Machi

Ngerekano-inĩ ĩrĩa ĩrĩ thĩinĩ wa Mathayo 25:31-36, “ngʼondu” irũgamĩrĩire andũ athingu arĩa mangĩgaakorũo kuo matukũ-inĩ ma mũthia na marĩ na kĩĩrĩgĩrĩro gĩa gũgaatũũra gũkũ thĩ, na nĩo metagwo arĩa a ngʼondu ingĩ. Nĩ manyitaga mbaru ariũ a Ithe na Kristo marĩ ehokeku. Njĩra ĩrĩa nene mekaga ũguo nayo nĩ kũmateithĩrĩria wĩra-inĩ wa kũhunjia na gũtua andũ arutwo thĩinĩ wa thĩ yothe. (Mat. 24:14; 28:19, 20) O mwaka ciumia cigana ũna mbere ya Kĩririkano, arĩa a ngʼondu ingĩ nĩ manyitaga mbaru ariũ a Ithe na Kristo na njĩra ya kũnyitanĩra kambĩini-inĩ ya thĩ yothe ya gwĩta andũ moke Kĩririkano. Ningĩ nĩ mateithagĩrĩria harĩ gwĩka mĩbango ĩrĩa yothe ĩrabatarania nĩguo Kĩririkano gĩkwo ciũngano-inĩ ciothe thĩinĩ wa thĩ. Arĩa a ngʼondu ingĩ nĩ makenagĩra gũteithĩrĩria ariũ a Ithe na Kristo na njĩra ta icio. Nĩ mamenyaga atĩ Jesu onaga ũndũ o wothe marekĩra arĩa aitĩrĩrie maguta ta arĩ we mwene marekĩra.—Mat. 25:37-40. w22.01 22 ¶11-12

Rĩrĩa twegerekania na ngumo cia Jesu na ũrĩa aarũmbũyanagia na andũ, kwa ngerekano rĩrĩa aaiguĩrĩire tha mũndũ warĩ na mangũ, mũtumia ũrĩa warwarĩte ihinda iraihu, na ũrĩa aacayagĩra andũ arĩa makuĩrĩirũo, tũkoragwo tũkĩĩgerekania na Jehova. (Mar. 1:40, 41; 5:25-34; Joh. 11:33-35) O ũrĩa tũregerekania na Jehova noguo tũmũkuhagĩrĩria o na makĩria. Kũrũmĩrĩra makinya ma Jesu nĩ gũtũteithagia kwaga kũhĩngĩcwo nĩ maũndũ ma thĩ ĩno. Ũtukũ wa mũico wa ũtũũro wa Jesu gũkũ thĩ ooigire ũũ: “Niĩ nĩ ndooretie thĩ.” (Joh. 16:33) Eendaga kuuga atĩ ndeetĩkĩririe mwĩcirĩrie, mĩoroto, kana ciĩko cia andũ a thĩ imũhĩngĩce. Ndaarekire ũndũ o na ũrĩkũ ũmũgirie gũtetera Jehova, ũndũ ũrĩa watũmĩte oke gũkũ thĩ. Ĩ ithuĩ na ithuĩ? Thĩinĩ wa thĩ ĩno kũrĩ na maũndũ maingĩ mangĩtũhĩngĩca. No tũngĩiga meciria maitũ harĩ gwĩka wendi wa Jehova o ta Jesu, o na ithuĩ no tũhote ‘gũtooria thĩ.’—1 Joh. 5:5. w21.04 3-4 ¶7-8

Mũtũmwo Paulo nĩ aamenyaga wega kĩĩranĩro kĩrĩa Jesu eeranĩire atĩ “mũndũ o wothe ũrĩonanagia wĩtĩkio” harĩ Jesu, nĩ “akaagĩa na muoyo wa tene na tene.” (Joh. 3:16; Rom. 6:23) Paulo hatarĩ nganja nĩ ũmwe wa andũ arĩa moonanagia wĩtĩkio harĩ ũkũũri. Aarĩ na ma biũ atĩ Jehova nĩ akoragwo ehaarĩirie kuohera nginya andũ arĩa meka mehia maritũ mangĩĩrira. (Thab. 86:5) Paulo ningĩ nĩ eetĩkĩtie atĩ Ngai nĩ aamwendete mũno tondũ nĩ aamenyaga atĩ Ngai nĩ aarutire Jesu akue nĩ ũndũ wake. Ta rora ciugo cia gwĩkĩra ngoro iria irĩ mũthia-inĩ wa Agalatia 2:20. Paulo ooigire ũũ: “Mũrũ wa Ngai, o we wanyendire na akĩĩneana we mwene nĩ ũndũ wakwa.” Paulo ndeeyonaga arĩ mũũru ũndũ Ngai atangĩmwenda, kana akeĩra ũũ: ‘Nĩ njũĩ Jehova nĩ endete aarĩ na ariũ a Ithe witũ arĩa angĩ, no niĩ ndirona ta angĩnyenda.’ Paulo aaririkanirie Aroma ũũ: “Hĩndĩ ĩrĩa twarĩ ehia, Kristo nĩ aakuire nĩ ũndũ witũ.” (Rom. 5:8) Gũtirĩ ũndũ ũngĩgirĩrĩria Ngai age gũtwenda! Paulo aarĩ na ma biũ atĩ wendo wa Ngai ũkoragwo ũrĩ mũnene. Paulo nĩ aamenyaga ũrĩa Jehova aarũmbũyanĩtie na rũrĩrĩ rwa Isiraeli arĩ na wetereri. w21.04 22 ¶8-10

Teithia mũrutwo waku kwenda Jehova rĩrĩa mũreruta Bibilia nake. Ũngĩka ũguo na njĩra ĩrĩkũ? Na njĩra ya gũcaragia mĩeke kũruta mũrutwo waku ũhoro wĩgiĩ ngumo cia Jehova. Teithia mũrutwo waku kuona atĩ Jehova nĩ Ngai mũkeni na atĩ nĩ ateithagia andũ arĩa mamwendete. (1 Tim. 1:11; Ahib. 11:6) Onia mũrutwo waku atĩ nĩ ekũgunĩka nĩ ũndũ wa kũhũthĩra maũndũ marĩa areruta, na ũmuonie atĩ ũguni ũcio ũronania atĩ Jehova nĩ amwendete. (Isa. 48:17, 18) O ũrĩa mũrutwo waku ekwenda Jehova, noguo ekũigua agĩtindĩkwo gwĩka mogarũrũku marĩa marabatarania. Mũrutwo wa Bibilia no abatare kwĩima nĩguo akũre kĩĩroho na akinyĩrĩre kũbatithio. Arutwo amwe no mabatare kwĩima maũndũ ma kĩĩmwĩrĩ. Angĩ nao no mabatare gũtigana na arata arĩa matendete Jehova. Angĩ nao no matiganĩrio nĩ andũ a famĩlĩ arĩa mathũire Aira a Jehova. Jesu ooigire atĩ andũ arĩa mamũrũmagĩrĩra gũtirĩ hĩndĩ magaaconorithio. Jehova nĩ arĩmarathimaga na njĩra ya kũmahe famĩlĩ ya kĩĩroho ĩrĩ na wendo.—Mar. 10:29, 30. w21.06 4 ¶8-9

Mũtũmwo Paulo aaringithanirie wĩra wa gũtua andũ arutwo na wĩra wa gũkũria mĩmera, akĩonania atĩ kũhanda mbeũ gwiki ti kũiganu. Aaririkanirie Akorintho ũũ: “Niĩ nĩ kũhanda ndahandire, Apolo agĩitĩrĩria maĩ . . . Inyuĩ mũrĩ mũgũnda wa Ngai ũrĩa ũrarĩmwo.” (1 Kor. 3:6-9) Tondũ tũrĩ aruti wĩra thĩinĩ wa “mũgũnda wa Ngai,” to kũhanda tũhandaga mbeũ no nĩ tũciitagĩrĩria maĩ na tũgaikara tũkĩroraga ũrĩa irathiĩ na mbere gũkũra. O ho, nĩ tũtaũkagĩrũo atĩ Ngai nĩwe ũtũmaga mbeũ icio ikũre. Na githĩ ti mweke wa mwanya tũheetwo wa kũhunjia na kũruta andũ arĩa angĩ ũhoro wa ma? Kũruta wĩra ũcio nĩ gũtũmaga tũkorũo na gĩkeno kĩa ma. Mũtũmwo Paulo ũrĩa wateithĩtie andũ aingĩ itũũra-inĩ rĩa Thesalonike gũtuĩka arutwo, aaugire ũũ agĩtaarĩria gĩkeno kĩrĩa aarĩ nakĩo: “Kaĩ kĩĩrĩgĩrĩro gitũ arĩ kĩrĩkũ, kana gĩkeno kana thũmbĩ itũ ya gĩkeno tũrĩ mbere ya Mwathani Jesu hĩndĩ ya gũkorũo kuo gwake? Na githĩ ti inyuĩ? Inyuĩ kũna nĩ inyuĩ riri na gĩkeno gitũ.”—1 Thes. 2:19, 20; Atũm. 17:1-4. w21.07 3 ¶5; 7 ¶17

Jehova nĩwe ũtũgucĩrĩirie ithuothe harĩ we. (Joh. 6:44) Hihi ũguo nĩ kuuga atĩa? Rĩrĩa Jehova aathuthuririe na kinyi andũ bilioni nyingĩ arĩa marĩ thĩinĩ wa thĩ, nĩ oonire ũndũ wa bata harĩ wee, akĩona atĩ ũrĩ na ngoro ĩhaarĩirie kũmwenda. (1 Maũ. 28:9) Jehova nĩ akũũĩ, nĩ ataũkagĩrũo nĩwe, na nĩ akwendete. Na githĩ ũndũ ũcio ti wa gwĩkĩra ngoro mũno! Jehova nĩ akũrũmbũyagia mũno, na ningĩ nĩ arũmbũyagia aarĩ na ariũ a Ithe witũ othe. Nĩguo Jesu onanie ũndũ ũcio, aaringithanirie Jehova na mũrĩithi. Mũrĩithi ekaga atĩa rĩrĩa ngʼondu ĩmwe harĩ rũũru rwa ngʼondu 100 yora? Atigaga ‘icio 99 irĩma-inĩ na agathiĩ gũcaria ĩyo ĩmwe yũrĩte.’ Mũrĩithi ona ngʼondu ĩyo, ndamĩrakaragĩra nĩ ũndũ wa kũũra. Nĩ gũkena akenaga. Tũreruta atĩa? Ngʼondu o yothe nĩ ya bata harĩ Jehova. Jesu ooigire ũũ: “Ũguo noguo Awa ũrĩa ũrĩ igũrũ atangĩenda o na ũmwe wa aya matariĩ ta twana ore.”—Mat. 18:12-14. w21.06 20 ¶1-2

Rĩrĩa twecũrania ũhoro wa wendo mũingĩ ũrĩa Jehova atuonetie, wendo witũ harĩ Jehova nĩ wongererekaga na ũrata witũ hamwe nake ũkarũma makĩria. (Rom. 8:38, 39) Nĩ tũtindĩkagwo kwĩgerekania na kĩonereria kĩa Jesu. (1 Pet. 2:21) Thikũ nini mbere ya Kĩririkano, nĩ tũthomaga na tũgecũrania maandĩko marĩa maragĩrĩria thikũ cia mũico cia Jesu gũkũ thĩ, gĩkuũ gĩake, na kũriũka gwake. Naguo hwaĩ-inĩ wa Kĩririkano, nĩ tũrutagĩrũo mĩario ĩtũririkanagia ũrĩa Jesu aatuonirie wendo. (Ef. 5:2; 1 Joh. 3:16) Rĩrĩa twathoma ũhoro wĩgiĩ kĩonereria kĩa Jesu gĩa kwĩima na twecũrania ũhoro wakĩo, nĩ tũtindĩkagwo “gũthiaga o ta ũrĩa . . . aathiaga.” (1 Joh. 2:6) Nĩ twĩhotoraga o na makĩria gũtũũra wendo-inĩ wa Ngai. (Jud. 20, 21) Tũtũũraga wendo-inĩ wa Ngai na njĩra ya gwĩka ũrĩa wothe tũngĩhota kũmwathĩkĩra, gũtheria rĩĩtwa rĩake, na gũkenia ngoro yake. (Thim. 27:11; Mat. 6:9; 1 Joh. 5:3) Kĩririkano nĩ gĩtũtindĩkaga kwĩhotora o na makĩria gũtũũra o mũthenya na njĩra ĩronania atĩ tũrera Jehova, ‘Nĩ ndĩrenda gũtũũra wendo-inĩ waku tene na tene!’ w22.01 23 ¶17-18; 25 ¶19

Jehova nĩ atũheete kĩheo kĩa wĩyathi wa gwĩthuurĩra. Tũkoragwo na wĩyathi wa gũthuura ũrĩa tũkwenda gwĩka ũtũũro-inĩ witũ. Ngai witũ ũrĩ wendo nĩ akenaga rĩrĩa twathuura kũmũtungatĩra. (Thab. 84:11; Thim. 27:11) No tũhũthĩre wĩyathi witũ wa gwĩthuurĩra na njĩra ĩrĩa yagĩrĩire rĩrĩa tũratua matua. No twĩgerekanie na Jesu na njĩra ya gũthuura kũiga maũndũ ma andũ arĩa angĩ mbere ya maũndũ maitũ ithuĩ ene. Hĩndĩ ĩmwe Jesu na atũmwo ake nĩ maanogete mũno, na magĩthiĩ handũ hahooreru nĩguo mahurũke. No ũndũ ũcio ndwahotekire. Guokire andũ kĩrĩndĩ kĩnene na nĩ meendaga kũrutwo nĩ Jesu. No Jesu ndaarakarire. Handũ ha ũguo, nĩ aaiguĩrĩire andũ acio tha. Kwoguo Jesu eekire atĩa? Bibilia yugaga ũũ: “Akĩambĩrĩria kũmaruta maũndũ maingĩ.” (Mar. 6:30-34) Rĩrĩa twegerekania na Jesu na njĩra ya kũhũthĩra mahinda na hinya witũ gũteithia andũ arĩa angĩ, nĩ tũgoocithagia Ithe witũ wa igũrũ.—Mat. 5:14-16. w21.08 3 ¶7-8

Jehova nĩ akenagio nĩ indo cia mĩthemba ĩtiganĩte. Tũmenyaga ũguo nĩ ũndũ wa indo iria oombire, o hamwe na andũ. Ithuothe tũrĩ ngũrani. Kwoguo Jehova ndakũringithanagia na andũ arĩa angĩ. No ahote gũthoma ngoro yaku. (1 Sam. 16:7) Ningĩ nĩ oĩ maũndũ marĩa ũngĩhota, marĩa ũtangĩhota, na nginya ũrĩa warerirũo. Na nderĩgagĩrĩra wĩke maũndũ marĩa ũtangĩhota gwĩka. Twagĩrĩirũo kwĩgerekania na Jehova na njĩra ya kwĩyona ta ũrĩa atuonaga. Gwĩka ũguo no gũtũteithie gũkorũo na “meciria mega,” tũkaaga kwĩyona tũrĩ a bata gũkĩria njano, kana kwĩyona tũtarĩ kĩene. (Rom. 12:3) Ũrĩa kũrĩ nĩ atĩ, no twĩrute kuumana na aarĩ na ariũ a Ithe witũ arĩa makoragwo na maumĩrĩra mega ũtungata-inĩ. (Ahib. 13:7) Kĩonereria kĩao no gĩtũteithie kwagagĩria njĩra citũ cia kũhunjia. (Afil. 3:17) No nĩ harĩ ngũrani gatagatĩ ga kwĩgerekania na kĩonereria kĩega kĩa mũndũ ũngĩ na kwĩringithania nake. w21.07 20 ¶1-2

No wake wĩtĩkio waku harĩ Mũũmbi na njĩra ya kwĩrorera indo ta nyamũ, mĩmera, na njata. (Thab. 19:1) O ũrĩa ũkwĩruta igũrũ rĩgiĩ maũndũ macio, noguo ũgũkorũo na ma atĩ Jehova nĩwe Mũũmbi. Rĩrĩa ũreruta ũhoro wĩgiĩ ũũmbi, geragia kũrora na kinyi maũndũ marĩa maronania atĩ nĩ kũrĩ Mũũmbi. (Rom. 1:20) Kwa ngerekano, no gũkorũo nĩ ũĩ atĩ o na gũtuĩka riũa nĩ rĩrutaga ũrugarĩ ũrĩa ũteithagia ciũmbe iria irĩ muoyo, ningĩ nĩ rĩkoragwo na mĩrũri ĩngĩthũkĩra ciũmbe icio. Tũrĩ andũ nĩ tũbataraga kũgitĩrũo kuumana na mĩrũri ĩyo, na nĩ tũgitagĩrũo. Na njĩra ĩrĩkũ? Thĩinĩ wa thĩ, nĩ gũkoragwo na rĩera rĩrĩa rĩgiragĩrĩria mĩrũri ĩyo gũtũkinyĩra. O ũrĩa mĩrũri ĩyo ĩrathiĩ ĩkĩhiũhaga, noguo rĩera rĩu rĩthiaga rĩkĩimbaga nĩguo mĩrũri ĩyo ndĩgatũrĩkanie. Na githĩ ũndũ ũcio ndũratũteithia kuona atĩ nĩ kũrĩ Mũũmbi ũrĩa warutire wĩra ũcio na akoragwo arĩ na wendo na ũũgĩ? w21.08 17 ¶9-10

Mũndũ arĩkia kũbatithio, nĩ twagĩrĩirũo gũthiĩ na mbere kũmwenda na kũmũhe gĩtĩo. (1 Joh. 4:20) Tũngĩka ũguo na njĩra ĩrĩkũ? Ũndũ ũmwe tũngĩka nĩ kũmwĩhoka na gwĩtĩkia atĩ aratungatĩra Ngai arĩ na muoroto mwega. Kwa ngerekano, angĩka ũndũ na twage gũtaũkĩrũo nĩguo, tũtiagĩrĩirũo gũtua atĩ ekire ũguo arĩ na muoroto mũũru. Handũ ha ũguo, twagĩrĩirũo kũmũhe gĩtĩo na tũmuone arĩ wa bata gũtũkĩra. (Rom. 12:10; Afil. 2:3) Nĩ twagĩrĩirũo kuonanagia tha na ũtugi kwerekera andũ othe. Angĩkorũo no twende gũkorũo thĩinĩ wa famĩlĩ ya Jehova tene na tene, nĩ twagĩrĩirũo kũhũthagĩra ũtaaro wa Kiugo gĩake ũtũũro-inĩ witũ. Kwa ngerekano, Jesu aarutanire atĩ nĩ twagĩrĩirũo kuonanagia tha na ũtugi kũrĩ andũ othe nginya kũrĩ thũ citũ. (Luk. 6:32-36) Rĩmwe na rĩmwe, no ũkorũo ũtarĩ ũndũ mũhũthũ gwĩka ũguo. Ĩndĩ no tũhote, tũngĩĩruta gwĩkaga na gwĩciria o ta Jesu. Rĩrĩa tweka ũrĩa wothe tũngĩhota gwathĩkĩra Jehova na kwĩgerekania na Jesu, nĩ tuonagia Ithe witũ wa igũrũ atĩ nĩ tũrenda gũkorũo tũrĩ a famĩlĩ yake tene na tene. w21.08 6 ¶14-15

Wĩrute kwĩhokaga Jehova. Eranĩire atĩ nĩ arĩtũrathimaga na njĩra nene twamwĩhoka na tweka ũrĩa wothe tũngĩhota. Bibilia nĩ ĩkoragwo na cionereria cia andũ aingĩ meerutanĩirie biũ ũtungata-inĩ wa Jehova. Aingĩ ao maarathimirũo nĩ Jehova thutha wao gwĩka ũndũ woonanirie atĩ maarĩ na wĩtĩkio harĩ we. Kwa ngerekano, Jehova aarathimire Iburahimu thutha wa gũthaama mũciĩ wake “o na gũtuĩka ndaamenyaga kũrĩa aathiaga.” (Ahib. 11:8) Nake Jakubu aamũkĩrire kĩrathimo kĩa mwanya thutha wa kũgiana na mũraika. (Kĩam. 32:24-30) Na rĩrĩa rũrĩrĩ rwa Isiraeli rwarĩ hakuhĩ kũingĩra Bũrũri-inĩ wa Kĩĩranĩro, andũ maahotire kũringa mũkĩra ũrĩa ũngĩ wa Rũũĩ rwa Jorodani thutha wa athĩnjĩri-Ngai gũtobokia magũrũ mao rũũĩ-inĩ rũu. (Josh. 3:14-16) Ningĩ no ũgunĩke ũngĩthuthuria cionereria cia mahinda maya cia andũ manehoka Jehova na makongerera ũtungata wao. w21.08 29-30 ¶12-14

Inyuĩ aarĩ na ariũ a Ithe witũ akũrũ nĩ mũĩ ũrĩa maũndũ meekagwo na hau kabere, no nĩ muonaga bata wa gũcenjia kũringana na mahinda. Inyuĩ andũ akũrũ arĩa mũrabatithirio ica ikuhĩ, o na inyuĩ mũrĩ ũteithio mũnene. Andũ ethĩ no makene mũngĩmataarĩria maũndũ marĩa mwĩyoneire na marĩa mwĩrutĩte. ‘Mũngĩĩmenyeragia kũheana’ na njĩra ya kũruta andũ arĩa angĩ kuumana na ũmenyeru ũrĩa mũgĩte naguo, Jehova nĩ arĩmũrathimaga na njĩra nene. (Luk. 6:38) O ũrĩa andũ akũrũ maragĩa ũrata na andũ ethĩ, nĩ mahotaga gũteithania. (Rom. 1:12) Othe marĩ na ũndũ mangĩteithania naguo. Andũ akũrũ marĩ na ũũgĩ na ũmenyeru ũrĩa magĩte naguo kwa ihinda rĩa mĩaka mĩingĩ. Nao andũ ethĩ marĩ na hinya na ũhoti. Rĩrĩa andũ akũrũ na ethĩ marutithania wĩra marĩ na ũrata, nĩ magoocithagia Ithe witũ wa igũrũ ũtwendete na magakorũo marĩ kĩrathimo harĩ kĩũngano. w21.09 8 ¶3; 13 ¶17-18

Nĩ kĩĩ gĩatũmire Ayahudi aingĩ mahĩngĩke nĩ ũndũ wa Jesu kũũragĩrũo mũtĩ-inĩ? Kũũragĩrũo mũtĩ-inĩ gwatũmaga mone Jesu ta aarĩ mwĩki-naĩ kana mwĩhia no ti Mesia. (Gũcok. 21:22, 23) Ayahudi arĩa maahĩngĩkire nĩ ũndũ wa gĩkuũ kĩa Jesu, matiataũkĩirũo atĩ ndaarĩ na mahĩtia na atĩ aaigĩrĩirũo thitango cia maheeni na agĩkwo maũndũ matarĩ ma kĩhooto. Andũ arĩa maaciirithirie Jesu matiahũthĩrire kĩhooto. Aciirithania a igooti rĩrĩa inene rĩa Kĩyahudi maacemanirie ihenya ihenya, na mĩtaratara ya gũciirithania ndĩarũmĩrĩirũo. (Luk. 22:54; Joh. 18:24) Handũ ha gũthikĩrĩria ũira ũrĩa waheanagwo wĩgiĩ Jesu matarĩ na mũthutũkanio, o “maacaragia ũira wa maheeni kwerekera Jesu nĩguo mamũũrage.” (Mat. 26:59; Mar. 14:55-64) Na thutha wa Jesu kũriũkio kuuma kũrĩ arĩa akuũ, aciirithania acio mataarĩ kĩhooto nĩ maarĩhire thigari cia Roma iria ciarangagĩra mbĩrĩra yake “icunjĩ nyingĩ cia betha,” nĩguo matheremie ndeto cia maheeni ciĩgiĩ kũriũka kwa Jesu.—Mat. 28:11-15. w21.05 11 ¶12-13

Jehova no aniine mũtabarĩre ũyũ mũũru wa maũndũ hĩndĩ o yothe. No wetereri wake nĩ ũtũteithĩtie mũno. Andũ othe arĩa moimanĩte na Adamu na Hawa maciaragwo matarĩ akinyanĩru. O na kũrĩ ũguo, Jehova no amendete na nĩ amarũmbũyagia, na nĩ eranĩire atĩ nĩ arĩniina mũtabarĩre ũyũ mũũru wa maũndũ. (1 Joh. 4:19) Na nĩ abangĩte mũthenya ũrĩa akaniina mathĩna marĩa mothe andũ macemanagia namo. Na githĩ wendo wake ndũbatiĩ gũtũma tũkirĩrĩrie hamwe nake nginya mũico? Jehova nĩ aigĩte kĩonereria kĩega mũno kĩa ũkirĩrĩria. Jesu nĩ eegerekanagia na Ithe harĩ gũkirĩrĩria. Hĩndĩ ĩrĩa aarĩ gũkũ thĩ nĩ aakirĩrĩirie mĩario mĩũru, gũconorithio, na mũtĩ wa kũnyarirĩrũo nĩ ũndũ witũ. (Ahib. 12:2, 3) Ũkirĩrĩria wa Jehova no mũhaka akorũo nĩ waheire Jesu hinya wa gũkirĩrĩria. O na ithuĩ no ũtũhe hinya wa gũkiragĩrĩria. w21.07 12-13 ¶15-17

O mũthenya nĩ tũgunĩkaga nĩ ũndũ wa tha cia Ithe witũ wa igũrũ. (Thab. 103:10-14) Arũmĩrĩri a Jesu matiarĩ akinyanĩru no nĩ aamonagia tha na akamohera. O na nĩ eerutĩire kũneana muoyo wake nĩguo tuoherũo mehia maitũ. (1 Joh. 2:1, 2) Wendo gatagatĩ-inĩ gaitũ nĩ wongererekaga rĩrĩa ‘tuohanĩra twĩyendeire.’ (Ef. 4:32) Ũrĩa kũrĩ nĩ atĩ, rĩmwe ti ũndũ mũhũthũ kuohera andũ arĩa angĩ na kwoguo no tũbatare kwĩrutanĩria. Mwarĩ wa Ithe witũ ũmwe aaugire atĩ gĩcunjĩ kĩmwe kĩarĩ thĩinĩ wa Mũrangĩri kĩarĩ na kĩongo “Ohanagĩrai Mwĩyendeire,” nĩ kĩamũteithirie kuohanagĩra. Aandĩkire ũũ: “[Gĩcunjĩ kĩu] nĩ gĩataarĩirie atĩ gũkorũo wĩhaarĩirie kuohera arĩa angĩ ti kuuga wĩtĩkĩre mĩtugo yao mĩũru kana ũhũthie ruo rũrĩa ĩrehete. Ĩndĩ kuohera nĩ kuuga weherie marakara o mothe marĩa moimanĩte na mahĩtia ta macio na ũtũũrie thayũ waku.” Rĩrĩa tuohera aarĩ na ariũ a Ithe witũ twĩyendeire, tũkoragwo tũkĩmonia atĩ nĩ tũmendete na nĩ twĩgerekanagia na Ithe witũ Jehova. w21.09 23-24 ¶15-16

Jesu nĩ eendete ma, na ũguo nĩ kuuga ma ĩgiĩ Ngai na mĩoroto yake. Ũtũũro wa Jesu nĩ woonanagia atĩ nĩ eetĩkĩtie ũhoro wa ma, na nĩ aaũmenyithanagia kũrĩ andũ arĩa angĩ. (Joh. 18:37) Arũmĩrĩri a Jesu o nao nĩ mendete ma kuuma ngoro. (Joh. 4:23) Mũtũmwo Petero aaugire atĩ Ũkristiano nĩ “njĩra ya ũhoro ũrĩa wa ma.” (2 Pet. 2:2) Tondũ nĩ meendete ũhoro wa ma mũno, Akristiano a tene nĩ maareganaga na morutani ma kĩĩndini, ũndũire, na mawoni ma andũ marĩa mataatwaranaga na ũhoro wa ma. (Kol. 2:8) O na ũmũthĩ, Akristiano a ma nĩ merutanagĩria ‘gũthiĩ kũringana na ũhoro ũrĩa wa ma,’ na njĩra ya gũtigĩrĩra atĩ maũndũ marĩa mothe metĩkĩtie na marĩa mekaga ũtũũro-inĩ nĩ maratwarana na Kiugo kĩa Jehova. (3 Joh. 3, 4) Aira a Jehova matiugaga atĩ nĩ makoragwo mataũkĩirũo nĩ maũndũ mothe marĩ thĩinĩ wa Bibilia. Kũrĩ hĩndĩ manahĩtia magĩtaarĩria morutani mana thĩinĩ wa Bibilia kana makĩbanga maũndũ thĩinĩ wa kĩũngano. Rĩrĩa mataũkĩrũo wega nĩ ũndũ, nĩ mekaga mogarũrũku marĩa marabatarania. w21.10 21-22 ¶11-12

O ta ũrĩa thingo cia tene ciarigicagĩria matũũra na kũgitĩra aikari a kuo, noguo ciĩko cia Jehova cia wendo mwĩhokeku itũrigicagĩria igatũhe ũgitĩri wa kĩĩroho kuumana na magerio marĩa mangĩthingithia wĩkindĩru witũ. Makĩria ma ũguo, wendo mwĩhokeku wa Jehova nĩ ũtũmaga atũgucĩrĩrie harĩ we. (Jer. 31:3) Daudi nĩ aahũthĩrire ngerekano ĩngĩ gũtaarĩria ũgitĩri ũrĩa andũ a Ngai makenagĩra. Aandĩkire ũũ: “Ngai nĩwe rĩũrĩro rĩakwa irũmu, Ngai o ũcio ũnyonagia wendo mwĩhokeku.” Daudi ningĩ aaugire ũũ igũrũ rĩgiĩ Jehova: “Nĩwe wendo wakwa mwĩhokeku, na mwĩgitio wakwa, nĩwe rĩũrĩro rĩakwa irũmu, na mũhonokia wakwa, ngo yakwa, o ũcio ndĩhithaga harĩ We.” (Thab. 59:17; 144:2) Nĩ kĩĩ gĩatũmire Daudi aringithanie wendo mwĩhokeku wa Jehova na mwĩgitio na rĩũrĩro? Tondũ tũrĩ ndungata cia Jehova, nĩ arĩthiaga na mbere gũtũhe ũgitĩri ũrĩa tũrabatara gũtekũmakania kũrĩa tũikaraga thĩinĩ wa thĩ, nĩguo tũhote kũgitĩra ũrata witũ wa hakuhĩ hamwe nake. w21.11 6 ¶14-15

Rĩrĩa Jesu na arutwo ake maacemanirie na kĩhuhũkanio kĩnene marĩ iria-inĩ, Jesu nĩ aahũthĩrire mweke ũcio kũmateithia mone atĩ nĩ maabataraga gwĩkĩra wĩtĩkio wao hinya. (Mat. 8:23-26) Kĩhuhũkanio kĩu kĩarĩ kĩnene ũndũ gatarũ kaahumbĩragwo nĩ maĩ, no Jesu aarĩ toro. Arutwo ake marĩ na guoya maamũkĩririe na makĩmwĩra amahonokie, nake akĩmarũnga na njĩra ya wendo akĩmeera: “Nĩ kĩĩ kĩratũma mwĩtigĩre ũguo, inyuĩ mũrĩ na wĩtĩkio mũnini?” Hihi harĩ ũndũ mũritũ mũno ũracemania naguo ũtũũro-inĩ? Ũndũ ũcio no ũkorũo ũrĩ gĩcanjama kĩa ndũire. Kana no ũkorũo ũrĩ kĩhuhũkanio kĩa mũhaano, ta hihi mũrimũ mũũru ũratũma ũigue ũritũhĩirũo na ũtarĩ na wa gwĩka. Rĩmwe na rĩmwe no ũigue ũgĩtangĩka mũno, no ndũkarekage mĩtangĩko ĩtũme wage kwĩhoka Jehova. Mũkuhĩrĩrie na njĩra ya kũmũhoyaga kaingĩ. Ĩkĩra wĩtĩkio waku hinya na njĩra ya gwĩcũrania igũrũ rĩgiĩ mahinda marĩa Jehova anagũteithia ihinda ihĩtũku. (Thab. 77:11) Gwĩka ũguo no gũgũteithie gũkorũo na ma atĩ gũtirĩ hĩndĩ agaagũtiganĩria. w21.11 22 ¶7; 23 ¶10

Mũndũ no ecirie atĩ tondũ hihi nĩ emenyagĩrĩra nĩguo ndakoe kĩndũ kĩa mũndũ ũngĩ, nĩ akoretwo agĩathĩkĩra rĩathani rĩu. Ĩndĩ no akorũo akĩiya na njĩra ingĩ. Kwa ngerekano, mũhũũri biacara angĩahũthĩrire ratiri kana ithimi njogomu nĩguo ahĩtithie agũri, angĩakorirũo akĩmaiya na njĩra ĩhithanĩtie. Maũndũ ma Alawii 19:13 yonanagia atĩ kũiya na mĩtugo ĩtarĩ ya wĩhokeku biacara-inĩ nĩ ikuruhanĩte tondũ yugaga: “Ndũkanakungie wara woe kĩndũ kĩa mũndũ ũrĩa ũngĩ.” Kwoguo rĩrĩa mũndũ akungia wara biacara-inĩ yake akoragwo akĩiya. Rĩathani rĩa kanana nĩ rĩakaananĩtie kũiya, no ũhoro ũrĩa ũrĩ thĩinĩ wa Maũndũ ma Alawii no ũtũteithie kuona ũrĩa tũngĩhũthĩra ũtaaro ũrĩa ũrĩ thĩinĩ wa watho ũcio. No tũgunĩke tũngĩĩciria mawoni ma Jehova igũrũ rĩgiĩ kwaga wĩhokeku na kũiya. No twĩyũrie ũũ: ‘Kũringana na ũhoro ũrĩa ũrĩ thĩinĩ wa Maũndũ ma Alawii 19:11-13, hihi nĩ harĩ ũndũ ndĩrabatara kũgarũrĩra ũtũũro-inĩ wakwa? Hihi nĩ ndĩrabatara gwĩka mogarũrũku harĩ njĩra ĩrĩa ndutaga biacara ciakwa nayo?’ w21.12 9-10 ¶6-8

Rĩrĩa ũrahoya Jehova, geria gwĩciria nĩ maũndũ marĩkũ wĩkire ũrĩa gũtagĩrĩire mũthenya ũcio na ũhoe Jehova akuohere. Angĩkorũo nĩ wĩkĩte mehia maritũ nĩ ũkũbatara kũhoya ũteithio nginya kuuma kũrĩ athuri a kĩũngano. Nĩ megũgũthikĩrĩria na makũhe ũtaaro wa wendo kuuma Kiugo-inĩ kĩa Ngai. Nĩ mekũhoya hamwe nawe na morie Jehova akuohere kũgerera igongona rĩa ũkũũri ‘nĩguo ũhone’ kĩĩroho. (Jak. 5:14-16) Ningĩ nĩ ũndũ wa bata gwĩcũranagia igũrũ rĩgiĩ ũkũũri. No gũkorũo nĩ ũiguaga ruo rũingĩ, wecũrania ũrĩa Mũrũ wa Ngai aanyamarĩkire na njĩra nene. Ĩndĩ o ũrĩa ũgwĩcũrania igũrũ rĩgiĩ igongona rĩrĩa Jesu aarutire, noguo wendo waku harĩ we na harĩ Jehova ũkuongerereka o na makĩria. O mwaka ngatho citũ harĩ ũkũũri nĩ ciongererekaga rĩrĩa twathiĩ Kĩririkano-inĩ gĩa gĩkuũ kĩa Jesu, na rĩrĩa twanyita andũ arĩa angĩ ũgeni tũrĩ na kĩyo. Na githĩ ti gĩtĩo kĩnene mũno Jehova atũheete gĩa kũruta andũ igũrũ rĩgiĩ Mũrũwe! w21.04 18-19 ¶13-16

Ta wĩcirie ũrĩa Jesu eekire rĩrĩa andũ kĩrĩndĩ kĩnene maathiire kũrĩ we arĩ kĩrĩma-inĩ. Jesu aararĩte ũtukũ mũgima akĩhoya. No mũhaka akorũo aarĩ mũnogu mũno, no rĩrĩa oonire andũ acio, nĩ aaiguire tha nĩ ũndũ wa arĩa maarĩ athĩni na arwaru gatagatĩ-inĩ kao. Nĩ aamahonirie, na makĩria ma ũguo akĩmarutĩra mĩario ĩrĩa ya gwĩkĩra ngoro mũno yanarutwo, yũĩkaine ta Mahunjio ma Kĩrĩma-inĩ. (Luk. 6:12-20) Jesu ningĩ nĩ aahũthagĩra mahinda na andũ arĩa angĩ o na hĩndĩ ĩrĩa aangĩendire gũkorũo arĩ wiki. Ta geria kũhũũra mbica ũrĩa Jesu aaiguire rĩrĩa aamenyire atĩ mũrata wake Johana Mũbatithania nĩ oragĩtwo. Bibilia yugaga ũũ: “Rĩrĩa Jesu aaiguire [ũhoro wa gĩkuũ kĩa Johana], akiuma kũu na gatarũ, agĩthiĩ kũndũ gũtaarĩ andũ nĩguo akorũo arĩ wiki.” (Mat. 14:10-13) No aakinya kũrĩa aathiaga nĩguo akorũo arĩ wiki, aakorire andũ kĩrĩndĩ kĩnene makinyĩte mbere yake. (Mar. 6:31-33) Nĩ oonire atĩ nĩ maabataraga kũigua maũndũ ma kĩĩroho, na o na ihenya akĩmateithia.—Luk. 9:10, 11. w22.02 21 ¶4, 6

Twagĩrĩirũo gwĩka atĩa tũngĩmenya atĩ nĩ tũtuurithĩtie mũrũ kana mwarĩ wa Ithe witũ? Twagĩrĩirũo kũhoya Jehova na kĩyo. No tũmũhoe arathime kĩyo gitũ gĩa gũcokia thayũ na mũrũ kana mwarĩ wa Ithe witũ tũrĩ na ũndũ nake. Ningĩ nĩ twagĩrĩirũo gwĩthuthuria ithuĩ ene. No twĩyũrie ciũria ta ici: ‘Hihi nĩ ndĩhaarĩirie gwĩtĩkĩra mahĩtia makwa, njũnge mũhera na thondeke thayũ? Jehova na Jesu mangĩigua atĩa ingĩoya ikinya rĩa mbere rĩa gũthondeka thayũ hamwe na mũrũ kana mwarĩ wa Ithe witũ?’ Macokio maitũ no matũme twende gũthikĩrĩria Jesu, na tũrĩ na wĩnyihia twaranĩrie na mũrũ kana mwarĩ wa Ithe witũ nĩguo tũthondeke thayũ. Rĩrĩa twathiĩ kũrĩ mũrũ kana mwarĩ wa Ithe witũ nĩguo tũthondeke thayũ, twagĩrĩirũo gũkorũo tũrĩ enyihia. (Ef. 4:2, 3) Twagĩrĩirũo gũthiĩ kũrĩ ũrĩa tũtuurithĩtie tũrĩ na muoroto wa kũmũhooreria nĩ ũndũ wa ruo rũrĩa angĩkorũo akĩgerera. Ririkana atĩ gũcokia thayũ hamwe na mũrũ kana mwarĩ wa Ithe witũ nĩ kwa bata gũkĩra kũmenya nũũ ũhĩtĩtie na nũũ ũtahĩtĩtie.—1 Kor. 6:7. w21.12 25-26 ¶13-16

Jesu aarĩ na ruo rwa ngoro, tondũ nĩ aamenyaga atĩ andũ aingĩ thĩinĩ wa Jerusalemu matiehaarĩirie kwamũkĩra ndũmĩrĩri ya Ũthamaki. Tondũ wa ũguo, Jerusalemu nĩ ĩngĩanangirũo, na Mũyahudi o wothe ũngĩahonokire nĩ angĩatwarirũo ithamĩrio. (Luk. 21:20-24) Ũndũ wa kĩeha nĩ atĩ, o ta ũrĩa Jesu aaugĩte, andũ aingĩ nĩ maamũregire. Hihi kũrĩa ũikaraga andũ mamũkagĩra atĩa ndũmĩrĩri ya Ũthamaki? Angĩkorũo no andũ anini mathikagĩrĩria ũhoro wa ma-rĩ, ũngĩĩruta atĩa kuumana na ũrĩa Jesu aarĩrĩire aikari a Jerusalemu? Jehova nĩ arũmbũyagia andũ. Maithori ma Jesu matũririkanagia ũrĩa Jehova arũmbũyagia andũ. Bibilia yugaga: “Ndendaga mũndũ o na ũmwe akaaniinwo no endaga othe merire.” (2 Pet. 3:9) Ũmũthĩ, tuonanagia atĩ nĩ twendete andũ rĩrĩa twerutanĩria kũmateithia merute ũhoro mwega wa Ũthamaki.—Mat. 22:39. w22.01 16 ¶10-12

Wĩtĩkio waku nĩ ũrĩgĩaga na hinya makĩria wecũrania maũndũ marĩa Jehova eekĩire andũ ake, na marĩa agwĩkĩire. O na kũrĩ ũguo, ũndũ ũrĩa wa bata makĩria nĩ atĩ wendo waku harĩ Jehova nĩ ũrĩongererekaga. Gũkĩra ngumo ĩngĩ o yothe, wendo nĩ ũrĩgũteithagia gwathĩkĩra Jehova, kwĩima nĩguo ũmũkenie, na gũkirĩrĩria magerio. (Mat. 22:37-39; 1 Kor. 13:4, 7; 1 Joh. 5:3) Gũtirĩ kĩndũ gĩkĩrĩte kũgĩa na ũrata mwega na wa hakuhĩ hamwe na Jehova! (Thab. 63:1-7) Ririkanaga atĩ ũthathaiya witũ nĩ ũhutĩtie kũhoya, kwĩruta, na gwĩcũrania. O ta Jesu, caragia kũndũ kũhooreru rĩrĩa ũrenda kũhũthĩra mahinda hamwe na Jehova. Wĩtheme maũndũ marĩa mangĩkũhĩngĩca. Hoya Jehova agũteithie gũkindĩria meciria rĩrĩa ũreka maũndũ ma kĩĩroho. Ũngĩhũthagĩra mahinda wega ihinda-inĩ rĩrĩ, Jehova nĩ agaakũrathima ũkenere ũtũũro tene na tene thĩinĩ wa thĩ njerũ ya Ngai.—Mar. 4:24. w22.01 30-31 ¶18-20

Meciria maitũ nĩ mahutagia ciĩko citũ. Nĩkĩo Jesu aatũrutire tũreganage na mwĩcirĩrie ũngĩtũma twĩke mehia maritũ. (Mat. 5:21, 22, 28, 29) Hatarĩ nganja nĩ twendete gũkenia Ithe witũ wa igũrũ. Na githĩ ndũkĩrĩ ũndũ wa bata kũregana o na ihenya na meciria moru rĩrĩa moka hakiri-inĩ citũ? Jesu aaugire ũũ: “Maũndũ marĩa mothe moimaga kanua makoragwo moimĩte ngoro-inĩ.” (Mat. 15:18) Maũndũ marĩa twaragia nĩ monanagia ũrĩa tũtariĩ ngoro-inĩ. Kwoguo wĩyũrie: ‘Hihi nĩ ndĩthemaga kũheenania o na angĩkorũo kwaria ma nĩ gũgũtũma nyingĩre thĩna-inĩ? Angĩkorũo ndĩ thĩinĩ wa kĩhiko-rĩ, hihi nĩ ndĩmenyagĩrĩra nĩguo ndigathaakĩre mũndũ ũngĩ kĩĩwendo? Hihi nĩ ndĩĩthemaga biũ mĩario mĩũru? Hihi mũndũ angĩndakaria nĩ ndĩmũcokagĩria na njĩra ya ũhooreri?’ Gwĩcũrania ciũria ta icio no gũgũteithie. Angĩkorũo nĩ tũrenda kwĩyaũra ũmũndũ ũrĩa wa tene, no mũhaka tũtige irumi, kwaria maheeni, na mĩario ya ũũra-thoni. w22.03 5 ¶12-14

Andũ arĩa mahoyaga ũtaaro handũ ha gweterera mũndũ ũngĩ amahe, kaingĩ nĩ matuaga matua ma ũũgĩ gũkĩra arĩa matahoyaga ũtaaro. Kwoguo oyaga ikinya rĩa mbere rĩa kũhoya ũtaaro. Nĩ hĩndĩ ta ĩrĩkũ tũngĩhoya ũtaaro kuuma kũrĩ aarĩ na ariũ a Ithe witũ? Rekei twarĩrĩrie ngerekano imwe. (1) Mwarĩ wa Ithe witũ akahoya mũhunjia ũngĩ ũrĩ na ũmenyeru mathiĩ nake kwĩruta Bibilia na mũrutwo, na thutha-inĩ akahoya ũtaaro wĩgiĩ ũrĩa angĩagagĩria njĩra ciake cia kũrutana. (2) Mwarĩ wa Ithe witũ ũtarĩ mũhiku arenda kũgũra nguo, kwoguo akoria mwarĩ wa Ithe witũ ũrĩ na ũmenyeru amwĩre ũrĩa nguo icio ihaana. (3) Mũrũ wa Ithe witũ akaheo mĩario yake ya mbere ya andũ othe. Akoria mũrũ wa Ithe witũ ũrĩ na ũmenyeru amũthikĩrĩrie na kinyi akĩruta mĩario ĩyo nĩguo amũhe ũtaaro wĩgiĩ maũndũ marĩa angĩrutĩra wĩra. O na ariũ a Ithe witũ arĩa makoretwo makĩruta mĩario ihinda rĩa mĩaka mĩingĩ, no mere ariũ a Ithe witũ arĩa marĩ na ũmenyeru mamahe ũtaaro wĩgiĩ harĩa mangĩrutĩra wĩra, macoke mahũthĩre ũtaaro ũcio.—Thim. 19:20. w22.02 13 ¶15-17

Jehova nĩ atwendete na nĩ atũrũmbũyagia o ta ũrĩa eekire harĩ Jesu rĩrĩa aarĩ gũkũ thĩ hĩndĩ ya ũtungata wake ũrĩa warĩ na moritũ. (Joh. 5:20) Jehova aarũmbũyagia mabataro ma Jesu ma kĩĩroho, ma ngoro, na ma kĩĩmwĩrĩ. Ningĩ Jehova nĩ eeraga Jesu atĩ nĩ aamwendete na atĩ nĩ aamwĩtĩkĩrĩte. (Mat. 3:16, 17) Nĩ ũndũ wa kũmenya atĩ hingo ciothe Jehova aakoragwo hamwe nake, Jesu ndaaiguaga arĩ wiki. O ta Jesu, ithuothe nĩ twĩyoneire maũndũ maingĩ marĩa monanagia atĩ Jehova nĩ atwendete. Ta wĩcirie ũndũ ũyũ: Jehova aakũgucĩrĩirie harĩ we, na agĩkũhe famĩlĩ ya kĩĩroho ĩrĩa ĩkoragwo na wendo na ũrũmwe nĩguo ũkoragwo na gĩkeno, na ĩkũmagĩrĩrie rĩrĩa ũrĩ na mĩtangĩko. (Joh. 6:44) Ningĩ Jehova nĩ atigagĩrĩra atĩ tũrĩ na irio cia kĩĩroho. Ningĩ nĩ arũmbũyagia mabataro maitũ ma kĩĩmwĩrĩ. (Mat. 6:31, 32) Tũngĩĩcũrania ũrĩa Jehova atuonagia wendo, wendo witũ harĩ we nĩ ũrĩongererekaga. w21.09 22 ¶8-9

Ũtũũro waku wahaanaga atĩa ũtanambĩrĩria kwĩruta Bibilia na Aira a Jehova? Aingĩ aitũ tũtingĩenda gwĩciria ũrĩa wahaanaga. No kũhoteke muonere witũ wa maũndũ na ũmũndũ witũ nĩ wathũkĩtio nĩ mwerekera wa andũ aingĩ thĩinĩ wa thĩ wĩgiĩ wega na ũũru. Angĩkorũo nĩ ũguo, ‘tũtiarĩ na kĩĩrĩgĩrĩro na tũtiarĩ na Ngai thĩinĩ wa thĩ.’ (Ef. 2:12) No o ũrĩa werutaga Bibilia, nĩ wamenyire atĩ ũrĩ na Ithe wanyu wa igũrũ ũkwendete mũno. Nĩ wataũkĩirũo atĩ nĩguo ũkenie Jehova na ũtuĩke ũmwe wa famĩlĩ ya athathaiya ake, nĩ wabataraga gwĩka mogarũrũku manene harĩ ũtũũro waku, muonere waku wa maũndũ, na mwĩcirĩrie waku. Nĩ ũngĩabatarire kwĩruta gwĩka maũndũ marĩa Jehova augĩte nĩ mega na gwĩthema marĩa augĩte nĩ moru. (Ef. 5:3-5) Jehova, Mũũmbi witũ na Ithe witũ wa igũrũ, arĩ na kĩhooto gĩa gũtua ũrĩa andũ a famĩlĩ yake ya athathaiya magĩrĩirũo gũikara. Na endaga tũtanabatithio, twĩrutanĩrie ‘kwĩyaũra ũmũndũ ũrĩa wa tene o hamwe na mĩtugo yaguo.’ w22.03 2 ¶1-3

Arĩa a ngʼondu ingĩ nĩ makenagĩra gũkorũo kuo hĩndĩ ya Kĩririkano na gwĩcũrania ũhoro wa kĩĩrĩgĩrĩro kĩao. Nĩ meriragĩria gũthikĩrĩria mĩario ya Kĩririkano tondũ gĩcunjĩ kĩnene kĩa mĩario ĩyo kĩaragĩrĩria maũndũ marĩa Kristo na andũ 144,000 arĩa magaathana nake mageekĩra andũ hĩndĩ ya Wathani wa Mĩaka Ngiri. Rungu rwa ũtongoria wa Mũthamaki wao, Jesu Kristo, acio magaathana nake kũrĩa igũrũ nĩ magaateithia gũthondeka thĩ ĩtuĩke paradiso, na mateithie andũ matuĩke akinyanĩru. Andũ milioni nyingĩ a ngʼondu ingĩ arĩa mathiaga Kĩririkano nĩ makenaga mũno mecũrania igũrũ rĩgiĩ kũhinga kwa morathi ma Bibilia, ta marĩa marĩ thĩinĩ wa Isaia 35:5, 6; 65:21-23; na Kũguũrĩrio 21:3, 4. Rĩrĩa mahũũra mbica marĩ thĩinĩ wa thĩ njerũ hamwe na endwa ao, nĩ mekĩraga hinya kĩĩrĩgĩrĩro kĩao kĩa ihinda rĩũkĩte, na itua rĩao rĩa gũthiĩ na mbere gũtungatĩra Jehova.—Mat. 24:13; Gal. 6:9. w22.01 21 ¶5-7

Ũkũũri nĩ kĩĩ? Nĩ thogora ũrĩa Jesu aarutire nĩguo arĩhĩre muoyo ũrĩa wateirũo nĩ Adamu. (1 Kor. 15:22) Ũkũũri wabataranagia nĩkĩ? Nĩ tondũ gĩthimi gĩa kĩhooto kĩrĩa Jehova aaigĩte thĩinĩ wa Watho wake, kĩoonanĩtie atĩ muoyo wagĩrĩirũo kũrĩhwo na muoyo. (Tham. 21:23, 24) Adamu nĩ aateire muoyo wake mũkinyanĩru. Kwoguo nĩgetha kĩhooto kĩa Ngai gĩkinyanĩre, Jesu nĩ aarutire muoyo wake mũkinyanĩru. (Rom. 5:17) Na njĩra ĩyo, agĩtuĩka “Ithe wa Andũ wa Tene na Tene” harĩ andũ arĩa othe monanagia wĩtĩkio harĩ ũkũũri. (Isa. 9:6; Rom. 3:23, 24) Jesu nĩ eehaarĩirie kũruta muoyo wake tondũ aarĩ na wendo mũnene harĩ Ithe na harĩ ithuĩ. (Joh. 14:31; 15:13) Nĩ ũndũ wa wendo ũcio, nĩ eehotorete gũtũũria wĩkindĩru wake nginya mũthia na kũhingia wendi wa Ithe. Jesu eekire ũguo na njĩra ya gũtũũra arĩ mwĩhokeku nginya hĩndĩ ya gĩkuũ gĩake. Ũndũ ũcio eekire, nĩ ũkaahotithia Jehova kũhingia wendi ũrĩa aarĩ naguo kĩambĩrĩria wĩgiĩ andũ na thĩ. w21.04 14 ¶2-3