tabikala, beto fwete nata yo na lukutakanu ya distrike. Bo tapesa yo na bampangi yankaka sambu na kuta kimbangi ya dibaku ya mbote na mbanza yina lukutakanu ya distrike kesalama.
10. Ta baeksperiansi yina kemonisa nde kampanye ya kukabula baemvitasio yina kesalamaka konso mvula kebutaka bambuma ya mbote.
10 Keti bantu kendimaka baemvitasio yina beto kekabulaka na kampanye yai ya konso mvula? Na lukutakanu mosi ya distrike, mpangi mosi ya kisalu ya kuyamba bantu sadisa bankwelani mosi na kuzwa kisika ya kuvanda. Bo zabisaka yandi nde, bo bakaka emvitasio mpi “bo monaka nde yo vandaka kitoko mpenza.” Bo salaka nzyetelo ya bakilometre kuluta 320 sambu na kukwisa na lukutakanu! Na mbandu yankaka, mpangi-nkento mosi vandaka kusamuna nzo na nzo; yandi monaka nde muntu mosi kele na kutula dikebi na mambu ya lukutakanu; yandi pesaka muntu yango emvitasio. Na nima, mpangi-nkento bakaka ntangu ya kutadila emvitasio yina ti yandi. Bilumbu fyoti na nima, ntangu mpangi-nkento vandaka na lukutakanu, yandi monaka bakala yango ti nduku na yandi, bo mesimba mukanda mosi ya mpa yina basikaka na lukutakanu!
11. Sambu na nki kukwenda na balukutakanu na beto ya distrike ya konso mvula kele mfunu?
11 Kuta bankinsi ya bansungi vandaka ngidika mosi ya zola yina Yehowa kusalaka sambu na kusadisa bantu ya Izraele na ‘kusadila yandi na ntima mosi ya mbote mpi kulemfukila yandi.’ (Yoz. 24:14) Mutindu mosi, kukwenda na balukutakanu na beto ya distrike ya konso mvula tasadisa beto na ‘kulanda kuzinga na kieleka’ mpi yo kele kitini ya mfunu ya lusambu na beto. (3 Yoa. 3) Bika nde Yehowa kusakumuna bikesa ya bantu yonso yina kezolaka kyeleka na kukwenda na lukutakanu ya distrike mpi kubaka mambote ya mingi!
[Bangogo sambu na kubenda dikebi ya kele na lutiti 4]
Bikalulu na beto ya mbote kekumisaka kyeleka ntangu beto kele na mbanza yina lukutakanu kesalama
[Bangogo sambu na kubenda dikebi ya kele na lutiti 5]
Bamposo tatu na ntwala ya kusala lukutakanu na beto ya distrike, beto tasala kampanye sambu na kubingisa bantu na kuvukana ti beto
[Lupangu ya kele na lutiti 3-6]
Bangibusa ya Lukutakanu ya Distrike 2012
◼ Bangunga: Bilumbu yonso tatu manaka tayantikaka na 8:20. Kansi sambu na bambanza yai: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire mpi Tshikapa, manaka ya balukutakanu ya distrike tayantikaka na 9:20 konso kilumbu. Bakyelo takangukaka na 7:00 to na 8:00, na kutadilaka mutindu mambu kesalamaka na bwala na beno. Ntangu mutubi tazabisa nde miziki ya luyantiku kezola kubula, beto yonso fwete kwenda kuvanda na bisika na beto na mpila nde manaka kuyantika na mutindu mosi ya mefwana. Manaka tasuka na 15:55 na Kitanu ti na Mposo, mpi na Lumingu yo tasuka na 14:40. Sambu na bambanza ya beto metanga na zulu, manaka tasukaka ngunga mosi na nima.
◼ Kubumba Bisika ya Kuvanda: Beno lenda bumba bisika ya kuvanda kaka sambu na bantu yina kezingaka ti beno nzo mosi, bayina kekwisa kumosi ti beno na vwatire, to sambu na bayina kelongukaka Biblia ti beno.—1 Kor. 13:5.
◼ Madya ya Midi: Beto kelomba beno na kunata madya ya kukonda kilo kansi ya mefwana, mu mbandu: mampa, bambuma (mankondo), nguba, mikati to bagato. Beno fwete tula masa, kafe to te na kima mosi yina kepasukaka ve sambu na kubuya bigonsa. Ata muntu mosi ve kele ti nswa ya kunata malafu ya kelausaka na lukutakanu ya distrike. Kana beto nata madya na beto ti bima na beto ya kunwa, beno tavanda ve na mfunu ya kusumba bima na bantu ya ketaka. Kubuya kusumba bima na bantu yina kele na nganda tasadisa beto na kuta kimbangi ya mbote na yina metala bunkete na beto. (Beno simba nde: Bantu yina keteka kele ve ti nswa ya kukota na kisika ya lukutakanu yo vanda na konso ntangu yina.—Yoa. 2:13-17.)
◼ Bunkete: Mbala mingi, yo kemonanaka nde bantu yina kesumbaka madya na bantu yina keteka, kelosaka na ntoto bapapie to basashe ya bo kekangilaka bo bima. Yo kesalaka nde kibansala ya mvimba kufuluka ti bapapie, basashe, babusho mpi buna na buna. Kana muntu mebaka lukanu ya kusumba kima mosi na bantu yina keteka (mu mbandu: bazoka, babisikwiti, bagato, mbisi to konso kima yankaka), yandi kele ti mukumba ya kulosa papie to sashe yina na kati ya bitunga ya bima ya mvindu kansi na ntoto ve. Kana beto memona nde muntu mosi melosa papie to sashe na ntoto, beto fwete lokuta yo mpi kulosa yo na bisika yina bo meyidika sambu na bima ya mvindu. Bampangi, beto kelomba beno na kusala mpenza kikesa sambu kisika ya beto kesadila lukutakanu na beto mpi nzyunga na yo kubikala bunkete. Konso muntu yina kele na lukutakanu fwete tula dikebi na yina metala bunkete. Kana konso muntu kesala mpidina, na nsuka ya kilumbu, kisika ya lukutakanu tabikala bunkete. Beto fwete monisa bikalulu ya Nzambi ya santu yina beto kesambilaka.—1 Pie. 1:15, 16; Kub. 19:10; Kul. 23:14.
◼ Makabu: Beto lenda monisa ntonda na beto na bangidika ya lukutakanu ya distrike ntangu beto ketula makabu ya luzolo ya mbote na lukutakanu ya distrike sambu na kisalu yina kesalama na ntoto ya mvimba. Ba chèques yonso yina bantu kepesa, bo fwete tula yo na zina ya “Association ‘Les Témoins de Jéhovah.’”
◼ Ba-Aksida mpi Maladi ya Kintulumukina: Kana maladi mekanga muntu mosi na kintulumukina na kisika ya lukutakanu ya distrike, beto kelomba beno na kusolula ti mpangi mosi ya kisalu ya kuyamba bantu, ebuna yandi tazabisa nswalu departema ya Lusadisu ya Ntete na mpila nde bampangi yina kele na lukutakanu mpi ya mezaba kisalu yango mbote kutadila maladi yango mpi kupesa lusadisu na bo.
◼ Bankisi: Kana munganga melombaka nge na kunwa nkisi mosi buna, kuvila ve na kunata yo, sambu bankisi ya mutindu yina tavanda ve na lukutakanu. Beno fwete losa bantunga ya bantu ya diabete to bantunga yankaka na kisika mosi ya bo meyidika sambu na kulosa bima ya mutindu yina, kansi ve na bitunga ya bima ya mvindu ya lukutakanu ya distrike.
◼ Kubaka Bafoto: Kana beno kebaka bafoto na ntangu lukutakanu kesalama, beto kelomba beno na kusadila ve flashe. Beto kelomba beno na kubinga ve bantu yina kekangaka bafoto na kukwisa na kisika ya lukutakanu. Kana beno mona bo na kisika ya lukutakanu kekanga bafoto, beno kwenda ve na bo sambu bo kanga beno bafoto.—Yoa. 2:13-17.
◼ Formilere Veuillez suivre l’intérêt (S-43): Beno tasadila formilere veuillez suivre l’intérêt sambu na kupesa bansangu ya ketadila konso muntu yina sepelaka ti nsangu ntangu beno vandaka kuta kimbangi ya dibaku ya mbote na nsungi ya lukutakanu ya distrike. Bansamuni fwete nata formilere mosi to zole na lukutakanu ya distrike. Na nima ya kufulusa yo, beno lenda pesa yo na Departema ya Mikanda to na sekretere ya dibundu na beno ntangu beno tavutuka na nzo.—Tala Kisalu na Beto ya Kimfumu ya Mayi 2011, lutiti 3.
◼ Barestora: Kumisa zina ya Yehowa na bikalulu na nge ya mbote na barestora. Kana na bwala yina yo kelombaka kukabila bansadi ya restora mwa mbongo, pesa bo.
◼ Na Bisika na Beto ya Kulala: (1) Kana bo mepesa beto kisika ya kulala, beto fwete lutisa ve ntalu ya bantu yina munkwa nzo mepesa beto. (2) Kana nge tazola ve kuvanda na nzo yina bo mepesa nge, beto kelomba nge na kutuba yo kukonda kusukinina. (3) Na ntwala ya kulamba, lomba ntete nswa na munkwa nzo to na bampangi yina kele na mukumba ya kutadila bisika ya kulala na Nzo ya Kimfumu na mpila nde bo baka konso ngidika yina kele mfunu. (4) Kusadila ve na mutindu ya mbi ngidika yina bampangi mebaka sambu na banzenza. Beto fwete vanda ti bukatikati. (5) Bunkete kekwendaka kumosi ti kikalulu ya kukangama na Nzambi. Kisika na beno ya kulala fwete vanda ntangu yonso bunkete, ya kuyidika mbote mpi na ndonga. Dyambu yai ketadila mpi Nzo ya Kimfumu, yina beno lenda sadila bonso kisika ya kulala sambu na bampangi yina kekatuka na mabundu ya ntama. (6) Monisa mbuma ya mpeve na mutindu na nge ya kuzinga ti bankaka, yo vanda ti munkwa nzo to bampangi yankaka ya Bakristu yina nge kele ti bo kisika mosi.—Gal. 5:22, 23.
◼ Kisalu ya Luzolo ya Mbote: Konso muntu yina kezola kusala kisalu ya luzolo ya mbote na lukutakanu ya distrike fwete kwenda na Departema ya Kisalu ya Luzolo ya Mbote. Bana yina kele ti bamvula na nsi ya 16 lenda sala kisalu yango na lutwadisu ya bibuti na bo to ya mbuta mosi yina bibuti mepesaka nswa.
[Lupangu ya kele na lutiti 6]
Inki Mutindu Beto Takabula Baemvitasio?
Sambu na kusala teritware na beto ya mvimba, yo lenda lomba nde beto tuba mambu mingi ve. Beto lenda tuba nde: “Mbote. Beto kesala kisalu ya kukabula emvitasio yai na ntoto ya mvimba. Ya nge yo yai. Nge takuta bansangu mingi na kati.” Tuba na kyese. Kana mpila kele, ntangu beno kekabula baemvitasio na Mposo ti na Lumingu, beno fwete kabula mpi baperiodike.