Ĩpuro

Hihi harĩ na igerio iritũ ũrahiũrania narĩo? No gũkorũo nĩ harĩ mũndũ kĩũngano-inĩ wĩkĩte ũndũ wa gũgũtuurithia. (Jak. 3:2) Kana akorũo andũ arĩa mũrutithanagia wĩra nao kana arĩa mũthomaga nao nĩ makũnyũrũragia nĩ ũndũ wa gũtungatĩra Jehova. (1 Pet. 4:3, 4) Ningĩ no gũkorũo andũ a famĩlĩ yanyu nĩ makũgiragia gũthiĩ mĩcemanio-inĩ kana kũhunjĩria andũ arĩa angĩ. (Mat. 10:35, 36) Mũndũ angĩkorũo akĩgerera igerio iritũ mũno, no aigue ta angĩtiga gũthiĩ na mbere gũtungatĩra Jehova. Ĩndĩ nĩ wagĩrĩirũo gũkorũo na ma atĩ gũtekũmakania thĩna ũrĩa ũragerera ũhaana atĩa, Jehova no akũhe ũũgĩ na hinya wa gũkirĩrĩria ũndũ ũcio. Thĩinĩ wa Kiugo gĩake, Jehova nĩ aandĩkithirie ũhoro mũingĩ wĩgiĩ ũrĩa andũ ake maahotire gũkirĩrĩria magerio o na gũtuĩka matiarĩ akinyanĩru. Eekire ũguo nĩgetha twĩrutage kuumana nao. Jehova nĩ aatongoririe mũtũmwo Paulo na roho wake akĩandĩka ũndũ ũcio. Gũthoma ũhoro wĩgiĩ cionereria ta icio, no gũtwĩkĩre ngoro na gũtũme tũkorũo na kĩĩrĩgĩrĩro. No gũthoma Bibilia gwiki ti kũiganu. Nĩ twagĩrĩirũo kũreka ũhoro ũrĩa twathoma ũtongorie mwĩcirĩrie witũ na ũhutie ngoro citũ. w21.03 14 ¶1-2

Hihi nĩ wonaga andũ arĩa ũhunjagĩria matariĩ ta irio ikũrĩte ũndũ ingĩgethwo? Angĩkorũo ũguo nĩguo ũmonaga, nĩ ũrĩkaga maũndũ maya matatũ. Wa mbere, nĩ ũrĩhunjagia ũrĩ na kĩyo. Ihinda rĩa magetha rĩkoragwo rĩrĩ inini, kwoguo mũndũ nĩ agĩrĩirũo kũhũthĩra mahinda wega. Ũndũ wa kerĩ, nĩ ũrĩkenaga wona andũ magĩthikĩrĩria ũhoro ũrĩa mwega. Bibilia yugaga: “Andũ [nĩ] makenaga hĩndĩ ya magetha.” (Isa. 9:3) Ũndũ wa gatatũ, nĩ ũrĩonaga mũndũ o wothe no atuĩke mũrutwo wa Jesu, kwoguo nĩ ũrĩgarũragĩra njĩra ya kũhunjia nĩguo ũgucĩrĩrie ũrĩa ũragũthikĩrĩria. Jesu aarĩ na mawoni mega kwerekera Asamaria, ngũrani na arũmĩrĩri amwe ake. Oonaga atĩ no matuĩke arutwo ake. O na ithuĩ nĩ twagĩrĩirũo kuona andũ a gĩcigo gitũ marĩ andũ mangĩtuĩka arutwo a Kristo. Mũtũmwo Paulo nĩ aatũigĩire kĩonereria kĩega gĩa kũrũmĩrĩra. Nĩ aamenyaga maũndũ marĩa andũ arĩa aahunjagĩria meetĩkĩtie, nĩ aataũkagĩrũo nĩ maũndũ marĩa maamakenagia, na nĩ oonaga marĩ andũ mangĩtuĩka arutwo a Jesu. w20.04 8-9 ¶3-4

Handũ ha gũtuagĩra mũndũ nĩ ũndũ wa maũndũ marĩa areka, wĩrutanagĩrie gũtaũkĩrũo nĩ ũrĩa araigua. Jehova nowe tu ũhotaga gũtaũkĩrũo nĩ ithuĩ wega biũ. Kwoguo mũhoyage agũteithie kuona andũ arĩa angĩ ta ũrĩa we amonaga, na agũteithie kũmenya ũrĩa ũngĩmonia ũcayanĩri. Ndwagĩrĩirũo gũthuura nĩ aarĩ na ariũ a Ithe witũ arĩkũ ũkuonia ũcayanĩri. Othe no makorũo makĩhiũrania na mathĩna mahaanaine na marĩa Jona, Elija, Hagari, na Loti maahiũranagia namo. Amwe ao no makorũo nĩo mereheire mathĩna macio o ene. Ũhoro wa ma nĩ atĩ ithuothe twanerehera mathĩna hĩndĩ ĩmwe. Nĩkĩo nĩ ũndũ mwagĩrĩru harĩ Jehova gũtwĩra tũkoragwo na wendo ta wa andũ a nyina ũmwe. (1 Pet. 3:8) Twathĩkĩra Jehova nĩ twĩkagĩra hinya ũrũmwe witũ wa aarĩ na ariũ a Ithe witũ a kuuma kũndũ guothe thĩinĩ wa thĩ. Nĩ ũndũ ũcio, rĩrĩa tũrahiũrania na andũ arĩa angĩ, rekei tũtue itua rĩa kũmathikagĩrĩria, gũtaũkĩrũo nĩo, na kũmonia ũcayanĩri. w20.04 18-19 ¶15-17

Jesu nĩ aaigire kĩonereria kĩega ũhoro-inĩ wĩgiĩ gwathĩkĩra Jehova. Kwoguo njĩra ĩmwe nene tũngĩathĩkĩra Jehova nayo nĩ kwĩrutanĩria biũ kũrũmĩrĩra makinya ma Jesu. (Joh. 8:29) Nĩguo tũthiĩ na mbere kũrũmĩrĩra ũhoro ũrĩa wa ma, no mũhaka twĩtĩkie atĩ Jehova nĩwe Ngai wa ma, na atĩ maũndũ mothe oigĩte thĩinĩ wa Kiugo gĩake Bibilia nĩ ma ma. Ningĩ no mũhaka twĩtĩkie atĩ Jesu nĩwe Mesia ũrĩa weranĩirũo. Andũ aingĩ ũmũthĩ nĩ mekagĩrĩra nganja kana Jesu nĩ amũrĩtwo arĩ Mũthamaki wa Ũthamaki wa Ngai. Johana ooigire atĩ kwarĩ na “aheenania aingĩ,” arĩa mangĩahĩtithirie andũ arĩa mataarĩ na wĩtĩkio mũrũmu harĩ Jehova na Jesu. (2 Joh. 7-11) Johana aandĩkire ũũ: “Nũũ mũheenania o tiga ũrĩa ũkaanaga atĩ Jesu nĩwe Kristo?” (1 Joh. 2:22) Ũndũ ũrĩa tu ũngĩtũteithia tũtikaheenio nĩ kwĩruta Kiugo kĩa Ngai. Ũndũ ũcio nĩguo ũngĩtũteithia kũmenya Jehova na Jesu. (Joh. 17:3) Na tweka ũguo nĩ tũrĩkoragwo na ma atĩ tũrĩ na ũhoro wa ma. w20.07 21 ¶4-5

Ũndũ ũmwe ũngĩtũteithia gwĩthema gũtuĩka “mũhĩnga” harĩ arĩa tũratengʼera hamwe nao, nĩ na njĩra ya gwĩtĩkĩra metuagĩre matua rĩrĩa kwagĩrĩire handũ ha kũmatindĩkĩrĩria marũmĩrĩre mawoni maitũ. (Rom. 14:19-21; 1 Kor. 8:9, 13) Ũndũ-inĩ ũcio wa bata, tũtikoragwo tũtariĩ ta mũtengʼeri ũrĩ macindano-inĩ ũrĩa wĩrutanagĩria nĩguo egĩre na kĩheo we mwene. Ũndũ ũrĩa mũnene atengʼeri acio makoragwo magĩciria nĩ ũrĩa o megũcinda. Kwoguo no magerie gũtindĩka arĩa angĩ nĩguo o makorũo marĩ mbere. Ngũrani nao, ithuĩ tũtikoragwo tũgĩcindana mũndũ na ũrĩa ũngĩ. (Gal. 5:26; 6:4) Muoroto witũ nĩ gũteithia andũ aingĩ o ũrĩa kwahoteka kũrĩkia ihenya tũrĩ hamwe na tũheo kĩheo kĩa muoyo. Kwoguo nĩ twĩrutanagĩria kũhũthĩra ũtaaro ũyũ wa Maandĩko ũtongoretio nĩ roho, wa kwaga ‘kũrũmbũiya o maũndũ maitũ oiki no tũkarũmbũyagia nginya maũndũ ma arĩa angĩ.’ (Afil. 2:4) Thĩinĩ wa ihenya rĩrĩa tũrĩ, Jehova nĩ erĩire andũ arĩa mekũrĩkia kĩheo kĩrĩa arĩ o mũhaka amahe, kĩa muoyo wa tene na tene kũrĩa igũrũ kana thĩinĩ wa paradiso gũkũ thĩ. w20.04 28 ¶10; 29 ¶12

Akristiano aingĩ nĩ makaahonoka na moime “thĩna-inĩ ũrĩa mũnene” na maingĩre thĩinĩ wa thĩ njerũ. Andũ acio makaahonoka thĩna ũrĩa mũnene nĩ makeyonera gĩkuũ gĩkĩhootwo o rĩngĩ rĩrĩa andũ bilioni nyingĩ arĩa maakuĩte tene makaariũkio. Ta hũũra mbica gĩkeno kĩrĩa tũgaakorũo nakĩo rĩrĩa ũndũ ũcio ũgeekĩka! (Atũm. 24:15) Na arĩa othe magatũũria wĩhokeku harĩ Jehova, nĩ magaatooria gĩkuũ kĩrĩa twagaire kuuma kũrĩ Adamu. Nĩ magaatũũra tene na tene. Akristiano othe arĩa marĩ muoyo ũmũthĩ nĩ magĩrĩirũo gũkena nĩ ũndũ wa ciugo cia gwĩkĩra ngoro ciĩgiĩ kũriũka iria Paulo aandĩkĩire Akorintho. Tũrĩ na itũmi njega cia gwathĩkĩra ũtaaro ũrĩa Paulo aaheanire wa gũkorũo na maũndũ maingĩ ma gwĩka “wĩra-inĩ wa Mwathani.” (1 Kor. 15:58) Tũngĩka ũrĩa wothe tũngĩhota wĩra-inĩ ũcio, no twĩrĩgĩrĩre gũgaakorũo na mahinda mega marĩa maroka. Ũtũũro wa mahinda macio ũgaakorũo ũrĩ mwega mũno gũkĩra ũndũ ũngĩ o wothe tũngĩĩcirĩria. Ũndũ ũcio nĩ ũkonania atĩ tũtikoretwo tũkĩruta wĩra wa tũhũ ũhoro-inĩ ũkoniĩ Mwathani. w20.12 13 ¶16-17

No kũhoteke morathi marĩa marĩ thĩinĩ wa Ezekieli 38:10-23; Danieli 2:43-45; 11:44–12:1 na Kũguũrĩrio 16:13-16, 21, mothe marataarĩria ũhoro wĩgiĩ maũndũ mageekĩka ihinda-inĩ rĩmwe. Angĩkorũo ũguo nĩguo, no twĩrĩgĩrĩre atĩ maũndũ maya marũmĩrĩire nĩ makaahaanĩka. Ihinda rĩna thutha wa thĩna ũrĩa mũnene kwambĩrĩria, “athamaki a thĩ yothe ĩrĩa ĩikaragwo,” nĩ magaathondeka ngwatanĩro ya mabũrũri. (Kũg. 16:13, 14) Ngwatanĩro ĩyo ya mabũrũri nĩyo Bibilia ĩĩtaga “Gogu wa bũrũri wa Magogu.” (Ezek. 38:2) Ngwatanĩro ĩyo ya mabũrũri nĩ ĩgaatharĩkĩra andũ othe a Ngai ĩkĩgeria kũmaniina biũ. Mũtũmwo Johana akĩaria ũhoro wĩgiĩ ihinda rĩu ooigire atĩ thũ cia Ngai nĩ ingĩgaakorũo nĩ ihũũra rĩa mbembe nene mũno cia mbura. No kũhoteke mbura ĩyo nene ya mbembe ĩrũgamĩrĩire ndũmĩrĩri nditũ ya ituĩro ĩrĩa ĩkaahunjio nĩ andũ a Jehova. Nĩ ĩkaarakaria Gogu wa Magogu na ecirie gũtharĩkĩra andũ a Ngai arĩ na muoroto wa kũmaniina biũ thĩinĩ wa thĩ.—Kũg. 16:21. w20.05 15 ¶13-14

Roho mũtheru wa Ngai nĩ kĩheo twagĩrĩirũo kuona kĩrĩ kĩa bata. No tuongerere ngatho citũ nĩ ũndũ wa roho mũtheru na njĩra ya gwĩcũrania maũndũ marĩa roho ũcio ũhingĩtie mahinda-inĩ maya. Jesu atanathiĩ igũrũ eerire arutwo ake ũũ: “Nĩ mũkaamũkĩra hinya rĩrĩa roho mũtheru ũgooka igũrũ rĩanyu, na nĩ mũgaatuĩka aira akwa . . . o nginya ituri ciothe cia thĩ.” (Atũm. 1:8) Kũgerera ũteithio wa roho mũtheru, nĩ kũgĩte na athathaiya a Jehova ta milioni inyanya na nuthu thĩinĩ wa thĩ yothe. Ningĩ nĩ tũkenagĩra gũkorũo na paradiso ya kĩĩroho tondũ roho mũtheru wa Ngai nĩ ũtũteithagia gũkũria ngumo njega ta wendo, gĩkeno, thayũ, wetereri, ũtugi, wega, wĩtĩkio, ũhooreri, na kwĩgirĩrĩria. Ngumo icio ikoragwo irĩ “maciaro ma roho.” (Gal. 5:22, 23) Hatarĩ nganja, roho mũtheru nĩ kĩheo gĩa bata mũno! w20.05 28 ¶10; 29 ¶13

Nĩ harĩ itũmi cigana ũna ingĩtũma twĩrĩgĩrĩre atĩ andũ nĩ makaamenya endwa ao arĩa makaariũkio. Kwa ngerekano, kũringana na andũ arĩa Jehova anariũkia no twĩrĩgĩrĩre akaariũkia andũ arĩa makuĩte matariĩ o ta ũrĩa maahaanaga, ũrĩa maaragia, na ũrĩa meeciragia kahinda kanini matanakua. Ririkana atĩ Jesu aaringithanirie gĩkuũ na toro na akĩringithania kũriũkio na gũkĩrio kuuma toro. (Mat. 9:18, 24; Joh. 11:11-13) Rĩrĩa andũ mokĩra kuuma toro, matikoragwo macenjetie ũrĩa marahaanaga kana mwarĩrie wao na matikoragwo mariganĩirũo nĩ maũndũ marĩa maroĩ matanathiĩ toro. Ta wĩcirie ngerekano ya Lazaro. Aakoretwo arĩ mũkuũ kwa ihinda rĩa thikũ inya, kwoguo mwĩrĩ wake nĩ waambĩrĩirie kũbutha. No rĩrĩa Jesu aamũriũkirie, aarĩ a nyina nĩ maamũmenyire, na o na Lazaro nĩ aamaririkanire.—Joh. 11:38-44; 12:1, 2. w20.08 14 ¶3; 16 ¶8

Maitho-inĩ ma Jehova, arĩa aitĩrĩrie maguta na arĩa a ngʼondu ingĩ matikoragwo na ngũrani. Othe amonaga marĩ a bata. Tũmenyaga ũguo tondũ aarutire muoyo wa Mũrũ wake ũrĩa endete kũrĩha thogora nĩ ũndũ wa arĩa aitĩrĩrie maguta o hamwe na arĩa a ngʼondu ingĩ. Ngũrani ĩrĩa ĩrĩ ho gatagatĩ ga ikundi icio cierĩ nĩ atĩ, o gĩkundi kĩrĩ na kĩĩrĩgĩrĩro gĩakĩo ngũrani. Andũ a ikundi icio cierĩ no mũhaka matũũre marĩ ehokeku harĩ Ngai na Kristo. (Thab. 31:23) Ningĩ ririkana atĩ roho wa Ngai ũrutaga wĩra ũndũ ũmwe harĩ ithuĩ ithuothe. Ũguo nĩ kuuga atĩ Jehova aheaga mũndũ roho wake mũtheru kũringana na mabataro make, gũtekũmakania kana nĩ mũitĩrĩrie maguta kana ti mũitĩrĩrie maguta. Jehova nĩ aheete ndungata ciake ciothe kĩĩrĩgĩrĩro kĩa magegania kĩa mahinda marĩa maroka. (Jer. 29:11) Kĩririkano gĩa gĩkuũ gĩa Kristo nĩ kĩheaga o ũmwe witũ mweke wa kũgooca Ngai na Kristo nĩ ũndũ wa maũndũ marĩa matwĩkĩire nĩguo tũgaakenera muoyo wa tene na tene. Hatarĩ nganja, Kĩririkano nĩkĩo mũcemanio ũrĩa wa bata mũno Akristiano a ma makoragwo naguo o mwaka. w21.01 18 ¶16; 19 ¶19

Andũ aingĩ arĩa mathiaga Kĩririkano makoragwo na kĩĩrĩgĩrĩro gĩa gũgaatũũra gũkũ thĩ. Mathiaga nĩkĩ? Nĩ ũndũ wa gĩtũmi o ta kĩrĩa gĩtũmaga andũ mathiĩ ũhiki wa mũrata. Mendaga kuonania atĩ nĩ mendete arĩa marahikania na atĩ nĩ maramanyita mbaru. Na njĩra o ta ĩyo, andũ a ngʼondu ingĩ mathiaga Kĩririkano tondũ nĩ mendaga kuonania atĩ nĩ maranyita mbaru Kristo na arĩa aitĩrĩrie maguta na nĩ mamendete. Ũndũ ũngĩ ũtũmaga andũ a ngʼondu ingĩ mathiĩ Kĩririkano, nĩgetha monanie ngatho ciao nĩ ũndũ wa igongona rĩa ũkũũri rĩa Jesu rĩrĩa rĩkaamahotithia gũtũũra thĩinĩ wa thĩ tene na tene. Ũndũ ũngĩ wa bata ũtũmaga andũ a ngʼondu ingĩ mathiĩ Kĩririkano, nĩ gwathĩkĩra rĩathani rĩa Jesu. Rĩrĩa Jesu aambĩrĩirie Irio cia Hwaĩ-inĩ cia Mwathani, eerire atũmwo ake ehokeku ũũ: “Ĩkagai ũũ nĩguo mũndirikanage.” (1 Kor. 11:23-26) Kwoguo ihinda rĩrĩa rĩothe arĩa aitĩrĩrie maguta makoretwo gũkũ thĩ, andũ a ngʼondu ingĩ nĩ mathiaga na mbere gũkorũo kuo hĩndĩ ya Irio cia Hwaĩ-inĩ cia Mwathani. w21.01 17-18 ¶13-14

Nĩguo tuonanie biũ atĩ nĩ twendete andũ, nĩ twagĩrĩirũo gwĩka ũguo kũgerera ciĩko. (Ringithania Jakubu 2:17, 26.) Kwa ngerekano, Jehova nĩ atwendete. (1 Joh. 4:19) Na nĩ atwĩraga atĩ nĩ atwendete kũgerera ciugo njega iria irĩ thĩinĩ wa Bibilia. (Thab. 25:10; Rom. 8:38, 39) O na kũrĩ ũguo, tũmenyaga atĩ Ngai nĩ atwendete, to kũgerera maũndũ marĩa atwĩraga no nĩ nginya marĩa atwĩkagĩra. Jehova nĩ eetĩkĩririe Mũrũ wake ũrĩa endete anyamarĩke na akue nĩ ũndũ witũ. (Joh. 3:16) Kwoguo nĩ tũkoragwo na ma atĩ Jehova nĩ atwendete. Tuonanagia atĩ nĩ twendete Jehova na Jesu na njĩra ya kũmaathĩkĩra. (Joh. 14:15; 1 Joh. 5:3) Jesu we mwene nĩ aatwathire twendanage. (Joh. 13:34, 35) Tũtiagĩrĩirũo o kwĩra aarĩ na ariũ a Ithe witũ atĩ nĩ tũmendete, no nĩ twagĩrĩirũo kũmonia atĩ nĩ tũmendete kũgerera ciĩko.—1 Joh. 3:18. w21.01 9 ¶6; 10 ¶8

Andũ arĩa maitĩrĩirio maguta kũgerera roho mũtheru nĩ makoragwo na kĩĩrĩgĩrĩro gĩa gũgaatũũrania na Jesu tene na tene marĩ athamaki Ũthamaki-inĩ wa Ngai. Magaakoragwo hamwe na Kristo, makamuona, makaria nake, na makahũthĩra mahinda hamwe nake. (Joh. 14:2, 3) Jesu nĩ akoonagia wendo na akarũmbũiya nginya andũ arĩa marĩ na kĩĩrĩgĩrĩro gĩa gũgaatũũra gũkũ thĩ. O na akorũo o matikona Jesu, ũrata wao hamwe nake ũgathiĩ na mbere ũkĩgĩaga hinya tondũ nĩ magaakenera ũtũũro mwega ũrĩa makaaheo nĩ Jehova na Jesu. (Isa. 9:6, 7) Rĩrĩa twetĩkĩra gũtuĩka arata a Jesu nĩ tũgĩaga na irathimo nyingĩ. Kwa ngerekano, nĩ atuonagia wendo na agatũteithia mahinda-inĩ maya. Tũrĩ na mweke wa gũgaatũũra tene na tene. Ningĩ ũndũ ũrĩa wa bata makĩria nĩ atĩ ũrata witũ hamwe na Jesu nĩ ũtũmaga tũgĩe na ũrata wa hakuhĩ hamwe na Ithe Jehova, na ũcio nĩguo ũrata ũrĩa mwega makĩria tũngĩgĩa naguo. Na githĩ ti gĩtĩo kĩa mwanya gũkorũo tũrĩ arata a Jesu! w20.04 25 ¶15-16

Mũtũmwo Paulo aandĩkaga marũa macio kũrĩ Akristiano aitĩrĩrie maguta a Korintho arĩa mangĩariũkirio mathiĩ igũrũ. Akristiano acio nĩ ‘maatheretio marĩ na ũiguano na Kristo Jesu, na magetwo matuĩke andũ aamũre.’ Ningĩ Paulo nĩ aaririe ũhoro wĩgiĩ “arĩa makomete gĩkuũ-inĩ marĩ na ũiguano na Kristo.” (1 Kor. 1:2; 15:18; 2 Kor. 5:17) Paulo akĩandĩka marũa mangĩ matongoretio nĩ roho ooigire atĩ arĩa marĩ na “ũrũmwe hamwe [na Jesu] nĩ ũndũ wa gĩkuũ ta gĩake,” nĩ makaagĩa na “ũrũmwe hamwe nake nĩ ũndũ wa kũriũka ta gwake.” (Rom. 6:3-5) Jesu aariũkirio arĩ kĩũmbe kĩa roho na agĩthiĩ igũrũ. Na ũguo nĩguo gũgaathiĩ harĩ arĩa marĩ na “ũiguano na Kristo,” ũguo nĩ kuuga Akristiano othe arĩa aitĩrĩrie maguta. Paulo aandĩkire atĩ Kristo aariũkirio arĩ we “maciaro ma mbere harĩ arĩa makomete gĩkuũ-inĩ.” (1 Kor. 15:20) Jesu nĩwe warĩ mũndũ wa mbere kũriũkio arĩ kĩũmbe kĩa roho na kũheo muoyo wa tene na tene. w20.12 5-6 ¶15-16

Akristiano aitĩrĩrie maguta arĩa makua ihinda-inĩ rĩrĩ, mariũkagio o rĩo magathiĩ gũtũũra kũrĩa igũrũ. Ũndũ ũcio nĩ ũrekĩrũo mũkonde nĩ ciugo cia mũtũmwo Paulo iria irĩ thĩinĩ wa 1 Akorintho 15:51, 52. Thutha wa kũriũkio, ariũ acio a Ithe na Kristo nĩ makoragwo na gĩkeno kĩnene. Bibilia nĩ ĩtwĩrĩte wĩra ũrĩa arĩa makaagarũrũo “o rĩmwe ta kũbucia kwa riitho” magaathiĩ kũruta kũrĩa igũrũ. Jesu ameerĩte ũũ: “Mũndũ ũrĩa ũgũtooria na arũmĩrĩre ciĩko ciakwa nginya mũthia, nĩ ngaamũhe wathani igũrũ rĩa ndũrĩrĩ, nake nĩ akaarĩithagia andũ na rũthanju rwa kĩgera nĩguo amahehenje tũcunjĩ tũcunjĩ o ta indo cia rĩũmba, o ta ũrĩa nyamũkĩrĩte kuuma kũrĩ Awa.”—Kũg. 2:26, 27. w20.12 12 ¶14-15

Rĩrĩa mũtũmwo Paulo eetire Jesu “maciaro ma mbere,” eendaga kuonania atĩ nĩ kũrĩ angĩ mangĩariũkirio thutha wake na mathiĩ igũrũ. Thutha-inĩ, atũmwo na andũ angĩ arĩa maarĩ na “ũiguano na Kristo” nĩ mangĩariũkirio mathiĩ igũrũ ta Jesu. (1 Kor. 15:18) Rĩrĩa Paulo aandĩkagĩra Akorintho marũa macio, ihinda rĩa arĩa marĩ na “ũiguano na Kristo” rĩa kũriũkio mathiĩ igũrũ rĩtiakinyĩte. Paulo oonanirie atĩ ũndũ ũcio ũngĩgeekĩka ihinda rĩrĩa rĩroka. Aandĩkire: “O mũndũ ihinda-inĩ rĩake mwene: Kristo arĩ we maciaro ma mbere, thutha ũcio, arĩa marĩ a Kristo hĩndĩ ya gũkorũo kuo gwake.” (1 Kor. 15:23; 1 Thes. 4:15, 16) Tũratũũra ihinda-inĩ rĩu rĩeranĩirũo rĩa “gũkorũo kuo” gwa Kristo. Atũmwo na Akristiano angĩ aitĩrĩrie maguta arĩa maakuĩte nĩ maabataraga gweterera ihinda rĩu rĩa gũkorũo kuo gwake nĩguo mariũkio maheo ngerenwa kũrĩa igũrũ na makorũo na “ũrũmwe hamwe [na Jesu] nĩ ũndũ wa kũriũka ta gwake.”—Rom. 6:5. w20.12 5 ¶12; 6 ¶16-17

Mũtũmwo Paulo aaragia ũhoro wĩgiĩ andũ arĩa mariũkagio magathiĩ gũtũũra kũrĩa igũrũ marĩ na “mwĩrĩ wa kĩĩroho.” (1 Kor. 15:43, 44) Rĩrĩa Jesu aarĩ gũkũ thĩ, aarĩ na mwĩrĩ wa nyama na thakame. No rĩrĩa aariũkirio aatuĩkire “roho wa kũheana muoyo” na agĩcoka kũrĩa igũrũ. O ũndũ ũmwe na ũcio, Akristiano aitĩrĩrie maguta mariũkagio na mĩĩrĩ ya roho nĩguo magatũũre kũrĩa igũrũ. Paulo ooigire ũũ: “O ta ũrĩa tũgĩĩte na mũhianĩre wa ũcio wombirũo na rũkũngũ, noguo tũkaagĩa na mũhianĩre wa ũcio wa igũrũ.” (1 Kor. 15:45-49) Ririkana atĩ Jesu ndaariũkirio arĩ na mwĩrĩ wa nyama na thakame. Paulo akĩrĩkĩrĩria ndeereti yake ooigire ũũ: “Nyama na thakame itingĩgaya Ũthamaki wa Ngai” kũrĩa igũrũ. (1 Kor. 15:50) Atũmwo o hamwe na aitĩrĩrie maguta arĩa angĩ matingĩariũkirio mathiĩ igũrũ marĩ na mĩĩrĩ ĩngĩbutha ya nyama na thakame. w20.12 11 ¶10-12

Ngai nĩ aatongoririe arutwo amwe a Jesu na roho wake hĩndĩ ya karine ya mbere kwandĩka igũrũ rĩgiĩ kĩĩrĩgĩrĩro gĩa gũthiĩ kũrĩa igũrũ. Mũtũmwo Johana aandĩkire ũũ: “Ithuĩ rĩu tũrĩ ciana cia Ngai, no gũtirĩ kũraguũrio ũrĩa tũgaatuĩka. Nĩ tũĩ atĩ rĩrĩa akaaguũrio tũkaahaanana nake, tondũ tũkaamuona o ta ũrĩa atariĩ.” (1 Joh. 3:2) Ũndũ ũcio ũronania atĩ Akristiano arĩa aitĩrĩrie maguta matikoragwo moĩ ũrĩa gũgaakorũo kũhaana rĩrĩa makaariũkio na mĩĩrĩ ya kĩĩroho mathiĩ kũrĩa igũrũ. O na kũrĩ ũguo, nĩ makoona Jehova rĩrĩa makaamũkĩra ngerenwa yao kũrĩa igũrũ. Bibilia nĩ yonanĩtie maũndũ mamwe megiĩ ũhoro ũcio. Akristiano acio aitĩrĩrie maguta magaakorũo hamwe na Kristo rĩrĩa akaaniina “thirikari yothe na wathani o na hinya wothe,” o hamwe na “thũ ya mũico [nĩyo] gĩkuũ.” Mũthia-inĩ, Jesu na arĩa magaakorũo magĩthamaka nake nĩ makeeiga rungu rwa Jehova na maige indo ciothe rungu rwake. (1 Kor. 15:24-28) Hatarĩ nganja rĩgakorũo rĩrĩ ihinda rĩega mũno. w20.12 8 ¶2

Akristieano ehokeku arĩa matakoragwo na kĩĩrĩgĩrĩro gĩa gũgaatũũra igũrũ hamwe na Kristo o nao nĩ makoragwo na kĩĩrĩgĩrĩro gĩa kũriũkio. Bibilia yonanagia atĩ mũtũmwo Paulo, na arĩa angĩ mathiaga igũrũ mariũkagio “ũriũkio ũrĩa wa kĩambĩrĩria kuuma kũrĩ arĩa akuũ.” (Afil. 3:11) Na githĩ ũndũ ũcio ndũronania atĩ nĩ harĩ ũriũkio ũngĩ ũngĩkaarũmĩrĩra? Ũndũ ũcio nĩ ũratwarana na ũrĩa Ayubu ooigĩte igũrũ rĩgiĩ ũtũũro wake wa mahinda mokĩte. (Ayub. 14:15) “Arĩa marĩ a Kristo hĩndĩ ya gũkorũo kuo gwake,” magaakorũo kũrĩa igũrũ hamwe na Jesu hĩndĩ ĩrĩa akaaniina biũ thirikari ciothe, wathani, na hinya wothe. O na “thũ ya mũico,” nĩyo gĩkuũ, nĩ ĩkaaniinwo. Kwoguo andũ arĩa makaariũkio mathiĩ igũrũ matigaacoka gũkua rĩngĩ. (1 Kor. 15:23-26) Andũ arĩa marĩ na kĩĩrĩgĩrĩro gĩa gũgaatũũra gũkũ thĩ no makorũo na kĩĩrĩgĩrĩro kĩĩhocetie harĩ ciugo cia Paulo iria irĩ rĩandĩko-inĩ rĩa ũmũthĩ. Tondũ gũtirĩ mũndũ ũtarĩ mũthingu ũngĩthiĩ igũrũ, ciugo icio ironania atĩ nĩ gũgaakorũo na ũriũkio wa andũ arĩa magaatũũra gũkũ thĩ. w20.12 6-7 ¶18-19

Mũndũ no eyũrie atĩrĩ, ‘Ingĩkorũo na ma biũ atĩa atĩ Jehova nĩ aanjoheire?’ Angĩkorũo nĩ wĩyũragia kĩũria kĩu, ũndũ ũcio ũronania atĩ Jehova no akuohere. Mĩaka mĩingĩ mĩhĩtũku, Mũrangĩri ũmwe woigĩte ũũ: “No wĩkore ũgĩka ihĩtia o rĩrĩa maita maingĩ, tondũ hihi ũndũ ũcio nĩ wakũingĩrĩte mũno na kwoguo ti ũndũ mũhũthũ kũũtooria. . . . Ndũkanecirie atĩ Jehova ndangĩkuohera. Ũguo nĩguo Shaitani angĩenda wĩcirie. Gũkorũo atĩ nĩ ũiguaga ũũru rĩrĩa weka ihĩtia, nĩ kuonania atĩ ndũrĩ mũndũ mũũru na Jehova no akuohere. Thiĩ na mbere kwĩnyihia na kũhoya Ngai akuohere, agũteithie kũgĩa na thamiri theru, na agũteithie gũtiga gwĩka ihĩtia rĩu.” Mũtũmwo Paulo atanatuĩka Mũkristiano, nĩ eekĩte mehia maigana ũna maritũ. Paulo nĩ aaririkanaga maũndũ macio eekĩte. (1 Tim. 1:12-15) Nĩ eetĩkĩtie atĩ we nĩ oheirũo nĩ ũndũ wa igongona rĩa ũkũũri. Nĩ ũndũ ũcio, handũ ha Paulo gũthumbũka nĩ ũndũ wa mahĩtia macio eekĩte, aaigire meciria make harĩ gũtungatĩra Jehova ũrĩa wothe angĩahotire. w20.11 28 ¶14; 29 ¶17

Shaitani no ahũthĩre njĩra nyingĩ gũtũgeria. Twagĩrĩirũo gwĩka atĩa? Nĩ ũndũ mũhũthũ gwĩciria atĩ ũndũ mũna ti mũũru. Kwa ngerekano, mũndũ no eĩre ũũ: ‘Ingĩka ũndũ ũyũ ndingĩeherio kĩũngano-inĩ, kwoguo ũndũ ũyũ ti mũũru.’ Mwĩcirĩrie ta ũcio nĩ mũũru mũno. Twagĩrĩrũo kwĩyũria ciũria ta ici: ‘Hihi no gũkorũo Shaitani arahũthĩra igerio rĩrĩ kũgayũkania ngoro yakwa? Na githĩ ndigũcambithia rĩĩtwa rĩa Jehova ingĩtĩkĩra gũtoorio nĩ merirĩria moru? Hihi ũndũ ũyũ ũgũtũma nguhĩrĩrie Ngai makĩria kana ũgũtũma ndĩmũraihĩrĩrie?’ Wĩcũranagie igũrũ rĩgiĩ ciũria icio. Hoyaga Jehova ũũgĩ wa gũcokia ciũria icio ũrĩa kwagĩrĩire ũtekwĩheenia. Gwĩka ũguo no gũkũgitĩre. No gũgũteithie kũregana na magerio o ta Jesu rĩrĩa ooigire ũũ: “Thiĩ, Shaitani!” (Mat. 4:10) Ririkanaga atĩ ngoro ĩgayũkanĩte ndĩngĩtũteithia o na hanini. w20.06 12-13 ¶16-17

Nĩ twathĩkagĩra ithimi cia Jehova tũrĩ na wĩnyihia, tondũ nĩ tũĩ atĩ hingo ciothe Jehova atwĩciragia maũndũ mega. (Ef. 4:22-24) Wĩnyihia nĩ ũtũmaga tũige wendi wa Jehova mbere ya witũ, na tũkona andũ arĩa angĩ marĩ a bata gũtũkĩra. Ũndũ ũcio nĩ ũtũmaga tũkorũo na ũrata mwega na Jehova o hamwe na aarĩ na ariũ a Ithe witũ. (Afil. 2:3) No tũngĩaga kwĩmenyerera, no tũkorũo na mwerekera ta wa andũ a thĩ ĩno ya Shaitani, arĩa makoragwo na mwĩtĩo na meyendete. No kũhoteke Akristiano amwe a karine ya mbere nĩ maahutĩtio nĩ mwerekera ta ũcio, tondũ mũtũmwo Paulo aandĩkire ũũ kũrĩ Aroma: “Ngwĩra mũndũ o wothe gatagatĩ-inĩ kanyu ndageciragie ũhoro wake mwene gũkĩra ũrĩa kwagĩrĩire gwĩciria, no eciragie nĩguo agĩe na meciria mega.” Paulo nĩ aamenyaga atĩ nĩ twagĩrĩirũo gwĩciria ũhoro witũ ene. O na kũrĩ ũguo, wĩnyihia nĩ ũtũteithagia gũkorũo na ũigananĩru harĩ ũrĩa twĩyonaga ithuĩ ene na gwĩthema gwĩciria mũno ũhoro witũ ene. w20.07 2 ¶1-2

Matukũ-inĩ ma Mũthamaki Asa, ihinda rĩa thayũ nĩ rĩacokire rĩgĩthira. Mbũtũ nene ya thigari ya andũ milioni ĩmwe kuuma Ethiopia nĩ yathiire kũmatharĩkĩra. Zera, mũnene wa mbũtũ ĩyo aarĩ na ma atĩ we hamwe na thigari ciake nĩ mangĩahootire Juda. No Asa ndaaigĩte mwĩhoko wake harĩ mũigana wa thigari iria aarĩ nacio, no eehokete Jehova Ngai. Asa aahoire ũũ: “Tũteithie wee Jehova Ngai witũ, nĩ gũkorũo nĩwe twĩhokete, na tũkĩte gũũkĩrĩra kĩrĩndĩ gĩkĩ na rĩĩtwa rĩaku.” (2 Maũ. 14:11) Mbũtũ ya Ethiopia yarĩ hakuhĩ maita merĩ ma mbũtũ ya Asa, no Asa aarĩ na ma atĩ Jehova aarĩ na ũhoti na nĩ angĩarũĩrĩire andũ ake. Na Jehova ndaamũconorithirie, tondũ mbũtũ ya Ethiopia nĩ yahootirũo. (2 Maũ. 14:8-13) O na gũtuĩka tũtiũĩ ũrĩa gũgaathiĩ harĩ o ũmwe witũ mahinda marĩa maroka, nĩ tũĩ atĩ ihinda rĩa thayũ rĩrĩa andũ a Ngai mangĩkorũo magĩkenera rĩtigũtũũra. Jesu aarathĩte atĩ matukũ-inĩ ma mũthia, arutwo ake nĩ mangĩgaathũrũo “nĩ ndũrĩrĩ ciothe.”—Mat. 24:9. w20.09 17-18 ¶14-16

Gũtirĩ mũndũ ũngĩenda kũrumwo. O na kũrĩ ũguo, thũ citũ ingĩtũruma na twĩcirie mũno ũhoro wĩgiĩ irumi icio, no tũkue ngoro. (Thim. 24:10) Gũkĩrĩ ũguo-rĩ, twagĩrĩirũo gwĩka atĩa rĩrĩa thũ citũ ciatũruma? O ta mũtũmwo Paulo, no ‘tũkenage rĩrĩa twarumwo.’ Nĩkĩ? Tondũ irumi na ũkararia cionanagia atĩ tũrĩ arutwo a ma a Jesu. (1 Pet. 4:14) Jesu ooigire atĩ arũmĩrĩri ake nĩ mangĩkanyarirũo. (Joh. 15:18-20) Ũndũ ũcio nĩ wekĩkire karine-inĩ ya mbere. Matukũ-inĩ macio, andũ arĩa maarũmagĩrĩra ũndũire wa Kĩngiriki, moonaga Akristiano matarĩ athomu na andũ matarĩ na hinya. O na mũtũmwo Petero na Johana arĩa maatuĩkĩte Akristiano, moonagwo nĩ Ayahudi marĩ andũ “matarĩ athomu na matarĩ igweta.” (Atũm. 4:13) Akristiano moonagwo matarĩ na hinya, andũ matarĩ na hinya gĩũteti kana hinya wa kũrũa mbaara, na andũ maamonaga marĩ ngũrani mũno na andũ arĩa angĩ. Hihi Akristiano acio a tene nĩ maarekire mawoni moru ma akararia ao mamorage ngoro? Aca. w20.07 14-15 ¶3-4

Mũtũmwo Johana nĩ eendete mũno ariũ a Ithe witũ na nĩ eendaga makorũo na wĩtĩkio mũrũmu. Ũndũ ũcio nĩ wonekaga wega kũgerera ũtaaro ũrĩa aamaheire thĩinĩ wa marũa make matatũ. Na githĩ ti ũndũ wa gwĩkĩra ngoro kũmenya atĩ athuri na atumia take nĩ maitĩrĩirio maguta magaathana hamwe na Kristo? (1 Joh. 2:27) Rekei tũtue itua rĩa kũrũmagĩrĩra ũtaaro ũcio aaheanire. Nĩ tũtuei itua rĩa kũrũmagĩrĩra ũhoro ũrĩa wa ma, tũgathĩkagĩra Jehova maũndũ-inĩ mothe ũtũũro-inĩ witũ. Wĩrutage Kiugo gĩake na ũgakĩĩhoka. Koragwo na wĩtĩkio mũrũmu harĩ Jesu. Wĩthemage morutani ma andũ na ma aregenyũki. Ndũgetuage atĩ nĩ ũratungatĩra Jehova na o hĩndĩ ĩyo nĩ ũreka maũndũ matagĩrĩire, na wĩthemage andũ arĩa mangĩkũhatĩka wĩke maũndũ marĩa matagĩrĩire. Rũmagĩrĩra ithimi ndũũgĩru cia Jehova cia mĩtugo. Ningĩ rekei tũteithagie aarĩ na ariũ a Ithe witũ gũkoragwo na hinya kĩĩroho, na njĩra ya kuohagĩra arĩa matũhĩtĩria na gũteithagia arĩa marabatara ũteithio. Tweka ũguo, nĩ tũgũthiĩ na mbere kũrũmĩrĩra ũhoro ũrĩa wa ma o na tũgĩcemanagia na mathĩna. w20.07 24-25 ¶15-17

Nĩ ũndũ wa wendo, Jehova nĩ etĩkĩrĩtie ndungata ciake ciothe gũkorũo thĩinĩ wa kĩũngano gĩake. O na gũtuĩka o mũndũ akoragwo na itemi ngũrani, ithuothe tũrĩ a bata na nĩ tũbataraga gũteithania. Mũtũmwo Paulo nĩ aatĩtĩrithirie atĩ hatirĩ mũndũ wagĩrĩirũo kũrora ũrĩa ũngĩ thĩinĩ wa kĩũngano amwĩre “Niĩ ndirakũbatara.” (1 Kor. 12:21) Nĩguo kĩũngano gĩkorũo na thayũ, no mũhaka tuone arĩa angĩ marĩ a bata na tũrutithanie wĩra hamwe. (Ef. 4:16) Rĩrĩa twarutithania wĩra hamwe tũrĩ na ũrũmwe, andũ othe kĩũngano-inĩ nĩ maiguaga mendetwo, na kĩũngano gĩkagĩa na hinya. Athuri othe thĩinĩ wa kĩũngano, mamũragwo kũgerera roho mũtheru wa Jehova. O na kũrĩ ũguo, o ũmwe wao akoragwo na ũhoti na iheo ngũrani. (1 Kor. 12:17) Amwe no gũkorũo no hingo maramũrirũo na kwoguo matirĩ na ũmenyeru mũnene. Angĩ no makorũo matihotaga kũhingia maũndũ maingĩ nĩ ũndũ wa ũkũrũ na mathĩna ma mwĩrĩ. Kwoguo gũtirĩ mũthuri wa kĩũngano wagĩrĩirũo kũrora ũrĩa ũngĩ na oige, “Niĩ ndirakũbatara.” Handũ ha ũguo, athuri othe a kĩũngano magĩrĩirũo kũrũmĩrĩra ũtaaro wa Paulo ũrĩa ũrĩ thĩinĩ wa Aroma 12:10. w20.08 26 ¶1-2; 27 ¶4

Jehova atũtongoragia njĩra-inĩ ya muoyo kũgerera gĩcunjĩ gĩa gũkũ thĩ gĩa ithondeka rĩake. Hĩndĩ ĩrĩa ithondeka rĩa Jehova rĩatũtaarĩria ũrutani mũna wa Bibilia kana ũhoro wĩgiĩ ithimi cia mĩtugo iria twagĩrĩrũo kũrũmĩrĩra, nĩ twathĩkaga na tũkarũmĩrĩra ũhoro ũcio. No twĩkaga atĩa rĩrĩa ithondeka rĩa Ngai rĩeka ũgarũrũku ũrahutia maũndũ mangĩ ma ũtũũro witũ, ta kwendia Nyũmba itũ ya Ũthamaki? Nĩ tũrĩkoragwo na gĩkeno, twaririkana atĩ tũratungatĩra Jehova na nĩwe ũratongoria ithondeka rĩake. (Kol. 3:23, 24) Mũthamaki Daudi nĩ aaigire kĩonereria kĩega rĩrĩa aarutaga mũhothi wa gwaka hekarũ. Ooigire ũũ: “Niĩ ndĩ ũ na andũ akwa nĩa atĩ nĩguo tũhote kũruta magongona maya ma kwĩyendera? Nĩ gũkorũo indo ciothe ciumaga kũrĩ wee, na twakũhe indo ciumĩte guoko-inĩ gwaku.” (1 Maũ. 29:14) Rĩrĩa tũraruta mĩhothi, o na ithuĩ tũkoragwo tũkĩhe Jehova kĩrĩa kiumĩte guoko-inĩ gwake. Na Jehova nĩ akenaga mũno hĩndĩ ĩrĩa twahũthĩra mahinda, hinya, na indo citũ gũteithĩrĩria wĩra wake.—2 Kor. 9:7. w20.11 22-23 ¶14-16

Tũrĩ Aira a Jehova, tũtithimaga kũgaacĩra gwitũ na andũ arĩa tũhotete gũteithia magoka ithondeka-inĩ rĩa Jehova. (Luk. 8:11-15) Tũngĩthiĩ na mbere kũhunjia ũhoro ũrĩa mwega na kũruta andũ arĩa angĩ, tũkoragwo tũrĩ agaacĩru maitho-inĩ ma Jehova. Nĩkĩ? Tondũ tũkoragwo tũgĩka ũrĩa we na Mũrũ wake mendaga tũkorũo tũgĩka. (Mar. 13:10; Atũm. 5:28, 29) Kũmenya atĩ mũico wa mũtabarĩre ũyũ ũrĩ hakuhĩ, nĩ kwagĩrĩirũo gũtũma tuongerere kĩyo gĩa kũhunjia ihinda-inĩ rĩrĩ. Ihinda rĩrĩa rĩtigarĩte rĩa kũruta wĩra ũcio wa kũhonokia mĩoyo nĩ inini mũno. Ndũgeterere nginya rĩrĩa maũndũ maku makaagĩra biũ nĩguo wambĩrĩrie kũnyitanĩra wĩra-inĩ ũcio wa kũhunjia. Oya ikinya ũmũthĩ nĩguo ũkũrie wendi, wongerere ũmenyo waku wa Bibilia, ũgĩe ũmĩrĩru, na ũkũrie ũhoti wa kwĩgirĩrĩria. Nyitanĩra na Aira a Jehova makĩria ma milioni inyanya arĩa marahunjia ũhoro ũrĩa mwega, na nĩ ũrĩonaga gĩkeno kĩrĩa kiumaga kũrĩ Jehova. (Neh. 8:10; Luk. 5:10) Tua itua rĩa kũnyitanĩra biũ wĩra-inĩ ũyũ nginya rĩrĩa ũkaarĩka. w20.09 7 ¶18-20

Tũtiagĩrĩirũo kũreka merirĩria ma kwenda indo nyingĩ cia kĩĩmwĩrĩ matũhĩngĩce. “Hinya wa maheeni wa ũtonga,” no ũtũme tũnyihie wendo witũ harĩ Jehova, twage ngatho harĩ Kiugo kĩa Ngai, na twage wendi wa kũmenyithia arĩa angĩ ũhoro wake. (Mat. 13:22) Nĩguo tũhote kũgitĩra maũndũ marĩa Jehova atwĩhokeire, nĩ tũrabatara kuoyaga makinya na ihenya rĩrĩa tuona ũgwati. Rĩrĩa tũrahũthĩra Intaneti, kana tũkĩĩrorera thenema kana ibindi cia TV, nĩ twagĩrĩirũo gũkorũo twĩhaarĩirie kabere ũrĩa tũngĩka tũngĩona mbica cia ũũra thoni, maũndũ ma ũhinya, kana ũhoro wa aregenyũki. Tũngĩkoragwo twĩhaarĩirie kabere nĩ ũndũ wa maũndũ mangĩhaanĩka, nĩ tũrĩhotaga kuoya ikinya na ihenya nĩguo twĩtheme maũndũ mangĩtũthũkia kĩĩroho na tũikare tũrĩ na thamiri theru maitho-inĩ ma Jehova. (Thab. 101:3; 1 Tim. 4:12) No mũhaka tũgitĩre maũndũ ma bata marĩa tũheetwo nĩ Jehova, nĩmo ma cia Bibilia na mweke wa kũruta andũ arĩa angĩ ma icio. Tweka ũguo, nĩ tũrĩkoragwo na thamiri theru, ũtũũro ũrĩ na muoroto, na gĩkeno kĩrĩa kiumanaga na gũteithia andũ arĩa angĩ kũmenya Jehova. w20.09 30 ¶16-19

Hihi ũrĩ mũbatithie? Hĩndĩ ĩrĩa wabatithirio, nĩ woonirie andũ arĩa angĩ atĩ nĩ wĩtĩkĩtie Jehova na nĩ wĩhaarĩirie kũmũtungatĩra thĩinĩ wa ithondeka rĩake. Ũrĩa Jehova atongoragia ithondeka rĩake matukũ-inĩ maya, nĩ gũtũteithagia gũtaũkĩrũo nĩ ũrĩa atariĩ, muoroto wake, na ithimi ciake. Ta wĩcirie ngumo ithatũ cia Jehova cionekaga wega kũgerera ũrĩa atongoragia ithondeka rĩake. Ya mbere, “Ngai ndarĩ mũthutũkanio.” (Atũm. 10:34) Wendo watũmire Jehova arute Mũrũ wake arĩ “ũkũũri . . . nĩ ũndũ wa andũ othe.” (1 Tim. 2:6; Joh. 3:16) Jehova nĩ arahũthĩra andũ ake kũhunjia ũhoro ũrĩa mwega kũrĩ andũ othe arĩa mangĩenda gũthikĩrĩria, na kwoguo agateithia andũ aingĩ o ũrĩa kwahoteka kũgunĩka kuumana na ũkũũri ũcio. Ya kerĩ, Jehova nĩ Ngai ũrĩ mĩbango na thayũ. (1 Kor. 14:33, 40) Kwoguo athathaiya ake magĩrĩirũo kũmũtungatĩra na njĩra ĩrĩ na mũbango mwega, na marĩ na thayũ. Ya gatatũ, Jehova nĩwe “Mũrutani . . . Ũrĩa Mũnene.” (Isa. 30:21) Nĩ ũndũ ũcio, ithondeka rĩake nĩ rĩĩrutanagĩria mũno kũrutana Kiugo gĩake kĩrĩa gĩtongoretio nĩ roho kĩũngano-inĩ na ũtungata-inĩ. w20.10 20 ¶1-3