Septemba

Jesu nĩ oonanirie ũcayanĩri harĩ Maritha na Mariamu. Rĩrĩa oonire kĩeha kĩrĩa maarĩ nakĩo nĩ ũndũ wa gũkuĩrũo nĩ mũrũ wa nyina Lazaro, “Jesu agĩita maithori.” (Joh. 11:32-35) Ndaarĩrire atĩ tondũ tu nĩ orũo nĩ mũrata wa hakuhĩ. Ũhoro wa ma nĩ atĩ nĩ aamenyaga nĩ ekũriũkia Lazaro. No Jesu aarĩrire tondũ nĩ aataũkĩirũo na akĩhutio nĩ ruo rwa ngoro rũrĩa arata ake maarĩ naruo. Nĩ tũgunĩkaga mũno tweruta ũhoro wĩgiĩ ũcayanĩri wa Jesu. Ũrĩa kũrĩ nĩ atĩ, tũtirĩ akinyanĩru ta ũrĩa aarĩ. O na kũrĩ ũguo, nĩ tũmwendete tondũ aahiũranagia na andũ arĩa angĩ na njĩra ya ũcayanĩri. Nĩ twĩkagĩrũo ngoro kũmenya atĩ rĩu arathana arĩ Mũthamaki wa Ũthamaki wa Ngai. Ica ikuhĩ nĩ ekũniina mĩnyamaro yothe. na tondũ Jesu anakorũo arĩ mũndũ, nĩwe wagĩrĩire biũ kũniinĩra andũ mĩnyamaro ĩrĩa wathani wa Shaitani ũmareheire. Hatarĩ nganja nĩ tũkenaga gũkorũo na Mũthamaki ũngĩhota “gũtũiguĩra tha maũndũ-inĩ marĩa twagĩte hinya.”—Ahib. 2:17, 18; 4:15, 16. w19.03 17 ¶12-13

Nĩ tũkoragwo na itemi harĩ gũteithia andũ arĩa angĩ merute ũhoro wa Ngai, no ti ithuĩ tũhingagia itemi rĩrĩa rĩa bata mũno. (1 Kor. 3:6, 7) Jehova nĩwe ũgucagĩrĩria andũ. O mũndũ nĩwe wĩtĩkagĩra kana akarega kwamũkĩra ũhoro ũrĩa mwega kũringana na ũrĩa ngoro yake ĩtariĩ. (Mat. 13:4-8) Ririkanaga atĩ andũ aingĩ matiamũkĩrire ndũmĩrĩri ya Jesu, o na gũtuĩka aarĩ Mwarimũ ũrĩa mwega mũno wanatũũra! Nĩ ũndũ ũcio-rĩ, tũtiagĩrĩirũo gũkua ngoro rĩrĩa andũ aingĩ arĩa tũrageria gũteithia maga kwamũkĩra wega ndũmĩrĩri itũ. Nĩ tũrĩkoragwo na moimĩrĩro mega rĩrĩa tuonania ũcayanĩri ũtungata-inĩ witũ. Nĩ tũrĩkenagĩra ũtungata witũ o na makĩria. Nĩ tũrĩgĩaga na gĩkeno kĩnene kĩrĩa kiumanaga na kũheana. Ningĩ nĩ tũrĩtũmaga andũ arĩa marĩ na “mwerekera ũrĩa wagĩrĩire wa kũheo muoyo wa tene na tene” mamũkĩre ũhoro ũrĩa mwega na njĩra hũthũ. (Atũm. 13:48) Kwoguo “rĩrĩa rĩothe tũrĩ na mweke, nĩ twĩkagei andũ othe wega.” (Gal. 6:10) Tweka ũguo, nĩ tũrĩkoragwo na gĩkeno kũmenya atĩ nĩ tũragoocithia Ithe witũ wa igũrũ.—Mat. 5:16. w19.03 25 ¶18-19

Mũthamaki Daudi aandĩkire ũũ: “Jehova nĩ mũnene na nĩ agĩrĩire mũno kũgoocagwo.” (Thab. 145:3) Nĩ eendete Jehova, na wendo nĩguo watũmaga agooce Ngai “thĩinĩ wa kĩũngano.” (1 Maũ. 29:10-13; Thab. 40:5) Matukũ-inĩ maya, njĩra ĩmwe tũgoocaga Jehova nayo nĩ gũcokia ciũria thĩinĩ wa mĩcemanio. Ithuothe nĩ tũkenaga kũigua macokio mwanya mwanya rĩrĩa tũrĩ mĩcemanio-inĩ. Nĩ tũkenagĩra macokio mahũthũ marutĩtwo kuuma ngoro nĩ kaana. Nĩ twĩkagĩrũo ngoro nĩ mũndũ ũraria na mũgambo ũrĩ na gĩkeno akiuga kaũndũ kerũ karĩa erutĩte. Ningĩ nĩ tũkenagio nĩ arĩa ‘magĩaga na ũmĩrĩru’ wa gũcokia, o na gũtuĩka nĩ marĩ thoni kana nĩ hingo mareruta rũthiomi rwitũ. (1 Thes. 2:2, kohoro ka magũrũ-inĩ) Tũngĩonania atĩa atĩ nĩ tũkenagio nĩ kĩyo kĩao? No tũmacokerie ngatho thutha wa mĩcemanio nĩ ũndũ wa macokio mao ma gwĩkĩra ngoro. Ũndũ ũngĩ tũngĩka nĩ kũruta macokio o na ithuĩ. Tweka ũguo to ithuĩ tũrĩkagĩrũo ngoro mĩcemanio-inĩ, no o na ithuĩ nĩ tũrĩkagĩra arĩa angĩ ngoro.—Rom. 1:11, 12. w19.01 8 ¶1-2; 9 ¶6

Kwarĩ na arũme ikũmi maarĩ na thĩna mũingĩ mũno. Maarĩ na mangũ na matiarĩ na mwĩhoko wa kũhona. No mũthenya ũmwe makĩona Jesu Mũrutani ũrĩa Mũnene arĩ o haraya. Nĩ maaiguĩte atĩ Jesu nĩ aahonetie andũ mĩrimũ ya mĩthemba yothe. Kwoguo makĩanĩrĩra na mũgambo mũnene makiuga: “Jesu, Mũrutani, tũiguĩre tha!” Arũme acio ikũmi nĩ maahonirio biũ. Hatarĩ nganja othe nĩ maakenire nĩ ũndũ wa Jesu kũmekĩra ũndũ wa ũtugi. O na kũrĩ ũguo, ũmwe wao to kũigua aaiguire arĩ na ngatho, no nĩ oonanirie ngatho ciake harĩ Jesu. Mũndũ ũcio wahonirio, ũrĩa warĩ Mũsamaria, nĩ aatindĩkirũo nĩ ũndũ ũcio kũgooca Ngai “na mũgambo mũnene.” (Luk. 17:12-19) O ta Mũsamaria ũcio, o na ithuĩ no twende kuonanagia ngatho harĩ andũ arĩa matwĩka maũndũ mega. Jehova nĩ atũigĩire kĩonereria kĩega gĩa kuonania ngatho. Njĩra ĩmwe onanagia nayo ngatho nĩ kũrathima andũ arĩa mamũkenagia. (2 Sam. 22:21; Thab. 13:6; Mat. 10:40, 41) Namo Maandĩko matwĩraga ũũ: “Mwĩgerekanagiei na Ngai mũrĩ ciana ciendetwo.” (Ef. 5:1) Kwoguo gĩtũmi kĩnene kĩrĩa kĩbatiĩ gũtũma tuonanagie ngatho nĩ kwenda kwĩgerekania na Jehova. w19.02 14 ¶1-2; 15 ¶4

Kairĩtu kanini karĩ cukuru, na njĩra ya gĩtĩo gakarega kũnyitanĩra gĩkũngũĩro-inĩ gĩtakenagia Ngai. Mwanake ũmwe ũrĩ na kaguoya arahunjia nyũmba kwa nyũmba. Akaingĩra mũciĩ kwa mũrutwo mathomaga nake ũrĩa wanacambia Aira a Jehova na akahũũra hũndi. Mũthuri ũmwe araruta wĩra na kĩyo nĩguo ethere famĩlĩ yake, na ũrĩa ũmwandĩkĩte akamwĩra eke ũndũ ũtarĩ wa wĩhokeku. O na gũtuĩka angĩaga gwĩka ũguo no orũo nĩ wĩra wake, agataarĩria mũmwandĩki atĩ ndegwĩka ũguo tondũ nĩ arenda gũkorũo arĩ mwĩhokeku na athĩkĩre watho tondũ ũguo nĩguo Ngai erĩgagĩrĩra ndungata ciake ciĩke. (Rom. 13:1-4; Ahib. 13:18) Nĩ ngumo ĩrĩkũ ũrona andũ acio atatũ marĩ nayo? No kũhoteke no ũgwete cigana ũna, ta ũmĩrĩru na wĩhokeku. No harĩ na ngumo ĩmwe ya bata maronania, ya wĩkindĩru. O ũmwe wao nĩ mwĩhokeku harĩ Jehova. O ũmwe wao nĩ ararega kwagarara ithimi cia Ngai. Mareka ũguo tondũ marĩ na wĩkindĩru. Jehova nĩ egũkenio nĩ o ũmwe wao nĩ ũndũ wa kuonania ngumo ĩyo. O na ithuĩ nĩ twendaga gũkenia Ithe witũ wa igũrũ. w19.02 2 ¶1-2

Watho nĩ wagitagĩra arĩa matangĩahotire kwĩgitĩra o ene ta ciana na atumia a ndigwa, na andũ a kũngĩ. Atuanĩri ciira thĩinĩ wa Isiraeli meerĩtwo ũũ: “Ndũkanogomie ituĩro rĩa ciira rĩa mũndũ wa kũngĩ ũrĩa ũikaranagia na inyuĩ kana mwana ũtarĩ ithe, na ndũkanoe nguo ya mũtumia wa ndigwa atĩ nĩguo ĩrũgamĩrĩre thiirĩ ũrĩa arĩ naguo.” (Gũcok. 24:17) Jehova we mwene nĩ aarũmbũyagia na wendo andũ arĩa mataarĩ na hinya. Na arĩa maamahinyagĩrĩria nĩ aamaherithagia. (Tham. 22:22-24) Jehova endaga andũ arĩa ehokeire gũtongoria andũ ake marũmbũiye andũ acio othe na njĩra ya wendo. Nĩ athũire mehia marĩa mahutanĩtie na ngomanio na endaga gũtigĩrĩra atĩ andũ othe, makĩria arĩa matarĩ na hinya nĩ magitĩrũo na mekĩrũo maũndũ na njĩra ya kĩhooto. (Alaw. 18:6-30) Wendo witũ harĩ Jehova nĩ wongererekaga rĩrĩa twamenya atĩ atwĩkagĩra maũndũ ma kĩhooto. Na rĩrĩa twenda Ngai na twenda ithimi ciake cia ũthingu, nĩ tũtindĩkagwo kwenda arĩa angĩ na kũmekĩra maũndũ na njĩra ya kĩhooto. w19.02 24-25 ¶22-26

Ta wĩcirie ngerekano ya ũrĩa tũngĩĩgitĩra tũtigathũkio nĩ mwĩcirĩrie wa Shaitani. Jehova nĩ atũrutĩte atĩ ‘ngomanio itagĩrĩire na mĩthemba o yothe ya maũndũ matarĩ matheru kana ũkoroku itiagĩrĩirũo kũgwetwo gatagatĩ-inĩ gaitũ.’ (Ef. 5:3) No rĩrĩ, andũ arĩa tũrutithanagia wĩra na arĩa tũthomaga nao, mangĩambĩrĩria ndeereti ciĩgiĩ ngomanio itaagĩrĩire-rĩ, twagĩrĩirũo gwĩka atĩa? Thamiri itũ ĩrĩa ĩkoragwo ĩtariĩ ta mũrangĩri no ĩtũmenyithie atĩ kũrĩ na ũgwati. (Rom. 2:15) No hihi nĩ tũkũmĩthikĩrĩria? No twĩkore tũgwĩte mũtego-inĩ wa gũthikĩrĩria andũ arĩa tũrutithanagia wĩra kana arĩa tũthomaga nao kana kwĩrorera mbica iria mangĩkorũo makĩona handũ ha gũthikĩrĩria thamiri itũ. Hĩndĩ ta ĩyo nĩrĩo mũndũ agĩrĩirũo kũhinga ihingo na ũguo nĩ kuuga gwĩthema ũgwati na njĩra ya gũcenjia ndeereti kana gũthiĩ. No nĩ tũkũbatara ũmĩrĩru nĩguo tũhote kũregana na arata aitũ mangĩtũhatĩka twĩcirie kana twĩke ũndũ ũtagĩrĩire. Twagĩrĩirũo gũkorũo na ma atĩ Jehova nĩ onaga ũrĩa tũrerutanĩria, na nĩ arĩtũheaga hinya na ũũgĩ ũrĩa tũrabatara wa kũregana na mwĩcirĩrie wa Shaitani.—2 Maũ. 16:9; Isa. 40:29; Jak. 1:5. w19.01 17-18 ¶12-13

Suleimani, ũmwe wa andũ arĩa manakorũo marĩ atongu na marĩ na hinya mũno nĩ eekire ũtuĩria. Eeĩrire ũũ: “Reke ngerie ikeno nyone nĩ ũndũ ũrĩkũ mwega ikũrehe.” (Koh. 2:1-10) Aakire manyũmba, akĩhanda mĩgũnda na mĩtitũ, na agĩthingata ũndũ ũrĩa wothe eerirĩirie. Aaiguire atĩa thutha wa gwĩka maũndũ macio? Hihi nĩ aaiguire aiganĩire na arĩ na gĩkeno? Tũtirabatara gwĩcirĩria tondũ we mwene nĩ atwĩrĩte thĩinĩ wa rĩandĩko rĩa ũmũthĩ. Na githĩ kĩonereria gĩake gĩtirakũruta ũndũ wa bata? Jehova arenda wĩtheme ruo rũrĩa ruumanaga na mũndũ kwĩruta na rĩake. Nĩ ũrabatara wĩtĩkio nĩgetha ũgũteithie gwathĩkagĩra Ngai na kũigaga wendi wake mbere ũtũũro-inĩ waku. Wĩtĩkio ũcio nĩ wa bata, na ndũrĩ hĩndĩ ũkeerira nĩ ũndũ wa matua marĩa watuire nĩ ũndũ wa wĩtĩkio. Jehova ndarĩ hĩndĩ akaariganĩrũo nĩ ‘wendo ũrĩa wanonania nĩ ũndũ wa rĩĩtwa rĩake.’ (Ahib. 6:10) Nĩ ũndũ ũcio wĩrutanĩrie gũkũria wĩtĩkio mũrũmu, na nĩ ũrĩonaga atĩ Jehova akwendagĩra maũndũ mega.—Thab. 32:8. w18.12 22 ¶14-15

Mũndũ wa kĩĩroho nĩ onanagia wĩtĩkio harĩ Ngai na onaga maũndũ o ta ũrĩa Ngai amonaga. Nĩ acaragia ũtongoria wa Ngai na nĩ erutanagĩria kũmwathĩkĩra. (1 Kor. 2:12, 13) Daudi nĩ kĩonereria kĩega kĩgiĩ ũndũ ũcio. Aainire ũũ: “Jehova nĩwe rwĩga rwakwa, gĩcunjĩ kĩrĩa ngaĩirũo, na gĩkombe gĩakwa.” (Thab. 16:5) “Rwĩga” rũrĩa Daudi aaragia ũhoro waruo nĩ ũrata wake hamwe na Ngai, o we ũrĩa aacaragia mwĩgitio harĩ we. (Thab. 16:1) Moimĩrĩro ma gwĩka ũguo maarĩ marĩkũ? Aandĩkire ũũ: “Ngoro yakwa nĩ gũkena ĩkenaga.” Ũndũ ũrĩa Daudi aakenagĩra mũno nĩ gũkorũo na ũrata wa hakuhĩ hamwe na Ngai. (Thab. 16:9, 11) Andũ arĩa mekĩrĩire ikeno na ũtonga ũtũũro-inĩ wao matigĩaga gĩkeno ta kĩrĩa Daudi aarĩ nakĩo. (1 Tim. 6:9, 10) Gũkũria wĩtĩkio harĩ Jehova na kũmũtungatĩra, nĩ gũgũtũma ũtũũro waku ũkorũo na muoroto na ũkorũo na gĩkeno. Ũngĩkũria wĩtĩkio atĩa? No mũhaka ũhũthagĩre mahinda hamwe na Jehova na njĩra ya gũthomaga Kiugo gĩake, kwĩrorera ũũmbi wake, na gwĩcũrania ũhoro wĩgiĩ ngumo ciake, ta ngumo ya wendo.—Rom. 1:20. w18.12 25 ¶7-8

Paulo to mawoni aheanaga tu megiĩ kĩhiko. Handũ ha ũguo, nĩ kwĩra eeraga Akristiano atĩ marĩ mũndũ ũmwe ũmwe no mũhaka matĩe kĩhiko na makĩonage kĩrĩ gĩtheru. Hihi ũguo nĩguo wee wonaga kĩhiko, makĩria kĩhiko gĩaku angĩkorũo nĩ ũhikĩte kana ũkahikania? Angĩkorũo nĩ ũtĩĩte kĩhiko nĩ ũregerekania na cionereria njega. Jesu nĩ aatĩĩte kĩhiko. Rĩrĩa Afarisai maamũririe ũhoro wĩgiĩ ndigano, aameerire ũrĩa Ngai ooigĩte igũrũ rĩgiĩ kĩhiko kĩa mbere: “Nĩ ũndũ ũcio, mũndũrũme nĩ agaatiga ithe na nyina, nao erĩ matuĩke mwĩrĩ ũmwe.” Jesu ningĩ akiuga ũũ: “Arĩa Ngai anyitithanĩtie, mũndũ ndakanamatigithanie.” (Mar. 10:2-12; Kĩam. 2:24) Kwoguo Jesu nĩ oonanirie atĩ Ngai nĩwe wambĩrĩirie kĩhiko, na kĩagĩrĩirũo gũkorũo kĩrĩ ũndũ wa gũtũũra. Ngai ndeerĩte Adamu na Hawa atĩ nĩ maagĩrĩirũo gũtigana. Muoroto wake kĩhiko-inĩ kĩu kĩambĩrĩirie mũgũnda-inĩ wa Edeni warĩ andũ acio “erĩ” matũũranie hamwe tene na tene. w18.12 10-11 ¶2-4

Rĩrĩa twambĩrĩirie kwĩruta ũhoro wa ma, nĩ tuoonire bata wa gwathĩkĩra ithimi cia Jehova cia mũthingi. Ĩndĩ o ũrĩa twathiaga tũkũrĩte kĩĩroho, nĩ twerutire maũndũ makĩria megiĩ mwĩcirĩrie wa Jehova, ũguo nĩ kuuga, tũkĩmenya maũndũ marĩa endete, marĩa athũire, na muonere wake wĩgiĩ maũndũ matiganĩte. Kũgĩa na mwĩcirĩrie wa Jehova nĩ gũtũrehagĩra gĩkeno, ĩndĩ nĩ kũrĩ moritũ. Rĩmwe na rĩmwe, no twage kuona maũndũ ta ũrĩa Jehova amonaga tondũ tũtirĩ akinyanĩru. Kwa ngerekano, no ũkorũo ũtarĩ ũndũ mũhũthũ gũtaũkĩrũo nĩ mawoni ma Jehova megiĩ ũtheru wa mĩtugo, indo cia kĩĩmwĩrĩ, wĩra wa kũhunjia, kũhũthĩra thakame ũrĩa gũtagĩrĩire, kana maũndũ mangĩ. Twagĩrĩirũo gwĩka atĩa? Tũngĩthiĩ na mbere atĩa kwĩrutanĩria kũgĩa na mwĩcirĩrie ta wa Ngai? Nĩ na njĩra ya gũthomaga Kiugo kĩa Ngai tũrĩ na muoroto wa gũtaũkĩrũo nĩ mwĩcirĩrie wake, tũkawĩcũũrania, na tũkagarũrĩra mwĩcirĩrie witũ nĩguo ũringane na mwĩcirĩrie wa Ngai. w18.11 23-24 ¶2-4

Habakuku aatũũraga ihinda iritũ mũno. Nĩ aatangĩkaga mũno nĩ ũndũ wa gũkorũo athiũrũrũkĩirio nĩ andũ aganu marĩ na ũhinya. Hihi waganu ũcio ũngĩathire na mbere nginya rĩ? Nĩ kĩĩ gĩatũmire Jehova aikare angĩkoya ikinya? Habakuku oonaga andũ a rũrĩrĩ rwao Aisiraeli magĩka o maũndũ ma wagi wa kĩhooto na ũhinyanĩrĩria. Aaiguaga orĩtwo nĩ hinya. Kwoguo ihinda-inĩ rĩu iritũ, agĩkaĩra Jehova oe ikinya. No kũhoteke Habakuku nĩ aambĩrĩirie kuona ta Jehova ataatindanagĩra. Kuoonekaga ta Ngai atangĩoire ikinya na ihenya. Hihi ũrĩ waigua ta ũrĩa ndungata ĩyo yendetwo nĩ Ngai yaiguaga? Hihi ũguo nĩ kuuga atĩ Habakuku nĩ aatete mwĩhoko harĩ Ngai? Hihi wĩtĩkio wake harĩ ciĩranĩro cia Ngai nĩ kũnyiha wanyihĩte? Aca! Kwĩhoka Jehova amũteithie nĩ ũndũ wa mathĩna na mĩtangĩko yake handũ ha kwĩhoka andũ kuonanagia atĩ no aarĩ na wĩtĩkio. Aatangĩkaga nĩ ũndũ wa kwaga kũmenya ihinda rĩrĩa Jehova angĩoire ikinya kana nĩ ũndũ wa kwaga gũtaũkĩrũo kĩrĩa gĩatũmaga Jehova etĩkĩrie agerere moritũ ta macio. w18.11 14 ¶4-5

Rĩrĩa Petero na Andrea arĩa maarĩ ategi a thamaki meetirũo nĩ Jesu matuĩke “ategi a andũ,” nĩ ‘maatigire neti ciao.’ (Mat. 4:18-20) Ũguo ti kuuga atĩ mũndũ eruta ũhoro wa ma no mũhaka atige wĩra wake. Mũndũ no mũhaka arute wĩra nĩguo arũmbũiye famĩlĩ yake. (1 Tim. 5:8) O na kũrĩ ũguo, mũndũ eruta ũhoro wa ma nĩ abataraga gũcenjia mwerekera wake wĩgiĩ indo cia kĩĩmwĩrĩ na maũndũ marĩa abatiĩ kũiga mbere ũtũũro-inĩ. Ta wĩcirie ngerekano ya mũirĩtu wĩtagwo Maria ũrĩa muoroto wake warĩ gũtuĩka mũthaki wa golf ũrĩ igweta thĩ yothe na agĩe mbeca nyingĩ. Maria agĩcoka akĩambĩrĩria kwĩruta Bibilia na agĩkenio nĩ ma iria eerutaga. Nĩ aakenirio nĩ mogarũrũku marĩa ũhoro wa ma wamũteithĩtie gwĩka ũtũũro-inĩ. Maria nĩ aamenyire atĩ ndangĩahotire gũthingata maũndũ ma kĩĩroho o agĩthingataga indo cia kĩĩmwĩrĩ. (Mat. 6:24) Nĩ ũndũ ũcio agĩtiga gũthingata muoroto wake wa gũtuĩka mũthaaki wa golf ũrĩ igweta na kũgĩa mbeca nyingĩ. Nĩ ũndũ wa kũgũra ũhoro wa ma na njĩra ĩyo, rĩu atungataga arĩ painia na oigaga atĩ rĩu “akoragwo na ũtũũro ũrĩ na gĩkeno na muoroto.” w18.11 5 ¶9-10

Jesu arĩ na mĩaka 30, nĩ aatiganire na ũbundi wa mbaũ tondũ nĩ aamenyaga atĩ wĩra ũrĩa wa bata mũno nĩ wa kũrutana. Ooigire atĩ wĩra wa kũhunjia ũhoro ũrĩa mwega wa Ũthamaki wa Ngai warĩ gĩtũmi kĩmwe kĩrĩa gĩatũmĩte Ngai amũtũme gũkũ thĩ. (Mat. 20:28; Luk. 3:23; 4:43) Jesu aatuire ũtungata wĩra ũrĩa wa bata makĩria ũtũũro-inĩ wake, na nĩ eendaga arĩa angĩ manyitanĩre nake wĩra-inĩ ũcio. (Mat. 9:35-38) No tũkorũo tũtarĩ mabundi a mbaũ ta Jesu, ĩndĩ tũrĩ arutani a ũhoro ũrĩa mwega. Wĩra ũcio nĩ wa bata mũno tondũ nĩ ũhutanĩtie na Ngai. O na twĩtagwo “arutithania wĩra hamwe na Ngai.” (1 Kor. 3:9; 2 Kor. 6:4) Nĩ twĩtĩkĩtie atĩ ‘ũhoro wothe ũrĩa Jehova oigĩte, mũigana waguo no ma.’ (Thab. 119:159, 160) Nĩkĩo tũngĩenda gũtigĩrĩra atĩ nĩ ‘tũrahũthĩra wega kiugo kĩa ũhoro ũrĩa wa ma’ ũtungata-inĩ witũ. (2 Tim. 2:15) Gũkĩrĩ ũguo-rĩ, tũikaraga tũkĩnooraga ũhoti witũ wa kũhũthĩra Bibilia, tondũ nĩyo kĩndũ kĩrĩa kĩnene tũhũthagĩra kũrutana ũhoro wa ma wĩgiĩ Jehova, Jesu, na Ũthamaki. w18.10 11 ¶1-2

Rĩrĩa mũthuri egerekania na Jesu Kristo arĩ we kĩongo gĩake, nĩ ateithagĩrĩria mũtumia wake gũkũria “gĩtĩo kĩnene” kũmwerekera. (Ef. 5:22-25, 33) Mũtumia akorũo na gĩtĩo harĩ mũthuri wake, ũndũ ũcio nĩ ũkũmũteithia gwĩciragia mũthuri wake. Rĩrĩa aciari monania atĩ nĩ marecirania, maigagĩra ciana ciao kĩonereria kĩega. O na ũrĩa kũrĩ nĩ atĩ, aciari nĩo makoragwo na itemi rĩa mbere harĩ kũruta ciana ciao ũhoro wĩgiĩ gwĩciria andũ arĩa angĩ. Kwa ngerekano, no macirute kwaga gũtengʼeraga Nyũmba-inĩ ya Ũthamaki. Ningĩ mangĩkorũo marĩ handũ andũ macemanĩtie, no mere ciana ciao ireke andũ arĩa akũrũ mambe mabange raini ya irio. Rĩrĩa mwana atwĩkĩra ũndũ mwega hihi ta gũtũhingũrĩra mũrango, twagĩrĩirũo kũmũgathĩrĩria. Gwĩka ũguo no kũhutie mwana ũcio ngoro mũno, na kũmũteithie kuona atĩ “kũheana nĩ kũrĩ gĩkeno kĩnene gũkĩra kwamũkĩra.” w18.09 29 ¶5-6

Ũtongoria ũrĩa Mũthamaki witũ Jesu Kristo aratũhe, hatarĩ nganja nĩ ũgũtũteithia mahinda-inĩ maya na mahinda mokĩte. Nĩ ũndũ ũcio, rekei tũkenere ũguni ũrĩa ũroimana na gwathĩkĩra mogarũrũku ma ica ikuhĩ. No wĩkĩrũo ngoro mũno mũngĩarĩrĩria thĩinĩ wa ũthathaiya wanyu wa famĩlĩ ũrĩa mũgunĩkĩte nĩ ũndũ wa mogarũrũku megiĩ mĩcemanio kana megiĩ ũtungata. Tũngĩĩcũrania kĩrĩa kĩratũma tũheo motaaro nĩ ithondeka rĩa Jehova na twĩcirie ũrĩa tũkũgunĩka, no ũkorũo ũrĩ ũndũ mũhũthũ kũrũmĩrĩra ũtongoria ũcio tũkenete. Nĩ twĩyoneire atĩ kũnyihanyihia mũigana wa mabuku marĩa maracabwo nĩ kũrahonokia mbeca na kũhũthĩra indo cia kĩĩrĩu gũgatũhotithia gũtwarithia na mbere wĩra wa Ũthamaki kũndũ guothe thĩinĩ wa thĩ. Nĩ ũndũ ũcio, nĩ tũrĩhũthagĩra na njĩra nene indo ta thimũ na video kũngĩhoteka. Na njĩra ĩyo, tũrĩkoragwo tũkĩĩgerekania na Kristo harĩ kũhũthĩra indo cia ithondeka rĩa Ngai na njĩra njega. Rĩrĩa twathĩkĩra ũtongoria wa Kristo na ngoro yothe, nĩ twĩkĩraga hinya wĩtĩkio wa arĩa angĩ na tũgateithia gũkorũo na ũrũmwe. w18.10 25-26 ¶17-19

Rĩrĩa tuonia mũndũ tha iria Ngai endaga tuonanie, no gũkorũo nĩ ithuĩ tũrahũthĩka gũcokia mahoya ma mũndũ ũhinyĩrĩrĩkĩte meciria. (2 Kor. 1:3-6) O na kũrĩ ũguo, ndũkerĩgĩrĩre Akristiano arĩa angĩ makorũo marĩ akinyanĩru. Korũo na muonere ũrĩa wagĩrĩire kwerekera aarĩ na ariũ a Ithe witũ. Gwĩciria atĩ matingĩhĩtia nĩ kwĩheenia na no gũtũme ũkue ngoro. (Koh. 7:21, 22) Ririkana atĩ Jehova erĩgagĩrĩra ndungata ciake ciĩke maũndũ marĩa oĩ atĩ no ihote. Tũngĩĩgerekania nake, no tũhote gũikarania na aarĩ na ariũ a Ithe witũ o na matarĩ akinyanĩru. (Ef. 4:2, 32) Handũ ha kũmonia atĩ matirerutanĩria harĩ gũtungatĩra Jehova, twagĩrĩirũo kũmacokeria ngatho nĩ ũndũ wa maũndũ marĩa mareka. Ũndũ ũcio no ũmekĩre ngoro. Gũcokeria mũndũ ngatho kuuma ngoro no kũmwĩkĩre hinya na kũmũteithie agĩe na “gĩtũmi gĩa gũkena” ũtungata-inĩ wake. Na githĩ ti wega gwĩka ũguo handũ ha kũringithania mũndũ na andũ arĩa angĩ!—Gal. 6:4. w18.09 16 ¶16-17

Kũringana na Jesu, kũrĩa irio cia kĩĩroho nĩ hamwe na kũrũmĩrĩra ũtongoria wa Ngai. Nĩ na njĩra ĩrĩkũ ũndũ ũcio ũraringithanio na irio? O ta ũrĩa tũiguaga twaiganĩra rĩrĩa twarĩa irio njega, no taguo ngoro citũ igĩaga na hinya na wĩtĩkio witũ ũkongerereka rĩrĩa tweka wendi wa Ngai. Gũkorũo na ũũgĩ nĩ kuuga kũrũmĩrĩra ũtongoria wa Ngai. (Thab. 107:43) Nĩ harĩ bata kwĩrutanĩria gũkorũo na ũũgĩ tondũ nĩ kũrĩ irathimo. “Kĩrĩa gĩothe ũngĩĩrirĩria gũtirĩ kĩngĩringithanio naguo. . . . Ũũgĩ nĩ mũtĩ wa muoyo kũrĩ arĩa maũhĩmbagĩria; arĩa megĩagĩra naguo-rĩ, nĩmarĩrathimagwo.” (Thim. 3:13-18, Holy Bible in Gĩkũyũ) Jesu oigire: “Angĩkorũo nĩ mũĩ maũndũ macio-rĩ, gũkena nĩ inyuĩ mũngĩmekaga.” (Joh. 13:17) Arutwo mangĩatũririe gĩkeno kĩao na njĩra ya gũikara hĩndĩ ciothe magĩkaga ũrĩa Jesu aamathĩte meke. Matietĩkĩrire morutani make na makĩrũmĩrĩra kĩonereria gĩake o hĩndĩ ĩyo aamerire ũguo, no maatũũrire mekaga ũguo ũtũũro-inĩ wao wothe. w18.09 4 ¶4-5

Nĩ harĩ maũndũ Ngai eerĩte aciari aitũ a mbere mangĩatũmire mecirie ũhoro wa andũ arĩa angĩ, o na gũtuĩka maarĩ o erĩ kũu mũgũnda-inĩ wa Edeni. Jehova aarathimire Adamu na Hawa na akĩmeera maciarane, maiyũrie thĩ, na mamĩtoorie. (Kĩam. 1:28) O ta ũrĩa Jehova eeciragia ũrĩa ũũmbi wake ũngĩikara wega, noguo o na aciari aitũ a mbere maagĩrĩirũo gwĩciria ũhoro wa gĩkeno gĩa ciana iria mangĩagĩire nacio. Thĩ yothe yarĩ ĩtuĩke Paradiso nĩguo njiaro cia Adamu igunĩke. Wĩra ũcio wothe nĩ wabataraga ũnyitanĩri wa famĩlĩ yake ĩrĩa ĩngĩathire ĩkĩnenehaga. Andũ akinyanĩru arĩa mangĩaramirie Paradiso no mũhaka mangĩanyitanĩire biũ na Jehova nĩguo mahingie mĩoroto yake, na njĩra ĩyo maingĩre kĩhurũko-inĩ gĩake. (Ahib. 4:11) Na githĩ wĩra ũcio ndũngĩatũmire maiganĩre na marathimwo mũno! Kwĩheana nĩ ũndũ wa andũ arĩa angĩ nĩ kũngĩamareheire irathimo nyingĩ na kũiganĩra kũnene. w18.08 18 ¶2; 19-20 ¶8-9

Ĩ angĩkorũo harĩ ũhoro waku ũheanĩtwo na ti wa ma? Jesu na Johana Mũbatithania nĩ maacemanirie na ũndũ ta ũcio. (Mat. 11:18, 19) Jesu eekaga atĩa rĩrĩa kwario ũhoro wa maheeni ũmwĩgiĩ? Ndaahũthagĩra hinya na mahinda make mothe gũtinda agĩĩtetera. Handũ ha ũguo, eekagĩra andũ ngoro marore maũndũ marĩa eekaga na marĩa aarutanaga. O ta ũrĩa oigire, “ũũgĩ ũmenyekaga ũrĩa ũtariĩ kũgerera ciĩko ciaguo.” (Mat. 11:19) Haha harĩ na ũndũ wa bata tũngĩĩruta. Rĩmwe na rĩmwe, andũ no matũmenererie kana moige maũndũ matarĩ mega matwĩgiĩ. No tũigue tũkĩenda mũno kĩhooto kĩoneke kana twĩrirĩrie hagĩe ũndũ tũngĩka nĩguo tũhumbĩre ũrĩa tũcaambĩtio. O na kũrĩ ũguo, harĩ ũndũ tũngĩka. Angĩkorũo harĩ mũndũ ũtheremetie ũhoro wa maheeni ũtwĩgiĩ, reke mĩtugo itũ yonie andũ othe atĩ ũhoro ũcio nĩ wa maheeni. Hatarĩ nganja, o ta ũrĩa kĩonereria kĩa Jesu kĩronania, gũkoragwo na mĩtugo mĩega ya Gĩkristiano no kwagithie kĩene ũhoro ũtarĩ wa ma kana ũrĩa ũtukanĩtio ma na maheeni. w18.08 6 ¶11-13

Harĩ na ũndũ ũhaanaine harĩ ũremi wa Kaini, Suleimani, na Aisiraeli marĩ Kĩrĩma-inĩ gĩa Sinai. Othe maarĩ na mweke wa ‘kwĩrira na kũgarũrũka.’ (Atũm. 3:19) Ũrĩa kũrĩ nĩ atĩ Jehova ndahiũhaga kũnogio nĩ arĩa mora njĩra. Kwa ngerekano, nĩ oheire Haruni. Ihinda-inĩ rĩrĩ, Jehova no atũhe mũkaana akĩhũthĩra Bibilia, mabuku maitũ, kana ũtaaro kuuma kũrĩ Mũkristiano ũngĩ. Tũngĩathĩkĩra mĩkaana ĩyo no tũkorũo na ma atĩ Jehova nĩ arĩtũiguagĩra tha. Ũtugi mũnene wa Jehova nĩ ũrĩ muoroto. (2 Kor. 6:1) Ũtũheaga mweke wa “kũrega maũndũ marĩa matakenagia Ngai, na kũrega merirĩria ma thĩ.” (Tit. 2:11-14) Hĩndĩ ĩrĩa yothe tũgũkorũo “mũtabarĩre-inĩ ũyũ wa maũndũ,” nĩ tũrĩcemanagia na maũndũ marĩgeragia wĩhokeku witũ harĩ Jehova. Rekei hĩndĩ ciothe tũtuage itua rĩa kũrũgama mwena wa Jehova! w18.07 21 ¶20-21

Tũngĩkĩra hinya atĩa itua ritũ rĩa kwenda gwĩtĩkĩrĩka nĩ Jehova handũ ha kwenda gwĩtĩkĩrĩka nĩ thĩ? Kũririkanaga maũndũ maya merĩ ma bata no gũtũteithie. Wa mbere, hingo ciothe Jehova etĩkagĩra arĩa mamũtungatagĩra marĩ ehokeku. (Ahib. 6:10; 11:6) Jehova onaga ndungata ciake iria njĩhokeku irĩ cia bata mũno na kwoguo onaga atĩ angĩaga gũtindanĩra nacio angĩkorũo ‘aagĩte ũthingu.’ ‘Nĩ oĩ njĩra ya arĩa athingu’ na nĩ oĩ kũmahonokia kuuma magerio-inĩ. (Thab. 1:6; 2 Pet. 2:9) Wa kerĩ, Jehova no onanie nĩ atwĩtĩkĩrĩte na njĩra tũtangĩcirĩria. Arĩa mekaga maũndũ mega no getha tu monwo nĩ andũ matirĩ kĩheo makona kuuma kũrĩ Jehova. Nĩkĩ? Tondũ nĩ marĩkĩtie kwamũkĩra kĩheo kĩao. (Mat. 6:1-5) Ngũrani na ũguo, Jesu oigire atĩ Ithe nĩ ‘onaga arĩ hitho-inĩ’ andũ arĩa matagathagĩrĩrio nĩ ũndũ wa maũndũ mega marĩa mekaga andũ. Nĩ onaga ciĩko ciao na akamarathima. w18.07 9 ¶8, 10

Petero nĩ aarigirũo mũno nĩ ũrĩa mũgambo ũcio weendaga kũmwĩra. O hĩndĩ ĩyo andũ arĩa maatũmĩtwo nĩ Korinelio magĩkinya. Petero nĩ aamũkĩrire ũtongoria wa roho mũtheru, makĩoyana na andũ acio na magĩthiĩ nginya mũciĩ gwa Korinelio. Korũo Petero nĩ aatuire maũndũ kũringana na kĩrĩa onaga na maitho, ndangĩaingĩrire gwa Korinelio mũciĩ. Ayahudi matiathiaga mĩciĩ ya andũ a Ndũrĩrĩ. Nĩ kĩĩ gĩatũmire Petero eke ũguo o na kũrĩ na mũthutũkanio ũcio watũũrĩte kuo? Kĩoneki kĩrĩa onete na kũũmĩrĩrio nĩ roho mũtheru nĩ gwatũmire agarũrĩre muonere wa maũndũ. Thutha wa gũthikĩrĩria maũndũ marĩa Korinelio aatarĩirie, hatarĩ nganja nĩ aahutirio ngoro nginya akiuga ũũ atongoretio nĩ roho: “Rĩu nĩ ndaũkĩirũo wega atĩ Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.” (Atũm. 10:34, 35) Na githĩ ũcio ndwarĩ ũtaũku mwerũ harĩ Petero na ũngĩarehire ũgarũrũku mũnene! w18.08 9 ¶3-4

No gũkorũo nĩ twĩthemaga biũ maũndũ marĩa Ngai athũire. O na kũrĩ ũguo, nĩ kũrĩ maũndũ Maandĩko matakoragwo moigĩte ĩmwe kwa ĩmwe ũrĩa twagĩrĩirũo gwĩka. Maũndũ-inĩ ta macio-rĩ, tũngĩmenya atĩa ũndũ ũrĩa ũgwĩtĩkĩrĩka nĩ Ngai na ũmũkenie? Hakinya ta hau, tũhũthagĩra thamiri itũ ĩmenyeretio nĩ Bibilia. Tondũ Jehova nĩ atwendete nĩ atũheete motaaro marĩa matongoragia thamiri citũ. Oigĩte ũũ: “Niĩ nĩ niĩ Jehova Ngai waku ũrĩa ũkũrutaga maũndũ ma gũkũguna, o we ũrĩa ũgũtongoragia na njĩra ĩrĩa wagĩrĩirũo nĩ kũgera.” (Isa. 48:17, 18) Twahũthĩra meciria maitũ na ngoro citũ gwĩcũrania motaaro ma Bibilia nĩ tũrũngaga thamiri citũ. Ũndũ ũcio nĩ ũtũteithagia gũtua matua mega. Motaaro nĩ matũteithagia gũtua matua mega. Nĩguo ũtaũkĩrũo nĩ ũtaaro wa Bibilia, no mũhaka ũtaũkĩrũo nĩ mwĩcirĩrie wa Jehova na kĩrĩa gĩatũmire aheane watho mũna. w18.06 17 ¶5; 18 ¶8-10

Arũmĩrĩri a Herode arĩa morĩtie kĩũria kĩu meerĩgagĩrĩra atĩ Jesu angĩoigire ti wega kũrĩha igooti, mangĩamũthitangire atĩ nĩ aacogagĩra andũ maregane na thirikari. Ningĩ Jesu angĩoigire atĩ andũ nĩ maagĩrĩirũo kũrĩha igooti, meerĩgagĩrĩra arũmĩrĩri ake nĩ mangĩamũtiganĩirie. Jesu ndeendire kũnyita mbaru mwena o na ũmwe wĩgiĩ ngucanio icio ciĩgiĩ kũrĩha igooti. Jesu nĩ oĩ atĩ etia aingĩ a mbeca cia igooti maarĩ na ungumania, no we ndeendaga kũhĩngĩcwo age gwĩkĩrĩra ũndũ ũrĩa wa bata mũno. Ũthamaki wa Ngai nĩguo warĩ ũndũ ũcio wa bata, na nĩguo ũkaaniinĩra andũ mathĩna. Nĩ aatũigĩire kĩonereria. Tũtiagĩrĩirũo kũnyita mbaru mwena o na ũmwe wa ũteti, o na angĩkorũo mwena ũmwe ũroneka ũgĩka maũndũ mega na ma kĩhooto, naguo ũcio ũngĩ ũroneka ũgĩka maũndũ moru na matarĩ ma kĩhooto. Akristiano macaragia Ũthamaki wa Ngai na ũthingu wake handũ ha gũkũria mawoni megiĩ nĩ ũndũ ũrĩkũ ũrekwo ũrĩa kwagĩrĩire kana kũmenereria maũndũ matarĩ ma kĩhooto. (Mat. 6:33) Aira a Jehova aingĩ nĩ mahotete gũtigana na mawoni ma ũteti marĩa maakoragwo namo hau kabere. w18.06 6 ¶9-11

No kũhoteke Shaitani to kũheenereria aaheenereirie araika acio mataarĩ ehokeku makomanie na airĩtu, no nĩ aamerĩire nginya ũtongoria wa gwatha andũ. No gũkorũo muoroto wake warĩ gũthararia gũka kwa ‘mbeũ ya mũtumia.’ (Kĩam. 3:15) O ũrĩa kũngĩkorũo kwarĩ, Jehova nĩ aaniinire mĩbango ta ĩyo yothe rĩrĩa aarehire Mũiyũro, ũndũ ũrĩa waharaganirie mĩbango ĩrĩa Shaitani na araika acio aremi mangĩkorũo maarĩ nayo. Kwoguo, ndũkanahũthie mũtego wa ngomanio itagĩrĩire na ũgwati wa mwĩtĩo. Araika arĩa maanyitire Shaitani mbaru maaikaranĩtie na Ngai mĩaka mĩingĩ mũno. O na kũrĩ ũguo, aingĩ nĩ meetĩkĩririe merirĩria moru maingĩre ngoro-inĩ ciao na makũre. Na njĩra o ta ĩyo, no tũkorũo nĩ tũtungatĩire Jehova ihinda iraihu. No o na gũtuĩka ithondeka-inĩ rĩa Jehova andũ makoragwo marĩ na mĩtugo mĩega, merirĩria moru no maingĩre ngoro-inĩ citũ. (1 Kor. 10:12) Kwoguo nĩ ũndũ wa bata mũno tũthuthuragie ngoro citũ, tũreganage na merirĩria moru, na tũhũranage na mwĩtĩo.—Gal. 5:26; Kol. 3:5. w18.05 25 ¶11-12

Paulo nĩ aaiguaga akuĩte ngoro nĩ ũndũ wa Ayahudi kũrega kwamũkĩra ndũmĩrĩri ya Ũthamaki. O na kũrĩ ũguo, ndaanogirio nĩo. Ta rora wone ũrĩa aacokire akiuga akĩandĩkĩra Akristiano a Roma igũrũ rĩgiĩ ũrĩa aaiguaga kwerekera Ayahudi acio: “Ha ũhoro wao-rĩ, wendi wakwa wa kuuma ngoro na mahoya makwa kũrĩ Ngai nĩ atĩ makaahonokio. Tondũ niĩ ndĩ mũira atĩ nĩ makoragwo na kĩyo gĩa gũtungatĩra Ngai, no ti kũringana na ũmenyo wa ma.” (Rom. 10:1, 2) Paulo nĩ aagwetire nĩ kĩĩ gĩatũmaga athiĩ na mbere kũhunjĩria Ayahudi. Aatindĩkagwo nĩ “wendi [wake] wa kuuma ngoro.” Warĩ wendi wa ngoro yake naarĩ Ayahudi amwe mahonokio. (Rom. 11:13, 14) Nĩ aathaithaga Ngai mahoya-inĩ ateithie Ayahudi ũmwe ũmwe metĩkĩre ndũmĩrĩri ya Ũthamaki. Oigire atĩ “nĩ makoragwo na kĩyo gĩa gũtungatĩra Ngai.” Nĩ onaga maũndũ marĩa mega harĩ andũ na atĩ no mahote gũtungatĩra Jehova. Nĩ aamenyaga atĩ Ayahudi acio maarĩ na kĩyo nĩ mangĩahotire gũtuĩka arutwo a Kristo marĩ kĩyo, o take. w18.05 13 ¶4; 15-16 ¶13-14

O ũmwe witũ nĩ agĩrĩire kũroraga nĩguo amenye ‘hĩndĩ ĩrĩa andũ mabataire’ ũteithio. Paulo aataarire Akristiano Ahibirania ũũ: “Ĩkĩrai hinya moko marĩa matarĩ na hinya o na maru marĩa maregerete, na mũikarage mũkĩrũngaga njĩra cia makinya manyu, nĩguo kĩrĩa kĩonju gĩtikehĩrũo mũno, handũ ha ũguo, kĩhonio.” (Ahib. 12:12, 13) Ithuothe, o hamwe na andũ arĩa ethĩ, no tũmanagĩrĩrie mũndũ na ũrĩa ũngĩ na ciugo njega. Paulo aaheanire ũtaaro ũyũ: “Mũngĩkorũo nĩ mwĩkĩranaga hinya thĩinĩ wa Kristo, mũkomanĩrĩria nĩ ũndũ wa wendo, mũkarũmbũyania, mũgacayanĩra na mũkendana-rĩ, ĩkagai ũguo nĩguo gĩkeno gĩakwa gĩkinyanĩre, na njĩra ya gũkoragwo na mwĩcirĩrie ũmwe, wendo ũmwe, mũrĩ na ngwatanĩro nũmu na mwĩcirĩrie ũmwe. Mũtikaneke ũndũ o na ũmwe na ngũĩ kana na kwĩĩkĩrĩra, no ikaragai mwĩnyihĩtie mũkĩonaga arĩa angĩ marĩ a bata kũmũkĩra, mũtekũrũmbũiya o maũndũ manyu moiki, no mũkarũmbũyagia nginya maũndũ ma arĩa angĩ.”—Afil. 2:1-4. w18.04 22 ¶10; 23 ¶12

Muoroto wa Jehova agĩtũkũũra kuuma watho-inĩ wa mehia na gĩkuũ kũgerera harĩ Jesu warĩ nĩguo tũtũũre “ta ngombo cia Ngai.” Njĩra ĩrĩa njega ya gwĩthema kũhũthĩra wĩyathi witũ ũũru nĩguo tũtigacoke ũkombo-inĩ wa maũndũ ma thĩ ĩno na merirĩria mayo, nĩ gũthingata maũndũ ma kĩĩroho. (Gal. 5:16) Kwa ngerekano, ta wĩcirie ũhoro wa ngerekano ya Nuhu na famĩlĩ yake. Maatũũraga thĩinĩ wa thĩ yaiyũire maũndũ ma ũhinya na mĩtugo mĩũru. O na kũrĩ ũguo, matieingĩranirie na merirĩria na maũndũ marĩa meekagwo nĩ andũ arĩa maamarigicĩirie. Maahotire atĩa gwĩka ũguo? Nĩ maatuire itua rĩa gũkorũo na kĩyo maũndũ-inĩ marĩa mothe Jehova aamerĩte meke ta gwaka thabina, kũiga irio ciao na cia nyamũ, o hamwe na kũhe andũ mũkaana. “Noguo Nuhu ekire; maũndũ marĩa mothe aathirũo nĩ Ngai eke, noguo ekire.” (Kĩam. 6:22) Moimĩrĩro maarĩ marĩkũ? Nuhu na famĩlĩ yake nĩ maahonokire mũico wa thĩ ya hĩndĩ ĩyo.—Ahib. 11:7. w18.04 10 ¶8; 11 ¶11-12

To thirikari tu Shaitani na ndaimono mahũthagĩra kũhĩtithia “thĩ yothe,” no nĩ mahũthagĩra nginya ndini ya maheeni na maũndũ megiĩ biacara. (Kũg. 12:9) Shaitani ahũthagĩra ndini ya maheeni gũtheremia maheeni megiĩ Jehova. Ningĩ Mũcukani nĩ erutanĩirie mũno gũtũma andũ aingĩ o ũrĩa kwahoteka mariganĩrũo nĩ rĩĩtwa rĩa Ngai. (Jer. 23:26, 27) Ũndũ ũcio ũtũmĩte andũ aingĩ marĩ na ngoro njega makorũo magĩthathaiya ndaimono matekũmenya, ĩndĩ o meciragia atĩ mathathayagia Ngai. (1 Kor. 10:20; 2 Kor. 11:13-15) Shaitani ningĩ nĩ atheremagia maheeni kũgerera maũndũ ma biacara. Kwa ngerekano, kaingĩ thĩ ĩrutanaga atĩ njĩra ĩrĩa njega biũ ya kũgĩa na gĩkeno nĩ gũcaria mbeca na gũkorũo na indo nyingĩ. (Thim. 18:11) Arĩa metĩkagia maheeni macio mahũthagĩra mĩtũũrĩre yao gũtungatĩra “Ũtonga” handũ ha gũtungatĩra Ngai. (Mat. 6:24) Angĩkorũo nĩ meendete Ngai mbere ĩyo, kwenda indo cia kĩĩmwĩrĩ mũno gũtũmaga wendo ũcio ũthire biũ.—Mat. 13:22; 1 Joh. 2:15, 16. w18.05 23 ¶6-7