Oktomba

Tũtikoragwo na ũhoti ta wa Jehova na Jesu wa gũthoma ngoro. O na kũrĩ ũguo, no twĩrutanĩrie gũtaũkĩrũo nĩ ũrĩa arĩa angĩ maraigua o hamwe na mabataro mao. (2 Kor. 11:29) Ngũrani na andũ marĩ na mwĩyendo arĩa matũthiũrũrũkĩirie, ithuĩ twĩrutanagĩria kwaga ‘kũrũmbũiya o maũndũ maitũ moiki, no tũrũmbũyagia nginya maũndũ ma arĩa angĩ.’ (Afil. 2:4) Athuri a kĩũngano nĩ magĩrĩire kuonia arĩa angĩ ũcayanĩri o na makĩria. Nĩ moĩ atĩ nĩ makoorio nĩ ũndũ wa ngʼondu iria mehokeirũo kũrũmbũiya. (Ahib. 13:17) Nĩguo athuri mahote gũteithia aarĩ na ariũ a Ithe witũ, nĩ marabatara gũkorũo na tha. Athuri mangĩonania ũcayanĩri na njĩra ĩrĩkũ? Mũthuri ũrĩ na ũcayanĩri nĩ ahũthagĩra mahinda hamwe na aarĩ na ariũ a Ithe witũ. Nĩ amoragia ciũria na akamathikĩrĩria na kinyi ategũthethũka. Maũndũ macio nĩ ma bata makĩria hĩndĩ ĩrĩa mũrũ kana mwarĩ wa Ithe witũ arenda kwĩitũrũra no nĩ araaga ciugo cia kũhũthĩra. (Thim. 20:5) Rĩrĩa mũthuri wa kĩũngano erutĩra kũhũthagĩra mahinda na aarĩ na ariũ a Ithe witũ, ũndũ ũcio nĩ ũtũmaga mehokane, makũrie ũrata, na wendo gatagatĩ-inĩ kao.—Atũm. 20:37. w19.03 17 ¶14-17

O ta ũrĩa mũndũ akenaga arugĩte irio njega akagaĩra andũ arĩa angĩ, no taguo kuonania ngatho gũtariĩ. Rĩrĩa tuona andũ arĩa angĩ magĩcokia ngatho nĩ ũndũ wa ũndũ twĩkĩte nĩ tũkenaga. Rĩrĩa tuonania ngatho nĩ tũtũmaga andũ angĩ makene. Mũndũ ũrĩa twacokeria ngatho nĩ onaga atĩ ũndũ ũrĩa atwĩkĩire kana kĩndũ kĩrĩa atũheire nĩ gĩtũteithirie. Ũndũ ũcio nĩ ũtũmaga ũrata gatagatĩ-inĩ gaitũ na mũndũ ũcio ũgĩe na hinya. Kuonania ngatho nĩ kwa bata mũno, ta ũrĩa rĩandĩko rĩa ũmũthĩ rĩonanĩtie. Na githĩ itunda rĩthondeketwo na thahabu rĩigĩrĩirũo igũrũ rĩa betha to rĩkorũo rĩrĩ ithaka mũno! Ningĩ githĩ to rĩkorũo rĩrĩ rĩa goro mũno! Hihi ũngĩheo indo icio irĩ kĩheo-rĩ, ũngĩigua atĩa? Ciugo iria wĩraga andũ cia kũmacokeria ngatho no iringithanio na kĩheo kĩu kĩa goro. Ningĩ ta wĩcirie ũndũ ũyũ: Itunda rĩthondeketwo na thahabu no rĩikare ihinda iraihu mũno. Ũndũ ũmwe na ũcio, ũngĩra mũndũ ciugo cia kũmũcokeria ngatho, no atũũre aciririkanaga na acionage irĩ cia bata ũtũũro wake wothe. w19.02 15 ¶5-6

Rĩrĩa Adamu na Hawa maarĩire maciaro ma mũtĩ ũrĩa wa kũmenyithania wega na ũũru, moonanirie wega ũndũ ũyũ: Atĩ matiehokete Jehova na ithimi ciake. Maathuurire kwĩigĩra ithimi ciao ene ciĩgiĩ wega na ũũru. No rĩrĩ, ta wĩcirie maũndũ marĩa maateire. Nĩ maateire ũrata wao hamwe na Jehova. Ningĩ nĩ maateire mweke wa gũtũũra tene na tene, na makĩrehera ciana ciao mehia na gĩkuũ. (Rom. 5:12) Ta ringithania ũrĩa Adamu na Hawa meekire na ũrĩa Mũethiopia eekire rĩrĩa aahunjĩirio nĩ Filipu. Mũethiopia ũcio nĩ oonanirie ngatho nyingĩ nĩ ũndũ wa maũndũ marĩa Jehova na Jesu maamwĩkĩire nginya akĩbatithio o rĩo. (Atũm. 8:34-38) Rĩrĩa tweyamũrĩra Ngai na tũkabatithio o ta Mũethiopia ũcio, harĩ ũndũ tuonanagia. Tuonanagia atĩ tũrĩ na ngatho nĩ ũndũ wa maũndũ marĩa Jehova na Jesu matwĩkĩire. Ningĩ nĩ tuonanagia atĩ nĩ twĩhokete Jehova na nĩ tũĩ atĩ nĩwe wagĩrĩire kũiga ithimi ciĩgiĩ wega na ũũru. w19.03 2 ¶1-2

Ndungata cia Ngai cionanagia wĩkindĩru na njĩra ĩrĩkũ? Na njĩra ya kwenda Jehova na ngoro yothe, na kwoguo hingo ciothe igeka o maũndũ marĩa mamũkenagia. Kiugo gĩa Kĩhibirania kĩrĩa gĩtaũrĩtwo “wĩkindĩru” kiugĩte: kĩndũ kĩrĩ gĩothe, gĩtarĩ na wathe, kana kĩrĩ kĩgima. Kwa ngerekano, nyamũ iria ciarutagĩrũo Jehova ciaagĩrĩirũo gũkorũo itarĩ na wathe kana kaũgũ. (Alaw. 22:21, 22) Andũ a Ngai matiaagĩrĩirũo kũruta nyamũ ya igongona ĩtarĩ na kũgũrũ, gũtũ, kana riitho; o na matiaagĩrĩirũo kũruta nyamũ ndwaru. Jehova eendaga nyamũ ĩyo ĩkorũo ĩrĩ yothe, ĩtarĩ na wathe, kana ĩrĩ ngʼima. (Mal. 1:6-9) O na ithuĩ no tũtaũkĩrũo nĩ kĩrĩa gĩtũmaga Jehova ende kĩndũ gĩtarĩ na wathe kana kĩgima. Rĩrĩa tũragũra kĩndũ ta itunda, ibuku, kana kĩndũ kĩngĩ, tũtiendaga kĩrĩa gĩthũkangu kana gĩtarĩ na icunjĩ imwe. Twendaga kĩrĩa kĩrĩ na indo ciothe, gĩtarĩ na wathe, na kĩgima. Ũguo noguo Jehova endaga ũhoro-inĩ wĩgiĩ wendo na wĩhokeku witũ harĩ we. Wagĩrĩirũo gũkorũo ũrĩ wa ngoro yothe, ũtarĩ na wathe, na wĩ mũgima. w19.02 3 ¶3

Nĩguo tũgitĩre ngoro itũ, tũtirabatara o kũmĩhingaga tu nĩguo ndĩkaingĩrie maũndũ moru, no nĩ tũrabatara nginya kũmĩhingũraga nĩguo ĩkaingĩria maũndũ mega. Thĩinĩ wa matũũra ma tene marĩa maakoragwo mairigĩirũo, mũrangĩri wa kĩhingo nĩ aahingaga ihingo cia itũũra nĩguo thũ itigatonye, no kũrĩ hĩndĩ aacihingũraga nĩguo kũingĩrio irio na indo ingĩ. Korũo ihingo itiahingũragwo, aikari a itũũra nĩ mangĩakuire nĩ ngʼaragu. Ũndũ ũmwe na ũcio, nĩ tũbatiĩ kũhingũraga ngoro citũ kaingĩ nĩguo mwĩcirĩrie wa Ngai ũkaingĩra. Tondũ Bibilia ĩkoragwo na mwĩcirĩrie wa Jehova, rĩrĩa rĩothe twamĩthoma tũkoragwo tũgĩtĩkĩria meciria ma Jehova matongorie mwĩcirĩrie witũ, na mwĩkĩre witũ wa maũndũ. Tũngĩka atĩa nĩguo tũkagunĩka biũ rĩrĩa tũrathoma Bibilia? Mahoya nĩ ma bata harĩ gũtũteithia ‘kuona wega maũndũ ma magegania’ marĩa marĩ thĩinĩ wa Kiugo gĩake. (Thab. 119:18) Ningĩ nĩ tũrabatara gwĩcũranagia maũndũ marĩa tũrathoma. Rĩrĩa twahoya, twathoma, na twecũrania, Kiugo kĩa Ngai nĩ gĩkinyaga “ngoro-inĩ [citũ] thĩinĩ biũ,” na ũndũ ũcio nĩ ũtũmaga twende mwĩcirĩrie wa Jehova.—Thim. 4:20-22. w19.01 18 ¶14-15

Jehova nĩ oĩ atĩ ũhoti witũ ndũiganaine na maũndũ maitũ matihaanaine, na nĩ akenaga mũno rĩrĩa twamũrutĩra magongona marĩa tũngĩhota. Ta wĩcirie ũhoro wa magongona marĩa Aisiraeli maamũrutagĩra. Aisiraeli amwe nĩ maahotaga kũruta kagondu kana mbũri. No Mũisiraeli mũthĩni nĩ angĩarutire “ndutura igĩrĩ kana njui igĩrĩ cia ndirahũgĩ.” Na Mũisiraeli angĩaremirũo kũruta tũnyoni twĩrĩ, Jehova nĩ eetĩkagĩra arute “mũtu mũhinyu gĩcunjĩ kĩmwe harĩ ikũmi kĩa eba.” (Alaw. 5:7, 11) O na gũtuĩka mũtu ndwarĩ wa goro, Jehova no aawĩtĩkagĩra, bata ũkorũo ũrĩ “mũtu mũhinyu.” Ũguo noguo Ngai witũ ũrĩ wendo arũmbũyanagia na ithuĩ ũmũthĩ. Rĩrĩa tũraruta macokio, Jehova nderĩgagĩrĩra ithuothe tũkorũo na ũhoti mwega wa kwaria ta Apolo, kana ũhoti wa kũiguithia andũ ta Paulo. (Atũm. 18:24; 26:28) Ũndũ ũrĩa Jehova endaga nĩ tũrute macokio mega kũringana na ũhoti witũ. Hihi nĩ ũraririkana mũtumia wa ndigwa ũrĩa warutire tũthendi twĩrĩ? Aakenirie Jehova tondũ aarutire kĩrĩa kĩega biũ aarĩ nakĩo.—Luk. 21:1-4. w19.01 8-9 ¶3-5

Tũrĩ arũmĩrĩri a Kristo nĩ twĩrĩgagĩrĩra kũmenwo. Jesu nĩ aarathĩte atĩ arutwo ake nĩ mangĩkanyarirũo mũno matukũ-inĩ ma kũrigĩrĩria. (Mat. 24:9; Joh. 15:20) Ũrathi wa Isaia nĩ wonanĩtie atĩ thũ citũ to gũtũmena igaatũmena, no nĩ ikaahũthĩra nginya matharaita matiganĩte gũtũũkĩrĩra. Matharaita macio nĩ hamwe na kũhũthĩra maheeni mehithanĩtie, igenyo, na kũnyarirũo na njĩra nene. (Mat. 5:11) Jehova ndagiragia thũ citũ itige kũhũthĩra matharaita macio gũtũũkĩrĩra. (Ef. 6:12; Kũg. 12:17) No tũtirabatara gwĩtigĩra. Jehova ooigire atĩ “gũtirĩ itharaita” rĩngĩhũthĩrũo gũtũũkĩrĩra “rĩkaagaacĩra” o na atĩa. (Isa. 54:17) O ta ũrĩa rũthingo rũgitagĩra andũ kuumana na mbura ya kĩhuhũkanio, noguo Jehova atũgitagĩra kuumana na “mũrurumo wa ahinyanĩrĩria.” (Isa. 25:4, 5) Gũtirĩ hĩndĩ thũ citũ ikaahota gũtwĩka ũndũ mũũru wa gũtũũra. (Isa. 65:17) Thũ ciothe cia andũ a Ngai nĩ ‘ikaagithio kĩene na ithire.’—Isa. 41:11, 12. w19.01 6-7 ¶13-16

Andũ ethĩ, Jehova nĩ endete wĩyathi, na aakũũmbire ũrĩ na wendi wa gũkorũo na wĩyathi. O na kũrĩ ũguo, nĩ endaga ũhũthagĩre wĩyathi ũcio na njĩra njega, na ũndũ ũcio nĩ ũrĩkũgitagĩra. No kũhoteke nĩ harĩ andũ amwe ũĩ meroragĩra ponografĩ, makeingĩria maũndũ-inĩ ma ngomanio, magathaaka mĩthaako ĩrĩ na ũgwati, kana makahũthĩra ndawa cia kũrebia na njohi. Kĩambĩrĩria-inĩ, no moneke ta marakenera maũndũ macio. No kaingĩ mĩtugo ta ĩyo ĩrehaga mĩrimũ, ĩgatũma mũndũ akorũo arĩ ngombo yayo, kana rĩngĩ o na agakua. (Gal. 6:7, 8) Hatarĩ nganja “wĩyathi” wao ũkoragwo ũrĩ wa maheeni. (Tit. 3:3) Ngũrani na ũguo-rĩ, nĩ andũ aigana ũĩ manarwara nĩ ũndũ wa kũrũmĩrĩra ithimi cia Bibilia? Gwathĩkĩra Jehova nĩ gũtũmaga tũkorũo na wĩyathi na ũgima mwega wa mwĩrĩ. (Thab. 19:7-11) Makĩria ma ũguo, rĩrĩa wahũthĩra wĩyathi na njĩra ya ũũgĩ, kũringana na mawatho na morutani makinyanĩru ma Ngai, nĩ wonagia Ngai o hamwe na aciari aku atĩ no makwĩhokere wĩyathi makĩria.—Rom. 8:21. w18.12 22-23 ¶16-17

Thutha wa Adamu kwĩhia, maũndũ maingĩ nĩ maagarũrũkire. Ũgarũrũku ũmwe nĩ atĩ andũ nĩ maambĩrĩirie gũkua, ũndũ ũrĩa ũngĩahutirie kĩhiko. Ũndũ ũcio no woneke wega harĩ ũrĩa mũtũmwo Paulo aandĩkire agĩtaarĩria atĩ Akristiano matirĩ rungu rwa Watho wa Musa. Oonanirie atĩ gĩkuũ nĩ gĩtũmaga kĩhiko gĩthire na atĩ mũndũ ũrĩa watigwo no ahike kana ahikanie thutha ũcio. (Rom. 7:1-3) Watho ũrĩa Ngai aaheire rũrĩrĩ rwa Isiraeli nĩ waheanĩte ũhoro makĩria wĩgiĩ kĩhiko. Nĩ wetĩkĩrĩtie mũndũ kũhikia atumia aingĩ, mũtugo ũrĩa waambĩrĩirie o na Ngai ataheete Aisiraeli Watho ũcio. O na kũrĩ ũguo, Watho ũcio nĩ wagitagĩra atumia na ciana matikahinyĩrĩrio thĩinĩ wa ihiko ta icio. Kwa ngerekano, Watho woonanĩtie atĩ mũthuri Mũisiraeli angĩahikirie ngombo acoke thutha-inĩ ahikie mũtumia wa kerĩ, no mũhaka angĩathiire na mbere kũhe mũtumia ũcio wake wa mbere irio, nguo, na amũhingĩrie bata wa kĩhiko. Ngai oonanĩtie atĩ no mũhaka mũthuri ũcio angĩathiire na mbere kũgitĩra na kũrũmbũiya mũtumia ũcio wake wa mbere. (Tham. 21:9, 10) Watho ũcio nĩ ũtuonagia ũrĩa Jehova arũmbũyanagia na kĩhiko, o na gũtuĩka ithuĩ tũtikoragwo rungu rwaguo. Na githĩ ũndũ ũcio ndũragũteithia gũtĩa kĩhiko? w18.12 10 ¶3; 11 ¶5-6

Thutha wa Habakuku gũtigĩra Jehova maũndũ marĩa maamũtangaga, no kũhoteke nĩ aarigagwo ũrĩa Jehova angĩekire. O ta mũciari ũrĩ wendo, Jehova nĩ aataũkĩirũo na ndaamũkũũmire nĩ ũndũ wa ciũria ciake cia kuuma ngoro. Nĩ aamenyire atĩ Habakuku nĩ aanyamarĩkaga, na nĩ kũhoya aahoyaga ũteithio. Jehova nĩ aamenyithirie Habakuku maũndũ marĩa mangĩekĩkire thutha ũcio, kũgerera ciugo iria ooigire kwerekera Ayahudi arĩa maaregenyũkĩte. O na no kũhoteke atĩ nĩwe warĩ wa mbere kũmenyithio nĩ Jehova atĩ mũico wa andũ acio oru warĩ hakuhĩ. Jehova nĩ aataarĩirie Habakuku atĩ aarĩ hakuhĩ kuoya ikinya. Rũciaro rũu rwekaga maũndũ ma ũhinya na rwaganu rwarĩ hakuhĩ kũherithio. Jehova akĩhũthĩra ciugo “matukũ-inĩ manyu,” oonanirie atĩ ituĩro rĩu rĩngĩokire matukũ-inĩ ma Habakuku kana ma andũ arĩa maatũranagia nake. Ũrĩa Jehova aacokirie hatarĩ nganja tiguo Habakuku eerĩgagĩrĩra. Maũndũ marĩa Jehova aamwĩrire moonanirie atĩ mĩnyamaro nĩ kũingĩha ĩngĩaingĩhire kũndũ guothe thĩinĩ wa Juda. w18.11 15 ¶7-8

Ũkoragwo na mawoni marĩkũ kwerekera andũ a mĩthemba mĩingĩ arĩa matarĩ mareruta ũhoro ũrĩa wa ma? O na gũtuĩka mũtũmwo Paulo nĩ aathiaga thunagogi-inĩ gũcaria andũ arĩa moĩ maũndũ maigana ũna megiĩ Ngai, ndaacaragia o Ayahudi tu. Rũgendo-inĩ rwake rwa mbere rwa ũmishonarĩ marĩ na Baranaba, andũ a Lukaonia maamonire marĩ na hinya wa mwanya na magĩciria nĩ ngai ciao cia maheeni Zeu na Herime irĩ thĩinĩ wao. Hihi Paulo na Baranaba nĩ monire ũcio ta arĩ mweke mwega wa kũgĩa igweta? Hihi nĩ mangĩonire ũcio ũrĩ mweke wa gũcokwo nĩ thayũ thutha wa kũnyarirũo matũũra-inĩ merĩ marĩa maathiĩte mbere ĩyo? Hihi nĩ meeciragia atĩ kũgĩa igweta nĩ kũngĩamateithirie gũtheremia ũhoro ũrĩa mwega? Aca! Maareganire na ũndũ ũcio o rĩo na njĩra ya gũtembũranga nguo ciao na magĩtengʼera kĩrĩndĩ-inĩ makĩanĩrĩra makiuga: “Mũreka maũndũ maya nĩkĩ? O na ithuĩ tũrĩ andũ o ta inyuĩ.”—Atũm. 14:8-15. w18.09 4-5 ¶8-9

Nĩ tũbatiĩ gũkorũo twĩhaarĩirie gwĩka mogarũrũku harĩ mwĩcirĩrie na mĩthiĩre itũ, nĩgetha twĩtĩkĩre ũhoro wa ma na tũtũũre kũringana na ithimi cia Bibilia. Mũtũmwo Petero aandĩkire ũũ: “Ta ciana njathĩki-rĩ, tigai gwĩkaga kũringana na merirĩria marĩa mwarĩ namo hau kabere rĩrĩa mũtaarĩ na ũmenyo wĩgiĩ Ngai, no . . . tuĩkai atheru mĩthiĩre-inĩ yanyu yothe.” (1 Pet. 1:14, 15) Andũ thĩinĩ wa itũũra rĩa Korintho rĩrĩa rĩaiyũire waganu, maabatarire gwĩka mogarũrũku manene mũtũũrĩre-inĩ wao nĩguo magũre ũhoro wa ma. O na andũ aingĩ ũmũthĩ nĩ matiganĩte na mĩthiĩre ĩtakenagia Ngai nĩgetha magũre ũhoro wa ma. Petero ningĩ aaririkanirie Akristiano matukũ-inĩ make ũũ: “Mahinda marĩa mahĩtũku nĩ mamũiganĩte gũkorũo mwĩkĩte wendi wa ndũrĩrĩ hĩndĩ ĩrĩa mweingĩragia mĩtugo-inĩ ya rũtũrĩko, mũkerirĩria gwĩka maũndũ moru, mũkanyua njohi gũkĩria njano, mũgathiĩ maruga-inĩ makĩrĩtie njano, na mũkahoya mĩhianano.”—1 Pet. 4:3. w18.11 6 ¶13

Tũngĩhota atĩa kũmenya arĩa marĩ na “mwerekera ũrĩa wagĩrĩire wa kũheo muoyo wa tene na tene”? O ta ũrĩa gwatariĩ thĩinĩ wa karine ya mbere, njĩra ĩrĩa tu tũngĩmamenya nayo nĩ kũgerera kũhunjia. Nĩ ũndũ ũcio, tũrabatara gwĩka o ta ũrĩa Jesu aathanire: “Taũni o yothe mũrĩtonya kana itũũra, cariai mũndũ ũrĩa ũrĩ kuo wagĩrĩire.” (Mat. 10:11) Tũtiĩrĩgagĩrĩra andũ marĩ na ũhinga, andũ matarĩ enyihia, kana andũ matendete maũndũ ma kĩĩroho maamũkĩre ũhoro mwega na njĩra njega. Tũcaragia andũ arĩa matarĩ ũhinga, enyihia, na manyoteire ũhoro wa ma. Gũcaria kũu no tũkũringithanie na ũrĩa Jesu, arĩ bundi wa mbaũ angĩkorũo eekaga agĩcaria mbaũ iria ciagĩrĩire cia gũthondeka indo ta mĩrango, macoki, kana indo ingĩ. Arĩkia kuona mbaũ iria ciagĩrĩire, akoya gathandũkũ gake ka indo cia gwaka, akahũthĩra ũũgĩ wake, na agathondeka kĩndũ kĩrĩa arenda. O na ithuĩ no mũhaka twĩke o ta ũguo rĩrĩa tũrerutanĩria gũcaria andũ arĩa marĩ na ngoro njega tũmatue arutwo.—Mat. 28:19, 20. w18.10 12 ¶3-4

Filipu ũrĩa warĩ mũhunjia wa ũhoro mwega nĩ aatũigĩire kĩonereria kĩega gĩa kũiga ũtungata mbere o na rĩrĩa maũndũ macenjia. Thĩinĩ wa Jerusalemu nĩ kwagĩire na ũkararia mũnene thutha wa Stefano kũũragwo. Ihinda-inĩ rĩu, Filipu nĩ aakenagĩra ũtungata mwerũ ũrĩa aaheetwo. (Atũm. 6:1-6) No rĩrĩa arũmĩrĩri a Kristo maanyaganire kũndũ gũtiganĩte Filipu ndaatiganĩirie ũtungata wake. Aathire kũhunjia itũũra rĩa Samaria rĩrĩa hĩndĩ ĩyo rĩtaakinyĩirũo nĩ ũhoro ũrĩa mwega. (Mat. 10:5; Atũm. 8:1) Filipu nĩ eehaarĩirie gũthiĩ o harĩa hothe roho wa Ngai ũngĩamũtongoririe, na kwoguo Jehova nĩ aamũhũthĩrire kũhunjia icigo-inĩ iria andũ mataakinyĩirũo nĩ ũhoro ũrĩa mwega. Asamaria nĩ maanyararĩtwo nĩ Ayahudi, na kwoguo no kũhoteke nĩ maakenirio nĩ ndũmĩrĩri ya Filipu tondũ we ndaarĩ na mũthutũkanio. O na nĩkĩo kĩrĩndĩ ‘kĩamũtegagĩra matũ akĩrutana’! (Atũm. 8:6-8) Filipu aathire na mbere kũiga ũtungata wake mbere, na ũndũ ũcio nĩ watũmire we na famĩlĩ yake marathimwo mũno nĩ Jehova.—Atũm. 21:8, 9. w18.10 30 ¶14-16

Hĩndĩ ĩmwe Jesu arĩ gĩcigo-inĩ kĩa Dekapoli, andũ nĩ “[maamũreheire] mũndũ ũtaarĩ na ũhoti wa kũigua na wa kwaria wega.” (Mar. 7:31-35) Handũ ha kũmũhoneria mbere ya andũ, Jesu “aamweheririe” kĩrĩndĩ-inĩ na agĩthiĩ akĩmũhonia. Eekire ũguo nĩkĩ? No gũkorũo mũndũ ũcio nĩ aaiguaga ataiganĩire arĩ mbere ya andũ nĩ ũndũ wa wathe ũcio aarĩ naguo. Kwahoteka nĩ ũndũ wa Jesu kũmenya ũguo nĩkĩo aamũhoneirie handũ hatarĩ na andũ. Ma nĩ atĩ ithuĩ tũtingĩhota kũhonia andũ na njĩra ya kĩama. Ĩndĩ no tũhote na nĩ twagĩrĩirũo gwĩciria mabataro ma aarĩ na ariũ a Ithe witũ na ũrĩa maraigua. Jesu nĩ aataũkagĩrũo nĩ ũrĩa mũndũ ũcio ũtaarĩ na ũhoti wa kũigua aaiguaga na akĩmũrũmbũiya na njĩra yonanirie atĩ nĩ aamwĩciragia. Ũndũ ũmwe na ũcio, nĩ twagĩrĩirũo gwĩciragia arĩa akũrũ na arĩa matarĩ na hinya. Ũndũ ũrĩa mũnene ũtũmaga kĩũngano gĩa Gĩkristiano kĩmenyeke, ti gwĩka maũndũ na njĩra njega, no nĩ wendo. (Joh. 13:34, 35) Wendo ũcio ũtũmaga twĩrutanĩrie ũrĩa wothe tũngĩhota gũteithia arĩa akũrũ na arĩa marĩ na wathe mahote gũthiĩ mĩcemanio na kũhunjia ũhoro ũrĩa mwega. Tũtiagaga kũmateithia o na angĩkorũo maũndũ marĩa mangĩhota kũhingia no manini.—Mat. 13:23. w18.09 29-30 ¶7-8

Gũtirĩ ngʼondu o na ĩmwe ya Jehova ĩtarĩ ya goro mũno harĩ we na harĩ Jesu, ũrĩa warutire muoyo wake nĩ ũndũ wacio ciothe. (Gal. 2:20) Nĩ twendete aarĩ na ariũ a Ithe witũ mũno na twendaga kũmarũmbũiya na njĩra njega na ya wendo. Nĩ getha tũhotage gũcanjamũra andũ arĩa angĩ, “nĩ tũthingatagei maũndũ marĩa mangĩrehe thayũ na marĩa mangĩtũma twĩkĩranage hinya.” (Rom. 14:19) Nĩ twĩriragĩria mũno hĩndĩ ĩrĩa tũtagacoka gũkua ngoro rĩngĩ thĩinĩ wa Paradiso ĩrĩa ĩroka. Gũtigaacoka gũkorũo na mĩrimũ o hamwe na mbaara, gĩkuũ kĩrĩa twagaire, kũnyarirũo, ngucanio cia kĩĩmũciĩ, na gũkua ngoro. Thutha wa mĩaka ngiri, andũ magaakorũo marĩ akinyanĩru. Arĩa magaatooria igerio rĩa mũico nĩ magaatuĩka ciana cia Jehova cia gũkũ thĩ na magĩe na “wĩyathi ũrĩ na riri wa ciana cia Ngai.” (Rom. 8:21) Rekei ithuothe tũthiĩ na mbere kuonania wendo ũrĩa wakaga andũ arĩa angĩ na tũteithanie gũkinyĩra kĩĩranĩro kĩu kĩega ũguo. w18.09 14 ¶10; 16 ¶18

Kwĩruta nĩ kũhutĩtie maũndũ makĩria, to gũthoma igũrũ igũrũ kana gũkururĩra macokio. Rĩrĩa tũreruta nĩ twagĩrĩirũo gwĩciria ũrĩa ũhoro ũcio ũratũruta igũrũ rĩgiĩ Jehova, njĩra yake ya gwĩka maũndũ, na mwĩcirĩrie wake. Nĩ twagĩrĩirũo gũtaũkĩrũo kĩrĩa kĩratũma Ngai atwĩre twĩke kana tũtigeke ũndũ mũna. Ningĩ nĩ tũrabatara gwĩcũrania ũrĩa ũhoro ũrĩa tũreruta ũngĩtũteithia gwĩka mogarũrũku marĩa mahutĩtie ũtũũro na mwĩcirĩrie witũ. Ma nĩ atĩ, ti hingo ciothe ũngĩhota gwĩcũrania maũndũ macio mothe rĩrĩa ũreruta, no nĩ wega kũhũthĩra ihinda gwĩcũrania ũhoro wĩgiĩ maũndũ marĩa weruta, o na angĩkorũo ũkũhũthĩra nuthu ya ihinda rĩrĩa ũhũthagĩra ũkĩĩruta. (1 Tim. 4:15) Rĩrĩa twecũrania Kiugo kĩa Ngai o mũthenya, nĩ tũhotaga ‘kwĩmenyera’ atĩ mwĩcirĩrie wa Jehova nĩ mũkinyanĩru. Nĩ twambagĩrĩria kuona maũndũ ta ũrĩa we amonaga na tũkona muonere wake wagĩrĩire. Meciria maitũ nĩ ‘magarũrũkaga,’ tũgakũria njĩra njerũ ya gwĩciria. (Rom. 12:2) Kahora kahora tũgathiĩ tũgĩte na mwĩcirĩrie ta wa Jehova. w18.11 24 ¶5-6

Karine-inĩ ya mbere, Paulo oigire we na angĩ maakoragwo nao maarĩ “arutithania wĩra hamwe na Ngai,” tondũ wa itemi rĩao rĩa kũhanda mbeũ cia ũhoro wa ma na gũcitĩrĩria maĩ. (1 Kor. 3:6) O na ithuĩ no tũkorũo tũrĩ “arutithania wĩra hamwe na Ngai” na njĩra ya kũhũthĩra mahinda maitũ, indo citũ, na hinya witũ kũruta wĩra ũyũ tũheetwo nĩ Ngai wa kũhunjia. Ũyũ nĩ mweke wa mwanya mũno! Kũhũthĩra mahinda maitũ na hinya witũ wĩra-inĩ wa kũhunjia na gũtua andũ arutwo nĩ ũndũ ũtũrehagĩra gĩkeno. Aingĩ arĩa magĩĩte na mweke wa kwĩruta Bibilia na andũ mareka mogarũrũku nĩ moigaga atĩ ũndũ ũcio nĩ ũrehaga gĩkeno kĩnene. Nĩ tũkenaga mũno tuona andũ magĩcanjamũka nĩ ũndũ wa gũtaũkĩrũo nĩ ũhoro wa ma, magĩkũria wĩtĩkio, magĩka mogarũrũku, na makĩambĩrĩria kũhunjĩria andũ arĩa angĩ. O na Jesu nĩ aakenire mũno rĩrĩa ahunjia 70 arĩa aatũmĩte makahunjie ‘maacokire marĩ na gĩkeno,’ nĩ ũndũ wa moimĩrĩro mega marĩa maagĩte namo.—Luk. 10:17-21. w18.08 20 ¶11-12

Kwĩhoka mũno ũũgĩ ũrĩa tũgĩte naguo no gũkorũo kũrĩ mũtego. No twambĩrĩrie gwĩciria atĩ no tũrore ũndũ mũna na tũtaũkĩrũo nĩguo o na angĩkorũo tũtimenyete ũhoro wothe wĩgiĩ ũndũ ũcio. Ningĩ mũhĩnga ũngĩ ũngĩtũma twage kũmenya ũhoro wega nĩ rĩrĩa twaga kũiguithania na Mũkristiano ũngĩ. Tũngĩikara tũkĩroraga maũndũ marĩa tũtaraiguithanĩria, no twambĩrĩrie gwĩkĩrĩra Mũkristiano ũcio nganja. Ũndũ ũcio no ũtũme tũhiũhe gwĩtĩkia ũndũ ũtarĩ mwega ũrĩa tũngĩigua ũmwĩgiĩ. Tũreruta ũndũ ũrĩkũ? Kũigĩra aarĩ na ariũ a Ithe witũ muku no gũtũme tũtue ũndũ o na tũtamenyete ũhoro wothe. (1 Tim. 6:4, 5) No twĩtheme gũtuagĩra arĩa angĩ ũrĩa gũtagĩrĩire tũngĩniina ũiru ngoro-inĩ citũ. Handũ ha kũrekereria maũndũ ta macio moru makũre ngoro-inĩ citũ, rekei tũririkanage atĩ nĩ twagĩrĩirũo kwendaga aarĩ na ariũ a Ithe witũ na kũmohagĩra kuuma ngoro.—Kol. 3:12-14. w18.08 6 ¶15; 7 ¶18

Andũ othe nĩ a Jehova tondũ nĩwe wamombire. (Thab. 100:3; Kũg. 4:11) O na kũrĩ ũguo, kuuma rĩrĩa andũ maambĩrĩirie gũtũũra gũkũ thĩ, Ngai akoretwo agĩthuura amwe matuĩke ake na njĩra ya mwanya. Kwa ngerekano, Thaburi 135 ĩtaga athathaiya a Jehova thĩinĩ wa Isiraeli ya tene “inagĩ kana igai rĩake kĩũmbe.” (Thab. 135:4) Ningĩ Hosea nĩ aarathĩte atĩ andũ amwe matarĩ Aisiraeli nĩ mangĩgatuĩka andũ a Jehova. (Hos. 2:23) Ũrathi ũcio wahingire rĩrĩa Jehova aambĩrĩirie gũthuura nginya andũ matarĩ Aisiraeli nĩguo magaathana na Kristo. (Atũm. 10:45; Rom. 9:23-26) ‘Rũrĩrĩ rũrũ rũtheru’ nĩ “kĩndũ kĩa Ngai kĩa mwanya” tondũ arĩa marĩ thĩinĩ waruo maitĩrĩirio maguta na roho mũtheru na magathuurũo nĩ getha magaatũũra igũrũ. (1 Pet. 2:9, 10) Ĩ nao Akristiano ehokeku arĩa marĩ na kĩĩrĩgĩrĩro gĩa gũgatũũra gũkũ thĩ? Jehova ameetaga “andũ” ake na andũ ake “arĩa athure.”—Isa. 65:22. w18.07 22 ¶1-2

Akristiano a ma megerekanagia na Kristo ũrĩa watũigĩire kĩonereria kĩega biũ kĩa ũrĩa mũndũ angĩkorũo arĩ mũtana. (Mat. 20:28) O ũmwe witũ agĩrĩirũo kwĩyũria ũũ: ‘Hihi no hote kũrũmĩrĩra kĩonereria kĩa Jesu makĩria ma ũrĩa ndĩreka rĩu?’ (1 Pet. 2:21) No twĩtĩkĩrĩke nĩ Jehova angĩkorũo nĩ tũrĩĩgerekanagia na kĩonereria gĩake na gĩa Kristo, angĩkorũo nĩ tũrĩĩciragia ũhoro wa andũ arĩa angĩ, na angĩkorũo nĩ tũrĩethaga njĩra cia kũrũmbũiya mabataro ma andũ arĩa angĩ. Thĩinĩ wa ngerekano ya Mũsamaria mwega, Jesu onanirie wega atĩ erĩgagĩrĩra arũmĩrĩri ake meke ũrĩa wothe mangĩhota nĩguo mateithie arĩa angĩ, nginya arĩa moimĩte kũndũ kũngĩ. (Luk. 10:29-37) Hihi nĩ ũraririkana kĩũria kĩrĩa gĩatũmire Jesu aheane ngerekano ya Mũsamaria mwega? Mũyahudi ũmwe aamũririe ũũ: “Mũndũ wa itũũra ritũ kũna nũ?” Macokio ma Jesu monanagia atĩ no mũhaka tũkorũo tũrĩ atana ta Mũsamaria ũcio, angĩkorũo nĩ tũkwenda gwĩtĩkĩrĩka nĩ Ngai. w18.08 19 ¶5-6

Hihi Mariamu nĩ aathire na mbere gwĩtĩkĩrĩka nĩ Jehova nĩ ũndũ wa kũrera na kũmenyerera Jesu? Ĩĩ. Ngai nĩ aatũmire maũndũ marĩa eekire na marĩa oigire maandĩkwo Bibilia-inĩ. No kũhoteke atĩ Mariamu ndangĩahotire gũtwaranaga na Jesu hĩndĩ ya ũtungata wake wa mĩaka ĩtatũ na nuthu. No gũkorũo ihinda-inĩ rĩu aarĩ mũtumia wa ndigwa, na no mũhaka angĩaikarire Nazarethi. O na gũtuĩka ndagĩire na mweke wa gũkorũo na Jesu ihinda-inĩ rĩu, aarĩ ho rĩrĩa aakuire. (Joh. 19:26) Thutha ũcio, Mariamu aarĩ Jerusalemu hamwe na arutwo mbere ya maitĩrĩirio roho mũtheru mũthenya wa Pentekoste. (Atũm. 1:13, 14) Kũrĩ na ũhotekeku mũnene atĩ nĩ aaitĩrĩirio roho mũtheru hamwe na arĩa angĩ maarĩ kuo. Angĩkorũo nĩguo, nĩ kuonania atĩ nĩ aaheirũo mweke wa gũkorũo na Jesu kũrĩa igũrũ tene na tene. Na githĩ kũu ti kũrathimwo na njĩra nene nĩ ũndũ wa wĩhokeku wake! w18.07 9 ¶11; 10 ¶14

Rĩrĩa Jesu aarĩ gũkũ thĩ, nĩ aarutanire maũndũ ma gũteithia arutwo ake mamenye moimĩrĩro ma mĩerekera na ciĩko imwe. Kwa ngerekano, aarutanire atĩ kũiga muku no gũtũme mũndũ atharĩkĩre ũrĩa ũngĩ na atĩ merirĩria moru no matũme mũndũ atharie. (Mat. 5:21, 22, 27, 28) Twagĩrĩirũo kũreka motaaro ma Bibilia matũtongoragie nĩguo tũgĩe na thamiri ĩmenyeretio wega, na ũndũ ũcio nĩ ũrĩgoocithagia Ngai. Maũndũ-inĩ mamwe, Akristiano matiganĩte marĩ na thamiri imenyeretio kũgerera Bibilia no matue matua matahaanaine. Ta wĩcirie ũhoro wa kũnyua njohi. Bibilia ndĩkananĩtie kũnyua njohi na gĩthimi. O na kũrĩ ũguo, nĩ ĩkaananĩtie kũnyua njohi gũkĩria gĩthimi, na ũrĩu. (Thim. 20:1; 1 Tim. 3:8) No hihi ũguo nĩ kuuga atĩ Mũkristiano ndarĩ maũndũ mangĩ agĩrĩirũo gwĩciria ũhoro wamo atĩ tondũ tu aranyua njohi na gĩthimi? Aca. O na angĩkorũo thamiri yake nĩ ĩramwĩtĩkĩria kũnyua njohi na gĩthimi, nĩ agĩrĩirũo gwĩciria ũhoro wa thamiri cia andũ arĩa angĩ. w18.06 18 ¶10-11

Jesu nĩ eerire arutwo ake atĩtĩrithĩtie atĩ metheme ndawa ya kũimbia, kana morutani ma Afarisai, Asadukai, na arũmĩrĩri a kĩama kĩa Herode. (Mat. 16:6, 12) Na nĩ wega kũririkana atĩ Jesu eerire arutwo ake ũguo ihinda inini thutha wa rĩrĩa andũ meendaga kũmũtua mũthamaki. Rĩrĩa ndini cieingĩrania na ũteti, ngahĩha no ituthũke na njĩra hũthũ. Jesu eerire arutwo ake atĩ no mũhaka metheme biũ maũndũ ma ũteti. Ũndũ ũmwe watũmaga athĩnjĩri-Ngai arĩa anene na Afarisai mende kũũraga Jesu nĩ ũteti. Nĩ meetigagĩra atĩ andũ nĩ mekũmũthikĩrĩria na matige kũmarũmĩrĩra, ũndũ ũrĩa ũngĩatũmire morũo nĩ ũnene ũrĩa maarĩ naguo wa kĩndini na ũteti. Moigire ũũ: “Tũngĩreka athiĩ na mbere ũguo-rĩ, andũ othe nĩ mekũmwĩtĩkia, nao Aroma moke matũtunye handũ haha haitũ o na bũrũri witũ.” (Joh. 11:48) Nĩ ũndũ ũcio Kaiafa, ũrĩa warĩ mũthĩnjĩri-Ngai mũnene agĩtongoria harĩ kũbanga ũrĩa Jesu ekũragwo.—Joh. 11:49-53; 18:14. w18.06 6-7 ¶12-13

Njĩra ĩmwe Shaitani ahũthagĩra kũnyitũkia andũ nĩ gũtũma mende mũno kũmenya maũndũ ma ndaimono. Shaitani to ndini ya maheeni ahũthagĩra gũtũma andũ mende maũndũ ma ndaimono, no nĩ ahũthagĩra nginya maũndũ ma gwĩkenia. Thenema, mĩthako ya kompiuta na maũndũ mangĩ ta macio matũmaga maũndũ ma ndaimono moneke marĩ mega. Tũngĩka atĩa nĩguo tũtikanyitwo nĩ mũtego ũcio? Tũtiagĩrĩirũo kwĩrĩgĩrĩra ithondeka rĩa Jehova rĩtwandĩkĩre maũndũ marĩa magĩrĩire ma gwĩkenia na marĩa matagĩrĩire. O ũmwe witũ nĩ ekũbatara kũmenyeria thamiri yake gũthuura maũndũ marĩa maratwarana na ithimi cia Ngai. (Ahib. 5:14) No tũngĩrũmĩrĩra ũtaaro ũcio mũtũmwo Paulo aandĩkire nĩ tũrĩtuaga matua ma ũũgĩ. No twĩyũrie ũũ: ‘Hihi maũndũ marĩa nyendete ma gwĩkenia no matũme nyoneke ndĩ na ũhinga? Hihi arutwo akwa a Bibilia kana andũ arĩa njokagĩra mangĩona maũndũ marĩa thuuraga ma gwĩkenia, no metĩkie atĩ njĩkaga ũrĩa hunjagia?’ Tũngĩka maũndũ marĩa tũhunjagia, ti ũndũ mũhũthũ kũnyitwo nĩ mũtego wa Shaitani.—1 Joh. 3:18. w18.05 25 ¶13

Twĩgerekanagia na Paulo atĩa? Wa mbere, twĩrutanagĩria gũkorũo na wendi wa kuuma ngoro wa gũcaria mũndũ o wothe ũngĩkorũo na “mwerekera ũrĩa wagĩrĩire wa kũheo muoyo wa tene na tene.” Wa kerĩ, tũhoyaga Jehova ahingũre ngoro cia andũ arĩa marenda gũthikĩrĩria. (Atũm. 13:48; 16:14) Silvana, ũrĩa ũkoretwo arĩ painia hakuhĩ mĩaka 30, oigire ũũ: “Itanaingĩra kwa mũndũ kũmũhunjĩria, nyambaga kũhoya Jehova andeithie nĩguo ngorũo na mwerekera ũrĩa wagĩrĩire.” Ningĩ nĩ tũhoyaga nĩguo araika matũteithie kuona andũ arĩa marĩ na ngoro njega. (Mat. 10:11-13; Kũg. 14:6) Robert, ũrĩa ũkoretwo arĩ painia makĩria ma mĩaka 30, oigire ũũ: “Kũrutithania wĩra na araika nĩ ũndũ ũcanjamũraga mũno tondũ nĩ moĩ maũndũ marĩa mũndũ ũrĩa tũrahunjĩria aragerera.” Wa gatatũ, nĩ twĩrutanagĩria kuona maũndũ marĩa mega harĩ andũ na atĩ no mahote gũtungatĩra Jehova. Mũthuri ũmwe wa kĩũngano wĩtagwo Carl, oigire ũũ: “Ngeragia kũrora kaũndũ o gothe kanini kangĩonania atĩ mũndũ ũrĩa ndĩrahunjĩria arĩ na ngoro njega, hihi ta ũcanjamũku, ũrĩa arandora, kana kĩũria gĩa kuuma ngoro.” O na ithuĩ no tũhote gũthiĩ na mbere gũciara maciaro o ta Paulo. w18.05 15 ¶13; 16 ¶15

Rĩrĩa twaigua ũrĩa andũ arĩa twateithirie gatene maratũũria wĩhokeku wao, ũndũ ũcio no ũtũũmĩrĩrie o ta ũrĩa kwarĩ harĩ mũtũmwo Johana, ũrĩa waandĩkire ũũ: “Ndirĩ na gĩkeno kĩngĩ gĩkĩrĩte gĩkĩ: atĩ njiguage ciana ciakwa nĩ irathiĩ na mbere kũrũmĩrĩra ũhoro ũrĩa wa ma.” (3 Joh. 4) Mapainia aingĩ no marute ũira ũcio wĩgiĩ ũrĩa momagĩrĩrio mamenya atĩ andũ amwe maateithirie moke ũhoro-inĩ wa ma mĩaka mĩingĩ mĩhĩtũku, no maratũũria wĩhokeku wao o na kana hihi maratungata marĩ mapainia. Kũririkania painia ũkuĩte ngoro gĩkeno kĩrĩa anakorũo nakĩo, no gũkorũo kũrĩ kĩhumo gĩa kũmũũmĩrĩria. Arori aingĩ a mũthiũrũrũko nĩ moigĩte ũrĩa momagĩrĩrio marĩ na atumia ao mandĩkĩrũo marũa ma kũmacokeria ngatho nĩ kĩũngano kĩrĩa maracereire. Ũguo noguo gũkoragwo harĩ athuri a kĩũngano, amishonarĩ, mapainia, na arĩa matungataga Betheli mangĩcokerio ngatho nĩ ũndũ wa gũtungata marĩ ehokeku. w18.04 23 ¶14-15

Suleimani ndaathĩkire tondũ aahikirie atumia 700 na akĩgĩa thuriya 300. (1 Ath. 11:3) Atumia aingĩ harĩ acio matiarĩ Aisiraeli na maathathayagia ngai cia maheeni. Kwoguo, Suleimani ningĩ ndaathĩkĩire watho wa Ngai ũrĩa wakananĩtie kũhikia atumia a ndũrĩrĩ ingĩ. (Gũcok. 7:3, 4) Suleimani eehereire Jehova kahora kahora nginya marigĩrĩrio-inĩ agĩka mehia maritũ. Aakĩire ngai ya maheeni yetagwo Ashitorethu kĩgongona na agĩcoka agĩaka kĩngĩ nĩ ũndũ wa ngai yetagwo Kemoshu, na mathiaga gũthathaiya ngai icio cia maheeni marĩ na atumia ake. Gũthũkia mũno, aakire igongona icio kĩrĩma-inĩ kĩarĩ mbere ya Jerusalemu kũrĩa aakĩte hekarũ ya Jehova! (1 Ath. 11:5-8; 2 Ath. 23:13) No gũkorũo Suleimani eheenagia atĩ Jehova nĩ angĩagire gũtindanĩra na ũremi wake angĩathire na mbere kũruta magongona hekarũ-inĩ. No Jehova ndarĩ hingo agaga gũtindanĩra na mehia. w18.07 18-19 ¶7-9

‘Mĩguĩ ĩmwe ĩrĩa ĩrĩ mwaki’ Shaitani angĩgũikĩria nĩ maheeni megiĩ atĩ Jehova ndakũrũmbũyagia na ndangĩkwenda. Ida, ũrĩa ũrĩ na mĩaka 19 aiguaga arĩ mũndũ ũtarĩ kĩene. Oigire ũũ: “Kaingĩ njiguaga Jehova arĩ kũraihu na niĩ na ngeciria ndendaga nduĩke mũrata wake.” Ahiũranagia atĩa na tharĩkĩro ĩyo? Aataarĩirie ũũ: “Mĩcemanio nĩ ĩkĩraga wĩtĩkio wakwa hinya mũno. Ndaamenyerete gũthiaga mĩcemanio ngaaga kuoya guoko njuge ũndũ, tondũ ndeciragia atĩ gũtirĩ mũndũ ũngĩenda gũthikĩrĩria ũrĩa ndĩroiga. O na kũrĩ ũguo, rĩu nĩ haaragĩria mĩcemanio na ngerutanĩria gũcokia maita merĩ kana matatũ.” Ũndũ ũcio Ida ataarĩria ũratũruta ũndũ wa bata: Ngo ĩrĩa mũthigari aakoragwo nayo ndĩacenjagia, no ngo itũ ya wĩtĩkio no ĩnenehe kana ĩnyihe. Ithuĩ nĩ ithuĩ tũngĩtua tũkwenda ĩkorũo ĩigana atĩa. (Mat. 14:31; 2 Thes. 1:3) Na githĩ ti ũndũ wa bata mũno gũthiĩ na mbere gwaka wĩtĩkio witũ! w18.05 29-30 ¶12-14

Thutha wa gĩthingithia kũhaanĩka nĩrĩo mũrangĩri ũcio wa njera aagarũrũkire ngoro na akĩhoya ũteithio. (Atũm. 16:25-34) Na njĩra o ta ĩyo, andũ amwe arĩa manarega ndũmĩrĩri ya Bibilia hau kabere no magarũrũke ngoro na macarie ũteithio thutha wa gũcemania na ũndũ mũritũ mũno ũtũũro-inĩ. No gũkorũo nĩ morĩtwo nĩ wĩra wao materĩgĩrĩire na ũndũ ũcio ũgatũma mamake. Angĩ nao no makorũo marwarĩte mũrimũ mũnene, kana makorũo makuĩte ngoro nĩ ũndũ wa gũkuĩrũo nĩ mũndũ mendete. No maambĩrĩrie kũũria ciũria ciĩgiĩ ũtũũro, iria matangĩroririe hau kabere. O na no makorũo makĩyũria, ‘Njagĩrĩirũo gwĩka atĩa nĩguo honoke?’ Rĩrĩa twamakora, no makorũo makĩenda gũthikĩrĩria ndũmĩrĩri itũ ya kĩĩrĩgĩrĩro riita rĩa mbere ũtũũro-inĩ wao. Nĩ ũndũ ũcio, twathiĩ na mbere kũhunjia, nĩ tũgũtigĩrĩra atĩ nĩ tũrĩonekaga nĩguo tũũmĩrĩrie andũ hĩndĩ ĩrĩa mangĩkorũo mehaarĩirie gũtũthikĩrĩria.—Isa. 61:1. w18.05 19-20 ¶10-12

Matukũ-inĩ maya, andũ arĩa aingĩ nĩ matumumarĩtio nĩ ngai ya gũkũ thĩ na marĩ ũkombo-inĩ wa ndini, wa ũthii wa na mbere, na wa mĩikarĩre. (2 Kor. 4:4) Tũrĩ na mweke wa kũrũmĩrĩra kĩonereria kĩa Jesu harĩ gũteithia andũ mamenye na matungatĩre Jehova, Ngai ũrĩa mwene wĩyathi. (Mat. 28:19, 20) Ũcio ti wĩra mũhũthũ, na kũrĩ na mathĩna maingĩ. Thĩinĩ wa mabũrũri mamwe, andũ marathiĩ o magĩcenjagia na amwe magakorũo marĩ oru mũno. Kwoguo o ũmwe witũ agĩrĩirũo kwĩyũria ũũ: ‘Ingĩhũthĩra wĩyathi wakwa atĩa kũnyita mbaru wĩra wa Ũthamaki na njĩra nene?’ Ũndũ wa gwĩkĩra ngoro nĩ atĩ andũ aingĩ nĩ mamenyete mahinda ma ũgwati marĩa tũratũũra na kwoguo makahũthahũthia ũtũũro wao nĩguo maingĩre ũtungata-inĩ wa hĩndĩ ciothe. (1 Kor. 9:19, 23) Amwe matungataga o kũrĩa marĩ, nao arĩa angĩ magathiĩ gũtungata kũrĩa kũrabatarania ahunjia. Githĩ macio ti moimĩrĩro mega nĩ ũndũ wa kũhũthĩra wĩyathi witũ na njĩra ya ũũgĩ gũtungatĩra Jehova!—Thab. 110:3. w18.04 11-12 ¶13-14