DISOLO YA KULONGUKA 46
NKUNGA 17 ‘Me Zola’
Yezu Kele Nganga-Nzambi ya Nene Yina Ke Wilaka Beto Mawa
“Beto kele ve ti nganga-nzambi ya nene yina lenda wila beto ve mawa sambu na bifu na beto.”—BAEB. 4:15.
NA BUNKUFI
Beto ta mona mutindu kikalulu ya mawa ya Yezu ke monisaka nde yandi me fwana na kuvanda Nganga-Nzambi ya Nene mpi mambote yina beto ke bakaka sambu na kikalulu yango.
1-2. (a) Sambu na nki Yehowa tindaka Yezu na ntoto? (b) Inki beto ta longuka na disolo yai? (Baebreo 5:7-9)
BAMVULA kiteso ya 2 000 me luta banda Yehowa tindaka Mwana na yandi yina yandi ke zolaka mingi awa na ntoto. Sambu na nki? Sambu na kusala mambu mingi. Mu mbandu kukatula bantu na kimpika ya disumu mpi ya lufwa mpi kuyidika mambu sambu na kukatula bampasi yonso na ntoto. (Yoa. 3:16; 1 Yoa. 3:8) Yehowa zabaka mpi nde luzingu ya Yezu awa na ntoto kele formasio yina ta sadisa yandi na kuvanda Nganga-Nzambi ya Nene yina ta wila bantu mawa. Yezu kumaka Nganga-Nzambi ya nene na mvula 29 ya ntangu na beto, na nima ya mbotika na yandi.a
2 Na disolo yai, beto ta mona nde mambu ya Yezu kutanaka ti yo na ntoto ke sadisaka yandi na kuvanda Nganga-Nzambi ya Nene ya ke wilaka bantu mawa. Yo kele mfunu mingi na kuzaba mambu yai sambu yo ta sadisa beto na kusamba Yehowa kukonda mpasi mpi na kukumisa kinduku na beto ngolo ti yandi, mingi-mingi kana beto me lemba nitu sambu na masumu na beto to bifu na beto.—Tanga Baebreo 5:7-9.
MWANA YINA NZAMBI KE ZOLAKA MINGI KWISAKA NA NTOTO
3-4. Inki mutindu luzingu ya Yezu sobaka?
3 Mambu ya luzingu na beto yonso ke sobaka. Mu mbandu, yo lenda lomba nde beto yambula nzo na beto, dibuta na beto to mpi banduku sambu na kukwenda kisika ya nkaka. Kansi, ata luzingu ya muntu mosi ve me sobaka kuluta ya Yezu. Na zulu, Yezu vandaka wanzio ya kuluta nene. Yehowa vandaka kuzola yandi mingi kibeni mpi yandi vandaka ntangu yonso na kiese sambu yandi vandaka kusala ti Tata na yandi. (Nk. 16:11; Bing. 8:30) Kansi Bafilipi 2:7 ke tuba nde yandi ndimaka ‘kuyambula bima yonso’ na zulu mpi yandi kwisaka awa na ntoto sambu na kuzinga ti bantu ya kukonda kukuka.
4 Beto tadila mambu yina salamaka ntangu Yezu kwisaka awa na ntoto. Bibuti na yandi vandaka bansukami, yo yina bo pesaka bandeke zole ya fioti bonso kimenga na tempelo ntangu Yezu butukaka. (Levi 12:8; Luka 2:24) Ntangu bo songaka ntotila Erode nde Mesia me butuka, yandi sosaka mpila ya kufwa yandi. Yo yina, bibuti ya Yezu tinaka ti yandi na Ezipte sambu na kutanina yandi. (Mat. 2:13, 15) Luzingu ya Yezu sobaka ngolo kibeni.
5. Inki Yezu monaka ntangu yandi vandaka na ntoto mpi nki mutindu yo ke sadisaka yandi na kuvanda Nganga-Nzambi ya mawa? (Tala mpi kifwanisu.)
5 Ntangu Yezu vandaka na ntoto, yandi vandaka kumona mutindu bantu vandaka kuniokwama. Ntembe kele ve nde yandi waka mpasi yina muntu ke waka kana muntu ya yandi ke zolaka me fwa sambu bantu mingi yina yandi vandaka kuzaba fwaka na meso na yandi ntangu yandi vandaka na ntoto; yo ke monana nde ti papa na yandi Yozefi mpi fwaka. Ntangu Yezu vandaka na ntoto, yandi monaka bantu yina vandaka kubela lepre, bifwa-meso, bantu yina vandaka kukuka ve kutambula mpi bayina bana na bo fwaka. Ebuna, yandi vandaka kuwila bo mawa. (Mat. 9:2, 6; 15:30; 20:34; Mar. 1:40, 41; Luka 7:13) Ntangu Yezu vandaka na zulu, yandi vandaka kumona bampasi ya bantu. Kansi yandi bakisaka mbote-mbote kibeni bampasi yango ntangu yandi kwisaka na ntoto. (Yez. 53:4) Yandi bakisaka mutindu bantu ke kudiwaka kana bo ke kutana ti bampasi. Yezu vandaka mpi kudiwa bonso bantu yonso. Mu mbandu yandi vandaka kulemba, kudiyangisa mpi kuwa mawa.
Yezu vandaka kuwila bantu mawa mingi mpi yandi vandaka kusadisa bo (Tala paragrafe 5)
YEZU VANDAKA KUWILA BANTU MAWA
6. Mambu yina profete Yezaya sonikaka ke longa beto nki sambu na mawa ya Yezu? (Yezaya 42:3)
6 Ntangu Yezu vandaka awa na ntoto, yandi vandaka kuwila bantu yina bo vandaka kuniokula mawa. Yo lungisaka kibeni mambu yina profete Yezaya tubaka. Bantangu ya nkaka, Masonuku ya Kiebreo ke fwanisaka bantu ya ngolo mpi bamvwama ti masamba (jardin) yina ke butaka bima mbote to ti banti ya nene mpi ya nda. (Nk. 92:12; Yez. 61:3; Yer. 31:12) Kansi yo ke fwanisaka bansukami mpi bantu yina bo ke niokula ti mwa-nti ya bo me konika mpi tiya ya nsinga ya mwinda yina ke pela mbote ve mpi ya ke zola kufwa. Bantu ke monaka bantu ya mutindu yai nde bo kele ve mfunu. (Tanga Yezaya 42:3; Mat. 12:20) Yezaya sonikaka mambu yai na nsadisa ya mpeve santu sambu na kutubila zola mpi mawa yina Yezu ta monisila bantu yina bo ke niokula.
7-8. Inki mutindu Yezu lungisaka mambu yina Yezaya tubaka?
7 Matayo tubaka na Evanzile na yandi nde Yezu lungisaka mambu ya profete Yezaya tubaka nde: ‘Yandi ta zenga ve mwa-nti ya bo me konika mpi yandi ta fwa ve tiya ya nsinga ya mwinda yina ke pela mbote ve.’ Yezu salaka mambu mingi ya kuyituka sambu na kusadisa bantu yina bo vandaka kuniokula, bayina vandaka kudiwa bonso mwa-nti ya bo me konika mpi bantu yina vandaka ve kuyindula nde luzingu na bo ta bonga sambu bo vandaka kudimona bonso nsinga ya mwinda yina ke pela mbote ve mpi yina ke zola kufwa. Mu mbandu, Yezu kutanaka ti muntu mosi yina vandaka ti maladi ya lepre. Mbala ya nkaka muntu yango vandaka kuyindula nde yandi ta beluka diaka ve mpi yandi ta vanda diaka ve kisika mosi ti bantu ya dibuta na yandi mpi banduku na yandi. (Luka 5:12, 13) Yezu kutanaka mpi ti muntu mosi yina vandaka kifwa-makutu mpi yina vandaka kutuba ve mbote. Mona na mabanza mutindu muntu yango vandaka kudiwa ntangu yandi vandaka kumona bantu ya nkaka ke solula kansi yandi ke wa ve mambu ya bo ke tuba. (Mar. 7:32, 33) Yo me suka pana ve.
8 Na bilumbu ya Yezu, Bayuda mingi vandaka kuyindula nde kana muntu ke kutana ti bampasi, yo ke tendula nde yandi ke futa mfuka ya masumu na yandi to ya bibuti na yandi. (Yoa. 9:2) Yo yina, bo vandaka kuniokula bantu yango mpi bo vandaka kudimona kukonda mfunu. Kansi Yezu belulaka bo mpi yandi sadisaka bo na kundima nde Yehowa ke zolaka bo. Yo ke longa beto nki sambu na Yezu?
9. Inki mutindu Baebreo 4:15, 16 ke monisa nde Nganga-Nzambi na beto ya Nene ke wilaka beto mawa mingi?
9 Tanga Baebreo 4:15, 16. Ngogo ya Kigreki ya bo me sadila na baverse yai mpi ya bo me balula nde mawa ke tendula kuditula na kisika ya muntu ya nkaka mpi kuwa mpasi yina yandi ke wa. Polo sadilaka mpi ngogo yango na Baebreo 10:34 sambu na kutubila mutindu beto fwete wila bantu yina kele na boloko mawa. Mambu ya kuyituka yina Yezu vandaka kusadila bantu vandaka kumonisa nde yandi vandaka kuwila bo kibeni mawa mingi. Yandi belulaka ve bantu kaka sambu yo lombaka nde yandi sala yo, kansi sambu yandi vandaka kuwila bo mawa mpi yandi vandaka kuzola bo. Mu mbandu, yandi belulaka ve muntu ya lepre na kintama. Kansi Yezu simbaka yandi na nitu mpi mbala ya nkaka, yandi vandaka muntu ya ntete yina simbaka muntu yango na nitu banda ntangu yandi yantikaka kubela. Diaka, ntangu yandi zolaka kubelula muntu yina vandaka kifwa-makutu, yandi katulaka yandi kisika yina bantu mpi makelele vandaka mingi mpi yandi nataka yandi na kisika yina bo vandaka kaka bo zole, ebuna yandi belulaka yandi. Kilumbu mosi mpi, nkento mosi balulaka ntima na masumu na yandi, ebuna yandi yantikaka kuyobisa makulu ya Yezu ti mansanga na yandi mpi kudipa yo ti nsuki na yandi. Ntangu Mufarize mosi monaka yo, yandi wilaka nkento yango makasi mingi. Kansi Yezu kotilaka nkento yango. (Mat. 8:3; Mar. 7:33; Luka 7:44) Ya kieleka, Yezu buyaka ve ata fioti kuvukana ti bantu yina vandaka kubela to bayina salaka masumu ya nene. Nkutu, yandi vandaka kusepela nde bo kwisa pene-pene na yandi mpi yandi vandaka kuzola bo mingi. Yezu me sobaka ve mpi yandi ke wilaka beto mpi mawa.
INKI MUTINDU BETO LENDA LANDA MBANDU YA NGANGA-NZAMBI NA BETO?
10. Inki beto ke basisaka bubu yai sambu na kusadisa bifwa-makutu mpi bifwa-meso? (Tala mpi bifwanisu.)
10 Beto kele balongoki ya Yezu, yo yina beto ke landaka mbandu na yandi ya kuzola bantu mpi ya kuwila bo mawa. (1 Pie. 2:21; 3:8) Ata beto lenda belula ve bifwa-makutu mpi bifwa-meso, beto lenda sadisa bo na kimpeve. Mu mbandu, mikanda na beto ya ke tendulaka Biblia kele na bandinga ya bidimbu kuluta 100. Beto me basisaka mpi mikanda na bisono ya bifwa-meso (braille) na bandinga kuluta 60 sambu na kusadisa bantu yina ke monaka ve mbote to bayina kele bifwa-meso. Diaka, beto ke basisaka na bandinga kuluta 100 bavideo yina kele ti ndinga ya muntu mosi ya ke tendula mambu yina ke salama na video (audio-description). Bima yai yonso ke sadisaka bifwa-makutu mpi bifwa-meso na kukuma banduku ya Yehowa mpi ya Mwana na yandi.
Mikanda na beto kele na bandinga kuluta 1000 (Tala baparagrafe 10-11)
Na diboko ya kimama: Mikanda na beto kele na bandinga ya bidimbu kuluta 100
Na diboko ya kitata: Mikanda na beto kele na bisono ya bifwa-meso na bandinga kuluta 60
(Tala paragrafe 10)
11. Inki dibundu ya Yehowa ke salaka sambu na kumonisa nde bo ke wilaka bantu yonso mawa bonso Yezu? (Bisalu 2:5-7, 33) (Tala mpi bifwanisu.)
11 Dibundu ya Yehowa ke salaka yonso sambu na kusadisa bantu ya bisika yonso na kuzaba Yehowa. Mu mbandu na nima ya lufutumuku ya Yezu, yandi pesaka balongoki na yandi mpeve santu sambu bo longa nsangu ya mbote na bantu yina vukanaka na nkinsi ya Pantekoti, konso muntu “na ndinga na yandi mosi.” (Tanga Bisalu 2:5-7, 33.) Bubu yai mpi, Yezu ke twadisaka dibundu ya Yehowa mpi yo ke basisaka mikanda na bandinga kuluta 1 000, nkutu ata na bandinga yina bantu ke tubaka ve mingi. Mu mbandu bandinga ya nkaka ya fioti na Amerika ya Nordi mpi ya Sudi. Dibundu ya Yehowa me basisaka mikanda na bandinga yango kuluta 160 sambu na kusadisa bantu yonso ya ke tubaka yo na kuwa nsangu ya mbote. Diaka, mikanda na beto kele mpi na bandinga kuluta 20 ya ba-Rom. Bantu ya ke tubaka bandinga ya ba-Rom kele ve mingi mpi bamingi na kati na bo ke zingaka na Eropa ya sudi mpi ya Esti. Bantu ke niokulaka bo mpi ke mengaka bo, kansi Bambangi ya Yehowa ke sadilaka bo ve mambu mutindu yai. Nkutu, bantu mingi ya ke tubaka bandinga yai me ndimaka kieleka.
Na diboko ya kimama: Mikanda na beto kele na bandinga kuluta 160 ya Amerika ya Nordi mpi ya Sudi
Na diboko ya kitata: Mikanda na beto kele na bandinga kuluta 20 ya ba-Rom
(Tala paragrafe 11)
12. Inki diaka dibundu ya Yehowa ke salaka sambu na kusadisa bantu?
12 Dibundu ya Yehowa ke sukaka kaka ve na kulonga bantu nsangu ya mbote, kansi yo ke sadisaka mpi bampangi yina ke kutanaka ti bampasi, mu mbandu mipepe ya ngolo ya ke bebisaka bima, kunikana ya ntoto mpi bamvula ya ngolo ya ke bebisaka bima. Yo yina, bampangi ke vandaka ya kuyilama na kusadisa bampangi ya ke bwilaka bampasi. Dibundu ya Yehowa ke yidikaka bisika ya fioti mpi ya mbote sambu na kusadisa bantu na kusambila Yehowa mpi na kubakisa nde yandi ke zolaka bo mingi.
INKI MUTINDU NGANGA-NZAMBI NA BETO YA NENE TA SADISA NGE?
13. Inki mutindu Yezu lenda sadisa nge?
13 Yezu kele ngungudi ya mbote, yo yina yandi ke sadisaka beto na kuvanda ti bima yonso ya kimpeve sambu na kulanda kusadila Yehowa. (Yoa. 10:14; Baef. 4:7) Bantangu ya nkaka, bampasi ya luzingu lenda sala nde beto kudiwa bonso nsinga ya mwinda yina ke pela mbote ve mpi yina ke zola kufwa to bonso mwa-nti ya bo me konika. Beto lenda lemba kibeni nitu sambu beto ke bela ngolo, sambu na kifu mosi yina beto salaka to sambu beto ke wakana ve mbote ti mpangi mosi. Yo lenda sala nde beto tula dikebi kaka na bampasi ya beto ke kutana ti yo bubu yai mpi yo vandila beto mpasi na kutula dikebi na mambu ya mbote yina ke vingila beto na nsi-ntoto ya mpa. Kansi, kuvila ve nde Yezu ke mona bampasi na nge yonso mpi yandi ke bakisa bangindu na nge. Yandi ke zola kusadisa nge sambu yandi ke wila nge mawa. Yandi lenda pesa nge mpeve santu sambu yo sadisa nge na kuvanda ngolo kana nge me lemba nitu. (Yoa. 16:7; Tito 3:6) Yezu lenda sadila mpi bankuluntu ti bampangi ya nkaka sambu na kupesa nge kikesa mpi kusadisa nge.—Baef. 4:8.
14. Inki beto fwete sala kana beto me lemba nitu?
14 Kana nge me lemba nitu, kuvila ve nde Yezu kele Nganga-Nzambi na beto ya Nene mpi yandi ta sadisa nge. Yehowa tindaka Yezu na ntoto sambu na kupesa luzingu na yandi bonso kimenga mpi sambu na kubakisa mbote bampasi ya bantu. Yo yina kana beto me lemba nitu sambu na masumu na beto to bifu na beto, beto fwete ndima kibeni nde Yezu ta sadisa beto “na ntangu ya mbote.”—Baeb. 4:15, 16.
15. Inki sadisaka mpangi Stefano na kuvutukila Yehowa?
15 Yezu ke twadisaka mpi balongoki na yandi ntangu bo ke salaka yonso sambu na kusadisa bantu yina me yambulaka Yehowa na kuvutukila yandi. (Mat. 18:12, 13) Beto tubila mbandu ya mpangi Stefano.b Yandi salaka bamvula 12 na nganda ya dibundu mpi na nima yandi kwendaka diaka na lukutakanu mosi na Nzo ya Kimfumu. Yandi ke tuba nde: “Yo vandilaka mono mpasi na kukatula makulu na nzo sambu na kukwenda na balukutakanu, kansi mono kwendaka sambu mono vandaka ti nzala ya ngolo ya kusambila Yehowa ti bampangi. Bankuluntu yina solulaka ti mono yambaka mono na kiese yonso. Ya kieleka, bantangu ya nkaka mono vandaka kuzola kuyambula kusala bikesa ya kuvutukila Yehowa. Kansi bankuluntu songaka mono nde Yehowa ti Yezu ke zola nde mono sala yonso sambu na kuvutuka na dibundu. Yo yina ntangu mono vutukaka na dibundu, bampangi yambaka mono ti dibuta na mono na kiese yonso. Nkento na mono ndimaka mpi kulonguka Biblia mpi bubu yai beto yonso ke sadilaka Yehowa.” Nganga-Nzambi na beto ya Nene Yezu ke vandaka na kiese ntangu yandi ke monaka bikesa yina beto ke salaka sambu na kusadisa bantu yina me yambulaka Yehowa na kuvutukila yandi.
16. Sambu na nki beto fwete pesa Yehowa mersi mutindu yandi me pesaka beto Nganga-Nzambi ya Nene ya mawa?
16 Ntangu Yezu vandaka na ntoto, yandi sadisaka bantu mingi kibeni na ntangu ya me fwana. Bubu yai mpi, beto fwete ndima kibeni nde yandi ta sadisa beto na ntangu ya me fwana. Diaka na nsi-ntoto ya mpa, yandi ta katula beto na kimpika ya disumu mpi beto ta monaka diaka ve mpasi. Beto ke pesaka Yehowa mersi sambu yandi ke zolaka beto mingi mpi sambu yandi me pesaka beto Yezu, Nganga-Nzambi ya Nene yina ke wilaka beto mawa.
NKUNGA 13 Kristu Kele Mbandu na Beto
a Nge lenda tanga disolo “Baka na Valere Dibaku ya Kusambila Yehowa na Tempelo ya Kimpeve” ya kele na Nzozulu ya Nkengi ya octobre 2023 sambu na kubakisa mutindu mukumba ya Yezu ya Kinganga-Nzambi ya Nene me yingaka yina ya banganga-nzambi ya nene ya Bayuda.
b Beto me soba zina.