Julaĩ

Tũratũũra “mahinda ma ũgwati maritũ kũhiũrania namo,” na ũtũũro ũgũthiĩ ũkĩritũhaga o na makĩria nginya rĩrĩa Jehova akaniina thĩ ĩno njũru na arehe thayũ wa ma thĩinĩ wa thĩ. (2 Tim. 3:1) Kwoguo nĩ wega o mũndũ eyũrie, ‘Ndoragia maitho makwa kũ rĩrĩa ndĩrabatara ũteithio na ũtongoria?’ Mĩaka mĩingĩ mĩhĩtũku, mwandĩki ũmwe wa Thaburi nĩ onanirie bata wa kũroria maitho maitũ kũrĩ Jehova rĩrĩa tũrabatara ũteithio. (Thab. 123:1-4) Aaringithanirie kũroria maitho harĩ Jehova na ũrĩa ngombo ĩroraga mwathi wayo. Eendaga kuuga atĩa? Ngombo ndĩroraga mwathi wayo no getha tu amĩhe irio na amĩgitĩre, no nĩ yagĩrĩirũo nginya gũikara ĩkĩmũroraga nĩguo ĩmenye ũrĩa arenda na ĩgeka guo. na njĩra o ta ĩyo, nĩ twagĩrĩirũo gũthomaga Kiugo kĩa Ngai o mũthenya nĩguo tũtaũkĩrũo nĩ ũrĩa Jehova arenda twĩke, tũcoke tũrũmĩrĩre ũtongoria ũcio. Tũngĩka ũguo, norĩo tũngĩkorũo na ma atĩ Jehova nĩ arĩtũteithagia rĩrĩa tũrabatara ũteithio. w18.07 12 ¶1-2

Jesu aaragia ũhoro wa gũkũũrũo kuumana na ũkombo ũrĩa mũnene na kũhinyĩrĩrio kũrĩa andũ matũũraga mahinyĩrĩirio nĩ ũndũ wa gũkorũo marĩ ‘ngombo cia mehia.’ (Joh. 8:34) Mehia to gũtũma mangĩtũma twĩke ũrĩa gũtagĩrĩire ĩndĩ no matũgirĩrĩrie gwĩka ũrĩa tũĩ nĩ wega kana gũikara ũrĩa tũĩ nĩ kwagĩrĩire. Nĩ ũndũ ũcio, tũkoragwo tũrĩ ngombo cia mehia, na moimĩrĩro nĩ gũkua ngoro, ruo, kũnyamarĩka, na mũthia-inĩ nĩ tũkuaga. (Rom. 6:23) Rĩrĩa mĩnyororo ya mehia ĩkeherio norĩo tu tũkagĩa na kĩĩrĩgĩrĩro na wĩyathi wa ma ũrĩa aciari aitũ a mbere maakenagĩra. Ciugo cia Jesu “mũngĩtũũra kiugo-inĩ gĩakwa,” cionanagia atĩ nĩ kũrĩ mĩhaka kana maũndũ mabataranagia nĩguo tũkorũo tũrĩ na wĩyathi. (Joh. 8:31) Tũrĩ Akristiano meyamũrĩire Ngai nĩ twĩregete na tũgathuura gũtũũra kũringana na morutani ma Kristo tũrĩ arutwo ake. (Mat. 16:24) O ta ũrĩa Jesu eeranĩire, nĩ tũgaakorũo na wĩyathi wa ma rĩrĩa tũkaagunĩka biũ kuumana na igongona rĩake rĩa ũkũũri. w18.04 7 ¶14-16

Jehova nĩ arũmbũyagia ũrĩa andũ ake maraigua ngoro-inĩ o na rĩrĩa mwĩcirĩrie wao ũtarĩ mwega. Ta wĩcirie ũhoro wĩgiĩ Jona. Ngai aatũmire mũnabii ũcio akahunjĩrie aikari a Nineve ndũmĩrĩri ya ituĩro. Rĩrĩa meeririre, Ngai nĩ aatuire itua rĩa kwaga kũmaniina. O na kũrĩ ũguo, Jona ndaakenirio nĩ ũndũ ũcio. Jona “akĩrakara mũno” tondũ Nineve ndĩngĩaniinirũo ta ũrĩa aarathĩte. No Jehova nĩ aakirĩrĩirie Jona na akĩmũteithia kũgarũrĩra mwĩcirĩrie wake. (Jona 3:10–4:11) Thutha wa ihinda, Jona nĩ aataũkĩirũo nĩ ũndũ ũrĩa Jehova eendaga kũmũruta, na akĩhũthĩrũo nĩ Jehova kwandĩka rũgano rũu nĩguo rũtũrute. (Rom. 15:4) Ũrĩa Jehova ahiũranagia na andũ ake wonanagia hatarĩ nganja atĩ nĩ amaiguagĩra tha. Nĩ oĩ ruo na mĩnyamaro ĩrĩa o ũmwe witũ ageragĩra. Nĩ ataũkagĩrũo nĩ meciria maitũ ma thĩinĩ, ũrĩa tũiguaga ngoro-inĩ, o hamwe na maũndũ marĩa tũtangĩhota gwĩka. Na ‘ndangĩreka tũgerio gũkĩra ũrĩa tũngĩhota gwĩtiiria.’ (1 Kor. 10:13) Na githĩ kĩu ti kĩĩranĩro gĩa gũtwĩkĩra ngoro mũno! w19.03 16 ¶6-7

Hĩndĩ ya Watho wa Musa, athuri arĩa maamũrĩtwo maagĩrĩirũo gũtuithania maciira megiĩ maũndũ ma kĩĩroho o hamwe na maciira ma wĩki-naĩ na megiĩ ngucanio. Ta wĩcirie ngerekano cigana ũna. Mũisiraeli angĩoragire mũndũ, ndooragagwo hau hau. Athuri a itũũra rĩake nĩ maagĩrĩirũo gũtuĩria maũndũ nĩguo mamenye kana aabatiĩ gũtuĩrũo gĩkuũ. (Gũcok. 19:2-7, 11-13) Ningĩ athuri acio nĩ maatuithanagia maciira megiĩ maũndũ ma o mũthenya ta ngucanio ciĩgiĩ indo na cia mĩciĩ. (Tham. 21:35; Gũcok. 22:13-19) Rĩrĩa athuri acio meka maũndũ na njĩra ya kĩhooto na Aisiraeli maathĩkĩra Watho, mũndũ wothe nĩ aagunĩkaga, na rũrĩrĩ rũu rũgatĩithia Jehova. (Alaw. 20:7, 8; Isa. 48:17, 18) Maũndũ macio maratuonia atĩ maũndũ mothe ma ũtũũro witũ nĩ ma bata harĩ Jehova. Endaga twĩkĩre andũ arĩa angĩ maũndũ na njĩra ya wendo na kĩhooto. Nĩ onaga maũndũ marĩa twaragia na tũgeka o na tũrĩ ithuiki mĩciĩ-inĩ gwitũ. w19.02 23 ¶16-18

Hĩndĩ ĩrĩa tũrĩ na mĩtangĩko, nĩ ũndũ mũritũ gũkorũo tũrĩ ahooreri. No twĩkore tũkĩrakario nĩ maũndũ marĩa kaingĩ matatũthumbũraga. Angĩkorũo nĩ ũrĩ wagĩa na mĩtangĩko, wĩcirie kĩonereria kĩa Jesu. Mĩeri ya mũthia ya ũtũũro wake gũkũ thĩ, Jesu aarĩ na mĩtangĩko mĩingĩ mũno. Nĩ aamenyaga atĩ nĩ ekũũragwo na anyarirĩke mũno. (Joh. 3:14, 15; Gal. 3:13) Mĩeri ĩigana ũna mbere ya gĩkuũ gĩake, ooigire atĩ nĩ aatangĩkĩte mũno. (Luk. 12:50) Na thikũ nini atanakua, Jesu ooigire ũũ: “Nĩ ndĩratangĩka.” Ciugo iria aahũthĩrire akĩhoya Ngai nĩ cionanagia atĩ aarĩ mwĩnyihia na nĩ aathĩkagĩra Ngai. (Joh. 12:27, 28) Rĩrĩa ihinda rĩakinyire, Jesu arĩ na ũmĩrĩru nĩ eeneanire kũrĩ thũ cia Ngai, iria ciamũragire na njĩra ya ruo rũingĩ na gĩconoko kĩnene. O na gũtuĩka Jesu aarĩ na mĩtangĩko mĩingĩ na nĩ aanyarirĩkaga mũno, ũhooreri nĩ wamũteithirie gwĩka wendi wa Ngai. No tuuge tũtarĩ na nganja atĩ Jesu nĩwe kĩonereria kĩrĩa kĩega mũno kĩa mũndũ wonanirie ũhooreri o na arĩ na mĩtangĩko.—Isa. 53:10. w19.02 11 ¶14-15

Nĩguo tũthiĩ mĩcemanio tũtegũtĩrĩria, no tũbatare kuonania ũmĩrĩru rĩrĩa tũragerera maũndũ maritũ. Aarĩ na ariũ a Ithe witũ amwe mathiaga mĩcemanio o na rĩrĩa magũmĩirũo nĩ kĩeha, gũkua ngoro, kana ndwari. Angĩ nao mathiaga mĩcemanio o na magĩkararagio na njĩra nene nĩ andũ a famĩlĩ kana thirikari. Ta tithia wĩcũranie ũrĩa kĩonereria gitũ kĩhutagia aarĩ na ariũ a Ithe witũ arĩa mohetwo nĩ ũndũ wa wĩtĩkio wao. (Ahib. 13:3) Rĩrĩa maigua atĩ no tũthiaga na mbere gũtungatĩra Jehova o na tũkĩgeragĩra magerio, nĩ magĩaga na hinya wa gũtũũria wĩtĩkio, ũmĩrĩru, na wĩkindĩru wao. Rĩrĩa Paulo oohetwo njera Roma, nĩ aakenaga kũigua atĩ aarĩ na ariũ a Ithe nĩ maatungatagĩra Ngai na wĩhokeku. (Afil. 1:3-5, 12-14) Ihinda inini thutha wake kũrekererio kuuma njera, nĩ aandĩkĩire Ahibirania marũa. Thĩinĩ wa marũa macio nĩ eekĩrire ngoro Akristiano acio ehokeku akĩmera matikanatige gũcemania hamwe.—Ahib. 10:25. w19.01 28 ¶9

Shaitani endaga tũhaane take, tũkorũo tũrĩ aremi mahũthagia ithimi cia Jehova na matindĩkagwo nĩ mwĩyendo. No ahũthĩre andũ arĩa matũthiũrũrũkĩirie arĩa mathũkĩtio nĩwe na wendi wake nĩ ‘mathũkie’ mwĩcirĩrie na mwĩkĩre witũ wa maũndũ. (1 Cor. 15:33) Ningĩ Shaitani nĩ ageragia gũthũkia ngoro itũ na njĩra ya gũtũma twĩhoke ũũgĩ wa andũ handũ ha kwĩhoka mwĩcirĩrie wa Jehova. (Kol. 2:8) Ta wĩcirie ũndũ ũmwe ũtheremagio nĩ Shaitani, atĩ kũgĩa na ũtonga nĩguo ũndũ ũrĩa wagĩrĩirũo gũkorũo ũrĩ wa bata makĩria ũtũũro-inĩ. Arĩa makoragwo na mwĩcirĩrie ta ũcio no matonge kana mage. Gũtekũmakania kana nĩ megũtonga kana matigũtonga, makoragwo meingĩrĩtie ũgwati-inĩ. Nĩkĩ? Tondũ maingĩraga ũhoro-inĩ wa gũcaria mbeca nginya magatiga kũrũmbũiya ũgima wao wa mwĩrĩ, famĩlĩ ciao, na magathũkia nginya ũrata wao na Ngai nogetha tu makinyĩre muoroto wao. (1 Tim. 6:10) Nĩ tũkenaga tondũ Ithe witũ wa igũrũ ũrĩ ũũgĩ nĩ atũteithagia kũgĩa na mawoni maigananĩru megiĩ mbeca.—Koh. 7:12; Luk. 12:15. w19.01 15 ¶6; 17 ¶9

O na mbere ya Jesu gũka gũkũ thĩ na akaiga kĩonereria kĩega gĩa kũũmanĩrĩria, ndungata njĩhokeku cia Jehova nĩ ciamenyete bata wa kũũmanĩrĩria. Hĩndĩ ĩrĩa Aashuri meendaga gũtharĩkĩra Juda, Hezekia nĩ aacokanĩrĩirie anene a ita na andũ a kũu nĩguo amomĩrĩrie. “Nao andũ acio magĩgĩikara mehokete [makĩũmĩrĩrio nĩ] ndeto icio ciaaririo [nĩwe].” (2 Maũ. 32:6-8) O na gũtuĩka Ayubu nĩ aabataraga kũũmĩrĩrio, nĩ onirie andũ atatũ arĩa mokĩte kũmũũmĩrĩria ũrĩa maagĩrĩire kũũmanĩrĩria tondũ nĩ maamũrehagĩra ‘mĩtangĩko.’ Aamerire atĩ korũo nĩwe ‘nĩ angĩamomĩrĩirie na kanua gake na ũhorerania wake wa mĩromo o naguo nĩ ũngĩamahoreirie.’ (Ayub. 16:1-5) Thutha ũcio, Ayubu nĩ omĩrĩirio nĩ Elihu na Jehova.—Ayub. 33:24, 25; 36:1, 11; 42:7, 10. w18.04 16 ¶6; 17 ¶8-9

Isaia nĩ aarĩkĩtie gũtaarĩria ũrĩa Jehova angĩekĩrire andũ ake hinya rĩrĩa ooigire ũũ: “Jehova . . . nĩ agooka arĩ na hinya mũingĩ, na guoko gwake nĩkuo gũgaathamaka nĩ ũndũ wake.” (Isa. 40:10) Bibilia kaingĩ nĩ ĩhũthagĩra kiugo “guoko” na njĩra ya ngerekano kuonania hinya. Nĩ ũndũ ũcio, ciugo “guoko gwake nĩkuo gũgaathamaka,” iratũririkania atĩ Jehova nĩ Mũthamaki ũrĩ hinya. Nĩ aahũthĩrire hinya wake mũingĩ gũteithia na kũgitĩra ndungata ciake mahinda-inĩ mahĩtũku, na nginya ihinda-inĩ rĩrĩ no arathiĩ na mbere gwĩkĩra hinya na kũgitĩra arĩa mamwĩhokete. (Gũcok. 1:30, 31; Isa. 43:10, kohoro ka magũrũ-inĩ) Jehova nĩ ahingagia kĩĩranĩro kĩrĩa eranĩire akoiga, “Nĩ ngũgwĩkĩra hinya,” makĩria rĩrĩa thũ citũ iratũnyarira. Kũndũ kũingĩ thĩinĩ wa thĩ ũmũthĩ, thũ citũ nĩ irageria mũno kũgiria wĩra witũ wa kũhunjia ũthiĩ na mbere kana o na ikahũũra marubuku ithondeka ritũ. No tũtitangĩkaga mũno nĩ ũndũ wa tharĩkĩro ta icio. Jehova nĩ atwĩrĩire ũndũ wa kwĩhokeka ũrĩa ũtũmaga tũgĩe na hinya na ũmĩrĩru. Atwĩrĩire ũũ: “Gũtirĩ itharaita rĩa mbaara rĩthondeketwo nĩ ũndũ waku rĩkaagaacĩra.”—Isa. 54:17. w19.01 5-6 ¶12-13

Ngũrani na nyamũ, nĩ tũkoragwo na nyota wa kũhingia mabataro ma kĩĩroho, na Mũũmbi witũ nowe ũngĩhota kũũhingia. (Mat. 4:4) Rĩrĩa wamũthikĩrĩria na kinyi nĩ ũgĩaga na ũtaũku, ũũgĩ, na gĩkeno. Ngai akũhingagĩria mabataro maku ma kĩĩroho kũgerera Kiugo gĩake na irio nyingĩ cia kĩĩroho iria atũheaga kũgerera “ngombo ĩrĩa njĩhokeku na njũgĩ.” (Mat. 24:45) Na githĩ tũtikenagĩra irio icio njega mũno cia kĩĩroho? (Isa. 65:13, 14) Irio icio cia kĩĩroho Ngai atũheaga nĩ irĩkũheaga ũũgĩ na ũhoti wa gwĩciria, iria irĩkũgitagĩra na njĩra nyingĩ. (Thim. 2:10-14) Kwa ngerekano, ngumo icio nĩ irĩgũteithagia gũkũũrana morutani ma maheeni, ta ũrutani wa atĩ gũtirĩ Mũũmbi. Nĩ irĩkũgitagĩra kuumana na maheeni ma atĩ mbeca na indo cia kĩĩmwĩrĩ nĩcio itũmaga mũndũ agĩe na gĩkeno. Ningĩ nĩ irĩgũteithagia gũkũũrana na kũregana na merirĩria moru na mĩtugo ĩrĩa ĩngĩgũthũkia. Nĩ ũndũ ũcio thiĩ na mbere gũcaria ũũgĩ ũrĩa uumaga kũrĩ Ngai na ũhoti wa gwĩciria, na ũcionage irĩ cia goro! w18.12 20 ¶6-7

Hihi hĩndĩ nĩ ĩrĩũka rĩrĩa matukũ maitũ makaigana “o ta ũrĩa matukũ ma mũtĩ maigana”? Mĩtĩ ĩmwe nĩ ĩtũũraga mĩaka mĩingĩ mũno. Nĩguo andũ mahote gũtũũra ihinda iraihu ũguo, no mũhaka makorũo na ũgima mwega wa mwĩrĩ. Mangĩtũũra kũndũ gũthaka kũrĩ na thayũ ta ũrĩa Isaia aarathire, mangĩkorũo marĩ thĩinĩ wa paradiso. Na ũrathi ũcio nĩ ũkaahinga! Ta wĩcirie ũrĩa ciĩranĩro icio twarĩrĩria ironania atĩ nĩ gũgaakorũo na paradiso ihinda rĩrĩa rĩroka: Andũ thĩinĩ wa thĩ yothe nĩ makaarathimwo nĩ Ngai. Gũtirĩ mũndũ ũgeetigĩra gũtharĩkĩrũo nĩ nyamũ kana andũ matariĩ ta nyamũ. Atumumu, arĩa mataiguaga, na arĩa marĩ na wonje nĩ makaahonio. Andũ nĩ magaaka nyũmba ciao na makenere kũhanda irio. Magaatũũra ihinda iraihu gũkĩra mĩtĩ. Bibilia nĩ ĩtũheaga ũũma atĩ ũndũ ũcio nĩ ũgwĩkĩka ihinda rĩrĩa rĩroka. O na kũrĩ ũguo, andũ amwe no moige atĩ morathi macio matironania atĩ nĩ gũgaakorũo na paradiso ihinda rĩrĩa rĩroka. Hihi nĩ gĩtũmi kĩrĩkũ kĩega ũrĩ nakĩo gĩa kwĩrĩgĩrĩra atĩ nĩ gũgaakorũo na paradiso gũkũ thĩ? Jesu nĩ aaheanire gĩtũmi kĩega gĩa gwĩtĩkia ũndũ ũcio.—Luk. 23:43. w18.12 5 ¶13-15

No tũhote kũgarũrĩra mwĩcirĩrie witũ. Mwĩcirĩrie witũ no ũcenjie na njĩra nene kũringana na maũndũ marĩa tũrareka maingĩre meciria-inĩ maitũ na marĩa tũrecũrania. Tũngĩthiĩ na mbere gwĩcũrania igũrũ rĩgiĩ mwĩcirĩrie wa Jehova, nĩ tũrĩkoragwo na ũũma atĩ mawoni ma Jehova makoragwo marĩ magĩrĩru hĩndĩ ciothe. Gwĩka ũguo nĩ kũrĩtũmaga hingo ciothe tũgaikara tũkĩgarũragĩra mwĩcirĩrie witũ nĩguo ũringane na wake. O na kũrĩ ũguo, rora wone atĩ nĩgetha tũkoragwo na mwĩcirĩrie ta wa Jehova tũrabatara ‘gũtiga kwĩgerekanagia na andũ a mũtabarĩre ũyũ wa maũndũ.’ No mũhaka tũtige kũingĩria thĩinĩ wa meciria maitũ maũndũ na mawoni marĩa mataringaine na mwĩcirĩrie wa Ngai. Bata wa ũndũ ũcio no wonanio na ngerekano ĩgiĩ irio. Mũndũ ũrenda kũgĩa na ũgima mwega wa mwĩrĩ no atue itua rĩa kũrĩaga irio njega. No hihi no agĩe na moimĩrĩro mega angĩkorũo rĩmwe na rĩmwe nĩ arĩaga irio njũru? Ũndũ ũmwe na ũcio, gũkorũo na mwĩcirĩrie ta wa Jehova no kwage gũtũguna angĩkorũo nĩ tũrathũkia meciria maitũ na mwĩcirĩrie wa gũkũ thĩ. w18.11 21 ¶14-15

Tua itua irũmu rĩa gũtũũra kũringana na ũhoro wa ma hĩndĩ ciothe. Wĩyohe mũcibi wa ũhoro wa ma njohero-inĩ yaku. Mahinda-inĩ ma Bibilia, mũcibi nĩ wanyitagĩrĩra na ũkagitĩra njohero na ciĩga ingĩ cia mũthigari arĩ mbaara-inĩ. O na kũrĩ ũguo, nĩguo mũcibi ũcio ũmũgitĩre wabataraga gũkorũo wohetwo ũkarũmio wega. Mũcibi mũregeru ndũngĩagitĩrire mũndũ wega. Mũcibi wa ũhoro wa ma ũtũgitagĩra atĩa? Tũngĩyoha ũhoro wa ma ũrũmĩte biũ o ta mũcibi, nĩ ũrĩtũgitagĩra kuumana na mwĩcirĩrie mũũru na ũtũteithagie gũtua matua mega. Rĩrĩa tũragerio, kana tũrĩ rungu rwa moritũ, ũhoro wa ma ũrĩa ũrĩ Bibilia-inĩ nĩ ũrĩkagĩra hinya itua ritũ rĩa gwĩka ũrĩa kwagĩrĩire. O ta ũrĩa mũthigari atangĩathiire mbaara-inĩ ateyohete mũcibi, o na ithuĩ twagĩrĩirũo gũtua itua rĩa kwaga gũkanaregeria kana kũruta mũcibi witũ wa ũhoro wa ma. Handũ ha ũguo, twĩkaga o ũrĩa wothe tũngĩhota nĩguo tũikare twĩyohete ũhoro wa ma na njĩra ya gũtũũra kũringana naguo. w18.11 12 ¶15

Nĩguo tũmenye ũhoro wa ma ũrĩa ũrĩ Kiugo-inĩ kĩa Ngai no mũhaka twĩkĩre kĩyo. No mũhaka twĩime maũndũ mangĩ nĩguo twĩgĩĩre naguo. O ta ũrĩa mwandĩki wa Thimo onanĩtie, rĩrĩa ‘twagũra’ kana twegĩĩra na “ũhoro wa ma,” nĩ tũbatiĩ kwĩmenyerera ‘tũtikanawendie’ kana tũũrũo nĩguo. O na gũtuĩka kĩndũ no kĩheanwo tũhũ, ti kuuga nĩ ũndũ mũhũthũ gũkĩona. Kiugo gĩa Kĩhibirania kĩrĩa gĩtaũrĩtwo “gũra” thĩinĩ wa Thimo 23:23 ningĩ no kiuge “wĩgĩĩre.” Ciugo icio cierĩ ironania atĩ mũndũ nĩ abataraga kĩyo kana kwĩima nĩgetha one kĩndũ kĩna kĩa goro. Ngerekano ĩno no ĩtũteithie gũtaũkĩrũo nĩ ũrĩa kũgũra ũhoro wa ma kuugĩte. Nĩ tũtue atĩ harĩ marigũ maraheanwo thoko-inĩ. Hihi marigũ macio no metware kwa mũndũ mũciĩ? Aca. No mũhaka mũndũ erutanĩrie gũthiĩ thoko kũmagĩra. Hihi marigũ macio maraheanwo tũhũ? Ĩĩ, ĩndĩ no mũhaka mũndũ oe mahinda na ekĩre kĩyo gĩa gũthiĩ thoko kũmagĩra. Ũndũ ũmwe na ũcio, tũtibataraga mbeca nĩguo tũgũre ũhoro wa ma. O na kũrĩ ũguo, no mũhaka twĩkĩre kĩyo nĩguo twĩgĩĩre naguo. w18.11 4 ¶4-5

Jesu eerĩte Petero, Jakubu, na Johana maambate hamwe nake kĩrĩma-inĩ kĩmwe kĩraihu. Marĩ kũu, nĩ meeyoneire kĩoneki kĩa mwanya. Ũthiũ wa Jesu wakengire ũtheri mũingĩ na nguo ciake ikĩhenia. Musa na Elija makiumĩra, na makĩambĩrĩria kwaria na Jesu ũhoro wĩgiĩ gĩkuũ gĩake kĩrĩa gĩakuhĩrĩirie o hamwe na kũriũka gwake. (Luk. 9:29-32) Hagĩcoka hakĩgĩa itu rĩkengu rĩkĩmahumbĩra, na makĩigua mũgambo kuuma itu-inĩ rĩu, na warĩ mũgambo wa Ngai! Kĩoneki kĩu kĩoonanirie ũrĩa Jesu angĩgaakorũo na riri na hinya arĩ Mũthamaki wa Ũthamaki wa Ngai. Hatarĩ nganja Kristo nĩ oomĩrĩirio na agĩkĩrũo hinya nĩ ũndũ wa mĩnyamaro ĩrĩa yarĩ mbere yake o hamwe na gĩkuũ kĩa ruo kĩrĩa kĩngĩamũkorire. Ningĩ kĩoneki kĩu nĩ gĩekĩrire wĩtĩkio wa arutwo acio hinya, ũndũ ũrĩa wamateithirie kwĩhaarĩria nĩ ũndũ wa moritũ marĩa mangĩamakorire o hamwe na wĩra mũritũ ũrĩa wametereire. Mĩaka ta 30 thutha ũcio, mũtũmwo Petero nĩ aagwetire kĩoneki kĩa Jesu kũgarũrũka, kuonania atĩ no aakĩririkanaga wega.—2 Pet. 1:16-18. w19.03 10 ¶7-8

Njĩra ĩmwe Akristiano a ma makoragwo marĩ ngũrani na a ndini cia maheeni nĩ ĩrĩkũ? ‘Twaragia ũhoro wa ma.’ (Zek. 8:16, 17) Twaragia ũhoro wa ma na njĩra nene na nini, harĩ andũ arĩa tũĩ, arĩa tũrutaga wĩra nao, arata, na andũ arĩa twendete. Ĩ angĩkorũo ũrĩ mũndũ mwĩthĩ na nĩ wendaga gwĩtĩkĩrĩka nĩ andũ a riika rĩaku? Ndũkaneke ũrĩa andũ amwe mekaga na njĩra ya gũtũũra mũtũũrĩre wa ũhinga. Monekaga marĩ na mĩtugo mĩega mũno marĩ hamwe na andũ a famĩlĩ ciao na kĩũngano-inĩ, no makoragwo marĩ ngũrani biũ marĩ hamwe na andũ arĩa angĩ ethĩ matarĩ athathaiya a Jehova na thĩinĩ wa social media. Kũu nĩ gũikara mũtũũrĩre ũrĩ na maheeni, ũkahitha ũrĩa ũtariĩ harĩ aciari aku, andũ thĩinĩ wa kĩũngano, na Ngai. (Thab. 26:4, 5) Jehova nĩ amenyaga rĩrĩa ‘tũramũhe gĩtĩo na mĩromo no ngoro citũ irĩ kũraya nake.’ (Mar. 7:6) Na githĩ ũndũ ũrĩa mwega makĩria ti gwĩka ta ũrĩa thimo yugaga: “Ngoro yaku nĩĩmenye gũkaigua ũiru nĩ ũndũ wa andũ a mahĩtia; wee-rĩ, mũthenya wothe tindaga na ũhoro wa gwĩtigĩra Jehova.”—Thim. 23:17. w18.10 9 ¶14-15

Andũ a Ngai makoragwo marĩ famĩlĩ ya kĩĩroho ĩrĩa ĩmenyekaga nĩ ũndũ wa wendo ũrĩa makoragwo naguo. (1 Joh. 4:21) Wendo ũcio kaingĩ nduonanagio na maũndũ manene, ĩndĩ wonanagio na tũmaũndũ tũnini tũingĩ, ta ciugo cia gwĩciria mũndũ ũrĩa ũngĩ na ciĩko cia ũtugi. Rĩrĩa twekĩra andũ arĩa angĩ maũndũ na njĩra ya tha na tuonania nĩ tũrameciria, ‘twĩgerekanagia na Ngai tũrĩ ciana ciake endete.’ (Ef. 5:1) Jesu eegerekanagia na Ithe na njĩra nginyanĩru. Oigire ũũ: “Ũkai harĩ niĩ, inyuothe arĩa mũnogete na mũtitikithĩtio mĩrigo, na nĩ ngũmũhurũkia . . . , nĩ ũndũ niĩ ndĩ mũhooreri na mwĩnyihia ngoro-inĩ.” (Mat. 11:28, 29) Rĩrĩa twegerekania na Kristo na njĩra ya “[gũcayagĩra] mũndũ ũrĩa ũtarĩ hinya,” nĩ twĩtĩkĩrĩkaga nĩ Ithe witũ wa igũrũ na tũkagĩa na gĩkeno kĩnene. (Thab. 41:1) Nĩ ũndũ ũcio rekei tuonanie wendo na njĩra ya gwĩciria arĩa angĩ famĩlĩ-inĩ, kĩũngano-inĩ, na ũtungata-inĩ. w18.09 28 ¶1-2

Rĩrĩa kwoimĩra icanjama, andũ a Ngai nĩ magĩaga na mweke wa kũrutithania wĩra hamwe na Ngai na njĩra ya gũteithĩrĩria aarĩ na ariũ a Ithe witũ. Njĩra ĩmwe twĩkaga ũguo nayo nĩ kũmahe ũteithio wa kĩĩmbeca. (Joh. 13:34, 35; Atũm. 11:27-30) Njĩra ĩngĩ nĩ kũmateithĩrĩria gũtheria kana gwaka rĩngĩ. Mwarĩ wa Ithe witũ Gabriela kuuma Poland ũrĩa mũciĩ wake wathũkangirio biũ nĩ kĩguũ, nĩ aakenire mũno rĩrĩa ariũ a Ithe witũ kuuma ciũngano iria mariganĩtie mokire kũmũteithia. Oigire ũũ: “Ndirenda kwaria ũhoro wa indo iria ndorirũo nĩcio tondũ icio no cia kĩĩmwĩrĩ. No reke njarie ũhoro wa ũrĩa ndagunĩkire. Ũndũ ũcio nĩ watũmire ngĩe na ma atĩ gũkorũo kĩũngano-inĩ gĩa Gĩkristiano nĩ gĩtĩo kĩnene, na nĩ ũndũ ũtũmaga mũndũ agĩe na gĩkeno.” Andũ aingĩ arĩa manateithĩrĩrio thutha wa gĩcanjama moigaga atĩ maiguaga o ta ũguo. Ningĩ arĩa marutithanagia wĩra na Jehova harĩ kũheana ũteithio ta ũcio nĩ maiguaga maiganĩire.—Atũm. 20:35; 2 Kor. 9:6, 7. w18.08 26 ¶12

Nĩguo tũhote kũgitĩra ngoro itũ, no mũhaka tũmenye mogwati marĩa mangĩtũkora na tũkoya ikinya rĩa na ihenya kwĩgitĩra. Kiugo kĩrĩa gĩtaũrĩtwo “gitagĩra” gĩtũririkanagia wĩra ũrĩa warutagwo nĩ mũrangĩri. Matukũ-inĩ ma Mũthamaki Suleimani, arangĩri nĩ maarũgamaga thingo igũrũ cia itũũra na magetana rĩrĩa mona ũgwati ũgĩũka. Kũhũũra mbica ũndũ ũcio meciria-inĩ no gũtũteithie kuona ũrĩa tũbatiĩ gwĩka nĩguo Shaitani ndagathũkie mwĩcirĩrie witũ. Mahinda-inĩ ma tene, arangĩri nĩ maarutithanagia wĩra na arangĩri a ihingo. (2 Sam. 18:24-26) Nĩ maanyitanagĩra kũgitĩra itũũra, na njĩra ya gũtigĩrĩra atĩ ihingo nĩ hinge mangĩonire thũ ĩkuhĩrĩirie. (Neh. 7:1-3) Thamiri itũ ĩmenyeretio nĩ Bibilia no ĩrute wĩra ta mũrangĩri witũ na njĩra ya gũtũmenyithia rĩrĩa Shaitani arageria gũtharĩkĩra ngoro itũ, na ũguo nĩ kuuga hĩndĩ ĩrĩa arageria gũthũkia meciria maitũ, mĩerekera itũ, kana merirĩria maitũ. Rĩrĩa rĩothe thamiri itũ yatũmenyithia atĩ kũrĩ na ũgwati, twagĩrĩirũo kũmĩthikĩrĩria na tũkahinga ihingo na njĩra ya gwĩthema ũndũ ũcio. w19.01 17 ¶10-11

Ariũ a Ithe witũ ethĩ maagĩrĩire gũthimwo na Kiugo kĩa Ngai, no ti na mawoni ma mũndũ kana ma ũndũire. (2 Tim. 3:16, 17) Mawoni ta macio matarĩ ma Kĩĩmandĩko no mahingĩrĩrie ariũ a Ithe witũ arĩa makinyanĩirie ithimi. Bũrũri-inĩ ũmwe ndungata ĩmwe ya kĩũngano yarĩ na ũhoti mũnene wa gwĩka maũndũ nĩ yehokeirũo maũndũ maritũ kĩũngano-inĩ. O na gũtuĩka athuri a kĩũngano nĩ metĩkanĩirie atĩ mũrũ wa Ithe witũ ũcio mwĩthĩ nĩ aahingĩtie ithimi cia Kĩĩmandĩko cia gũtuĩka mũthuri wa kĩũngano, matioigire amũrũo. Athuri amwe maikangĩtie matukũ moigire atĩ ndangĩatuĩkire mũthuri wa kĩũngano tondũ onekaga arĩ mwĩthĩ mũno. Nĩ ũndũ wa kĩeha kuona atĩ mũrũ wa Ithe witũ ũcio aagire kwamũrũo nĩ ũndũ wa kuoneka arĩ mwĩthĩ. Riboti kuuma kũndũ na kũndũ ironania atĩ mwĩcirĩrie ũyũ ũrĩ kũndũ kũingĩ thĩinĩ wa thĩ. Na githĩ ti ũndũ wa bata mũno kũhũthagĩra Maandĩko handũ ha kũrũmagĩrĩra mawoni maitũ! Gwĩka ũguo nĩ gũgũtũteithia gwathĩkĩra Jesu na gũtiga gũtuanagĩra na maũndũ marĩa maroneka na maitho.—Joh. 7:24. w18.08 12 ¶16-17

Harĩ na ũgwati wa kũhiũha gũtũma e-mail na ndũmĩrĩri nguhĩ. Thĩinĩ wa mabũrũri mamwe, wĩra witũ wa kũhunjia nĩ wĩkĩrĩirũo mĩkaana kana ũkagirio biũ. Andũ arĩa matũkararagia thĩinĩ wa mabũrũri ta macio no matheremie ũhoro ũtarĩ mwega makĩendaga wa gũtũma twĩtigĩre kana twage kwĩhokana. Ta wĩcirie ũrĩa gwathire hĩndĩ ya Soviet Union. Thigari cietagwo KGB nĩ ciatheremagia mũhuhu atĩ ariũ a Ithe witũ moĩkaine wega nĩ maatiganĩte na ithondeka rĩa Jehova. Andũ aingĩ nĩ meetĩkirie mũhuhu ũcio na ũndũ ũcio ũgĩtũma moime ithondeka-inĩ rĩa Jehova. Na githĩ ũcio ti ũndũ wa kĩeha! Wega nĩ atĩ thutha ũcio aingĩ nĩ maacokire, no angĩ matiacokire tondũ wĩtĩkio wao wathũkire biũ o ta meri yanangĩkĩte. (1 Tim. 1:19) Tũngĩĩthema ũgwati ta ũcio atĩa? Ndũgetĩkĩre gũtheremia ndeto njũru na iria ũtoĩ kana nĩ cia ma. Ndũgatuĩke mũndũ wa kũheneka na ihenya kana wa gwĩtĩkia ũndũ o wothe. Ambaga gũtuĩria ũndũ nĩguo ũmenye kana nĩ wa ma. w18.08 4 ¶8

Maandĩko marĩa mekuo ma tene ma Kĩngiriki, monanagia atĩ tũtithio na marũũri mangĩ itiahũthagĩrũo hĩndĩ ciothe. Kwoguo-rĩ, hihi Jesu eendaga kuuga, “Ngũkwĩra na ma atĩ, ũmũthĩ nĩ ũgũkorũo hamwe na niĩ thĩinĩ wa Paradiso”? Kana hihi eendaga kuuga, “Ũmũthĩ ndakwĩra na ma atĩrĩ, nĩ ũgaakorũo hamwe na niĩ thĩinĩ wa Paradiso”? Ririkana atĩ mbere ĩyo Jesu nĩ eerĩte arũmĩrĩri ake ũũ: “Mũrũ wa mũndũ arĩkorũo thĩinĩ wa mbĩrĩra mĩthenya ĩtatũ ũtukũ na mũthenya.” (Mat. 12:40; 16:21; 17:22, 23; Mar. 10:34; Atũm. 10:39, 40) Kwoguo Jesu ndaathiire Paradiso mũthenya ũrĩa we na mwĩki-naĩ ũcio maakuire. Jesu aaikarire thĩinĩ wa “Mbĩrĩra [kana “Hadesi”]” thikũ cigana ũna, nginya rĩrĩa Ngai aamũriũkirie. (Atũm. 2:31, 32) Mwĩki-naĩ ũcio o na ndaamenyaga atĩ Jesu nĩ aarĩkanĩire na atũmwo ake ehokeku kĩrĩkanĩro gĩa gũgaakorũo hamwe nake Ũthamaki-inĩ wa igũrũ. (Luk. 22:29) Makĩria ma ũguo, mwĩki-naĩ ũcio o na ndaarĩ mũbatithie. (Joh. 3:3-6, 12) Kwoguo Jesu eeragĩra mwĩki-naĩ ũcio paradiso gũkũ thĩ. w18.12 6 ¶17-18, 20-21

Aisiraeli nĩ maathathairie njaũ ya thahabu. O na maremeire Jehova na njĩra ta ĩyo ĩroneka ĩmwe kwa ĩmwe, meeheenagia atĩ marĩ o mwena wa Jehova. O na Haruni eetire ũthathaiya wa njaũ ĩyo “gĩathĩ gĩa kũririkana Jehova.” Jehova aaiguire atĩa? Aaiguire atuurũo mũno. Eerire Musa atĩ andũ “nĩmethũkĩtie” na “nĩmagarũrũkĩte . . . magatiga gũthiĩ na mĩthiĩre ĩrĩa [amaathire] mathiage nayo.” Nĩ ũndũ wa “matũkũya,” Jehova o na nĩ eecirĩtie kũniina rũrĩrĩ rũu rwa Isiraeli. (Tham. 32:5-10) O na kũrĩ ũguo, Jehova nĩ aatuire itua rĩa kwaga kũniina Aisiraeli. (Tham. 32:14) O na gũtuĩka Haruni nĩ aathondekire mũhianano, nĩ eeririre na agĩthiĩ mwena wa Jehova marĩ na Alawii arĩa maacokire mwena wa Jehova. Andũ aingĩ mũno nĩ maakuire nĩ ũndũ wa gũthathaiya mũhianano. No arĩa maarĩ mwena wa Jehova nĩ meerirũo atĩ nĩ mekũrathimwo.—Tham. 32:26-29. w18.07 20 ¶13-16

Kũmenyeka kũrĩa kwega biũ nĩ kũrĩkũ? Ti kũrĩa andũ macaragia kũgerera gĩthomo kĩa igũrũ, biacara, na kũgĩa na igweta. Kũmenyeka kũrĩa kwega biũ nĩ kũrĩa Paulo aatarĩirie rĩrĩa oigire ũũ: “Tondũ rĩu nĩ mũrĩkĩtie kũmenya Ngai, kana mũkarĩkia kũmenywo nĩ Ngai-rĩ, mũragĩcoka na thutha nĩkĩ maũndũ-inĩ marĩa ma tũhũ na matarĩ kĩene, mũkenda gũtuĩka ngombo ciamo o rĩngĩ?” (Gal. 4:9) “Kũmenywo nĩ Ngai,” Mwathani Mũnene wa igũrũ na thĩ, nĩ ũndũ wa bata mũno! Nĩ endaga mũno tũkorũo tũrĩ arata ake a hakuhĩ. Mũthomi ũmwe oigire atĩ “tũtuĩkaga andũ maretĩkĩrĩka nĩwe.” Rĩrĩa Jehova atwĩtĩkĩra tũrĩ arata ake nĩ tũhingagia ũndũ ũrĩa watũmire atũũmbe.—Koh. 12:13, 14. w18.07 8 ¶3-4

Nĩguo mawatho ma Ngai matũteithie, no mũhaka tũmende na tũmahe gĩtĩo. (Amos 5:15) No tũngĩka ũguo atĩa? Twagĩrĩirũo kwĩruta kuonaga maũndũ ta ũrĩa Jehova amonaga. Kwa ngerekano: Ta nĩ tũtue atĩ nĩ ũkoretwo ũkĩũrũo nĩ toro. Wathiĩ kũrĩ ndagĩtarĩ agakwĩra irio iria wagĩrĩirũo kũrĩa, ũmenyerie mwĩrĩ waku, na wĩke mogarũrũku mangĩ ũtũũro-inĩ. Na thutha wa kũgeria maũndũ macio, ũkona atĩ nĩ maragũteithia! Kwahoteka no ũcokerie ndagĩtarĩ ũcio ngatho mũno nĩ ũndũ wa gũgũteithia kwagĩria ũtũũro waku. Na njĩra o ta ĩyo, nĩguo ũtũũro witũ wagĩre, Mũũmbi witũ nĩ atũheete mawatho ma gũtũgitĩra kuumana na moimĩrĩro moru ma gwĩka mehia. Ta wĩcirie ũrĩa tũgunĩkaga nĩ ũndũ wa kũrũmĩrĩra mawatho ma Bibilia marĩa makananĩtie kũheenania, kũhũthĩra wara, kũiya, ngomanio itagĩrĩire, kũrũa, na maũndũ ma ndaimono. (Thim. 6:16-19; Kũg. 21:8) Rĩrĩa twagĩa na irathimo nĩ ũndũ wa gwĩka maũndũ na njĩra ya Jehova, wendo witũ harĩ we na harĩ mawatho make nĩ ũkũraga. w18.06 17 ¶5-6

Kwahoteka Pilato eetigagĩra atĩ Jesu nĩ angĩatũmire andũ maregane na wathani wa Roma. Jesu aamũcokeirie ũũ: “Ũthamaki wakwa ti wa thĩ ĩno.” (Joh. 18:36) Ndangĩeingĩranirie na maũndũ ma ũteti tondũ Ũthamaki wake ũngĩgakorũo kũrĩa igũrũ. Eerire Pilato atĩ okĩte gũkũ thĩ ‘kũruta ũira wĩgiĩ ũhoro ũrĩa wa ma.’ (Joh. 18:37) Rĩrĩa twamenya wega wĩra witũ nĩ ũrĩkũ o ta Jesu, nĩ tũrĩĩthemaga kũnyita mbaru ikundi cia ũteti nginya ngoro-inĩ citũ. Ũndũ ũcio no ũkorũo ũtarĩ mũhũthũ. Mũrori ũmwe wa mũthiũrũrũko oigire ũũ: “Andũ gĩcigo-inĩ gitũ marathiĩ makĩendaga kũgĩe na mogarũrũku. Nĩ maretĩĩra mũno bũrũri wao na marona atĩ mangĩathwo nĩ andũ a rũrĩrĩ rwao, maũndũ no magĩre. Ũndũ ũrĩa mwega nĩ atĩ aarĩ na ariũ a Ithe witũ nĩ magitĩire ũrũmwe wao wa Gĩkristiano na njĩra ya gwĩkĩrĩra wĩra wa kũhunjia ũhoro ũrĩa mwega wa Ũthamaki. Mehokete atĩ Ngai nĩwe ũkaaniina maũndũ matarĩ ma kĩhooto o hamwe na mathĩna marĩa mangĩ tũcemanagia namo.” w18.06 4-5 ¶6-7

Thĩinĩ wa Kĩhibirania gĩa tene, no mabuku matatũ tu thĩinĩ wa Maandĩko ma Kĩhibirania magwetete rĩĩtwa Shaitani rĩrĩa riugĩte “Mũkararia.” Mabuku macio nĩ 1 Maũndũ ma Matukũ ma Tene, Ayubu, na Zekaria. Nĩkĩ ti maũndũ maingĩ megiĩ thũ ĩyo itũ maagwetetwo mbere ya gũka kwa Mesia? No gũkorũo Jehova aagire kwaria maũndũ maingĩ megiĩ Shaitani na mawĩra make thĩinĩ wa Maandĩko ma Kĩhibirania tondũ ndangĩendire gũtũma Shaitani oneke arĩ wa bata. Muoroto wa Jehova ũrĩa mũnene wa kwandĩkithia Maandĩko macio warĩ gũteithia andũ mamenye Mesia na gũtongoria andũ nginya kũrĩ we. (Luk. 24:44; Gal. 3:24) Rĩrĩa muoroto ũcio wahingire na Mesia agĩũka, Jehova nĩ aamũhũthĩrire marĩ na arutwo ake kũguũria maũndũ maingĩ marĩa tũĩ megiĩ Shaitani na araika arĩa maamũrũmĩrĩire. Ũcio nĩ ũndũ mwagĩrĩru tondũ Jehova akaahũthĩra Jesu na aitĩrĩrie maguta arĩa magaathana nake kwananga Shaitani na arĩa mamũrũmagĩrĩra. (Rom. 16:20; Kũg. 17:14; 20:10) Ririkana atĩ hinya wa Mũcukani nĩ ũrĩ mĩhaka. Jehova, Jesu, na araika arĩa ehokeku marĩ mwena witũ, na no matũteithie kũregana na thũ ĩyo itũ. w18.05 22-23 ¶2-4

Jehova atuonaga tũrĩ ndungata ciake angĩkorũo tu nĩ tũraciara maciaro. (Mat. 13:23; 21:43) Kwoguo thĩinĩ wa ngerekano ĩrĩa ĩrĩ thĩinĩ wa Johana 15:1-5, maciaro marĩa o Mũkristiano arĩ o mũhaka aciare matingĩkorũo marĩ arutwo a Bibilia arĩa ahotete gũkorũo nao. (Mat. 28:19) Kũngĩrĩ ũguo, aarĩ na ariũ a Ithe witũ ehokeku arĩa matarĩ maahota gũteithia andũ matuĩke arutwo nĩ gũkorũo mahunjagia icigo-inĩ andũ aingĩ matetĩkagĩra ũhoro ũrĩa mwega, mangĩkorũo mahaana ta honge icio itaaciaraga thĩinĩ wa ngerekano ya Jesu. No gũtingĩthiĩ ũguo. Nĩkĩ? Tondũ tũtingĩringĩrĩria andũ matuĩke arutwo. Tondũ Jehova nĩ arĩ wendo, ndangiuga mũndũ ti ndungata yake atĩ tondũ nĩ aremwo gwĩka ũndũ ũkĩrĩte ũhoti wake. Hĩndĩ ciothe Jehova atwĩraga twĩke maũndũ marĩa tũngĩhota. (Gũcok. 30:11-14) Rĩu-rĩ, maciaro marĩa arĩ o mũhaka tũciare nĩ kĩĩ? Kũroneka wega atĩ maciaro no mũhaka makorũo mararũgamĩrĩra ũndũ o ũmwe witũ angĩhota gwĩka. Nĩ ũndũ ũrĩkũ? Nĩ kũhunjia ũhoro ũrĩa mwega wa Ũthamaki wa Ngai.—Mat. 24:14. w18.05 14 ¶8-9

Matukũ-inĩ maya atongoria a ndini nĩ aingĩ mũno thĩinĩ wa thĩ na metagwo marĩĩtwa ta pasta, mũtungatĩri, rabii, batĩrĩ, kana marĩĩtwa mangĩ. “Magiragĩrĩria ma” ĩrĩa ĩrĩ Kiugo-inĩ kĩa Ngai o ta atongoria acio maarĩ kuo karine-inĩ ya mbere, na nĩ mathuurĩte “gwĩtĩkia maheeni handũ ha ũhoro wa ma wĩgiĩ Ngai.” (Rom. 1:18, 25) Marutanaga morutani ma maheeni, ta ũrutani ũrĩa wa atĩ “mũndũ ahonoka ndabataraga ũndũ ũngĩ,” ũrutani wa atĩ muoyo wa mũndũ ndũkuaga, mũndũ akua acokaga agaciarũo arĩ kĩũmbe kĩngĩ, na ũrutani wa ũrimũ atĩ Ngai no etĩkĩrie ngomanio na ihiko cia arũme kwa arũme na atumia gwa atumia. Ateti nĩ mahũthagĩra maheeni kũhĩtithia andũ. Nĩ twĩrĩgĩrĩire kũigua mamwe ma maheeni manene mũno andũ makiuga atĩ nĩ mahotete kũrehe “thayũ na ũgitĩri!” No ‘hĩndĩ ĩyo kwanangwo kwao gũkaamakora o rĩmwe materĩgĩrĩire.’ Rekei tũtikaheeneke twambĩrĩrie kuona ta mũico wa mũtabarĩre ũyũ ũrĩ kũraihu! Ũũma nĩ atĩ nĩ tũĩ “wega atĩ mũthenya wa Jehova ũgoka o ta ũrĩa mũici okaga ũtukũ.”—1 Thes. 5:1-4. w18.10 7-8 ¶6-8

Jesu Kristo, kũgerera ariũ a Ithe witũ aitĩrĩrie maguta na “anene” arĩa mamateithagia a ngʼondu ingĩ, nĩ omagĩrĩria na agatongoria andũ arĩa mahinyĩrĩrĩkĩte na magakua ngoro mahinda-inĩ maya ma kũrigĩrĩria. Na ũguo nĩguo kwagĩrĩire, tondũ athuri ti “athani” igũrũ rĩgiĩ wĩtĩkio wa arĩa angĩ no nĩ “arutithania wĩra” nĩgetha aarĩ na ariũ a Ithe witũ makenage. (Isa. 32:1, 2; 2 Kor. 1:24) Mũtũmwo Paulo nĩ aaigire kĩonereria kĩagĩrĩire kũrũmĩrĩrũo. Aandĩkĩire Akristiano arĩa maanyariragwo Thesalonike ũũ: “Tondũ nĩ tũmwendete mũno-rĩ, twatuire itua rĩa kũmũhe, to ũhoro ũrĩa mwega wa Ngai ĩndĩ nĩ nginya mĩoyo itũ, nĩ gũkorũo nĩ twamwendire mũno.” (1 Thes. 2:8) Akĩonania atĩ kiugo gĩa kũũmĩrĩria ti kĩiganu hingo ciothe, Paulo eerire athuri a Efeso ciugo cia rĩandĩko rĩa ũmũthĩ. w18.04 21-22 ¶6-8

Nĩguo tũkenere na tũgunĩke kuumana na wĩyathi ũcio, no mũhaka ‘tũcokerere Jehova,’ na ũguo nĩ kuuga mũndũ agĩe ũrata nake. (2 Kor. 3:16) Rĩrĩa Aisiraeli maarĩ werũ-inĩ mationire maũndũ marĩa Jehova aamekagĩra na njĩra ya kĩĩroho. Nĩ ta ngoro ciao na meciria ciahumbĩrĩtwo nĩ taama na ikoma, na nĩ ũndũ ũcio wĩyathi ũrĩa maagĩte naguo kuuma Misiri maaũhũthagĩra kwĩguna na njĩra ya kĩĩmwĩrĩ tu. (Ahib. 3:8-10) O na kũrĩ ũguo, wĩyathi ũrĩa uumanaga na roho wa Jehova ũkoragwo ũrĩ makĩria ma kuuma ũkombo-inĩ wa maũndũ ma kĩĩmwĩrĩ. Makĩria ma ũrĩa andũ mangĩĩrĩgĩrĩra kũhingia, roho wa Jehova ũkũũraga andũ kuuma ũkombo-inĩ wa mehia na gĩkuũ na kuuma ũthathaiya-inĩ wa maheeni na mĩtugo yaguo. (Rom. 6:23; 8:2) Githĩ ũcio ti wĩyathi mwega! Mũndũ no akenere ũguni wa wĩyathi ũcio o na rĩrĩa arĩ njera kana rĩrĩa arĩ ngombo.—Kĩam. 39:20-23. w18.04 9 ¶3-5