Beto Sadisa Bantu Yina Lenda Longuka Ntete Ve Mukanda Biblia Kelongaka
1. Keti na luyantiku bantu yonso ke sepelaka ti mukanda Biblia Kelongaka? Tendula.
1 Sambu muntu kukuma nsadi ya Yehowa, yandi fwete longuka mambu yina Biblia ke longaka. Kansi, bantu ya nkaka ke vandaka ve na dibundu ya Bukristu mpi ke tadilaka ve Biblia bonso Ndinga ya Nzambi. Bankaka diaka ke kwikilaka ve na Nzambi ata fioti mpi ke zitisaka ve Biblia. Inki bisadilu me fwana na kusadisa bantu yina lenda ndima ve mukanda Biblia Kelongaka na mbala ya ntete? Mabanza yai ya ke landa me katuka na bansamuni ya bansi kiteso ya 20.
2. Kana muntu kuzabisa beto nde yandi ke kwikilaka ve na Nzambi, nki beto fwete sosa kuzaba mpi sambu na nki?
2 Bayina Ke Kwikilaka Ve na Nzambi: Kana muntu ke tuba nde yandi ke kwikilaka ve na Nzambi, yo kele mfunu na kusosa kuzaba kikuma. Keti yo kele sambu yandi ke kwikilaka na evolisio? Keti yandi ke kwikilaka diaka ve na Nzambi sambu na kukonda lunungu ya nsi-ntoto to luvunu ya mabundu? Keti insi na yandi ke buyisaka bantu na kukwikila na Nzambi? Ziku yandi ke buyaka ve na ntima mosi nde Nzambi kele, kansi yandi me monaka ve mfunu ya kukwikila na yandi. Bansamuni mingi ke yulaka ngiufula yai: “Keti nge ke yindulaka ntangu yonso mutindu yai?,” mpi yo ke pusaka bawi na kutendula kikuma. Widikila yandi mpi kuzenga yandi ndinga ve. Ntangu beto ke bakisaka kikuma yina muntu ke kwikilaka ve na Nzambi, beto ta zaba mutindu ya kupesa mvutu mpi mukanda ya kupesa yandi.—Bing. 18:13.
3. Inki mutindu beto lenda zitisa muntu mpi balukwikilu na yandi?
3 Ntangu nge ke pesa mvutu, zikisa nde mvutu na nge ke pesa ve muwi ngindu nde nge ke vwenza dibanza na yandi. Dibanza yai me katuka na États-Unis: “Yo kele mfunu mingi na kuzitisa kimpwanza ya bantu na mambu ya bo ke kwikilaka. Na kisika ya kusosa kunungisa mabanza na nge, yo me luta mbote na kuyula bangiufula yina ta pusa bantu na kuyindula mpi na kubaka balukanu bo mosi.” Na nima ya kuwidikila dibanza ya muwi, mbala mingi nkengi-ntambudi mosi ke yantikaka mvutu na yandi ti ngiufula yai: “Keti nge me tadilaka dezia dibanza yai?”
4. Inki mutindu beto lenda sadisa Babudiste?
4 Kukwikila na Nzambi ke vandaka mpasi sambu na Babudiste. Bansamuni ya nkaka ya Grande-Bretagne ke sadilaka kamukanda La paix et le bonheur durables : comment les trouver ntangu bo ke taka kimbangi na bantu ya mutindu yai. Na nima ya kutadila bangogo ya luyantiku, bo ke tubilaka kitini “Existe-t-il vraiment un Créateur Très-Haut ?” mpi diaka kitini “Un guide bénéfique pour tous les humains.” Na nima, bo lenda pesa mukanda Biblia Kelongaka mpi kuzabisa muwi nde: “Ata nge ke kwikilaka ve na Nzambi, kulonguka Biblia kele mfunu sambu yo kele ti lutwadisu ya mbote.” Mupasudi-nzila mosi na États-Unis yina ke samunaka na teritware ya Bashinwa tubaka nde: “Bantu mingi na teritware na beto ke zolaka kutanga. Mbala mingi bo ke manisaka kutanga mikanda na beto na ntwala nde beto vutukila bo. Kansi bo lenda bakisa ve dibanza ya kulonguka Biblia. Yo yina, mono ke sepelaka kupesa bo kamukanda Nsangu ya Mbote na mbala ya ntete sambu bo me sonikaka yo na mutindu yina ke siamisaka na kusolula.” Nkengi mosi ya nziunga yina ke talaka bampangi ya ke tubaka ndinga ya Kishinwa na États-Unis ke tuba nde nge lenda pesa mukanda Biblia Kelongaka na mbala ya ntete. Kansi, yo ta vanda mbote kuluta na kuyantika kulonguka kapu ya 2, yina ke tubila bangogo ya luyantiku ya Biblia, na kisika ya kulonguka kapu ya 1, yina ke tubila Nzambi.
5. Sambu na nki kuvanda ntima-nda kele mfunu?
5 Yo ke lombaka ntangu sambu muntu kukwikila na Nzambi, yo yina kuvanda ntima-nda kele mfunu. Ntangu beto ke solula ti muntu na mbala ya ntete, muntu lenda ndima ve nde Ngangi kele. Kansi, na nima, yandi lenda ndima mpi kutuba nde yandi me bakisa kikuma yina muntu lenda baka lukanu yina.
6. Sambu na nki bantu ya nkaka ke tudilaka ve Biblia dikebi?
6 Bantu Yina Ke Tudilaka Ve Biblia Dikebi to Ke Tudilaka Yo Ve Ntima: Mbala mingi muntu yina ke ndima nde Nzambi kele, lenda sepela ve na mambu yina Biblia ke longaka sambu yandi ke kwikilaka ve nde yo kele Ndinga ya Nzambi. Ziku yandi ke zingaka na nsi yina bantu kele ve Bakristu mpi ke tadilaka Biblia bonso mukanda ya Kikristu. To yandi ke zingaka na nsi yina bo ke bingaka nde ya Bukristu kansi bantu ke kudipesa mingi na mambu ya kinsuni mpi yandi lenda yindula nde Biblia kele mfunu ve sambu na yandi. Inki mutindu beto lenda sadisa bantu yai na kusepela na Biblia mpi nsuka-nsuka bo ndima na kulonguka mukanda Biblia Kelongaka?
7. Inki ke vandaka mbala mingi mutindu ya mbote ya kubenda dikebi ya bantu na Biblia?
7 Biro ya filiale ya Grese sonikaka nde: “Mutindu ya kuluta mbote ya kusadisa bayina ke tulaka ve dikebi na Biblia kele kaka kukangula Biblia mpi kusonga bo mambu yina kele na kati. Bansamuni mingi me bakisaka nde nsangu ya Biblia ke vandaka ti bupusi ya ngolo na ntima ya muntu kuluta mambu yina muntu lenda tuba. (Baeb. 4:12) Kutanga zina ya Nzambi na Biblia me sadisaka bantu mingi na kuyedisa mpusa ya kutudila Biblia dikebi.” Biro ya filiale ya Inde sonikaka nde: “Kieleka na yina me tala luzingu mpi lufwa ke bendaka mpenza dikebi ya Bahindu mingi. Ebuna, Biblia ke sila nsi-ntoto mosi ya kukonda kupona bantu na kutadila ndonga na bo.” Kutubila bampasi yina bantu ke kutanaka ti yo me pesaka bansamuni dibaku ya kumonisa mambu ya Biblia ke tubaka yina Kimfumu ya Nzambi ta yidika.
8. Inki beto lenda zabisa bantu yina ke ndimaka ve Biblia sambu na Kikristu?
8 Kana muntu ke ndimaka ve Biblia sambu na Kikristu, songa yandi nde Kikristu me monisaka Biblia ti malongi na yo na mutindu ya mbi. Biro ya filiale ya Inde sonikaka nde: “Bantangu ya nkaka, beto fwete sadisa bantu na kubakisa nde mabundu kele ve bankwa Biblia.” Bo tubaka nde mbala mingi Bahindu ke sepelaka ti kitini ya 4 ya kamukanda Quel est le but de la vie ? Comment le découvrir ?, yina ke tendulaka mutindu mabundu me salaka ngolo sambu na kubebisa mpi kufwa Ndinga ya Nzambi. Mupasudi-nzila mosi na Brésil ke zabisaka bantu nde: “Sambu na nki ve kusosa kuzaba mambu mingi ya kele na Biblia? Bantu mingi ke salaka yo ti mabanza ya mbote kukonda kukangama na dibundu mosi buna. Mambu yina nge ta longuka lenda yitukisa nge.”
9. Sambu na nki beto fwete yambula ve kana muntu me sepela ve ti malongi ya Biblia na mbala ya ntete?
9 Yehowa ke talaka ntima ya konso muntu. (1 Sam. 16:7; Bing. 21:2) Yandi ke bendaka bantu ya ntima ya mbote na lusambu ya kieleka. (Yoa. 6:44) Bo me longaka ntete ve bantu mingi ya mutindu yai mambu ya Nzambi to bo me zaba mambu fioti na Biblia. Kisalu na beto ya kusamuna ke pesaka bo dibaku ya “kuguluka mpi kubaka nzayilu ya sikisiki ya kieleka.” (1 Tim. 2:4) Yo yina, kana bantu mingi me sepelaka ntete ve na malongi ya Biblia, kuyambula ve! Sadila kisadilu mosi yina kele na ndinga na beno sambu na kubenda dikebi na bo. Nsuka-nsuka, nge lenda kotisa bo na mukanda Inki Biblia Kelongaka Mpenza? kisadilu na beto ya ntete-ntete ya kulonguka Biblia ti bantu?
[Lupangu ya kele na lutiti 4]
Kana muwi me tuba nde yandi ke kwikilaka ve na Nzambi, meka bangindu yai:
• Sambu na kuzaba kikuma, yula yandi nde: “Keti nge ke yindulaka ntangu yonso mutindu yai?”
• Kana yandi kele Budiste, sadila kamukanda La paix et le bonheur durables : comment les trouver, balutiti 9-12.
• Kana yandi ke kwikilaka na evolisio, bareferansi yai lenda sadisa yandi:
Masolo ya kulandana ya Réveillez-vous ! na ntu-diambu: «Hasard ou conception ?»
Video Les merveilles de la création révèlent la gloire de Dieu
Tumikanda Une vie pleinement satisfaisante : Comment ?, kitini ya 4; La vie a-t-elle été créée ?; mpi Cinq questions à se poser sur l’origine de la vie
• Kana yandi ke kwikilaka diaka ve na Nzambi sambu na bampasi mpi kukonda lunungu, bareferansi yai lenda sadisa yandi:
Mukanda Y a-t-il un Créateur qui se soucie de vous ?, kapu ya 10
Tumikanda Dieu se soucie-t-il vraiment de nous ?, kitini ya 6, mpi Quel est le but de la vie ?, kitini ya 6
• Kana muwi me tuba nde ziku Nzambi kele, kotisa yandi mbala mosi na mukanda Biblia Kelongaka. Yo ta vanda mbote na kuyantika na kapu ya 2 to na disolo ya nkaka yina ta sepedisa yandi.
[Lupangu ya kele na lutiti 5]
Kana muwi me tuba nde yandi ke kwikilaka ve na Biblia, meka bangindu yai:
• Tadila kapu ya 17 mpi ya 18 ya mukanda La vie: comment est-elle apparue ? Évolution ou création ?
• Sambu na Bahindu, sadila kamukanda Pourquoi adorer Dieu en amour et en vérité ?
• Sambu na Bayuda, sadila kamukanda Connaîtrons-nous un jour un monde sans guerre ?, balutiti 3-11.
• Tubila mambote ya kusadila minsiku ya Biblia. Nge lenda sadila mikanda yai sambu na kusonga muntu mfunu ya Biblia:
Réveillez-vous ! masolo ya kulandana na ntu-diambu: «De l’aide pour les familles»
Video La Bible : une force dans votre vie
Tumikanda Nsangu ya Mbote ya Mekatuka na Nzambi!, dilongi ya 9 mpi ya 11; Un livre pour tous, balutiti 22-26; mpi Une vie pleinement satisfaisante : Comment ?, kitini ya 2
Sambu na Babudiste, sadila kamukanda La voie qui mène à la paix et au bonheur, balutiti 3-7.
Sambu na Bamizuluma, sadila kamukanda La vraie foi : le chemin qui mène au bonheur, kitini ya 3.
Kana nge ke samuna na kisika yina bantu ke vandaka ti bangindu ya mbi sambu na Biblia, yo lenda vanda ve mbote na kuzabisa muntu kisina ya mambu ya mayele yina nge ke longa yandi me katuka tii kuna nge ta sala bamvutukila mingi.
• Tendula mutindu bambikudulu ya Biblia me lunganaka. Nge lenda sadila bareferansi yai:
Video La Bible : un récit historique exact, des prophéties dignes de foi
Kamukanda Un livre pour tous, balutiti 27-29
• Ntangu muntu me yula masolo yina Biblia ke longaka kotisa yandi mbala mosi na mukanda Biblia Kelongaka.
[Lupangu ya kele na lutiti 6]
Kana muwi me tuba nde “Mono ke kwikilaka ve na Nzambi,” nge lenda tuba nde:
• “Keti mono lenda tendudila nge na bunkufi diambu ya me ndimisaka mono na kukwikila na Ngangi?” Ebuna zabisa yandi mambu yina kele na mukanda Comment raisonner lutiti 72 tii na 74 to baka bangidika sambu na kunatila yandi mukanda yina yandi ta zola kutanga.
• “Kana Nzambi kele, nge ta zola nde yandi vanda muntu ya nki mutindu?” Bawi mingi ke pesaka mvutu nde bo ke zolaka kukwenda pene-pene na Nzambi mosi ya zola, ya lunungu, ya mawa mpi yina ke pona-ponaka ve. Songa yandi na nsadisa ya Biblia nde Nzambi kele ti bikalulu yina. (Yo ta vanda mbote na kusadila kapu ya 1 ya mukanda Biblia Kelongaka, yantika na paragrafe 6.)
Kana muwi me tuba nde “Mono ke kwikilaka ve na Biblia,” nge lenda tuba nde:
• “Bantu mingi ke yindulaka mutindu yina. Bankaka ke yindulaka nde Biblia ke wakanaka ve ti siansi to nde minsiku ya Biblia kele ve mfunu. Zabisa mono, keti nge me tangaka dezia Biblia? [Bika muntu yango kupesa mvutu. Na nima, songa yandi bangogo ya luyantiku yina kele na lutiti 3 ya kamukanda Un livre pour tous, mpi pesa yandi kamukanda yango.] Bantu mingi ke kwikilaka ve na Biblia sambu mabundu me monisaka malongi na yo na mutindu ya mbi. Na mbala ya nima, mono ta zola beto tadila mbandu mosi yina kele na lutiti 4 mpi 5.”
• “Bantu mingi ke ndimaka dibanza na nge. Keti mono lenda songa nge kima mosi yina yitukisaka mono na yina me tala Biblia? [Tanga Yobi 26:7; to Yezaya 40:22, yina ke monisaka nde Biblia kele siki-siki na mambu ya siansi.] Biblia kele mpi ti bandongisila ya mayele yina ke sadisaka mabuta. Na mbala ya nima, mono ta zola kusonga nge mbandu mosi.”
• “Matondo mingi mutindu nge me zabisa mono yo. Kana Nzambi sonikaka mukanda mosi sambu na bantu, nge ke yindula nde inki mambu zolaka kuvanda na kati?” Na nima, songa yandi diambu mosi yina me katuka na Biblia yina ke wakana ti dibanza na yandi.