DISOLO YINA KELE NA LUTITI YA ZULU | BAMBANGI YA YEHOWA KELE BANANI?
Bambangi ya Yehowa Ke Kwikilaka na Nki Mambu?
Beto ke kwikilaka nde: “Masonuku yonso kele ya kupemama na Nzambi mpi yo kele mfunu.” (2 Timoteo 3:16) Biblia ke sadisaka beto na kulonguka mambu ya me tala Ngangi mpi na kuvanda ti luzingu ya mbote.
Biblia ke tuba nde: “Bika bantu kuzaba nde nge, yina zina na nge kele Yehowa, nge mpamba kele Muntu ya Kuluta Zulu na ntoto ya mvimba.” (Nkunga 83:18, NW) Beto ke sambilaka kaka Yehowa Nzambi mpi sambu beto kele Bambangi na yandi, beto ke salaka ngolo sambu na kuzabisa zina na yandi na bantu ya nkaka.—Yezaya 43:10-12.
Sambu beto kele Bakristu, beto ke kwikilaka nde Yezu, “Mwana ya Nzambi”a kwisaka na ntoto mpi kumaka Mesia. (Yoane 1:34, 41; 4:25, 26) Na nima ya lufwa na yandi, yandi futumukaka mpi kwendaka na zulu. (1 Bakorinto 15:3, 4) Diaka, Yezu kumaka Ntotila ya Kimfumu ya Nzambi. (Kusonga 11:15) Kimfumu yango kele luyalu mosi ya kieleka yina ta kumisa diaka ntoto Paladisu. (Daniele 2:44) Biblia ke tuba nde: “Bantu yina ke kudikulumusaka, bo ta zinga mbote na ngemba mpenza na ntoto.”—Nkunga 37:11, 29.
“Ntangu bo ke tangaka Biblia, bo ke kwikilaka nde Nzambi muntu ke tubila bo. Ntangu bo ke kutanaka ti bampasi na luzingu na bo, bo ke kangulaka Ndinga ya Nzambi mpi bo ke sosaka lutwadisu. . . . Sambu na bo, Ndinga ya Nzambi kele ya moyo.”
Bambangi ya Yehowa ke kwikilaka nde minsiku ya Biblia lenda natila bantu mambote ata bubu yai. (Yezaya 48:17, 18) Yo yina, beto ke zitisaka mbote-mbote minsiku yango. Mu mbandu, Biblia ke kebisaka beto na kusadila ve bima yina lenda bebisa mabanza mpi nitu na beto; yo yina beto ke nwaka ve makaya to bima yina ke lawusaka. (2 Bakorinto 7:1) Diaka, beto ke salaka ve mambu yina Biblia ke buyisaka, mu mbandu kulawuka malafu, kusala bizumba mpi kuyiba.—1 Bakorinto 6:9-11.
a Biblia ke binga Yezu nde “Mwana mosi kaka ya kubutuka ya Nzambi” sambu yandi kele kigangwa ya ntete yina Yehowa yandi mosi gangaka.—Yoane 3:18; Bakolosai 1:13-15.