Agosti

Andũ arĩa makoragwo na ũrata wa hakuhĩ hamwe na Jesu no o tu magunĩkaga kuumana na igongona rĩake rĩa ũkũũri. Jesu ooigire atĩ nĩ angĩarutire “muoyo wake nĩ ũndũ wa arata ake.” (Joh. 15:13) Andũ ehokeku arĩa maatũũraga mbere ya Jesu gũka gũkũ thĩ, no mũhaka makeeruta ũhoro wĩgiĩ Jesu na mamwende. Athuri na atumia acio ehokeku nĩ makaariũkio, no nĩguo maheo muoyo wa tene na tene nĩ makaabatara gũkũria ũrata hamwe na Jesu. (Joh. 17:3; Atũm. 24:15; Ahib. 11:8-12, 24-26, 31) Nĩ tũkenagĩra kũrutithania wĩra hamwe na Jesu rĩrĩa tũrahunjia na tũkarutana ũhoro ũrĩa mwega wa Ũthamaki. Rĩrĩa Jesu aarĩ gũkũ thĩ aarĩ mũrutani. na kuuma Jesu acoka igũrũ, akoretwo agĩthiĩ na mbere kũbanga wĩra wa kũhunjia na kũrutana tondũ nĩwe mũtwe wa kĩũngano. Nĩ onaga na agakenio nĩ kĩyo gĩaku gĩa gũteithia andũ aingĩ o ũrĩa wahota mamũmenye na mamenye Ithe. Tũhotaga wĩra ũcio nĩ ũndũ wa gũteithio nĩ Jehova na Jesu.—Joh. 15:4. w20.04 22 ¶7-8

Kĩambĩrĩria-inĩ, ciugo “mũthamaki wa mwena wa rũgongo” na “mũthamaki wa mwena wa mũhuro” ciahũthagĩrũo kwaria ũhoro wĩgiĩ thirikari nene iria ciarĩ mwena wa rũgongo na mwena wa mũhuro wa bũrũri wa Isiraeli. (Dan. 10:14) Rũrĩrĩ rwa Isiraeli nĩruo rwarĩ andũ a Ngai nginya Pentekoste ya mwaka wa 33 Mahinda Maitũ (M.M.). No kuuma hĩndĩ ĩyo gũthiĩ na mbere, Jehova nĩ oonanirie ĩmwe kwa ĩmwe atĩ arũmĩrĩri ehokeku a Jesu nĩo andũ ake. Nĩ ũndũ ũcio, maũndũ maingĩ marĩa marĩ thĩinĩ wa Danieli 11, megiĩ arũmĩrĩri a Kristo no ti rũrĩrĩ rwa Isiraeli. (Atũm. 2:1-4; Rom. 9:6-8; Gal. 6:15, 16) Ningĩ athamaki kana thirikari itiganĩte nĩ makoretwo makĩrũgamĩrĩra mũthamaki wa mwena wa rũgongo na mũthamaki wa mwena wa mũhuro mahinda-inĩ matiganĩte. O na kũrĩ ũguo, nĩ harĩ maũndũ mahaanaine megiĩ athamaki acio. Wa mbere, athamaki acio maathanaga gĩcigo gĩaikaragwo nĩ andũ aingĩ a Ngai, kana nĩ maatharĩkĩire andũ a Ngai. Wa kerĩ, nĩ moonanirie kũgerera ũrĩa meekire andũ a Ngai atĩ nĩ maathũire Jehova Ngai ũrĩa wa ma. Na wa gatatũ, athamaki acio erĩ nĩ maagucanagĩria ũnene. w20.05 3 ¶3-4

Jehova atũmaga maũndũ mekĩke na njĩra ya gũtuĩka kĩrĩa gĩothe kĩrabatarania, nĩgetha ahingie muoroto wake. Jehova ningĩ no atũme ndungata ciake itarĩ nginyanĩru ituĩke kĩrĩa kĩrabatarania nĩguo imũtungatĩre, na ihingie muoroto wake. (Isa. 64:8) Jehova nĩ ahũthagĩra njĩra icio kũhingia wendi wake. Gũtirĩ ũndũ ũngĩmũgiria kũhingia mĩoroto yake. (Isa. 46:10, 11) No twende Ithe witũ wa igũrũ o na makĩria, tũngĩĩcũrania maũndũ marĩa aneka na marĩa anatũhotithia kũhingia. Kwa ngerekano, rĩrĩa twecũrania igũrũ rĩgiĩ indo iria ciothe Jehova ombĩte, nĩ tũkenagio mũno nĩ maũndũ macio ahingĩtie. (Thab. 8:3, 4) Ningĩ nĩ tũiguaga twenda Jehova na tũkamũhe gĩtĩo o na makĩria rĩrĩa twecũrania ũhoro wĩgiĩ maũndũ marĩa mothe anatũhotithia gwĩka nĩguo tũhingie wendi wake. Hatarĩ nganja rĩĩtwa rĩa Jehova nĩ rĩa magegania! Rĩhutĩtie ũrĩa Ithe witũ atariĩ, maũndũ marĩa mothe aneka, na marĩa arĩka.—Thab. 89:7, 8. w20.06 9-10 ¶6-7

Oxygen, nĩ rĩera rĩrĩa nyamũ o hamwe na andũ mabataraga nĩguo mathiĩ na mbere gũkorũo marĩ muoyo. O mwaka, ciũmbe iria irĩ muoyo nĩ ihuhagia rĩera rĩingĩ mũno rĩa oxygen. Ciũmbe icio icokaga ikaruta rĩera rĩngĩ rĩtarĩ itheru rĩĩtagwo carbon dioxide. O na kũrĩ ũguo, gũtirĩ hĩndĩ ciũmbe iria irĩ muoyo ihuhagia ikaniina rĩera rĩa oxygen rĩothe, kana thĩ ĩkaiyũrũo nĩ rĩera rĩu rĩtarĩ itheru rĩa carbon dioxide. Nĩkĩ? Tondũ Jehova ombĩte mĩmera mĩingĩ, mĩnene na mĩnini, ĩrĩa ĩhuhagia rĩera rĩu rĩa carbon dioxide na ĩkaruta rĩa oxygen. Mũthiũrũrũko ũcio wa rĩera rĩa oxygen nĩ ũtũmaga twĩtĩkanie na ciugo cia rĩandĩko rĩa ũmũthĩ. Nĩ kĩĩ kĩngĩtũteithia kũgĩa na ngatho makĩria nĩ ũndũ wa thĩ ĩno itũ njega na indo ciothe iria irĩ kuo? (Thab. 115:16) Ũndũ ũmwe nĩ gwĩcũrania igũrũ rĩgiĩ indo iria Jehova ombĩte. Ũndũ ũcio nĩ ũrĩtũtindĩkaga gũcokeria Jehova ngatho o mũthenya nĩ ũndũ wa indo njega iria atũheete. Ningĩ no tuonanie nĩ tũcokagia ngatho nĩ ũndũ wa thĩ, na njĩra ya gwĩka ũrĩa wothe tũngĩhota kũiga kũrĩa tũikaraga kũrĩ gũtheru. w20.05 22 ¶5, 7

Jehova aahiũranirie na thitango ya Shaitani na njĩra ya ũũgĩ, wetereri, na kĩhooto. Ningĩ anonania hinya wake mũingĩ na njĩra nyingĩ itiganĩte. Na ũndũ wa bata nĩ atĩ wendo wake nĩ wonekaga wega maũndũ-inĩ mothe marĩa ekaga. (1 Joh. 4:8) Jehova akoretwo akĩruta wĩra na kĩyo gũtheria rĩĩtwa rĩake. Shaitani no acambagia rĩĩtwa rĩa Ngai o na ũmũthĩ. Ageragia gũtũma andũ metĩkie atĩ Ngai ndarĩ hinya, kĩhooto, ũũgĩ, na wendo. Kwa ngerekano, Shaitani ageragia gũtũma andũ metĩkie atĩ Jehova tiwe Mũũmbi. Na rĩrĩa andũ metĩkia atĩ Ngai arĩ kuo, Shaitani endaga metĩkie atĩ Ngai nĩ mũhinyanĩrĩria na ti wa kĩhooto, o hamwe na ithimi ciake. Ningĩ arutaga andũ atĩ Jehova nĩ Ngai ũtarĩ tha na nĩ acinaga andũ mwaki-inĩ wa tene na tene. Rĩrĩa andũ metĩkia maheeni ta macio, nĩ ũkoragwo ũrĩ ũndũ mũhũthũ harĩ o kũregana na wathani wa Jehova wa ũthingu. Nginya rĩrĩa Shaitani akaaniinwo, no arĩgeragia o nawe ũregane na Jehova. Hihi nĩ ũgwĩtĩkania nake? w20.06 5 ¶13-15

Thĩinĩ wa ciũngano nyingĩ nĩ kũrĩkoragwo na aarĩ na ariũ a Ithe witũ marerutanĩria kwĩruta rũthiomi rwerũ. No ũkorũo ũrĩ ũndũ mũritũ harĩ o kwĩyaria. No tũngĩaga gũtindanĩra na ũrĩa mararia rũthiomi rũu rwerũ, nĩ tũrĩonaga atĩ nĩ mendete Jehova na nĩ mendete mũno kũmũtungatĩra. Tũngĩroraga ngumo njega cia aarĩ na ariũ a Ithe witũ acio, nĩ tũrĩiguaga tũmendete mũno na tũkamahe gĩtĩo. Tũtirĩmeeraga, “Niĩ ndirakũbatara” atĩ tondũ matirahota kwaria rũthiomi rwitũ wega. (1 Kor. 12:21) Jehova nĩ atũheete ithuothe mweke wa mwanya wa gũkorũo na itemi kĩũngano-inĩ gĩake. Gũtekũmakania kana tũrĩ athuri kana atumia, tũrĩ thĩinĩ wa kĩhiko kana tũtirĩ thĩinĩ wa kĩhiko, tũrĩ akũrũ kana ethĩ, kana nĩ tũĩ kwaria rũthiomi rũna wega kana tũtiũĩ, tũrĩ a bata harĩ Jehova na gatagatĩ-inĩ gaitũ ithuĩ ene. (Rom. 12:4, 5; Kol. 3:10) Rekei hingo ciothe tũcaragie njĩra cia kuonania atĩ nĩ tũtĩĩte itemi ritũ na rĩa andũ arĩa angĩ kĩũngano-inĩ kĩa Jehova. w20.08 31 ¶20-22

Mũtũmwo Paulo ndatigire kũhunjĩria andũ a Athene o na gũtuĩka itũũra rĩao rĩaiyũire ũhoi wa mĩhianano, ngomanio itagĩrĩire, na ũrutani wa maheeni; na ndarekire mĩario yao ya kĩnyũrũri ĩmũũrage ngoro. Paulo we mwene nĩ aatuĩkĩte Mũkristiano, o na gũtuĩka tene aarĩ “mũrumi Ngai na mũnyarirani na mũndũ ũtaarĩ gĩtĩo.” (1 Tim. 1:13) O ta ũrĩa Jesu oonire Paulo no atuĩke mũrutwo wake, noguo Paulo oonaga andũ a Athene, atĩ no matuĩke arutwo a Jesu. Na ũguo nĩguo gwathiire. (Atũm. 9:13-15) Hĩndĩ ya karine ya mbere, andũ a mĩthemba yothe nĩ maatuĩkire arutwo a Jesu. Rĩrĩa Paulo aandĩkagĩra Akristiano arĩa maaikaraga Ngiriki itũũra-inĩ rĩa Korintho, ooigire atĩ andũ amwe thĩinĩ wa kĩũngano kĩu kũrĩ hĩndĩ maarĩ eki-naĩ na angĩ maatũũraga mĩtũũrĩre ya waganu. Aacokire akiuga ũũ: “Ũguo nĩguo amwe anyu mwatariĩ. No nĩ mũthambĩtio mũgathera.” (1 Kor. 6:9-11) Korũo nĩwe nĩ ũngĩonire ta andũ acio mangĩacenjirie na matuĩke arutwo a Jesu? w20.04 12 ¶15-16

Athuri a kĩũngano matiagĩrĩirũo kũhiũha gũtuĩra andũ arĩa marekĩrĩra nganja kana gũtungatĩra Jehova nĩ kũrĩ ũguni. Handũ ha kũmatuĩra matiagĩrĩire, athuri nĩ mageragia gũtaũkĩrũo nĩ kĩĩ kĩratũma andũ acio marie kana meke maũndũ na njĩra ĩyo. Athuri mangĩka ũguo norĩo tu mangĩhota kũmenya nĩ Maandĩko marĩkũ mangĩhũthĩra kũũmĩrĩria andũ acio. Mũnabii Elija nĩ oorĩire Jezebeli. (1 Ath. 19:1-3) Oonaga ta wĩra ũrĩa aarutĩte warĩ wa tũhũ na kwoguo akĩĩrirĩria gũkua. (1 Ath. 19:10) Handũ ha Jehova kuona Elija ta atagĩrĩire, nĩ aamũmĩrĩirie na akĩmwĩra ndarĩ wiki na atĩ nĩ angĩehokire hinya wa Ngai na akĩmwĩra kwarĩ o na wĩra mũingĩ angĩarutire. Jehova nĩ aamũthikĩrĩirie arĩ na wendo na akĩmũhe wĩra ũngĩ. (1 Ath. 19:11-16, 18) Tũreruta atĩa? Ithuothe na makĩria athuri a kĩũngano, twagĩrĩirũo kũrũmbũyania na ngʼondu cia Jehova na njĩra ya wendo. O na mũndũ angĩkorũo nĩ aronania marakara, kana akona ta atagĩrĩire kuonio tha cia Jehova, athuri nĩ mamũthikagĩrĩria akĩĩyaria kuuma ngoro. Thutha ũcio nĩ mageragia kũũmĩrĩria mũndũ ũcio makamuonia atĩ Jehova nĩ amwendete. w20.06 21-22 ¶13-14

Jehova nĩ endaga tũkenere kũhũthĩra mahinda hamwe na andũ aitũ a famĩlĩ na arata. (Thab. 133:1) Jesu nĩ aarĩ na arata ega. (Joh. 15:15) Bibilia nĩ yonanagia ũguni wa gũkorũo na arata a ma. (Thim. 18:24) Na ĩtwĩraga atĩ ti wega kwĩyamũrania na andũ arĩa angĩ. (Thim. 18:1) Andũ aingĩ meciragia atĩ social media nĩ ĩteithagia mũndũ gũkorũo na arata aingĩ na ĩgatũma mũndũ ndagakorũo na ihooru. O na kũrĩ ũguo, nĩ tũrabatara kwĩmenyerera mũno ũrĩa tũrahũthĩra njĩra ĩyo ya kwaranĩria. Ũthuthuria nĩ wonanĩtie atĩ andũ arĩa mahũthagĩra mahinda maingĩ magĩthoma ndũmĩrĩri na kwĩrorera mbica thĩinĩ wa social media, mũthia-inĩ no makorũo na ihooru na mĩtangĩko. Nĩkĩ? No kũhoteke gĩtũmi kĩmwe nĩ atĩ, kaingĩ mbica iria andũ aingĩ mekagĩra thĩinĩ wa social media nĩ iria njega biũ ciao, cia arata ao, na kũndũ kwega kũrĩa maceerete. Mũndũ ũrĩa ũrerorera mbica icio aringithania ũtũũro wake na wao, ahota gwĩciria ta marĩ na ũtũũro mwega kũmũkĩra. w20.07 5-6 ¶12-13

Ngathĩti ya The Watchtower ya Oktomba 1, 1988, yoigĩte ũũ: “Athuri nĩ mamenyaga atĩ Kristo kũgerera roho mũtheru no atongorie meciria ma mũthuri o wothe thĩinĩ wa kĩama gĩa athuri kũheana ũtaaro wa Bibilia ũrĩa ũrabatarania kũhiũrania na ũndũ mũna kana gũtua itua o rĩothe rĩa bata. (Atũm. 15:7-15) Roho mũtheru ũteithagia athuri othe a kĩũngano, ti mũthuri ũmwe tu.” Mũthuri wa kĩũngano ũtĩĩte athuri arĩa angĩ, hingo ciothe ndageragia kwaria arĩ wa mbere rĩrĩa marĩ na mũcemanio wa athuri. Ndendaga kuoneka nĩwe ũraria mũno na ndonaga mawoni make ta arĩ mo mega hingo ciothe gũkĩra ma arĩa angĩ. Handũ ha ũguo, arutaga mawoni make arĩ na wĩnyihia. Nĩ athikagĩrĩria na kinyi mawoni ma arĩa angĩ. Na ũndũ wa bata makĩria nĩ akoragwo ehaarĩirie kũheana ũtaaro wa Kĩĩmaandĩko na kũrũmĩrĩra ũtongoria wa “ngombo ĩrĩa njĩhokeku na njũgĩ.” (Mat. 24:45-47) Rĩrĩa athuri a kĩũngano marĩrĩria maũndũ na njĩra ya wendo na gĩtĩo, Ngai nĩ amaheaga roho wake mũtheru ũkamatongoria gũtua matua marĩa magĩrĩire.—Jak. 3:17, 18. w20.08 27 ¶5-6

Thũ cia mũtũmwo Paulo ciarĩ na hinya mũingĩ kũmũkĩra. Kaingĩ nĩ mooigaga ahũũrũo na aikio njera. Ningĩ Paulo nĩ eekirũo maũndũ moru nĩ andũ arĩa maabatiĩ gũkorũo marĩ arata ake. O na andũ amwe kĩũngano-inĩ gĩa Gĩkristiano nĩ maamũkagĩrĩra. (2 Kor. 12:11; Afil. 3:18) No Paulo nĩ aatooririe andũ arĩa othe maamũkagĩrĩra. Na njĩra ĩrĩkũ? Aathiire na mbere kũhunjia o na agĩũkagĩrĩrũo. Aatũũrire arĩ mwĩhokeku harĩ aarĩ na ariũ a Ithe witũ, o na rĩrĩa meka maũndũ ma kũmũũraga ngoro. Na ũndũ ũrĩa wa bata makĩria, aatũũrire arĩ mwĩhokeku harĩ Ngai nginya rĩrĩa aakuire. (2 Tim. 4:8) Eekire maũndũ macio mothe, ti tondũ wa hinya wake no nĩ tondũ nĩ eehokete Jehova. Hihi nĩ ũrumagwo kana ũgokĩrĩrũo? Rĩrĩa andũ matũkĩrĩra, tũtooragia ũũru na njĩra ya kwĩrutanĩria gũteithia andũ kwĩruta ũhoro wĩgiĩ Jehova na Bibilia. No tũhote gwĩka ũguo na njĩra ya kũhũthagĩra Bibilia gũcokia ciũria iria andũ maratũũria, ningĩ na njĩra ya gũkoragwo na gĩtĩo na ũtugi harĩ andũ arĩa maratwĩka maũndũ moru, na gwĩkaga andũ othe maũndũ mega, o na thũ citũ.—Mat. 5:44; 1 Pet. 3:15-17. w20.07 17-18 ¶14-15

Hihi no tuuge atĩ Jehova nĩ mwĩnyihia? Ĩĩ, no twĩtĩkanie na ciugo icio cia Daudi. (Thab. 18:35) No kũhoteke rĩrĩa Daudi aandĩkire ciugo icio eeciragia rĩrĩa mũnabii Samueli aathiire nyũmba ya ithe gũitĩrĩria maguta ũrĩa ũngĩatuĩkire mũthamaki wa Isiraeli. Daudi nĩwe warĩ mũnini harĩ ariũ acio angĩ mũgwanja a ithe, no Jehova nĩwe aathuurire atuĩke mũthamaki ithenya rĩa Saulu. (1 Sam. 16:1, 10-13) Daudi nĩ angĩetĩkanirie na mwandĩki wa thaburi ũrĩa woigire ũũ igũrũ rĩgiĩ Jehova: “Nĩ enyihagia akainamĩrĩra nĩguo arore igũrũ o na thĩ, agokĩria mũndũ ũrĩa ũtarĩ hinya kuuma rũkũngũ-inĩ. Nĩ oyaga na igũrũ mũndũ ũrĩa mũthĩni . . . nĩgetha atũme aikare hamwe na andũ arĩa marĩ igweta.” (Thab. 113:6-8) Jehova nĩ onanagia atĩ nĩ mwĩnyihia kũgerera ũrĩa arũmbũyanagia na athathaiya ake matarĩ akinyanĩru. To gwĩtĩkĩra etĩkagĩra ũthathaiya witũ, no nĩ atuonaga tũrĩ arata ake. (Thab. 25:14) Nĩguo tũhote gũtuĩka arata ake, Jehova nĩ ooire ikinya rĩa mbere rĩa kũruta Mũrũ wake arĩ ta igongona nĩ ũndũ wa mehia maitũ. Na githĩ Jehova ndatuonetie tha na ũcayanĩri na njĩra nene! w20.08 8 ¶1-3

Jehova nĩ atuĩte nĩrĩ akaaniina mũtabarĩre ũyũ wa maũndũ. (Mat. 24:36) Na tondũ nĩ arĩ wetereri, ndangĩoya ikinya ihinda rĩu rĩtakinyĩte. Nĩ eriragĩria kũriũkia arĩa makuĩte, no no akoragwo na wetereri. (Ayub. 14:14, 15) Etereire ihinda rĩrĩa rĩagĩrĩire rĩkinye nĩguo amariũkie. (Joh. 5:28) Nĩ twagĩrĩirũo gũcokia ngatho nĩ ũndũ wa wetereri wa Jehova. Ta wĩcirie ũndũ ũyũ: Nĩ ũndũ wa wetereri wa Jehova, andũ aingĩ o hamwe na ithuĩ, nĩ tũgĩte na mweke wa ‘kwĩrira.’ Jehova endaga andũ aingĩ o ũrĩa kwahoteka makaagĩa na muoyo wa tene na tene. Kwoguo rekei tuonanagie ngatho nĩ ũndũ wa wetereri wake. Na njĩra ĩrĩkũ? Na njĩra ya gwĩka ũrĩa wothe tũngĩhota gũcaria arĩa marĩ na “mwerekera ũrĩa wagĩrĩire wa kũheo muoyo wa tene na tene” na kũmateithia kwenda Jehova na kũmũtungatĩra. (Atũm. 13:48) Tweka ũguo, andũ angĩ nĩ mekũgunĩka na wetereri wa Jehova o ta ũrĩa o na ithuĩ tũgunĩkĩte. w20.08 18 ¶17

Maũndũ marĩa mũrutwo ekwĩruta wĩruti-inĩ wake, matibatiĩ o kũhutia meciria make no nĩ nginya ngoro yake. Nĩkĩ? Tondũ angĩhutio ngoro, norĩo angĩhota gwĩka kũringana na maũndũ marĩa areruta. Jesu aarĩ mwarimũ mwega na andũ nĩ maakenagĩra maũndũ marĩa aamarutaga. No andũ maamũrũmagĩrĩra tondũ nĩ aahutagia ngoro ciao. (Luk. 24:15, 27, 32) Mũrutwo waku nĩ arabatara gũtaũkĩrũo wega nĩ Jehova, ataũkĩrũo atĩ no agĩe na ũrata hamwe nake, na atuĩke Ithe, Ngai wake, na Mũrata wake. (Thab. 25:5) Rĩrĩa mũreruta nake, mũteithie kuona wega ngumo cia Ngai. (Tham. 34:5, 6; 1 Pet. 5:6, 7) Ũndũ-inĩ o wothe mũrarĩrĩria, mũteithagie kuona Jehova nĩ Ngai wa mũthemba ũrĩkũ. Teithia mũrutwo waku ataũkĩrũo nĩ ngumo cia Jehova ta wendo, ũtugi, na tha. Jesu ooigire atĩ “rĩathani rĩrĩa inene mũno na rĩa mbere” nĩ kwenda “Jehova Ngai waku.” (Mat. 22:37, 38) Teithi mũrutwo waku akũrie wendo mũnene harĩ Ngai ngoro-inĩ yake. w20.10 10 ¶12

Jesu aarũmbũyanagia na atumia othe na njĩra ya gĩtĩo. (Joh. 4:27) No Jesu aakoragwo na gĩtĩo kĩnene mũno harĩ atumia arĩa meekaga wendi wa Ithe. Eetire atumia acio aarĩ a nyina, na ndaamatigire na thutha akĩgweta arũme arĩa oonaga marĩ a famĩlĩ yake ya kĩĩroho. (Mat. 12:50) Ningĩ Jesu aakoragwo arĩ mũrata wa ma harĩ o. Jesu aarĩ mũrata wa Mariamu na Maritha, arĩa kuonekaga ta mataarĩ thĩinĩ wa kĩhiko. (Luk. 10:38-42) Kũgerera ciugo na ciĩko ciake, nĩ aatũmaga maigue maiganĩire marĩ nake. Kwa ngerekano, Mariamu nĩ aaikarire magũrũ-inĩ ma Jesu nĩguo arutwo nĩwe. Na rĩrĩa Maritha aarakarĩte tondũ Mariamu ndaamũteithagia wĩra, ndaiguire hinya kwĩra Jesu ũndũ ũrĩa wamũthĩnagia. Jesu nĩ aahũthĩrire mweke ũcio kũruta aarĩ a Ithe witũ acio maũndũ ma bata. Ningĩ nĩ oonanirie atĩ nĩ aamarũmbũyagia o hamwe na Lazaro ũrĩa warĩ mũrũ wa nyina nao, na njĩra ya kũmaceerera maita mangĩ. (Joh. 12:1-3) Nĩkĩo ndwarĩ ũndũ mũritũ harĩ Mariamu na Maritha kũhoya Jesu ũteithio rĩrĩa Lazaro aarwarire.—Joh. 11:3. w20.09 20 ¶3; 21 ¶6

Arutwo a Jesu meeciragia atĩ Ũthamaki wa Ngai “ũngĩokire o hĩndĩ ĩyo” na ũmahonokie kuuma ũkombo-inĩ wa Aroma. Na ithuĩ nĩ twetagĩrĩra mũno rĩrĩa Ũthamaki wa Ngai ũkeeheria maũndũ moru na ũtũrehere thĩ njerũ ĩrĩ na ũthingu. (2 Pet. 3:13) O na kũrĩ ũguo, nĩ tũrabatara gweterera nginya ihinda rĩrĩa Jehova abangĩte rĩkinye. Jehova nĩ aaheire Nuhu ihinda rĩiganu rĩa gwaka thabina na rĩa gũkorũo arĩ “mũhunjia wa ũthingu.” (2 Pet. 2:5; 1 Pet. 3:20) Jehova nĩ aathikĩrĩirie Iburahimu hĩndĩ ĩrĩa aamũũragia ciũria nyingĩ ciĩgiĩ itua rĩake rĩa kwananga aikari a matũũra ma Sodomu na Gomora arĩa maarĩ aganu. (Kĩam. 18:20-33) Kwa ihinda rĩa mĩaka mĩingĩ, Jehova nĩ oonanirie wetereri na gĩkĩro kĩnene mũno kwerekera rũrĩrĩ rwa Isiraeli rũrĩa rũtaarĩ na wĩhokeku. (Neh. 9:30, 31) Ũmũthĩ nĩ tuonaga wetereri wa Jehova tondũ nĩ aheanĩte ihinda nĩguo andũ othe arĩa arenda matuĩke arata ake “merire.” (2 Pet. 3:9; Joh. 6:44; 1 Tim. 2:3, 4) Kĩonereria kĩa Jehova nĩ gĩtũteithagia gũkorũo na wetereri rĩrĩa tũrathiĩ na mbere kũhunjia na kũrutana. w20.09 10 ¶8-9

Jehova akaariũkia andũ marĩ na ũmũndũ wao na makĩririkanaga maũndũ marĩa mooĩ. Ũndũ ũcio ũronania atĩa? Ũronania atĩ Jehova nĩ akwendete mũno ũũ atĩ nĩ aririkanaga maũndũ marĩa wĩciragia, ũrĩa ũiguaga, ũrĩa waragia, na ũrĩa wĩkaga. Kwoguo no ahote kũriũkia mũndũ ahaana o ta ũrĩa aahaanaga atanakua. Mũthamaki Daudi nĩ aamenyaga atĩ Jehova nĩ oĩ o ũmwe witũ wega. (Thab. 139:1-4) Kũmenya atĩ Jehova nĩ atũĩ na njĩra ta ĩyo kũngĩtũhutia atĩa ihinda-inĩ rĩrĩ? Tũngĩĩcũrania ũrĩa Jehova atũĩ wega, tũtibatiĩ gwĩtigĩra. Nĩkĩ hihi? Nĩ tũrĩririkanaga atĩ Jehova nĩ atũrũmbũyagia na gĩkĩro kĩnene. Nĩ onaga ngumo iria itũmaga o ũmwe witũ akorũo arĩ wa bata harĩ we. Nĩ oĩ maũndũ marĩa twanagerera ũtũũro-inĩ witũ magatũma tũhaane ũrĩa tũhaana. Na githĩ ũcio ti ũndũ wa gũtũũmĩrĩria? Tũtiagĩrĩirũo kũigua ta tũrĩ oiki. Na hingo ciothe Jehova akoragwo hamwe na ithuĩ akĩrora ũrĩa angĩtũteithia.—2 Maũ. 16:9. w20.08 17 ¶13-14

Jehova nĩ endete mũno kũruta andũ ake. Nĩ endaga mamũmenye, mamwende, na matũũre tene na tene marĩ ciana ciake endete. Maũndũ macio matingĩhoteka korũo ndarutaga andũ ake. (Joh. 17:3) Jehova nĩ aahũthĩrire kĩũngano gĩa Gĩkristiano gĩa karine ya mbere kũruta andũ ake. (Kol. 1:9, 10) Roho mũtheru kana “mũteithia” ũrĩa Jesu eeranĩire nĩ wateithirie arutwo mũno. (Joh. 14:16) Nĩ wateithirie arutwo gũtaũkĩrũo wega nĩ Kiugo kĩa Ngai na ũkĩmaririkania maũndũ maingĩ marĩa Jesu ooigĩte na agĩka, marĩa maacokire kwandĩkwo mabuku-inĩ ma Injiri. Ũmenyo ũcio nĩ wekĩrire hinya wĩtĩkio wa Akristiano acio a karine ya mbere na ũgĩtũma wendo wao harĩ Ngai, harĩ Mũrũwe, na harĩ mũndũ na ũrĩa ũngĩ wongerereke. Jehova aarathĩte atĩ “ihinda-inĩ rĩa mũthia rĩa matukũ,” andũ kuuma ndũrĩrĩ-inĩ ciothe nĩ mangĩgaathiĩ kĩrĩma-inĩ gĩake kĩa mũhaano nĩguo marutwo njĩra ciake. (Isa. 2:2, 3) Nĩ tũrona ũrathi ũcio ũkĩhinga ũmũthĩ. w20.10 24 ¶14-15

Nĩ ũndũ ũrĩkũ ũngĩtũma mũndũ arege gwĩtĩkĩra ũtaaro araheo nĩ mũrata wake? Nĩ mwĩtĩo. Andũ arĩa etĩi mendaga o kũigua maũndũ ma ‘gũkenia matũ mao.’ Matiendaga “gũthikĩrĩria ũhoro ũrĩa wa ma.” (2 Tim. 4:3, 4) Mationaga ta marabatara gũtaarũo tondũ monaga nĩ ogĩ na nĩ a bata gũkĩra andũ arĩa angĩ. No mũtũmwo Paulo aandĩkire ũũ: “Mũndũ angĩciria atĩ we nĩ kĩndũ na hĩndĩ ĩyo we ti kĩndũ, nĩ kwĩheenia areheenia.” (Gal. 6:3) Ũndũ ũcio ningĩ nĩ ũtaarĩirio wega nĩ Mũthamaki Suleimani. Aandĩkire ũũ: “Nĩ kaba mwana mũthĩni no nĩ mũũgĩ gũkĩra mũthamaki mũkũrũ no nĩ mũkĩgu, o ũcio ũtigĩte kuona bata wa gwathĩkĩra mũkaana.” (Koh. 4:13) Ta wĩcirie kĩonereria kĩrĩa mũtũmwo Petero aatũigĩire rĩrĩa aarũngirũo mbere ya andũ nĩ mũtũmwo Paulo. (Gal. 2:11-14) Petero nĩ angĩarakarire nĩ njĩra ĩrĩa Paulo aamũrũngire nayo na harĩa aamũrũngĩire. No Petero aarĩ na ũũgĩ. Nĩ eetĩkĩrire ũtaaro na ndaarakarĩire Paulo kana akĩmũigĩra muku. O na thutha ũcio, eetire Paulo “mũrũ wa Ithe witũ twendete.”—2 Pet. 3:15. w20.11 21 ¶9, 11-12

Nĩ kĩĩ kĩngĩteithia arutwo a Bibilia gũkũra kĩĩroho? Nĩ gũthiĩ mĩcemanio-inĩ ya Gĩkristiano. Tondũ maũndũ marĩa mekwĩruta mĩcemanio-inĩ nĩ mekũmateithia kuongerera ũmenyo, gwĩkĩra wĩtĩkio wao hinya, na kwenda Ngai makĩria. (Atũm. 15:30-32) Ningĩ, mũhunjia kĩũngano-inĩ no ere mũrutwo ũrĩa kwenda Jehova kwamũteithirie gwathĩkĩra mawatho ma Ngai. (2 Kor. 7:1; Afil. 4:13) Na rĩrĩa arutwo a Bibilia mamenyana na ahunjia matiganĩte arĩa maigĩte kĩonereria kĩega, nĩ merutaga na cionereria ciao ũrĩa mangĩrũmia watho wa Jesu wĩgiĩ kwenda Ngai na andũ. (Joh. 13:35; 1 Tim. 4:12) Nĩ monaga ahunjia nĩ marahiũrania na moritũ o ta marĩa marahiũrania namo na makona atĩ no mahote gwĩka mogarũrũku marĩa marabatarania nĩguo matuĩke arutwo a Kristo. (Gũcok. 30:11) O mũndũ thĩinĩ wa kĩũngano no ateithĩrĩrie arutwo a Bibilia na njĩra itiganĩte nĩguo makũre kĩĩroho.—Mat. 5:16. w20.11 5 ¶10-12

No kũhoteke mũtũmwo Paulo aaragia ũhoro wĩgiĩ kũrũa na nyamũ kĩhaaro-inĩ kĩmwe kĩa mathaako thĩinĩ wa Efeso. (2 Kor. 1:8; 4:10; 11:23) Kana hihi akorũo aaragĩrĩria igũrũ rĩgiĩ Ayahudi na andũ angĩ arĩa maamũkararagia, arĩa maatariĩ ta “nyamũ cia gĩthaka.” (Atũm. 19:26-34; 1 Kor. 16:9) O ũrĩa kũngĩkorũo kwarĩ, Paulo nĩ aacemanirie na magerio maingĩ maritũ. Ĩndĩ aarĩ na kĩĩrĩgĩrĩro kĩega kĩa mahinda marĩa maroka. (1 Kor. 15:30, 31; 2 Kor. 4:16-18) Tũratũũra mahinda marĩ na mogwati maingĩ. Aarĩ na ariũ a Ithe witũ amwe nĩ magũmĩirũo nĩ maũndũ ma wĩki-naĩ. Angĩ nao maikaraga kũndũ kũrĩ na mbaara, na nĩ ũndũ ũcio matiguaga marĩ na ũgitĩri. O na kũrĩ angĩ matungatagĩra Jehova mabũrũri-inĩ wĩra witũ wĩkĩrĩirũo mĩkaana kana ũhũũrĩtwo marubuku, na ũndũ ũcio nĩ ũtũmaga makorũo ũgwati-inĩ wa kuohwo njera o na kana kũũragwo. O na kũrĩ ũguo, aarĩ na ariũ a Ithe witũ acio othe nĩ mathiaga na mbere gũthathaiya Jehova, na kwoguo magatũigĩra kĩonereria kĩega. Matiĩtigagĩra tondũ nĩ mamenyaga atĩ o na mangĩũrũo nĩ mĩoyo yao mahinda-inĩ maya, Jehova nĩ amaigĩire ũndũ ũngĩ mwega makĩria mahinda marĩa maroka. w20.12 9 ¶3-4

Hihi wanekora ũkuĩte ngoro tondũ gĩcigo kĩrĩa mũhunjagia gĩtikoragwo na moimĩrĩro mega kana tondũ mũtikoraga andũ aingĩ mĩciĩ? Hĩndĩ ta ĩyo-rĩ, nĩ kĩĩ kĩngĩtũteithia gũtũũria kana kuongerera gĩkeno gitũ? Nĩ ũndũ wa bata gũkorũo na mawoni marĩa magĩrĩire kwerekera ũtungata. Hihi ũguo nĩ kuuga atĩa? Ririkanaga atĩ muoroto witũ mũnene wa kũhunjia nĩ kũmenyithania rĩĩtwa rĩa Ngai na Ũthamaki wake. Jesu ooigire atĩ no andũ anini mangĩkarũmĩrĩra njĩra ya muoyo. (Mat. 7:13, 14) Rĩrĩa tũrĩ ũtungata-inĩ nĩ tũkoragwo na mweke wa mwanya wa kũrutithania wĩra na Jehova, Jesu, na araika. (Mat. 28:19, 20; Kũg. 14:6, 7) Jehova agucagĩrĩria andũ arĩa marenda kũmũtungatĩra. (Joh. 6:44) Kwoguo mũndũ angĩaga gũthikĩrĩria ndũmĩrĩri itũ ihinda-inĩ rĩrĩ, no kũhoteke nĩ agaathikĩrĩria hĩndĩ ĩyo ĩngĩ. Mwarĩ wa Ithe witũ wĩtagwo Deborah ooigire ũũ: “Gũkua ngoro nĩ itharaita rĩmwe rĩrĩ hinya Shaitani ahũthagĩra gũtwerekera.” No Jehova Ngai arĩ hinya mũnene mũno gũkĩra Shaitani na matharaita make mothe. w20.12 26 ¶18-19; 27 ¶21

Akristiano aingĩ ehokeku marutaga wĩra mahinda mothe nĩguo macarie mabataro mao na ma famĩlĩ ciao. O na kũrĩ ũguo, ahunjia acio ehokeku nĩ manyitaga mbaru ithondeka rĩa Ngai na njĩra ciothe iria mahota. Kwa ngerekano, amwe nĩ mateithagĩrĩria rĩrĩa kwagĩa na icanjama, angĩ nao makerutĩra wĩra-inĩ wa mĩako, na mũndũ o wothe nĩ akoragwo na mweke wa kũnyita mbaru wĩra wa thĩ yothe na njĩra ya kũruta mũhothi. Mekaga maũndũ macio tondũ nĩ mendete Ngai na nĩ mendete andũ arĩa angĩ. O kiumia, nĩ tuonanagia atĩ nĩ twendete aarĩ na ariũ a Ithe witũ rĩrĩa twathiĩ na twanyitanĩra mĩcemanio-inĩ ya kĩũngano. O na gũtuĩka rĩmwe nĩ tũiguaga tũnogete, no tũthiaga mĩcemanio-inĩ. O na gũtuĩka no tũkorũo tũkĩigua guoya, nĩ tũrutaga macokio. Ningĩ o na akorũo ithuothe nĩ tũkoragwo na mathĩna maitũ, nĩ twĩkĩraga arĩa angĩ ngoro mbere na thutha wa mĩcemanio. (Ahib. 10:24, 25) Na githĩ tũticokagia ngatho nĩ ũndũ wa maũndũ marĩa aarĩ na ariũ a Ithe witũ mahingagia? w21.01 10 ¶11

Andũ etĩi nĩ maiguaga hinya mũno kũgaathĩrĩria andũ arĩa angĩ na mendaga magathĩrĩrio arĩ o. Kaingĩ nĩ meringithanagia na andũ arĩa angĩ, na magakũria roho wa macindano. Handũ ha kũmenyeria andũ arĩa angĩ na kũmehokera mawĩra, makoragwo na mawoni atĩ, “Ũndũ ndũngĩthiĩ wega itawĩkĩte niĩ mwene.” Andũ etĩi kaingĩ mendaga kuoneka marĩ a bata gũkĩra andũ arĩa angĩ na makoragwo na ũiru. Tũngĩona tũrĩ na thĩna wa mwĩtĩo, twagĩrĩirũo kũhoya Jehova na kĩyo atũteithie ‘kũgarũrĩra meciria maitũ,’ nĩgetha ngumo ĩyo njũru ndĩkagĩe na mĩri ngoro-inĩ citũ. (Rom. 12:2) Nĩ tũkenaga mũno nĩ ũndũ wa kĩonereria kĩega kĩrĩa Jehova atũigĩire. (Thab. 18:35) Nĩ tuonaga ũrĩa arĩ mwĩnyihia kũgerera ũrĩa arũmbũyanagia na ndungata ciake, na no twende kwĩgerekania nake. Ningĩ, no twende kwĩgerekania na cionereria njega cia andũ arĩa magwetetwo nĩ Bibilia, arĩa maatwaranaga na Ngai marĩ na wĩnyihia. Rekei hingo ciothe tũheage Jehova ngumo na gĩtĩo kĩrĩa kĩmwagĩrĩire.—Kũg. 4:11. w20.08 13 ¶19-20

Kĩhiko nĩ kĩheo gĩkinyanĩru kuuma kũrĩ Ngai no andũ ti akinyanĩru. (1 Joh. 1:8) Nĩkĩo Kiugo kĩa Ngai kiugaga atĩ andũ arĩa mahikanĩtie nĩ marĩcemanagia na moritũ, tondũ kiugaga atĩ nĩ marĩonaga “thĩna mwĩrĩ-inĩ wao.” Jehova erĩgagĩrĩra athuri Akristiano marũmbũiye mabataro ma kĩĩroho, ma ngoro, na ma kĩĩmwĩrĩ ma famĩlĩ ciao. (1 Tim. 5:8) O na kũrĩ ũguo, o na atumia nĩ magĩrĩirũo gwetha mahinda o mũthenya ma gũthoma na gwĩcũrania Kiugo kĩa Ngai na kũhoya Jehova na kĩyo o na marĩ na mĩhangʼo mĩingĩ. Ũndũ ũcio no ũkorũo ũtarĩ mũhũthũ. Atumia makoragwo na maũndũ maingĩ ma gwĩka, no nĩ harĩ bata gwetha mahinda gwĩka maũndũ macio. Nĩkĩ? Tondũ Jehova endaga o ũmwe witũ akũrie na atũũrie ũrata wa hakuhĩ hamwe nake. (Atũm. 17:27) Ũrĩa kũrĩ nĩ atĩ, mũtumia no abatare kwĩrutanĩria mũno nĩguo ahote kwĩnyihĩria mũthuri wake ũtarĩ mũkinyanĩru. O na kũrĩ ũguo, no ũkorũo ũrĩ ũndũ mũhũthũ harĩ we kũhingia itemi rĩrĩa Jehova amũheete, angĩtaũkĩrũo na etĩkĩre itũmi iria irĩ thĩinĩ wa Bibilia cia kwĩnyihĩria mũthuri wake. w21.02 9 ¶3, 6-7

Magerio no maringithanio na mwaki ũrĩa bundi ahũthagĩra agĩtura rũhiũ. Rũhiũ rũu rwacinwo biũ rũcoke rũikio maĩ-inĩ mahehu, nĩ rũgĩaga na hinya makĩria. Na njĩra o ta ĩyo, rĩrĩa twacemania na magerio, wĩtĩkio witũ nĩ ũgĩaga na hinya makĩria. Nĩkĩo Jakubu aandĩkire ũũ: “Rekagai ũkirĩrĩria ũrĩkie wĩra waguo, nĩgetha mũkoragwo mũrĩ akinyanĩru na mũrĩ agima maũndũ-inĩ mothe.” (Jak. 1:4) Kũmenya atĩ magerio marĩa tũngĩcemania namo no matũme wĩtĩkio witũ ũgĩe na hinya makĩria, no gũtũteithie kũmakirĩrĩria tũrĩ na gĩkeno. Ningĩ thĩinĩ wa marũa macio make, Jakubu nĩ oonanirie maũndũ mamwe mangĩtũma tũũrũo nĩ gĩkeno gitũ. Ũndũ ũmwe ũngĩtũma tũũrũo nĩ gĩkeno nĩ kũrigwo ũrĩa twagĩrĩirũo gwĩka. Hĩndĩ ĩrĩa tũragerera igerio-inĩ rĩna, nĩ twagĩrĩirũo kwĩhoka Jehova nĩguo atũteithie gũtua matua mekũmũkenia, magune aarĩ na ariũ a Ithe witũ, na matũteithie gũtũũria wĩkindĩru witũ. (Jer. 10:23) No tũbatare ũũgĩ nĩguo tũmenye ũrĩa twagĩrĩirũo gwĩka na ũrĩa twagĩrĩirũo kwĩra andũ arĩa maratũkararia. Tũngĩkorũo tũtaramenya ũrĩa twagĩrĩirũo gwĩka no tũigue tũkuĩte ngoro nĩ ũndũ wa maũndũ marĩa tũragerera, na tũũrũo nĩ gĩkeno gitũ na ihenya. w21.02 28 ¶7-9

Jehova nĩ atũigĩire kĩonereria. Wendo wake nĩ mũnene harĩ ithuĩ ũũ atĩ gũtirĩ kĩndũ kĩngĩtũma atige gũtwenda, tũngĩkorũo tũrĩ ehokeku harĩ we. (Rom. 8:38, 39) Kiugo gĩa Kĩngiriki kĩrĩa gĩtaũrĩtwo “biũ,” gĩkoragwo gĩkĩenda kuonania kĩyo kĩnene kĩrĩa mũndũ ekagĩra nĩguo onanie wendo. Rĩmwe na rĩmwe no tũbatare gwĩkĩra kĩyo kĩnene nĩguo tuonie aarĩ na ariũ a Ithe witũ wendo muororo. Tũngĩhĩtĩrio nĩ andũ arĩa angĩ, nĩ twagĩrĩirũo gũthiĩ na mbere ‘gũkiranĩrĩria o mũndũ na ũrĩa ũngĩ tũrĩ na wendo, o tũkĩĩrutanagĩria biũ gũtũũria ũrũmwe wa roho thĩinĩ wa thayũ ũrĩa ũtũnyitithanagia.’ (Ef. 4:1-3) Nĩ tũrĩhotaga kwaga gũtindanĩra na mahĩtia ma aarĩ na ariũ a Ithe witũ na tũgeka ũrĩa wothe twahota nĩguo tũkorũo na mawoni ta ma Jehova kwerekera aarĩ na ariũ a Ithe witũ. (1 Sam. 16:7; Thab. 130:3) Ti ũndũ mũhũthũ hingo ciothe kuonia aarĩ na ariũ a Ithe witũ wendo muororo, makĩria angĩkorũo nĩ tũĩ mawathe mao. Akristiano amwe a karine ya mbere nĩ maarĩ na thĩna ta ũcio, ta ũrĩa kwarĩ harĩ Yudia na Sintike. Mũtũmwo Paulo aameerire “makoragwo na mwĩcirĩrie ũmwe thĩinĩ wa Mwathani.”—Afil. 4:2, 3. w21.01 22-23 ¶10-11

Inyuĩ ariũ a Ithe witũ ethĩ, andũ arĩa angĩ kĩũngano-inĩ nĩ makenaga gũtungatĩra Jehova marĩ na “ũrũmwe” hamwe na inyuĩ. (Zef. 3:9) Nĩ makenagio nĩ kĩyo kĩanyu na ũrĩa mũrutaga mawĩra marĩa mwĩhokeirũo mũrĩ na hinya na ũcanjamũku. Mũkoragwo mũrĩ a bata mũno harĩ o. Ariũ a Ithe witũ ethĩ, mũtikanariganĩrũo atĩ Jehova nĩ amwendete na nĩ amwĩhokete. Nĩ aarathĩte atĩ matukũ-inĩ ma kũrigĩrĩria, nĩ kũngĩgaakorũo na mbũtũ ya andũ ethĩ arĩa makeerutagĩra meyendeire. (Thab. 110:1-3) Nĩ oĩ atĩ nĩ ũmwendete na nĩ wendaga kũmũtungatĩra kũringana na ũhoti waku. Ndũkamakagio mũno nĩ ũrĩa andũ arĩa angĩ marakuona na ndũgakuage ngoro rĩrĩa ũrageria gũtungatĩra Jehova. Rĩrĩa wahĩtia, ĩtĩkagĩra kũmenyerio na kũrũngwo na wonage atĩ ũndũ ũcio uumĩte kũrĩ Jehova. (Ahib. 12:6) Rutaga na kĩyo wĩra o wothe wehokerũo kĩũngano-inĩ. Na ũndũ ũrĩa wa bata makĩria, tigagĩrĩra atĩ nĩ watũma Jehova akene maũndũ-inĩ marĩa mothe ũrĩkaga.—Thim. 27:11. w21.03 7 ¶17-18

Nĩ kũrĩ maũndũ maingĩ mangĩtũũraga ngoro. Maũndũ macio nĩ ta mahĩtia maitũ, kũremwo nĩ kũhingia maũndũ mamwe, kana mũrimũ. Ningĩ no tũkue ngoro nĩ ũndũ wa kwaga kũheo mweke twĩriragĩria ũtungata-inĩ wa Jehova kana nĩ ũndũ wa kũhunjia kũndũ andũ matarathikĩrĩria ũhoro ũrĩa mwega. No ũkorũo ũrĩ ũndũ mũhũthũ kwĩigua tũtarĩ kĩene tũngĩciria mũno ũhoro wĩgiĩ mahĩtia na mawathe maitũ. Ũndũ ũcio no ũtũme twĩcirie atĩ Jehova ndakaareka tũingĩre thĩinĩ wa thĩ njerũ nĩ ũndũ wa mahĩtia maitũ. Gũkorũo na mwerekera ta ũcio nĩ ũgwati. Bibilia yugaga atĩ andũ othe “nĩ mehĩtie” o tiga Jesu Kristo. (Rom. 3:23) No Jehova ndaroraga o mahĩtia maitũ kana akerĩgĩrĩra tũkorũo tũrĩ akinyanĩru. Handũ ha ũguo, nĩ Ithe witũ ũtwendete na akoragwo ehaarĩirie gũtũteithia. Ningĩ nĩ arĩ wetereri. Nĩ onaga ũrĩa twĩrutanagĩria nĩguo tũrũe na mawathe maitũ na tũtige kwĩigua tũtarĩ kĩene, na nĩ akoragwo ehaarĩirie gũtũteithia.—Rom. 7:18, 19. w20.12 22 ¶1-3

Ithuothe tũrĩ rũgendo-inĩ. Muoroto witũ nĩ gũgaatũũra thĩinĩ wa thĩ njerũ rungu rwa ũtongoria wa Jehova wa wendo. Hĩndĩ ciothe nĩ twĩrutanagĩria kũgerera njĩra-inĩ ya muoyo. Ĩndĩ o ta ũrĩa Jesu ooigire njĩra ĩyo nĩ ngunderu na rĩmwe ndũkoragwo ũrĩ ũndũ mũhũthũ kũmĩgerera. (Mat. 7:13, 14) Tondũ tũrĩ andũ matarĩ akinyanĩru, nĩ ũndũ mũhũthũ rĩmwe gwĩkora nĩ tuumire njĩra-inĩ ĩyo. (Gal. 6:1) Angĩkorũo nĩ tũrenda gũtũũra njĩra-inĩ ya muoyo, no mũhaka tũkorũo twĩhaarĩirie kũgarũrĩra mwĩcirĩrie, mwerekera, na ciĩko citũ. Mũtũmwo Paulo atwĩkĩrĩte ngoro tũthiĩ na mbere “kũrũngagwo.” Ti ũndũ mũhũthũ gũthuthuria meciria na mĩerekera itũ. Nĩkĩ? Tondũ ngoro itũ nĩ ĩheenanagia, na kwoguo no ũkorũo ũrĩ ũndũ mũritũ kũmenya kũrĩa ĩgũtwerekeria. (Jer. 17:9) Ningĩ nĩ ũndũ mũhũthũ kwĩheenia na “mwĩcirĩrie wa maheeni.” (Jak. 1:22) Kwoguo twagĩrĩirũo gwĩthuthuria tũkĩhũthĩra Kiugo kĩa Ngai. Kiugo kĩa Ngai nĩ gĩtũteithagia kũmenya ũrĩa tũhaana na thĩinĩ, ũrĩa “meciria na methugunda” ma ngoro itũ mahaana.—Ahib. 4:12, 13. w20.11 18 ¶1-3

Rĩrĩa twakorũo tũrĩ enyihia, ũndũ ũcio no ũtũrehere gĩkeno. Nĩkĩ? Tondũ nĩ tũrĩmenyaga atĩ nĩ harĩ maũndũ tũtangĩhota, na kwoguo nĩ tũrĩcokagia ngatho na tũgakena rĩrĩa twateithio nĩ andũ arĩa angĩ. Kwa ngerekano, ta wĩcirie hĩndĩ ĩrĩa Jesu aahonirie andũ ikũmi arĩa maarĩ na mangũ. Mũndũ ũmwe tu harĩ acio, nowe wacokire gũcokeria Jesu ngatho nĩ ũndũ wa kũmũhonia mũrimũ ũcio mũũru. Mũndũ ũcio mwĩnyihia nĩ aamenyaga atĩ ndangĩahotire kwĩhonia hatarĩ na ũteithio wa Jesu, na kwoguo akĩgoocithia Ngai nĩ ũndũ wa ũndũ ũcio. (Luk. 17:11-19) Kaingĩ, andũ arĩa enyihia nĩ mahotaga kũiguana na andũ arĩa angĩ, na ũkoragwo ũrĩ ũndũ mũhũthũ harĩ o kũgĩa na arata a hakuhĩ. Nĩkĩ? Nĩ mamenyaga atĩ andũ arĩa angĩ nĩ makoragwo na ngumo njega, na kwoguo nĩ mamehokaga. Andũ enyihia nĩ makenaga rĩrĩa mona andũ arĩa angĩ makĩgaacĩra mĩeke-inĩ ya ũtungata ĩrĩa maheetwo, na makoragwo marĩ a mbere kũmagathĩrĩria na kũmahe gĩtĩo. w20.08 12 ¶17-18