Oktomba

Morutani na wĩtĩkio witũ ũkoragwo wĩhocetie Kiugo-inĩ kĩa Ngai. O na kũrĩ ũguo, andũ aingĩ ũmũthĩ nĩ mahĩngĩkaga tondũ monaga njĩra itũ ya ũthathaiya ĩtarĩ na maũndũ marĩa mangĩenda. Ningĩ maũndũ marĩa tũrutanaga nĩ mũgarũ na maũndũ marĩa mangĩenda kũigua. Tũngĩka atĩa nĩguo tũtikahĩngĩke? Mũtũmwo Paulo eerire Akristiano arĩa maaikaraga Roma ũũ: “Wĩtĩkio uumanaga na ũndũ ũrĩa ũiguĩtwo. Naguo ũndũ ũrĩa ũiguĩtwo uumanaga na kiugo kĩgiĩ Kristo.” (Rom. 10:17) Kwoguo twakaga wĩtĩkio witũ kũgerera kwĩruta Maandĩko, no ti na njĩra ya kũnyitanĩra ikũngũĩro-inĩ itoimanĩte na Maandĩko cia kĩndini o na angĩkorũo ciendetwo kana ikĩoneka irĩ na maũndũ ma kũgucĩrĩria. No mũhaka tũkorũo na wĩtĩkio mũrũmu wĩhocetie harĩ ũmenyo wa ma, tondũ “hatarĩ na wĩtĩkio gũtingĩhoteka gũkenia Ngai wega.” (Ahib. 11:1, 6) Kwoguo tũtirabatara kuona kĩmenyithia kĩa magegania kuuma igũrũ nĩgetha tũmenye atĩ nĩ tuonete ũhoro wa ma. Gũthuthuria morutani ma Bibilia na kinyi, nĩ kũiganu gũtũma twĩtĩkie atĩ tũrĩ thĩinĩ wa ũhoro wa ma na tweherie nganja o ciothe tũngĩkorũo nacio. w21.05 4-5 ¶11-12

Mũtũmwo Paulo nĩ aacemanirie na moritũ maingĩ. Nĩ aabataraga hinya, makĩria rĩrĩa aahũũragwo na iboko, rĩrĩa aahũũragwo na mahiga, na agaikio njera. (2 Kor. 11:23-25) Paulo ooigire atekũhithĩrĩra atĩ rĩmwe nĩ aahiũranagia na gũkua ngoro. (Rom. 7:18, 19, 24) Ningĩ aarĩ na thĩna ũrĩa wahaanaga ta “mũigua thĩinĩ wa mwĩrĩ,” na nĩ eeriragĩria mũno Ngai amwehererie thĩna ũcio. (2 Kor. 12:7, 8) Jehova nĩ aaheire Paulo hinya wa kũhingia ũtungata wake o na agĩcemanagia na moritũ macio mothe. Ta wĩcirie maũndũ marĩa Paulo aahingirie. Kwa ngerekano, rĩrĩa oohetwo kĩoho kĩa nyũmba thĩinĩ wa Roma, nĩ aahunjirie ũhoro ũrĩa mwega na kĩyo mbere ya atongoria a Kĩyahudi na hihi nginya mbere ya anene a thirikari. (Atũm. 28:17; Afil. 4:21, 22) Ningĩ nĩ aahunjagĩria Arangĩri a kwa Mũthamaki na arĩa othe mookaga kũmũceerera. (Atũm. 28:30, 31; Afil. 1:13) Ihinda-inĩ rĩu, Paulo agĩtongorio nĩ roho nĩ aandĩkire marũa marĩa magunaga Akristiano a ma nginya ũmũthĩ. w21.05 21 ¶4-5

Nĩ ũndũ wa mwĩtĩo, Mũthamaki Uzia wa Juda nĩ aaregire ũtaaro na agĩka ũndũ ataarĩ na rũtha rwa kũwĩka. Uzia nĩ aahingĩtie maũndũ maingĩ. Nĩ aahootanĩte mbaara nyingĩ, agaaka matũũra maingĩ, na akarĩma mĩgũnda mĩingĩ. Bibilia yugaga: “Ngai ũrĩa ma nĩ aatũmire agaacĩre.” (2 Maũ. 26:3-7, 10) Bibilia ĩcokete ĩkoiga: “No rĩrĩ, rĩrĩa aagĩire na hinya, ngoro yake nĩ yetũũgĩririe nginya akĩĩrehera mwanangĩko.” Mbere ĩyo, Jehova aathanĩte atĩ no athĩnjĩri-Ngai tu meetĩkĩrĩtio gũcina ũbumba thĩinĩ wa hekarũ. No Mũthamaki Uzia akĩagarara mĩhaka na akĩingĩra hekarũ gũcina ũbumba. Jehova ndaakenirio nĩ mwĩtĩo ũcio wa Uzia na kwoguo akĩmũhũũra na mangũ. (2 Maũ. 26:16-21) Hihi mwĩtĩo no ũtũingĩrie mũtego-inĩ ta ũcio wanyitire Uzia? Ĩĩ, no gũthiĩ ũguo tũngĩciria ũhoro witũ mũno gũkĩra ũrĩa kwagĩrĩire. Rekei tũririkanage atĩ iheo o ciothe tũngĩkorũo nacio na ũndũ o wothe tũngĩĩhokerũo kĩũngano-inĩ, maũndũ macio moimaga kũrĩ Jehova. (1 Kor. 4:7) Tũngĩkorũo tũrĩ etĩi, Jehova ndangĩtũhũthĩra ũtungata-inĩ wake. w21.06 16 ¶7-8

Jesu nĩ aamenyaga atĩ ti hingo ciothe arutwo ake mangĩakorirũo na maumĩrĩra mega ũtungata-inĩ. O na tũtiũĩ nĩ andũ aigana arĩa maathikĩrĩirie arutwo a Jesu hingo ĩyo maatuĩkire etĩkia. Arutwo nĩ maabataraga gũtaũkĩrũo atĩ gĩkeno kĩao gĩtiabatiĩ kwĩhocia tu harĩ andũ arĩa maamathikagĩrĩria, no ũndũ wa bata makĩria, gĩabatiĩ kuumana nao kũmenya atĩ Jehova nĩ arakenio nĩ kĩyo kĩao. Twathiĩ na mbere gũkirĩrĩria ũtungata-inĩ witũ nĩ tũkaaheo muoyo wa tene na tene. Rĩrĩa twerutanĩria biũ kũhunjia na kũrutana ũhoro ũrĩa mwega, tũkoragwo ‘tũkĩhanda tũtongoretio nĩ roho,’ na njĩra ya kũreka roho mũtheru wa Ngai ũrute wĩra ũtũũro-inĩ witũ. Tũngĩaga ‘gũkua ngoro’ kana ‘tũnoge,’ Jehova atwĩrĩire atĩ nĩ agaatũhe muoyo wa tene na tene gũtekũmakania kana nĩ twateithirie mũndũ kwĩyamũrĩra Jehova.—Gal. 6:7-9. w21.10 26 ¶8-9

Hingo ĩmwe, Jesu na arutwo ake nĩ maanogete mũno tondũ maatindĩte makĩhunjia. Nĩ meendaga gũthiĩ handũ makahurũke, no kĩrĩndĩ kĩnene gĩkĩmarũmĩrĩra. Nĩ ũndũ wa Jesu kũringwo nĩ tha, nĩ aambĩrĩirie kũmaruta “maũndũ maingĩ.” Eekire ũguo tondũ nĩ eeĩkĩrire iratũ-inĩ cia andũ acio. Nĩ eendaga kũmateithia tondũ nĩ oonaga mĩnyamaro ĩrĩa maarĩ nayo na nĩ eendaga kũmahe kĩĩrĩgĩrĩro. O na ũmũthĩ noguo kũhaana. O na gũtuĩka andũ no moneke marĩ na gĩkeno na ta maiganĩire ũtũũro-inĩ, nĩ marabatara kĩĩrĩgĩrĩro. Matariĩ ta ngʼondu itarĩ na mũrĩithi. Mũtũmwo Paulo aaugire atĩ andũ ta acio makoragwo matarĩ na Ngai na matarĩ na kĩĩrĩgĩrĩro. (Ef. 2:12) Rĩrĩa tweciria ũrĩa andũ a gĩcigo gitũ marabatara mũno kũmenya Ngai, nĩ tũtindĩkagwo nĩ wendo na tha kũmateithia. Na njĩra ĩrĩa njega ya kũmateithia, nĩ kwĩruta nao Bibilia. w21.07 5 ¶8

Mũndũ wa kwĩĩkĩrĩra akoragwo na mwĩtĩo na mwĩyendo. Mũndũ ũrĩ na ũiru to kwĩrirĩria eriragĩria kĩndũ kĩrĩa mũndũ ũrĩa ũngĩ arĩ nakĩo, no endaga nginya kũmũtunya kĩndũ kĩu. Ũiru ũtũmaga mũndũ amene mũndũ ũrĩa ũngĩ. Kwĩĩkĩrĩra na ũiru no iringithanio na mũthũa ũrĩa ũrĩaga ikĩngĩ na mbaũ cia nyũmba. Nyũmba ĩyo no ĩikare kwa ihinda ĩrĩ o njega, no mũthia-inĩ no ĩkaagwa. Na njĩra o ta ĩyo, mũndũ no ahote gũthiĩ na mbere gũtungatĩra Jehova kwa ihinda, no angĩkorũo nĩ areĩkĩrĩra na arĩ na ũiru ndangĩthiĩ haraihu atagwĩte. (Thim. 16:18) No atige gũtungatĩra Jehova, na ũndũ ũcio ũkorũo na maumĩrĩra moru harĩ we na harĩ andũ arĩa angĩ. No tũtoorie mwerekera wa kwĩĩkĩrĩra tũngĩikara tũkĩririkanaga ũtaaro ũyũ wa mũtũmwo Paulo: “Mũtikaneke ũndũ o na ũmwe na ngũĩ kana na kwĩĩkĩrĩra, ĩndĩ mũrĩ na wĩnyihia onagai arĩa angĩ marĩ a bata kũmũkĩra.”—Afil. 2:3. w21.07 15 ¶6-8

Andũ amwe meciragia atĩ ndini ya ma yagĩrĩirũo gũkorũo ĩkĩhota gũcokia ciũria ciothe nginya iria itaarĩrĩirio thĩinĩ wa Bibilia. Hihi ũndũ ũcio no ũhoteke? Ta wĩcirie ũhoro wĩgiĩ mũtũmwo Paulo. Eekagĩra andũ arĩa angĩ ngoro ‘gũthuthuragia maũndũ mothe,’ no ndaahithaga atĩ harĩ maũndũ mangĩ maingĩ ataataũkagĩrũo nĩmo. (1 Thes. 5:21) Aandĩkire atĩ “tũkoragwo na ũmenyo o gĩcunjĩ,” na agĩcoka akĩongerera atĩ “tuonaga na mairia, o ta tũrarora na gĩcicio gĩa cuma.” (1 Kor. 13:9, 12) O ta ithuĩ, Paulo ndaataũkagĩrũo nĩ maũndũ mothe. No nĩ aataũkagĩrũo nĩ maũndũ ma mũthingi megiĩ Jehova. Maũndũ marĩa ooĩ maarĩ maiganu ma gũtũma etĩkie biũ atĩ aarĩ ũhoro-inĩ wa ma. Ũndũ ũmwe ũngĩtũteithia gwĩtĩkia biũ atĩ tũrĩ ũhoro-inĩ wa ma nĩ kũringithania njĩra ĩrĩa Jesu aarutanire ya ũthathaiya na ũrĩa Aira a Jehova mekaga ũmũthĩ. w21.10 18-19 ¶2-4

Inyuĩ andũ akũrũ, gũtekũmakania kana mũrĩ ũtungata-inĩ wa mahinda mothe, no mũteithie aarĩ na ariũ a Ithe witũ na njĩra nene. No mwĩke ũguo na njĩra ya gũkenera ũtungata ũrĩa mũrĩ naguo ihinda-inĩ rĩrĩ, kwĩigĩra mĩoroto mĩerũ, na gwĩkĩrĩra mũno maũndũ marĩa mũrahota kũhingia handũ ha maũndũ marĩa mũtarahota kũhingia. Mũthamaki Daudi nĩ eendaga gwaka nyũmba ya Jehova. No rĩrĩa Jehova aamwĩrire atĩ wĩra ũcio ũngĩarutirũo nĩ Suleimani, ũrĩa warĩ mwĩthĩ, Daudi nĩ eetĩkĩrire itua rĩa Jehova na akĩnyita mwako ũcio mbaru na ngoro yake yothe. (1 Maũ. 17:4; 22:5) Daudi ndeyonire ta arĩ we ũngĩahotire gwaka hekarũ wega gũkĩra Suleimani, ũrĩa warĩ ‘mũnini na ndaarĩ na ũmenyeru.’ (1 Maũ. 29:1) Daudi nĩ aamenyaga atĩ hekarũ ĩyo ĩngĩakirũo nĩ ũndũ wa irathimo cia Jehova, no ti tondũ wa ũkũrũ kana ũmenyeru wa arĩa maatongoragia wĩra ũcio. O ta Daudi, andũ arĩa akũrũ ũmũthĩ no mathiaga na mbere gũtungatĩra Jehova o na mĩeke yao ya ũtungata yacenjia. Na nĩ mamenyaga atĩ Jehova nĩ arĩrathimaga andũ ethĩ arĩa marutaga mawĩra marĩa maarutaga hau kabere. w21.09 9 ¶4; 10 ¶5, 8

Kwĩigĩra mĩoroto ya kĩĩroho, nĩ gũtũteithagia gũkorũo na ũtũũro mwega ũrĩ na muoroto. O na kũrĩ ũguo, ũndũ ũrĩa ũngĩtũteithia nĩ kwĩigĩra mĩoroto ĩrĩa ĩringaine na ũhoti witũ na ũrĩa maũndũ maitũ mahaana, handũ ha kwĩringithania na andũ arĩa angĩ. Kwĩringithania na andũ arĩa angĩ tũkĩĩigĩra mĩoroto no gũtũme tũkue ngoro. (Luk. 14:28) Tondũ ũrĩ ndungata ya Jehova, ũkoragwo ũrĩ wa bata famĩlĩ-inĩ yake o na angĩkorũo ũrĩ ngũrani na andũ arĩa angĩ. Jehova ndaakũgucĩrĩirie harĩ we atĩ tondũ warĩ mwega gũkĩra arĩa angĩ. Aakũgucĩrĩirie tondũ nĩ aarorire ngoro yaku, akĩona atĩ ũrĩ mũndũ mũhooreri na no ũrutĩke na wĩke mogarũrũku. Gĩa na ma atĩ nĩ akenagio nĩwe rĩrĩa werutanĩria kũmũtungatĩra na ngoro yothe. Ũkirĩrĩria waku na wĩhokeku waku nĩ cionanagia atĩ ũrĩ na “ngoro njega.” (Luk. 8:15) Kwoguo thiĩ na mbere kũhe Jehova kĩrĩa kĩega biũ. Weka ũguo, nĩ ũrĩkoragwo na gĩtũmi kĩega gĩa gũkena “nĩ ũndũ [waku] mwene.”—Gal. 6:4. w21.07 23 ¶15; 25 ¶20

Kaingĩ nĩ tũbataraga gweterera rĩrĩa tũrekwo maũndũ matarĩ ma kĩhooto. Kwa ngerekano, rĩrĩa athuri mamenya atĩ nĩ kũrĩ mũndũ thĩinĩ wa kĩũngano wĩkĩte mehia maritũ, nĩ mahoyaga “ũũgĩ ũrĩa uumaga igũrũ,” nĩguo magĩe na mawoni ta ma Jehova megiĩ ũndũ ũcio. (Jak. 3:17) Muoroto wao ũkoragwo ũrĩ gũteithia ũcio ũhĩtĩtie nĩguo acoke “kuuma mahĩtia-inĩ ma njĩra yake” kũngĩhoteka. (Jak. 5:19, 20) Ningĩ nĩ mendaga gwĩka ũrĩa wothe mangĩhota nĩguo magitĩre kĩũngano na momĩrĩrie andũ arĩa matuurithĩtio nĩ mũndũ ũcio. (2 Kor. 1:3, 4) Na rĩrĩa ũndũ ta ũcio waumĩra, athuri nĩ mambaga gũtuĩria maũndũ mothe, na ũndũ ũcio no woe ihinda. Macokaga makahoya na makahe mũndũ ũcio ũhĩtĩtie motaaro kuuma Bibilia-inĩ na makamũrũnga na “gĩkĩro kĩrĩa kĩagĩrĩire.” (Jer. 30:11) Athuri matihĩkaga gũtua matua. Rĩrĩa athuri marũmĩrĩra ũtongoria wa Jehova, kĩũngano gĩothe nĩ kĩgunĩkaga. w21.08 11 ¶12-13

Nĩ ũndũ wa ngʼaragu ĩrĩa yarĩ kuo hĩndĩ ĩmwe thĩinĩ wa Isiraeli, Naomi, mũthuri wake, na ariũ ao erĩ nĩ maathamĩire Moabi. Marĩ kũu mũthuri wa Naomi nĩ aakuire. Ariũ ake erĩ nĩ maacokire makĩhikania, no ũndũ wa kĩeha nĩ atĩ o nao nĩ maakuire. (Ruth 1:3-5) Maũndũ macio nĩ maatũmire Naomi akue ngoro mũno. Nĩ maamũritũhĩire mũno, nginya akiuga atĩ nĩ Jehova wareganaga nake. Ta rora ũrĩa aaugire igũrũ rĩgiĩ Ngai: “Guoko kwa Jehova nĩ kũnjũkĩrĩire.” “Mwene-Hinya-Wothe nĩ atũmĩte ũtũũro ũkorũo ũrĩ na ruo mũno harĩ niĩ.” Ningĩ akiuga ũũ: “Nĩ Jehova ũreganĩte na niĩ na ũrĩa Mwene-Hinya-Wothe nĩwe ũndeheire mathĩna.” (Ruth 1:13, 20, 21) Jehova nĩ ataũkagĩrũo atĩ “ũhinyanĩrĩria no ũtũme mũndũ mũũgĩ ahaane mũgũrũki.” (Koh. 7:7) Nĩ aateithirie Ruthu, agĩtuĩka mũrata wa Naomi na akĩmuonia wendo mwĩhokeku. Ruthu nĩ aateithirie Naomi eyendeire na arĩ na ũtugi nĩguo atige gũkua ngoro na amenye atĩ Jehova no aamwendete. w21.11 9 ¶9; 10 ¶10, 13

Hihi kũiga meciria maitũ mĩeke-inĩ ĩrĩa twĩhokeirũo ihinda-inĩ rĩrĩ nĩ kuuga tũtige gwĩciria ũrĩa tũngĩongerera ũtungata witũ harĩ Jehova? Aca. Nĩ twagĩrĩirũo kwĩigĩra mĩoroto ya kĩĩroho ĩngĩtũteithia gũthiĩ na mbere gũkorũo na maumĩrĩra mega ũtungata-inĩ, na ĩtũteithie gũthiĩ na mbere gũteithia aarĩ na ariũ a Ithe witũ. No tũkinyĩre mĩeke ĩyo tũngĩiga meciria maitũ harĩ gũtungata andũ arĩa angĩ handũ ha kwĩĩciria ithuĩ ene. (Thim. 11:2; Atũm. 20:35) Nĩ mĩoroto ta ĩrĩkũ ũngĩĩigĩra? Hoya Jehova agũteithie kũmenya nĩ mĩoroto ta ĩrĩkũ ũngĩhota gũkinyĩra. (Thim. 16:3) Hihi no wĩigĩre muoroto wa gũtuĩka painia wa gũteithĩrĩria kana wa mahinda mothe, gũtungata Betheli, kana mawĩra-inĩ ma mĩako ya ithondeka? Ningĩ no gũkorũo no ũhote kwĩruta rũthiomi rũngĩ kana ũthiĩ kũndũ kũngĩ ũkahunjie ũhoro ũrĩa mwega. w21.08 23 ¶14-15

Wendo mwĩhokeku nĩ wa bata mũno harĩ Jehova. (Hos. 6:6) Kũgerera mũnabii Mika, Ngai witũ atwĩkagĩra ngoro ‘twendage wendo mwĩhokeku.’ (Mik. 6:8, kohoro ka magũrũ-inĩ.) No tũtanamba gwĩka ũguo, nĩ tũrabatara kũmenya wendo mwĩhokeku nĩ kĩĩ. Wendo mwĩhokeku nĩ kĩĩ? Ciugo “wendo mwĩhokeku” cionekaga maita ta 230 thĩinĩ wa Bibilia ya New World Translation of the Holy Scriptures. Hihi ciugĩte atĩa? Kũringana na gacunjĩ ka “Ũthathaũri wa Ciugo cia Bibilia” karĩa karĩ thĩinĩ wa Bibilia ĩyo, ciugĩte “wendo uumanĩte na kwĩrutĩra biũ, wĩkindĩru, wĩhokeku, na wendi mũnene harĩ kĩndũ. Kaingĩ ihũthagĩrũo ũhoro-inĩ wĩgiĩ wendo wa Ngai harĩ andũ, no ningĩ nĩ ihũthagĩrũo harĩ wendo ũrĩa andũ monanagia o ene.” Jehova nĩwe kĩonereria kĩrĩa kĩega biũ harĩ kuonania wendo mwĩhokeku. Nĩkĩo Mũthamaki Daudi aatindĩkirũo kwandĩka ũũ: “Wee Jehova-rĩ, wendo waku mwĩhokeku ũkinyĩte o igũrũ . . . Wee Ngai-rĩ, kaĩ wendo waku mwĩhokeku nĩ wa goro-ĩ!” (Thab. 36:5, 7) Hihi nĩ tũcokagia ngatho nĩ ũndũ wa wendo mwĩhokeku wa Ngai o ta Daudi? w21.11 2 ¶1-2; 3 ¶4

Famĩlĩ ya Jehova ĩkoragwo ĩthondeketwo nĩ athathaiya ake, Jesu, ũrĩa nĩwe “irigithathi harĩ ũũmbi wothe,” na araika ngiri nyingĩ. (Kol. 1:15; Thab. 103:20) Rĩrĩa Jesu aarĩ gũkũ thĩ, nĩ aateithirie andũ gũtaũkĩrũo atĩ no mete Jehova Ithe wao. Akĩaria na arutwo ake, Jesu eetire Jehova “Awa na no we Ithe wanyu.” (Joh. 20:17) Rĩrĩa tweyamũrĩra Jehova na twabatithio, tũtuĩkaga a famĩlĩ ya Jehova ĩrĩ wendo ya aarĩ na ariũ a Ithe witũ. (Mar. 10:29, 30) Jehova nĩ Ithe witũ ũtwendete. Jesu endaga tuone Jehova ta ũrĩa amuonaga, tũmuone atariĩ ta mũciari ũrĩ wendo ũrĩa tũngĩhota kwaria nake hĩndĩ o yothe, no ti ta mũndũ ũtarĩ tha ũheaga andũ o mawatho marĩa magĩrĩirũo kũrũmĩrĩra. Aambĩrĩirie ihoya rĩa kĩonereria na ciugo “Ithe witũ.” Jesu nĩ angĩamerire metage Jehova “Mwene-Hinya-Wothe,” “Mũũmbi,” kana “Mũthamaki wa tene na tene,” tondũ Jehova nĩ agĩrĩirũo gwĩtwo ũguo na nginya Maandĩko nĩ mahũthagĩra marĩĩtwa macio. (Kĩam. 49:25; Isa. 40:28; 1 Tim. 1:17) Handũ ha ũguo, Jesu aatwĩrire twĩtage Jehova “Ithe witũ,” rĩĩtwa rĩrĩa rĩronania wendo. w21.09 20 ¶1, 3

Mũthamaki Manase nĩ aaregire gũthikĩrĩria motaaro marĩa Jehova aamũheaga kũgerera harĩ anabii ake. Mũthia-inĩ, Jehova akĩrehera Juda “anene a mbũtũ ya mũthamaki wa Ashuri, nao makĩnyita Manase na ihocio na makĩmuoha na bĩngũ igĩrĩ cia gĩcango makĩmũtwara Babuloni.” Hĩndĩ ĩyo Manase oohetwo njera Babuloni, no kũhoteke nĩ eeciririe na njĩra ndikĩru ũhoro wĩgiĩ maũndũ marĩa eekĩte. Nĩ ‘aathiire na mbere kwĩnyihia na njĩra nene mbere ya Ngai wa maithe make ma tene.’ Na to ũguo tu. “Nĩ aathaithire Jehova Ngai wake amũiguĩre tha.” Bibilia yugaga, Manase “agĩthiĩ na mbere kũmũhoya.” (2 Maũ. 33:10-12) Thutha wa ihinda, Jehova nĩ aacokirie mahoya ma Manase. Maũndũ marĩa Manase aahoyaga igũrũ rĩamo nĩ maatũmire Jehova one atĩ nĩ aacenjetie. Kwoguo Jehova nĩ aathikĩrĩirie mathaithana make akĩmuohera, na akĩmwĩtĩkĩria atuĩke mũthamaki rĩngĩ. Manase eekire ũrĩa wothe angĩahotire kuonania atĩ nĩ eerirĩte kuuma ngoro. w21.10 4 ¶10-11

Akila na Pirisila nĩ maabatarire kuuma kũrĩa maamenyerete, mathiĩ magĩe na mũciĩ mwerũ, na mamenye ũrĩa mangĩambĩrĩirie biacara gĩcigo-inĩ kĩngĩ kĩerũ. Mathamĩra itũũra-inĩ rĩa Korintho, Akila na Pirisila nĩ maanyitanagĩra na kĩũngano gĩa kũu na nĩ maarutithanirie wĩra na mũtũmwo Paulo harĩ gwĩkĩra hinya aarĩ na ariũ a Ithe witũ. Thutha ũcio, nĩ maathamĩire taũni-inĩ ingĩ kũrĩa kwarĩ na ũbataro mũnene wa ahunjia. (Atũm. 18:18-21; Rom. 16:3-5) Hatarĩ nganja, ũtũũro wao warĩ na maũndũ maingĩ marĩa maamarehagĩra gĩkeno. Andũ arĩa mahikanĩtie mahinda-inĩ maya, no megerekanie na Pirisila na Akila na njĩra ya kũiga maũndũ ma Ũthamaki mbere. Ihinda rĩrĩa rĩega mwanake na mũirĩtu mangĩarĩrĩria mĩoroto yao ũtũũro-inĩ, nĩ matanahikania. Rĩrĩa marĩ hamwe meigĩra mĩoroto ũtungata-inĩ wa Jehova na makerutanĩria gũkinyĩra mĩoroto ĩyo, nĩ magĩaga na mĩeke ya kuona Jehova akĩmateithia ũtũũro-inĩ.—Koh. 4:12. w21.11 17 ¶11-12

Hatarĩ nganja, nĩ twagĩrĩirũo gwathĩkagĩra watho ũrĩa Ngai atũhete wa gũtĩa aciari aitũ. Ririkana atĩ ũtaaro ũrĩa ũrĩ thĩinĩ wa Maũndũ ma Alawii 19:3, wa mũndũ gũtĩa nyina na ithe, ũrũmanĩrĩire na ciugo: “Mwagĩrĩirũo gũkorũo mũrĩ atheru, tondũ niĩ, Jehova Ngai wanyu, ndĩ mũtheru.” (Alaw. 19:2) Rĩrĩa tweciria ũhoro wa rĩathani rĩrĩa Jehova atũhete rĩa gũtĩa aciari aitũ, no twĩyũrie ũũ: ‘Hihi niĩ nĩ njĩkaga ũguo?’ Ũngĩrora wone atĩ no wĩke makĩria ma ũrĩa ũkoretwo ũgĩka, no ũtue itua rĩa gwĩka mogarũrũku. O na gũtuĩka no wage gũcenjia maũndũ marĩa mahĩtũku, no ũtue itua atĩ kuuma rĩu nĩ ũrĩhũthagĩra mahinda makĩria hamwe na aciari aku, na ũkamateithia. No ũmaheage ũteithio wa kĩĩmwĩrĩ, ũkamateithia makuhĩrĩrie Jehova na mathiĩ na mbere kũmũtungatĩra, na ũkamekĩra ngoro. Weka ũguo, ũgũkorũo ũgĩathĩkĩra ũtaaro ũrĩa ũrĩ thĩinĩ wa Maũndũ ma Alawii 19:3. w21.12 4-5 ¶10-12

Mũthamaki Daudi nĩ eekire mehia maritũ. Kwa ngerekano, nĩ eekire ũtharia hamwe na Bathi-sheba, o na akĩũragithia mũthuri wake. (2 Sam. 11:2-4, 14, 15, 24) Ũndũ ũcio warĩ na maumĩrĩra moru harĩ Daudi we mwene, famĩlĩ yake, o hamwe na atumia ake. (2 Sam. 12:10, 11) Hĩndĩ ĩngĩ narĩo, Daudi nĩ aagire kuonania atĩ nĩ eehokete Jehova biũ, hĩndĩ ĩrĩa aatarire mũigana wa mbũtũ ya Isiraeli ũndũ ũrĩa warĩ mũgarũ na wendi wa Jehova. Maumĩrĩra maarĩ marĩkũ? Aisiraeli 70,000 nĩ maakuire nĩ ũndũ wa mũrimũ mũũru. (2 Sam. 24:1-4, 10-15) Hihi nĩ ũngĩatuire atĩ Daudi ndaagĩrĩire kuonio tha nĩ Jehova? Ũguo tiguo Jehova aamuonaga. Nĩ aaririkanire ũrĩa Daudi aakoretwo arĩ mwĩhokeku ũtũũro-inĩ wake na ningĩ atĩ nĩ eerirĩte. Nĩ ũndũ ũcio, Jehova nĩ ooheire Daudi mehia macio maritũ eekĩte. Nĩ aamenyaga atĩ Daudi nĩ aamwendete mũno na nĩ eendaga gwĩka ũrĩa kwagĩrĩire. Nĩ tũcokagia ngatho mũno tondũ Jehova aroraga maũndũ marĩa mega harĩ ithuĩ.—1 Ath. 9:4; 1 Maũ. 29:10, 17. w21.12 19 ¶11-13

Jesu nĩ aacayagĩra arĩa maarĩ na mawathe ma mwĩrĩ. Ririkana ndũmĩrĩri ĩrĩa aatũmire kũrĩ Johana Mũbatithania. Aaugire: “Arĩa atumumu rĩu nĩ marona, arĩa mathuaga magetwara wega, arĩa marĩ na mangũ magatherio, arĩa mataiguaga makaigua, [na] arĩa akuũ makariũkio.” Thutha wa kuona ciama iria Jesu aaringaga, ‘andũ othe makĩgooca Ngai.’ (Luk. 7:20-22) Akristiano nĩ mendaga mũno kwĩgerekania na Jesu harĩ kuonania ũcayanĩri kwerekera andũ arĩa marĩ na mawathe ma mwĩrĩ. Kwoguo nĩ twendaga kũmarũmbũiya, na gũkorũo na wetereri kũmerekera. Ũrĩa kũrĩ nĩ atĩ, Jehova ndatũhete ũhoti wa kũringa ciama. No nĩ atũhete mweke wa gũteithia arĩa atumumu kĩĩmwĩrĩ na kĩĩroho, na njĩra ya kũmahunjĩria ũhoro mwega wĩgiĩ paradiso, kũrĩa andũ magaakorũo na ũgima mwega wa mwĩrĩ na wa kĩĩroho. (Luk. 4:18) Ũhoro ũcio mwega nĩ ũratũma andũ aingĩ magooce Ngai. w21.12 9 ¶5

Jakubu aahũthagĩra Maandĩko akĩrutana. Aahũthĩrire Kiugo kĩa Ngai gũteithia athikĩrĩria ake gũtaũkĩrũo atĩ Jehova nĩ akoragwo ehaarĩirie kũrathima arĩa makoragwo marĩ ehokeku harĩ we o ta Ayubu. Jakubu aarutanire ũndũ ũcio na njĩra ya kũhũthĩra ciugo hũthũ na kũruta ihooto. Kũgerera njĩra ĩyo, nĩ aateithagia andũ gwĩciria ũhoro wĩgiĩ Jehova handũ hake we mwene. Tũreruta atĩa? Rutanaga na njĩra hũthũ na ũhũthagĩre Kiugo kĩa Ngai. Muoroto witũ wagĩrĩirũo gũkorũo ũrĩ kuonania ũrĩa Jehova oĩ maũndũ maingĩ na ũrĩa atũrũmbũyagia, no ti kwĩyonania ũrĩa ithuĩ tũũĩ maũndũ maingĩ. (Rom. 11:33) No tũkinyĩre muoroto ũcio tũngĩtigagĩrĩra atĩ maũndũ marĩa mothe tũrarutana marauma Maandĩko-inĩ. Kwa ngerekano, handũ ha kwĩra arutwo a Bibilia ũrĩa ithuĩ tũngĩka tũngĩkorũo ũndũ-inĩ ta wao, twagĩrĩirũo kũmateithia gwĩcũrania cionereria cia Bibilia iria ingĩmateithia kũmenya mwĩcirĩrie wa Jehova na ũrĩa onaga maũndũ. Ũndũ ũcio no ũmateithie kuoya makinya magĩtindĩkwo nĩ wendi wao wa gũkenia Jehova, no ti wa gũtũkenia ithuĩ. w22.01 10-11 ¶9-10

Ngai nĩ erĩgagĩrĩra tũtigeke andũ arĩa angĩ ũũru, no gwĩka ũguo gwiki ti kũiganu. No mũhaka Mũkristiano ende mũndũ ũrĩa ũngĩ o ta ũrĩa eyendete nĩguo akenie Ngai. Ta rora wone ũrĩa Jesu aatĩtĩrithirie bata wa watho ũrĩa ũkoragwo thĩinĩ wa Maũndũ ma Alawii 19:18. Harĩ hĩndĩ Mũfarisai ũmwe ooririe Jesu ũũ: “Rĩathani rĩrĩa inene mũno thĩinĩ wa Watho nĩ rĩrĩkũ?” Jesu aamũcokeirie na kũmwĩra atĩ “rĩathani rĩrĩa inene mũno na rĩa mbere,” nĩ kwenda Jehova Ngai na ngoro yaku yothe, na muoyo waku wothe, na meciria maku mothe. Jesu agĩcoka akĩgweta ciugo iria irĩ thĩinĩ wa Maũndũ ma Alawii 19:18 akiuga: “Rĩa kerĩ rĩtariĩ o ta rĩu, na nĩrĩo rĩrĩ: ‘No mũhaka wende mũndũ ũrĩa mũriganĩtie nake o ta ũrĩa wĩyendete wee mwene.’” (Mat. 22:35-40) No tuonie andũ arĩa tũrigainie nao wendo na njĩra nyingĩ. Njĩra ĩmwe nĩ kũhũthĩra ũtaaro ũrĩa ũrĩ thĩinĩ wa Maũndũ ma Alawii 19:18. Ugaga ũũ: “Ndũkanerĩhĩrie kana ũigĩre ariũ a andũ anyu muku.” w21.12 10-11 ¶11-13

Jesu aatambũrũkirie guoko gwake na akĩhonokia mũtũmwo Petero. Nĩ ũndũ wa bata kuona atĩ rĩrĩa Petero aaigĩte meciria make harĩ Jesu, nĩ aahotire kũgera igũrũ rĩa maĩ. No rĩrĩa Petero aarorire kĩhuhũkanio, nĩ aatooririo nĩ guoya na nganja na akĩambĩrĩria kũrikĩra. (Mat. 14:24-31) No twĩrute kuumana na ngerekano ya Petero. Rĩrĩa Petero aaumire gatarũ-inĩ na akĩambĩrĩria kũgera igũrũ rĩa maĩ, nderĩgagĩrĩra atĩ nĩ egwĩtigĩra na ambĩrĩrie kũrikĩra. Eendaga gũthiĩra igũrũ rĩa maĩ nginya akinye harĩ Mwathi wake. No nĩ aagire gũthiĩ na mbere kũiga meciria make harĩ Jesu. Ithuĩ tũtingĩhota gũthiĩra igũrũ rĩa maĩ, no o ta Petero nĩ tũcemanagia na magerio maingĩ ma wĩtĩkio. Tũngĩaga kũiga meciria maitũ harĩ Jehova na ciĩranĩro ciake, no twambĩrĩrie kũrikĩra kĩĩroho. O na tũngĩkorũo tũgĩcemania na magerio manene atĩa ũtũũro-inĩ witũ, nĩ twagĩrĩirũo gũthiĩ na mbere kũiga meciria maitũ harĩ Jehova na harĩ ũhoti wake wa gũtũteithia. w21.12 17-18 ¶6-7

Ũthathaiya witũ nĩ ũhutĩtie kũhoya, kwĩruta, na gwĩcũrania. Tũkĩhoya, tũkoragwo tũkĩaranĩria na Ithe witũ wa igũrũ ũtwendete mũno. Tũgĩthoma Bibilia, tũkoragwo tũkĩĩruta “ũmenyo wĩgiĩ Ngai,” ũrĩa we Kĩhumo kĩa ũũgĩ wothe. (Thim. 2:1-5) Tũgĩĩcũrania, tũkoragwo tũgĩciria ũhoro wĩgiĩ ngumo njega cia Jehova, o hamwe na muoroto wake wa magegania gũtwerekera na kwerekera ũũmbi wothe. Ĩyo nĩyo njĩra ĩrĩa njega biũ ya kũhũthĩra mahinda maitũ! No nĩ atĩa tũngĩka nĩguo tũhũthĩre mahinda macio wega? Kũngĩhoteka, ikara handũ hahooreru. Ta wĩcirie ũhoro wa Jesu. Atanambĩrĩria ũtungata wake gũkũ thĩ, aaikarire werũ-inĩ thikũ 40. (Luk. 4:1, 2) Arĩ kũndũ kũu kũhooreru, Jesu nĩ angĩahotire kũhoya na gwĩcũrania ũhoro wĩgiĩ wendi wa Ithe. Gwĩka ũguo nĩ gwateithirie Jesu kwĩhaarĩria nĩ ũndũ wa magerio marĩa angĩacemanirie namo. w22.01 27-28 ¶7-8

Mũthuri wa kĩũngano kana Mũkristiano ũngĩ ũrĩ na ũmenyeru no atũgwetere ũndũ tũrabatara kũrutĩra wĩra. Angĩkorũo mũndũ nĩ atwendete nginya agatũhe ũtaaro wa Bibilia, nĩ twagĩrĩirũo kũhũthĩra ũtaaro ũcio. Ũrĩa kũrĩ nĩ atĩ, no ũkorũo ũtarĩ ũndũ mũhũthũ gwĩtĩkĩra ũtaaro wa ĩmwe kwa ĩmwe. O na no ũtũme tũrakare. Nĩkĩ? O na gũtuĩka nĩ twĩtĩkagĩra atĩ tũtirĩ akinyanĩru, rĩmwe no tũritũhĩrũo gwĩtĩkĩra ũtaaro rĩrĩa mũndũ atwĩra ũndũ mũna tũrabatara kũrutĩra wĩra. (Koh. 7:9) O na no twambĩrĩrie gwĩtetera. No twĩkĩrĩre nganja muoroto wa mũndũ ũrĩa ũratũhe ũtaaro kana tũrakario nĩ njĩra ĩrĩa ahũthĩra gũtũtaara. O na no twambĩrĩrie kũmenereria mũndũ ũcio na tuuge: ‘Ndagĩrĩirũo nĩ kũhe ũtaaro. Githĩ o nake ndahĩtagia?’ Na angĩkorũo ũtaaro wake ndũnatũkenia, no twage gũtindanĩra naguo kana tũũrie mũndũ ũngĩ atũhe ũtaaro tũgĩciria atĩ nĩ egũtwĩra ũndũ ũrĩa tũngĩenda kũigua. w22.02 8-9 ¶2-4

Hihi ũtũũro thĩinĩ wa thĩ njerũ nĩ ũgaakorũo na maũndũ mangĩgeria mwĩhoko witũ harĩ njĩra ya Jehova ya gwĩka maũndũ? Kwa ngerekano, ta wĩcirie ũrĩa gwekĩkire ihinda inini thutha wa Aisiraeli gũkũũrũo ũkombo-inĩ bũrũri-inĩ wa Misiri. Aisiraeli amwe nĩ maambĩrĩirie gũteta nĩ ũndũ wa kwĩrirĩria irio imwe iria maarĩaga Misiri, na makĩambĩrĩria kũnyarara irio cia maana iria Jehova aamaheaga. (Ndar. 11:4-6; 21:5) Hihi nĩ tũkaagĩa na mwĩcirĩrie ta ũcio wa Aisiraeli thutha wa thĩna ũrĩa mũnene gũthira? Tũtiũĩ tũkaabatara kũruta wĩra ũigana atĩa nĩguo tũtherie thĩ na o kahora ĩthiĩ ĩtuĩkĩte paradiso. Kwahoteka ũtũũro ndũgaakorũo ũrĩ mũhũthũ kĩambĩrĩria-inĩ na nĩ gũgaakorũo na wĩra mũingĩ ũkaabatara kũrutwo. Hihi nĩ tũkaanuguna nĩ ũndũ wa kĩrĩa Jehova agaakorũo agĩtũhe ihinda-inĩ rĩu? Angĩkorũo nĩ tũkenagĩra kĩrĩa Jehova atũheaga mahinda maya, nĩ ũgaakorũo ũrĩ ũndũ mũhũthũ gũkenera kĩrĩa Jehova agaatũhee hĩndĩ ĩyo. w22.02 7 ¶18-19

Ũrathi-inĩ ũrĩa ũrĩ thĩinĩ wa Zekaria 8:23, ciugo “Mũyahudi” na “hamwe na inyuĩ” iraria ũhoro wa gĩkundi kĩmwe, kĩa arĩa aitĩrĩrie maguta. (Rom. 2:28, 29) Ciugo “andũ ikũmi kuuma harĩ thiomi ciothe cia ndũrĩrĩ” iraria ũhoro wa arĩa a ngʼondu ingĩ. ‘Manyitaga marũmĩtie’ kana makenyitithania na arĩa aitĩrĩrie maguta na njĩra ya kũnyitanĩra nao ũthathaiya-inĩ mũtheru. O ũndũ ũmwe na ũcio, Jehova ahingĩtie ũrathi ũrĩa ũrĩ thĩinĩ wa Ezekieli 37:15-19, 24, 25 na njĩra ya gũtũma arĩa aitĩrĩrie maguta makorũo na ũrũmwe mũnene hamwe na arĩa a ngʼondu ingĩ. Ũrathi ũcio ũgwetete ũhoro wa tũmĩtĩ twĩrĩ. Arĩa marĩ na kĩĩrĩgĩrĩro gĩa gũgathiĩ igũrũ marũgamĩrĩirũo nĩ kamũtĩ “ka Juda” (mũhĩrĩga ũrĩa athamaki a Isiraeli maaumanaga naguo), nao arĩa marĩ na kĩĩrĩgĩrĩro gĩa gũgatũũra gũkũ thĩ marũgamĩrĩirũo nĩ kamũtĩ “ka Efiraimu.” Jehova nĩ angĩanyitithanirie ikundi icio cierĩ ituĩke “kamũtĩ kamwe.” Ũguo nĩ kuuga mangĩgakorũo na ũrũmwe rungu rwa Mũthamaki ũmwe, nĩwe Jesu Kristo.—Joh. 10:16. w22.01 22 ¶9-10

Jesu nĩ aaririe ũhoro wĩgiĩ andũ arĩa maaheaga andũ arĩa athĩni iheo no magatigĩrĩra atĩ mareka ũguo makĩonagwo nĩ andũ arĩa angĩ nĩgetha mamagooce. O na gũtuĩka ciĩko icio meekaga ciarĩ njega, itiakenagia Jehova. (Mat. 6:2-4) Tuonanagia tũrĩ na ngumo ya wega o rĩrĩa tu tweka ũndũ ũrĩa wagĩrĩire tũrĩ na muoroto mwega ũtarĩ wa mwĩyendo. Kwoguo no wĩyũrie ciũria ici: ‘Hihi nĩ menyaga maũndũ mega marĩa njagĩrĩirũo gwĩka na ngatigĩrĩra atĩ nĩ ndameka? Muoroto wakwa ngĩka maũndũ marĩa mega ũkoragwo ũrĩ ũrĩkũ?’ O ũrĩa tũkwĩrutanĩria kuonania maciaro macio, noguo roho wa Jehova ũrĩtũteithagia, tondũ Jehova nĩ Ngai wa ciĩko na roho wake nĩ ũrutaga wĩra. (Kĩam. 1:2) Kwoguo ciĩko nĩ cia bata. Kwa ngerekano, Jakubu aandĩkire ũũ: ‘Wĩtĩkio ũtarĩ na ciĩko nĩ mũkuũ.’ (Jak. 2:26) Ũguo noguo kũrĩ harĩ ngumo icio ingĩ ciothe cia maciaro ma roho wa Ngai. Rĩrĩa rĩothe tuonania ngumo icio, nĩ tuonanagia atĩ roho wa Ngai nĩ ũraruta wĩra thĩinĩ witũ. w22.03 11-12 ¶14-16

No tũkorũo tũgĩtungatĩra Jehova hingo ciothe na twĩke maũndũ maingĩ mega, no nĩ harĩ ũndũ ũmwe wa bata mũtũmwo Petero aatĩtĩrithirie ũhoro waguo. Mbere ya Petero atwĩkĩrĩte ngoro tũkorũo tũrĩ atheru mĩthiĩre-inĩ itũ, aambire akiuga: “Mwĩhotorei meciria manyu nĩ ũndũ wa wĩra.” (1 Pet. 1:13) Wĩra ũcio nĩ ũrĩkũ? Petero aaugire atĩ ariũ a Ithe na Kristo nĩ ‘mangĩamenyithanirie kũndũ guothe mawega ma Ũrĩa wametire.’ (1 Pet. 2:9) Ũrĩa kũrĩ nĩ atĩ, Akristiano othe ũmũthĩ nĩ makoragwo na mweke wa kũnyitanĩra wĩra-inĩ ũcio wa bata, ũrĩa ũkoragwo na ũguni gũkĩra wĩra ũngĩ o wothe. Na githĩ ti gĩtĩo kĩa mwanya twĩ nakĩo gĩa kũhunjia na kũrutana na kĩyo hingo ciothe tũrĩ andũ atheru a Ngai? (Mar. 13:10) Rĩrĩa twerutanĩria gwĩka ũguo, nĩ tuonanagia atĩ nĩ twendete Ngai witũ o hamwe na andũ arĩa angĩ. Ningĩ nĩ tuonanagia atĩ nĩ tũrenda ‘gũkorũo tũrĩ atheru’ mĩthiĩre-inĩ itũ yothe. w21.12 13 ¶18

Mũtũmwo Paulo nĩ aakoragwo na mawoni mega kwerekera aarĩ na ariũ a Ithe witũ. Nĩ aamenyaga atĩ gũkorũo mũndũ ahĩtĩtie ti kuuga atĩ mũndũ ũcio nĩ mũũru. Nĩ eendete aarĩ na ariũ a Ithe witũ na aaroraga mũno ngumo ciao njega. Rĩrĩa maremwo gwĩka ũndũ ũrĩa wagĩrĩire, aatuaga atĩ marĩ na muoroto mwega na ũndũ ũrĩa marabatara nĩ gũteithĩrĩrio. Ta wĩcirie ũrĩa Paulo aarũmbũyanirie na aarĩ a Ithe witũ erĩ a kĩũngano kĩa Filipi. (Afil. 4:1-3) No kũhoteke Yudia na Sintike matiaiguithanagia. Paulo ndaamarakarĩire kana akĩmatuĩra, no aarorire ngumo ciao njega. Aarĩ a Ithe witũ acio ehokeku nĩ maatungatĩire Jehova kwa ihinda iraihu. Paulo nĩ aamenyaga atĩ Jehova nĩ amendete. Tondũ Paulo aarĩ na mawoni mega kũmerekera, nĩ aamekĩrire ngoro maiguithanie. Ningĩ tondũ wa mwerekera wake mwega, Paulo nĩ aahotire gũtũũria gĩkeno na ũrata mũrũmu hamwe na aarĩ na ariũ a Ithe witũ a kĩũngano kĩu. w22.03 30 ¶16-18

Thayũ ũrĩa Jehova atũheaga nĩ ũhooragĩria ngoro citũ na ũgatũteithia gwĩciria na njĩra ĩrĩa yagĩrĩire. Mwarĩ wa Ithe witũ ũmwe wĩtagwo Luz nĩ onete ũũma wa ũndũ ũcio. Aaugire ũũ: “Kaingĩ nĩ njiguaga ihooru. Rĩmwe na rĩmwe, kũigua ũguo gũtũmaga ndĩcirie atĩ Jehova ndanyendete. No rĩrĩa ũndũ ũcio wekĩka, o rĩo nĩ njĩraga Jehova ũrĩa ndĩraigua. Mahoya nĩ mandeithagia gũcokwo nĩ thayũ.” Ngerekano yake ĩronania atĩ o na ithuĩ no tũgĩe thayũ tũngĩhoya. (Afil. 4:6, 7) Nĩ tũĩ atĩ Jehova na Jesu nĩ marĩtũteithagia hĩndĩ ĩrĩa mũndũ twendete akua. Nĩ twĩkĩragwo ngoro kũhunjia na kũrutana tũrĩ na ũcayanĩri tondũ Jehova Ngai na Jesu Kristo nĩ monanagia ngumo ĩyo ya bata. Ningĩ nĩ tũmagĩrĩrio nĩ kũmenya atĩ Jehova na Mũrũ wake nĩ mamenyaga mawathe maitũ, na nĩ mehaarĩirie gũtũteithia gũkirĩrĩria. Nĩ twĩriragĩria mũno mũthenya ũrĩa Jehova ‘akaagiria maithori mothe mathire maitho-inĩ maitũ’!—Kũg. 21:4. w22.01 15 ¶7; 19 ¶19-20

Jesu aagwetire mĩromo ĩĩrĩ ngũrani ĩrĩa ĩtongoragia andũ harĩ njĩra igĩrĩ ngũrani, ĩmwe “njariĩ” na ĩngĩ “ngunderu.” (Mat. 7:14) Gũtikoragwo na njĩra ya gatatũ. No mũhaka tũthuure njĩra ĩrĩa tũkũgerera. Rĩu nĩrĩo itua rĩa bata mũno tũngĩtua ũtũũro-inĩ, tondũ muoyo witũ wa tene na tene wĩhocetie harĩ rĩo. Njĩra ĩyo “njariĩ” ĩgeragwo nĩ andũ aingĩ tondũ nĩ hũthũ kũgerera. Ũndũ wa kĩeha nĩ atĩ, andũ aingĩ mathuuraga kũgerera njĩra ĩyo na gwĩka maũndũ marĩa marekwo nĩ andũ arĩa maramĩgera. Ũndũ ũrĩa matoĩ nĩ atĩ mũndũ ũrĩa wendaga andũ magere njĩra ĩyo nĩ Shaitani ũrĩa Mũcukani, na atĩ njĩra ĩyo ĩtwaraga andũ gĩkuũ-inĩ. (1 Kor. 6:9, 10; 1 Joh. 5:19) Ngũrani na njĩra ĩyo “njariĩ,” njĩra ĩyo ĩngĩ nĩ “ngunderu,” na Jesu aaugire atĩ andũ arĩa mamĩgeraga nĩ anini. Nĩkĩ hihi? Thĩinĩ wa mũhari ũrĩa ũrũmĩrĩire, Jesu eerire arũmĩrĩri ake mehũgage anabii a maheeni.—Mat. 7:15. w21.12 22-23 ¶3-5