Julaĩ

No mũhaka tũkorũo na ũrata mwega hamwe na Jesu nĩgetha mahoya maitũ macokio. Ũguo nĩ kuonania atĩ, kuuga “kũgerera harĩ rĩĩtwa rĩa Jesu” gwiki tũkĩrĩkĩrĩria mahoya maitũ ti kũiganu. Nĩ twagĩrĩirũo gũtaũkĩrũo nĩ ũrĩa Jehova ahũthagĩra Jesu gũcokia mahoya maitũ. Jesu eerire atũmwo ũũ: “Ũndũ o wothe mũrĩhoyaga na rĩĩtwa rĩakwa, nĩ ndĩrĩmũhingagĩria.” (Joh. 14:13) O na gũtuĩka Jehova nĩwe ũthikagĩrĩria na agacokia mahoya maitũ, nĩ aheete Jesu wathani wa kũhingia matua make. Kwoguo, Ngai atanacokia mahoya maitũ, ambaga kũrora kana nĩ tũhũthĩrĩte ũtaaro ũrĩa Jesu aaheanire. Kwa ngerekano, Jesu ooigire ũũ: “Mũngĩohagĩra andũ mehia mao, Ithe wanyu wa igũrũ o nake nĩ arĩmuohagĩra; no angĩkorũo mũtirĩohagĩra andũ mehia mao, o nake Ithe wanyu ndarĩmuohagĩra mehia manyu.” (Mat. 6:14, 15) na githĩ ndũkĩrĩ ũndũ wa bata gwĩkagĩra andũ arĩa angĩ maũndũ na njĩra ya ũtugi ta ũrĩa Jehova na Jesu matwĩkagĩra! w20.04 22 ¶6

Mũtũmwo Paulo nĩ aataũkĩirũo nĩ maũndũ marĩa maakenagia athikĩrĩria ake, na agĩcoka akĩgarũrĩra njĩra yake ya kũhunjia. Kwa ngerekano, andũ arĩa aaragĩria thĩinĩ wa Listra, maarĩ na ũmenyo mũnini wa Maandĩko kana makorũo matiarĩ. Kwoguo Paulo aaririe nao maũndũ marĩa mangĩataũkĩirũo nĩmo. Aaririe nao ũhoro wĩgiĩ magetha mega, na gũkenera ũtũũro. Aahũthĩrire ciugo na ngerekano iria athikĩrĩria ake mangĩataũkĩirũo wega nĩcio. Hũthagĩra ũũgĩ nĩguo ũtaũkĩrũo nĩ maũndũ marĩa makenagia andũ a gĩcigo kĩanyu, na ũgarũragĩre njĩra yaku ya kũhunjia. Ũngĩmenya atĩa maũndũ marĩa makenagia mũndũ rĩrĩa ũracemania nake kana rĩrĩa ũraingĩra gwake mũciĩ? Baaraga maũndũ. No gũkorũo nĩ kũrĩma ararĩma, gũthoma ibuku, gũthondeka ngaari, kana ũndũ ũngĩ. Angĩkorũo nĩ kwagĩrĩire, githĩ to ũhũthĩre ũndũ ũrĩa areka kwambĩrĩria ndeereti nake? (Joh. 4:7) O na mwĩhumbĩre wa mũndũ no ũgũteithie kũmenya ũhoro wĩgiĩ mũndũ ũcio, ta hihi oimĩte bũrũri ũrĩkũ, arutaga wĩra ũrĩkũ, kana endete timu ĩrĩkũ ya mathaako. w20.04 11 ¶11-12

Nĩ ũndũ wa aarĩ na ariũ a Ithe witũ amwe gũkorũo na mĩtangĩko mĩnene ya meciria, nĩ maiguaga mataiganĩire marĩ mbere ya andũ. No maigue maritũhĩirũo gũkorũo marĩ handũ harĩ na andũ aingĩ ĩndĩ no merutanagĩria gũthiĩ mĩcemanio na igomano. O na gũtuĩka nĩ maritũhagĩrũo kwaria na andũ matoĩ, nĩ maragia na andũ marĩ ũtungata-inĩ. Angĩkorũo nĩ ũgeragĩra ũndũ-inĩ ta ũcio, koragwo na ma atĩ ndũrĩ wiki. Andũ aingĩ nĩ mahiũranagia na mathĩna ta macio. Ririkanaga atĩ Jehova nĩ akenagio nĩ kĩyo gĩaku gĩa kuuma ngoro. Gũkorũo atĩ no ũrathiĩ na mbere nĩ kuonania atĩ nĩ arakũrathima na agakũhe hinya ũrĩa ũrabatara. (Afil. 4:6, 7) Angĩkorũo nĩ ũratungatĩra Jehova o na ũrĩ na mathĩna ma mwĩrĩ kana mĩtangĩko ya meciria, koragwo na ma atĩ nĩ ũkenagia Jehova. Aingĩ aitũ tũrĩ na mathĩna ma mwĩrĩ ĩndĩ no tũratengʼera ihenya-inĩ rĩa muoyo. (2 Kor. 4:16) Tũrĩ na ũteithio wa Jehova, ithuothe nĩ tũgũtengʼera ihenya rĩa muoyo nginya mũthia. w20.04 31 ¶20-21

Ũũgĩ wa Ngai nĩ wonekaga wega kũgerera ũrĩa ombĩte thĩ ĩno tũikaraga. (Ahib. 3:4) Thĩ yũmbĩtwo na njĩra ya mwanya tondũ ĩkoragwo na maũndũ marĩa mothe mabataranagia nĩguo ũtũũro ũthiĩ na mbere. Ũrĩa thĩ ĩthiagĩra rĩera-inĩ, no kũringithanio na ũrĩa gatarũ gathiagĩra iria-inĩ inene. No thĩ ĩkoragwo ĩrĩ ngũrani na gatarũ karathiĩra iria-inĩ gakuuĩte andũ. Kwa ngerekano-rĩ, andũ makuuĩtwo nĩ gatarũ mangĩikara ihinda rĩigana atĩa angĩkorũo nĩ o marethondekera rĩera rĩa oxygen, irio na maĩ, na makorũo matirate gĩko nja wa gatarũ kau? Andũ acio matingĩikara mũno matakuĩte. Ngũrani na ũguo, thĩ nĩ ĩhotaga gũtũũria muoyo andũ na nyamũ bilioni nyingĩ. Nĩyo ĩrutaga indo iria ciothe tũbataraga ta rĩera rĩa oxygen, irio, maĩ, na gũtirĩ hĩndĩ indo icio cia bata ciagaga. O na akorũo gĩko gĩothe gĩteagwo o gũkũ thĩ, thĩ ĩkoragwo ĩrĩ thaka na kũndũ kwega gwa gũikara. Ũndũ ũcio ũhotekaga atĩa? Jehova akoragwo ombĩte thĩ ũũ atĩ gĩko kĩrĩa kĩarutwo no gĩcenjio gĩtuĩke kĩndũ kĩngĩ kĩega kĩngĩhũthĩka rĩngĩ. w20.05 20 ¶3-4

Shaitani eerire Hawa atĩ Jehova nĩ mũheenania. Na njĩra ĩyo Shaitani agĩtuĩka mũcukani kana mũcambania. Hawa aahenirio biũ na agĩtĩkia Shaitani. (1 Tim. 2:14) Eetĩkirie Shaitani gũkĩra ũrĩa eetĩkĩtie Jehova. Ũndũ ũcio nĩguo watũmire Hawa atue itua rĩrĩa rĩũru mũno. Aatuire itua rĩa kwaga gwathĩkĩra Jehova, na akĩrĩa maciaro ma mũtĩ ũrĩa aagirĩtio nĩ Jehova. Thutha-inĩ, akĩhe Adamu o nake akĩrĩa. (Kĩam. 3:6) Ta wĩcirie o hanini ũrĩa Hawa aagĩrĩirũo kwĩra Shaitani. Ta wĩcirie korũo ooigire ũũ: “Niĩ ndikũĩ, no nĩ njũĩ Ithe witũ Jehova na nĩ ndĩmwendete na ngamwĩhoka. Twĩ na Adamu, nĩwe ũtũheete kĩrĩa gĩothe tũrĩ nakĩo. Nĩ weka ũũru mũno kwaria maũndũ ta macio moru mamwĩgiĩ. Njeherera!” Na githĩ to mũhaka akorũo Jehova nĩ angĩakenire mũno kũigua ciugo ta icio cia wĩhokeku kuuma kũrĩ mwarĩ wake endete! (Thim. 27:11) No Adamu na Hawa matiarĩ na wendo mwĩhokeku harĩ Jehova. Gũkorũo matarĩ na wendo ta ũcio harĩ Ithe wao Jehova, nĩ gwatũmire Adamu na Hawa maage gũtetera rĩĩtwa rĩake harĩ ũrĩa wamũcambagia. w20.06 4 ¶10-11

Aarĩ a Ithe witũ nĩ magĩrĩire gũcokerio ngatho nĩ ũndũ wa maũndũ mothe mahingagia ũtungata-inĩ wa Jehova. Maũndũ mamwe mahingagia nĩ gwaka na kũmenyerera mĩako ya ithondeka, gũteithĩrĩria ikundi cia rũthiomi rũngĩ, na kwĩrutĩra gũtungata Betheli. Nĩ mateithagĩrĩria hĩndĩ ĩrĩa kwagĩa na icanjama, wĩra-inĩ wa ũtaũri, na magatungata marĩ mapainia na amishonarĩ. Makĩria ma ũguo, atumia arĩa ahiku nĩ mateithagĩrĩria athuri ao kũhingia wĩra mũritũ ũrĩa mehokeirũo thĩinĩ wa kĩũngano na ithondeka-inĩ. Ariũ a Ithe witũ acio matongoragia maũndũ matingĩhota kũhingia biũ wĩra wao marĩ ta “iheo” mategũteithio nĩ atumia ao. (Ef. 4:8) Athuri a kĩũngano nĩ mamenyaga atĩ aarĩ a Ithe witũ nĩ “mbũtũ nene” ya erutĩri marĩ kĩyo, na atĩ kaingĩ nĩ makoragwo na moimĩrĩro mega wĩra-inĩ wa kũhunjia. Makĩria ma ũguo, athuri a kĩũngano nĩ mamenyaga atĩ aarĩ a Ithe witũ arĩa agimaru kĩĩroho nĩ mahotaga mũno gũteithia aarĩ a Ithe witũ ethĩ kũhiũrania na moritũ. (Tit. 2:3-5) Hatarĩ nganja, aarĩ a Ithe witũ nĩ marabatara kuonio wendo na gũcokerio ngatho. w20.09 23 ¶13-14

Jehova ndangĩriganĩrũo nĩ andũ manamũtungatĩra arĩa matigĩte kũnyitanĩra na andũ ake kwa ihinda, na ndangĩriganĩrũo nĩ ũtungata ũrĩa manamũrutĩra. (Ahib. 6:10) Mũnabii Isaia nĩ aandĩkire ngerekano njega mũno yonanagia ũrĩa Jehova arũmbũyagia andũ ake. Aandĩkire ũũ: “O ta mũrĩithi, nĩ akaarũmbũiya rũũru rwake. Natuo tũgondu atũcokanĩrĩrie na guoko gwake, na atũkuue gĩthũri-inĩ gĩake.” (Isa. 40:11) Mũrĩithi Ũrĩa Mũnene aiguaga atĩa rĩrĩa ngʼondu ĩmwe yake yehera rũũru-inĩ? Jesu nĩ oonanirie ũrĩa Jehova aiguaga rĩrĩa ooririe arutwo ake ũũ: “Hihi mũgwĩciria atĩa? Mũndũ angĩkorũo na ngʼondu 100, na ĩmwe yacio yũre-rĩ, githĩ ndangĩtiga icio 99 irĩma-inĩ na athiĩ agacarie ĩyo ĩmwe yũrĩte? Na angĩmĩona, ngũmwĩra na ma atĩrĩ, angĩkena nĩ ũndũ wayo gũkĩra icio 99 itekũũrĩte.”—Mat. 18:12, 13. w20.06 19-20 ¶8-9

Tuonaga ũrĩ mweke wa mwanya gũtungatĩra Jehova na njĩra o yothe tũngĩhota kũmũtungatĩra nayo. (Thab. 27:4; 84:10) Angĩkorũo mũrũ wa Ithe witũ nĩ ehaarĩirie gũtungata makĩria ithondeka-inĩ rĩa Jehova, ũcio nĩ ũndũ mwega. O na kũrĩ ũguo, rĩrĩa amũkĩra mweke wa ũtungata, ndagĩrĩirũo gwĩciria ũhoro wake mwene gũkĩra ũrĩa kwagĩrĩire. (Luk. 17:7-10) Muoroto wake wagĩrĩirũo gũkorũo arĩ gũtungata andũ arĩa angĩ arĩ na wĩnyihia. (2 Kor. 12:15) Bibilia nĩ ĩkoragwo na ngerekano cia gũtũhe mũkaana cia andũ meeciragia mũno ũhoro wao ene. Nĩ ũndũ wa kwaga wĩnyihia, Diotrefe nĩ eendaga ‘gũkorũo arĩ wa mbere’ thĩinĩ wa kĩũngano. (3 Joh. 9) Nĩ ũndũ wa mwĩtĩo, Uzia nĩ aarutire wĩra ũrĩa Jehova ataamwĩtĩkĩrĩtie kũruta. (2 Maũ. 26:16-21) Arĩ na wara, Abisalomu nĩ aagucĩrĩirie andũ nĩguo mamũnyite mbaru tondũ nĩ eendaga gũtuĩka mũthamaki. (2 Sam. 15:2-6) O ta ũrĩa maandĩko macio monania, Jehova ndakenagio nĩ andũ arĩa mecaragĩria riri wao ene. (Thim. 25:27) Marigĩrĩrio-inĩ, mwĩtĩo na mwĩtũũgĩrio irehagĩra mũndũ o mathĩna.—Thim. 16:18. w20.07 4 ¶7-8

Aarĩ na ariũ a Ithe witũ amwe nĩ mathamĩte hamwe na famĩlĩ ciao magathiĩ mabũrũri-inĩ mangĩ nĩ ũndũ wa mathĩna matiganĩte kana gwetha mawĩra. Hĩndĩ ta ĩyo, ciana ciao ibataraga gũthiĩ cukuru iria ithomithagio na rũthiomi rũrĩa rwaragio mũno bũrũri-inĩ ũcio. O na aciari nĩ mabataraga kwĩruta rũthiomi rwa bũrũri ũcio nĩguo mone wĩra. Ĩ angĩkorũo kũu mathamĩra kũrĩ na kĩũngano kĩhũthagĩra rũthiomi rũrĩa marahũthagĩra kwao? Hihi magĩrĩirũo gũthiĩ kĩũngano kĩrĩkũ? Hihi magĩrĩirũo gũthiĩ kĩũngano kĩrĩa kĩhũthagĩra rũthiomi rwa bũrũri ũcio, kana kĩũngano kĩrĩa kĩhũthagĩra rũthiomi rũrĩa marahũthagĩra kwao? Kĩongo kĩa famĩlĩ nĩwe wagĩrĩirũo gũtua kĩũngano kĩrĩa famĩlĩ yake ĩrĩthiaga. Tondũ rĩu nĩ itua rĩake, nĩ agĩrĩirũo gwĩciria ũndũ ũrĩa ũngĩagĩrĩra famĩlĩ yake makĩria. Nĩ twagĩrĩirũo gũtĩa itua rĩrĩa kĩongo kĩa famĩlĩ angĩtua. Nĩ twagĩrĩirũo gũtĩa itua rĩake, na kũnyita famĩlĩ ĩyo ũgeni kĩũngano-inĩ.—Rom. 15:7. w20.08 30 ¶17-18

Nĩguo tũheo hinya nĩ Jehova, nĩ twagĩrĩirũo gwĩthema gwĩciria atĩ hinya witũ, gĩthomo, mũrerere witũ, kana indo iria tũrĩ nacio nĩcio itũmaga tũkorũo tũrĩ a bata. Indo icio ticio itũmaga tũkorũo tũrĩ a bata maitho-inĩ ma Jehova. Ũrĩa kũrĩ nĩ atĩ, ti andũ aingĩ gatagatĩ-inĩ ka andũ a Ngai “ogĩ kũringana na ithimi cia andũ, ti aingĩ marĩ na ũhoti, o na ti aingĩ moimĩte famĩlĩ-inĩ irĩ igweta.” (1 Kor. 1:26) Kwoguo ndũkareke gũkorũo ũtarĩ na maũndũ macio gũtũme wage gũtungatĩra Jehova. Handũ ha ũguo, onaga ũndũ ũcio ũrĩ mweke wa gũgũteithia kuona hinya wa Jehova ũkĩruta wĩra ũtũũro-inĩ waku. Kwa ngerekano, angĩkorũo nĩ ũretigĩra kwaria na andũ arĩa marokĩrĩra maũndũ marĩa wĩtĩkĩtie, hoyaga Jehova akũhe ũmĩrĩru wa gũtetera wĩtĩkio waku. (Ef. 6:19, 20) Angĩkorũo nĩ harĩ thĩna mũnene wa mwĩrĩ ũrahiũrania naguo, hoyaga Jehova akũhe hinya ũrĩa ũrabatara nĩguo wĩke ũrĩa wothe ũngĩhota ũtungata-inĩ wake. Rĩrĩa rĩothe wona Jehova agĩgũteithia, wĩtĩkio waku nĩ ũrĩongererekaga, na ũgakorũo na hinya makĩria. w20.07 16 ¶9

Angĩkorũo nĩ tũrenda kũiga Ũthamaki wa Ngai mbere ũtũũro-inĩ witũ, no mũhaka twĩgerekanie na Iburahimu, ũrĩa wehaarĩirie kwĩima nĩguo akenie Ngai. (Mar. 10:28-30; Ahib. 11:8-10) Ndũkerĩgĩrĩre atĩ ũtũũro waku ũgũkorũo ũtarĩ na mathĩna. O na arĩa makoragwo merutĩire gũtungatĩra Jehova ũtũũro-inĩ wao wothe no macemanagia na mathĩna. (Jak. 1:2; 1 Pet. 5:9) Ũmũthĩ tũrĩ na itũmi nyingĩ gũkĩra hĩndĩ ĩngĩ o yothe cia kũiga meciria maitũ harĩ mahinda marĩa maroka. Maũndũ marĩa marekĩka thĩinĩ wa thĩ nĩ maronania wega atĩ tũratũũra mahinda ma mũthia ma thikũ cia mũico cia mũtabarĩre ũyũ wa maũndũ. Ũndũ ũmwe tũgaakenera rungu rwa Ũthamaki wa Ngai nĩ kuona endwa aitũ arĩa makuĩte makĩriũkio. Hĩndĩ ĩyo, Jehova nĩ akaahe Iburahimu ngerenwa nĩ ũndũ wa wĩtĩkio na wetereri wake na njĩra ya kũmũriũkia we hamwe na famĩlĩ yake matũũre thĩinĩ wa thĩ. Hihi nĩ ũgaakorũo kuo ũmanyite ũgeni? No ũkorũo kuo ũngĩĩgerekania na Iburahimu na njĩra ya gũkorũo wĩhaarĩirie kwĩima nĩ ũndũ wa Ũthamaki wa Ngai, gũtũũria wĩtĩkio waku o na ũgĩcemanagia na mathĩna, na gũikara wetereire Jehova ũtegũthethũka.—Mik. 7:7. w20.08 5-6 ¶13-14; 7 ¶17

Nĩ tũĩ atĩ o na thũ citũ ingĩtũũraga, Jehova nĩ agaatũriũkia. Tũrĩ na ma atĩ gũtirĩ ũndũ o na ũmwe mangĩka ũngĩtũtigithũkania na Jehova. (Rom. 8:35-39) Jehova nĩ onanĩtie atĩ nĩ arĩ ũũgĩ mũingĩ mũno na njĩra ya gũtũhe kĩĩrĩgĩrĩro gĩa kũriũka. Nĩ ũndũ wa kĩĩrĩgĩrĩro kĩu, tũtiĩtigagĩra rĩrĩa arĩa marĩ rungu rwa Shaitani moiga nĩ megũtũũraga. Ningĩ nĩ gĩtũmaga tũgĩe na ũmĩrĩru mũnene wa gũthiĩ na mbere gũtungatĩra Jehova. Thũ cia Jehova ingiuga atĩ nĩ igũkũũraga-rĩ, hihi no ũkorũo na ma atĩ nĩ agaakũriũkia? Ũngĩmenya atĩa atĩ nĩ wĩhokete Jehova? Ũndũ ũmwe tũngĩka ũguo nĩ kwĩyũria, ‘Hihi matua marĩa ndĩratua o mũthenya nĩ monanagia atĩ nĩ ndĩhokaga Jehova?’ (Luk. 16:10) Kĩũria kĩngĩ tũngĩĩyũria nĩ, ‘Hihi mũtũũrĩre wakwa nĩ wonanagia atĩ nĩ ndĩhokete kĩĩranĩro kĩa Jehova gĩa kũrũmbũiya mabataro makwa rĩrĩa ndaiga Ũthamaki mbere?’ (Mat. 6:31-33) Angĩkorũo macokio maku nĩ ĩĩ, nĩ wĩhaarĩirie nĩ ũndũ wa igerio o rĩothe ũngĩcemania narĩo.—Thim. 3:5, 6. w20.08 17-18 ¶15-16

Nĩ twagĩrĩirũo kwĩmenyeria kũhũthĩra Kiugo kĩa Ngai wega. Ũndũ ũmwe ũngĩtũteithia gwĩka ũguo nĩ mĩcemanio itũ. No nĩguo tũhote gũteithia andũ arĩa angĩ makorũo na ma atĩ ũhoro ũrĩa ũrĩ Bibilia-inĩ nĩ wa bata, no mũhaka tũkorũo na mũtaratara mwega wa kwĩruta Bibilia tũtegũtĩrĩria. Nĩ tũrabatara kũhũthĩra Kiugo kĩa Ngai gwĩkĩra hinya wĩtĩkio witũ. Nĩguo tũhote gwĩka ũguo, gũthoma Bibilia gwiki ti kũiganu. Tũrabatara gwĩcũrania maũndũ marĩa twathoma na twĩke ũthuthuria mabuku-inĩ maitũ nĩguo tũhote gũtaũkĩrũo wega na kũhũthĩra maũndũ marĩa tweruta. (1 Tim. 4:13-15) Tũngĩka ũguo, no tũhote kũhũthĩra Kiugo kĩa Ngai kũruta andũ arĩa angĩ. Tũtiagĩrĩirũo gũthomera andũ o mĩhari ya Bibilia. Nĩ twagĩrĩirũo kũmateithia nĩguo mataũkĩrũo nĩ ũrĩa mĩhari ĩyo yugĩte na ũrĩa mangĩmĩhũthĩra ũtũũro-inĩ. Tũngĩkorũo na mũtaratara mwega wa kwĩruta Bibilia, no tũhote kwagagĩria ũhoti witũ wa kũhũthĩra Kiugo kĩa Ngai kĩrĩa gĩtongoretio nĩ roho kũruta andũ arĩa angĩ.—2 Tim. 3:16, 17. w20.09 28 ¶12

No tũhote kũiga wĩra wa kũhunjia mbere tũngĩciria maũndũ marĩa Jehova areka nĩguo atũteithie. Kwa ngerekano nĩ atũheaga irio nyingĩ cia kĩĩroho iria tũthomaga kũgerera mabuku macabe kana indo-inĩ ta thimũ, indo cia gũthikĩrĩria na video, na indo ingĩ thĩinĩ wa Intaneti. Ta wĩcirie ũndũ ũyũ: Website itũ yonekaga na thiomi makĩria ma 1,000. (Mat. 24:45-47) Ũndũ ũngĩ ũngĩtũteithia kũiga mbere wĩra wa kũhunjia nĩ kũrũmĩrĩra kĩonereria kĩa Jesu. Ndaarekire ũndũ o na ũmwe ũmũhĩngĩce atige kũhunjia ũhoro mwega. (Joh. 18:37) Ndaahenekire rĩrĩa Shaitani aamwĩrĩire atĩ nĩ ekũmũhe “mothamaki mothe ma thĩ na riri wamo,” na rĩrĩa andũ meendaga kũmũtua mũthamaki. (Mat. 4:8, 9; Joh. 6:15) Ndeetĩkĩrire kũgucĩrĩrio nĩ indo cia kĩĩmwĩrĩ, kana agĩtigĩra nĩ ũndũ wa gũcemania na ũkararia mũnene. (Luk. 9:58; Joh. 8:59) Rĩrĩa twacemania na maũndũ mangĩgeria wĩtĩkio witũ no tũhote kũiga mbere wĩra wa kũhunjia tũngĩririkanaga ũtaaro wa mũtũmwo Paulo ũrĩa ũrĩ thĩinĩ wa rĩandĩko rĩa ũmũthĩ. w20.09 9-10 ¶6-7

Nĩ tũkenaga mũno gũkorũo na aarĩ a Ithe witũ aingĩ marĩ kĩyo thĩinĩ wa kĩũngano. Nĩ manyitanagĩra mĩcemanio-inĩ na ũtungata-inĩ. Amwe nĩ manyitanagĩra harĩ kũramata Nyũmba ya Ũthamaki, na makarũmbũiya Akristiano arĩa angĩ. No ũrĩa kũrĩ nĩ atĩ nĩ macemanagia na moritũ. Amwe nĩ marũmbũyagia aciari ao akũrũ. Angĩ nĩ makararagio nĩ andũ a famĩlĩ ciao. Angĩ nao mareraga ciana marĩ mũciari ũmwe, na nĩ merutanagĩria mũno gwethera ciana ciao mabataro. Twagĩrĩirũo gũteithĩrĩria aarĩ a Ithe witũ nĩkĩ? Tondũ kaingĩ andũ a thĩ matiheaga atumia gĩtĩo kĩrĩa magĩrĩire kũheo. Makĩria ma ũguo, Bibilia nĩ ĩtwĩkagĩra ngoro tũmateithĩrĩrie. Kwa ngerekano, mũtũmwo Paulo eerire kĩũngano kĩa Roma kĩnyite ũgeni Fibi na kĩmũhe “ũteithio o wothe angĩbatara.” (Rom. 16:1, 2) Paulo aakũrĩire thĩinĩ wa ũndũire wa andũ arĩa mataaheete atumia gĩtĩo. No atuĩka Mũkristiano, nĩ eegerekanagia na Jesu harĩ kuonia atumia gĩtĩo na ũtugi. w20.09 20 ¶1-2

Nĩguo tũteithie arutwo a Bibilia makũrie wendi wa kũhunjia ũhoro ũrĩa mwega, no tũmorie ciũria ta ici: “Gwĩtĩkĩra ũhoro mwega gũgũteithĩtie atĩa kwagĩria ũtũũro waku? Nĩ ũkuona ta arĩa angĩ marabatara kũmenya ũhoro ũyũ? Ũngĩka atĩa nĩguo ũmateithie?” (Thim. 3:27; Mat. 9:37, 38) Ririkanaga atĩ Jesu aatwathire atĩ tũrutage andũ arĩa angĩ “kũrũmia maũndũ marĩa mothe” atwathĩte. Na hatarĩ nganja, maũndũ macio nĩ hamwe na maathani marĩa merĩ manene, nĩmo kwenda Ngai na kwenda andũ, na merĩ nĩ mahutanĩtie na wĩra wa kũhunjia na gũtua andũ arutwo. (Mat. 22:37-39) Ũrĩa kũrĩ nĩ atĩ, ũndũ ũrĩa mũnene ũtũmaga tũrute wĩra wa kũhunjia nĩ wendo. No arutwo amwe a Bibilia no maigue magĩtigĩra kũhunjia. Ĩndĩ no tũteithie arutwo ta acio gũkorũo na ma atĩ marĩ na ũteithio wa Jehova nĩ mekũhota gũthiĩ maniinĩte guoya kahora kahora.—Thab. 18:1-3; Thim. 29:25. w20.11 3 ¶6-8

Ũkĩĩhaarĩria gũthiĩ gũthoma na mũrutwo, hoya Jehova igũrũ rĩgiĩ mũrutwo waku na mabataro make. Ĩra Jehova agũteithie kũrutana Bibilia na njĩra ĩgũkinyĩra mũrutwo ũcio ngoro. Ririkanaga atĩ muoroto waku nĩ kũmũteithia akinyĩrĩre kũbatithio. Ningĩ mũrutwo nĩ arabatara kwaranagĩria na Jehova. Na njĩra ĩrĩkũ? Na njĩra ya gũthikĩrĩria Jehova na kũmwarĩria. No athikĩrĩrie Ngai na njĩra ya gũthomaga Bibilia o mũthenya. (Josh. 1:8; Thab. 1:1-3) No aragie na Jehova na njĩra ya kũhoyaga o mũthenya. Kwoguo hoyaga mahoya ma kuuma ngoro mbere na thutha wa kwĩruta na mũrutwo, na ũkamũgweta mahoya-inĩ macio. O ũrĩa egũthiĩ na mbere kũigua mahoya maku, noguo ekwĩruta ũrĩa angĩhoya kuuma ngoro, akahoya Jehova Ngai kũgerera harĩ rĩĩtwa rĩa Jesu Kristo. (Mat. 6:9; Joh. 15:16) Na githĩ gũthoma Bibilia o mũthenya (gũthikĩrĩria Jehova) na kũhoya (kwaria na Jehova) to gũteithie mũrutwo waku gũkuhĩrĩria Ngai makĩria!—Jak. 4:8. w20.10 8 ¶8; 9 ¶10-11

Ithondeka rĩa Jehova matukũ-inĩ maya nĩ rĩĩrutanagĩria mũno kũiga kĩũngano kĩa Jehova kĩrĩ na mũbango na thayũ, o ta ũrĩa kĩũngano gĩa karine ya mbere gĩekaga. (Atũm. 16:4, 5) Kwa ngerekano, ũngĩceera kĩũngano kĩngĩ kana bũrũri ũngĩ hĩndĩ ya Wĩruti wa Mũrangĩri, nĩ ũgũkorũo ũkĩmenya ũrĩa wĩruti ũcio wĩkagwo na gĩcunjĩ kĩrĩa kĩrathomwo. Ũngĩona o ta ũrĩ kĩũngano-inĩ kĩanyu! Roho wa Jehova noguo tu ũngĩtũma ũrũmwe ta ũcio woneke. (Zef. 3:9) Wee ũngĩteithĩrĩria atĩa? Wĩyũrie ũũ: ‘Hihi nĩ ndeithagia kĩũngano gĩkorũo na thayũ na ũrũmwe? Hihi nĩ njathĩkagĩra arĩa maratongoria? Hihi andũ arĩa angĩ nĩ makoragwo na ma atĩ no manjĩhoke, makĩria angĩkorũo nĩ ndĩĩhokeirũo maũndũ kĩũngano-inĩ? Hihi nĩ hingagia maũndũ ihinda rĩrĩa rĩagĩrĩire, ngateithia andũ arĩa angĩ, na ngakorũo ndĩhaarĩirie kũmatungatĩra?’ (Jak. 3:17) Angĩkorũo nĩ ũrona handũ ũngĩagagĩria harĩ maũndũ macio, hoya Jehova akũhe roho mũtheru. O ũrĩa ũkũreka roho ũcio ũgũtongorie na ũtongorie ciĩko ciaku, noguo aarĩ na ariũ a Ithe witũ megũkwenda na makenere itemi rĩrĩa ũhingagia. w20.10 23 ¶12-13

No tũhũthĩre Kiugo kĩa Ngai gĩtariĩ ta gĩcicio. (Jak. 1:23-25) Aingĩ aitũ nĩ twĩroraga gĩcicio-inĩ rũcinĩ tũtanoima mũciĩ. Ũndũ ũcio nĩ ũtũteithagia kuona kana nĩ harĩ ũndũ tũrabatara kũgarũrĩra, andũ arĩa angĩ matanatuona. Ũndũ ũmwe na ũcio, tũngĩthomaga Bibilia o mũthenya nĩ ĩrĩtũteithagia kũrũnga mwĩcirĩrie na mwerekera witũ. Andũ aingĩ nĩ monaga arĩ ũndũ mwega gũthoma rĩandĩko rĩa o mũthenya o rũcinĩ matanoima mũciĩ. Nĩ marekaga ũhoro ũrĩa mathoma ũhutie mwĩcirĩrie wao. Ningĩ magĩthiĩ na mbere na mĩhangʼo yao, nĩ mageragia kũhũthĩra maũndũ marĩa merutĩte Kiugo-inĩ kĩa Ngai. Makĩria ma ũguo, nĩ twagĩrĩirũo gũkorũo na mũtaratara mwega wa gũthoma na gwĩcũrania Kiugo kĩa Ngai o mũthenya. O na gũtuĩka mũndũ no one gwĩka ũguo ta arĩ ũndũ mũnini, nĩ ũndũ ũmwe wa bata mũno ũngĩtũteithia gũthiĩ na mbere njĩra-inĩ ĩno ngunderu ya muoyo. Kwoguo Kiugo kĩa Ngai no kĩringithanio na macini ĩrĩa ĩhũũraga mũndũ mbica nĩguo amenyeke ũrĩa mwĩrĩ wake ũtariĩ na thĩinĩ. No nĩguo tũgunĩke kuumana na ũtaaro ũrĩa tũngĩamũkĩra kuuma Bibilia-inĩ kana kuuma kũrĩ andũ arĩa mamũrĩtwo nĩ Jehova no mũhaka tũkorũo tũrĩ enyihia. w20.11 18 ¶3; 20 ¶8

O na gũtuĩka Akristiano a karine ya mbere kaingĩ nĩ maanyariragwo, kũrĩ mahinda maakoragwo na thayũ. Hihi arutwo acio maahũthĩrire atĩa mahinda macio kwarĩ na thayũ? Akristiano acio ehokeku maathiire na mbere kũhunjia ũhoro ũrĩa mwega mategũtiga. Ũhoro ũrĩa ũrĩ thĩinĩ wa ibuku rĩa Atũmwo uugĩte atĩ nĩ ‘meetigĩrĩte Jehova.’ Maathiire na mbere kũhunjia ũhoro ũrĩa mwega, na nĩ ũndũ ũcio ‘magĩthiĩ na mbere kuongerereka.’ Hatarĩ nganja Jehova nĩ aarathimire kĩyo kĩao gĩa kũhunjia mahinda-inĩ macio kwarĩ na thayũ. (Atũm. 9:26-31) Arutwo a karine ya mbere nĩ maahũthagĩra mweke o wothe ũrĩa mona kũhunjia ũhoro ũrĩa mwega. Kwa ngerekano, rĩrĩa mũtũmwo Paulo aamenyire atĩ nĩ aahingũrĩirũo mũrango mũnene wa ũtungata rĩrĩa aarĩ Efeso, nĩ aahũthĩrire mweke o wothe ũrĩa aarĩ naguo kũhunjia na gũtua andũ arutwo itũũra-inĩ rĩu. (1 Kor. 16:8, 9) Arutwo nĩ meekĩrire kĩyo kĩnene harĩ kũhunjia “ũhoro ũrĩa mwega wa kiugo kĩa Jehova.” (Atũm. 15:30-35) Moimĩrĩro maarĩ marĩkũ? Ciugo cia rĩandĩko rĩa ũmũthĩ nĩ ironania. w20.09 16 ¶6-8

Rĩrĩa Adamu eehirie eereheire gĩkuũ o hamwe na njiarũa ciake. Andũ no mathiaga na mbere kũnyamarĩka nĩ ũndũ wa ũremi wake. No tondũ Ngai nĩ aariũkirie Mũrũ wake, ũndũ ũcio nĩ ũtũmaga tũkorũo na kĩĩrĩgĩrĩro kĩega kĩa mahinda marĩa maroka. Mũtũmwo Paulo aandĩkire ũũ: “Kũriũkio kwa arĩa akuũ o nakuo gũũkaga kũgerera harĩ mũndũ [nĩwe Jesu]. Nĩ gũkorũo o ta ũrĩa othe makuaga nĩ ũndũ wa Adamu, noguo othe magaacokio muoyo nĩ ũndũ wa Kristo.” (1 Kor. 15:22) Hihi Paulo eendaga kuuga atĩa rĩrĩa ooigire “othe makuaga nĩ ũndũ wa Adamu”? Paulo aaragia ũhoro wĩgiĩ andũ othe arĩa moimanĩte na Adamu arĩa maagaire mehia na kwaga gũkinyanĩra na kwoguo matingĩĩthema gĩkuũ. (Rom. 5:12) Adamu ti ũmwe wa andũ arĩa “magaacokio muoyo.” Adamu ndakaagunĩka kuumana na ũkũũri ũrĩa warutirũo nĩ Kristo tondũ aarĩ mũkinyanĩru, na aaremeire Ngai akĩendaga. O na andũ arĩa “Mũrũ wa mũndũ” agatuĩra atĩ nĩ a mũhaano wa “mbũri” nĩ “makeeherio tene na tene” o ta Adamu.—Mat. 25:31-33, 46; Ahib. 5:9. w20.12 5 ¶13-14

Tũngĩaga kũheo mweke mũna wa ũtungata, kĩonereria kĩa araika arĩa ehokeku no gĩtũteithie. Hĩndĩ ya wathani wa Mũthamaki Ahabu, Jehova nĩ eerire araika ake marute mawoni megiĩ ũrĩa mũthamaki ũcio mwaganu angĩahenereirio. Araika amwe nĩ maaheanire mawoni mao. No Ngai aarũmĩrĩire mawoni ma mũraika ũmwe na akiuga atĩ nĩ mangĩagacĩrire. (1 Ath. 22:19-22) Hihi araika acio angĩ nĩ maakuire ngoro magĩĩciria atĩ kaba matangĩrutire mawoni mao? Matiekire ũguo. Araika nĩ enyihia na mendaga rũgooco ruothe rũcokerere Jehova. (Atiir. 13:16-18; Kũg. 19:10) Ririkanaga gĩtĩo kĩnene kĩrĩa tuonetio gĩa gwĩtanio na rĩĩtwa rĩa Ngai na kũhunjia Ũthamaki wake. Mĩeke ya ũtungata tiyo ĩtũmaga tũkorũo tũrĩ a bata maitho-inĩ ma Ngai. No rĩrĩa twakorũo na wĩnyihia nĩ tũkoragwo tũrĩ a bata harĩ Jehova na harĩ ariũ a Ithe witũ. Kwoguo hoya Jehova agũteithie gũikara ũrĩ mwĩnyihia. Wĩcũranie ũhoro wa andũ aingĩ arĩa magwetetwo Bibilia-inĩ arĩa maigĩte kĩonereria kĩega gĩa gũkorũo marĩ enyihia. Wĩrutagĩre ũrĩa wothe ũngĩhota gũtungatĩra aarĩ na ariũ a Ithe witũ.—1 Pet. 5:5. w20.12 26 ¶16-17

Ngũbia ya ũhonokio nĩ kĩĩrĩgĩrĩro kĩrĩa Jehova atũheete gĩa gũtũhonokia kuuma harĩ gĩkuũ na gĩa kũhe ngerenwa arĩa othe mekaga wendi wake. (1 Thes. 5:8; 1 Tim. 4:10; Tit. 1:1, 2) Kĩĩrĩgĩrĩro kĩa ũhonokio kĩgitagĩra ũhoti witũ wa gwĩciria. Nĩ gĩtũmaga tũige meciria maitũ harĩ ciĩranĩro cia Ngai, na gĩgatũteithia kwaga gũtoorio nĩ mathĩna. Twĩhumbaga ngũbia ĩyo na njĩra ya gũkorũo na mwĩcirĩrie ta wa Jehova. Kwa ngerekano, tũtigaga mwĩhoko witũ harĩ ũtonga ũrĩa ũtamenyagĩrũo, no twĩhokaga Ngai. (Thab. 26:2; 104:34; 1 Tim. 6:17) Rũhiũ rwa njora rwa roho nĩ Kiugo kĩa Ngai, Bibilia. Rũhiũ rũu nĩ rũkoragwo na ũhoti wa kũguũria maheeni, na kũruta andũ ũkombo-inĩ wa morutani ma maheeni na mĩtugo ĩtagĩrĩire. (2 Kor. 10:4, 5; 2 Tim. 3:16, 17; Ahib. 4:12) Nĩ twĩrutaga ũrĩa tũngĩhũthĩra rũhiũ rũu na njĩra ĩrĩa yagĩrĩire kũgerera wĩruti witũ kĩũmbe na kũgerera gĩthomo kĩrĩa twamũkagĩra ithondeka-inĩ rĩa Jehova.—2 Tim. 2:15. w21.03 27 ¶4; 29 ¶10-11

O na rĩrĩa mũtũmwo Johana oohetwo njera nĩ ũndũ wa kũhunjia ũhoro wĩgiĩ Jesu, nĩ oonanirie atĩ nĩ eendete andũ. Kwa ngerekano, nĩ aandĩkire ibuku rĩa Kũguũrĩrio na agĩtũmĩra ciũngano nĩguo imenye maũndũ marĩa “arĩ o mũhaka mekĩke ica ikuhĩ.” (Kũg. 1:1) Thutha ũcio, hihi thutha wa kũrekererio kuuma Patimosi, Johana nĩ aandĩkire Injiri ĩgiĩ ũtũũro na ũtungata wa Jesu. Ningĩ nĩ aandĩkire marũa matatũ ma gwĩkĩra ngoro aarĩ na ariũ a Ithe witũ. No wĩgerekanie na mwerekera ũcio wa Johana wa kwĩima nĩ ũndũ wa andũ arĩa angĩ na wonanie nĩ ũmendete, na ũrĩa ũgũthuura kũhũthĩra ũtũũro waku. Thĩ ĩno ya Shaitani yendaga ũhũthĩre mahinda na hinya waku wothe gwĩka maũndũ ma kwĩguna, wĩcarĩrie mbeca, kana ũgĩe na igweta. No handũ ha ũguo, ahunjia a Ũthamaki kũndũ guothe thĩinĩ wa thĩ nĩ meimaga na makahũthĩra mahinda mao maingĩ kũhunjia ũhoro ũrĩa mwega na gũteithia andũ gũkuhĩrĩria Jehova. w21.01 10 ¶9-10

Jonathani nĩ angĩaiguĩrĩire Daudi ũiru. Tondũ Jonathani aarĩ mũriũ wa Mũthamaki Saulu, nĩ angĩendire kuonania atĩ nĩwe ũrĩ na kĩhooto gĩa kũgaya ũthamaki. (1 Sam. 20:31) No Jonathani aarĩ mwĩnyihia, na aarĩ mwĩhokeku harĩ Jehova. Kwoguo nĩ aanyitire mbaru biũ itua rĩa Jehova rĩa Daudi gũtuĩka mũthamaki. Ningĩ aarĩ mwĩhokeku harĩ Daudi o na gũtuĩka ũndũ ũcio nĩ watũmaga Saulu arakare mũno. (1 Sam. 20:32-34) Tondũ Jonathani aarĩ na wendo muororo kwerekera Daudi, ndaamũiguagĩra ũiru. Jonathani aarĩ njamba ya ita ĩrĩ na ũcamba, na aarĩ na ũmenyeru mũnene harĩ kũhũthĩra ũta na mĩguĩ. Andũ mooigaga atĩ marĩ na ithe Saulu maarĩ na “mĩtũkĩ gũkĩra nderi,” na maarĩ na “hinya gũkĩra mĩrũthi.” (2 Sam. 1:22, 23) Kwoguo Jonathani nĩ angĩehũũrire gĩthũri nĩ ũndũ wa maũndũ ma ũcamba marĩa eekĩte. No Jonathani ndeendaga gũcindana na Daudi kana kũmũiguĩra ũiru nĩ ũndũ wa maũndũ marĩa aahingĩtie. Handũ ha ũguo, Jonathani nĩ kwenda eendire Daudi nĩ ũndũ wa ũcamba wake na kwĩhoka Jehova. Kwa ngerekano, rĩrĩa Daudi ooragire Goliathu, Jonathani aambĩrĩirie kũmwenda o ta ũrĩa eeyendete. w21.01 21 ¶6; 22 ¶8-9

Akristiano othe makoragwo rungu rwa ũtongoria mũkinyanĩru wa Jesu Kristo. O na kũrĩ ũguo, rĩrĩa mũtumia Mũkristiano ahika, aingĩraga rungu rwa ũtongoria wa mũthuri ũtarĩ mũkinyanĩru. Ũndũ ũcio no ũrehe moritũ. Kwoguo rĩrĩa areciria kũhikio nĩ mũrũ wa Ithe witũ mũna, agĩrĩirũo kwĩyũria ũũ: ‘Hihi mũrũ wa Ithe witũ ũcio nĩ aronania atĩ no atuĩke mũtwe mwega wa famĩlĩ? Hihi nĩ aigaga maũndũ ma kĩĩroho mbere ũtũũro-inĩ wake? Angĩkorũo ũguo tiguo kũrĩ-rĩ, nĩ kĩĩ kĩratũma ndĩcirie atĩ twahikania nĩ ekũndongoria wega maũndũ-inĩ ma kĩĩroho?’ Mwarĩ wa Ithe witũ ningĩ nĩ agĩrĩirũo kwĩyũria ũũ: ‘Niĩ-rĩ, nĩ ngumo irĩkũ njega ndĩ nacio ingĩteithia kĩhiko gitũ? Hihi nĩ ngoragwo na ngumo ya wetereri na ũtaana? Hihi ndĩ na ũrata mũrũmu hamwe na Jehova?’ (Koh. 4:9, 12) Mwarĩ wa Ithe witũ angĩtua matua mega atanahika, ũndũ ũcio no ũmũteithie gũkorũo na kĩhiko kĩgaacĩru na kĩrĩ na gĩkeno. Aarĩ a Ithe witũ aingĩ nĩ maigĩte kĩonereria kĩega gĩa kwĩnyihĩria athuri ao. Nĩ marabatara gũcokerio ngatho! w21.02 8 ¶1-2

Mĩaka-inĩ ya ica ikuhĩ, ahunjia aingĩ nĩ merutĩte rũthiomi rwerũ nĩgetha mandandũre ũtungata wao na magathamĩra ciũngano iria irĩ na bata mũnene wa ahunjia. Aarĩ na ariũ a Ithe witũ ta acio matuaga itua rĩu nĩguo mahote gũtungatĩra Jehova makĩria. O na gũtuĩka no moe mĩaka mĩingĩ magĩkamenya rũthiomi rũu rwerũ, nĩ mahingagia maũndũ maingĩ ma bata. Ngumo ciao njega na ũmenyeru wao nĩ ciĩkĩraga kĩũngano hinya. Nĩ tũkenagio mũno nĩ aarĩ na ariũ a Ithe witũ ta acio monanagia ngumo ya kwĩima. Kĩama gĩa athuri gĩtiagĩrĩirũo kwaga kũhĩtũkia mũrũ wa Ithe witũ amũrũo arĩ mũthuri wa kĩũngano kana ndungata ya kĩũngano atĩ tondũ ndahotete kwaria wega rũthiomi rwa kĩũngano. Athuri a kĩũngano magĩrĩirũo kũrora ngumo cia Kĩĩmaandĩko iria igwetetwo cia athuri na ndungata cia kĩũngano no ti kũrora ũrĩa araria rũthiomi rũrĩa rũhũthagĩrũo nĩ kĩũngano.—1 Tim. 3:1-10, 12, 13; Tit. 1:5-9. w20.08 30 ¶15-16

Andũ no mecirie atĩ gũkorũo na ũgima mwega wa mwĩrĩ, mbeca nyingĩ, na famĩlĩ ĩrĩ na gĩkeno, nomo maũndũ marĩa mangĩrehera mũndũ gĩkeno. No gĩkeno kĩrĩa Jakubu aaragia ũhoro wakĩo, nĩ gĩcunjĩ kĩa maciaro ma roho wa Ngai na gĩtikoragwo kĩĩhocetie harĩ ũrĩa maũndũ ma mũndũ mahaana. (Gal. 5:22) Mũkristiano agĩaga na gĩkeno kĩa ma nĩ ũndũ wa kũmenya atĩ nĩ arakenia Jehova na nĩ ararũmĩrĩra kĩonereria kĩa Jesu. (Luk. 6:22, 23; Kol. 1:10, 11) Gĩkeno kĩu no kĩringithanio na rũtambĩ rũrakana thĩinĩ wa tawa wa ngirathi. Rũtambĩ rũu nĩ rũthiaga na mbere gwakana tondũ nĩ rũkoragwo rũgitĩrĩtwo kuumana na rũhuho. Na njĩra o ta ĩyo, o na ithuĩ no tũhote gũthiĩ na mbere gũkorũo na gĩkeno, gũtekũmakania maũndũ marĩa marathiĩ na mbere ũtũũro-inĩ witũ. Tũtingĩũrũo nĩ gĩkeno gitũ o na tũngĩrwara kana tũkorũo na mathĩna ma mbeca. Ningĩ no tũrĩkoragwo na gĩkeno o na rĩrĩa twanyũrũrio, kana twakarario nĩ andũ a famĩlĩ kana andũ angĩ. Handũ ha gĩkeno gitũ kũnyiha rĩrĩa andũ matwĩka maũndũ moru, nĩ kũingĩha kĩrĩingĩhaga. Magerio marĩa tũcemanagia namo nĩ ũndũ wa wĩtĩkio witũ monanagia atĩ tũrĩ arutwo a ma a Kristo. (Mat. 10:22; 24:9; Joh. 15:20) Nĩkĩo Jakubu aandĩkire ciugo cia rĩandĩko rĩa ũmũthĩ. w21.02 28 ¶6

Rĩrĩa wathoma mĩhari ya Bibilia ĩronania atĩ gũikara tũhooreire na kwĩhoka Jehova nĩ gũtũheaga hinya, geria kũiga mĩhari ĩyo meciria-inĩ maku. Nĩguo ũhote kũmĩiga meciria-inĩ, no ũmĩthome na kayũ, kana ũmĩandĩke handũ na ũgaikara ũkĩmĩthomaga kaingĩ. Jehova aathĩte Joshua athomage ibuku rĩa Watho na mĩheehũ o mũthenya nĩguo ekage maũndũ na njĩra ya ũũgĩ. Gũthoma Watho ũcio ningĩ nĩ kũngĩamũteithirie kwaga guoya, na handũ ha ũguo akorũo na ũmĩrĩru wa gũtongoria andũ a Ngai. (Josh. 1:8, 9) Mĩhari mĩingĩ thĩinĩ wa Kiugo kĩa Ngai no ĩgũteithie kũgĩa na thayũ wa meciria na ngoro rĩrĩa wacemania na maũndũ mangĩtũma wĩtigĩre kana ũtangĩke. (Thab. 27:1-3; Thim. 3:25, 26) Rĩrĩa tũrĩ mĩcemanio-inĩ, nĩ tũgunĩkaga kuumana na motaaro ma mĩario mwanya mwanya ĩrĩa ĩrutagwo, macokio marĩa andũ marutaga, na ndeereti cia gwaka iria tũgĩaga nacio na aarĩ na ariũ a Ithe witũ. (Ahib. 10:24, 25) Ningĩ nĩ tũiguaga twekĩrũo ngoro mũno rĩrĩa twaitũrũrĩra ngoro citũ mũrũ kana mwarĩ wa Ithe witũ twĩhokete thĩinĩ wa kĩũngano. w21.01 6 ¶15-16

Rĩrĩa wabatithirio, warĩ na wĩtĩkio mũnene harĩ Jehova, na nĩ wamwĩhokete biũ. Na Jehova nĩ aakenire mũno agĩkũnyita ũgeni thĩinĩ wa famĩlĩ yake. Ũndũ ũrĩa ũrabatara gwĩka nĩ gũthiĩ na mbere kwĩhoka Jehova. No ũkorũo ũrĩ ũndũ mũhũthũ kwĩhoka Jehova, hĩndĩ ĩrĩa ũrabatara gũtua matua marĩa mangĩhutia ũtũũro waku na njĩra nene, no rĩrĩ, ĩ maũndũ-inĩ mangĩ ma ũtũũro waku? Nĩ ũndũ wa bata wĩhokage Jehova hĩndĩ ĩrĩa ũratua matua, ta matua megiĩ maũndũ ma gwĩkenia, wĩra, na mĩoroto ĩrĩa ũrenda gũthingata ũtũũro-inĩ. Ndũkehokage ũũgĩ waku mwene. Handũ ha ũguo, caragia motaaro ma Bibilia marĩa mangĩgũteithia gũtua matua ta macio na ũkarũmĩrĩra ũtaaro ũrĩa wona. (Thim. 3:5, 6) Weka ũguo nĩ ũrĩkenagia Jehova na ũgatũma andũ thĩinĩ wa kĩũngano kĩanyu makũhe gĩtĩo. Ũrĩa kũrĩ nĩ atĩ, o ta mũndũ ũngĩ o wothe, rĩmwe na rĩmwe nĩ ũrĩhĩtagia tondũ ndũrĩ mũkinyanĩru. O na kũrĩ ũguo, ũndũ ũcio ndwagĩrĩirũo gũkũgirĩrĩria wĩrutanĩrie ũrĩa wothe ũngĩhota ũtungata-inĩ wa Jehova. w21.03 6 ¶14-15

Hihi nĩ ũkagĩrĩrũo nĩ andũ a famĩlĩ nĩ ũndũ wa gũtungatĩra Jehova? Ningĩ-rĩ, to gũkorũo hihi ũikaraga bũrũri wĩra witũ wĩkĩrĩirũo mĩkaana mĩritũ kana ũkahũũrũo marubuku? Angĩkorũo nĩguo, no wĩkĩrũo ngoro mũno ũngĩthoma 2 Timotheo 1:12-16 na 4:6-11, 17-22. Mũtũmwo Paulo aandĩkire mĩhari ĩyo arĩ njera. Ũtanambĩrĩria gũthoma mĩhari ĩyo, aria na Jehova ũmwĩre thĩna waku na ũrĩa thĩna ũcio ũratũma ũigue. Mwĩre ĩmwe kwa ĩmwe ũndũ ũrĩa ũragũthĩnia. Ũcoke ũhoe Jehova agũteithie kuona morutani megiĩ maũndũ macio maritũ Paulo aageragĩra marĩa mangĩgũteithia kũhiũrania na ũndũ ũrĩa ũragerera. Jehova nĩ eerĩte Paulo atĩ nĩ angĩanyaririrũo nĩ ũndũ wa gũtuĩka Mũkristiano. (Atũm. 21:11-13) Jehova aateithirie Paulo atĩa? Nĩ aacokirie mahoya ma Paulo, na thutha ũcio akĩmwĩkĩra hinya. Paulo nĩ eerirũo na ma atĩ nĩ angĩaheirũo ngerenwa tondũ nĩ aarutĩte wĩra wa Jehova na kĩyo mũno. Jehova ningĩ nĩ aahũthĩrire arata ehokeku a Paulo kũmũhe ũteithio ũrĩa aabataraga. w21.03 17-18 ¶14-15, 19