LYNNONG 25

Kaei ka Jingthmu jong U Blei ïa Ngi ki Briew?

Printed Edition

Ka Baibl ka ong ba ka jingim u briew ka long kaba lyngkot bad kaba dap da ki jingjynjar. (Job 14:1) Hato kane ka dei shisha kaba U Blei u kwah ïa ngi? Lada em, kaei ka jingthmu ka jong u ïa ngi ki briew? Hato yn pyndep ïa ka? To ngin ïa peit ïa kaei ba ka Baibl ka ong.

1. U Jehobah u kwah ba ngin im ka jingim kaba kumno?

U Jehobah u kwah ba ngin don ka jingim kaba kmen. Haba u la thaw ïa ki briew banyngkong u la buh ïa ki ha ka jaka kaba itynnad kaba la khot ka kper Eden. Nangta “U Blei u la kyrkhu ruh ïa ki, bad U Blei u la ong ha ki, ‘To da nang kha, bad to da nang roi, bad to da pyndap ïa ka khyndew, bad to da pyndem ngon ïa ka.’” (Jenesis 1:28) U Jehobah u kwah ïa ki ban don ki khun ki kti, ban pynlong ïa kane ka pyrthei baroh kawei ka paradais, bad ban sumar ïa ki mrad. Ka jingthmu jong u ïa ngi ki briew ka long ba ngin don ka met kaba koit ba khiah bad ban im shi junom da ka jingkmen.

Watla ka jingim jong ngi kam long kumta,a hynrei ka jingthmu ka jong U Blei kam ju kylla. (Isaïah 46:10, 11) U dang kwah hi ba ki briew kiba kohnguh ïa u kin im shi junom ha ka jingsuk jingkmen bajanai.—Pule Jingpynpaw 21:3, 4.

2. Kumno ngi lah ban ïoh ïa ka jingim kaba kmen mynta?

U Jehobah u la thaw ïa ngi bad ka jingdonkam ba kynja mynsiem, kata ka mut ba ngi don ka jingkwah ban tip bad ban mane ïa u. (Pule Mathaïos 5:3-6.) U kwah ïa ngi ban don ka jingïadei paralok kaba jan bad u, “ban ïaid ha ki lynti jong u baroh,” ban “ïeid ïa u,” bad ban shakri ïa u “da la ka dohnud baroh”. (Deuteronomi 10:12; Salm 25:14) Haba ngi leh kumta, ngi lah ban don ka jingim kaba kmen watla ngi mad shibun ki jingeh. Ka jingmane jong ngi ïa U Jehobah ka ai ïa ngi ka jingim kaba kmen bad kaba don jingmut.

WAD SHUH SHUH

Peit kumno ka jingïeid ba khraw ka jong U Jehobah ka la paw shai haba u la thaw ïa ka pyrthei na ka bynta jong ngi. Peit ruh ka Ktien jong u ka hikai aïu shaphang ka jingthmu jong u ïa ngi.

U Adam bad ka Im ki ïa peit ïa ka kper baitynnad jong ki kaba dap da ki jingthung ba jyrngam bad ki mrad.

3. U Jehobah u kwah ïa ki briew ban don ka jingim kaba kmen

Peit ïa ka VIDEO, bad nangta sa ïa peit lang ïa kane ka jingkylli harum:

VIDEO: Balei U Blei u la Thaw ïa ka Pyrthei?—Shi bynta (1:41)

Balei U Blei u la thaw ïa kane ka pyrthei kaba itynnad?

Pule Ekklesiastis 3:11, bad nangta sa ïa peit lang ïa kane ka jingkylli harum:

Kane ka hikai aïu ïa phi shaphang U Jehobah?

4. Ka jingthmu jong U Jehobah kam pat kylla

Pule Salm 37:11, 29 bad Isaïah 55:11, bad nangta sa ïa peit lang ïa kane ka jingkylli harum:

Kumno ngi tip ba ka jingthmu jong U Jehobah ïa ki briew ka khlem kylla?

A. Ka ïing kaba la jot. Ka tnum ba la pei, ki ïit ba la pait, bad ka phyllaw kaba dap da ki jaboh. — Ïa ka ïing kaba la jot, lah ban pynbha biang. Te ha kajuh ka rukom, ïa ka pyrthei kaba la pynjot da u briew lah ban pynbha biang da U Blei na ka bynta kito kiba ieid ïa u.

B. Kajuh ka ïing kaba la pynbha ka la itynnad bad ka phyllaw ruh ka la khuid. — Ïa ka ïing kaba la jot, lah ban pynbha biang. Te ha kajuh ka rukom, ïa ka pyrthei kaba la pynjot da u briew lah ban pynbha biang da U Blei na ka bynta kito kiba ieid ïa u.

5. Haba ngi mane ïa U Jehobah ka pynkmen ïa ngi

Ngi kmen haba ngi tip ïa ka jingthmu jong ka jingim. Peit ïa ka VIDEO, bad nangta sa ïa peit lang ïa kane ka jingkylli harum:

VIDEO: Mynta Nga la Tip Shaphang ka Jingthmu jong ka Jingim (5:03) (Phareng)

Kumno i Terumi i la ïoh jingmyntoi haba i la tip shaphang ka jingthmu jong ka jingim?

Pule Ekklesiastis 12:13, bad nangta sa ïa peit lang ïa kane ka jingkylli harum:

Kumno ngin pyni ba ngi sngewnguh ïa kaei kaba U Jehobah u la leh na ka bynta jong ngi?

DON KIBA LAH BAN KYLLI: “Kaei ka jingthmu jong U Blei ïa ngi ki briew?”

Kumno phin jubab?

KI MAT BAKONGSAN

U Jehobah u kwah ba ngin ïoh ka jingim kaba kmen shi junom ha kane ka pyrthei khlem kano kano ka jingjynjar. Haba ngi mane ïa u naduh ka dohnud, ngin ïoh ïa ka jingim kaba suk kaba kmen—wat mynta ruh.