Juni

Ayubu aarĩ na ũrata wa hakuhĩ hamwe na Jehova. Aarĩ na famĩlĩ nene ĩrĩ na gĩkeno, na aarĩ na ũtonga mũingĩ. (Ayub. 1:​1-5) No mũthenya ũmwe, nĩ oorirũo nĩ indo ciake hakuhĩ ciothe. Aambire akĩũrũo nĩ ũtonga wake. (Ayub. 1:​13-17) Ciana ciake ciothe igĩcoka igĩkua. Ta hũũra mbica kĩmako, kĩeha, na ruo rũrĩa Ayubu na mũtumia wake maaiguire rĩrĩa maamenyire atĩ ciana ciao ciothe ikũmi nĩ ciakuĩte. Nĩkĩo Ayubu aatembũrangire nguo yake na akĩgwa thĩ agĩcakaya. (Ayub. 1:​18-20, The Bible in Gikũyũ.) Shaitani aacokire akĩrehera Ayubu mũrimũ mũũru mũno warĩ na ruo na wa gĩconoko. (Ayub. 2:​6-8) Mbere ĩyo, Ayubu nĩ aatĩĩtwo mũno nĩ andũ itũũra-inĩ. Andũ maathiaga kũrĩ we gũcaria ũtaaro. (Ayub. 31:18) No rĩu nĩ maambĩrĩirie kũmwĩthema. Nĩ aatiganĩirio nĩ ariũ a nyina, arata a hakuhĩ, o na nginya ndungata ciake.—Ayub. 19:​13, 14, 16. w22.06 21 ¶5-6

Thutha wa kũbatithio, ithuothe nĩ tũrabatara kũrũmagĩrĩra ũtaaro ũrĩa mũtũmwo Paulo aaheire Akristiano a Efeso. Aamekĩrire ngoro matuĩke Akristiano ‘agima biũ.’ (Ef. 4:13) Nĩ ta aameraga: ‘Thiĩi na mbere gũkũra kĩĩroho.’ Gũkinyĩria rĩu nĩ wendete Jehova mũno. Ĩndĩ wendo waku harĩ we no wongerereke. Na njĩra ĩrĩkũ? Mũtũmwo Paulo nĩ aagwetire ũndũ ũmwe tũngĩka thĩinĩ wa Afilipi 1:9. Paulo aahoire atĩ wendo wa Afilipi “ũingĩhe mũno makĩria.” Kwoguo no tũhote kwenda Jehova makĩria. Tũngĩka ũguo na njĩra ya kũgĩa na “ũmenyo ũrĩa wa ma na ũtaũku wothe.” O ũrĩa tũgũthiĩ na mbere kũmenya Jehova, noguo tũgũthiĩ na mbere kũmwenda makĩria, na gũkenera ngumo ciake hamwe na njĩra ciake cia gwĩka maũndũ. Nĩ tũrĩkoragwo na wendi mũnene wa kũmũkenia, na tũgethema gwĩka ũndũ o wothe ũngĩmũrakaria. Nĩ twĩrutanagĩria mũno kũmenya wendi wake na ũrĩa tũngĩũhingia. w22.08 3 ¶3-4

Maũndũ marĩa mandĩkĩtwo ibuku-inĩ rĩa Kũguũrĩrio matiandĩkĩirũo andũ othe, no nĩ ithuĩ twandĩkĩirũo tũrĩ ndungata cia Ngai. Tondũ tũrĩ andũ a Ngai, tũtiagĩrĩirũo kũmaka nĩ ũndũ wa kũmenya atĩ tũrĩ na itemi harĩ kũhinga kwa morathi ma magegania marĩa marĩ ibuku-inĩ rĩu. Mũtũmwo Johana nĩ oonanirie ihinda rĩrĩa morathi macio mangĩkaahinga. Aaugire ũũ: “Kũgerera ũtongoria wa roho mũtheru, nĩ ndekorire thĩinĩ wa mũthenya wa Mwathani.” (Kũg. 1:10) Rĩrĩa Johana aandĩkaga ciugo icio kĩndũ mwaka wa 96 Mahinda Maitũ (M.M.), “mũthenya wa Mwathani” watigĩtie mĩaka mĩingĩ ũkinye. (Mat. 25:​14, 19; Luk. 19:12) No kũringana na ũrathi wa Bibilia, mũthenya ũcio waambĩrĩirie mwaka wa 1914 rĩrĩa Jesu aatuĩkire Mũthamaki kũrĩa igũrũ. Kuuma mwaka ũcio gũthiĩ na mbere, morathi ma ibuku rĩa Kũguũrĩrio marĩa mahutĩtie andũ a Ngai nĩ maambĩrĩirie kũhinga. Kwoguo tũratũũra ihinda rĩu rĩa “mũthenya wa Mwathani.”—Kũg. 1:3. w22.05 2 ¶2-3

Mũnabii ũcio wa maheeni arĩ o muoyo, aaikirio thĩinĩ wa iria rĩa mwaki wa ũbiriti hamwe na nyamũ ĩyo ya gĩthaka. Kwoguo, thirikari icio o igĩthiaga na mbere gwathana, nĩ ikaanangwo tene na tene. Ũndũ ũcio ũtũhutagia atĩa? Tondũ tũrĩ Akristiano, nĩ twagĩrĩirũo gũkorũo tũrĩ ehokeku harĩ Ngai na Ũthamaki wake. (Joh. 18:36) Nĩ tũrabatara gwĩthema kũnyita mbaru maũndũ ma gĩũteti ma thĩ ĩno. O na kũrĩ ũguo, kwaga kwĩingĩria maũndũ-inĩ ma gĩũteti ma thĩ ĩno no ũkorũo ũrĩ ũndũ mũritũ, tondũ thirikari cia thĩ ciendaga tũcinyite mbaru biũ kũgerera ciugo na ciĩko citũ. Andũ arĩa metigagĩra na magacinyita mbaru, nĩ mekĩragwo rũũri rwa nyamũ ĩyo ya gĩthaka. (Kũg. 13:16, 17) No mũndũ o wothe wĩkĩragwo rũũri rũu, ndangĩtĩkĩrĩka harĩ Jehova na nĩ akoorũo nĩ muoyo wa tene na tene. (Kũg. 14:​9, 10; 20:4) Nĩ ũndũ wa bata harĩ o ũmwe witũ kwaga kwĩingĩria maũndũ-inĩ ma gĩũteti o na rĩrĩa twahatĩkwo mũno gwĩka ũguo. w22.05 11 ¶12-13

Muoroto ũmwe tũngĩĩigĩra nĩ kwĩruta wĩra kana ũndũ mũna. Tũngĩĩrutanĩria kwagagĩria ũhoti witũ, no tũhote kũhingia maũndũ maingĩ makĩria ũtungata-inĩ wa Jehova. Ta wĩcirie ũrĩa gũbataranagia aruti wĩra aingĩ nĩ ũndũ wa gwaka Wabici cia Honge, Nyũmba cia Igomano, na Nyũmba cia Ũthamaki. Aingĩ ao merutaga mawĩra macio na njĩra ya kũrutithania wĩra na aarĩ na ariũ a Ithe witũ marĩ na ũmenyeru. Ũmũthĩ, aarĩ na ariũ a Ithe witũ nĩ mareruta maũndũ matiganĩte marĩa mabataranagia nĩguo gũteithĩrĩria kũmenyerera Nyũmba cia Igomano na Nyũmba cia Ũthamaki. Kũgerera njĩra ĩyo na ingĩ, Jehova Ngai, “Mũthamaki wa tene na tene” na Kristo Jesu, “Mũthamaki wa . . . athamaki,” nĩ marahingia maũndũ manene makĩhũthĩra aruti wĩra marĩ na ũmenyeru. (1 Tim. 1:17; 6:15) No twende kwĩrutanĩria kũhũthĩra ũũgĩ ũrĩa twagĩa naguo kũgoocithia Jehova, no ti ithuĩ ene.—Joh. 8:54. w22.04 24 ¶7; 25 ¶11

Suleimani aarĩ mũtongu mũno na nĩ aagacĩrĩte mũno. (1 Ath. 10:7, 14, 15) No Jesu ndaarĩ na indo nyingĩ, o na ndaarĩ na mũciĩ wake. (Mat. 8:20) No eerĩ maarĩ na mawoni maigananĩru megiĩ indo tondũ ũũgĩ wao waumaga harĩ Kĩhumo kĩmwe, nĩkĩo Jehova Ngai. Suleimani nĩ eetĩkĩraga atĩ mbeca nĩ itũhotithagia kũgĩa na indo iria tũbataraga ũtũũro-inĩ na hihi indo ingĩ tũngĩenda. No o na Suleimani arĩ mũtongu ũguo, nĩ aamenyaga atĩ nĩ harĩ maũndũ mangĩ ma bata gũkĩra mbeca. Kwa ngerekano, aandĩkire ũũ: “Kaba gũthuura rĩĩtwa rĩega [kana, “ngumo njega,” kohoro ka magũrũ-inĩ] handũ ha ũtonga mũnene.” (Thim. 22:1) Ũndũ ũngĩ aaugire nĩ atĩ andũ arĩa mendete mbeca matiiganagĩra na indo iria marĩ nacio. (Koh. 5:​10, 12) Ningĩ nĩ aaheanire mũkaana atĩ tũtiagĩrĩire gwĩciria atĩ mbeca nĩcio cia bata mũno ũtũũro-inĩ, tondũ no ithire hĩndĩ o yothe.—Thim. 23:4, 5. w22.05 21 ¶4-5

Gwĩcũrania igũrũ rĩgiĩ irathimo iria tũrĩ nacio mahinda-inĩ maya nĩ kũrĩkagĩra hinya ũrata witũ na Jehova. Na rĩrĩa twecũrania igũrũ rĩgiĩ irathimo iria Jehova atwĩrĩire mahinda mokĩte nĩ tũrĩkagĩra hinya kĩĩrĩgĩrĩro gitũ gĩa kũmũtungatĩra tene na tene. Maũndũ macio mothe nĩ marĩtũteithagia kuongerera gĩkeno gitũ tũgĩtungatĩra Jehova mahinda-inĩ maya. Jehova nĩ ‘akaarahũka’ nĩ ũndũ witũ rĩrĩa akaaniina thĩ ĩno njũru. Tũrĩ na ma atĩ tondũ Jehova nĩ “Ngai wa kĩhooto,” ndagetĩkĩria thĩ ya Shaitani ĩthiĩ na mbere gũkorũo kuo makĩria ma ihinda rĩrĩa rĩagĩrĩire. (Isa. 25:9) Nĩ twetagĩrĩra hamwe na Jehova tũkirĩrĩirie, mũthenya ũcio ũkinye ũrĩa agaatũhonokia. Kamũira hĩndĩ ĩyo ĩkinye, nĩ tũtuĩte itua rĩa gũthiĩ na mbere gũkenera mweke ũrĩa tũrĩ naguo wa kũhoya, kwĩruta Kiugo kĩa Ngai na kũhũthĩra maũndũ marĩa tũreruta, na gwĩcũrania igũrũ rĩgiĩ irathimo citũ. Tweka ũguo, Jehova nĩ arĩtũteithagia gũkirĩrĩria tũrĩ na gĩkeno tũkĩmũtungatĩra. w22.11 13 ¶18-19

O na gũtuĩka Bibilia ndĩtwĩrĩte ũhoro wĩgiĩ ũbatithio wa Timotheo, no tũgerie kũhũũra mbica ũrĩa mami wao Eunike aarĩ na gĩkeno kĩingĩ mũthenya ũrĩa Timotheo aabatithirio. (Thim. 23:25) O na gũtuĩka ndwarĩ ũndũ mũhũthũ, Eunike nĩ aahotete gũteithia Timotheo kwenda Jehova, na kwenda mũrũwe Jesu Kristo. Timotheo aarereirũo famĩlĩ-inĩ ĩgayũkanĩte kĩndini. Baba wao aarĩ Mũngiriki, nake mami wao na cũcũ wao maarĩ Ayahudi. (Atũm. 16:1) No kũhoteke Timotheo aarĩ tinĩnja rĩrĩa Eunike na Loisi maatuĩkire Akristiano. No ithe ndaatuĩkire Mũkristiano. Hihi Timotheo angĩarũmĩrĩire wĩtĩkio ũrĩkũ? O na ũmũthĩ, atumia Akristiano nĩ mendete famĩlĩ ciao. Nĩ mendaga mũno gũteithia ciana ciao ikũrie ũrata wa hakuhĩ hamwe na Jehova. Na Ngai nĩ akenagio mũno nĩ kĩyo kĩu kĩao. (Thim. 1:​8, 9) Jehova nĩ ateithĩtie atumia aingĩ kũruta ciana ciao ũhoro wa ma. w22.04 16 ¶1-3

Ica ikuhĩ Jehova nĩ arĩkĩra ũndũ ngoro-inĩ cia atongoria a gĩũteti “nĩguo mahingie rĩciria rĩake.” Maumĩrĩro magaakorũo marĩ marĩkũ? Thirikari icio cia gĩũteti, nĩcio “athamaki ikũmi,” nĩ igaatharĩkĩra ndini cia maheeni na icianange. (Kũg. 17:1, 2, 12, 16) Tũmenyaga atĩa atĩ mũthia wa Babuloni Ũrĩa Mũnene nĩ ũkuhĩrĩirie? Nĩguo tũcokie kĩũria kĩu, nĩ wega kũririkana atĩ itũũra rĩa tene rĩa Babuloni nĩ rĩagitĩrĩtwo na gĩkĩro kĩna nĩ maĩ ma rũũĩ rũnene rwa Farati. Ibuku rĩa Kũguũrĩrio rĩringithanagia andũ milioni nyingĩ arĩa manyitaga mbaru Babuloni Ũrĩa Mũnene na “maĩ” ma kũmũgitĩra. (Kũg. 17:15) No ningĩ nĩ rĩguũragia atĩ maĩ macio nĩ ‘mangĩkahũa’ kuonania atĩ andũ aingĩ nĩ mangĩgatiga kũnyitanĩra na ndini cia maheeni gũkũ thĩ. (Kũg. 16:12) Ũmũthĩ, ũrathi ũcio nĩ ũrahinga tondũ andũ aingĩ nĩ matigĩte kũnyitanĩra na ndini, na makahũgũkĩra kũndũ kũngĩ gũcaria ũteithio. w22.07 5-6 ¶14-15

Kuohanĩra nĩ kuonanagia atĩ tũrĩ na ngatho. Thĩinĩ wa ngerekano ĩmwe ya Jesu, aaringithanirie Jehova na mwathi ũmwe warekeire ngombo yake thiirĩ mũnene ĩtangĩahotire kũrĩha. No ngombo ĩyo yoheirũo nĩ yaregire kuonia ngombo ĩngĩ tha, ĩrĩa yarĩ na thiirĩ mũnini gũkĩra ũrĩa yoheirũo. (Mat. 18:​23-35) Jesu eendaga gũtũruta atĩa? Angĩkorũo nĩ tũkoragwo na ngatho nĩ ũndũ wa tha nyingĩ iria Jehova atuonetie, nĩ tũrĩtindĩkagwo kuohera andũ arĩa angĩ. (Thab. 103:9) Ngathĩti ya Mũrangĩri yaugĩte ũũ mĩaka mĩingĩ mĩhĩtũku: “O na tũngĩohera andũ arĩa angĩ maita maingĩ atĩa, gũtirĩ hĩndĩ tũngĩkinyĩrĩra gĩkĩro kĩrĩa Jehova atuohagĩra nakĩo na agatuonia tha kũgerera igongona rĩa Kristo.” Arĩa mohanagĩra nĩ marĩohagĩrũo. Jehova onanagia tha kũrĩ arĩa monanagia tha. (Mat. 5:7) Jesu nĩ oonanirie ũndũ ũcio wega rĩrĩa aarutire arutwo ake ũrĩa marĩhoyaga.—Mat. 6:14, 15. w22.06 10 ¶8-9

Rĩrĩa Jesu ookire gũkũ thĩ, nĩ aahotire kwĩgerekania na ngumo cia Ithe biũ. (Joh. 14:9) Kwoguo rĩrĩa tweruta ũhoro wĩgiĩ Jesu, nĩ tũhotaga kũmenya Jehova Ngai na kũmwenda. Ningĩ nĩ tũgunĩkaga kuumana na morutani ma Jesu na ũtongoria ũrĩa aheaga kĩũngano gĩa Gĩkristiano ũmũthĩ. Nĩ atũrutĩte ũrĩa tũngĩtũũra na njĩra ĩrĩtũmaga twĩtĩkĩrĩke nĩ Jehova. Na ithuothe no tũgunĩke kuumana na gĩkuũ kĩa Jesu. Rĩrĩa Jesu aariũkirio, Jehova nĩ eetĩkĩrire thogora wa igongona rĩake rĩrĩa “[rĩtũtheragia] mehia mothe.” (1 Joh. 1:7) Rĩu Jesu nĩ Mũthamaki ũrĩ na hinya ũtangĩkua. Ica ikuhĩ nĩ arĩhehenja Shaitani mũtwe. (Kĩam. 3:15) Ndungata cia Ngai nĩ igaakena mũno rĩrĩa Shaitani akaaniinwo! Kamũira hĩndĩ ĩyo ĩkinye, ndũgakue ngoro. Ngai witũ nĩ mwĩhokeku. Nĩ akaarathima “ndũrĩrĩ ciothe cia thĩ” na njĩra nene. w22.07 18 ¶13; 19 ¶19

Nĩ twagĩrĩirũo gũkorũo twĩhaarĩirie kũgarũrĩra rĩrĩa tũreigĩra mĩoroto. Nĩkĩ? Tondũ tũtikoragwo na ũhoti igũrũ rĩgiĩ maũndũ marĩa mangiumĩra ũtũũro-inĩ witũ. Kwa ngerekano, mũtũmwo Paulo nĩ aateithĩtie kwambĩrĩria kĩũngano kĩerũ itũũra-inĩ rĩa Thesalonike. No akararia nĩ maatũmire Paulo aume itũũra-inĩ rĩu. (Atũm. 17:​1-5, 10) Paulo angĩaikarire kũu, nĩ aangĩaigire mĩoyo ya ariũ a Ithe witũ ũgwati-inĩ. No Paulo ndaatigire kũgeria kũmateithia. Handũ ha ũguo, nĩ aagarũrĩire kũringana na ũrĩa maũndũ maatariĩ. Thutha ũcio nĩ aatũmire Timotheo nĩguo arũmbũiye mabataro ma kĩĩroho ma aarĩ na ariũ a Ithe witũ a kĩũngano kĩu kĩerũ gĩa Thesalonike. (1 Thes. 3:​1, 2) No mũhaka akorũo Akristiano acio a Thesalonike nĩ maakenire mũno. No twĩrute kuumana na kĩonereria kĩa Paulo arĩ Thesalonike. No tũkorũo tũkĩĩrutanĩria gũkinyĩra mweke mũna wa ũtungata, no maũndũ maitũ makorũo matingĩtwĩtĩkĩria gũkinyĩra mweke ũcio. (Koh. 9:11) Ũngĩĩkora ũndũ-inĩ ta ũcio, korũo wĩhaarĩirie kwĩigĩra muoroto ũngĩ ũrĩa ũngĩhota gũkinyĩra. w22.04 25-26 ¶14-15

Jehova nĩ atũũmagĩrĩria na njĩra ya gũtũhe kĩĩrĩgĩrĩro kĩa mahinda mokĩte. Ta wĩcirie ũhoro wa maũndũ mamwe magwetetwo thĩinĩ wa Bibilia marĩa mangĩtũũmĩrĩria hĩndĩ ya magerio. Thĩinĩ wa Maandĩko, Jehova atwĩrĩte atĩ gũtirĩ kĩndũ “kĩngĩhota gũtũtigithũkania na wendo [wake],” nginya magerio maritũ. (Rom. 8:​38, 39) Ningĩ nĩ atũheete ũũma atĩ “akoragwo hakuhĩ na arĩa othe mamũkayagĩra” kũgerera mahoya. (Thab. 145:18) Jehova atwĩrĩte atĩ tũngĩmwĩhokaga, nĩ tũrĩhotaga gũkirĩrĩria igerio o rĩothe na tũgakorũo na gĩkeno o na rĩrĩa tũragerera magerio. (1 Kor. 10:13; Jak. 1:2) Kiugo kĩa Ngai ningĩ nĩ gĩtũririkanagia atĩ magerio marĩa tũragerera no ma ihinda inini maringithanĩtio na irathimo cia tene na tene iria atwĩrĩire. (2 Kor. 4:​16-18) Jehova nĩ atũheete kĩĩrĩgĩrĩro kĩa ma atĩ nĩ akaaniina Shaitani ũrĩa Mũcukani, ũrĩa ũtũrehagĩra mathĩna maitũ mothe, na aniine andũ arĩa aganu. (Thab. 37:10) Hihi nĩ ũigĩte meciria-inĩ maandĩko mamwe ma gũkũũmĩrĩria kuuma Bibilia-inĩ marĩa mangĩgũteithia gũkirĩrĩria magerio ihinda rĩũkĩte? w22.08 11 ¶11

Hihi nĩ wonaga ta ũtangĩhota gũthiĩ na mbere gũtũũra kũringana na ithimi cia Jehova cia ũthingu mũthenya o mũthenya ihinda rĩa mĩaka mĩingĩ? Jehova atwĩrĩire atĩ ũthingu witũ no “ũhaane o ta makũmbĩ ma iria.” (Isa. 48:18) Ta hũũra mbica ũrũgamĩte rũteere-inĩ rwa iria inene, ũkĩĩrorera makũmbĩ magĩthiĩ matekũrũgama, o ikũmbĩ thutha wa rĩrĩa rĩngĩ. Ũrĩ kũndũ kũu kũhooreru, ndũngĩciria atĩ kũrĩ hĩndĩ makũmbĩ macio magatiga gũthiĩ. Nĩ ũĩ atĩ megũtũũra ũguo. Ũthingu waku no ũhaane o ta makũmbĩ macio ma iria. Na njĩra ĩrĩkũ? Rĩrĩa wabatara gũtua itua, ambaga gwĩciria ũrĩa Jehova angĩenda wĩke. Ũcoke wĩke ũguo. O na itua rĩu rĩngĩkorũo rĩrĩ iritũ atĩa, Ithe witũ ũkwendete nĩ arĩkoragwo hamwe nawe, nĩguo agũteithie gũikara ũrũmĩte na ũrĩ na hinya, na ũhote gũtũũra o mũthenya kũringana na ithimi ciake cia ũthingu.—Isa. 40:​29-31. w22.08 30 ¶15-17

Mũthia-inĩ wa mĩaka ĩrĩa 1,000, Shaitani nĩ akaarekererio na agerie kũhĩtithia andũ akinyanĩru. Hĩndĩ ya igerio rĩu, andũ othe akinyanĩru thĩinĩ wa thĩ nĩ makaaheo mweke wa kuonania kana nĩ matĩĩte rĩĩtwa rĩa Ngai na makanyita mbaru wathani wake. (Kũg. 20:​8-10) Maũndũ marĩa o mũndũ ageeka hĩndĩ ĩyo nĩ magaatua kana rĩĩtwa rĩake nĩ rĩkaandĩkwo ibuku-inĩ rĩa muoyo ũndũ rĩtangĩthario. Bibilia yonanagia atĩ andũ amwe nĩ makaaregana na wathani wa Jehova o ta Adamu na Hawa. Gũgaathiĩ atĩa harĩ o? Kũguũrĩrio 20:15 yugaga ũũ: “Mũndũ o wothe ũtaandĩkĩtwo thĩinĩ wa ibuku rĩa muoyo nĩ aaikirio iria-inĩ rĩu rĩa mwaki.” Kwoguo andũ acio aremi nĩ makaaniinwo tene na tene. No andũ aingĩ akinyanĩru nĩ mageetiiria igerio rĩu rĩa mũthia. w22.09 23-24 ¶15-16

Andũ amwe thĩinĩ wa kĩũngano gĩa karine ya mbere maatĩtĩrithagia atĩ Andũ a Ndũrĩrĩ arĩa maagarũrũkĩte magatuĩka Akristiano no mũhaka mangĩaruire, nĩguo matikaingĩrĩrũo nĩ Ayahudi. (Gal. 6:12) Mũtũmwo Paulo ndeetĩkanagia o na hanini na mawoni mao, no handũ ha gũtĩtĩrithia marũmĩrĩre mawoni make, arĩ na wĩnyihia nĩ aahoire ũtaaro kuuma kũrĩ atũmwo na athuri thĩinĩ wa Jerusalemu. (Atũm. 15:2) Ũndũ ũcio Paulo eekire nĩ wateithirie Akristiano acio gũtũũria gĩkeno na thayũ thĩinĩ wa kĩũngano. (Atũm. 15:30, 31) Kũngiumĩra ũndũ ũngĩrehe ngarari, no tũtũme kĩũngano kĩgĩe na thayũ tũngĩetha ũtongoria kuuma kũrĩ arĩa Jehova ehokeire maũndũ thĩinĩ wa kĩũngano. Kaingĩ ũtongoria ũrĩa ũheanagwo nĩ ithondeka no ũtũteithie, kana tuone ũtaaro wa Kĩĩmaandĩko kuuma mabuku-inĩ maitũ. Tũngĩigaga meciria maitũ harĩ kũrũmĩrĩra ũtongoria ũcio handũ ha kwĩra andũ arĩa angĩ mawoni maitũ, no tũtũme kĩũngano kĩgĩe na thayũ. w22.08 22 ¶8-9

Rĩmwe na rĩmwe aingĩ aitũ nĩ tũiguaga tũkĩenda kwĩra mũrata wa hakuhĩ kaũndũ gaitũ ga thĩinĩ. Ti ũndũ mũhũthũ gwĩka ũguo hingo ciothe. No tũkorũo tũtamenyerete kwĩra andũ arĩa angĩ maũndũ maitũ ma thĩinĩ na no tũkue ngoro mũno tũngĩmenya atĩ mũrata witũ nĩ erĩte andũ angĩ ũndũ tũramwĩrĩte. No nĩ tũkenaga mũno rĩrĩa twamenya atĩ mũrata witũ nĩ oĩ kũiga hitho. Athuri a kĩũngano arĩa maigaga hitho makoragwo marĩ “handũ ha kwĩhitha rũhuho, [na] handũ ha kwĩgitia” kũrĩ Akristiano. (Isa. 32:2) Nĩ tũĩ atĩ no twĩre athuri a kĩũngano ũndũ o wothe tũrĩ na ma atĩ ũndũ ũrĩa tũkũmeera ũgũikara ũrĩ hitho. Tũtimatindĩkagĩrĩria matwĩre maũndũ marĩa magĩrĩire kũigwo marĩ hitho. Makĩria ma ũguo, nĩ tũkenagio nĩ atumia a athuri a ciũngano citũ tondũ matigeragia kũhoya athuri ao ũhoro wa hitho wa andũ arĩa angĩ. Hatarĩ nganja, mũtumia wa mũthuri wa kĩũngano nĩ agunĩkaga rĩrĩa aga kũigua ũhoro wa hitho wa aarĩ na ariũ a Ithe witũ. w22.09 11 ¶10-11

No tũkorũo na ma atĩ Jehova nĩ akaahonokia ndungata ciake njĩhokeku hĩndĩ ya “thĩna [ũrĩa] mũnene” ũrĩ mbere. (Mat. 24:21; Dan. 12:1) Ageeka ũguo rĩrĩa ngwatanĩro ya mabũrũri, nĩyo Gogu wa Magogu, ĩgaatharĩkĩra andũ arĩa ehokeku harĩ Jehova thĩinĩ wa thĩ yothe. O na ngwatanĩro ĩyo ĩngĩgaakorũo ĩrĩ ya mabũrũri mothe 193 marĩa mathondekete Ũrũmwe wa Mabũrũri, ndĩgaatooria Ũrĩa Mũnene Makĩria na mbũtũ yake ya igũrũ. Jehova eranĩire ũũ: “Nĩ ngeegoocithia, na ndĩyonanie ũrĩa ndĩ mũtheru na ndĩĩmenyithanie mbere ya maitho ma ndũrĩrĩ nyingĩ; nacio nĩ ikaamenya atĩ niĩ nĩ niĩ Jehova.” (Ezek. 38:14-16, 23) Tharĩkĩro ĩyo ya Gogu nĩyo ĩgaatuthũra mbaara ya Hari–Magedoni, rĩrĩa Jehova akaananga “athamaki a thĩ yothe ĩrĩa ĩikaragwo.” (Kũg. 16:14, 16; 19:19-21) Ngũrani nao, “andũ arĩa arũngĩrĩru no o tu magaatũũra thĩinĩ wa thĩ, na arĩa matũũragia wĩkindĩru nĩo magaatigara kuo.”—Thim. 2:21, kohoro ka magũrũ-inĩ. w22.10 16-17 ¶16-17

Ithuĩ tũtingĩhota gũthoma ngoro, no Jehova nowe tu “[ũthuthuragia] mĩoroto.” (Thim. 16:2) Endete andũ a mĩthemba yothe, kuuma mĩrerere-inĩ yothe, na ũndũire-inĩ o wothe. Na Jehova atwĩkagĩra ngoro ‘tũhingũre ngoro citũ biũ.’ (2 Kor. 6:13) Twĩrutanagĩria kwenda aarĩ na ariũ a Ithe witũ othe no ti kũmatuĩra. Ũguo nĩ kuonania atĩ tũtiagĩrĩirũo gũtuĩra nginya andũ arĩa marĩ nja wa kĩũngano. Hihi no ũtuĩre mũndũ wa famĩlĩ ũrĩa ũtarĩ Mũira wa Jehova uuge atĩ, “Ũrĩa gũtirĩ hĩndĩ agooka ũhoro-inĩ wa ma”? Aca, tondũ ũngĩka ũguo ũngĩkorũo ũkĩĩyona ũrĩ mũthingu, na ũkĩruta wĩra wa Jehova wa gũtuanĩra. Jehova no aheete “andũ othe kũndũ guothe” mweke wa kwĩrira. (Atũm. 17:30) Hingo ciothe ririkanaga atĩ kwĩyona ũrĩ mũthingu nĩ kwaga ũthingu. Rĩrĩa twenda ithimi cia Jehova cia ũthingu nĩ tũrĩkoragwo na gĩkeno na tũgakorũo twĩ kĩonereria kĩega harĩ andũ arĩa angĩ, na ũndũ ũcio ũgatũma matwende na makuhĩrĩrie Jehova makĩria. w22.08 31 ¶20-22

No twĩrĩgĩrĩre atĩ nĩ tũrĩcemanagia na ũkararia tũkĩruta wĩra witũ wa kũhunjia. Ũkararia ũcio o na no wongerereke ihinda-inĩ rĩũkĩte. (Dan. 11:44; 2 Tim. 3:12; Kũg. 16:21) O na kũrĩ ũguo, no tũkorũo na ma atĩ Jehova nĩ arĩtũheaga ũteithio ũrĩa tũrabatara. No tũkorũo na ma na ũndũ ũcio tondũ hingo ciothe Jehova nĩ ateithagia ndungata ciake kũhingia ũtungata wao, o na ũngĩkorũo ũrĩ mũritũ atĩa. Ta wĩcirie ũhoro wa mũnabii Ezekieli, ũrĩa wahunjagĩria Ayahudi arĩa maarĩ ithamĩrio Babuloni. Andũ arĩa Ezekieli aahunjagĩria maahaanaga atĩa? Jehova aaugire atĩ maarĩ andũ “aremi,” na nĩ ‘moomĩtie ngoro.’ Aaugire atĩ maatariĩ ta mĩigua na tũngʼaurũ. Nĩkĩo Jehova eerire Ezekieli maita maingĩ ũũ: “Ndũgetigĩre”! (Ezek. 2:​3-6) Ezekieli nĩ aahotire kũhingia wĩra wake wa kũhunjia tondũ (1) aatũmĩtwo nĩ Jehova, (2) nĩ aaheirũo hinya kũgerera roho mũtheru, na (3) nĩ eekĩrirũo hinya nĩ ciugo cia Ngai. w22.11 2 ¶1-2

Indo ciothe irĩ muoyo iria Jehova oombire thĩinĩ wa thĩ, mũthia-inĩ nĩ ingĩakuire. No mũndũ oombirũo arĩ na mweke wa mwanya wa gũtũũra ategũkua. Ningĩ Jehova aatũmbire twĩ na wendi mũnene wa gũtũũra muoyo. Bibilia ĩkĩaria ũhoro wa andũ, yugaga atĩ Ngai nĩ “ekĩrĩte ũhoro wa tene na tene ngoro-inĩ ciao.” (Koh. 3:11) Ũcio nĩ ũndũ ũmwe ũtũmaga tuone gĩkuũ kĩrĩ thũ. (1 Kor. 15:26) Rĩrĩa twarũara biũ-rĩ, hihi tũikaraga o ũguo twetereire gũkua? Aca. Kaingĩ tũthiaga thibitarĩ na rĩmwe na rĩmwe tũkanyua ndawa nĩguo tũhone. Twĩkaga ũrĩa wothe tũngĩhota nĩguo tũtigakue. Na rĩrĩa mũndũ twendete akua, gũtekũmakania ararĩ mwana kana mũndũ mũkũrũ, nĩ tũtigagwo na ruo rũingĩ mũno rwa ngoro. (Joh. 11:32, 33) Hatarĩ nganja, korũo Mũũmbi witũ ũrĩ wendo ndatũũmbĩte tũtũũrage tene na tene, ndangĩatũheire wendi ta ũcio na ũhoti ũrĩa tombo witũ ũkoragwo naguo. w22.12 3 ¶5; 4 ¶7

Mahinda-inĩ maya maritũ, aarĩ na ariũ a Ithe witũ aingĩ no makorũo marĩ arwaru, marĩ na guoya, kana marĩ na ihooru. Wĩrutanĩrie kwaranĩria na aarĩ na ariũ a Ithe witũ. Rĩrĩa gwatuthũka mũrimũ wa kũgwatanio, no tũbatare gũikara tũraihanĩrĩirie o na rĩrĩa tũrĩ hamwe na arĩa tũthathayagia nao. Hĩndĩ ta ĩyo, no ũigue ta ũrĩa mũtũmwo Johana aaiguire. Nĩ eendaga kuona mũrata wake Gayo ũthiũ kwa ũthiũ. (3 Joh. 13, 14) No nĩ aataũkĩirũo atĩ kwa ihinda rĩna ndangĩahotire kuona Gayo. Kwoguo Johana agĩka ũrĩa angĩahotire, akĩandĩkĩra Gayo marũa. Angĩkorũo rĩmwe no ũkorũo ũrĩ ũndũ mũritũ kwaranĩria na aarĩ na ariũ a Ithe witũ ĩmwe kwa ĩmwe, geria kwaranĩria nao na njĩra ingĩ. Rĩrĩa wathiĩ na mbere kwaranĩria na Akristiano arĩa angĩ, nĩ ũrĩiguaga ũhooreire na ũtarĩ na kĩeha. Rĩrĩa waigua ũrĩ na mĩtangĩko, aranagĩria na athuri a kĩũngano na ũgathikĩrĩria ciugo ciao cia gũgwĩkĩra ngoro.—Isa. 32:1, 2. w22.12 17-18 ¶6-7

Bibilia yonanagia atĩ kwa ihinda, Jusufu oohetwo magũrũ make na bĩngũ na ngingo yake ĩkohwo na igera. (Thab. 105:​17, 18) Maũndũ ma Jusufu maathiaga mathũkĩte o na makĩria, agĩtiga gũtuĩka ngombo yehoketwo, agĩtuĩka muohwo. Hihi nĩ ũrĩ wahĩtũkĩra ũndũ mũritũ ũrĩa wathiaga ũgĩthũkaga o na makĩria o na thengia ya gũkorũo ũkĩhoya na kĩyo? Ũndũ ũcio no ũhaanĩke. Jehova ndagiragĩrĩria tũtigacemanie na moritũ thĩinĩ wa thĩ ĩno ĩratongorio nĩ Shaitani. (1 Joh. 5:19) O na kũrĩ ũguo, no ũkorũo na ma na ũndũ ũyũ: Jehova nĩ oĩ wega biũ ũndũ ũrĩa ũragerera na nĩ akũrũmbũyagia. (Mat. 10:​29-31; 1 Pet. 5:​6, 7) Makĩria ma ũguo, eranĩire ũũ: “Ndirĩ hĩndĩ ngaagũtiga, na ndirĩ hĩndĩ ngaagũtirika.” (Ahib. 13:5) Jehova no agũteithie gũkirĩrĩria o na rĩrĩa ũrĩ ũndũ-inĩ ũratũma wone ta ũtarĩ na mwĩhoko. w23.01 15-16 ¶7-8

Maandĩko nĩ matũheaga ũũma atĩ Ngai witũ ndangĩtũtiganĩria nĩ ũndũ wa mahĩtia marĩa twĩkĩte. Aisiraeli nĩ meehĩirie Jehova maita maingĩ, no rĩrĩa meeririre kuuma ngoro, nĩ aamoheire. Akristiano a karine ya mbere o nao nĩ mooĩ atĩ Ngai nĩ aamendete mũno. Mũtũmwo Paulo agĩtongorio nĩ roho eekĩrire Akristiano a Korintho ngoro ‘mohere na momĩrĩrie’ mũndũ wekĩte mehia maritũ tondũ nĩ eerirĩte. (2 Kor. 2:​6, 7; 1 Kor. 5:​1-5) Nĩ ũndũ mwega mũno kuona atĩ Jehova ndaatiganagĩria athathaiya ake no ũndũ tu wa kũmwĩhĩria. Handũ ha ũguo, nĩ aamateithagia arĩ na wendo, akamarũnga, na akametĩkĩria matuĩke arata ake rĩngĩ. Nĩ eranĩire gwĩka o ũguo kũrĩ ehia arĩa othe merirĩte ũmũthĩ. (Jak. 4:​8-10) Bibilia nĩ yonanagia wega atĩ Ngai nĩ arĩ ũũgĩ, kĩhooto, na wendo. Ibuku rĩu nĩ ũira wa atĩ Jehova nĩ endaga tũmũmenye na tũtuĩke arata ake. w23.02 7 ¶16-17

Tũrĩ na itũmi njega cia kwenda kũmenya ũrĩa maũndũ marĩa marekĩka thĩinĩ wa thĩ marahingia ũrathi wa Bibilia. Kwa ngerekano, Jesu nĩ aatwĩrire ũhoro wĩgiĩ maũndũ maigana ũna, marĩa mangĩgekĩka nĩguo tũmenye atĩ mũtabarĩre ũyũ wa Shaitani ũrĩ hakuhĩ gũthira. (Mat. 24:​3-14) Mũtũmwo Petero aatwĩkĩrire ngoro tũigage meciria maitũ harĩ kũhinga kwa ũrathi nĩguo wĩtĩkio witũ ũkoragwo ũrĩ mũrũmu. (2 Pet. 1:​20, 21) Endaga tũkoragwo na mawoni maigananĩru rĩrĩa tũrathuthuria ũrathi wa Bibilia. Atwĩkĩraga ngoro “[tũigage] hakuhĩ meciria-inĩ gũkorũo kuo kwa mũthenya wa Jehova.” (2 Pet. 3:​11-13) Atwĩraga twĩke ũguo ti tondũ nĩ tũrenda kũmenya ‘mũthenya kana thaa’ iria Jehova akaarehe Hari–Magedoni, no nĩ tondũ nĩ twendaga kũhũthĩra ihinda rĩrĩa rĩtigarĩte gũkorũo na “[mĩthiĩre] ya ũtheru na ciĩko cia wĩrutĩri Ngai.” (Mat. 24:36; Luk. 12:40) Twendaga hingo ciothe gũkoragwo na mĩthiĩre mĩega na gũtigĩrĩra atĩ maũndũ marĩa mothe tũreka ũtungata-inĩ wa Jehova tũrameka tondũ wa wendo witũ mũnene kũmwerekera. Nĩguo tũhote gwĩka ũguo, nĩ twagĩrĩirũo kwĩmenyagĩrĩra. w23.02 16 ¶4, 6

Harĩ maũndũ arĩa a “ngʼondu ingĩ” marabatara gwĩka rĩu nĩguo makaagĩrĩra gũtũũra thĩinĩ wa Paradiso. Nĩ tũrabatara kuonania ngatho nĩ ũndũ wa Jesu. Kwa ngerekano, nĩ tuonanagia nĩ tũmwendete kũgerera maũndũ marĩa twĩkagĩra ariũ a Ithe arĩa aitĩrĩrie maguta. Jesu aaugire atĩ angĩgaatuĩra andũ kũringana na ũrĩa meekĩire ariũ a Ithe. (Mat. 25:​31-40) No tũmanyite mbaru wĩra-inĩ wa kũhunjia na gũtua andũ arutwo. (Mat. 28:​18-20) Tũtirabatara gweterera nginya rĩrĩa tũkaaingĩra thĩinĩ wa Paradiso nĩguo tũtuĩke andũ arĩa Jehova endaga matũũre kuo. Nĩ twagĩrĩirũo kwĩrutanĩria ihinda-inĩ rĩrĩ gũkorũo tũrĩ ehokeku ũhoro-inĩ wĩgiĩ mĩario na ciĩko citũ na gũkorũo na ũigananĩru ũtũũro-inĩ witũ. Ningĩ nĩ twagĩrĩirũo gũkorũo tũrĩ ehokeku harĩ Jehova, harĩ mũndũ ũrĩa tũhikanĩtie nake, na harĩ Akristiano arĩa angĩ. O ũrĩa tũrerutanĩria gũtũũra kũringana na ithimi cia Ngai thĩinĩ wa thĩ ĩno njũru, noguo ũgaakorũo ũrĩ ũndũ mũhũthũ harĩ ithuĩ gũtũũra kũringana na ithimi icio thĩinĩ wa Paradiso. Ningĩ no twĩrutanĩrie kũgĩa na ũmenyeru wa mawĩra marĩa tũkaaruta thĩinĩ wa thĩ njerũ, na gũkũria ngumo iria irabatarania nĩguo tuonanie atĩ nĩ tũrehaarĩria gũgaatũũra kuo. w22.12 11-12 ¶14-16

Nĩ tũkenaga nĩ ũndũ wa Jesu gũkorũo arĩ we Mũthamaki witũ tondũ nĩwe Mwathani ũrĩa mwega biũ. Jehova we mwene nĩ aamenyeririe Mũrũ wake na akĩmwamũra atuĩke Mũthamaki. (Isa. 50:​4, 5) Ningĩ wĩcirie ũrĩa Jesu onanĩtie wendo wa kwĩima. (Joh. 13:1) Tondũ Jesu nĩwe Mũthamaki witũ, hatarĩ nganja nĩ twagĩrĩirũo kũmwenda. Aaugire atĩ etaga andũ arĩa mamwendete arata ake, na atĩ monanagia nĩ mamwendete na njĩra ya gwathĩkĩra maathani make. (Joh. 14:15; 15:​14, 15) Na githĩ ti gĩtĩo kĩnene gũkorũo ũrĩ mũrata wa Mũrũ wa Jehova! Nĩ ũĩ atĩ Jesu nĩ mwĩnyihia na atĩ egerekanagia na Ithe biũ. Nĩ wĩrutĩte atĩ nĩ aahũnirie arĩa maarĩ ahũtu, akĩũmĩrĩria arĩa maakuĩte ngoro, na o na akĩhonia arĩa maarĩ arwaru. (Mat. 14:​14-21) Nĩ wĩyoneire ũrĩa atongoragia kĩũngano gĩake ũmũthĩ. (Mat. 23:10) Na nĩ ũĩ atĩ arĩ Mũthamaki wa Ũthamaki wa Ngai nĩ ageeka maũndũ ma magegania o na gũkĩra macio ihinda rĩũkĩte. Ũngĩonania atĩa atĩ nĩ ũmwendete? Na njĩra ya kũrũmĩrĩra kĩonereria gĩake. Ũndũ ũmwe wa mbere ũngĩka nĩguo ũrũmĩrĩre kĩonereria gĩake, nĩ kwĩyamũrĩra Jehova na kũbatithio. w23.03 4 ¶8, 10

Jehova oombire indo nyingĩ kũrĩa igũrũ na gũkũ thĩ o hamwe na iria-inĩ, na indo icio ciothe no itũrute maũndũ maingĩ mamwĩgiĩ. (Thab. 104:​24, 25) Ningĩ ta wĩcirie ũrĩa Ngai aatũmbire. Aatũmbire na njĩra tũrĩhotaga gũkenera kwĩrorera indo thaka iria ombĩte. Ningĩ aatũmbire tũrĩ na ũhoti wa kuona, kũigua, kũhutia, gũcama, na kũnungĩra, nĩguo tũhotage gũkenera indo ngũrani iria ombĩte. Bibilia nĩ ĩtũheaga gĩtũmi kĩngĩ kĩa bata gĩa gũthuthuria ũũmbi. Nĩ ũtũrutaga igũrũ rĩgiĩ ngumo cia Jehova. (Rom. 1:20) Kwa ngerekano, ũngĩĩrorera indo iria Jehova ombĩte nĩ ũkuona atĩ ithondeketwo na njĩra ya magegania. Ũndũ ũcio nĩ wonanagia wega atĩ Ngai arĩ ũũgĩ mũingĩ. Ningĩ ta wĩcirie ũrĩa gũkoragwo na mĩthemba mĩingĩ ya irio. Ũndũ ũcio nĩ wonanagia wega atĩ Ngai nĩ endete andũ. Rĩrĩa tuona ngumo cia Jehova kuumana na indo iria ombĩte, nĩ tũmũmenyaga wega makĩria na tũgatindĩkwo kwenda kũmũkuhĩrĩria o na makĩria. w23.03 16 ¶4-5

O ũrĩa maũndũ thĩinĩ wa thĩ marathiĩ mathũkĩte, noguo ũrĩkoragwo ũrĩ ũndũ mũritũ kwĩhoka Kiugo kĩa Ngai. Andũ no magerie gũtũma tũkorũo na nganja ciĩgiĩ ũũma wa Bibilia na gwĩkĩrĩra nganja kana Jehova nĩwe wamũrĩte ngombo ĩrĩa njĩhokeku na njũgĩ ĩtũtongoragie. No hingo ciothe tũngĩkoragwo twĩtĩkĩtie biũ atĩ Kiugo kĩa Jehova nĩ kĩa ma, nĩ tũrĩhotaga kũregana na tharĩkĩro ta icio kwerekera wĩtĩkio witũ. Nĩ tũrĩkoragwo “[tũtuĩte] itua rĩa gwathĩkagĩra mawatho [ma Jehova] hĩndĩ ciothe, o nginya mũthia.” (Thab. 119:112) ‘Tũtirĩconokaga’ kwĩra andũ arĩa angĩ igũrũ rĩgiĩ ũhoro ũrĩa wa ma na nĩ tũrĩmekĩraga ngoro gũtũũra kũringana na ũhoro ũcio. (Thab. 119:46) Nĩ tũrĩhotaga gũkirĩrĩria nginya moritũ manene o hamwe na kũnyarirũo “[tũrĩ] na wetereri na gĩkeno.” (Kol. 1:11; Thab. 119:​143, 157) Ũhoro wa ma nĩ ũtwĩkĩraga hinya na ũgatũteithia gũikara tũhooreire, na ningĩ ũgatũruta ũrĩa twagĩrĩirũo gũikara thĩinĩ wa thĩ ĩno ĩrathiĩ o ĩhĩngĩcanĩte. Nĩ ũtũheaga kĩĩrĩgĩrĩro kĩega kĩa mahinda mokĩte rungu rwa Ũthamaki wa Ngai. w23.01 7 ¶16-17

Ũtukũ wa mũico Jesu atanakua nĩ aahoire ihinda iraihu akĩhoera arutwo ake, na akĩũria Ithe “[amagitagĩre] kuumana na ũrĩa mũũru.” (Joh. 17:15) Ũndũ ũcio woonanirie atĩ Jesu nĩ aamendete mũno. O na gũtuĩka nĩ aamenyaga moritũ marĩa angĩagereire, no aarũmbũyagia arutwo ake mũno. Tũkĩĩgerekania na Jesu, tũtiĩciragia o ũhoro wa mabataro maitũ tu rĩrĩa tũrahoya. Handũ ha ũguo, nĩ tũhoyagĩra aarĩ na ariũ a Ithe witũ kaingĩ. Rĩrĩa tweka ũguo, tũkoragwo tũgĩathĩkĩra watho wa Jesu wa kwendana ithuĩ ene na tũkonia Jehova atĩ nĩ twendete aarĩ na ariũ a Ithe witũ. Kũhoera aarĩ na ariũ a Ithe witũ ti gũte mahinda. Kiugo kĩa Ngai gĩtwĩraga atĩ “ithaithana rĩa mũndũ mũthingu nĩ rĩrĩ ũhoti mũnene.” (Jak. 5:16) Aarĩ na ariũ a Ithe witũ nĩ mabataraga mahoya maitũ tondũ nĩ mahiũranagia na moritũ maingĩ. w22.07 23 ¶13-15