Septemba

Petero nĩ aahũthĩrire ciugo ngũrani hanini akĩgweta ũrathi wa Joeli. (Atũm. 2:16, 17) Mũtũmwo Petero ndaambĩrĩirie na ciugo “thutha ũcio,” iria irĩ thĩinĩ wa ũrathi wa Joeli, no aambĩrĩirie na ciugo “matukũ-inĩ ma kũrigĩrĩria” akĩaria ũhoro wĩgiĩ ihinda inini mbere ya Jerusalemu na hekarũ ĩrĩa yarĩ kuo kwanangwo. Hĩndĩ ĩyo nĩrĩo “andũ a mĩthemba yothe” mangĩgaaitĩrĩrio roho wa Ngai. Ũndũ ũcio ũronania atĩ ihinda nĩ rĩahĩtũkĩte mbere ya ũrathi wa Joeli ũhinge. Thutha wa Ngai gũitĩrĩria Akristiano acio a karine ya mbere roho wake, nĩ maambĩrĩirie wĩra wa kũhunjia ũrĩa thutha-inĩ ũngĩacokire ũthereme thĩ yothe. Gũkinyĩria kĩndũ mwaka wa 61 M.M., rĩrĩa mũtũmwo Paulo aandĩkĩire Akolosai marũa, ooigire atĩ ũhoro ũrĩa mwega nĩ wahunjĩtio “kũrĩ ũũmbi wothe mũhuro wa riũa.” (Kol. 1:23) Rĩrĩa Paulo aahũthĩrire ciugo “ũũmbi wothe,” eendaga kuuga icigo iria ciothe mangĩahotire gũthiĩ. Nĩ ũndũ wa ũteithio wa roho mũtheru wa Jehova, wĩra wa kũhunjia nĩ ũtheremete o na makĩria matukũ-inĩ maitũ, ũgakinya nginya “ituri-inĩ cia thĩ.”—Atũm. 13:47. w20.04 6-7 ¶15-16

Jehova nĩ endete o ũmwe witũ o hamwe na ngʼondu o yothe ĩngĩkorũo yeherete rũũru-inĩ. (Mat. 18:12-14) Ngai nĩ eeranĩire atĩ nĩ angĩgaacaria ngʼondu ciake iria ciũrĩte na aciteithie gũcokereria hinya kĩĩroho. Ningĩ nĩ aagwetire ĩmwe kwa ĩmwe maũndũ marĩa angĩekire, maũndũ marĩa mũrĩithi Mũisiraeli angĩekire ngʼondu yake ĩngĩorire. (Ezek. 34:12-16) Wa mbere, mũrĩithi nĩ angĩacaririe ngʼondu, ũndũ ũrĩa wabataraga mahinda maingĩ na kĩyo kĩingĩ. Na angĩonire ngʼondu ĩyo yorĩte, nĩ aamĩcokagia rũũru-inĩ. Makĩria ma ũguo, ngʼondu ĩyo ĩngĩakorirũo ĩgurarĩte kana ĩrĩ hũtu, mũrĩithi nĩ aamĩteithagia na njĩra ya wendo, akamĩoha ironda, akamĩkuua, na akamĩhe irio. Athuri a kĩũngano arĩa nĩo arĩithi a “rũũru rwa Ngai” nĩ marabatara gwĩka maũndũ o ta macio nĩguo mateithie arĩa matigĩte kũnyitanĩra na kĩũngano. (1 Pet. 5:2, 3) Athuri a kĩũngano nĩ macaragia andũ ta acio makamateithia gũcoka rũũru-inĩ, na makamonia wendo na njĩra ya kũmahe ũteithio ũrĩa marabatara wa kĩĩroho. w20.06 20 ¶10

Hihi Jesu oonaga mĩgũnda yerũhĩte ũndũ ĩngĩgethwo tondũ nĩ eerĩgagĩrĩra andũ aingĩ mamũrũmĩrĩre? Aca. Maandĩko nĩ maarathĩte atĩ no andũ anini mangĩkamwĩtĩkia. (Joh. 12:37, 38) Ningĩ Jesu nĩ aarĩ na ũhoti wa gũthoma ngoro. (Mat. 9:4) O na gũtuĩka andũ arĩa aarũmbũyagia mũno nĩ arĩa anini maamwĩtĩkagia, aahunjagĩria andũ othe arĩ na kĩyo. Ithuĩ tũtingĩhota gũthoma ngoro, kwoguo hatarĩ nganja nĩ twagĩrĩirũo kũregana na mwerekera wa gũtuagĩra andũ kana gĩcigo kĩrĩa tũhunjagia. Handũ ha ũguo, twagĩrĩirũo kuona andũ acio no matuĩke arutwo a Jesu. Ririkanaga ũrĩa Jesu eerire arutwo ake. Mĩgũnda nĩ yerũhĩte, na ũguo nĩ kuuga nĩ ĩrabatara kũgethwo. Andũ no macenjie na matuĩke arutwo a Kristo. Jehova onaga andũ arĩa mangĩtuĩka arutwo a Kristo marĩ “indo cia goro.” (Hag. 2:7) Tũngĩonaga andũ ta ũrĩa Jehova na Jesu mamonaga, nĩ tũrĩgeragia kũmenya ũrĩa maũndũ mao mahaana na maũndũ marĩa mamakenagia. Tũtirĩmonaga ta andũ matangĩcenjia, no tũrĩmonaga marĩ andũ mangĩtuĩka aarĩ na ariũ a Ithe witũ. w20.04 13 ¶18-19

Kiugo kĩa Ngai nĩ kĩonanagia wega atĩ no mũhaka tũkũrie na tũtũũrie wendo harĩ Jesu nĩguo tũkenie Jehova. Ũndũ ũmwe tũngĩka nĩguo tũtuĩke arata a Jesu nĩ kũmũmenya. No twĩke ũguo na njĩra ya gũthoma mabuku ma Mathayo, Mariko, Luka, na Johana. Tũngĩĩcũrania maũndũ marĩa marĩ Bibilia-inĩ megiĩ ũtũũro wa Jesu, no tũhote kũmwenda na kũmũtĩa nĩ ũndũ wa ũrĩa eekagĩra andũ maũndũ na njĩra ya ũtugi. Kwa ngerekano, o na gũtuĩka nĩwe warĩ Mwathi wa arutwo ake, ndaamonaga matariĩ ta ngombo. Handũ ha ũguo, nĩ aameraga ũrĩa areciria na ũrĩa araigua. Rĩrĩa marĩ na kĩeha, o nake nĩ aaiguaga kĩeha na akarĩranĩra hamwe nao. (Joh. 11:32-36) O na andũ arĩa maamũkararagia nĩ meeyonagĩra atĩ nĩ aatuĩkaga mũrata wa andũ arĩa metĩkĩra ndũmĩrĩri yake. (Mat. 11:19) Tũngĩĩgerekania na ũrĩa Jesu eekagĩra arutwo ake, ũrata witũ hamwe na andũ arĩa angĩ nĩ ũkũgĩa na hinya makĩria, nĩ tũrĩiguaga tũiganĩire na tũrĩ na gĩkeno, na nĩ tũrĩiguaga twendete na tũgatĩa Kristo o na makĩria. w20.04 22 ¶9-10

Gũkinyĩria mwaka wa 1870, Ngeretha nĩyo yathanaga kũndũ kũrĩa kũnene thĩinĩ wa thĩ, na nĩyo yarĩ na njeshi ĩrĩa yarĩ na hinya mũno thĩinĩ wa thĩ. Thĩinĩ wa ũrathi, thirikari ĩyo nĩyo yonanĩtio ĩtariĩ ta rũhĩa rũnini, rũrĩa rwatooririe hĩa ingĩ ithatũ nĩcio Faranja, Spain, na Netherlands. (Dan. 7:7, 8) Ngeretha nĩyo yarĩ mũthamaki wa mwena wa mũhuro o na hĩndĩ ya Mbaara ya Mbere ya Thĩ. Ihinda-inĩ o rĩu, nayo thirikari ya Amerika (US), nĩ yatuĩkĩte thirikari ĩrĩa yarĩ na ũtonga mũingĩ mũno na nĩ yambĩrĩirie kũnyitanĩra mũno na thirikari ya Ngeretha. Hĩndĩ ya Mbaara ya Mbere ya Thĩ, thirikari ya Amerika (US) na Ngeretha nĩ cianyitanĩire na ikĩgĩa na hinya mũno. Hĩndĩ ĩyo, thirikari icio cierĩ nĩ cianyitanĩire igĩtuĩka Thirikari ya Thĩ ya Ngeretha na Amerika. O ta ũrĩa Danieli aarathĩte, mũthamaki ũcio nĩ aacokanĩrĩirie “mbũtũ nene mũno na ĩrĩ hinya.” Matukũ-inĩ ma kũrigĩrĩria, thirikari ya Ngeretha ĩnyitanĩire na thirikari ya Amerika, nĩcio ikoretwo irĩ mũthamaki wa mwena wa mũhuro. w20.05 4 ¶7-8

Maĩ makoragwo mahaana ũguo mahaana tondũ thĩ itũ ĩkoragwo harĩa hagĩrĩire kuuma harĩ riũa. Thĩ ĩngĩkuhĩrĩria riũa hanini, maĩ mothe mangĩtherũka mahũe, gũtigwo kũrĩ kũndũ kũũmũ gũtangĩikarĩka. Ningĩ thĩ ĩngĩraihĩrĩria riũa hanini, maĩ mothe mangĩheha manyitane, thĩ ĩtuĩke kĩhiga kĩnene kĩa mbarabu. Gũkorũo atĩ Jehova aigĩte thĩ harĩa yagĩrĩire, nĩ gũtũmaga mũthiũrũrũko wa maĩ ũhote gũtũũria muoyo indo iria irĩ kuo. Riũa rĩcinaga maĩ marĩa marĩ iria-inĩ na marĩa marĩ thĩ, na ndogo yamo ĩkambata igũrũ ĩgathondeka matu. O mwaka riũa nĩ rĩcinaga maĩ mangĩihũra itangi rĩa kĩndũ kilomita 80 kũraiha, kwarama, na kũrika, makambata marĩ ndogo. Maĩ macio mambata rĩera-inĩ, maikaraga thikũ ta ikũmi magacoka magaitĩka marĩ mbura kana mbarabu. Mbura yoira, maĩ macio macokaga iria-inĩ na njũĩ-inĩ na mũthiũrũrũko ũcio ũgathiĩ na mbere gwĩcokera. Jehova aathondekire mũthiũrũrũko ũcio nĩguo hĩndĩ ciothe thĩ ĩgakorũo na maĩ, ũndũ ũrĩa wonanagia atĩ nĩ mũũgĩ na nĩ arĩ hinya.—Ayub. 36:27, 28. w20.05 22 ¶6

Jesu aatwĩkĩrire ngoro tũthiĩ na mbere kũhoya tũheo roho mũtheru. (Luk. 11:9, 13) Kũgerera roho wake mũtheru, Jehova nĩ atũheaga “hinya ũrĩa ũkĩrĩte wa ndũire.” (2 Kor. 4:7) Tũgĩteithio nĩ roho mũtheru wa Ngai, no tũhote gũkirĩrĩria igerio o rĩothe tũngĩcemania narĩo. Roho mũtheru ningĩ no ũtũteithie kũhingia maũndũ marĩa twĩhokeirũo ũtungata-inĩ wa Jehova na no ũtũteithie kwagagĩria ũhoti ũrĩa tũrĩ naguo. Nĩ tũĩ atĩ moimĩrĩro mega marĩa tũgĩaga namo ũtungata-inĩ wa Jehova, mahotekaga tu nĩ ũndũ wa ũteithio wa roho mũtheru wa Ngai. No tuonanie atĩ nĩ tuonaga roho mũtheru ũrĩ kĩndũ kĩa bata na njĩra ya kũhoya Jehova atũhe roho ũcio nĩguo ũtũteithie kũmenya kana tũrĩ na meciria kana merirĩria matarĩ mega ngoro-inĩ citũ. (Thab. 139:23, 24) Tũngĩhoya Jehova atũteithie na njĩra ĩyo, no atũteithie kũgerera roho wake kũmenya mwĩcirĩrie kana mĩerekera mĩũru tũngĩkorũo nayo. Ningĩ nĩ twagĩrĩirũo kũhoya tũheo roho mũtheru ũtũhe hinya wa kũregana na maũndũ macio. Tũngĩka ũguo, no tuonanie atĩ nĩ tũtuĩte itua rĩa gwĩthema ũndũ o wothe ũngĩtũma Jehova age gũtũhe roho wake mũtheru.—Ef. 4:30. w20.05 28-29 ¶10-12

Rĩrĩa twatetera rĩĩtwa rĩa Jehova, tũkoragwo tũkĩĩgerekania na kĩonereria kĩa Jesu Kristo. Jesu aamenyithanirie rĩĩtwa rĩa Ithe na njĩra ya kũrĩhũthĩra o na ningĩ gũtetera ngumo cia Jehova. Aaragia na njĩra ngũrani na Afarisai arĩa makĩhũthĩra njĩra itiganĩte maatũmaga Jehova oneke arĩ mũũru, mũhinyanĩrĩria, arĩ kũraihu na andũ, na ũtarĩ tha. Jesu nĩ aateithirie andũ kuona Jehova arĩ Ithe witũ ũtwĩciragia, ũrĩ wetereri, wendo, na muohanĩri. Ningĩ nĩ aateithirie andũ kũmenya Jehova kũgerera ũrĩa eegerekanirie biũ na ngumo cia Ithe ũtũũro-inĩ wake wa o mũthenya. (Joh. 14:9) O ta Jesu, no twĩre andũ arĩa angĩ maũndũ marĩa tũĩ megiĩ Jehova tũmateithie kũmenya atĩ Jehova nĩ Ngai ũrĩ ũtugi na wendo. Rĩrĩa tũreka ũguo, nĩ tũguũragia maheeni marĩa marĩtio kwerekera Jehova. Nĩ twamũraga rĩĩtwa rĩa Jehova tũgatũma andũ marĩone rĩrĩ itheru ngoro-inĩ na meciria-inĩ mao. Kũgerera ciugo na ciĩko citũ nĩ tũrekaga andũ mone ũrĩa Jehova atariĩ kũna. Nĩ tũtetagĩra rĩĩtwa rĩu, na njĩra ya gũteithia andũ kũmenya ũhoro wa ma wĩgiĩ Ngai. w20.06 6 ¶17-18

Ũrĩa kũrĩ nĩ atĩ no tũhũthĩre social media na njĩra njega, kwa ngerekano, kwaranĩria na andũ a famĩlĩ na arata. No hihi nĩ wonete atĩ maũndũ mamwe marĩa andũ mekagĩra thĩinĩ wa social media makoragwo marĩ ma kwĩyonania? Nĩ ta makoragwo makĩũria andũ, “Mũranyona atĩa?” Andũ amwe o na nĩ mandĩkaga maũndũ matagĩrĩire megiĩ mbica ciao kana mbica iria andũ angĩ mekĩrĩte. Ũndũ ũcio nĩ ngũrani na ngumo iria Akristiano mekĩragwo ngoro makũrie ta wĩnyihia na tha. (1 Pet. 3:8) Angĩkorũo nĩ ũhũthagĩra social media, wĩyũrie ũũ: ‘Hihi maũndũ marĩa nyandĩkaga, mbica kana video iria njĩkagĩra ho no itũme andũ mone ta ndĩretĩa? Hihi no itũme andũ arĩa angĩ maigue ũiru?’ Akristiano matingĩenda kwĩyonania atĩ nĩ a bata mũno. Marũmagĩrĩra ũtaaro wa Bibilia ũrĩa ũrĩ rĩandĩko-inĩ rĩa ũmũthĩ. Wĩnyihia nĩ ũrĩtũteithagia gwĩthema mwerekera wa andũ a thĩ wa kwĩyona tũrĩ andũ a bata mũno.—1 Joh. 2:16. w20.07 6 ¶14-15

Mũtũmwo Paulo atanatuĩka mũrutwo wa Kristo, aarĩ mũndũ mwĩthĩ ũtaarĩ gĩtĩo na nĩ aanyariraga arũmĩrĩri a Jesu. (Atũm. 7:58) Jesu we mwene nĩwe wagiririe Paulo ũrĩa wetagwo Saulu kũnyarira kĩũngano gĩa Gĩkristiano. Jesu arĩ kũrĩa igũrũ nĩ aarĩirie Paulo na agĩtũma atuĩke mũtumumu. Nĩguo Paulo ahote kuona rĩngĩ, no mũhaka angĩacaririe ũteithio kuuma harĩ andũ arĩa aanyariraga. Nĩ eetĩkĩrire arĩ na wĩnyihia ũteithio wa mũrutwo wetagwo Anania, ũrĩa wamũhonirie akĩhota kuona rĩngĩ. (Atũm. 9:3-9, 17, 18) Thutha ũcio Paulo nĩ aatuĩkire mũndũ ũĩkaine mũno kĩũngano-inĩ gĩa Gĩkristiano, ĩndĩ ndaariganĩirũo nĩ maũndũ marĩa eerutĩte kuuma harĩ Jesu rĩrĩa aarĩ njĩra-inĩ erekeire Dameski. Paulo aatũũrire arĩ mwĩnyihia, na nĩ eetĩkagĩra ũteithio ũrĩa aaheagwo nĩ aarĩ na ariũ a Ithe witũ. Ooigire atĩ maarĩ ‘ũteithio wa kũmwĩkĩra hinya.’—Kol. 4:10, 11, kohoro ka magũrũ-inĩ. w20.07 18-19 ¶16-17

O na gũtuĩka Jehova nĩ Mwene-Hinya-Wothe, nĩ ehokagĩra andũ arĩa angĩ mawĩra. Kwa ngerekano, nĩ amũrĩte Jesu atuĩke Mũthamaki wa Ũthamaki wake, na nĩ akahee andũ 144,000 arĩa magaathana hamwe na Jesu hinya wa gwathana na gĩkĩro kĩna. Ũrĩa kũrĩ nĩ atĩ, Jehova nĩ aambire kũmenyeria Jesu nĩguo atuĩke Mũthamaki na Mũthĩnjĩri-Ngai Ũrĩa Mũnene. (Ahib. 5:8, 9) Ningĩ nĩ amenyagĩria arĩa magathana na Jesu, no amehokera wĩra ndacokaga kũmeera ũrĩa megwĩka nginya tũmaũndũ-inĩ tũnini tũnini. Handũ ha ũguo, ehokaga atĩ nĩ megwĩka wendi wake. (Kũg. 5:10) Angĩkorũo Ithe witũ wa igũrũ ũrĩa ũtabataraga ũteithio wa mũndũ o na ũrĩkũ nĩ ehokagĩra andũ arĩa angĩ mawĩra-rĩ, githĩ tũtikĩagĩrĩirũo o na makĩria gwĩka take! Kwa ngerekano-rĩ, hihi ũrĩ kĩongo gĩa famĩlĩ kana mũthuri wa kĩũngano? Wĩgerekanie na kĩonereria kĩa Jehova harĩ kwĩhokera andũ arĩa angĩ mawĩra na wĩtheme kũmeera ũrĩa megwĩka nginya tũmaũndũ-inĩ tũnini tũnini. Wegerekania na Jehova, andũ nĩ marĩhotaga kũruta mawĩra marĩa wamehokera, na makĩria ma ũguo nĩ ũrĩmenyagĩria arĩa angĩ na ũkamateithia gũkorũo na ũmĩrĩru wa kũruta wĩra ũcio.—Isa. 41:10. w20.08 9-10 ¶5-6

Jehova endaga tũkorũo na mawoni marĩkũ kwerekera ngʼondu ciake iria ciũrĩte? Jesu nĩ aatũigĩire kĩonereria gĩa kũrũmĩrĩra. Nĩ aamenyaga atĩ ngʼondu ciothe cia Jehova ciarĩ cia bata maitho-inĩ make, na kwoguo nĩ eekire ũrĩa wothe angĩahotire nĩguo ateithie “ngʼondu iria ciũrĩte cia nyũmba ya Isiraeli” icokerere Jehova. (Mat. 15:24) Ningĩ Jesu arĩ mũrĩithi ũrĩa mwega, nĩ eekire ũrĩa wothe angĩahotire nĩguo hatikagĩe ngʼondu ya Jehova ĩkũra. (Joh. 6:39) Mũtũmwo Paulo nĩ eekĩrire ngoro athuri a kĩũngano kĩa Efeso megerekanie na kĩonereria kĩa Jesu. Aameerire ũũ: “Mũteithagie arĩa matarĩ na hinya na no mũhaka mũririkanage ciugo cia Mwathani Jesu, hĩndĩ ĩrĩa we mwene ooigire ũũ: ‘Kũheana nĩ kũrĩ gĩkeno kĩnene gũkĩra kwamũkĩra.’” (Atũm. 20:17, 35) Rĩandĩko rĩu rĩronania atĩ athuri a kĩũngano marĩ na wĩra wa bata wa kũrũmbũiya andũ a Jehova. Mũthuri ũmwe wa kĩũngano wĩtagwo Salvador kuuma Spain ooigire ũũ: “Rĩrĩa ndeciria ũrĩa Jehova arũmbũyagia na njĩra nene ngʼondu ciake iria ciũrĩte, ũndũ ũcio nĩ ũnjĩkĩraga ngoro gwĩka ũrĩa wothe ingĩhota nĩguo ndeithie arĩa meherete rũũru-inĩ. Ndĩna ma atĩ Jehova nĩ endaga ndĩmarũmbũiye.” w20.06 23 ¶15-16

Jehova nĩ ageterera mũthia wa mĩaka ĩrĩa ngiri ategũthethũka, rĩrĩa andũ magaatuĩka akinyanĩru. Mbere ya hĩndĩ ĩyo ĩkinye, Jehova no agaathiĩ na mbere gũtuohera mehia maitũ. Kwoguo nĩ twagĩrĩirũo kũrũmĩrĩra kĩonereria gĩake, na njĩra ya kũroraga ngumo njega cia andũ arĩa angĩ na kũmakirĩrĩria. Jesu na araika nĩ maakenire mũno rĩrĩa thĩ yombirũo. No ta wĩcirie ũrĩa magaakorũo na gĩkeno mona thĩ ĩiyũrĩte andũ akinyanĩru, mendete Jehova na maramũtungatĩra. Ningĩ ta wĩcirie gĩkeno kĩrĩa arĩa makoima gũkũ thĩ mathiĩ igũrũ magaathane hamwe na Kristo magaakorũo nakĩo mona ũrĩa wĩra wao ũgunĩte andũ gũkũ thĩ. (Kũg. 4:4, 9-11; 5:9, 10) Ningĩ ta hũũra mbica ũgĩtũũra hĩndĩ ĩrĩa andũ makaarĩraga maithori ma gĩkeno, rĩrĩa mĩrimũ, kĩeha, na gĩkuũ itagaacoka gũkorũo kuo rĩngĩ. Kamũira ihinda rĩu rĩkinye, tua itua rĩa kwĩgerekania na Ithe witũ ũrĩ wendo, ũũgĩ, na wetereri. Weka ũguo nĩ ũgũtũũria gĩkeno, o na wacemania na moritũ mahaana atĩa. (Jak. 1:2-4) Nĩ tũcokagĩria Jehova ngatho nĩ ũndũ wa kĩĩranĩro gĩake gĩa atĩ “nĩ gũkaariũkio andũ.”—Atũm. 24:15. w20.08 19 ¶18-19

Bibilia nĩ kĩheo kĩa wendo kuuma kũrĩ Ngai. Ithe witũ wa igũrũ aatongoririe andũ kwandĩka Bibilia tondũ nĩ atwendete mũno. Jehova akĩhũthĩra Bibilia nĩ acoketie ciũria iria cia bata mũno tũngĩyũragia ta: Tuoimire kũ? Muoroto wa ũtũũro nĩ ũrĩkũ? Ihinda rĩrĩa rĩroka rĩgaakorũo rĩhaana atĩa? Jehova nĩ endaga andũ othe mamenye macokio ma ciũria icio, na nĩkĩo kwa ihinda rĩa mĩaka mĩingĩ ahũthĩrĩte andũ gũtaũra Bibilia na thiomi nyingĩ. Ũmũthĩ, Bibilia nĩ yonekaga ĩrĩ yothe kana icunjĩ ciayo na makĩria ma thiomi 3,000. Bibilia nĩrĩo ibuku rĩrĩa rĩanataũrũo na thiomi nyingĩ na rĩgakinyĩra andũ aingĩ thĩinĩ wa historĩ. No tuonanie atĩ nĩ tũcokagia ngatho nĩ ũndũ wa Bibilia na njĩra ya kũmĩthomaga o mũthenya, gwĩcũrania maũndũ marĩa ĩrutanĩte, na gwĩka ũrĩa wothe tũngĩhota kũhũthĩra maũndũ marĩa tweruta. Ningĩ no tuonanie ngatho citũ harĩ Ngai na njĩra ya gwĩka ũrĩa wothe tũngĩhota kũhunjĩria andũ aingĩ o ũrĩa tũngĩhota ndũmĩrĩri ĩrĩa ĩkoragwo thĩinĩ wa Bibilia.—Thab. 1:1-3; Mat. 28:19, 20. w20.05 24-25 ¶15-16

Andũ arĩa mũnabii Jeremia eerĩtwo akahunjĩrie matiamũthikagĩrĩria. Hĩndĩ ĩmwe nĩ aaiguĩte akuĩte ngoro mũno nginya agĩĩciria gũtiga kũhunjia. No ndaatigire. Nĩkĩ? “Kiugo kĩa Jehova” gĩatariĩ ta mwaki thĩinĩ wa Jeremia na ndangĩahotire gũkĩhingĩrĩria! (Jer. 20:9) Na ũguo nĩguo gũthiaga harĩ ithuĩ rĩrĩa tweruta Kiugo kĩa Ngai na kĩyo. Ũcio nĩ ũndũ ũngĩ wagĩrĩirũo gũtũma tũthomage Bibilia o mũthenya, na tũgecũrania ũhoro wayo. Tweka ũguo, gĩkeno gitũ nĩ kĩrĩthiaga na mbere kuongerereka na no tũkorũo na moimĩrĩro mega ũtungata-inĩ. (Jer. 15:16) Kwoguo rĩrĩa waigua ũkuĩte ngoro thaitha Jehova ũmwĩre agũteithie. Nĩ arĩgũteithagia kũhiũrania na mahĩtia, mawathe maku, kana mũrimũ. Nĩ arĩgũteithagia gũkorũo na mawoni marĩa magĩrĩire megiĩ mĩeke ya ũtungata. Na nĩ arĩgũteithagia gũkorũo na mawoni marĩa magĩrĩire megiĩ ũtungata waku. Makĩria ma ũguo, itũrũragĩra Ithe witũ wa igũrũ maũndũ marĩa maratũma ũtangĩke. No ũtoorie gũkua ngoro ũrĩ na ũteithio wake. w20.12 27 ¶20-21

Harĩ aarĩ a Ithe witũ amwe, mĩcemanio ĩkoragwo ĩrĩ mweke mwega wa gũcemania na Akristiano arĩa angĩ. Kwoguo nĩ twagĩrĩirũo kũhũthĩra mahinda macio kũmanyita ũgeni, kwaria nao, na kũmonia biũ atĩ nĩ tũmarũmbũyagia. O ta Jesu nĩ twagĩrĩirũo kwĩrutanĩria kũhũthagĩra mahinda hamwe na aarĩ a Ithe witũ. (Luk. 10:38-42) No tũmanyite ũgeni tũrĩanĩre hamwe nao, kana tũkorũo nao maũndũ-inĩ ma gwĩkenia. Rĩrĩa tweka ũguo, nĩ twagĩrĩirũo gũtigĩrĩra atĩ ndeereti itũ nĩ ya gwaka. (Rom. 1:11, 12) Athuri a kĩũngano nĩ magĩrĩirũo gũkorũo na mwerekera ta ũrĩa Jesu aarĩ naguo. Nĩ aamenyaga atĩ andũ amwe nĩ mangĩaritũhĩirũo nĩ ũndũ wa gũkorũo matarĩ thĩinĩ wa kĩhiko, no nĩ oonanirie wega atĩ gĩkeno kĩa ma na gĩa gũtũũra gĩtiumanaga na mũndũ gũkorũo arĩ thĩinĩ wa kĩhiko kana gũkorũo na ciana. (Luk. 11:27, 28) Handũ ha ũguo, gĩkeno gĩa gũtũũra kiumanaga na kũiga ũtungata wa Jehova mbere. (Mat. 19:12) Athuri a kĩũngano nĩ mabatiĩ kũrũmbũyania na aarĩ a Ithe witũ o ta ũrĩa marũmbũyanagia na aarĩ a nyina kana manyina mao. Ningĩ nĩ mabatiĩ kũhũthĩra mahinda kwaria na aarĩ a Ithe witũ mbere kana thutha wa mĩcemanio. w20.09 21-22 ¶7-9

Thĩinĩ wa Isiraeli, arĩmi maahandaga irio kĩndũ mweri-inĩ wa Ĩpuro na makagetha kĩndũ mweri-inĩ wa Oktomba kana Novemba. (Mar. 4:28) Nĩ ũndũ wa ũũgĩ kwĩgerekania na arĩmi ũhoro-inĩ wĩgiĩ wetereri. No ũndũ ũcio ti mũhũthũ. Kaingĩ andũ mendaga kuona moimĩrĩro ma wĩra wao o rĩo. No angĩkorũo nĩ tũrenda mũgũnda witũ ũrute maciaro no mũhaka tũikare tũkĩũrũmbũyagia na njĩra ya kũũrĩma, kũũhanda, kũũrĩmĩra, na kũũitĩrĩria maĩ. O na wĩra wa gũtua andũ arutwo nĩ ũbataraga kĩyo gĩa gũthiĩ na mbere. Ihinda nĩ rĩbataranagia nĩguo tũrute arutwo aitũ kwaga mũthutũkanio na kwenda andũ. Gũkorũo na wetereri nĩ kũrĩtũteithagia kwaga gũkua ngoro rĩrĩa twacemania na moritũ. O na rĩrĩa andũ mamũkĩra ũhoro mwega na njĩra njega, tũrabatara gũkorũo na wetereri. Tũtingĩtindĩkĩrĩria mũrutwo wa Bibilia akorũo na wĩtĩkio. Rĩmwe na rĩmwe, o na arutwo a Jesu nĩ maagaga kũnyita na ihenya maũndũ marĩa aarutanaga. (Joh. 14:9) Rekei tũririkanage atĩ, o na rĩrĩa twahanda na twaitĩrĩria maĩ, Jehova nĩwe ũkũragia.—1 Kor. 3:6. w20.09 11 ¶10-11

Wendi witũ ithuothe nĩ arutwo aitũ makũre kĩĩroho nginya makinyĩrĩre kũbatithio. Njĩra ĩmwe nene tũngĩmateithia nayo nĩ kũmekĩra ngoro gũthiaga mĩcemanio. Kaingĩ arutwo arĩa mambagĩrĩria gũthiĩ mĩcemanio o rĩo thutha wa kwambĩrĩria kwĩruta nĩ makũraga na ihenya kĩĩroho. Ahunjia amwe nĩ mataaragĩria arutwo ao atĩ nĩ harĩ maũndũ maingĩ mangĩĩruta mĩcemanio-inĩ matangĩĩruta wĩruti-inĩ wao. Thoma Ahibirania 10:24, 25 hamwe na mũrutwo waku na ũmũtaarĩrie atĩ nĩ ekũgunĩka mũno nĩ ũndũ wa gũthiĩ mĩcemanio. No ũmũtaarĩrie ũkenete kaũndũ ũrerutire mũcemanio-inĩ. Ũndũ ũcio no ũtũme ende gũthiĩ gũkĩra o kũmwĩra athiĩ mĩcemanio. Maũndũ marĩa mũrutwo waku ekwĩyonera athiĩ mũcemanio riita rĩa mbere, makĩrĩte ũndũ ũngĩ o wothe aneyonera mĩcemanio-inĩ ya ndini iria ingĩ. (1 Kor. 14:24, 25) Nĩ egũcemania na andũ angĩ maigĩte kĩonereria kĩega angĩĩgerekania nakĩo, arĩa mekũmũteithia gũthiĩ na mbere nginya abatithio. w20.10 10-11 ¶14-15

Roho mũtheru nĩ ũrĩgũteithagia kũhũthĩra maũndũ marĩa ũrathoma na ũkeruta Kiugo-inĩ kĩa Ngai. Hoyaga o ta mwandĩki wa thaburi ũrĩa wahoire ũũ: “Atĩrĩrĩ Jehova, nduta ũhoro wĩgiĩ njĩra yaku. Niĩ ndĩrĩrũmagĩrĩra ũhoro waku wa ma. He ngoro ĩtagayũkanĩte nĩguo ndĩtigagĩre rĩĩtwa rĩaku.” (Thab. 86:11) Kwoguo thiĩ na mbere kũrĩa irio cia kĩĩroho iria Jehova aratũhe kũgerera Kiugo gĩake na ithondeka rĩake. Muoroto waku ndwagĩrĩirũo gũkorũo ũrĩ o kũgĩa ũmenyo. Nĩ wagĩrĩirũo gwĩtĩkia biũ maũndũ marĩa ũreruta na kũmahũthĩra ũtũũro-inĩ waku. Roho mũtheru wa Jehova nĩ ũrĩgũteithagia gwĩka ũguo. Ningĩ nĩ wagĩrĩirũo gwĩkĩra hinya aarĩ na ariũ a Ithe witũ. (Ahib. 10:24, 25) Nĩkĩ? Tondũ tũrĩ a famĩlĩ ĩmwe ya kĩĩroho. Hoyaga Ngai akũhe roho wake mũtheru nĩguo ũkahota kũruta macokio ma kuuma ngoro mĩcemanio-inĩ, na ũkahota kũhingia gacunjĩ karĩa ũheetwo na njĩra njega. Rĩrĩa weka ũguo nĩ wonagia Jehova na Mũrũwe atĩ nĩ wendete “ngʼondu” ciao. (Joh. 21:15-17) Kwoguo thikagĩrĩria Mũrutani Waku Ũrĩa Mũnene na njĩra ya kũhũthĩra irio nyingĩ cia kĩĩroho iria atũheaga. w20.10 24-25 ¶15-17

Jesu eekĩire arutwo ake maũndũ na njĩra ĩrĩkũ hĩndĩ ĩyo moorĩtwo nĩ hinya? Ihinda inini thutha wake kũriũkio, Jesu eerire andũ amwe arĩa maamũrũmagĩrĩra ũũ: “Mũtigetigĩre! Thiĩi mũkeere ariũ a Awa [atĩ nĩ ndiũkĩtio].” (Mat. 28:10a) Jesu ndaatiganĩirie arutwo ake. Aametire “ariũ a Awa” o na gũtuĩka nĩ maamũtiganĩirie. Jesu nĩ oonanirie tha na akĩohanĩra o ta Jehova. (2 Ath. 13:23) Na njĩra o ta ĩyo, nĩ twagĩrĩirũo gwĩciria mũno igũrũ rĩgiĩ aarĩ na ariũ a Ithe witũ arĩa matigĩte kũhunjia. Nĩ a famĩlĩ itũ ya kĩĩroho, na nĩ tũmendete mũno. Aarĩ na ariũ a Ithe witũ amwe arĩa matigĩte kũhunjia maarĩ na kĩyo kwa ihinda rĩa mĩaka mĩingĩ, na nĩ tũririkanaga maũndũ maingĩ marĩa maahingirie hĩndĩ ĩyo. (Ahib. 6:10) Nĩ twĩriragĩria mũno kuona magĩcokerera kũhunjia! (Luk. 15:4-7) Kwoguo ĩkĩraga ngoro ahunjia arĩa matigĩte kũhunjia mokage mĩcemanio ya kĩũngano. Na rĩrĩa mũndũ ũtigĩte kũhunjia oka Nyũmba-inĩ ya Ũthamaki, nĩ twagĩrĩirũo kuoya ikinya rĩa mbere rĩa kũmũnyita ũgeni tũcanjamũkĩte. w20.11 6 ¶14-17

Jakubu na Johana marĩ na mami wao nĩ maathiire kũrĩ Jesu makĩmwĩra amahe kĩndũ ataarĩ na kĩhooto gĩa kũheana. Atekũrĩa marĩĩgu, Jesu aameerire atĩ no Ithe ũrĩ na kĩhooto gĩa gũtua nũũ ũgaikara mwena wake wa ũrĩo na mwena wa ũmotho Ũthamaki-inĩ. (Mat. 20:20-23) Jesu nĩ oonanirie atĩ nĩ ooĩ mĩhaka yake. Aarĩ mwĩnyihia. Ndarĩ hĩndĩ eekire ũndũ ũrĩa Jehova ataamwĩtĩkĩrĩtie gwĩka. (Joh. 12:49) Tũngĩĩgerekania atĩa na kĩonereria kĩu kĩega kĩa Jesu? Nĩ twĩgerekanagia na kĩonereria kĩa Jesu kĩa wĩnyihia rĩrĩa twarũmĩrĩra ũtaaro wa Bibilia ũrĩa ũrĩ thĩinĩ wa rĩandĩko rĩa ũmũthĩ. Kwoguo hĩndĩ ĩrĩa mũndũ atũhoya ũtaaro, tũtiagĩrĩirũo kũmũtindĩkĩrĩria etĩkĩre mawoni maitũ, kana tũmwĩre ũndũ wa mbere ũrĩa woka meciria-inĩ maitũ. Handũ ha ũguo, twagĩrĩirũo kwerekeria mũndũ thĩinĩ wa ũtaaro ũrĩa ũrĩ thĩinĩ wa Bibilia na mabuku maitũ. Rĩrĩa tweka ũguo, nĩ tuonanagia atĩ nĩ tũĩ mĩhaka itũ. Ũndũ ũcio nĩ wonanagia atĩ tũrĩ enyihia tondũ tũkoragwo tũkĩonania nĩ tũrataũkĩrũo atĩ ũtaaro wa Jehova hingo ciothe ũkoragwo ũrĩ mwega gũkĩra witũ.—Kũg. 15:3, 4. w20.08 11-12 ¶14-15

Ũngĩona atĩ nĩ ũrabatara kũhe mũrata waku ũtaaro-rĩ, nĩ maũndũ marĩkũ wagĩrĩirũo kũririkana? Mbere ya ũthiĩte kũrĩ mũrata waku wĩyũrie ũũ: ‘Hihi nĩ ndĩretua “mũthingu makĩria”?’ Mũndũ mũthingu makĩria, atuagĩra andũ arĩa angĩ na ithimi ciake mwene handũ ha ithimi cia Jehova na ndaiguagĩra andũ arĩa angĩ tha. Angĩkorũo o na thutha wa gwĩthuthuria no ũrona bata wa kwaria na mũrata waku, geria kũmenya wega harĩa thĩna ũrĩ na ũmũrie ciũria cia mawoni nĩguo ũmũteithie one mahĩtia make. Tigĩrĩra atĩ ũtaaro ũrĩa ũkũmũhe wĩhocetie harĩ Maandĩko, ũkĩririkanaga atĩ wee tiwe wagĩrĩirũo kũmũtuĩra no nĩ Jehova. (Rom. 14:10) Wĩhokage ũũgĩ ũrĩa ũkoragwo Kiugo-inĩ kĩa Ngai, na rĩrĩa ũrarũnga mũndũ wĩgerekanagie na Jesu harĩ kuonania ũcayanĩri. (Thim. 3:5; Mat. 12:20) Nĩkĩ? Tondũ Jehova akaahiũrania na ithuĩ o ta ũrĩa tũhiũranagia na andũ arĩa angĩ.—Jak. 2:13. w20.11 21 ¶13

Hihi no wende andũ magũtuĩre tondũ wa rangi wa ngothi yaku, ũrĩa ũthiũ waku ũtariĩ, kana ũrĩa mwĩrĩ waku ũigana? Hatarĩ nganja ndũngĩenda. Na githĩ ti ũndũ wa gwĩkĩra ngoro kũmenya atĩ Jehova ndatũtuagĩra kũringana na maũndũ marĩa andũ monaga na maitho? Kwa ngerekano, rĩrĩa Samueli oonire ariũ a Jesii, ndonire kĩrĩa Jehova oonaga harĩ o. Jehova nĩ eerĩte Samueli atĩ mũriũ ũmwe wa Jesii nĩwe ũngĩatuĩkire mũthamaki wa Isiraeli. No hihi nĩ ũrĩkũ ũngĩatuĩkire mũthamaki? Rĩrĩa Samueli oonire Eliabu, ũrĩa warĩ mũriũ wa irigithathi wa Jesii, ooigire ũũ: “Hatarĩ nganja ũrĩa mũitĩrĩrie maguta wa Jehova arũgamĩte haha mbere yake.” Samueli oonaga Eliabu agĩrĩire gũtuĩka mũthamaki. “No Jehova akĩra Samueli atĩrĩ: ‘Ndũkarore ũrĩa aroneka ahaana na ũraihu wake, tondũ nĩ ndĩmũregete.’” Tũreruta atĩa? Jehova aacokire akiuga ũũ: “Mũndũ aroraga kĩrĩa kĩroneka na maitho, no Jehova aroraga ngoro thĩinĩ.” (1 Sam. 16:1, 6, 7) Nĩ twagĩrĩirũo kwĩgerekania na Jehova tũkĩrũmbũyania na aarĩ na ariũ a Ithe witũ. w20.04 14 ¶1; 15 ¶3

Jesu aageragĩra mĩgũnda-inĩ na no kũhoteke hĩndĩ ĩyo cairi nĩ hĩndĩ yakũraga. (Joh. 4:3-6) Cairi ĩyo yatigĩtie mĩeri ta ĩna nĩguo ĩgethwo. Ũndũ ũrĩa Jesu ooigire no mũhaka akorũo nĩ wagegirie arutwo ake. Ooigire: “Tiirai maitho manyu mũrore mĩgũnda, muone atĩ nĩ yerũhĩte ũndũ ĩngĩgethwo.” (Joh. 4:35, 36) Eendaga kuuga atĩa? Jesu aaragia na njĩra ya ngerekano akĩenda kuonania ũhoro wa gũcokanĩrĩria andũ no ti cairi. Ta wĩcirie ũndũ ũrĩa wakoretwo wahaanĩka. O na gũtuĩka Ayahudi matianyitanagĩra na Asamaria, Jesu aakoretwo ahunjĩria mũtumia Mũsamaria na mũtumia ũcio akĩmũthikĩrĩria. Rĩrĩa Jesu aaragia ũhoro wĩgiĩ mĩgũnda gũkorũo “yerũhĩte ũndũ ĩngĩgethwo,” harĩ andũ kuuma Samaria arĩa maaiguĩte ũhoro wĩgiĩ Jesu kuuma kũrĩ mũtumia ũcio aahunjĩirie mookaga kũrĩ we merute makĩria. (Joh. 4:9, 39-42) Ibuku rĩmwe rĩgĩtaarĩria rũgano rũu riugaga: “Wendi wao mũnene . . . woonanirie atĩ maatariĩ ta irio ikiriĩ kũgethwo.” w20.04 8 ¶1-2

Mĩcemanio itũ nĩ ĩtũteithagia gũtuĩka ahunjia na arutani ega. Kwa ngerekano, nĩ twĩrutaga ũrĩa tũngĩhũthĩra Gathandũkũ Gaitũ ka Indo cia Kũrutana na njĩra ĩrĩ na moimĩrĩro mega. Kwoguo wĩhaaragĩrie wega nĩ ũndũ wa mĩcemanio. Na ũrĩ mĩcemanio-inĩ, thikagĩrĩria na kinyi. Thutha wa mũcemanio, hũthagĩra maũndũ marĩa weruta. Na rĩrĩa weka maũndũ macio, nĩ ũgũtuĩka “mũthigari mwega wa Kristo Jesu.” (2 Tim. 2:3) Ningĩ nĩ tũteithagĩrĩrio nĩ araika aingĩ na makoragwo na hinya mũingĩ mũno. Ta wĩcirie maũndũ marĩa mũraika ũmwe angĩhota gwĩka. (Isa. 37:36) Rĩu ta wĩcirie maũndũ marĩa mbũtũ nene ya araika ĩngĩhota kũhingia. Gũtirĩ mũndũ kana ndaimono ĩngĩhota gũtooria mbũtũ ya Jehova. Ũrĩa kũrĩ nĩ atĩ, ndungata ĩmwe njĩhokeku ya Jehova ĩgĩteithio nĩ Jehova, ĩkoragwo na hinya gũkĩra andũ arĩa matũkararagia o na mangĩkorũo marĩ aingĩ atĩa. (Atiir. 6:16) Ririkanaga ũndũ ũcio rĩrĩa rĩothe werũo kana wekwo ũndũ wa gũkũũraga ngoro nĩ mũndũ mũrutithanagia wĩra nake, mũndũ mũthomaga nake, kana mũndũ wanyu wa famĩlĩ ũtarĩ mwĩtĩkia. Ningĩ ririkana atĩ ndũrarũa mbaara ĩno ũrĩ wiki. Ũrarũa ũgĩtongorio nĩ Jehova. w21.03 29 ¶13-14

No gũkorũo mũtũmwo Paulo aagwetaga ciugo iria irĩ thĩinĩ wa Isaia 22:13, iria cionanagia mwerekera ũrĩa Aisiraeli maarĩ naguo. Handũ ha kwĩrutanĩria gũkuhĩrĩria Ngai, maathingataga maũndũ ma gwĩkenia. Mwerekera wa Aisiraeli watariĩ ta ũrĩa ũkoragwo na andũ aingĩ ũmũthĩ, wa gwĩkenia rĩrĩa marĩ muoyo tondũ no makue hĩndĩ o yothe. Gũkorũo atĩ Jehova no ahote kũriũkia andũ arĩa makuĩte, nĩ kwagĩrĩire kũhutia matua maitũ megiĩ gũthuura arata. Ariũ a Ithe witũ a Korintho nĩ maabataraga kwĩmenyerera nĩguo matikagĩe ũrata na andũ arĩa mateetĩkĩtie ũhoro wĩgiĩ kũriũkio. Ũhoro wao nĩ ũratũruta ũndũ wa bata, atĩ moimĩrĩro no makorũo marĩ moru harĩ ithuĩ tũngĩthuura gũtuĩka arata na andũ arĩa maikaraga mũtũũrĩre o wa gwĩkenia mategwĩciria ũhoro wa mahinda marĩa maroka. Kũhũthĩra mahinda maingĩ na andũ acio no gũthũkie mĩtugo na muonere wa maũndũ wa Mũkristiano. O na no gũtũme ekage maũndũ marĩa Ngai athũire. Nĩkĩo Paulo ooigire ũũ: “Arahũkai meciria-inĩ manyu na njĩra ya ũthingu na mũtikamenyere kwĩhagia.”—1 Kor. 15:33, 34. w20.12 9 ¶3, 5-6

Mũhari ũyũ ũrataarĩria ũrĩa Jehova akoragwo abangĩte famĩlĩ yake kũrĩa igũrũ na gũkũ thĩ. Tondũ nĩwe mũtwe wa famĩlĩ yake, akoragwo na ũnene wothe. Kũgerera mũbango ũcio aigĩte wa ũnene, nĩ akoragwo aheete andũ amwe ũnene na gĩkĩro kĩna, no erĩgagĩrĩra mahũthĩre ũnene ũcio na njĩra ĩrĩa yagĩrĩire. (Rom. 14:10; Ef. 3:14, 15) Jehova nĩ aheete Jesu ũnene wa gũtongoria kĩũngano, no Jesu agĩrĩirũo gũtũrũmbũiya kũringana na ũrĩa Jehova arenda. (1 Kor. 15:27) Ningĩ Jehova nĩ aheete mũthuri ũnene igũrũ rĩgiĩ mũtumia na ciana ciake. Hihi angĩĩruta atĩa gũkorũo arĩ mũtwe mwega wa famĩlĩ? Nĩ agĩrĩirũo kwamba kũmenya maũndũ marĩa Jehova erĩgagĩrĩra eke. Ningĩ nĩ agĩrĩirũo kũmenya kĩrĩa gĩatũmire Jehova aige mũbango ũcio, na makĩria amenye ũrĩa angĩĩgerekania na kĩonereria kĩa Jehova na Jesu. Nĩkĩ ũndũ ũcio nĩ wa bata? Nĩ tondũ Jehova nĩ aheete athuri ũnene na gĩkĩro kĩna na nĩ erĩgagĩrĩra mahũthĩre ũnene ũcio wega.—Luk. 12:48b. w21.02 2 ¶1-3

Nĩ twagĩrĩirũo kwĩgerekania na Jehova na njĩra ya gũthuura kũriganĩrũo nĩ maũndũ mamwe. Kwa ngerekano, Jehova akoragwo na ũhoti mũkinyanĩru wa kũririkana maũndũ, no rĩrĩa twerira nĩ athuuraga gũtuohera na kũriganĩrũo nĩ mahĩtia marĩa tũrekĩte. (Thab. 25:7; 130:3, 4) Jehova endaga twĩke o ta ũguo rĩrĩa andũ arĩa angĩ macũnga mũhera thutha wa gũtũhĩtĩria. (Mat. 6:14; Luk. 17:3, 4) No tuonanie ngatho nĩ ũndũ wa kĩheo kĩa magegania kĩa ũhoti witũ wa gwĩciria na njĩra ya kũhũthĩra meciria maitũ kũgoocithia ũrĩa watũheire ũhoti ũcio. Andũ amwe nĩo metuagĩra wega na ũũru, na kwoguo makahũthĩra meciria mao na njĩra ya mwĩyendo. No tondũ Jehova nĩwe watũmbire, tũtikoragwo na nganja atĩ ithimi ciake nĩcio njega gũkĩra iria tũngĩigĩra ithuĩ ene. (Rom. 12:1, 2) Rĩrĩa twatũũra kũringana na ithimi ciake, nĩ tũgĩaga na thayũ. (Isa. 48:18) Ningĩ nĩ tũmenyaga atĩ, muoroto witũ mũnene ũtũũro-inĩ nĩ kũgoocithia Mũũmbi witũ, o we Ithe witũ na gũtũma ngoro yake ĩkene.—Thim. 27:11. w20.05 23-24 ¶13-14

Tũngĩka atĩa nĩguo tuonie aarĩ na ariũ a Ithe witũ wendo muororo mahinda-inĩ maya? Rĩrĩa twerutanĩria kũmamenya wega, no ũkorũo ũrĩ ũndũ mũhũthũ harĩ ithuĩ gũtaũkĩrũo nĩo na kũmonia wendo muororo. No tũtuĩke arata ao gũtekũmakania kana nĩ akũrũ kana nĩ anini gũtũkĩra, o na kana mareretwo na njĩra ngũrani na ithuĩ. Ririkana atĩ Jonathani aarĩ mũkũrũ gũkĩra Daudi na kĩndũ mĩaka 30, no nĩ aakũririe ũrata wa hakuhĩ hamwe nake. Hihi nĩ harĩ mũndũ mũkũrũ kana mũnyinyi gũgũkĩra kĩũngano-inĩ kĩanyu ũngĩgĩa ũrata hamwe nake? Ũngĩka ũguo, no wonanie atĩ ũrĩ na “wendo harĩ thiritũ yothe ya ariũ a Ithe witũ.” (1 Pet. 2:17) Hihi gũkorũo na wendo muororo kwerekera aarĩ na ariũ a Ithe witũ nĩ kuuga atĩ andũ othe thĩinĩ wa kĩũngano megũkorũo marĩ arata aitũ a hakuhĩ? Aca. Ũndũ ũcio ndũngĩhoteka. Nĩ twĩkoraga tũkĩgucĩrĩrio makĩria nĩ andũ arĩa mendete maũndũ ta marĩa twendete. Jesu eetaga atũmwo ake othe “arata,” no aarĩ na ũrata wa hakuhĩ makĩria na Johana. (Joh. 13:23; 15:15; 20:2) No Jesu ndeekagĩra Johana maũndũ na njĩra ya mwanya gũkĩra acio angĩ.—Mar. 10:35-40. w21.01 23 ¶12-13

Njĩra ĩrĩa mũtũmwo Paulo aahũthĩrire kũhunjĩria andũ a ndũrĩrĩ thĩinĩ wa Athene, tiyo aahũthĩrĩte kũhunjĩria Ayahudi thĩinĩ wa thunagogi. Nĩ aabaarire na kinyi itũũra rĩu rĩao na akĩona maũndũ marĩa andũ meetĩkĩtie. (Atũm. 17:23) Ningĩ Paulo nĩ aarorire maũndũ marĩa mangĩaiguithanĩirie nao megiĩ ũthathaiya wao na ũhoro wa ma ũrĩa ũrĩ Maandĩko-inĩ. Kwoguo Paulo nĩ eehaarĩirie kũgarũrĩra njĩra yake ya kũhunjia. Eerire andũ a Athene atĩ ndũmĩrĩri ĩrĩa aarĩ nayo yoimĩte kũrĩ “Ngai Ũtoĩo,” ũrĩa o maathathayagia. O na gũtuĩka andũ a ndũrĩrĩ matioĩ Maandĩko, Paulo ndeeciririe atĩ matingĩtuĩka Akristiano. Handũ ha ũguo, aamonaga matariĩ ta irio ikũrĩte ũndũ ingĩgethwo, na kwoguo akĩgarũrĩra njĩra yake ya kũhunjia ũhoro ũrĩa mwega. O ta Paulo, baaraga maũndũ. Roraga maũndũ marĩa mangĩgũteithia kũmenya nĩ maũndũ marĩkũ andũ a gĩcigo kĩanyu metĩkĩtie. Hihi mwene nyũmba agemetie mũciĩ kana ngaari yake atĩa? Hihi rĩĩtwa rĩake, mwĩhumbĩre wake kana ciugo ciake no igũteithie kũmenya nĩ wa ndini ĩrĩkũ? w20.04 9-10 ¶7-8