Septemba

Andũ amwe matukũ-inĩ ma Jesu nĩ meendaga kuona ũndũ ũngĩ makĩria o na thutha wa kũigua morutani mega ma Jesu. No rĩrĩa aaregire kũmonia kĩmenyithia kĩrĩa meendaga kuona, makĩhĩngĩka. (Mat. 16:4) Maandĩko moigaga atĩa? Mũnabii Isaia aandĩkire ũũ igũrũ rĩgiĩ Mesia: “Ndungata yakwa . . . ndĩkaanĩrĩra o na kana yambatĩrie mũgambo wayo, na ndĩkaareka mũgambo wayo ũiguĩke njĩra-inĩ.” (Isa. 42:1, 2) Jesu ndeegoocithirie hĩndĩ ya ũtungata wake gũkũ thĩ. Ndaakire mahekarũ manene, ningĩ ndeekĩraga nguo cia kĩĩndini cia kũmũtigithũkania na andũ arĩa angĩ, kana kwĩra andũ mamwĩtage marĩĩtwa ma gĩtĩo. na rĩrĩa aaciirithagio, Jesu nĩ aaregire kũringa kĩama nĩguo akenie Mũthamaki Herode, o na akorũo muoyo wake warĩ ũgwati-inĩ. (Luk. 23:8-11) Nĩ kũrĩ hĩndĩ Jesu aaringaga ciama, no ũndũ ũrĩa eekagĩrĩra mũno nĩ kũhunjia ũhoro ũrĩa mwega. Akĩaria ũhoro wĩgiĩ wĩra wa kũhunjia, eerire arutwo ake ũũ: “Nĩkĩo gĩatũmire njũke.”—Mar. 1:38. w21.05 4 ¶9-10

Tũcaragia andũ arĩa marĩ na “mwerekera ũrĩa wagĩrĩire wa kũheo muoyo wa tene na tene.” (Atũm. 13:48) Nĩguo tũteithie andũ acio gũtuĩka arutwo, nĩ twagĩrĩirũo kũmateithia (1) gũtaũkĩrũo, (2) gwĩtĩkia, na (3) kũhũthĩra maũndũ marĩa mareruta thĩinĩ wa Bibilia. (Kol. 2:6, 7; 1 Thes. 2:13) Andũ othe thĩinĩ wa kĩũngano no mateithie arutwo a Bibilia na njĩra ya kũmonia wendo na gũtũma maigue maiganĩire rĩrĩa moka mĩcemanio-inĩ. (Joh. 13:35) Mũhunjia ũrĩa ũreruta na mũrutwo, no abatare kũhũthĩra hinya na mahinda maingĩ gũteithia mũrutwo gũtigana na mĩtugo na mawĩtĩkio marĩa angĩkorũo ‘arũmĩtie mũno.’ (2 Kor. 10:4, 5) Mwarimũ no ahũthĩre mĩeri mĩingĩ gũteithia mũrutwo gwĩka mogarũrũku macio nĩguo agĩrĩre kũbatithio. No kũmũteithia eke mogarũrũku macio nĩ ũndũ wa bata mũno. w21.07 3 ¶6

Hihi nĩ tũkoragwo twĩtĩkĩtie biũ atĩ ũhoro ũrĩa tũrutanaga nĩguo ũhoro ũrĩa wa ma na atĩ ũthathaiya ũrĩa Aira a Jehova marũmagĩrĩra ũmũthĩ nĩguo wĩtĩkĩrĩkaga harĩ Jehova? Mũtũmwo Paulo nĩ eetĩkĩtie biũ atĩ aarĩ thĩinĩ wa ũhoro wa ma. (1 Thes. 1:5) Ndeetĩkĩtie ũhoro wa ma atĩ tondũ tu nĩ wamũkenagia. Paulo nĩ eerutaga Kiugo kĩa Ngai na kĩyo. Eetĩkĩtie atĩ “Rĩandĩko o rĩothe, rĩtongoretio nĩ roho wa Ngai.” (2 Tim. 3:16) Eerutire maũndũ marĩkũ? Maandĩko nĩ maateithirie Paulo gũkorũo na ũira ũtangĩkarario atĩ Jesu nĩwe Mesia ũrĩa weranĩirũo, ngũrani na atongoria a ndini ya Kĩyahudi arĩa mataatindanagĩra na ũira ũcio. Atongoria acio a ndini maaugaga atĩ mararutana ũhoro wa ma, ĩndĩ meekaga maũndũ marĩa matakenagia Ngai. (Tit. 1:16) Ngũrani nao, Paulo ndathuuranagia nĩ icunjĩ irĩkũ cia Kiugo kĩa Ngai angĩetĩkirie. Nĩ eehaarĩirie kũrutana na kũrũmĩrĩra “maũndũ mothe megiĩ wendi wa Ngai.”—Atũm. 20:27. w21.10 18 ¶1-2

O na gũtuĩka nĩ tũhandaga na tũgaitĩrĩria maĩ, nĩ twagĩrĩirũo kũririkana atĩ Ngai nĩwe ũkũragia. (1 Kor. 3:6, 7) Jehova onaga andũ othe marĩ a bata. Nĩ atũheete mweke wa kũrutithania wĩra hamwe na Mũrũ wake, wa gũcokanĩrĩria andũ kuuma ndũrĩrĩ-inĩ ciothe mbere ya mũico wa mũtabarĩre ũyũ ũkinyĩte. (Hag. 2:7) Wĩra witũ wa kũhunjia no ũringithanio na wĩra wa kũhonokia mĩoyo. Na tũtariĩ ta aruti wĩra a kũhonokia mĩoyo matũmĩtwo makahonokie andũ magwĩrĩirũo nĩ tĩri kware. O na gũtuĩka no andũ anini mangĩkorũo marĩ muoyo, wĩra ũrĩa ũrarutwo nĩ arĩa marahonokia mĩoyo nĩ wa bata mũno. Ũguo noguo wĩra witũ wa kũhunjia ũtariĩ. Tũtiũĩ nĩ andũ aigana matigarĩte thĩinĩ wa mũtabarĩre ũyũ wa Shaitani marabatara kũhonokio. No Jehova no ahũthĩre mũndũ o wothe gatagatĩ-inĩ gaitũ kũmateithia. Andreas ũrĩa ũikaraga Bolivia ooigire ũũ: “Hĩndĩ ciothe rĩrĩa ndona mũndũ eruta ũhoro wa ma na akabatithio, nĩ menyaga atĩ ũcio nĩ wĩra ũrutĩtwo nĩ andũ aingĩ.” Rekei tũtũũrie mwerekera o ta ũcio mwega ũtungata-inĩ witũ. Tweka ũguo, Jehova nĩ arĩtũrathimaga, na nĩ tũrĩkenagĩra biũ ũtungata witũ. w21.05 19 ¶19-20

Mũhĩti akoragwo na muoroto ũmwe, wa kũnyita kana kũũraga kĩrĩa anyita. O ta ũrĩa mũrata ũmwe harĩ arata atatũ a maheeni arĩa mookĩte kũũmĩrĩria Ayubu aagwetire, Shaitani no ahũthĩre mĩtego ĩtiganĩte. (Ayub. 18:8-10) Mũhĩti aheenagĩrĩria nyamũ atĩa ĩingĩre mũtego-inĩ wake? Ambaga gũtuĩria nyamũ ĩyo nĩguo amĩmenye wega. Hihi yendete gũthiĩ kũ? Hihi yendete kĩĩ? Nĩ mũtego ũrĩkũ ũngĩmĩnyita ĩterĩgĩrĩire? Shaitani atariĩ ta mũhĩti ũcio. Ambaga gũtũtuĩria, akamenya kũrĩa tũthiaga na maũndũ marĩa matũkenagia. Agacoka akahũthĩra mũtego ũrĩa ũgũtũnyita tũterĩgĩrĩire. O na kũrĩ ũguo, Bibilia yonanagia atĩ o na angĩkorũo mũndũ nĩ anyitĩtwo nĩ mũtego wa Shaitani, no ahote gwĩthara. Ningĩ nĩ ĩtũrutaga ũrĩa tũngĩĩthema mĩtego ya Shaitani. Mĩtego ĩĩrĩ ĩrĩa Shaitani ahũthagĩra na akanyita andũ aingĩ nĩ mwĩtĩo na mũkoroko. Shaitani nĩ ahũthĩrĩte mĩtego ĩyo mĩaka mĩingĩ na akanyita andũ aingĩ. Atariĩ ta mũtegi wa nyoni ũrĩa ũheenagĩrĩria nyoni ĩingĩre mũtego-inĩ. (Thab. 91:3) No to mũhaka tũnyitwo nĩ mĩtego ya Shaitani. Tũroiga ũguo tondũ Jehova nĩ atũguũrĩirie mawara marĩa Shaitani ahũthagĩra.—2 Kor. 2:11. w21.06 14 ¶1-2

Aarĩ na ariũ a Ithe witũ arĩa akũrũ nĩ a bata mũno. Kiugo kĩa Ngai kĩringithanagia mbuĩ ciao na thũmbĩ. (Thim. 20:29) O na kũrĩ ũguo, nĩ ũndũ mũhũthũ kwaga gũtindanĩra na aarĩ na ariũ a Ithe witũ acio akũrũ. Andũ ethĩ arĩa monaga andũ arĩa akũrũ marĩ a bata, no megĩre na kĩndũ kĩa bata gũkĩra ũtonga. Akristiano arĩa akũrũ nĩ a bata mũno maitho-inĩ ma Jehova Ngai. Nĩ oĩ ũrĩa matariĩ na nĩ andũ a mũthemba ũrĩkũ, na nĩ onaga na agakenio nĩ ngumo ciao njega. Nĩ akenaga hĩndĩ ĩrĩa andũ arĩa akũrũ monia andũ arĩa ethĩ maũndũ marĩa merutĩte, ihinda-inĩ rĩa mĩaka mĩingĩ ĩrĩa makoretwo makĩmũtungatĩra. (Ayub. 12:12; Thim. 1:1-4) Jehova ningĩ nĩ akenagio nĩ ũkirĩrĩria wao. (Mal. 3:16) Ũtũũro-inĩ wao nĩ makoretwo magĩcemania na mathĩna maingĩ, no nĩ mathiĩte na mbere gũkorũo marĩ ehokeku harĩ Jehova. Kĩĩrĩgĩrĩro kĩao kĩa mahinda marĩa maroka nĩ kĩgĩte na hinya makĩria, gũkĩra ũrĩa kĩarĩ hĩndĩ ĩrĩa meerutire ũhoro wa ma. Ningĩ Jehova nĩ amendete tondũ nĩ mathiaga na mbere kũhunjia ũhoro wa rĩĩtwa rĩake, ‘o na marĩ akũrũ.’—Thab. 92:12-15. w21.09 2 ¶2-3

Nĩ wega gũikaraga tũgĩĩthuthuragia ithuĩ ene. No twĩyũrie ciũria ta: ‘Hihi rĩrĩa nderingithania na andũ arĩa angĩ nĩ nyonaga ndĩ wa bata kũmakĩra? Hihi ndĩrutanagĩria kĩũngano-inĩ nĩguo nyoneke ndĩ wa bata gũkĩra arĩa angĩ othe kana hihi nĩgetha nyoneke ndĩ mwega gũkĩra mũrũ kana mwarĩ wa Ithe witũ mũna? Kana hihi ndĩrutanagĩria nĩguo he Jehova kĩrĩa kĩega biũ?’ Bibilia ĩtwĩraga twĩtheme kwĩringithania na andũ arĩa angĩ. Nĩkĩ? Ũndũ ũmwe nĩ atĩ, tũngĩĩciria nĩ tũkĩrĩte mũrũ kana mwarĩ wa Ithe witũ na ũndũ mũna no twambĩrĩrie gwĩtĩa. Ũndũ ũngĩ nĩ atĩ, tũngĩambĩrĩria kwĩringithania na andũ arĩa angĩ na tuone atĩ nĩ matũkĩrĩte na ũndũ mũna, no tũkue ngoro. (Rom. 12:3) Nĩ twagĩrĩirũo kũririkanaga atĩ Jehova atũgucĩrĩirie harĩ we ti tondũ wa ũthaka witũ, mwarĩrie, kana atĩ tondũ nĩ tũĩkaine, no nĩ tondũ nĩ tũmwendete na nĩ tũkoragwo twĩhaarĩirie gũthikĩrĩria Mũrũwe.—Joh. 6:44; 1 Kor. 1:26-31. w21.07 14-15 ¶3-4

Nĩguo tũhote kũgarũrĩra mwĩcirĩrie witũ, nĩ twagĩrĩirũo kũhoya, kwĩruta Kiugo kĩa Ngai, na gwĩcũrania. Nĩ ũndũ ũcio, thiĩ na mbere gwĩkaga maũndũ macio na ũhoyage Jehova akũhe hinya. Roho wake mũtheru no ũgũteithie gũtiga kwĩringithanagia na andũ arĩa angĩ. Jehova ningĩ nĩ arĩgũteithagia kũmenya kana nĩ ũkũrĩtie mwĩtĩo kana ũiru ngoro-inĩ yaku, na agũteithie gwĩka mogarũrũku marĩa marabatarania o na ihenya. (2 Maũ. 6:29, 30) Jehova nĩ oĩ ngoro citũ. Ningĩ nĩ oĩ atĩ nĩ twĩrutanagĩria kũrũa na mĩerekera mĩũru ya thĩ ĩno na ya kwaga gũkinyanĩra gwitũ. Rĩrĩa Jehova ona tũkĩĩrutanĩria kũrũa na mĩerekera ta ĩyo mĩũru, nĩ atwendaga o na makĩria. Jehova ahũthĩrĩte ngerekano ya wendo ũrĩa ũkoragwo gatagatĩ ka mũtumia na kaana gake nĩguo atũteithie gũtaũkĩrũo ũrĩa aiguaga gũtwerekera. (Isa. 49:15) Nĩ twĩkĩragwo ngoro mũno kũmenya atĩ Jehova akoragwo na wendo ta ũcio gũtwerekera rĩrĩa ona tũkĩĩrutanĩria kũmũtungatĩra na ngoro yothe. w21.07 24-25 ¶17-19

No tuongerere gĩkeno gitũ na njĩra ya kwĩrutanĩria wĩra-inĩ o wothe tũheetwo ũtungata-inĩ wa Jehova. Koragwo na kĩyo wĩra-inĩ wa kũhunjia na ũkerutanĩria biũ kĩũngano-inĩ. (Atũm. 18:5; Ahib. 10:24, 25) Rĩrĩa ũrathiĩ mĩcemanio, wĩhaaragĩrie wega nĩguo ũkahota kũruta macokio ma gwaka andũ arĩa angĩ. Oyaga na ũritũ gacunjĩ ka mũrutwo karĩa waheo thĩinĩ wa mũcemanio wa gatagatĩ-inĩ ga kiumia. Na angĩkorũo nĩ waheo wĩra mũna thĩinĩ wa kĩũngano, tigagĩrĩra nĩ waũhingia ihinda-inĩ rĩrĩa rĩagĩrĩire. Ndũkonage ta wĩra mũna waheo ta arĩ wa gũgũtera mathaa. Wĩrutanagĩrie kwagagĩria ũhoti waku wa gwĩka maũndũ. (Thim. 22:29) O ũrĩa ũkwĩrutanĩria maũndũ-inĩ marĩa wĩhokeirũo, noguo ũgũkũra kĩĩroho na wongerere gĩkeno gĩaku. (Gal. 6:4) Ningĩ nĩ ũrĩonaga ũrĩ ũndũ mũhũthũ gũkena hamwe na arĩa maheo mĩeke ĩrĩa o nawe ũngĩenda kwĩhokerũo.—Gal. 5:26. w21.08 22 ¶11

No mũhaka twĩtheme mwĩtĩo, na tũkorũo na wendi wa kũrutwo nĩ Jehova. O ta ũrĩa mũrimũ ũngĩtũma ngoro ĩritũhĩrũo kũhũũra thakame, no taguo mwĩtĩo ũngĩtũma ũkorũo ũrĩ ũndũ mũritũ gwathĩkĩra ũtongoria wa Jehova. Afarisai nĩ moomĩtie ngoro ciao mũno nginya makĩrega gwĩtĩkĩra ũira ũtangĩakararirio ũrĩa woonanagia atĩ Jesu aarĩ na roho wa Ngai na aarĩ Mũrũ wa Ngai. (Joh. 12:37-40) Mwĩtĩo wao warĩ mũũru tondũ nĩ watũmire morũo nĩ mweke wa gũkagĩa na muoyo wa tene na tene. (Mat. 23:13, 33) Nĩ ũndũ wa bata mũno tũthiĩ na mbere gwĩtĩkĩria Kiugo kĩa Ngai na roho wake itũteithie kũgarũrĩra ũmũndũ witũ na itongoragie meciria maitũ na ciĩko citũ. Jakubu nĩ eetĩkĩrire kũrutwo nĩ Jehova tondũ aarĩ mwĩnyihia. Ningĩ wĩnyihia nĩ wamũteithirie gũtuĩka mũrutani mwega. w22.01 10 ¶7

Rĩrĩa ‘twahoya tũtegũtigithĩria,’ no tũkorũo na ma atĩ Ithe witũ wa igũrũ nĩ egũtũthikĩrĩria. (Kol. 4:2) O na gũtuĩka no tuone ta Jehova aikarire mũno agĩgacokia, atwĩrĩire atĩ arĩcokagia mahoya maitũ “ihinda rĩrĩa rĩagĩrĩire.” (Ahib. 4:16) Nĩkĩo tũtiagĩrĩire kũruta Jehova mahĩtia ũndũ mũna ũngĩaga gwĩkĩka na ihenya ta ũrĩa tũrerĩgagĩrĩra. Kwa ngerekano, andũ aingĩ nĩ makoretwo makĩhoya mĩaka mĩingĩ nĩguo Ũthamaki wa Ngai ũũke ũniine mũtabarĩre ũyũ mũũru. O na Jesu oonanirie atĩ nĩ twagĩrĩirũo kũhoya Ũthamaki ũcio ũũke. (Mat. 6:10) Ĩndĩ no ũkorũo ũtarĩ ũndũ wa ũũgĩ o na hanini mũndũ angĩtĩkĩria wĩtĩkio wake harĩ Ngai ũnyihe atĩ tondũ mũico nduokire hĩndĩ ĩrĩa andũ meerĩgagĩrĩra ũũke. (Hab. 2:3; Mat. 24:44) Nĩ ũndũ wa ũũgĩ gũthiĩ na mbere gweterera Jehova na kũhoya tũrĩ na wĩtĩkio. Mũico ũgooka hĩndĩ ĩrĩa yagĩrĩire tondũ Jehova nĩ atuĩte ‘mũthenya na thaa’ rĩrĩa ũgooka. Na tũrĩ na ma atĩ mũthenya ũcio ũgaakorũo ũrĩ ihinda rĩrĩa rĩagĩrĩire harĩ andũ othe.—Mat. 24:36; 2 Pet. 3:15. w21.08 10 ¶10-11

Andũ akũrũ arĩa monanagia wĩnyihia nĩ mamenyaga atĩ o ũrĩa marakũra, matingĩhota gwĩka maũndũ maingĩ ta ũrĩa meekaga hau kabere. Kwa ngerekano, ta wĩcirie ũhoro wa arori a mũthiũrũrũko. Rĩrĩa makinyia mĩaka 70, nĩ macenjagĩrio wĩra makaheo wĩra ũngĩ. Ũndũ ũcio no ũkorũo ũtarĩ mũhũthũ harĩ o. Nĩ maakenagĩra mweke wa gũtungata aarĩ na ariũ a Ithe witũ. Ĩndĩ nĩ mataũkagĩrũo atĩ no ũkorũo ũrĩ ũndũ mwega makĩria andũ ethĩ mangĩũruta. Na njĩra ĩyo, monanagia mwerekera ta wa Alawii thĩinĩ wa Isiraeli ya tene, arĩa maatigaga gũtungata hema-inĩ ya gũtũnganwo makinyia mĩaka 50. Alawii acio akũrũ nĩ maakoragwo na gĩkeno gũtekũmakania nĩ ũtungata ũrĩkũ maahingagia. Nĩ meerutanagĩria kũhũthĩra mĩeke ĩrĩa yothe mangĩonire gũteithia Alawii arĩa maarĩ ethĩ. (Ndar. 8:25, 26) O na gũtuĩka arĩa maatungataga marĩ arori a mũthiũrũrũko tene rĩu matitungatagĩra ciũngano nyingĩ, nĩ makoragwo marĩ kĩrathimo kĩnene harĩ ciũngano ciao. w21.09 8-9 ¶3-4

Jesu nĩ aaheanire ngerekano ya gwĩkĩra ngoro ĩgiĩ mwanake ũmwe worĩte thĩinĩ wa Luka 15:11-32. Mwanake ũcio aaremeire ithe, akiuma mũciĩ na agĩthiĩ “bũrũri wa kũraya.” Arĩ kũu, akĩambĩrĩria gũikara mũtũũrĩre wa ũũra-thoni. No rĩrĩa ũtũũro waritũhire, nĩ aambĩrĩirie gwĩciria na njĩra ndikĩru igũrũ rĩgiĩ matua moru marĩa aatuĩte. Ecũrania nĩ oonire atĩ ũtũũro wake warĩ mwega rĩrĩa aaikaraga mũciĩ gwa ithe. Jesu aaugire atĩ mwanake ũcio nĩ “aacokereirũo nĩ meciria.” Agĩgĩtua itua rĩa gũcoka mũciĩ nĩguo akahoe ithe mũhera. Kũmenya atĩ nĩ aatuĩte matua maingĩ moru kwarĩ kwa bata mũno harĩ mwanake ũcio. Nĩ aabataraga kuoya ikinya! Mwanake ũcio worĩte nĩ oonanirie atĩ nĩ eerirĩte kuuma ngoro nĩ ũndũ wa maũndũ marĩa eekĩte. Athuri a kĩũngano no merute ũndũ wa bata mũno kuumana na rũgano rũu. No rũmateithie rĩrĩa marenda kũmenya kana Mũkristiano mũna wĩhĩtie nĩ erirĩte kuuma ngoro. w21.10 5 ¶14-15

Nĩ kĩĩ gĩtagaathingithio kana kĩeherio? Mũtũmwo Paulo aandĩkire ũũ: “Kuona atĩ nĩ tũkaamũkĩra Ũthamaki ũtangĩthingithio-rĩ, nĩ tũthiĩi na mbere . . . kũrutĩra Ngai ũtungata mũtheru na njĩra ĩretĩkĩrĩka tũrĩ na wĩtigĩri Ngai na gĩtĩo.” (Ahib. 12:28) Rĩrĩa gũthingithio kũu kwa mũico gũkaarĩka, no Ũthamaki wa Ngai tu ũtagaakorũo ũthingithĩtio. (Thab. 110:5, 6; Dan. 2:44) Ihinda rĩrĩa rĩtigarĩte nĩ inini. Andũ no mũhaka mathuure kana mekwenda: Gũthiĩ na mbere kũnyita mbaru maũndũ ma thĩ ĩno na mũthia-inĩ makaaniinwo, kana mathuure gũtungatĩra Jehova na gwĩka mogarũrũku marĩa marabatarania na mũthia-inĩ makaaheo muoyo wa tene na tene. (Ahib. 12:25) Kũgerera wĩra witũ wa kũhunjia, no tũteithie andũ gũtua itua rĩu rĩa bata. Ningĩ rekei hingo ciothe tũririkanage ciugo cia Mwathani witũ Jesu Kristo iria aaugire: “Ũhoro ũyũ mwega wa Ũthamaki nĩ ũkaahunjio thĩ yothe ĩrĩa ĩikaragwo ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.”—Mat. 24:14. w21.09 19 ¶18-20

Athuri a kĩũngano, mũrĩ na itemi rĩa mwanya rĩa kũũmĩrĩria andũ arĩa endwa ao matigĩte gũtungatĩra Jehova. (1 Thes. 5:14) Mekĩrage ngoro na njĩra ya kwaria nao mbere na thutha wa mĩcemanio ya Gĩkristiano. Maceeragĩrei mĩciĩ-inĩ kwao na mũkahoya hamwe nao. Hunjagia hamwe nao kana rĩmwe na rĩmwe ũkamanyita ũgeni mwĩke ũthathaiya wa famĩlĩ hamwe nao. Athuri a kĩũngano nĩ mabataraga kũrũmbũiya arĩa marĩ na mĩtangĩko, mamacaĩre, mamonie wendo, na mamathikĩrĩrie. (1 Thes. 2:7, 8) Jehova “ndendaga mũndũ o na ũmwe akaaniinwo no endaga othe merire.” (2 Pet. 3:9) O na gũtuĩka mũndũ no eke mehia maritũ, muoyo wake ũkoragwo ũrĩ o wa bata harĩ Ngai. Ririkanaga atĩ Jehova aarĩhire thogora mũnene wa Mũrũ wake endete nĩ ũndũ witũ ithuothe. Jehova na njĩra ya wendo nĩ ageragia gũteithĩrĩria andũ arĩa matigĩte kũmũtungatĩra nĩguo mamũcokerere. Jehova akoragwo arĩ na mwĩhoko atĩ nĩ megũthuura kũmũcokerera o ta ũrĩa gwathiire harĩ mwanake ũrĩa worĩte thĩinĩ wa ngerekano ĩrĩa Jesu aaheanire.—Luk. 15:11-32. w21.09 30-31 ¶17-19

Ĩ angĩkorũo ndũhotaga kũhingia maũndũ maingĩ wĩra-inĩ wa kũhunjia na kũrutana nĩ ũndũ wa gũkorũo ndũrĩ na ũgima mwega wa mwĩrĩ? O na hĩndĩ ta ĩyo no ũkorũo na gĩkeno wĩra-inĩ wa kũhunjia. Ta wĩcirie ngerekano ya Mũthamaki Daudi, rĩrĩa we hamwe na arũme ake maathiire kũhonokia famĩlĩ na indo ciao iria ciatahĩtwo nĩ Aamaleki. Arũme 200 maarĩ anogu mũno matingĩahotire gũthiĩ kũrũa, kwoguo magĩtigwo nĩguo marangagĩre mĩrigo. Thutha wao kũhootana mbaara-inĩ, Daudi aaugire atĩ indo iria maatahire ciagĩrĩire kũgayanio harĩ arũme acio othe gũtarĩ mũndũ ũkũgaĩrũo nyingĩ gũkĩra ũrĩa ũngĩ. (1 Sam. 30:21-25) Ũguo noguo kũrĩ wĩra-inĩ witũ wa gũtua andũ arutwo. O na angĩkorũo ndũhotaga kũhingia maũndũ maingĩ wĩra-inĩ wa kũhunjia, ũngĩĩrutanagĩria ũrĩa wothe ũngĩhota, no ũkoragwo na gĩkeno rĩrĩa kwagĩa na mũndũ weruta ũhoro wa ma na agakinyĩrĩra kũbatithio. Jehova nĩ onaga kĩyo gitũ o na mwerekera witũ mwega, na nĩ atũrathimaga. Ningĩ nĩ atũrutaga ũrĩa tũngĩgĩa na gĩkeno rĩrĩa tũrahingia itemi ritũ wĩra-inĩ ũcio wa kũhunjia. (Joh. 14:12) Tũrĩ na ma atĩ Ngai nĩ arĩkenagio nĩ ithuĩ twaga gũkua ngoro! w21.10 27-28 ¶15-17

O ũrĩa mũndũ arakũra, no one ta atarahingia maũndũ maingĩ ũtungata-inĩ wa Jehova ta ũrĩa eekaga hau kabere. O na gũtuĩka mũndũ no aigue ta atarĩ na hinya mũingĩ ta ũrĩa aarĩ naguo tene, no ahũthĩre ũũgĩ na ũmenyeru ũrĩa arĩ naguo gũteithia aarĩ na ariũ a Ithe witũ ethĩ nĩguo mahũthĩke na njĩra nene ithondeka-inĩ rĩa Jehova na mehokerũo mawĩra makĩria. Nĩguo andũ akũrũ mahote gũteithia andũ ethĩ, nĩ magĩrĩirũo gũkorũo na wĩnyihia. Mũndũ mwĩnyihia onaga andũ arĩa angĩ marĩ a bata kũmũkĩra. (Afil. 2:3, 4) Andũ akũrũ arĩa monanagia ngumo ya wĩnyihia nĩ mamenyaga atĩ nĩ kũrĩ njĩra nyingĩ cia Kĩĩmandĩko iria mũndũ angĩhũthĩra kũhingia ũtungata mũna. Nĩ ũndũ ũcio, matiĩrĩgagĩrĩra andũ othe meke maũndũ ta ũrĩa o meekaga na hau kabere. (Koh. 7:10) O na gũtuĩka no makorũo na ũmenyeru mũingĩ ũrĩa mangĩhũthĩra kũmenyeria andũ arĩa ethĩ, nĩ mataũkagĩrũo atĩ ‘thĩ ĩno ĩrathiĩ ĩkĩgarũrũkaga,’ na atĩ no mabatare kwĩruta njĩra njerũ cia gwĩka maũndũ.—1 Kor. 7:31. w21.09 8 ¶1, 3

Jehova ndangĩra athathaiya ake meke ũndũ ũtarĩ mũtheru. Jehova nĩ mũtheru biũ. Ciugo iria ciaandĩkĩtwo kabati-inĩ ga thahabu karĩa kaarĩ kĩremba-inĩ kĩa mũthĩnjĩri-Ngai ũrĩa mũnene, nĩ ciaririkanagia Aisiraeli ũndũ ũcio. Kabati kau ga thahabu gaakoragwo na ciugo: “Ũtheru nĩ wa Jehova.” (Tham. 28:36-38) Mũndũ o wothe woonaga ciugo icio nĩ aaririkanagio atĩ Jehova nĩ mũtheru biũ. Ĩ angĩkorũo Mũisiraeli ndangĩonire kabati kau tondũ ndangĩahotire gũthiĩ hakuhĩ na mũthĩnjĩri-Ngai ũrĩa mũnene? Hihi ũguo nĩ kuuga atĩ ndangĩamenyire atĩ Jehova nĩ mũtheru? Aca! Mũisiraeli o wothe nĩ angĩaiguire ndũmĩrĩri ĩyo rĩrĩa Watho wathomagwo mbere ya athuri, atumia, na ciana. (Gũcok. 31:9-12) Korũo warĩ kuo hĩndĩ ĩyo, nĩ ũngĩaiguire ciugo ici: “Niĩ nĩ niĩ Jehova Ngai wanyu, na no mũhaka . . . mũkorũo mũrĩ atheru, tondũ niĩ ndĩ mũtheru.” “No mũhaka mũkorũo mũrĩ atheru harĩ niĩ, tondũ niĩ Jehova, ndĩ mũtheru.”—Alaw. 11:44, 45; 20:7, 26. w21.12 3 ¶6-7

Andũ amwe no matangĩke mũno nĩ ũndũ wa indo iria marabatara. No makorũo magĩikara bũrũri ũrĩ na moritũ ma kĩĩmbeca na ũgakorũo ũrĩ ũndũ mũritũ kuona wĩra. No maritũhĩrũo kuona mbeca cia kũigana cia kũhingia mabataro ma famĩlĩ ciao. Ningĩ famĩlĩ no ĩkuĩrũo nĩ mũndũ ũrĩa ũramĩteithagia kuona mabataro, na kwoguo acio angĩ matigwo matarĩ na mbeca cia kũgũra indo iria marabatara. Handũ ha gũtangĩka mũno nĩ ũndũ wa mathĩna maitũ, tũrabatara kwĩhoka Jehova. Ririkanaga atĩ Jehova nĩ atwĩrĩire atĩ nĩ arĩhingagia mabataro maitũ ma kĩĩmwĩrĩ tũngĩiga maũndũ ma kĩĩroho mbere. (Mat. 6:32, 33) Nĩ onanĩtie atĩ hingo ciothe nĩ ahingagia kĩĩranĩro kĩu. (Gũcok. 8:4, 15, 16; Thab. 37:25) Angĩkorũo Jehova nĩ arũmbũyagia nyoni na mahũa-rĩ, hatarĩ nganja tũtiagĩrĩirũo gwĩtanga nĩ ũndũ wa kĩrĩa tũkũrĩa kana kĩrĩa tũkwĩhumba. (Mat. 6:26-30; Afil. 4:6, 7) O ta ũrĩa aciari matindĩkagwo nĩ wendo kũhingĩria ciana ciao mabataro ma kĩĩmwĩrĩ, wendo nĩ ũtindĩkaga Ithe witũ wa igũrũ kũhingia mabataro ma kĩĩmwĩrĩ ma andũ ake. w21.12 16-17 ¶4-5; 18 ¶8

Hihi nĩ ũrĩ watuurithio na njĩra nene nĩ mũndũ ũngĩ, na hihi o na akorũo aarĩ Mũira wa Jehova? Ta wĩcirie ũhoro wa kĩonereria kĩa Jusufu, ũrĩa wekirũo maũndũ mataarĩ ma kĩhooto nĩ ariũ a ithe. Aaigire meciria make harĩ gũtungatĩra Jehova, na nĩ aarathimirũo na njĩra nene nĩ ũndũ wa gũkirĩrĩria arĩ na wetereri. Thutha wa ihinda, Jusufu nĩ aahotire kuohera andũ acio maamũhĩtĩirie, tondũ nĩ oonaga ũrĩa Jehova aamũrathimĩte. (Kĩam. 45:5) O ta Jusufu, tũngĩkuhĩrĩria Jehova na tũtige maũndũ mothe moko-inĩ make, nĩ tũrĩiguaga tũũmĩrĩirio. (Thab. 7:17; 73:28) Angĩkorũo nĩ ũrakirĩrĩria nĩ ũndũ wa gwĩkwo ũndũ mũna ũtarĩ wa kĩhooto, kana ũndũ ũngĩ wa gũgũtuurithia, ririkanaga atĩ Jehova akoragwo hakuhĩ na “arĩa mathuthĩkĩte ngoro.” (Thab. 34:18) Nĩ akwendete, tondũ nĩ ũkoragwo na wetereri na nĩ ũmũikagĩria mĩrigo yaku. (Thab. 55:22) Jehova nĩwe Mũtuanĩri ciira wa thĩ yothe, na kwoguo nĩ oonaga maũndũ mothe marĩa mekĩkaga. (1 Pet. 3:12) Angĩkorũo nĩ ũragerera moritũ makĩrĩte ũhoti waku-rĩ, hihi nĩ wĩhaarĩirie gweterera Jehova arũnge maũndũ? w21.08 11 ¶14; 12 ¶16

No ũkorũo ũrĩ ũndũ wa ũũgĩ harĩ ithuĩ kũhũthĩra ũtũũro witũ gwĩka maũndũ marĩa makenagia Jehova. No mũhaka tũigage maũndũ marĩa ma bata mbere. Nĩguo tũhũthĩre mahinda maitũ wega, rĩmwe no tũbatare gũthuura gatagatĩ ka maũndũ merĩ matarĩ moru. Rũgano rwa ũrĩa gwathiire rĩrĩa Jesu aaceereire Mariamu na Maritha nĩ rũronania ũndũ ũcio wega. Maritha nĩ aakenire mũno nĩ ũndũ wa Jesu kũmaceerera nginya akĩmũhaarĩrĩria iruga inene. Nake mwarĩ wa nyina Mariamu, aaikarire hakuhĩ na Jesu nĩguo athikĩrĩrie akĩrutana. O na gũtuĩka Maritha aarĩ na muoroto mwega, Jesu aaugire atĩ Mariamu “athuurĩte ũndũ ũrĩa mwega makĩria.” (Luk. 10:38-42, kohoro ka magũrũ-inĩ) Thutha wa ihinda, Mariamu no akorũo nĩ aariganĩirũo nĩ irio iria maarĩire hĩndĩ ĩyo, ĩndĩ no tũkorũo na ma atĩ ndaariganĩirũo nĩ maũndũ marĩa eerutire kuuma kũrĩ Jesu. O ta ũrĩa Mariamu oonire ũrĩ ũndũ wa bata kũhũthĩra mahinda hamwe na Jesu, o na ithuĩ noguo tuonaga ũrĩ ũndũ wa bata kũhũthĩra mahinda hamwe na Jehova. w22.01 27 ¶5-6

O na gũtuĩka Ahabu nĩ eenyihirie mbere ya Jehova, ciĩko iria aacokire gwĩka cioonanirie atĩ ndeerirĩte kuuma ngoro. Ndeerutanĩirie kweheria ũthathaiya wa Baali ũthamaki-inĩ wake. Ningĩ ndeekĩrire andũ ngoro mathathaiye Jehova. Thutha wa Ahabu gũkua, Jehova nĩ oonanirie ũrĩa oonaga mũthamaki ũcio. Mũnabii wa Ngai wetagwo Jehu aaugire atĩ aarĩ ‘mwaganu.’ (2 Maũ. 19:1, 2) Ta wĩcirie ũndũ ũcio: Korũo Ahabu nĩ eerirĩte kuuma ngoro, mũnabii ũcio ndangĩaugire atĩ aarĩ mũndũ mwaganu wathũire Jehova. Kwoguo o na gũtuĩka Ahabu nĩ eerirĩte na gĩkĩro kĩna, ndeerirĩte biũ kuuma ngoro. Tũreruta atĩa kuumana na ngerekano ya Ahabu? Rĩrĩa Elija eerire Ahabu ituĩro rĩrĩa rĩngĩakorire famĩlĩ yake, kĩambĩrĩria-inĩ nĩ eenyihirie. Warĩ ũndũ mwega gwĩka ũguo. Thutha-inĩ ciĩko ciake nĩ cioonanirie atĩ ndeerirĩte kuuma ngoro. Nĩ ũndũ ũcio, kwĩrira nĩ makĩria ma gũcũnga mũhera nĩ ũndũ wa ũndũ ũrĩa mũndũ ekĩte. w21.10 3 ¶4-5, 7-8

Isaia aarĩ mũnabii, na no kũhoteke atĩ o na mũtumia wake kũrĩ wĩra eehokeirũo wa kũratha, tondũ o nake etĩtwo “mũnabii.” (Isa. 8:1-4) Ũndũ ũrĩa Isaia na mũtumia wake maaigĩte mbere ũtũũro-inĩ wao nĩ ũthathaiya wao harĩ Jehova. Andũ arĩa mahikanĩtie o nao no maige ũtungata wa Jehova mbere na njĩra ya kwĩrutanĩria ũrĩa wothe mangĩhota ũtungata-inĩ wake. No mekĩre hinya mwĩhoko wao harĩ Jehova na njĩra ya kwĩruta ũrathi wa Bibilia marĩ hamwe na kuona ũrĩa hingo ciothe ũrathi ũcio ũhingaga. (Tit. 1:2) No mecũranie igũrũ rĩgiĩ itemi rĩrĩa mahingagia harĩ kũhinga kwa morathi mamwe ma Bibilia. Kwa ngerekano, no makorũo na itemi harĩ kũhingia ũrathi wa Jesu ũrĩa warathĩte atĩ ũhoro mwega nĩ ũngĩkaahunjio thĩinĩ wa thĩ yothe mbere ya mũico ũkinyĩte. O ũrĩa mũthuri na mũtumia makorũo na ma atĩ ũrathi mũna wa Bibilia nĩ ũkaahinga, noguo megũkorũo mehotorete o na makĩria kwĩrutanĩria ũtungata-inĩ wa Jehova. w21.11 16 ¶9-10

Jesu nĩ eeciragia ũhoro wĩgiĩ nyina, ũrĩa no kũhoteke hĩndĩ ĩyo aarĩ wa ndigwa. Tondũ Jesu nĩ eendete Mariamu na nĩ aamũrũmbũyagia, nĩ eehokeire Johana wĩra wa kũrũmbũiya mabataro make ma kĩĩroho, tondũ nĩ aamenyaga atĩ nĩ egwĩka ũguo. Kuuma hĩndĩ ĩyo gũthiĩ na mbere, Johana aatuĩkire o ta mũrũ wa Mariamu na agĩthiĩ na mbere kũmũrũmbũiya o ta nyina. Hatarĩ nganja Jesu nĩ oonirie Mariamu wendo mũnene, o ũcio wamũrũmbũĩtie na wendo kuuma arĩ o mwana na rĩu aarũgamĩte hakuhĩ nake hĩndĩ ĩyo aakuaga. Tũngĩĩruta atĩa kuumana na ciugo cia Jesu? Ũrata witũ hamwe na aarĩ na ariũ a Ithe witũ no ũkorũo ũrĩ mũnene gũkĩra ũrata witũ na andũ aitũ a famĩlĩ a hakuhĩ. Andũ aitũ no matũkararie kana o na nginya matũtiganĩrie, no o ta ũrĩa Jesu eeranĩire, tũngĩikaraga hakuhĩ na Jehova na ithondeka rĩake tũrĩamũkagĩra “maita 100 makĩria” ma kĩrĩa tũũrĩtwo nĩkĩo. Akristiano aingĩ harĩ ithuĩ makoragwo matariĩ ta ariũ aitũ, aarĩ aitũ, manyina maitũ, kana maithe maitũ. (Mar. 10:29, 30) Ũiguaga atĩa gũkorũo thĩinĩ wa famĩlĩ ya kĩĩroho ĩrĩ na ũrũmwe nĩ ũndũ wa gũkorũo na wĩtĩkio na wendo harĩ Jehova na mũndũ na ũrĩa ũngĩ?—Kol. 3:14; 1 Pet. 2:17. w21.04 9-11 ¶7-8

Wendo mwĩhokeku ũtũmaga mũndũ eke makĩria ma ũrĩa arerĩgĩrĩrũo eke. O ta mahinda-inĩ ma tene, aarĩ na ariũ a Ithe witũ aingĩ ũmũthĩ nĩ monagia Akristiano arĩa angĩ wendo mwĩhokeku, nginya arĩa matoyaine nao. Kwa ngerekano, rĩrĩa mamenya atĩ kũrĩ kũndũ gwekĩka gĩcanjama kĩa ndũire, nĩ meciragia o na ihenya ũrĩa mangĩteithia. Rĩrĩa mũndũ thĩinĩ wa kĩũngano agĩa na mathĩna, matirĩaga marĩĩgu gũkinyĩra mũndũ ũcio, na kũmũteithia ũrĩa mangĩhota. O ta Akristiano a Makedonia thĩinĩ wa karine ya mbere, mekaga makĩria ma ũrĩa merĩgagĩrĩrũo meke. Nĩ meimaga, na makaheana “makĩria ma ũhoti wao” nĩguo mateithie ariũ a Ithe witũ acio marĩ na thĩna. (2 Kor. 8:3) Mahinda-inĩ maya, athuri a kĩũngano nĩ monaga ũrĩa aarĩ na ariũ a Ithe witũ monanagia wendo na njĩra ya kũheana ũteithio. Athuri a kĩũngano mangĩcokagĩria aarĩ na ariũ a Ithe witũ ngatho cia kuuma ngoro, nĩ marĩmateithagia kũgĩa na hinya wa gũthiĩ na mbere na ciĩko icio njega.—Isa. 32:1, 2. w21.11 11 ¶14; 12 ¶21

Rĩmwe na rĩmwe ithuothe nĩ tũbataraga kũheo ũtaaro. Kũrĩ hĩndĩ ĩngĩ narĩo tũngĩoya ikinya rĩa kũũria mũndũ tũtĩĩte atũhe ũtaaro. Ningĩ mũrũ wa Ithe witũ no atũhe ũtaaro angĩona twĩ hakuhĩ gũthiĩra ‘njĩra-inĩ ĩtagĩrĩire’ ĩngĩtũma twĩrire thutha-inĩ. (Gal. 6:1) Makĩria ma ũguo, no twamũkĩre ũtaaro na njĩra ya kũrũngwo thutha wa gwĩka mehia maritũ. Gũtekũmakania kĩrĩa kĩratũma tũheo ũtaaro, nĩ twagĩrĩirũo kũũthikĩrĩria. Nĩ tũgunĩkaga rĩrĩa tweka ũguo, na ũndũ ũcio no ũhonokie muoyo witũ. (Thim. 6:23) Rĩandĩko ritũ rĩa ũmũthĩ rĩratwĩkĩra ngoro ‘gũthikagĩrĩria ciugo cia andũ arĩa ogĩ.’ Gũtirĩ mũndũ ũĩ maũndũ mothe, kwoguo hingo ciothe nĩ kũrĩkoragwo na mũndũ ũrĩ na ũũgĩ gũtũkĩra kana ũrĩ na ũmenyeru gũtũkĩra. (Thim. 12:15) Rĩrĩa twathikĩrĩria ũtaaro nĩ tuonanagia atĩ tũrĩ enyihia. Ũndũ ũcio nĩ wonanagia nĩ tũũĩ atĩ tũtingĩhota maũndũ mothe, na atĩ nĩ tũbataraga ũteithio nĩguo tũkinyĩre mĩoroto itũ. Mũthamaki Suleimani ũrĩa warĩ na ũũgĩ aandĩkire ũũ: “Ataarani aingĩ nĩ matũmaga maũndũ magaacĩre.”—Thim. 15:22. w22.02 8 ¶1-2

Kwĩrira kwa ma nĩ makĩria ma kuuga atĩ nĩ twacũnga mũhera nĩ ũndũ wa mehia marĩa twĩkĩte. No mũhaka mũndũ agarũrĩre mwĩcirĩrie na mwerekera wake. Nĩ agĩrĩirũo gũtigana na mehia make na arũmĩrĩre ithimi cia Jehova. (Ezek. 33:14-16) Ũndũ ũrĩa mũnene mũndũ wĩhĩtie agĩrĩirũo gũthingata nĩ gũthondeka ũrata wake hamwe na Jehova. Tũngĩmenya mũrata witũ wa hakuhĩ nĩ ekĩte mehia maritũ-rĩ, twagĩrĩirũo gwĩka atĩa? Tũtingĩkorũo tũgĩteithia mũrata ũcio witũ tũngĩgeria kũhitha mehia make. Ningĩ kũgeria kũmũhithĩrĩra no wĩra wa tũhũ tondũ Jehova nĩ arona. (Thim. 5:21, 22) No ũteithie mũrata ũcio waku na njĩra ya kũmũririkania atĩ athuri nĩ mehaarĩirie kũmũteithia. Angĩrega kumbũrĩra athuri mehia marĩa ekĩte, nĩ wagĩrĩirũo kũmenyithia athuri ũhoro ũcio, na njĩra ĩyo wonanie atĩ nĩ ma nĩ ũrenda kũmũteithia. w21.10 7 ¶19-21

Ithuothe nĩ twagĩrĩirũo kwĩgerekania na Jesu harĩ kuonania roho wa kwĩima. Bibilia yugaga atĩ ‘ehaananirie na ngombo.’ (Afil. 2:7) Ngombo kana ndungata yeendetwo nĩ mwathi wayo, nĩ yacaragia mĩeke ya kũmũkenia. Tondũ tũrĩ ngombo cia Jehova na nĩ tũtungatagĩra aarĩ na ariũ a Ithe witũ, nĩ twĩriragĩria o na makĩria kũhũthĩrũo nĩ Jehova na gũteithĩrĩria Akristiano arĩa angĩ. Wĩyũrie: ‘Hihi nĩ ngoragwo ndĩhaarĩirie kwĩima nĩguo ndeithie andũ arĩa angĩ? Hihi kũngĩbatara andũ a kwĩrutĩra gũtheria kũrĩa gũgwĩkĩrũo kĩgomano kana kũmenyerera Nyũmba ya Ũthamaki-rĩ, nĩ ndĩrutagĩra o na ihenya gũteithĩrĩria?’ Ũngĩka atĩa ũngĩmenya atĩ harĩ maũndũ ũrabatara kũrutĩra wĩra, no ndũrĩ na wendi wa gwĩka mogarũrũku marĩa marabatarania? Ũngĩmenya ũguo, hoya Jehova kuuma ngoro. Ĩra Jehova ũrĩa ũraigua, na ũmwĩre akũhe “wendi o na ũhoti wa gwĩka maũndũ.”—Afil. 2:13. w22.02 22-23 ¶9-11

Jesu oonanirie ũtugi na njĩra ya gũkorũo arĩ na tha na kwaga kũnyitĩrĩra mawoni make, o na hĩndĩ ĩrĩa maũndũ maarĩ maritũ. (Mat. 11:29, 30) Kwa ngerekano, hĩndĩ ĩrĩa mũtumia Mũfoenicia aamũthaithire ahonie mwana wake, Jesu nĩ aaregete kũhonia mwana ũcio kĩambĩrĩria-inĩ, no rĩrĩa mũtumia ũcio oonanirie wĩtĩkio mũnene, nĩ aahonirie mwana wake. (Mat. 15:22-28) O na gũtuĩka Jesu aarĩ na ũtugi, ndaagaga kũheana ũtaaro rĩrĩa kwabatarania. Mahinda mangĩ nĩ oonanirie ũtugi na njĩra ya kwaga kũregeria mũrũgamo wake harĩ maũndũ marĩa magĩrĩire akĩhiũrania na andũ arĩa eendete. Kwa ngerekano, hĩndĩ ĩrĩa Petero aageririe kũgiria Jesu ndageke wendi wa Jehova, Jesu nĩ aamũkũũmire mbere ya arutwo arĩa angĩ. (Mar. 8:32, 33) Ndeekire ũguo nĩguo aconorithie Petero, no eendaga kũmũteithia we hamwe na arutwo arĩa angĩ kũmenya atĩ maagĩrĩirũo kũmũnyita mbaru no ti kũgeria kũmũgiria gwĩka wendi wa Ngai. No mũhaka akorũo Petero nĩ aaiguire aconoka, no nĩ aagunĩkire kuumana na ũtaaro ũcio aaheirũo. Nĩguo wonie andũ arĩa wendete ũtugi, rĩmwe na rĩmwe no ũbatare kũmahe ũtaaro. Rĩrĩa ũreka ũguo, wĩgerekanie na Jesu na njĩra ya kũheana ũtaaro uumĩte Kiugo-inĩ kĩa Ngai. w22.03 11 ¶12-13

Kũgooca Jehova nĩ njĩra ya kũmũthathaiya. (Thab. 34:1) Tũgoocaga Jehova na njĩra ya kwĩra andũ arĩa angĩ ũrĩa twendete ngumo ciake njega na mawĩra make. Kũgooca kuumanaga na ngoro ĩrĩ na ngatho. Tũngĩhũthagĩra mahinda gwĩcũrania igũrũ rĩgiĩ maũndũ mega marĩa Jehova atwĩkagĩra, nĩ tũrĩkoragwo na itũmi nyingĩ cia kũmũgooca. Wĩra wa kũhunjia nĩ ũtũheaga mweke mwega wa “[kũrutĩra] Ngai igongona rĩa kũgooca, ũguo nĩ kuuga, maciaro ma mĩromo itũ.” O ta ũrĩa twagĩrĩirũo kwamba gwĩciria ũrĩa tũkuuga tũtanahoya Jehova, no taguo twagĩrĩirũo kwamba gwĩciria ũrĩa tũkwĩra arĩa tũkũhunjĩria. Tũngĩenda “igongona [ritũ] rĩa kũgooca” rĩkorũo rĩrĩ rĩega biũ, kwoguo tũhunjagia tũcanjamũkĩte. w22.03 21 ¶8