Julaĩ

Jehova nĩwe ũthondekete mũbango wa kweheria andũ kĩũngano-inĩ. Hĩndĩ ĩrĩa Jehova arũnga mũndũ, andũ othe nĩ magunĩkaga, nginya ũcio ũhĩtĩtie. Andũ amwe thĩinĩ wa kĩũngano no mauge atĩ athuri matinatua itua rĩrĩa rĩagĩrĩire rĩa kweheria mũndũ kĩũngano-inĩ. No ririkanaga atĩ andũ ta acio kaingĩ matigwetaga maũndũ moru marĩa mũndũ ũcio angĩkorũo ekĩte. Ũrĩa kũrĩ nĩ atĩ, tũtikoragwo tũũĩ maũndũ mothe. Kwoguo nĩ ũndũ wa ũũgĩ kwĩhoka atĩ athuri arĩa mararĩ kamĩtĩ-inĩ ya ciira nĩ marekire ũrĩa wothe kũngĩhoteka kũrũmĩrĩra motaaro ma Bibilia na gũtua ciira “tondũ wa Jehova.” (2 Maũ. 19:6) Rĩrĩa wanyita mbaru itua rĩa athuri rĩa kweheria mũndũ wendete, ũkoragwo ũgĩteithĩrĩria mũndũ ũcio gũcokerera Jehova. Elizabeth aaugire ũũ: “Gũkorũo tũtekũnyitanĩra na mwanake witũ nĩ gwatũritũhagĩra mũno. No rĩrĩa aacokereire Jehova, o nake nĩ aaugire atĩ nĩ aagĩrĩire kweherio kĩũngano-inĩ. Thutha-inĩ aaugire atĩ kũrũngwo kũu nĩ kwamũrutire maũndũ maingĩ.” w21.09 28-29 ¶11-12

Wĩcirie ũhoro wa mũtumia ũcio. No mũhaka akorũo nĩ eeriragĩria kũhe Jehova kĩndũ kĩega makĩria ma kĩu aarutire. O na kũrĩ ũguo, aaheire Jehova kĩrĩa kĩega biũ angĩahotire kũruta. na Jesu nĩ aamenyaga atĩ mũhothi wake warĩ wa bata mũno maitho-inĩ ma Jehova. Ũhoro ũcio ũratũruta ũndũ ũyũ wa bata: Jehova nĩ akenaga rĩrĩa twamũhe kĩrĩa kĩega biũ, rĩrĩa twamũrutĩra ũtungata wa ngoro yothe. (Mat. 22:37; Kol. 3:23) Jehova nĩ akenaga rĩrĩa ona tũkĩĩrutanĩria ũrĩa wothe tũngĩhota. Ũtungata ũcio wa ngoro yothe nĩ ũhutĩtie mahinda na hinya ũrĩa tũhũthagĩra ũthathaiya-inĩ wake hamwe na ũtungata-inĩ na gũthiĩ mĩcemanio. Ũngĩhũthĩra atĩa ũhoro ũrĩa weruta rũgano-inĩ rũu rwa mũtumia wa ndigwa? Wĩcirie nĩ andũ arĩkũ mangĩbatara kũmĩrĩrio na maririkanio atĩ kĩyo kĩao nĩ gĩkenagia Jehova. No gũkorũo nĩ harĩ mwarĩ wa Ithe witũ ũĩ ũkoragwo arĩ mũrwaru na nĩ aiguaga ũũru kana akona ta atarĩ wa bata tondũ wa kuona ndahotaga kũhingia maũndũ maingĩ ũtungata-inĩ wa Jehova ta ũrĩa eekaga na hau kabere. w21.04 6 ¶17, 19-20

Jehova nĩ oĩ ihinda rĩrĩa rĩega biũ rĩa kũniina thĩ ĩno njũru. Nĩ ũndũ wa wetereri wake andũ aingĩ nĩ mamũmenyete, na rĩu kũrĩ na andũ kĩrĩndĩ kĩnene arĩa mamũthathayagia. Andũ acio nĩ makenaga tondũ Jehova nĩ aakirĩrĩirie ihinda iraihu nginya magĩciarũo na magĩkinyĩrĩra kũmwenda na kũmwĩyamũrĩra. Rĩrĩa andũ milioni nyingĩ magakirĩrĩria nginya mũico, nĩ gũkooneka wega atĩ Jehova nĩ aatuire itua rĩega rĩa gũkorũo arĩ na wetereri. O na gũtuĩka Shaitani nĩ atũmĩte kũgĩe na mĩnyamaro mĩingĩ, Jehova atũũrĩte arĩ ‘Ngai mũkeni.’ (1 Tim. 1:11) O na ithuĩ no tũtũũrie gĩkeno o twetereire Jehova agaatheria rĩĩtwa rĩake, atũũgĩrie ũnene wake, aniine waganu wothe, na atwehererie mathĩna marĩa tũrĩ namo. Rekei tũtue itua rĩa gũthiĩ na mbere gũkirĩrĩria o tũkĩririkanaga atĩ o na Ithe witũ wa igũrũ no akirĩrĩirie. w21.07 13 ¶18-19

Andũ aingĩ karine-inĩ ya mbere nĩ maagire gwĩtĩkia Jesu. Maamuonaga tu arĩ mũriũ wa bundi wa mbaũ. Ningĩ ooimĩte Nazarethi, itũũra rĩrĩa andũ aingĩ moonaga rĩtarĩ ngumo. O na Nathanieli ũrĩa wacokire gũtuĩka mũrutwo wa Jesu, hĩndĩ ĩmwe ooririe: “Nĩ kũrĩ kĩndũ kĩega kĩngiuma Nazarethi?” No kũhoteke nĩ aaririkanaga ũrathi ũrĩ thĩinĩ wa Mika 5:2, ũrĩa woonanĩtie atĩ Mesia angĩaciarĩirũo Bethilehemu no ti Nazarethi. Mũnabii Isaia aarathĩte atĩ thũ cia Jesu itingĩarũmbũyanirie na “ũhoro wa rũciaro [rwa Mesia].” (Isa. 53:8) Korũo andũ acio nĩ maathuthurĩtie ũhoro wa ma, nĩ maangĩamenyire atĩ Jesu aaciarĩirũo Bethilehemu, na atĩ ooimanĩte na rũciaro rwa Mũthamaki Daudi. (Luk. 2:4-7) Jesu aaciarĩirũo Bethilehemu, o ta ũrĩa ũrathi ũrĩa ũrĩ thĩinĩ wa Mika 5:2 wonanĩtie. No hihi thĩna warĩ ũrĩkũ? Andũ nĩ maahiũhire gũtua ciira. Matiambire gũtuĩria maũndũ mothe. Na ũndũ ũcio nĩguo watũmire mahĩngĩke. w21.05 2-3 ¶4-6

Bibilia nĩ yarĩtie ũhoro wa andũ maarĩ cionereria njega arĩa maarathimirũo nĩ ũndũ wa gwĩtĩkĩra ũtaaro. Ta wĩcirie ũhoro wa Ayubu. O na gũtuĩka nĩ eetigĩrĩte Ngai, ndaarĩ mũkinyanĩru. Rĩrĩa aarĩ na mĩtangĩko mĩingĩ, nĩ aaugire maũndũ mataarĩ ma ma. Nĩ ũndũ ũcio, nĩ aaheirũo ũtaaro wa ĩmwe kwa ĩmwe nĩ Elihu na Jehova. Ayubu eekire atĩa? Aaugire ũũ: “Ndaririe itarĩ na ũtaũku . . . Nĩkĩo ndĩraugũkwo maũndũ marĩa njugĩte, na nĩ nderira na ndehurĩria rũkũngũ na mũhu.” (Ayub. 42:3-6, 12-17) Oonanirie atĩ aarĩ mwĩnyihia na njĩra ya gwĩtĩkĩra ũtaaro wa Elihu, o na gũtuĩka Elihu aarĩ mũnini kũmũkĩra. (Ayub. 32:6, 7) Wĩnyihia nĩ ũrĩtũteithagia o na ithuĩ kũhũthĩra ũtaaro ũrĩa twaheo, o na rĩrĩa tũrona ũtaaro ũcio ndũtwagĩrĩire kana ũrĩa ũratũhe ũtaaro ũcio nĩ mwĩthĩ gũtũkĩra. Ithuothe nĩ tũbataraga gũthiĩ na mbere gũkũria maciaro ma roho mũtheru, na gũthiĩ na mbere gũkorũo tũrĩ ahunjia na arutani ega a ũhoro mwega. w22.02 11 ¶8; 12 ¶12

Andũ othe kĩũngano-inĩ marĩ na itemi rĩa gũtigĩrĩra atĩ kũrĩ na wendo na thayũ, na ũndũ ũcio no ũteithie kwage mũndũ ũkũigua arĩ na ihooru. Ciugo na ciĩko citũ no ciĩkĩre andũ arĩa angĩ ngoro na njĩra nene. Ũngĩka atĩa gũteithia andũ arĩa marĩ oiki ũhoro-inĩ wa ma thĩinĩ wa famĩlĩ ciao meigue marĩ a bata kĩũngano-inĩ? Geragia gũthondeka ũrata na andũ arĩa erũ mĩcemanio-inĩ. Ũndũ ũmwe tũngĩka nĩ kũmanyita ũgeni tũkenete. (Rom. 15:7) No kũmageithia tũcanjamũkĩte ti kũiganu. Tũngĩenda gũkũria ũrata wa hakuhĩ hamwe nao o ũrĩa mahinda marathiĩ. Kwoguo onagia andũ arĩa erũ kĩũngano-inĩ atĩ nĩ ũmarũmbũyagia biũ. Geragia gũtaũkĩrũo nĩ maũndũ marĩa maragerera, na ũgĩka ũguo wĩmenyagĩrĩre nĩguo ndũkaingĩrĩre maũndũ mao kĩũmbe. Andũ amwe no maritũhĩrũo kuuga ũrĩa maraigua, kwoguo ndũkamatindĩkagĩrĩrie kwaria. Handũ ha ũguo, ũrĩ na wendo moragie ciũria na njĩra ya ũũgĩ ũndũ ũngĩmateithia kwĩyaria na ũkamathikĩrĩria ũrĩ na wetereri. Kwa ngerekano, no ũmorie ũrĩa maamenyire ũhoro wa ma. w21.06 11 ¶13-14

Nĩ tuonaga arĩ gĩtĩo kĩnene gũtungatĩra Jehova na ũrũmwe tũrĩ “rũũru rũmwe” rungu rwa “mũrĩithi ũmwe.” Ibuku rĩa Ithondeka Rĩrĩa Rĩkaga Wendi wa Jehova karatathi ka 165 riugaga ũũ: “Nĩguo ũgunĩke nĩ ũrũmwe ũcio, ũrĩ na itemi rĩa kũũtũũria.” Kwoguo nĩ tũrabatara kwĩruta “kuona aarĩ na ariũ a Ithe witũ ta ũrĩa Jehova amonaga.” Maitho-inĩ ma Jehova, ithuothe ‘tũtariĩ ta twana’ twendetwo. Hihi ũguo nĩguo wonaga aarĩ na ariũ a Ithe witũ? Jehova nĩ onaga na agakenio nĩ ũndũ o wothe wĩkaga nĩguo ũmateithie na ũmarũmbũiye. (Mat. 10:42) Nĩ twendete aarĩ na ariũ a Ithe witũ. Kwoguo nĩ twĩrutanagĩria “kwaga kũigĩra mũrũ wa Ithe witũ mũhĩnga kana ũndũ ũngĩtũma agwe.” (Rom. 14:13) Tuonaga aarĩ na ariũ a Ithe witũ marĩ a bata gũtũkĩra, na no twende kũmohagĩra kuuma ngoro. Rekei tũtikanetĩkĩre kũhĩngĩka nĩ ũndũ wa andũ arĩa angĩ. Handũ ha ũguo, nĩ “tũthingatagei maũndũ marĩa mangĩrehe thayũ na maũndũ ma gwaka arĩa angĩ.”—Rom. 14:19. w21.06 24 ¶16-17

Rĩrĩa tweruta na kĩyo na tũkahũthĩra maũndũ marĩa tũreruta kũgerera Kiugo kĩa Ngai na ithondeka rĩake, o kahora kahora nĩ tũkũragia ngumo ta cia Kristo. Ningĩ nĩ tũmenyaga Ngai makĩria. Jesu aahũthĩrire ngerekano kuonania atĩ ũhoro wa Ũthamaki ũhaana ta kabegũ kanini karakũra o kahora ngoro-inĩ ya mũndũ wendete maũndũ mega. Aaugire ũũ: “Nacio mbeũ icio ikamera na ikaraiha—no [mũhandi] ndoĩ ũrĩa ikũraga. Tĩri guo mwene ũtũmaga igĩe na maciaro itĩna gwa itĩna, ciambaga ikaruta nguha, igacoka ikaruta igira, na marigĩrĩrio-inĩ igira icio ikagĩa na maciaro.” (Mar. 4:27, 28) Jesu aataragĩria atĩ o ta ũrĩa mũmera ũkũraga kahora kahora, no taguo mũndũ ũrĩa wetĩkĩra ũhoro wa Ũthamaki akũraga kĩĩroho kahora o kahora. Kwa ngerekano, o ũrĩa arutwo aitũ a Bibilia marathiĩ magĩkuhagĩrĩria Jehova, nĩ twambagĩrĩria kuona magĩka mogarũrũku maingĩ ũtũũro-inĩ wao. (Ef. 4:22-24) No nĩ twagĩrĩirũo kũririkanaga atĩ Jehova nĩwe ũkũragia kabegũ kau kanini. w21.08 8-9 ¶4-5

No tuone gĩkeno tũngĩgĩetha handũ harĩa hagĩrĩire. Mũndũ ũrĩa ũkenagĩra “kĩrĩa maitho make marona” nĩ aiganagĩra na maũndũ marĩa arĩ namo. Ngũrani na ũguo, mũndũ ũrũraga agĩthingata merirĩria make aikaraga akĩĩriragĩria kĩndũ atangĩhota kwĩgĩĩra nakĩo. Tũreruta atĩa? Nĩguo tũkorũo na gĩkeno twagĩrĩirũo kũiga meciria maitũ harĩ maũndũ marĩa tũrĩ namo na maũndũ marĩa tũngĩhota gũkinyĩra. Hihi no kũhoteke mũndũ aiganĩre na maũndũ marĩa arĩ namo? Andũ aingĩ meciragia atĩ gũtingĩhoteka tondũ nĩ twendaga gũikara tũkĩgeragia maũndũ merũ, ĩndĩ ũrĩa kũrĩ nĩ atĩ no kũhoteke. No tũhote gũkenera maũndũ marĩa tũrĩ namo ihinda-inĩ rĩrĩ. Nĩ kĩĩ kĩngĩtũteithia gwĩka ũguo? Nĩguo tuone macokio, no tũthuthurie ngerekano ya Jesu ĩgiĩ taranda, ĩrĩa ĩrĩ thĩinĩ wa Mathayo 25:14-30, na twĩrute ũrĩa tũngĩgĩa na gĩkeno, na ũrĩa tũngĩongerera gĩkeno gitũ maũndũ-inĩ marĩa tũrĩ namo ihinda-inĩ rĩrĩ. w21.08 21 ¶5-6

Jehova nĩ arũmbũyagia mũno andũ “arĩa mahehenjekete na matarĩ hinya.” Ithuothe nĩ twagĩrĩirũo gwĩkĩra ngoro aarĩ na ariũ a Ithe witũ, na to athuri a kĩũngano tu magĩrĩirũo gwĩka ũguo. Ũndũ ũmwe tũngĩka nĩguo tũmomĩrĩrie nĩ kũmonia atĩ nĩ tũmarũmbũyagia. Jehova nĩ endaga tũmonie atĩ nĩ tũmendete mũno. (Thim. 19:17) Ningĩ no tũteithie aarĩ na ariũ a Ithe witũ na njĩra ya gũkorũo tũrĩ enyihia na kwaga kwĩyonania nĩ ũndũ wa ũhoti witũ. Tũtingĩenda kwĩyonania atĩ tũrĩ a bata mũno, ũndũ ũrĩa ũngĩtũma andũ arĩa angĩ mambĩrĩrie gũtũiguĩra ũiru. Handũ ha ũguo, twagĩrĩirũo kũhũthĩra ũhoti witũ na ũmenyo ũrĩa tũrĩ naguo gũteithia andũ arĩa angĩ. (1 Pet. 4:10, 11) Gwĩciria igũrũ rĩgiĩ ũrĩa Jesu aarũmbũyanagia na arũmĩrĩri ake, no gũtũrute ũrĩa twagĩrĩirũo kũrũmbũiya arĩa angĩ. Jesu nĩwe mũndũ ũrĩa ũĩkaine mũno wanatũũra gũkũ thĩ. Ĩndĩ aarĩ “mũhooreri na mwĩnyihia ngoro-inĩ.” (Mat. 11:28-30) Aahũthagĩra rũthiomi na ngerekano hũthũ kũrutana, na ũndũ ũcio nĩ wahutagia ngoro cia andũ a kĩrathi gĩa thĩ.—Luk. 10:21. w21.07 23 ¶11-12

Oyaga ikinya rĩa mbere rĩa kwaranĩria na andũ arĩa akũrũ. Ũrĩa kũrĩ nĩ atĩ, rĩu no makorũo nĩ manyihĩirũo nĩ ũhoti wao wa kuona, magũrũ mao makaremwo nĩ gũthiĩ, na maragia mĩgambo yao ĩkĩinainaga, no ngoro-inĩ ciao nĩ ethĩ na nĩ methondekeire “rĩĩtwa rĩega” harĩ Jehova. (Koh. 7:1) Ririkanaga kĩrĩa gĩtũmaga Jehova amone marĩ a bata. Thiĩ na mbere kũmaheaga gĩtĩo. Wĩgerekanie na Elisha. Mũthenya wa mũico rĩrĩa maarĩ na Elija, nĩ aaregire biũ gũtigwo nĩwe. Elisha eerire Elija ũũ maita matatũ: “Ndigũgũtiga.” (2 Ath. 2:2, 4, 6) Onanagia atĩ nĩ ũrakenio nĩ andũ arĩa akũrũ na njĩra ya kũrekaga meyarie. (Thim. 1:5; 20:5; 1 Tim. 5:1, 2) Moragie ciũria ta: “Rĩrĩa warĩ mwĩthĩ-rĩ, nĩ kĩĩ gĩagũteithirie gũkorũo na ma atĩ nĩ wonete ũhoro wa ma?” “Maũndũ marĩa wĩyoneire ũtũũro-inĩ magũteithĩtie atĩa gũkuhĩrĩria Jehova?” “Nĩ kĩĩ gĩgũteithĩtie gũkorũo na gĩkeno ũgĩtungatĩra Jehova?” (1 Tim. 6:6-8) Ũcoke ũmathikĩrĩrie rĩrĩa mareyaria. w21.09 5 ¶14; 7 ¶15

Rĩrĩa werutanĩria gwathĩkĩra rĩathani rĩa kũhunjia na gũtua andũ arutwo, nĩ wonanagia atĩ nĩ wendete Ngai. (1 Joh. 5:3) Ta wĩcirie ũndũ ũyũ: Ũkoretwo ũkĩhunjia nyũmba kwa nyũmba tondũ nĩ wendete Jehova. No kũhoteke ndwarĩ ũndũ mũhũthũ harĩ we gwathĩkĩra rĩathani rĩa kũhunjia. Hihi nĩ waiguire guoya rĩrĩa wathiire kũhunjia mũciĩ wa mbere? No mũhaka akorũo nĩ waiguire guoya. No nĩ wamenyaga atĩ nĩ Jesu watigire auga tũrutage wĩra ũcio, na nĩ weendaga gwathĩka. Na no kũhoteke o ũrĩa ihinda rĩathiaga rĩhĩtũkĩte, noguo woonaga wĩra wa kũhunjia ũrĩ mũhũthũ. Ĩ ũhoro wĩgiĩ kwĩruta na andũ Bibilia? Hihi nĩ wĩtigĩrĩte wĩra wa gũtua andũ arutwo? No kũhoteke nĩ wĩtigĩrĩte. O na kũrĩ ũguo, ũngĩhoya Jehova agũteithie gũtooria guoya na kũgĩa na ũmĩrĩru wa kũruta andũ Bibilia, no agũteithie ũkũrie wendi wa gũtua andũ arutwo. w21.07 3 ¶7

Mahinda-inĩ ma tene ngombo nĩ ciekĩragwo rũũri nĩguo imenyeke nĩ cia ũ. Na njĩra o ta ĩyo, matukũ-inĩ maya maitũ andũ nĩ marĩrĩgagĩrĩrũo makorũo na rũũri rwa mũhaano guoko-inĩ kana thiithi-inĩ wao, rwa kuonania mwena ũrĩa maranyita mbaru. Meciria na ciĩko cia mũndũ nĩ irĩonanagia kana nĩ aranyita mbaru thirikari cia gũkũ thĩ. Hihi nĩ tũgwĩtĩkĩra gwĩkĩrũo rũũri rũu rwa mũhaano na tũnyite thirikari cia gĩũteti mbaru? Andũ arĩa marĩregaga gwĩkĩrũo rũũri rũu nĩ marĩcemanagia na maũndũ maritũ. Ibuku rĩa Kũguũrĩrio riugaga ũũ: “Gũtirĩ mũndũ ũngĩgũra kana endie o tiga mũndũ ũrĩ na rũũri rũu.” (Kũg. 13:17) No o ta ũrĩa Kũguũrĩrio 14:9, 10 yonanĩtie, andũ a Ngai nĩ moĩ ũrĩa Ngai ageeka andũ acio mekĩrĩtwo rũũri. Handũ ha gwĩtĩkĩra gwĩkĩrũo rũũri rũu, o nĩ ta magakorũo mandĩkĩte guoko-inĩ kwao, “Niĩ ndĩ wa Jehova.” (Isa. 44:5) Twagĩrĩirũo kũhũthĩra ihinda rĩrĩ gwĩkĩra hinya wĩhokeku witũ harĩ Jehova. Tũngĩka ũguo, Jehova nĩ arĩkenaga kuuga tũrĩ ake. w21.09 18 ¶15-16

Nĩguo tũhote kũhingia ũtungata witũ, no tũhoe andũ arĩa angĩ ũteithio. Mũtũmwo Paulo nĩ oonirie Timotheo njĩra itiganĩte cia kũhunjia na kũrutana, na akĩmwĩkĩra ngoro onie andũ arĩa angĩ. (1 Kor. 4:17) O ta Timotheo, no twĩrute maũndũ maingĩ kuuma kũrĩ andũ arĩa marĩ na ũmenyeru kĩũngano-inĩ. Ningĩ nĩ twagĩrĩirũo kũhoyaga Jehova atũteithie rĩrĩa rĩothe tũrĩ ũtungata-inĩ. Gũtirĩ ũndũ tũngĩhota kũhingia tũtateithĩtio nĩ roho wake mũtheru ũrĩa ũrĩ hinya. (Thab. 127:1; Luk. 11:13) Rĩrĩa ũrahoya Jehova ũteithio, mũgwetere maũndũ ĩmwe kwa ĩmwe. Kwa ngerekano, no ũmũũrie agũtongorie nĩguo wone andũ arĩa marĩ na mwerekera ũrĩa wagĩrĩire, na arĩa mangĩenda gũthikĩrĩria. Ningĩ nĩ twagĩrĩirũo gũkoragwo na wĩruti witũ wa Bibilia. Kiugo kĩa Ngai kiugaga ũũ: “[Mwĩmenyagĩrei] wendi wa Ngai ũrĩa mwega, wa gwĩtĩkĩrĩka na mũkinyanĩru.” (Rom. 12:2) Kwĩruta nĩ gũtũteithagia kũmenya Ngai wega makĩria, na kwoguo rĩrĩa tũraria na andũ nĩ marĩonaga atĩ nĩ twĩtĩkĩtie biũ maũndũ marĩa tũrameera. w21.05 18 ¶14-16

Ĩ angĩkorũo o na thutha wa gwĩkĩra kĩyo kĩingĩ na kũhoya nĩ ũrona atĩ mũrutwo waku ndarakũra kĩĩroho, na ũkona atĩ nĩ ũrabatara gũtiga kwĩruta nake? Ĩ angĩkorũo ndũrĩ weruta na mũndũ nginya agakinyĩrĩra kũbatithio? Hihi nĩ wagĩrĩirũo kũigua ũũru wone ta Jehova atakenagio nĩ ũtungata waku? Nĩ rĩ Jehova angiuga atĩ nĩ tũgaacĩrĩte ũtungata-inĩ? Jehova aroraga kĩyo na ũkirĩrĩria witũ. Jehova onaga tũgaacĩrĩte ũtungata-inĩ witũ angĩkorũo nĩ tũrathiĩ na mbere kũmũtungatĩra tũrĩ na kĩyo na wendo gũtekũmakania ũrĩa andũ arĩa angĩ maramũkĩra ndũmĩrĩri itũ. Paulo aandĩkire ũũ: “Ngai ndagĩte ũthingu nĩguo ariganĩrũo nĩ wĩra wanyu o na wendo ũrĩa muoonanirie nĩ ũndũ wa rĩĩtwa rĩake na njĩra ya gũtungata o na gũthiĩ na mbere gũtungata arĩa aamũre.” (Ahib. 6:10) Jehova nĩ aririkanaga kĩyo na wendo witũ o na angĩkorũo hatirĩ mũndũ tũteithĩtie agakinyĩrĩra kũbatithio. Kwoguo ciugo cia rĩandĩko rĩa ũmũthĩ iria Paulo eerire Akorintho no igwĩkĩre ngoro. w21.10 25 ¶4-6

Jesu aarũmbũyanagia na arutwo ake na njĩra ya ũtugi na wendo. Nĩ aamenyaga atĩ maũndũ mao na ũhoti wao warĩ ngũrani. Kwoguo othe matingĩehokeirũo wĩra ũmwe, na o mũndũ angĩakorirũo na maumĩrĩra ngũrani ũtungata-inĩ. O na kũrĩ ũguo, nĩ aakenagio nĩ kĩyo kĩao othe. Mwerekera ũcio wa Jesu nĩ woonekire wega ngerekano-inĩ ya taranda. Thĩinĩ wa ngerekano ĩyo, mwathi wa ngombo aaheire o ngombo wĩra “kũringana na ũhoti wayo.” Ngombo igĩrĩ ciarĩ na kĩyo, no ĩmwe yacio yaheirũo taranda nyingĩ gũkĩra ĩyo ĩngĩ. No mwathi wacio eerire ngombo icio cierĩ ũũ: “Nĩ wĩkĩte wega ngombo ĩno njega na njĩhokeku!” (Mat. 25:14-23) Jesu arũmbũyanagia na ithuĩ na njĩra ya ũtugi na wendo. Nĩ amenyaga atĩ ũhoti na maũndũ maitũ nĩ ngũrani, na nĩ akenaga rĩrĩa twerutanĩria kũringana na ũhoti witũ. Nĩ twagĩrĩirũo kwĩgerekania na Jesu. w21.07 23 ¶12-14

Ti hingo ciothe Mũthamaki Daudi oonanagia tha. Kwa ngerekano, rĩrĩa mũthuri ũmwe warĩ mũũru wetagwo Nabali aamwarĩirie na njĩra ĩtarĩ ya gĩtĩo na akĩrega kũmũhe irio marĩ na arũme ake, Daudi nĩ aarakarire mũno na agĩtua itua rĩa kũũraga Nabali o hamwe na arũme othe a nyũmba yake. No mũtumia wa Nabali wetagwo Abigaili, ũrĩa warĩ mũtugi na warĩ na ũkirĩrĩria, nĩ ooire ikinya na ihenya na agĩteithia Daudi ndagakorũo na mahĩtia ma ũiti wa thakame. (1 Sam. 25:9-22, 32-35) Rĩrĩa Daudi aacinirũo nĩ marakara, aatuire atĩ Nabali na arũme ake othe maagĩrĩirũo gũkua. Ningĩ thutha ũcio, Daudi aatuĩrĩire mũndũ ũrĩa warĩ ngerekano-inĩ ya Nathani atĩ aagĩrĩirũo kũũragwo. No twĩyũrie atĩrĩ, na tondũ Daudi aarĩ mũndũ wakoragwo na ngoro njega-rĩ, nĩ kĩĩ gĩatũmire atuĩre mũndũ ũcio waiyĩte ngʼondu na njĩra njũru ũguo? Gwĩciria ũndũ ũrĩa wakoretwo wekĩka harĩ Daudi no gũtũteithie. Ihinda-inĩ rĩu, maũndũ marĩa Daudi eekĩte nĩ maatũmĩte akorũo na thamiri ĩrĩ na ũcuke. Rĩrĩa mũndũ atuĩra andũ arĩa angĩ na njĩra ĩtarĩ ya tha, ũndũ ũcio wonanagia atĩ ũrata wake na Jehova ti mwega. w21.10 12 ¶17-18, 20

Ciugo cia rĩandĩko rĩa ũmũthĩ iratũruta atĩ no tũhote kwĩgerekania na Jehova, ũrĩa nĩwe kĩonereria kĩrĩa kĩega biũ harĩ ũtheru. No mũhaka tũkoragwo tũrĩ atheru mĩthiĩre-inĩ itũ. Ũndũ ũcio no woneke ta ũtangĩhoteka tondũ tũtirĩ akinyanĩru. Mũtũmwo Petero nĩ eekire mahĩtia maita maigana ũna, no kĩonereria gĩake nĩ gĩtuonagia atĩ no tũhote gũkorũo tũrĩ atheru. Rĩrĩa andũ aingĩ meciria ũhoro wa mũndũ mũtheru, mbica ĩrĩa yũkaga meciria-inĩ nĩ ya mũndũ wĩkĩrĩte nguo cia kĩndini, ũikaraga hingo ciothe atukĩte gĩthithi. No ũguo tiguo andũ atheru makoragwo matariĩ. Jehova nĩ mũtheru, na Bibilia yugaga atĩ nĩ ‘Ngai mũkeni.’ (1 Tim. 1:11) Ningĩ yugaga atĩ “gũkena” nĩ andũ arĩa mamũthathayagia. (Thab. 144:15) Jesu nĩ aamenereirie andũ arĩa meehumbaga nguo cia kwĩyonania, na meekaga maũndũ ma ũthingu nĩguo monwo nĩ andũ arĩa angĩ. (Mat. 6:1; Mar. 12:38) Akristiano a ma nĩ makoragwo moĩ gũkorũo marĩ atheru nĩ kuuga atĩa, kuumana na ũrĩa merutĩte thĩinĩ wa Bibilia. Tũrĩ na ma atĩ Ngai witũ ũrĩ wendo ndangĩtwĩra twĩke ũndũ tũtangĩhota gwĩka. w21.12 2 ¶1, 3

Jehova nĩ atũheete iheo nyingĩ mũno, na kĩheo kĩmwe kĩnene atũheete nĩ ũhoti wa kũmũthathayia. Nĩ tuonagia Jehova atĩ nĩ tũmwendete na njĩra ya ‘kũrũmĩrĩra maathani make.’ (1 Joh. 5:3) Rĩathani rĩmwe rĩrĩa Jehova endaga twathĩkĩre nĩ rĩrĩa Jesu aatũheire rĩa gũtua andũ arutwo na kũmabatithia. (Mat. 28:19) Ningĩ nĩ aatwathire twendanage. (Joh. 13:35) Jehova nĩ amũkagĩra andũ arĩa mamwathĩkagĩra akamaingĩria thĩinĩ wa famĩlĩ ya thĩ yothe ya ndungata ciake. (Thab. 15:1, 2) Wendo nĩyo ngumo ĩrĩa nene ya Jehova. (1 Joh. 4:8) Jehova aatwendire o na tũtamũmenyete. (1 Joh. 4:9, 10) Rĩrĩa twenda andũ arĩa angĩ, tũkoragwo tũkĩĩgerekania nake. (Ef. 5:1) Njĩra ĩmwe njega ya kuonania atĩ nĩ twendete andũ nĩ kũmateithia merute ũhoro wĩgiĩ Jehova hĩndĩ ĩno marĩ na mweke. (Mat. 9:36-38) Rĩrĩa tweka ũguo, nĩ tũtũmaga magĩe na kĩĩrĩgĩrĩro gĩa gũkaaingĩra thĩinĩ wa famĩlĩ ya Ngai. w21.08 5-6 ¶13-14

Wendo mũnene wa Jesu harĩ Jehova nĩ wamũtindĩkire kwĩima nĩ ũndũ wa Ithe na nĩ ũndũ witũ. (Joh. 14:31) Jesu nĩ oonanirie atĩ nĩ endete andũ mũno, kũgerera njĩra ĩrĩa aatũũrire nayo gũkũ thĩ. O mũthenya nĩ oonanagia wendo na ũcayanĩri o na nginyagia hĩndĩ ĩrĩa andũ amwe maamũkararagia. Njĩra ĩmwe nene oonanirie wendo nayo nĩ kũruta andũ ũhoro wĩgiĩ Ũthamaki wa Ngai. (Luk. 4:43, 44) Jesu ningĩ nĩ oonanirie wendo wa kwĩima harĩ Ngai na andũ, na njĩra ya kwĩrutĩra kũnyamarĩka na gũkua gĩkuũ kĩa ruo moko-inĩ ma ehia. Nĩ ũndũ ũcio, nĩ aatũmire tũgĩe na mweke wa gũkoona muoyo wa tene na tene. Tweyamũrĩire Jehova na tũkĩbatithio tondũ nĩ twendete Ithe witũ wa igũrũ. Kwoguo o ta Jesu, twagĩrĩirũo kuonania nĩ twendete Jehova kũgerera ũrĩa tũrũmbũyagia andũ arĩa angĩ. Mũtũmwo Johana aandĩkire ũũ: “Mũndũ ũrĩa ũtendete mũrũ wa Ithe, ũcio onete, ndangĩhota kwenda Ngai, ũcio atarĩ ona.”—1 Joh. 4:20. w22.03 10 ¶8-9

O na gũtuĩka nĩ tũkenagĩra kũhũthĩra mahinda hamwe na Jehova, rĩmwe ndũkoragwo ũrĩ ũndũ mũhũthũ gwĩka ũguo. Nĩ tũkoragwo na mĩhangʼo mĩingĩ ũtũũro-inĩ, ũndũ ũrĩa ũngĩtũma twage mahinda ma gwĩka maũndũ ma kĩĩroho. Kũruta wĩra, kũrũmbũiya famĩlĩ, na gwĩka maũndũ mangĩ ma bata, no kuoye mahinda maitũ maingĩ nginya tũkaga ihinda rĩa kũhoya, kwĩruta, o na kana gwĩcũrania. Nĩ harĩ ũndũ ũngĩ ũngĩoya mahinda maitũ. Tũngĩaga kwĩmenyerera, no twĩkore tũgĩtĩkĩria maũndũ mamwe matarĩ moru, moe mahinda maitũ ma gũkuhĩrĩria Jehova. Kwa ngerekano, ta wĩcirie ũhoro wĩgiĩ gwĩkenia. Ithuothe nĩ twendete kũgĩa na ihinda rĩa kũhurũka. Ĩndĩ o na maũndũ mega ma gwĩkenia no moe mahinda maitũ maingĩ, nginya twage ihinda rĩa kũigana tũngĩhũthĩra hamwe na Jehova. Nĩ tũrabatara kũririkanaga atĩ maũndũ ma gwĩkenia timo ma bata makĩria.—Thim. 25:27; 1 Tim. 4:8. w22.01 26 ¶2-3

Hĩndĩ ĩrĩa Jehova aathire Aisiraeli mendage mũndũ ũrĩa marigainie, ti kuuga atĩ maagĩrĩirũo kwenda tu andũ arĩa maarĩ a rũrĩrĩ rũmwe, kana arĩa mooimĩte bũrũri-inĩ ũmwe. Ningĩ nĩ aameerĩte mende andũ a kũngĩ arĩa maaikaranagia nao. Ũndũ ũcio nĩ ũtaarĩirio wega rĩandĩko-inĩ rĩa Maũndũ ma Alawii 19:33, 34. Mũndũ wa kũngĩ aagĩrĩirũo kuonwo ta ‘mũndũ ũciarĩirũo bũrũri-inĩ wao,’ na Aisiraeli nĩ maagĩrĩirũo ‘kũmwenda’ o ta ũrĩa meeyendete. Kwa ngerekano, Aisiraeli nĩ maagĩrĩirũo gwĩtĩkĩria mũndũ wa kũngĩ o hamwe na andũ arĩa athĩni mahaarage matigari ma mĩgũnda yao. (Alaw. 19:9, 10) Ũtaaro ũcio wĩgiĩ kuonia andũ a kũngĩ wendo no ũhũthĩkaga harĩ Akristiano ũmũthĩ. (Luk. 10:30-37) Na njĩra ĩrĩkũ? Andũ milioni nyingĩ nĩ mathamĩte mabũrũri-inĩ mao na magathiĩ mabũrũri-inĩ mangĩ, na kwahoteka amwe ao maikaraga hakuhĩ na kũrĩa ũikaraga. Nĩ ũndũ wa bata kuonia andũ ta acio gĩtĩo, makorũo marĩ ciana, athuri, kana atumia. w21.12 12 ¶16

O ũrĩa tũkwĩhoka Jehova ihinda-inĩ rĩrĩ, noguo tũgũkorũo na ma atĩ nĩ agatũteithia ihinda rĩrĩa rĩũkĩte. No tũbatare gũkorũo na wĩtĩkio na twĩhoke Jehova nĩguo tũhote kũũria mũndũ ũrĩa ũtwandĩkĩte atwĩtĩkĩrie tũthiĩ kĩgomano, kana atũcenjerie mathaa ma wĩra nĩguo tũhote gũthiĩ mĩcemanio yothe na tũhũthĩre mahinda makĩria ũtungata-inĩ. Ĩ ũrĩa ũtwandĩkĩte angĩrega gũtũthikĩrĩria na tũbutwo wĩra? Hihi nĩ twĩtĩkĩtie atĩ Jehova ndagatũtiganĩria na atĩ hingo ciothe nĩ arĩtũheaga mabataro maitũ? (Ahib. 13:5) Andũ aingĩ arĩa marĩ ũtungata-inĩ wa mahinda mothe nĩ mataaragĩria maũndũ meyoneire marĩa monanagia ũrĩa Jehova aamateithirie rĩrĩa maabataraga mũno ũteithio. Jehova nĩ mwĩhokeku. Tũtirabatara gwĩtigĩra mahinda marĩa maroka tondũ Jehova arĩ hamwe na ithuĩ. Twathiĩ na mbere kũiga wendi wake mbere ũtũũro-inĩ witũ, ndarĩ hĩndĩ agatũtiganĩria. w22.01 7 ¶16-17

Mwĩhoko witũ kwerekera athuri ũngĩgerio na njĩra ĩrĩkũ? Ĩ angĩkorũo mũndũ ũrĩa weheretio kĩũngano-inĩ nĩ mũrata witũ wa hakuhĩ? No kũhoteke twĩyũrie kana athuri nĩ mararorire maũndũ mothe kana nĩ maratuire itua rĩu na njĩra ya Jehova. Nĩ kĩĩ kĩngĩtũteithia gũtũũria muonere mwega kwerekera itua rĩu rĩa athuri? Nĩ twagĩrĩirũo kũririkanaga atĩ kweheria mũndũ kĩũngano-inĩ ũkoragwo ũrĩ mũbango wa Jehova, na nĩ ũteithagia kĩũngano na ũgateithia mũndũ ũrĩa wĩhĩtie. Mũndũ ũtarerira angĩtĩkĩrio gũthiĩ na mbere gũikara kĩũngano-inĩ, no akorũo na ũgucania ũtarĩ mwega harĩ andũ arĩa angĩ. (Gal. 5:9) Makĩria ma ũguo, no age kuona ũritũ wa mehia make, na age kuona bata wa kũgarũrĩra mwĩcirĩrie na ciĩko ciake nĩguo ahote gwĩtĩkĩrĩka rĩngĩ nĩ Jehova. (Koh. 8:11) No tũkorũo na ma atĩ rĩrĩa athuri maratua itua kana mũndũ nĩ ekweherio kĩũngano-inĩ, nĩ moyaga ũndũ ũcio na ũritũ. w22.02 5 ¶13-14

Wetereri na ũtugi nĩ ibataranagia, makĩria rĩrĩa mũndũ amba kũrega ũtaaro wa Bibilia. Mũthuri wa kĩũngano ndagĩrĩire kũrakara mũrũ kana mwarĩ wa Ithe witũ angĩaga gwĩtĩkĩra ũtaaro kana kũũhũthĩra. Kwoguo rĩrĩa mũthuri wa kĩũngano arahoya arĩ wiki, no orie Jehova arathime mũndũ ũrĩa ũrabatara kũheo ũtaaro na amũteithie gũtaũkĩrũo kĩrĩa kĩratũma aheo ũtaaro ũcio na aũhũthĩre. Mũndũ ũrĩa waheo ũtaaro no abatare ihinda rĩa kwamba gwĩcũrania ũtaaro ũrĩa aheo. Mũthuri wa kĩũngano angĩheana ũtaaro arĩ na wetereri na ũtugi, no ũkorũo ũrĩ ũndũ mũhũthũ harĩ ũrĩa waheo ũtaaro kũwamũkĩra ategũtindanĩra na njĩra ĩrĩa ũtaaro waheanwo nayo. Nĩ wega kũririkana atĩ ũtaaro wagĩrĩire kuuma Kiugo-inĩ kĩa Ngai. Muoroto witũ to kũheana ũtaaro ũrĩ na ũguni tu, no ningĩ nĩ ũtaaro ‘ũrĩtũmaga ngoro ĩkene.’—Thim. 27:9. w22.02 18 ¶17; 19 ¶19

Tũngĩkorũo tũkĩhoya Jehova atũhe hinya wa gũkirĩrĩria igerio kana wa gũtooria mũtugo mũna ũtarĩ mwega, no tuone ta aroya ihinda iraihu atarĩ aracokia mahoya macio maitũ. Nĩ kĩĩ gĩtũmaga Jehova age gũcokia mahoya maitũ mothe o rĩo rĩrĩa twamũhoya? Onaga mahoya maitũ ma kuuma ngoro marĩ ũira wa kuonania atĩ tũrĩ na wĩtĩkio. (Ahib. 11:6) Ningĩ rĩrĩa twahoya Jehova nĩ endaga kuona kana nĩ tũrerutanĩria gwĩka kũringana na mahoya maitũ na gwĩka wendi wake. (1 Joh. 3:22) Kwoguo no tũbatare gũkorũo na wetereri na gwĩka kũringana na mahoya maitũ angĩkorũo nĩ tũrenda gũtooria mũtugo mũna mũũru tũrĩ naguo. Jesu nĩ aatũteithirie kuona atĩ mahoya maitũ mamwe no mage gũcokio o hĩndĩ ĩyo. Aaugire ũũ: “Thiĩi na mbere kũhoya, na nĩ mũkũheo; thiĩi na mbere gũcaria, na nĩ mũkuona; thiĩi na mbere kũringaringa, na nĩ mũkũhingũrĩrũo; tondũ mũndũ o wothe ũhoyaga nĩ aheagwo, na mũndũ o wothe ũcaragia nĩ onaga, na mũndũ o wothe ũrĩringaringaga, nĩ arĩhingũragĩrũo.”—Mat. 7:7, 8. w21.08 8 ¶1; 10 ¶9-10

Nĩ ũrabatara gũthiĩ na mbere kwĩruta Kiugo kĩa Ngai nĩguo wĩkĩre hinya wĩtĩkio waku harĩ Mũũmbi. (Josh. 1:8) Wĩcirie ũhoro wĩgiĩ maũndũ marĩa mothe Bibilia yarathĩte na makĩhinga na ũrĩa andĩki ngũrani a Bibilia maandĩkire maũndũ maraiguithania. Gwĩka ũguo no gwĩkĩre wĩtĩkio waku hinya atĩ tuombirũo nĩ Mũũmbi ũrĩ wendo na ũũgĩ na nĩwe waandĩkithirie Bibilia. (2 Tim. 3:14; 2 Pet. 1:21) Rĩrĩa ũrathoma Kiugo kĩa Ngai, wĩcirie ũguni ũrĩa uumanaga na ũtaaro wakĩo. Kwa ngerekano, Bibilia nĩ yaugĩte o tene atĩ kwenda mbeca nĩ ũgwati na no gũtũreherere “ruo rũingĩ.” (1 Tim. 6:9, 10; Thim. 28:20; Mat. 6:24) Na githĩ ũndũ ũcio ndũronania atĩ ũtaaro ũcio wa Bibilia wĩgiĩ kwaga kwenda mbeca nĩ wa bata mũno! Hihi harĩ na ũtaaro ũngĩ wa Bibilia wonete ũrĩ na ũguni? O ũrĩa tũrona bata wa motaaro ma Bibilia, noguo tũrĩiguaga tũkĩenda kũhũthĩra ũũgĩ ũrĩa tũheagwo nĩ Mũũmbi witũ ũrĩ wendo. (Jak. 1:5) Ũndũ ũcio nĩ ũrĩtũmaga tũkorũo na gĩkeno makĩria ũtũũro-inĩ witũ.—Isa. 48:17, 18. w21.08 17-18 ¶12-13

Angĩkorũo nĩ ũikangĩtie tũmatukũ, koragwo na ma atĩ Jehova no aririkanaga wĩra ũrĩa wanaruta ihinda ihĩtũku. Nĩ ũkoretwo na kĩyo gĩa kũruta wĩra wa kũhunjia. Nĩ ũkirĩrĩirie magerio, nginya mangĩ ma kũũraga ngoro, ũkarũmia ithimi cia Bibilia cia ũthingu, ũkahingia mawĩra maritũ ithondeka-inĩ, na ũkamenyeria arĩa angĩ. Ningĩ nĩ wĩrutanĩirie biũ gũtwarana na mogarũrũku maingĩ marĩa ithondeka rĩa Jehova rĩkĩte. Ningĩ nĩ ũteithĩrĩirie na ũgekĩra ngoro andũ arĩa marĩ ũtungata-inĩ wa mahinda mothe. Jehova Ngai nĩ akwendete mũno nĩ ũndũ wa gũkorũo ũrĩ mwĩhokeku. Eranĩire atĩ “ndagaatiganĩria andũ ake arĩa ehokeku.” (Thab. 37:28) Atũheete kĩĩranĩro gĩkĩ: “O nginya rĩrĩa mũkaagĩa mbuĩ ngũtũũra ndĩmũnyitĩrĩire.” (Isa. 46:4) Kwoguo ndwagĩrĩirũo gwĩciria atĩ tondũ rĩu ũrĩ mũkũrũ, gũtirĩ ũndũ wa bata ũngĩhingia ithondeka-inĩ rĩa Jehova. Ũrĩ wa bata mũno! w21.09 3 ¶4

Jehova onanagia tha tondũ nĩ arĩ ũũgĩ mũingĩ mũno. Bibilia yugaga atĩ “ũũgĩ ũrĩa uumaga igũrũ . . . , ũiyũirũo nĩ tha na maciaro mega.” (Jak. 3:17) O ta mũciari ũrĩ na wendo, Jehova nĩ oĩ atĩ tha ciake nĩ igunaga ciana ciake. (Isa. 49:15) Nĩ ũndũ wa tha cia Jehova, ndungata ciake nĩ ikoragwo na kĩĩrĩgĩrĩro, o na gũtuĩka ti nginyanĩru. Kwoguo, ũũgĩ mũingĩ ũrĩa Jehova akoragwo naguo nĩ ũmũteithagia kuonania tha hĩndĩ ĩrĩa arona harĩ na gĩtũmi kĩiganu gĩa gwĩka ũguo. O na kũrĩ ũguo, nĩ akoragwo na ũigananĩru harĩ kuonania ngumo ĩyo ya tha. Tondũ nĩ mũũgĩ, ndonanagia tha hĩndĩ ĩrĩa arona ta gwĩka ũguo kũngĩonania nĩ aranyita mbaru ũndũ ũcio mũũru wĩkĩtwo. Twagĩrĩirũo gwĩka atĩa ndungata ya Jehova ĩngĩthuura gũtũũra mũtũũrĩre wa ũũra-thoni? Paulo aandĩkire ũũ atongoretio nĩ roho: ‘Mũtige gũthiaga thiritũ nake.’ (1 Kor. 5:11) Andũ arĩa maga kwĩrira nĩ meheragio thĩinĩ wa kĩũngano. Ũndũ ũcio ũkoragwo ũrĩ wa bata nĩ ũndũ wa kũgitĩra aarĩ na ariũ a Ithe witũ na gũtũũgĩria njĩra cia ũthingu cia Jehova. w21.10 9-10 ¶7-8

Kũruta mĩhothi ya gũteithĩrĩria wĩra wa Ũthamaki nĩ njĩra ya gũthathaiya Jehova. Aisiraeli maatiagĩrĩirũo gũthiĩ mbere ya Jehova moko matheri. (Gũcok. 16:16) Maagĩrĩirũo gũthiĩ na iheo kũringana na ũhoti wa o mũndũ. Gwĩka ũguo nĩ kuoonanagia atĩ maarĩ na ngatho nĩ ũndũ wa mĩbango ĩrĩa yekĩtwo ya kũmahũnia kĩĩroho. Tũngĩonania atĩa wendo witũ harĩ Jehova na ngatho nĩ ũndũ wa irio cia kĩĩroho iria twamũkagĩra? Ũndũ ũmwe tũngĩka nĩ kũruta mĩhothi ya gũteithĩrĩria kĩũngano na wĩra wa thĩ yothe kũringana na ũhoti witũ. Mũtũmwo Paulo aaugire ũũ: “Angĩkorũo o mbere harĩ na wendi, ũndũ ũcio nĩ wĩtĩkĩrĩkĩte makĩria kũringana na kĩrĩa mũndũ arĩ nakĩo, no ti kũringana na kĩrĩa atarĩ nakĩo.” (2 Kor. 8:4, 12) Jehova nĩ akenagio nĩ mũhothi witũ o na angĩkorũo nĩ mũnini.—Mar. 12:42-44. w22.03 24 ¶13

Athuri a kĩũngano matingĩhota kwehereria andũ a Jehova moritũ mothe marĩa maragerera. O na kũrĩ ũguo, Jehova nĩ endaga athuri merutanĩrie ũrĩa wothe mangĩhota gwĩkĩra ngoro na kũgitĩra ngʼondu ciake. O na athuri marĩ na maũndũ maingĩ ma gwĩka-rĩ, mangĩka atĩa nĩguo mone mahinda ma kũheana ũteithio ũrĩa ũrabatarania? Rũmagĩrĩrai kĩonereria kĩa mũtũmwo Paulo. Hingo ciothe Paulo aakoragwo ehaarĩirie kũgaathĩrĩria aarĩ na ariũ a Ithe witũ na kũmekĩra ngoro. Athuri a kĩũngano no marũmĩrĩre kĩonereria gĩake na njĩra ya kũrũmbũyania na andũ a Jehova na njĩra ya wendo na ũtugi. (1 Thes. 2:7) Paulo nĩ eeraga aarĩ na ariũ a Ithe witũ atĩ nĩ amendete, na atĩ Jehova nĩ amendete. (2 Kor. 2:4; Ef. 2:4, 5) Paulo nĩ aahũthagĩra mahinda na andũ kĩũngano-inĩ tondũ aamonaga marĩ arata ake. Nĩ oonanagia atĩ nĩ amehokete na njĩra ya kũmeera cara-rũkũ maũndũ marĩa maamũtangaga o hamwe na mawathe make. (2 Kor. 7:5; 1 Tim. 1:15) O na kũrĩ ũguo, Paulo ndaameeraga maũndũ macio nĩguo mecirie o ũhoro wa mathĩna make, no eendaga kũmateithia. w22.03 28 ¶9-10