Ĩpuro

Jesu nĩ aatuonirie wendo mũnene na njĩra ya kũruta muoyo wake eyendeire nĩ ũndũ witũ. (Joh. 15:13) Tũtingĩhota kũrĩha Jehova na Jesu nĩ ũndũ wa wendo ũcio matuonetie. Ĩndĩ no tuonanie atĩ tũrĩ na ngatho kũgerera mũtũũrĩre witũ wa o mũthenya. (Kol. 3:15) Arĩa aitĩrĩrie maguta nĩ monaga ũkũũri ũrĩ wa bata mũno tondũ nĩ ũmahotithĩtie kũgĩa na kĩĩrĩgĩrĩro kĩa magegania. (Mat. 20:28) Nĩ ũndũ wa gũkorũo na wĩtĩkio harĩ igongona rĩa Kristo, Jehova nĩ amatuĩte athingu na akamatua ciana ciake. (Rom. 5:1; 8:15-17, 23) Arĩa a ngʼondu ingĩ o nao nĩ macokagia ngatho nĩ ũndũ wa ũkũũri. Nĩ ũndũ wa gũkorũo na wĩtĩkio harĩ igongona rĩa ũkũũri rĩa Kristo, nĩ magĩaga na mũrũgamo mwega mbere ya Ngai, na makagĩa na kĩĩrĩgĩrĩro gĩa kũhonoka kuuma “thĩna-inĩ ũrĩa mũnene.” (Kũg. 7:13-15) Ikundi icio cierĩ nĩ cionanagia ngatho harĩ ũkũũri na njĩra ya gũkorũo kuo Kĩririkano-inĩ o mwaka. w22.01 23 ¶14-15

Jesu nĩ aatangĩkaga nĩ ũndũ wa thitango iria ciatũmire oragwo. Aatuĩrĩirũo ũrĩa gũtarĩ atĩ nĩ mũrumi Ngai, mũndũ ũtaaheete Ngai gĩtĩo o hamwe na rĩĩtwa rĩake. (Mat. 26:64-66) Kĩgenyo kĩu gĩatũmaga atangĩke nginya akerirĩria Ithe amwehererie gĩconoko kĩu. (Mat. 26:38, 39, 42) Jesu nĩ angĩacuuririo mũtĩ-inĩ nĩguo akũũre Ayahudi kuumana na kĩrumi kĩrĩa maarĩ nakĩo. (Gal. 3:10) Maarĩ rungu rwa kĩrumi, tondũ nĩ maagararĩte kĩrĩkanĩro kĩrĩa maarĩ nakĩo hamwe na Ngai gĩa gwathĩkĩra Watho wake. Kwoguo o na gũtuĩka maarĩ na mehia nĩ ũndũ wa gũkorũo marĩ njiarũa cia Adamu, maarĩ ehĩre o na makĩria nĩ ũndũ wa gũkorũo marĩ rungu rwa kĩrumi kĩu. (Rom. 5:12) Watho wa Ngai woonanĩtie atĩ mũndũ angĩekire rĩhia rĩngĩatũmire atuĩrũo gĩkuũ, aagĩrĩire kũũragwo. Rĩmwe na rĩmwe, mũndũ ta ũcio thutha wa kũũragwo mwĩrĩ wake nĩ wacuuragio mũtĩ-inĩ. (Gũcok. 21:22, 23; 27:26) Kwoguo rĩrĩa Jesu aacuuririo mũtĩ igũrũ, nĩ aahotithirie rũrĩrĩ rũu rũrĩa rwaremeire Ngai kũgunĩka kuumana na igongona rĩrĩa aarutire. w21.04 16 ¶5-6

Ta geria gwĩciria ũrĩa mũthenya wa mũico wa Jesu atanakua wahaanaga. Thigari cia Roma ciamũhũũrire itarĩ na tha. (Mat. 26:52-54; Joh. 18:3; 19:1) Ciamũhũũraga na kĩboko kĩamũringaga gĩgatarũra nyama cia mwĩrĩ wake. Thutha-inĩ, ikĩmũkuuithia mũtĩ mũritũ mũgongo-inĩ o ũcio wauraga thakame. Jesu akĩambĩrĩria gũkururia mũtĩ ũcio erekeire harĩa angĩoragĩirũo, na o magĩthiaga, mũndũ ũngĩ agĩkuuithio mũtĩ ũcio Jesu aakuuĩte. (Mat. 27:32) Rĩrĩa maakinyire harĩa Jesu angĩoragĩirũo, thigari ikĩmũhũũrĩra mĩcumarĩ moko na magũrũ mũtĩ-inĩ ũcio. No kũhoteke ironda cia mĩcumarĩ ĩyo ciathiaga inenehete nĩ ũndũ wa ũritũ wa mwĩrĩ wake. Arata ake maarĩ na kĩeha nake mami wao akĩrĩra, no atongoria a Kĩyahudi no kũmũnyũrũria maamũnyũrũragia. (Luk. 23:32-38; Joh. 19:25) O ũrĩa mahinda maahĩtũkaga, noguo aathiaga na mbere kũigua ruo o na makĩria. Ngoro na mahũri make no kũhoteke nĩ ciaritũhagĩrũo kũruta wĩra na kwoguo ũgakorũo ũrĩ ũndũ mũritũ harĩ we kũhuhia. Atigĩtie hanini nĩguo atuĩkane, akĩhoya ihoya rĩake rĩa mũico. Agĩcoka akĩinamia mũtwe, na agĩtuĩkana. (Mar. 15:37; Luk. 23:46; Joh. 10:18; 19:30) Hatarĩ nganja, nĩ aagereire ruo rũnene kwa ihinda, na agĩkua gĩkuũ gĩa gĩconoko. w21.04 16 ¶4

Jesu nĩ aaririe na atũmwo ake 11 ehokeku igũrũ rĩgiĩ irĩkanĩro igĩrĩ, kĩrĩkanĩro kĩrĩa kĩerũ na kĩrĩkanĩro kĩa Ũthamaki. (Luk. 22:20, 28-30) Irĩkanĩro icio nĩ ciahotithirie atũmwo acio na andũ angĩ anini gũgaatuĩka athamaki na athĩnjĩri-Ngai kũrĩa igũrũ. (Kũg. 5:10; 14:1) Aitĩrĩrie maguta arĩa matigarĩte, arĩa marĩ thĩinĩ wa irĩkanĩro icio, no o tu mangĩrĩa mũgate na manyue ndibei hĩndĩ ya Kĩririkano. Jehova nĩ amaheete kĩĩrĩgĩrĩro kĩa magegania gĩa gũkorũo na muoyo ũtangĩkua kana ũbuthe kũrĩa igũrũ, gĩa gũtungata hamwe na Jesu Kristo na acio angĩ a 144,000, na makĩria ma ũguo, gũkorũo marĩ mbere ya Jehova Ngai. (1 Kor. 15:51-53; 1 Joh. 3:2) Arĩa aitĩrĩrie maguta nĩ mamenyaga atĩ no mũhaka matũũrie wĩhokeku wao nginya gĩkuũ.—2 Tim. 4:7, 8. w22.01 20-21 ¶4-5

Haarĩ na aici erĩ maacuurĩtio mũtĩ-inĩ hakuhĩ na Jesu. (Luk. 23:40, 41) Ũmwe wao akĩrora Jesu akĩmwĩra ũũ: “Ũkaandirikana rĩrĩa ũkaaingĩra thĩinĩ wa Ũthamaki waku.” (Luk. 23:42) Jesu nĩ aamwĩrire ciugo cia kũmũhe mwĩhoko tondũ nĩ aamenyaga atĩ Jehova nĩ mũigua tha. (Thab. 103:8; Ahib. 1:3) Jehova nĩ akoragwo ehaarĩirie gũtuohera biũ na gũtuonia tha, angĩkorũo nĩ twĩrirĩte biũ maũndũ moru marĩa twĩkĩte na angĩkorũo nĩ twĩtĩkĩtie atĩ no tuoherũo kũgerera thakame ĩrĩa yaitirũo nĩ Jesu Kristo. (1 Joh. 1:7) Andũ amwe no mone arĩ ũndũ mũritũ gwĩtĩkia atĩ Jehova no amohere. Angĩkorũo nĩ ũiguaga ũguo rĩmwe na rĩmwe, ririkanaga ũndũ ũyũ: Jesu atigĩtie ihinda inini akue, nĩ oonirie mũici ũmwe tha, na mũici ũcio aakoretwo o hĩndĩ ambĩrĩria kuonania wĩtĩkio. Kwoguo-rĩ, na githĩ Jehova ndakĩonagia tha o na makĩria ndungata ciake njĩhokeku!—Thab. 51:1; 1 Joh. 2:1, 2. w21.04 9 ¶5-6

Jesu nĩ aahingirie maũndũ maigana ũna rĩrĩa aatũũririe wĩkindĩru wake nginya mũthia. Wa mbere, nĩ oonanirie atĩ Shaitani nĩ mũheenania. Jesu nĩ oonanirie atĩ mũndũ mũkinyanĩru no ahote gũtũũria wĩkindĩru wake o na Shaitani angĩmũrehera magerio mahaana atĩa. Wa kerĩ, Jesu nĩ aarutire muoyo wake ũrĩ ũkũũri. Gĩkuũ gĩake nĩ kĩahotithirie andũ matarĩ akinyanĩru gũkorũo na mũrũgamo mwega mbere ya Ngai, na kũgĩa na kĩĩrĩgĩrĩro gĩa gũgaatũũra tene na tene. Wa gatatũ, Jesu nĩ oonanirie atĩ Jehova nĩwe wagĩrĩire gũkorũo arĩ Mwathani wa igũrũ na thĩ, na agĩtheria rĩĩtwa rĩa Ithe. Rekei tũhũthagĩre o mũthenya ta arĩ guo mweke witũ wa mũico wa kuonania wĩkindĩru witũ. Tweka ũguo, o na tũngĩngʼethanĩra na gĩkuũ no tũhote kuuga ũũ: “Jehova, nĩ njĩkĩte ũrĩa wothe ingĩhota gũtũũria wĩkindĩru wakwa, kuonania atĩ Shaitani nĩ mũheenania, na gũtetera rĩĩtwa rĩaku na ũnene waku.” w21.04 12 ¶13-14

Thutha wa Jesu gũthitangwo na gũtuĩrũo nĩ ũndũ wa mahĩtia ateekĩte, nĩ aanyũrũririo, akĩnyarirũo, na agĩcoka agĩcuurio mũtĩ-inĩ wa kũnyarirĩrũo. Aahũrĩrĩirũo mĩcumarĩ moko na magũrũ-inĩ make. No mũhaka akorũo akĩaria na akĩhuhia aarĩ na ruo rũingĩ mũno. Ĩndĩ no nginya aangĩaririe tondũ aarĩ na maũndũ ma bata eendaga kuuga. No twĩrute maũndũ ma bata kuumana na ciugo cia Jesu cia mũthia atanakua. Ciugo icio nĩ itũririkanagia bata wa kuohera andũ arĩa angĩ na gũkorũo na ma atĩ Jehova nĩ egũtuohera. Nĩ tũrathimĩtwo tũgakorũo na famĩlĩ ya aarĩ na ariũ a Ithe witũ, arĩa makoragwo mehaarĩirie gũtũteithia. No rĩrĩa tũrabatara ũteithio nĩ twagĩrĩirũo kuoya ikinya rĩa kũmahoya ũteithio. Twĩ na ma atĩ Jehova nĩ arĩtũteithagia gũkirĩrĩria igerio o rĩothe rĩrĩa tũngĩcemania narĩo. Ningĩ nĩ itũririkanagia bata wa kũhũthĩra o mũthenya ta arĩ guo mweke witũ wa mũico wa kuonania wĩkindĩru witũ, tũrĩ na ma atĩ o na tũngĩkua Jehova nĩ agaatũriũkia. w21.04 8 ¶1; 13 ¶17

Kũrũmĩrĩra makinya ma Jesu nĩ gũgaatũma tũheo muoyo wa tene na tene. Rĩrĩa mwanake ũmwe warĩ mũtongu ooririe ũrĩa aabataraga gwĩka nĩguo one muoyo wa tene na tene, Jesu aamwĩrire: “[Ũka] ũtuĩke mũrũmĩrĩri wakwa.” (Mat. 19:16-21) Jesu eerire Ayahudi amwe arĩa mateetĩkĩtie atĩ we nĩwe Kristo ũũ: “Ngʼondu ciakwa . . . nĩ cinũmagĩrĩra. Nĩ ndĩciheaga muoyo wa tene na tene.” (Joh. 10:24-29) Tuonanagia wĩtĩkio harĩ Jesu na njĩra ya kũhũthĩra maũndũ marĩa aarutanire na kũrũmĩrĩra kĩonereria gĩake. Tweka ũguo nĩ tũgũthiĩ na mbere kũgerera njĩra-inĩ ya muoyo. (Mat. 7:14) Nĩguo tũhote kũrũmĩrĩra biũ makinya ma Jesu, no mũhaka twambe tũmũmenye. ‘Kũmenya’ Jesu gũtirĩ mũthia. Nĩ twagĩrĩirũo gũthiĩ na mbere kwĩruta ũhoro ũmwĩgiĩ, na ũguo nĩ kuuga kwĩruta ũhoro wĩgiĩ ngumo ciake, mwĩcirĩrie wake, na ithimi ciake. Gũtekũmakania tũkoretwo ũhoro-inĩ wa ma ihinda rĩigana atĩa, nĩ twagĩrĩirũo gũthiĩ na mbere kũmenya Jehova na Mũrũ wake. w21.04 4 ¶9-10

No kũhoteke rĩmwe na rĩmwe mũtũmwo Paulo nĩ aaiguaga agĩthumbũka nĩ ũndũ wa maũndũ marĩa eekĩte tene. No gũkorũo ũndũ ũcio nĩguo watũmire eĩte mwĩhia “wa mbere.” (1 Tim. 1:15) Paulo ataneruta ũhoro wa ma, nĩ aanyariraga Akristiano kuuma itũũra rĩmwe nginya rĩrĩa rĩngĩ agĩikagia amwe njera, o na nĩ aaikagia kura nĩguo Akristiano amwe moragwo. (Atũm. 26:10, 11) Ta hũũra mbica ũrĩa Paulo angĩkorũo aaiguaga rĩrĩa acemania na Mũkristiano mwĩthĩ, ũrĩa aciari ake mooragithĩtio nĩwe. Paulo nĩ aaiguaga ũũru nĩ ũndũ wa mahĩtia macio eekĩte, no nĩ aamenyaga atĩ ndangĩahotire gũcenjia maũndũ marĩa mahĩtũku. Nĩ eetĩkĩtie atĩ Kristo aakuire nĩ ũndũ wake, na akĩandĩka ũũ: “Nduĩkĩte ũguo ndariĩ kũgerera ũtugi mũnene wa Ngai.” (1 Kor. 15:3, 10) Tũreruta atĩa? Koragwo na ma atĩ Kristo nĩ aakuire nĩ ũndũ waku, na agĩkũhotithia kũgĩa na ũrata wa hakuhĩ hamwe na Jehova. (Atũm. 3:19) Ũndũ ũrĩa wa bata harĩ Ngai nĩ maũndũ marĩa tũreka ihinda rĩrĩ, na marĩa tũrĩka ihinda rĩũkĩte, no ti mahĩtia marĩa twekire tene.—Isa. 1:18. w21.04 23 ¶11

Ayahudi aingĩ matukũ-inĩ ma Jesu matierĩgagĩrĩra atĩ Mesia nĩ aangĩakuire. O na kũrĩ ũguo, Maandĩko maarathĩte ũũ: “Nĩ aarutire muoyo wake nginya agĩkua na agĩtaranĩrio hamwe na ehia; agĩkuua mehia ma andũ aingĩ, na agĩthaithanĩrĩra andũ arĩa ehia.” (Isa. 53:12) Kwoguo Ayahudi matiabatiĩ kũhĩngĩka rĩrĩa Jesu aatuĩrĩirũo nĩ mwĩhia na akĩũragwo. Mahinda-inĩ maya, no twĩtheme kũhĩngĩka na njĩra ya gũthuthuria nĩguo tũmenye ũhoro wa ma. Thĩinĩ wa mahunjio ma Jesu ma kĩrĩma-inĩ, eerire athikĩrĩria ake atĩ andũ amwe nĩ mangĩkamaigĩrĩra “igenyo cia mĩthemba yothe mĩũru.” (Mat. 5:11) Maheeni macio mangĩkoimana na Shaitani. Ahũthagĩra thũ cia Jehova gũtheremia ndeto njũru ciĩgiĩ andũ arĩa mendete ũhoro wa ma. (Kũg. 12:9, 10) Tũtiagĩrĩirũo gwĩtĩkia maheeni macio maragio nĩ thũ citũ. Tũtiagĩrĩirũo kũreka maheeni mao matũme tũtige gũtungatĩra Jehova kana matũme tũnyihie wĩtĩkio witũ. w21.05 11 ¶14; 12 ¶16

Teithia mũrutwo waku wa Bibilia kwĩhokaga Jehova. Jesu nĩ aaheire arutwo ake ũũma atĩ Jehova nĩ angĩamateithirie tondũ nĩ aamendete. (Mat. 10:19, 20, 29, 30) Ririkanagia mũrutwo atĩ Jehova nĩ arĩmũteithagia. No ũteithie mũrutwo waku kwĩhokaga Jehova, na njĩra ya kũgweta mĩoroto ya mũrutwo ũcio rĩrĩa mũrahoya nake. Mũrũ wa Ithe witũ Franciszek ũrĩa ũikaraga Poland ooigire ũũ: “Mwarimũ wakwa nĩ aagwetaga mĩoroto yakwa kaingĩ rĩrĩa arahoya. Kuona Jehova agĩcokia mahoya ma mwarimũ wakwa nĩ gwatũmire nyambĩrĩrie kũhoyaga. Nĩ ndonire Jehova akĩndeithia rĩrĩa ndaabataraga kũhoya rũtha wĩra-inĩ nĩguo hote gũthiĩ mĩcemanio na kĩgomano.” Jehova nĩ arũmbũyagia mũno arutwo aitũ a Bibilia. Nĩ onaga ũrĩa arimũ a Bibilia merutanagĩria gũteithia andũ mamũkuhĩrĩrie, na nĩ amendete nĩ ũndũ wa ũndũ ũcio. (Isa. 52:7) Angĩkorũo ihinda-inĩ rĩrĩ ndũrĩ na mũrutwo wa Bibilia, no ũteithĩrĩrie arutwo a Bibilia mathiĩ na mbere gũkũra nginya magĩrĩre kũbatithio, ũngĩthiaga na ahunjia arĩa angĩ kwĩruta na arutwo ao. w21.06 7 ¶17-18

No tuonanie atĩ nĩ tũkenaga nĩ ũndũ wa gũkorũo na kĩheo gĩa Kiugo kĩa Ngai na njĩra ya gũgĩthomaga hingo ciothe. Nĩ twagĩrĩirũo kũbanga mahinda marĩa tũrĩĩrutaga Bibilia no ti gũthomaga tu o rĩrĩa mahinda moneka. Tũngĩrũmagĩrĩra mũtaratara ũrĩa tũbangĩte wa kwĩruta tũtegũtĩrĩria, nĩ tũrĩkĩraga wĩtĩkio witũ hinya. Ngũrani na “andũ arĩa ogĩ na marĩ ũmenyo” a thĩ ĩno, ithuĩ tũkoragwo na wĩtĩkio mũrũmu wĩhocetie harĩ Kiugo kĩa Ngai. (Mat. 11:25, 26) Kwĩruta Bibilia nĩ gũtũteithĩtie kũmenya kĩrĩa kĩratũma maũndũ thĩinĩ wa thĩ mathiĩ mathũkĩte na tũkamenya ikinya rĩrĩa Jehova ekuoya. Nĩ ũndũ ũcio, rekei tũtue itua rĩa gwĩkĩra wĩtĩkio witũ hinya na tũteithie andũ aingĩ o ũrĩa tũngĩhota magĩe na wĩtĩkio harĩ Mũũmbi. (1 Tim. 2:3, 4) Ningĩ rekei tũthiĩ na mbere kwĩrĩgĩrĩra ihinda rĩrĩa andũ othe thĩinĩ wa thĩ makaagooca Jehova na mauge ciugo iria irĩ thĩinĩ wa Kũguũrĩrio 4:11 iria ciugaga: “Wee Jehova Ngai witũ, nĩ wagĩrĩire kwamũkĩra riri . . . nĩ gũkorũo nĩwe wombire indo ciothe.” w21.08 19 ¶18-20

Athuri a kĩũngano nĩ maheetwo wĩra wa kũheana ũtaaro rĩrĩa kwabatarania. Nĩ magĩrĩirũo kwĩrutanagĩria kũheana ũtaaro ũngĩguna andũ arĩa angĩ na ũmekĩre ngoro na ‘ũtũme ngoro ciao ĩkene.’ (Thim. 27:9) Athuri a kĩũngano nĩ mendete aarĩ na ariũ a Ithe witũ. Rĩmwe na rĩmwe monanagia wendo ũcio na njĩra ya kũrũnga mũndũ ũrathiĩ na njĩra ĩrĩa ĩtagĩrĩire. (Gal. 6:1) No mbere ya kwaria na mũndũ ũcio, athuri a kĩũngano no mabatare gwĩciria maũndũ mamwe mũtũmwo Paulo aagwetire megiĩ wendo. Aaugire ũũ: “Wendo nĩ ũrĩ wetereri na ũtugi. . . . Wĩtiiragia maũndũ mothe, wĩtĩkagia maũndũ mothe, wĩrĩgagĩrĩra maũndũ mothe, ũkiragĩrĩria maũndũ mothe.” (1 Kor. 13:4, 7) Gwĩcũrania igũrũ rĩgiĩ mĩhari ĩyo ya Bibilia no gũteithie mũthuri wa kĩũngano gũthuthuria kĩrĩa kĩratũma aheane ũtaaro na ahote kũheana ũtaaro ũcio na njĩra ya wendo. No kũhoteke mũndũ etĩkĩre ũtaaro angĩmenya atĩ mũthuri wa kĩũngano aramũhe ũtaaro tondũ nĩ aramũrũmbũiya. w22.02 14 ¶3; 15 ¶5

Jehova oombire andũ o hamwe na araika marĩ akinyanĩru. No mũraika ũmwe nĩ aaremire agĩtuĩka Shaitani (rĩĩtwa rĩrĩa riugĩte “Mũregani”) na agĩtũma Adamu na Hawa arĩa maarĩ akinyanĩru maremere Jehova. Thutha ũcio, araika angĩ o hamwe na andũ nĩ maanyitanĩire na Shaitani harĩ kũremera Jehova. (Jud. 6) Jehova ndaakenirio nĩ wagi ũcio wa wĩhokeku. No nĩ akirĩrĩirie na no egũthiĩ na mbere gũkirĩrĩria nginya ihinda rĩkinye rĩa kũniina aremi acio. Ihinda rĩu rĩakinya, andũ ake ehokeku nĩ magaakena, arĩa o nao makoretwo magĩkirĩrĩria maũndũ moru thĩinĩ wa thĩ. Shaitani aaririe ũũru igũrũ rĩgiĩ Ayubu ndungata ya Ngai, akĩenda kuonania atĩ ndungata ciothe cia Jehova imũtungatagĩra nĩ ũndũ wa indo iria aciheaga. (Ayub. 1:8-11; 2:3-5) Ũguo nĩguo Shaitani augaga igũrũ rĩgiĩ ndungata cia Jehova o na ũmũthĩ. (Kũg. 12:10) No tũteithĩrĩrie harĩ kuonania atĩ Shaitani nĩ mũheenania na njĩra ya gũkirĩrĩria magerio na gũikara tũrĩ ehokeku harĩ Jehova nĩ ũndũ wa kũmwenda. w21.07 9 ¶7-8

Mũtũmwo Paulo nĩ aahũthĩrire ciugo ironania ũrĩa twagĩrĩirũo kuoya na ũritũ ũhoro wĩgiĩ gwĩka mogarũrũku ũtũũro-inĩ. Aaugire atĩ nĩ twagĩrĩirũo kũhũũrĩrĩra ũmũndũ witũ wa tene na mĩcumarĩ “mũtĩ-inĩ.” (Rom. 6:6) Ũguo nĩ kuuga atĩ nĩ twagĩrĩirũo kũrũmĩrĩra kĩonereria gĩa Kristo. Nĩ tũrabatara gũtigana na mĩerekera na maũndũ marĩa Jehova athũire. Gwĩka ũguo tu nokuo kũngĩtũteithia gũkorũo na thamiri theru na kũgĩa na kĩĩrĩgĩrĩro gĩa gũgaatũũra tene na tene. (Joh. 17:3; 1 Pet. 3:21) Jehova ndangĩcenjia ithimi ciake nĩguo atũkenie. Handũ ha ũguo, ithuĩ nĩ ithuĩ tũrabatara gwĩka mogarũrũku nĩguo tũikare kũringana na ithimi ciake. (Isa. 1:17, 18; 55:9) O na thutha wa kũbatithio, nĩ ũkũbatara gũthiĩ na mbere kũrũa na merirĩria moru. Hoya Jehova ũteithio, na wĩhokage roho wake no ti hinya waku mwene. (Gal. 5:22; Afil. 4:6) No mũhaka twĩrutanĩrie biũ nĩguo twĩyaũre ũmũndũ ũrĩa wa tene na tũtikaũcokerere. w22.03 5-6 ¶15-17

Jehova atwĩrĩire atĩ nĩ arĩtũheaga irio, nguo, na handũ ha gũikara, tũngĩiga Ũthamaki wake mbere na tũtũũre kũringana na ithimi ciake cia ũthingu. (Mat. 6:33) Kũririkana ũndũ ũcio, nĩ gũtũteithagia gwĩthema gwĩciria atĩ indo cia kĩĩmwĩrĩ iria irĩ thĩinĩ wa thĩ no itũhe ũgitĩri na gĩkeno gĩa gũtũũra. Nĩ tũmenyaga atĩ njĩra ĩrĩa tu ĩngĩtũrehera thayũ wa ma wa meciria nĩ gwĩka wendi wa Jehova. (Afil. 4:6, 7) Ningĩ o na angĩkorũo no tũhote kũgũra indo nyingĩ, nĩ twagĩrĩirũo kwĩyũria kana nĩ tũrĩkoragwo na mahinda na hinya wa gũcihũthĩra na gũcirũmbũiya. Hihi nĩ twendete mũno indo iria tũrĩ nacio cia kĩĩmwĩrĩ? Ririkanaga atĩ nĩ harĩ wĩra ũrĩa Ngai atũheete thĩinĩ wa famĩlĩ yake, na kwoguo tũtiagĩrĩirũo kũreka ũndũ o na ũmwe ũtũhĩngĩce. Hatarĩ nganja tũtingĩenda kũhaana ta mũndũ ũrĩa waregire kũrũmĩrĩra Jesu nĩ ũndũ wa indo cia kĩĩmwĩrĩ iria aarĩ nacio, na kwoguo akĩaga gũtungatĩra Jehova na akĩũrũo nĩ mweke wa gũtuĩka ũmwe wa ariũ a Ngai.—Mar. 10:17-22. w21.08 6 ¶17

Kwĩruta Bibilia nĩ gũgũgũteithia kũmenya ũrĩa Jehova atariĩ o hamwe na ngumo ciake, na ngumo icio nocio twĩrutaga ũhoro wacio rĩrĩa twerorera ũũmbi. Kwĩruta ũhoro wĩgiĩ ngumo cia Jehova nĩ gũtũteithagia gũkorũo na ma atĩ arĩ kuo. (Tham. 34:6, 7; Thab. 145:8, 9) O ũrĩa ũkũmenya Jehova makĩria, noguo wĩtĩkio waku ũkũgĩa na hinya, ũmwende makĩria, na ũrata waku hamwe nake ũgĩe na hinya makĩria. Ĩraga andũ arĩa angĩ maũndũ marĩa wĩtĩkĩtie. Ĩ mũndũ ũrĩa ũrahunjĩria angĩkwĩra atĩ ndetĩkĩtie nĩ kũrĩ Ngai na ndũramenya wega ũrĩa ũngĩmũcokeria? No ũcarie mabuku-inĩ maitũ harĩa harĩrĩirie ũhoro ũcio, ũcoke ũwarĩrĩrie na mũndũ ũcio. Ningĩ no wĩre Mũira wa Jehova ũngĩ ũrĩ na ũmenyeru agũteithie gũcokia kĩũria kĩu. Mũndũ ũcio angĩtĩkĩra kana age gwĩtĩkĩra macokio ma Bibilia marĩa ũkũmũhe, wee nĩ ũkũgunĩka kuumana na ũthuthuria ũcio. Wĩtĩkio waku nĩ ũkũgĩa hinya makĩria. w21.08 18 ¶14-15

Tũtirabatara gũtigana na maũndũ mothe tũkenagĩra atĩ nĩguo tũkenie Jehova. (Koh. 5:19, 20) O na kũrĩ ũguo, tũngĩrega kwandandũra ũtungata witũ atĩ tondũ tũtirenda gũtigana na indo kana maũndũ mamwe twendete, tũngĩkorũo tũtariĩ ta mũndũ ũrĩa Jesu aagwetire ngerekano-inĩ yake ũrĩa wekĩrĩire mũno kũgĩa na ũtũũro mwega handũ ha gũtungatĩra Ngai. (Luk. 12:16-21) Rĩrĩa twacemania na moritũ, nĩ tũhoyaga na tũgeciria na njĩra ndikĩru ũrĩa tũkũhiũrania na mathĩna macio. (Thim. 3:21) Jehova nĩ atũrathimaga na njĩra nyingĩ. No tuonanie atĩ nĩ tũkenagĩra irathimo icio na njĩra ya gwĩka ũrĩa wothe tũngĩhota gwĩka maũndũ ma kũmũgoocithia. (Ahib. 13:15) Nĩguo tũhote gwĩka ũguo, no tũbatare kwandandũra ũtungata witũ, na ũndũ ũcio ũtũme twamũkĩre irathimo makĩria. O mũthenya rekei tũcaragie njĩra cia ‘gũcama tuone atĩ Jehova nĩ mwega.’ (Thab. 34:8) Tweka ũguo tũrĩkoragwo tũhaana ta Jesu ũrĩa waugire: “Irio ciakwa nĩ gwĩka wendi wa ũrĩa wandũmire na kũrĩkia wĩra wake.”—Joh. 4:34. w21.08 30-31 ¶16-19

Shaitani endaga tũkũrie mwĩtĩo. Nĩ oĩ atĩ tũngĩkũria mwĩtĩo tũngĩhaana o take, na ũndũ ũcio ũtũme tũkaaga muoyo wa tene na tene. Nĩkĩo mũtũmwo Paulo ooigire atĩ mũndũ no agĩe na “mwĩtĩo akinyĩrũo nĩ ituĩro rĩrĩa rĩatuĩrĩirũo Mũcukani.” (1 Tim. 3:6, 7) Ũndũ ũcio no ũhaanĩke harĩ mũndũ o wothe, gũtekũmakania kana nĩ hĩndĩ arerutire ũhoro wa ma kana akoretwo agĩtungatĩra Jehova kwa ihinda rĩa mĩaka mĩingĩ. Andũ arĩa etĩi makoragwo na mwĩyendo. Shaitani endaga tũkorũo na mwĩyendo, twĩcirie ũhoro wĩgiĩ ithuĩ ene handũ ha gwĩciria ũhoro wĩgiĩ Jehova, makĩria rĩrĩa tũragerera ũndũ mũritũ. Kwa ngerekano-rĩ, hihi nĩ ũigĩrĩirũo kĩgenyo kana ũgekwo ũndũ ũtarĩ wa kĩhooto? Shaitani no akene mũno ũngĩambĩrĩria kũrakarĩra Jehova kana aarĩ na ariũ a Ithe witũ. Ningĩ Mũcukani angĩenda wĩcirie atĩ njĩra ĩrĩa njega biũ ya kũhiũrania na ũndũ ũcio nĩ gwĩka maũndũ ũrĩa ũrona kwagĩrĩire handũ ha kũrũmĩrĩra ũtongoria ũrĩa Jehova aheanĩte thĩinĩ wa Kiugo gĩake.—Koh. 7:16, 20. w21.06 15 ¶4-5

Mũnabii Hagai nĩ aaheirũo wĩra wa bata nĩ Jehova. No kũhoteke Hagai aarĩ ũmwe wa andũ arĩa maacokire Jerusalemu kuuma ithamĩrio itũũra-inĩ rĩa Babuloni mwaka wa 537 M.M.M. Kahinda kanini thutha wa athathaiya acio a Jehova gũkinya Jerusalemu, nĩ maambĩrĩirie gwaka mũthingi wa nyũmba ya Jehova kana hekarũ. (Ezar. 3:8, 10) No ihinda inini thutha ũcio, nĩ gwekĩkire ũndũ wa kũmoraga ngoro. Mookĩrĩirũo nĩ andũ arĩa maaikaraga gĩcigo-inĩ kĩu, nginya magĩkua ngoro na magĩtiga gũthiĩ na mbere na gwaka. (Ezar. 4:4; Hag. 1:1, 2) Kwoguo mwaka-inĩ wa 520 M.M.M., Jehova nĩ eerire Hagai athiĩ akamekĩre ngoro nĩguo macokererie kĩyo kĩao na marĩkie gwaka hekarũ. (Ezar. 6:14, 15) Ndũmĩrĩri ĩrĩa Hagai aarĩ nayo yarĩ na muoroto wa gũteithia andũ makũrie wĩtĩkio harĩ Jehova. Ciugo “Jehova mũnene wa ita” no mũhaka akorũo nĩ ciekĩrire Ayahudi acio ngoro. Jehova nĩ akoragwo na mbũtũ nene ya araika marĩ hinya, na kwoguo Ayahudi nĩ maabataraga kũmwĩhoka nĩguo magaacĩre wĩra-inĩ wao. w21.09 14-15 ¶4-5

Mahinda-inĩ maya, Aira a Jehova nĩ makoragwo na wendo na ũrũmwe thĩinĩ wa thĩ yothe. Tũkoragwo tũrĩ ngũrani na ndini iria ingĩ ciothe, tondũ tũikaranagia ta andũ a famĩlĩ o na gũtuĩka tuumĩte mabũrũri na ũndũire-inĩ ngũrani. Nĩ twĩyonagĩra wendo ũcio wa ma rĩrĩa tũrĩ mĩcemanio-inĩ na igomano-inĩ. Ũndũ ũcio nĩ ũtũteithagia gwĩtĩkia biũ atĩ njĩra ĩrĩa tũthathayagia nayo nĩyo ĩtĩkĩrĩkĩte nĩ Jehova. (Joh. 13:34) Maandĩko matwĩkĩraga ngoro tũkoragwo na “wendo mũnene harĩ mũndũ na ũrĩa ũngĩ.” (1 Pet. 4:8) Njĩra ĩmwe tũngĩonania wendo ta ũcio, nĩ kuohanagĩra na gũkiranagĩrĩria mũndũ na ũrĩa ũngĩ. Ningĩ nĩ tũcaragia mĩeke ya kuonia andũ othe thĩinĩ wa kĩũngano ũtaana o na arĩa mangĩkorũo matũhĩtĩirie. (Kol. 3:12-14) Rĩrĩa twakorũo na wendo ta ũcio, nĩ tuonanagia atĩ nĩ ithuĩ Akristiano a ma. w21.10 22 ¶13-14

Hihi kweherio kĩũngano-inĩ no gũteithie mũndũ ũtarerira gũcenjia mĩthiĩre yake? Ĩĩ. Andũ aingĩ arĩa maneka mehia maritũ nĩ monete atĩ ikinya rĩrĩa mooeirũo rĩa kweherio kĩũngano-inĩ nĩ rĩamateithirie gũcokererũo nĩ meciria mao na rĩkĩmateithia kũgarũrĩra mĩthiĩre yao, na gũcokerera Jehova. (Ahib. 12:5, 6) Ta wĩcirie ngerekano ĩno. Mũrĩithi no one atĩ ngʼondu ĩmwe yake nĩ ndwaru. Nĩ oĩ atĩ, nĩ ũndũ wa mũrimũ ũrĩa ĩrĩ naguo, nĩ arabatara kũmĩiga mwamũ na ngʼondu icio ingĩ nĩguo amĩrigite. No ngʼondu citiendaga ũguo. Ciendaga gũikara hamwe irĩ gĩkundi, na itikenaga rĩrĩa ciamũranio. No hihi mũrĩithi angĩmĩamũrania na iria ingĩ nĩ kuuga atĩ nĩ mũũru na ndarĩ na tha? Aca o na hanini. Nĩ oĩ atĩ angĩreka ngʼondu ĩyo ndwaru ĩikaranie na iria ingĩ, o nacio no irware. Rĩrĩa aramũrania ngʼondu ĩyo ndwaru na icio ingĩ, akoragwo akĩgitĩra rũũru ruothe. w21.10 10 ¶9-10

Nĩ gĩtĩo kĩnene gũkorũo tũrĩ thĩinĩ wa famĩlĩ yonanagia wendo ya aarĩ na ariũ a Ithe witũ thĩinĩ wa thĩ yothe. Tũngĩenda andũ aingĩ o ũrĩa kwahoteka moke manyitanĩre hamwe na ithuĩ harĩ gũthathaiya Ngai witũ. Nĩ ũndũ ũcio, nĩ twagĩrĩirũo gwĩthema ũndũ o wothe ũngĩcambithia andũ a Jehova kana ũthũkie rĩĩtwa rĩa Ithe witũ wa igũrũ. Tũgeragia gwĩka maũndũ na njĩra ĩngĩtũma andũ angĩ merirĩrie kwĩruta ũhoro wĩgiĩ Jehova. Rĩmwe na rĩmwe no tũnyũrũrio kana tũnyarirũo nĩ ũndũ wa gwathĩkĩra Ithe witũ wa igũrũ. Twagĩrĩirũo gwĩka atĩa angĩkorũo nĩ tũiguaga guoya kwaria na andũ arĩa angĩ maũndũ marĩa twĩtĩkĩtie? Hĩndĩ ta ĩyo, no tũkorũo na ma atĩ Jehova na Jesu nĩ marĩtũteithagia. Jesu eerire arutwo ake atĩ matiaagĩrĩire kũmaka nĩ ũndũ wa maũndũ marĩa maabatiĩ kwaria. Nĩkĩ hihi? Jesu aameerire ũũ: “Nĩ mũkaaheo ũndũ ũrĩa mũkuuga o hĩndĩ ĩyo; nĩ gũkorũo ti inyuiki mũgaakorũo mũkĩaria, no nĩ roho wa Ithe wanyu ũgaakorũo ũkĩaria kũgerera kũrĩ inyuĩ.”—Mat. 10:19, 20. w21.09 24 ¶17-18

Musa nĩ aahũthĩrire ngerekano o ta ĩyo ĩgiĩ rĩũrĩro. (Thab. 90:1, kohoro ka magũrũ-inĩ.) Ningĩ kahinda kanini atanakua, Musa nĩ aaugire ũndũ ũngĩ wa gwĩkĩra ngoro. Aandĩkire ũũ: “Ngai nĩ rĩũrĩro kuuma o mahinda ma tene, moko make ma tene na tene marĩ rungu rwaku.” (Gũcok. 33:27) Ciugo “moko make ma tene na tene marĩ rungu rwaku” itũrutaga atĩa igũrũ rĩgiĩ Jehova? Nĩ tũiguaga tũrĩ na ũgitĩri rĩrĩa Jehova atuĩka Mwĩgitio witũ. O na kũrĩ ũguo, nĩ kũrĩ mahinda tũrĩiguaga tũkuĩte ngoro na tũtarĩ na hinya wa kwĩhanda. Hihi hĩndĩ ta ĩyo Jehova angĩtũteithia atĩa? (Thab. 136:23) Nĩ arĩigaga moko make rungu ruitũ, nĩguo atũũkĩrie na atũteithie kwĩhanda. (Thab. 28:9; 94:18) Kũmenya atĩ hingo ciothe no twĩhoke Jehova atũtiirĩrĩre, nĩ gũtũteithagia kũririkana atĩ tũrĩ arathime maũndũ-inĩ maya merĩ. Wa mbere, o kũrĩa guothe tũngĩkorũo tũgĩikara, nĩ tũrĩmenyaga atĩ Jehova nĩ arĩtũgitagĩra hingo ciothe. Wa kerĩ, Ithe witũ wa igũrũ ũrĩ wendo nĩ atũrũmbũyagia mũno. w21.11 6 ¶15-16

Jesu nĩ aamenyaga atĩ wĩtĩkio wa arutwo ake nĩ ũngĩageririo nĩ maũndũ ma wagi wa kĩhooto. Nĩguo amateithie kũhiũrania na ũndũ ũcio, nĩ aaheanire ngerekano ĩrĩ thĩinĩ wa ibuku rĩa Luka. Aataarĩirie ũhoro wĩgiĩ mũtumia wa ndigwa waikaraga agĩthaithaga mũcirithania ũtaarĩ mũthingu atigĩrĩre atĩ nĩ ona kĩhooto. Aarĩ na ma atĩ angĩathiire na mbere kũmũthaitha nĩ angĩamũteithirie. Mũthia-inĩ mũciirithania ũcio nĩ aamũteithirie. Tũreruta atĩa? Jehova nĩ arĩ kĩhooto. Nĩ ũndũ ũcio, Jesu aaugire ũũ: “Kwoguo-rĩ, githĩ Ngai ndarĩtigagĩrĩra atĩ andũ ake arĩa athuure, arĩa mamũkayagĩra mũthenya na ũtukũ nĩ mona kĩhooto?” (Luk. 18:1-8) Aacokire akiuga ũũ: “Hĩndĩ ĩrĩa Mũrũ wa mũndũ agaakinya-rĩ, hihi kũna nĩ agaakora wĩtĩkio ta ũcio gũkũ thĩ?” Rĩrĩa twekwo maũndũ matarĩ ma kĩhooto, no tuonanie atĩ tũrĩ na wĩtĩkio mũrũmu ta wa mũtumia ũcio wa ndigwa na njĩra ya gũkorũo na wetereri na ũkirĩrĩria. Wĩtĩkio ta ũcio no ũtũteithie gũkorũo na ma atĩ Jehova nĩ egũtũteithia. Ningĩ nĩ tũrabatara gwĩtĩkia atĩ mahoya nĩ marĩ ũhoti mũnene. w21.11 23 ¶12; 24 ¶14

Andũ ethĩ, hihi rĩmwe na rĩmwe nĩ muonaga ta ithimi cia Jehova iramũima wĩyathi? Shaitani angĩenda mwĩcirie ũguo. Angĩenda mwĩcirie mũno ũhoro wĩgiĩ maũndũ marĩa andũ arĩa marĩ njĩra-inĩ ĩrĩa njariĩ mareka na muone ta marakenera ũtũũro mũno. Angĩenda wĩcirie atĩ ndũrakenera ũtũũro ta ũrĩa andũ arĩa mũthomaga nao marakenera kana andũ arĩa wonaga Intaneti-inĩ. Shaitani angĩenda wĩcirie atĩ ithimi cia Jehova nĩcio irakũgirĩrĩria ndũgakenere ũtũũro biũ. No ririkanaga ũndũ ũyũ: Shaitani ndendaga andũ arĩa maragera njĩra-inĩ yake mamenye kũrĩa njĩra ĩyo ĩkũmakinyia. (Mat. 7:13, 14) Ngũrani na ũguo, Jehova nĩ atũtaarĩirie wega igũrũ rĩgiĩ irathimo iria tũkuona twatũũra njĩra-inĩ ya muoyo.—Thab. 37:29; Isa. 35:5, 6; 65:21-23. w21.12 23 ¶6-7

Nĩ tũĩ atĩ nĩ twagĩrĩirũo kuohera andũ arĩa angĩ, na gwĩka ũguo nĩguo ũndũ ũrĩa wagĩrĩire. No rĩmwe ũndũ ũcio ndũkoragwo ũrĩ mũhũthũ. No gũkorũo kũrĩ hĩndĩ mũtũmwo Petero aaiguaga ũguo. (Mat. 18:21, 22) Tũngĩka atĩa nĩguo tũhotage kuohanĩra? Wa mbere, wĩcũranie ũrĩa Jehova akuohagĩra. (Mat. 18:32, 33) Atuohagĩra eyendeire, o na gũtuĩka tũtikoragwo twagĩrĩire kuoherũo nĩwe. (Thab. 103:8-10) Makĩria ma ũguo, nĩ “twagĩrĩirũo kwendanaga.” Kwoguo kuohanĩra nĩ ũndũ wa o mũhaka. Nĩ twagĩrĩirũo kuohera aarĩ na ariũ a Ithe witũ. (1 Joh. 4:11) Wa kerĩ, wĩcũranie ũrĩa gũthiaga rĩrĩa tuohera arĩa angĩ. Nĩ tũhotaga gũteithia mũndũ ũcio ũtũhĩtĩirie, tũgateithia kĩũngano gũkorũo na ũrũmwe, tũkagitĩra ũrata witũ hamwe na Jehova, na tũkeheria mũrigo ũrĩa tũngĩkorũo naguo. (2 Kor. 2:7; Kol. 3:14) Na mũthia, hoya Jehova agũteithie kuohanĩra. Ndũkarekage Shaitani athũkie thayũ ũrĩa ũrĩ naguo hamwe na Akristiano arĩa angĩ. (Ef. 4:26, 27) Nĩ tũrabatara ũteithio wa Jehova nĩguo tũhote gwĩthema kũgwa mũtego-inĩ wa Shaitani. w21.06 22 ¶11; 23 ¶14

Saulu, Mũthamaki wa Isiraeli, nĩ aatuĩte itua rĩa kũũraga Daudi na kwoguo Daudi akĩũra nĩguo ahonokie muoyo wake. Rĩrĩa Daudi aabatarire kĩndũ gĩa kũrĩa, nĩ aathiire itũũra-inĩ rĩa Nobu na akĩhoya mĩgate ĩtano. (1 Sam. 21:1, 3) Thutha ũcio Daudi na arũme arĩa aarĩ nao, makĩona handũ ha kwĩhitha ngurunga-inĩ. (1 Sam. 22:1) Gwathiĩte atĩa nĩguo Daudi ekore thĩna-inĩ ũcio? Saulu nĩ aaiguagĩra Daudi ũiru mũno tondũ nĩ eendetwo nĩ andũ aingĩ na nĩ aahootanĩte mbaara nyingĩ. Saulu ningĩ nĩ aamenyaga atĩ ũremi wake nĩ watũmĩte Jehova amũrege gũkorũo arĩ mũthamaki wa Isiraeli, na atĩ Jehova nĩ aacagũrĩte Daudi atuĩke mũthamaki. (1 Sam. 23:16, 17) O na kũrĩ ũguo, tondũ Saulu nowe warĩ mũthamaki wa Isiraeli, aarĩ na mbũtũ nene na andũ aingĩ maamũnyitaga mbaru, na kwoguo no nginya Daudi angĩorire nĩguo ahonokie muoyo wake. Hihi Saulu eeciragia atĩ nĩ angĩarũgamirie muoroto wa Ngai wa gũtua Daudi mũthamaki? (Isa. 55:11) Bibilia ndiugĩte, no ũndũ ũrĩa tũrĩ na ma naguo nĩ atĩ Saulu nĩ kwĩikia eeikagia thĩna-inĩ. Gũtirĩ mũndũ ũngĩregana na Ngai na agaacĩre! w22.01 2 ¶1-2

Jesu aahunjagia na kĩyo. Oonanirie atĩ nĩ endete andũ na njĩra ya gũthiĩ na mbere kũmaruta rĩrĩa rĩothe ona mweke. (Luk. 19:47, 48) Nĩ kĩĩ kĩamũtindĩkaga gwĩka ũguo? Nĩ tondũ nĩ aamacayagĩra. Rĩmwe na rĩmwe, andũ aingĩ nĩ meendaga gũthikĩrĩria ciugo cia Jesu, nginya we na arutwo ake ‘makaga mweke wa kũrĩa irio.’ (Mar. 3:20) Aarutanire nginya ũtukũ, ihinda rĩrĩa ũmwe wa athikĩrĩria ake oonekaga. Andũ aingĩ arĩa maathikĩrĩirie Jesu, matiatuĩkire arutwo ake. No andũ arĩa othe maamũthikĩrĩirie nĩ maakinyĩirũo nĩ ndũmĩrĩri ya Ũthamaki. Ũmũthĩ, twendaga kũhe andũ othe mweke wa kũigua ũhoro ũrĩa mwega. (Atũm. 10:42) Nĩguo tũhingie ũndũ ũcio, no tũbatare kũgarũrĩra njĩra citũ cia kũhunjia. Handũ ha hĩndĩ ciothe kũrũmagĩrĩra mũtaratara ũrĩa ũtwagagĩrĩra, twagĩrĩirũo gũkorũo twĩhaarĩirie gũcenjia maũndũ maitũ, nĩguo tũkinyĩre andũ aingĩ mathaa marĩa mangĩoneka. Tweka ũguo, nĩ tũrĩkoragwo na ma atĩ Jehova nĩ egũkena. w22.01 17 ¶13-14

Ũmũthĩ, andũ aingĩ nĩ maritũhagĩrũo nĩ kwĩhoka atongoria. Andũ aingĩ nĩ meyoneire atĩ thirikari na mawatho marĩa maigĩtwo, kaingĩ igitagĩra andũ arĩa atongu na arĩa marĩ na ũnene, no itiheaga arĩa athĩni kĩhooto kĩao. Ningĩ, atongoria amwe a ndini nĩ mekaga maũndũ moru, ũndũ ũrĩa ũtũmaga andũ amwe mage mwĩhoko harĩ Ngai. Kwoguo rĩrĩa tũreruta na mũndũ Bibilia, ndũkoragwo ũrĩ ũndũ mũhũthũ kũmũteithia kwĩhoka Jehova na arĩa amũrĩte gũkũ thĩ. Ma nĩ atĩ, to arutwo a Bibilia marabatara kwĩruta kwĩhoka Jehova na ithondeka rĩake. O na arĩa makoretwo magĩtungatĩra Jehova kwa ihinda rĩa mĩaka mĩingĩ nĩ magĩrĩirũo gũthiĩ na mbere kwĩhoka atĩ njĩra ya Jehova ya gwĩka maũndũ nĩyo njega biũ. Rĩmwe na rĩmwe, ũndũ no wĩkĩke ũgerie mwĩhoko witũ harĩ Jehova. w22.02 2 ¶1-2