Julaĩ

Ũhoti wa kwaria nĩ kĩheo kuuma kũrĩ Ngai witũ ũrĩ wendo. O na kũrĩ ũguo, ũhoti ũcio wa kwaria nĩ wahũthĩrirũo na njĩra njũru. Shaitani ũrĩa Mũcukani nĩ aaheenirie Hawa, na maheeni macio magĩtũma andũ matuĩke ehia na makuage. (Kĩam. 3:​1-4) Adamu nĩ aahũthĩrire na njĩra njũru kĩheo gĩa kwaria rĩrĩa aamenereirie Hawa na akĩmenereria Jehova nĩ ũndũ wa mahĩtia make mwene. (Kĩam. 3:12) Kaini nĩ aaheenirie Jehova thutha wake kũũraga mũrũ wa nyina Habili. (Kĩam. 4:9) Mahinda-inĩ maya nĩ hinya kuona thenema ĩtarahũthĩra mĩario mĩũru. Arutwo nĩ maiguaga mĩario mĩũru marĩ cukuru, na andũ agima o nao nĩ mamĩiguaga marĩ kũrĩa marutaga wĩra. Nĩ ũndũ wa kũigua mĩario mĩũru kaingĩ, tũngĩaga kwĩmenyerera o na ithuĩ no twĩkore tũkĩaria mĩario mĩũru. Tondũ tũrĩ Akristiano, nĩ twendaga gũkenia Jehova, na ũndũ ũcio nĩ ũhutĩtie makĩria ma gwĩthema mĩario mĩũru. Twendaga kũhũthĩra kĩheo kĩa magegania gĩa kwaria na njĩra njega ya kũgooca Ngai witũ. w22.04 4-5 ¶1-3

Jesu aarĩ na mawoni maigananĩru megiĩ indo. Nĩ aakenagĩra kũrĩa na kũnyua. (Luk. 19:​2, 6, 7) Kĩama-inĩ gĩake kĩa mbere, nĩ aathondekire ndibei ĩrĩa njega biũ. (Joh. 2:​10, 11) Na mũthenya ũrĩa aakuire, eehumbĩte nguo ya goro mũno. (Joh. 19:​23, 24) No Jesu ndeetĩkĩririe indo ituĩke ũndũ ũrĩa wa bata mũno ũtũũro-inĩ wake. Jesu aarutanire atĩ tũngĩcaragia Ũthamaki mbere, Jehova nĩ arĩtigagĩrĩra atĩ tũrĩ na kĩrĩa tũrabatara. (Mat. 6:​31-33) Andũ aingĩ nĩ magunĩkĩte nĩ ũndũ wa kũhũthĩra ũtaaro wa Jehova wĩgiĩ mbeca. Ta wĩcirie ũhoro wa mũrũ wa Ithe witũ ũmwe ũtarĩ kĩhiko-inĩ wĩtagwo Daniel. Aaugire ũũ: “Ndĩ mwĩthĩ, nĩ ndatuire atĩ ũndũ ũrĩa wa bata mũno ũtũũro-inĩ wakwa ũrĩkoragwo ũrĩ gũtungatĩra Jehova.” Nĩ ũndũ wa gũikara ũtũũro mũhũthũ, Daniel nĩ ahotete kũhũthĩra mahinda make na ũhoti wake kũhingia maũndũ maingĩ ũtungata-inĩ wa Jehova. Oongereire ũũ: “Irathimo iria Jehova aheete itingĩringithanio na mbeca o na ingĩkorũo cigana atĩa.” w22.05 21 ¶6-7

No tuonanie atĩ nĩ twendete ũhoro ũrĩa wa ma na njĩra ya gũthomaga Bibilia kaingĩ na mabuku mehocetie harĩ Bibilia. Ma nĩ atĩ, o na tũngĩkorũo tũikarĩte ũhoro-inĩ wa ma ihinda rĩigana atĩa, tũtiagaga maũndũ ma kwĩruta. Kwĩruta nĩ kũbataraga kĩyo, no nĩ kũrĩ ũguni mũnene. Amwe aitũ tũtiendete gũthoma na kwĩruta. No Jehova atwĩraga ‘tũthiĩ na mbere gũcaria’ na ‘tũikare tũgĩethaga’ ũtaũku makĩria wa ũhoro ũrĩa wa ma. (Thim. 2:​4-6) Rĩrĩa twerutanĩria gwĩka ũguo nĩ tũgunĩkaga. Mũrũ wa Ithe witũ wĩtagwo Corey akĩaria ũhoro wĩgiĩ wĩruti wake wa Bibilia augaga atĩ aroraga mũhari ũmwe thutha wa ũrĩa ũngĩ. Aaugire ũũ: “Thomaga tũũhoro tuothe twa magũrũ-inĩ, ngathoma maandĩko mothe ma kũringithania, na ngeka ũthuthuria makĩria. . . . Nĩ ndĩrutaga maũndũ maingĩ mũno ndahũthĩra njĩra ĩyo.” Tũkorũo tũhũthagĩra njĩra ĩyo ya kwĩruta kana ĩngĩ, nĩ tuonanagia atĩ nĩ twendete ũhoro ũrĩa wa ma rĩrĩa twacaria mahinda ma kwĩruta na twekĩra kĩyo ũndũ-inĩ ũcio.—Thab. 1:1-3. w22.08 17 ¶13; 18 ¶15-16

Rĩrĩa Jesu aarĩ gũkũ thĩ, nĩ aahũthĩrire ũũmbi kũruta arutwo ake ũhoro wĩgiĩ Ithe. Ta wĩcirie ũndũ ũmwe aarutanire. Jehova onagia andũ othe wendo. Hĩndĩ ya Mahunjio make ma Kĩrĩma-inĩ, Jesu nĩ eerire arutwo ake ũhoro wa riũa na mbura, indo iria andũ aingĩ mateciragia mũno ũhoro wacio. Indo icio cierĩ nĩ cia bata harĩ ũtũũro, na Jehova nĩ angĩathuurire kwaga kũhe andũ arĩa matamũtungatagĩra indo icio. No handũ ha ũguo, aheaga andũ othe riũa na mbura. (Mat. 5:​43-45) Jesu aahũthĩrire indo icio kũruta arutwo ake atĩ Jehova endaga tuonie andũ othe wendo. Rĩrĩa rĩothe tuona riũa rĩgĩthũa kana karũthuthuũ kega ka mbura, no tũririkanage wendo wa Jehova kwerekera andũ othe. Kĩonereria gĩake nĩ kĩagĩrĩirũo gũtũtindĩka o na ithuĩ kuonanagia wendo ta ũcio, na njĩra ya kũhunjagĩria andũ othe. w23.03 17 ¶9-10

Nĩ ũndũ ũrĩkũ wagegirie mũtũmwo Johana? Oonire mũtumia aikarĩire nyamũ ya gĩthaka ya rangi mũtune. Ataarĩirio ta “mũmaraya ũrĩa mũnene” na etĩtwo “Babuloni Ũrĩa Mũnene.” Eingĩragia ‘ngomanio-inĩ itagĩrĩire’ na “athamaki a thĩ.” (Kũg. 17:​1-5) “Babuloni Ũrĩa Mũnene” arũgamĩrĩire kĩĩ? Mũtumia ũcio ndangĩkorũo arũgamĩrĩire ithondeka rĩa gĩũteti, tondũ erĩtwo atĩ eingĩragia ngomanio-inĩ itagĩrĩire na anene a gĩũteti a thĩ. (Kũg. 18:9) Gũkorũo aikarĩire nyamũ ĩyo, kuonanagia atĩ nĩ endaga gũtongoria athamaki acio. Makĩria ma ũguo, ndangĩkorũo arũgamĩrĩire mathondeka makoroku ma kĩbiacara ma thĩ ĩno ya Shaitani, tondũ harĩ handũ hangĩ magwetetwo thĩinĩ wa ibuku rĩa Kũguũrĩrio magetwo “ahũũri biacara a thĩ.” (Kũg. 18:​11, 15, 16) Thĩinĩ wa Babuloni ya tene, ũthathaiya wa maheeni nĩ watheremete na gĩkĩro kĩnene. Kwoguo Babuloni Ũrĩa Mũnene, no mũhaka akorũo arũgamagĩrĩra ũthathaiya wa maheeni wa mĩthemba yothe. Nĩ ndini ciothe cia maheeni thĩinĩ wa thĩ.—Kũg. 17:​5, 18. w22.05 11 ¶14-16

Rĩmwe mũtumia no eyũrie kana ciana ciake nĩ igaatungatĩra Jehova, tondũ aciari nĩ mamenyaga atĩ ciana ciao nĩ icemanagia na hatĩka nyingĩ thĩinĩ wa thĩ ĩno ya Shaitani. Makĩria ma ũguo, atumia aingĩ nĩ maritũhagĩrũo kũrera ciana ciao marĩ aiki, kana marĩ na mũthuri ũtaratungatĩra Jehova. To aciari arĩa makoragwo famĩlĩ-inĩ ĩgayũkanĩte kĩndini makoragwo na moritũ. O na rĩrĩa aciari eerĩ marĩ ũhoro-inĩ wa ma, no ũkorũo ũrĩ ũndũ mũritũ kũhutia ngoro cia andũ ethĩ nĩguo matuĩke ndungata njĩhokeku cia Jehova. O ũrĩa kũngĩkorũo kũrĩ, ndũkamake. Jehova nĩ egũgũteithia. No ũrie aciari arĩa marĩ na ũmenyeru makwĩre ũrĩa mahũthagĩra indo iria tũheetwo cia gwĩka ũthathaiya wa famĩlĩ. (Thim. 11:14) Ningĩ Jehova no agũteithie kwaranĩria na ciana ciaku. Mũhoe agũteithie kũmenya ciũria iria ũngĩhũthĩra nĩguo ũmenye kĩrĩa kĩrĩ ngoro-inĩ ya ciana ciaku.—Thim. 20:5. w22.04 17 ¶4, 7; 18 ¶9

No tũhote kwenda Jehova makĩria tũngĩmenya Mũrũ wake wega, tondũ egerekanagia na Ithe na njĩra nginyanĩru. (Ahib. 1:3) Njĩra ĩrĩa njega biũ ya kũmenya Jesu nĩ kwĩruta mabuku marĩa mana ma Injiri. Angĩkorũo ndũkoretwo ũgĩthoma Bibilia o mũthenya-rĩ, githĩ to wambĩrĩrie na mabuku macio? Ũgĩthoma mabuku macio megiĩ Jesu, wĩrutanĩrie biũ kũmenya ngumo ciake. Nĩ aakinyĩrĩkaga na ihenya, na nĩ aanyitaga twana tũnini moko-inĩ make arĩ na wendo. (Mar. 10:​13-16) Arutwo ake nĩ maaiguaga marĩ na wĩyathi wa kwĩitũrũra kuuma ngoro, rĩrĩa maakoragwo hamwe nake. (Mat. 16:22) Jesu eegerekanagia na Ithe witũ wa igũrũ ũndũ-inĩ ũcio. O na Jehova nĩ akinyĩrĩkaga na ihenya. No twarie nake na njĩra ya mahoya. Rĩrĩa tũrahoya, no tũmũitũrũrĩre kĩrĩa kĩrĩ ngoro-inĩ citũ. Na twĩ na ũũma atĩ ndangĩtũtuĩra ũrĩa gũtarĩ. Nĩ atwendete mũno, na nĩ atũrũmbũyagia.—1 Pet. 5:7. w22.08 3 ¶4-5

Tondũ Jehova nĩwe watũũmbire, nĩ oĩ maũndũ mothe matwĩgiĩ. Ta wĩcirie ũndũ ũyũ! Jehova nĩ oĩ kaũndũ o gothe kegiĩ mũndũ o wothe thĩinĩ wa thĩ. (Thab. 139:​15-17) Kwoguo nĩ onaga mawathe mothe marĩa twagaire kuuma kũrĩ aciari aitũ. Makĩria ma ũguo, nĩ oĩ maũndũ marĩa mothe tũgereire ũtũũro-inĩ, marĩa matũmaga tũkorũo tũhaana ũguo tũtariĩ. Gũkorũo na ũmenyo ũcio wĩgiĩ andũ gũtindĩkaga Jehova gwĩka atĩa? Nĩ kũmũtindĩkaga atuonie tha. (Thab. 78:39; 103:​13, 14) Jehova nĩ onanĩtie wega atĩ nĩ akoragwo ehaarĩirie gũtuohera. Nĩ ataũkagĩrũo atĩ nĩ ũndũ wa ciĩko cia mũndũ wa mbere Adamu, ithuothe nĩ twĩhagia na mũthia-inĩ tũgakua. (Rom. 5:12) Gũtirĩ ũndũ tũngĩka twĩhonokie kuuma kĩrumi-inĩ kĩu kĩa mehia na gĩkuũ, kana tũhonokie mũndũ ũngĩ o wothe. (Thab. 49:​7-9) O na kũrĩ ũguo, Ngai witũ ũrĩ wendo nĩ aatuonirie tha, na agĩthondeka maũndũ nĩguo atũhonokie. Kũringana na Johana 3:​16, Jehova aarutire Mũrũ wake wa mũmwe akue nĩ ũndũ witũ.—Mat. 20:28; Rom. 5:19. w22.06 3 ¶5-6

Jehova nĩ oonanirie wega atĩ arĩa mohanagĩra nĩ marĩohagĩrũo rĩrĩa aarũmbũyanagia na Ayubu. Mũthuri ũcio mwĩhokeku nĩ aatuurithĩtio mũno nĩ ciugo itarĩ cia tha iria eerirũo nĩ arata ake atatũ, Elifazu, Bilidadi, na Zofaru. Jehova eerire Ayubu amahoere. Thutha wa Ayubu gwĩka ũguo, Jehova nĩ aamũrathimire. (Ayub. 42:​8-10) Kũiga muku nĩ ũgwati harĩ ithuĩ. Marakara nĩ ta mũrigo mũritũ, na Jehova endaga twĩyaũre mũrigo ũcio nĩguo tũkorũo na thayũ. (Ef. 4:​31, 32) Atwĩraga ‘tweherie marakara na tũtigane na mathũgũta.’ (Thab. 37:8) Tũngĩrũmĩrĩra ũtaaro ũcio no tũgunĩke. Kũiga muku no gũkorũo kũrĩ ũgwati harĩ ũgima witũ wa mwĩrĩ na wa meciria. (Thim. 14:30) Kũiga muku gũtingĩhutia ũrĩa ũtũhĩtĩirie, o ta ũrĩa tũtangĩnyua thumu tũkĩĩrĩgĩrĩra atĩ nĩ ũkũmũthũkĩra. Na kwoguo rĩrĩa tuohera andũ arĩa angĩ, nĩ ithuĩ twĩgunaga. Nĩ tũgĩaga na thayũ wa meciria na wa ngoro, na tũkahota gũthiĩ na mbere gũtungatĩra Jehova. w22.06 10 ¶9-10

Kĩĩrĩgĩrĩro gitũ gĩtariĩ ta ngũbia ya mũhaano ĩrĩa ĩgitagĩra meciria maitũ na ĩgatũteithia kwaga gwĩciria o ũhoro witũ ithuĩ ene, ũndũ ũrĩa ũngĩthũkia ũrata witũ na Jehova. (1 Kor. 15:​33, 34) Ngũbia itũ ya kĩĩrĩgĩrĩro ningĩ no ĩtũteithie gwĩthema mwĩcirĩrie wa atĩ tũtingĩhota gũkenia Jehova. Mwĩcirĩrie ta ũcio no taguo Elifazu ũrĩa wathiĩte kũũmĩrĩria Ayubu aarĩ naguo. Elifazu aaugire ũũ: “Mũndũ-rĩ, nĩwe kĩ atĩ nĩguo akorũo arĩ mũtheru?” Agĩcoka akiuga ũũ igũrũ rĩgiĩ Ngai: “Atĩrĩrĩ, Ngai ndakoragwo ehokete arĩa ake atheru, na nginya igũrũ rĩtikoragwo rĩrĩ itheru maitho-inĩ make.” (Ayub. 15:​14, 15) Macio nĩ maheeni moru mũno! Ririkana atĩ Shaitani nĩwe wendaga twĩcirie na njĩra ta ĩyo. Nĩ oĩ atĩ ũngĩthiĩ na mbere gwĩciria na njĩra ĩyo, kĩĩrĩgĩrĩro gĩaku no gĩthire. Kwoguo, reganaga na maheeni ta macio. Koragwo na ma atĩ Jehova nĩ endaga ũgaatũũra tene na tene na atĩ nĩ arĩgũteithagia nĩguo ũkinyĩre muoroto ũcio.—1 Tim. 2:​3, 4. w22.10 25-26 ¶8-10

Shaitani eendaga Ayubu etĩkie atĩ aathĩnĩkaga tondũ nĩ aarakarĩtie Jehova. Kwa ngerekano, Shaitani aahũthĩrire rũhuho rũnene kũgũithia nyũmba ĩrĩa ciana ciothe ikũmi cia Ayubu ciarĩ ikĩrĩanĩra. (Ayub. 1:​18, 19) Ningĩ nĩ aatũmire mwaki kuuma igũrũ ũniine mahiũ mothe ma Ayubu o hamwe na ndungata iria ciarũmbũyagia mahiũ macio. (Ayub. 1:16) Tondũ rũhuho na mwaki ciaumanire na igũrũ, Ayubu eeciragia atĩ ciaumĩte kũrĩ Jehova Ngai. Na nĩ ũndũ ũcio Ayubu eeciragia atĩ nĩ aarakarĩtie Jehova. O na kũrĩ ũguo, Ayubu nĩ aaregire kũruma Ngai. Ayubu nĩ eeyoneire ũrĩa Ngai aamwĩkĩire maũndũ maingĩ mega ihinda-inĩ rĩa mĩaka mĩingĩ. Kwoguo eeciragia atĩ angĩkorũo nĩ aakeneire kwamũkĩra maũndũ macio mega nĩ aagĩrĩirũo kwamũkĩra o na macio moru. Nĩkĩo aaugire ũũ: “Rĩĩtwa rĩa Jehova rĩrothiĩ na mbere kũgoocwo.”—Ayub. 1:​20, 21. w22.06 21 ¶7

Jesu eerire arũmĩrĩri ake atĩ ũndũ ta ũcio nĩ ũngĩgekĩka, thĩinĩ wa Johana 17:14. Hatarĩ nganja nĩ twĩyoneire ũrathi ũcio ũkĩhinga, makĩria ihinda-inĩ rĩa mĩaka 100 mĩhĩtũku. Ũhingĩte na njĩra ĩrĩkũ? Kahinda kanini thutha wa Jesu gũtuo Mũthamaki wa Kĩĩmesia mwaka-inĩ wa 1914, Shaitani nĩ aaingatirũo kũrĩa igũrũ. Aaikirio gũkũ thĩ ũndũ atangĩhota gũcoka kũrĩa igũrũ, etereire kwanangwo. (Kũg. 12:​9, 12) No ndaikarĩte o ũguo hatarĩ ũndũ areka. Shaitani nĩ mũrakaru na kwoguo nĩ atharĩkagĩra andũ a Ngai. (Kũg. 12:​13, 17) Nĩkĩo thĩ ya Shaitani ĩmenete andũ a Ngai na gĩkĩro kĩnene ũguo ihinda-inĩ rĩrĩ. No tũtiagĩrĩirũo gwĩtigĩra Shaitani na arũmĩrĩri ake. Handũ ha ũguo, no tũkorũo na ũũma ta ũrĩa warĩ na mũtũmwo Paulo, ũrĩa waandĩkire ũũ: “Angĩkorũo Ngai arĩ hamwe na ithuĩ-rĩ, nũũ ũngĩtũũkĩrĩra?” (Rom. 8:31) No twĩhoke Jehova biũ. w22.07 18 ¶14-15

Jesu ndaarĩ na nganja atĩ nĩ kũngĩgakorũo na aruti wĩra a kũigana hĩndĩ ya ithirĩro rĩa mũtabarĩre wa maũndũ. Nĩ aamenyaga atĩ ciugo ici cia ũrathi irĩ thĩinĩ wa Thaburi nĩ ingĩkaahinga: “Andũ aku makeerutagĩra meyendeire mũthenya wa mbũtũ yaku.” (Thab. 110:3) Angĩkorũo nĩ ũnyitanagĩra wĩra-inĩ wa kũhunjia, nĩ ũranyita mbaru Jesu na ngombo ĩrĩa njĩhokeku na ũgateithia harĩ kũhinga kwa ũrathi ũcio. Wĩra ũcio no ũrathiĩ na mbere kũrutwo, ĩndĩ kũrĩ na moritũ. Ũndũ ũmwe mũritũ ahunjia a Ũthamaki macemanagia naguo nĩ ũkararia. Aregenyũki, atongoria a ndini, na ateti, nĩ meeraga andũ aingĩ maũndũ ma maheeni megiĩ wĩra witũ. Rĩrĩa andũ aitũ a famĩlĩ, andũ arĩa tũyaine nao, na arĩa tũrutithanagia wĩra nao metĩkia maheeni macio, no matũtindĩkĩrĩrie tũtige gũtungatĩra Jehova na tũtige kũhunjia. Mabũrũri-inĩ mamwe, thũ citũ nĩ ciĩhĩtagĩra aarĩ na ariũ a Ithe witũ, ikamatharĩkĩra, kana ikamanyita, o na kana ikamoha njera. w22.07 8 ¶1; 9 ¶5-6

Jehova endaga tũcaragie mahinda ma kwĩruta Bibilia o mũthenya, na tũgecũranagia na njĩra ndikĩru maũndũ marĩa tũrathoma. Rĩrĩa twahũthĩra maũndũ marĩa tũreruta, wĩtĩkio witũ nĩ ũgĩaga na hinya makĩria na tũgakuhĩrĩria Ithe witũ wa igũrũ makĩria. Na njĩra ĩyo, tũkagĩa na hinya wa gũkirĩrĩria magerio. Jehova ningĩ nĩ aheaga arĩa mehokaga Kiugo gĩake roho wake mũtheru. Na roho ũcio no ũtũhe “hinya ũrĩa ũkĩrĩte wa ndũire” nĩguo tũhote gũkirĩrĩria igerio o rĩothe. (2 Kor. 4:​7-10) Kũgerera ũteithio wa Jehova, “ngombo ĩrĩa njĩhokeku na njũgĩ” nĩ ĩtũheaga mabuku, video, na nyĩmbo, iria itũteithagia gũkorũo na wĩtĩkio mũrũmu na gũikara twarahũkĩte kĩĩroho. (Mat. 24:45) Jehova nĩ arutĩte andũ ake ũrĩa mangĩonania wendo na momanĩrĩrie hĩndĩ ya moritũ. (2 Kor. 1:​3, 4; 1 Thes. 4:9) Aarĩ na ariũ a Ithe witũ nĩ makoragwo mehaarĩirie gũtũteithia gũikara tũrĩ ehokeku rĩrĩa twacemania na moritũ. w22.08 12 ¶12-14

Kũgwetaga ngumo njega cia aarĩ na ariũ a Ithe witũ, no kũmateithie gwaka ũrata mũrũmu mũndũ na ũrĩa ũngĩ, ũndũ ũrĩa ũtũmaga kĩũngano gĩkorũo na wendo. Rĩmwe o na Akristiano agimaru kĩĩroho no mage kũiguithanĩria maũndũ-inĩ mamwe o na kana makararanie. Ũguo nĩguo gwathiire harĩ mũtũmwo Paulo na Baranaba mũrata wake wa hakuhĩ. Arũme aya erĩ nĩ maagĩire na ngarari nene igũrũ rĩgiĩ kana nĩ mangĩathiire na Mariko rũgendo-inĩ rwao rwa ũmishonarĩ. Nĩ “[maakararanirie] marakarĩte mũno,” nginya magĩtigana. (Atũm. 15:​37-39) No Paulo, Baranaba, na Mariko nĩ maacokirie thayũ gatagatĩ-inĩ kao. Thutha ũcio Paulo nĩ aagathĩrĩirie Baranaba na Mariko. (1 Kor. 9:6; Kol. 4:10) O na ithuĩ tũngĩkorũo tũtekũiguana na arĩa angĩ thĩinĩ wa kĩũngano, nĩ tũrabatara kwĩrutanĩria kũiguana nao na tũthiĩ na mbere kũiga meciria maitũ harĩ ngumo ciao njega. Tweka ũguo nĩ tũrĩthingataga thayũ na ũrũmwe. w22.08 23 ¶10-11

Tũkĩĩrutanĩria gũtũũra kũringana na ithimi cia Jehova cia ũthingu, nĩ twagĩrĩirũo gwĩthema gũtuagĩra arĩa angĩ na kwĩyonaga tũrĩ athingu. Twagĩrĩirũo kũririkanaga atĩ Jehova nĩwe “Mũtuanĩri Ciira wa thĩ yothe.” (Kĩam. 18:25) Jehova ndatũheete wĩra wa gũtuĩra arĩa angĩ. Ta wĩcirie ũhoro wa kĩonereria kĩa Jusufu. Nĩ eethemaga gũtuĩra andũ arĩa angĩ, nginya arĩa maamwĩkĩte maũndũ moru. Ariũ a ithe nĩ maamũtharĩkĩire, makĩmwendia ũkombo-inĩ, na makĩiguithia baba wao atĩ Jusufu nĩ aakuĩte. Mĩaka mĩingĩ thutha ũcio, Jusufu nĩ aacokanirũo rĩngĩ na famĩlĩ yao. Hĩndĩ ĩyo Jusufu nĩ aatuĩkĩte mũtongoria ũrĩ na hinya, na nĩ angĩatuĩrĩire ariũ a ithe atarĩ na tha na erĩhĩrie. Ariũ a ithe na Jusufu nĩ moonaga ta angĩka ũguo, o na gũtuĩka hĩndĩ ĩyo nĩ meerirĩte kuuma ngoro nĩ maũndũ marĩa meekĩte. No Jusufu aamatĩtĩrithĩirie ũũ: “Tigai gwĩtigĩra. Kaĩ njoete ithenya rĩa Ngai?” (Kĩam. 37:​18-20, 27, 28, 31-35; 50:​15-21) Nĩ ũndũ wa wĩnyihia, Jusufu nĩ aatigĩire Jehova wĩra wa gũtuanĩra. w22.08 30 ¶18-19

Hihi nĩ ũĩ atĩ Jehova no akũhũthĩre gũcokia mahoya ma ndungata yake? No akũhũthĩre gũtekũmakania kana ũrĩ mũthuri wa kĩũngano, ndungata ya kĩũngano, painia, kana mũhunjia thĩinĩ wa kĩũngano. Na no akũhũthĩre gũtekũmakania kana ũrĩ mũndũ mwĩthĩ kana ũrĩ mũkũrũ, na gũtekũmakania kana ũrĩ mũrũ wa Ithe witũ kana mwarĩ wa Ithe witũ. Rĩrĩa mũndũ wendete Jehova amũhoya ũteithio, kaingĩ Ngai witũ ahũthagĩra athuri a kĩũngano na ndungata ingĩ ciake njĩhokeku ‘kũũmĩrĩria’ mũndũ ũcio. (Kol. 4:11) Na githĩ ti gĩtĩo kĩnene gũtungatĩra Jehova na aarĩ na ariũ a Ithe witũ na njĩra ĩyo? No tũhote gũteithia na kũũmĩrĩria aarĩ na ariũ a Ithe witũ rĩrĩa kwoimĩra mũrimũ, gĩcanjama, o na kana rĩrĩa maranyarirũo. No twende gũteithia arĩa angĩ, ĩndĩ no ũkorũo ũrĩ ũndũ mũritũ angĩkorũo andũ aitũ a famĩlĩ marĩ na mathĩna. O na kũrĩ ũguo, no twendete gũteithia aarĩ na ariũ a Ithe witũ, na Jehova nĩ akenaga rĩrĩa tweka ũrĩa wothe tũngĩhota kũmateithia.—Thim. 19:17. w22.12 22 ¶1-2

Wendo nĩyo ngumo ĩrĩa ya bata mũno ĩngĩtũma twĩhokwo. Jesu aaugire atĩ maathani merĩ marĩa manene nĩ kwenda Jehova na kwenda mũndũ ũrĩa tũriganĩtie nake. (Mat. 22:​37-39) Wendo witũ harĩ Jehova nĩ ũtũtindĩkaga kwĩgerekania na kĩonereria gĩake gĩkinyanĩru gĩa kwĩhokeka. Kwa ngerekano, wendo witũ harĩ aarĩ na ariũ a Ithe witũ nĩ ũtũtindĩkaga kũiga maũndũ mao ma thĩinĩ marĩ hitho. Tũtingĩenda kũheana ũhoro ũngĩmatuurithia, ũngĩmaconorithia, kana ũngĩmaingĩria ũgwati-inĩ. Wĩnyihia o naguo no ũtũteithie gũtuĩka andũ mangĩĩhokeka. Mũkristiano mwĩnyihia ndageragia kwĩgaathĩrĩria kũrĩ arĩa angĩ na njĩra ya gũkorũo arĩ wa mbere kũheana ũhoro mũna. (Afil. 2:3) Ndageragia kwĩyonania atĩ nĩ wa bata na njĩra ya kuuga atĩ arĩ na ũhoro mũna wa hitho atagĩrĩirũo kwaria ũhoro waguo. Wĩnyihia ningĩ no ũtũteithie kwaga gũtheremia mawoni maitũ ene megiĩ maũndũ matarĩrĩirio thĩinĩ wa Bibilia kana mabuku-inĩ maitũ. w22.09 12 ¶12-13

Mũraika eerire Danieli atĩ ũrathi ũrĩa ũrĩ thĩinĩ wa ibuku rĩa Danieli, nĩ ũngĩgaataũkĩka wega makĩria harĩ andũ a Ngai, no “gũtirĩ mũndũ mwaganu [ũngĩgaataũkĩrũo].” (Dan. 12:10) Rĩrĩ nĩrĩo ihinda rĩrĩa twagĩrĩirũo kuonania atĩ tũtirĩ amwe a arĩa aganu. (Mal. 3:​16-18) Jehova nĩ aracokanĩrĩria arĩa onaga marĩ “kĩndũ kĩa mwanya” kana kĩndũ kĩa bata harĩ we. Hatarĩ nganja tũngĩenda gũkorũo tũrĩ amwe ao. Hatarĩ nganja tũratũũra mahinda-inĩ ma bata mũno. No nĩ harĩ maũndũ ma magegania o na makĩria megwĩkĩka ica ikuhĩ. Ihinda rĩtarĩ kũraihu nĩ tũkwĩyonera maũndũ mothe moru makĩniinwo. Thutha ũcio, twĩyonere kũhinga gwa kĩĩranĩro gĩkĩ Jehova eerĩire Danieli: “Nĩ ũkaarũgama nĩguo wamũkĩre igai rĩaku mũthia-inĩ wa matukũ macio.” (Dan. 12:13) Hihi nĩ wĩriragĩria mũthenya ũrĩa Danieli o hamwe na endwa aku ‘makaarũgama’ rĩngĩ? Angĩkorũo nĩ wĩriragĩria, wĩrutanĩrie o ũrĩa wothe ũngĩhota gũikara ũrĩ mwĩhokeku ihinda-inĩ rĩrĩ, na no ũkorũo na ma atĩ rĩĩtwa rĩaku nĩ rĩgũikara rĩandĩkĩtwo ibuku-inĩ rĩa muoyo rĩa Jehova. w22.09 24 ¶17; 25 ¶19-20

No mũhaka ciugo icio ikorũo nĩ ciekĩrire Ezekieli hinya. No kũhoteke nĩ aaririkanire ũrĩa Jehova aahũthĩrĩte ciugo o ta icio rĩrĩa aatũmaga Musa na Isaia matuĩke anabii ake. (Tham. 3:10; Isa. 6:8) Ningĩ Ezekieli nĩ aamenyaga ũrĩa Jehova aateithĩtie anabii acio erĩ kũhiũrania na moritũ. Kwoguo rĩrĩa Jehova eerire Ezekieli maita merĩ atĩ nĩ ‘ekũmũtũma,’ Ezekieli aarĩ na gĩtũmi kĩega gĩa gwĩtĩkia atĩ Jehova nĩ angĩamũteithirie. Makĩria ma ũguo, thĩinĩ wa ibuku rĩa Ezekieli, ciugo “kiugo kĩa Jehova gĩkĩnginyĩra,” nĩ cionekaga maita maingĩ. (Ezek. 3:16) Ningĩ ciugo “kiugo kĩa Jehova nĩ kĩanginyĩire o rĩngĩ,” nĩ icokeretwo maita maingĩ. (Ezek. 6:1) No mũhaka Ezekieli akorũo aarĩ na ma biũ atĩ Jehova nĩwe wamũtũmĩte. Ũndũ ũngĩ nĩ atĩ, tondũ ithe wa Ezekieli aarĩ mũthĩnjĩri-Ngai, no kũhoteke nĩ aarutĩte Ezekieli ũrĩa Jehova eerĩte anabii a tene atĩ nĩ ekũmateithia. Jehova eerĩte Isaaka, Jakubu, na Jeremia ũũ: “Ndĩ hamwe nawe.”—Kĩam. 26:24; 28:15; Jer. 1:8 w22.11 2 ¶3

O na gũtuĩka Adamu na Hawa nĩ meehirie na makĩrehera ciana ciao gĩkuũ, Jehova ndaacenjirie meciria igũrũ rĩgiĩ muoroto wake. (Isa. 55:11) Muoroto wake wa atĩ andũ ehokeku magaatũũra tene na tene ũrĩ o ho. Ta wĩcirie maũndũ marĩa Jehova augĩte na ageka nĩguo ahingie muoroto wake. Jehova nĩ eranĩire atĩ nĩ akaariũkia andũ arĩa makuĩte na amahe mweke wa gũtũũra tene na tene. (Atũm. 24:15; Tit. 1:​1, 2) Ayubu, mũthuri warĩ mwĩhokeku, aarĩ na ma atĩ Jehova nĩ eriragĩria mũno kũriũkia arĩa makuĩte. (Ayub. 14:​14, 15) Nake mũnabii Danieli nĩ ooĩ atĩ andũ nĩ mangĩkaariũkio na maheo mweke wa gũtũũra tene na tene. (Thab. 37:29; Dan. 12:​2, 13) Ayahudi matukũ-inĩ ma Jesu o nao nĩ mooĩ atĩ Jehova nĩ angĩkaahe ndungata ciake njĩhokeku “muoyo wa tene na tene.” (Luk. 10:25; 18:18) Jesu nĩ aaririe ũhoro wa kĩĩranĩro kĩu maita maingĩ na we mwene nĩ aariũkirio nĩ Ithe.—Mat. 19:29; 22:​31, 32; Luk. 18:30; Joh. 11:25. w22.12 4-5 ¶8-9

Jehova atwĩkagĩra ngoro tũmũkuhĩrĩrie. (Jak. 4:8) Endaga gũkorũo arĩ Ngai witũ, Ithe witũ, na Mũrata witũ. Nĩ acokagia mahoya maitũ na agatũteithia rĩrĩa tũragerera moritũ. Ningĩ nĩ ahũthagĩra ithondeka rĩake gũtũruta na gũtũgitĩra. No tũkuhĩrĩrie Jehova na njĩra ya kũmũhoya na gũthoma Kiugo gĩake na gwĩcũrania igũrũ rĩakĩo. Tweka ũguo, wendo na ngatho citũ kũrĩ we nĩ irĩongererekaga. Nĩ tũrĩiguaga tũkĩenda kũmwathĩkĩra na kũmũhe rũgooco rũrĩa agĩrĩire kũheo. (Kũg. 4:11) O ũrĩa tũgũthiĩ na mbere kũmenya Jehova, noguo tũkũmwĩhoka makĩria, o hamwe na ithondeka rĩake rĩrĩa ahũthagĩra gũtũteithia. O na kũrĩ ũguo, Mũcukani nĩ ageragia gũtũma tũthiĩ o kahora tũtigĩte kwĩhoka Jehova na ithondeka rĩake. Ĩndĩ no tũhote kũregana na mawara make. Wĩtĩkio witũ ũngĩkorũo ũrĩ na hinya, na mwĩhoko witũ harĩ Jehova ũkorũo ũrĩ mũrũmu, tũtingĩtiganĩria Ngai witũ na ithondeka rĩake.—Thab. 31:​13, 14. w22.11 14 ¶1-3

Akristiano aingĩ a ma nĩ metĩkĩrĩte kũũrũo nĩ wĩyathi wao o hamwe na mĩoyo yao nĩ ũndũ wa kwenda Jehova, Mwathani Wao Ũrĩa Mũnene. Akristiano acio nĩ mehotorete gũtũũra marĩ ehokeku harĩ Jehova. Matariĩ o ta Ahibirania arĩa atatũ arĩa maatũũririe wĩhokeku wao harĩ Ũrĩa Mũnene Makĩria, Ũrĩa wacokire kũmahonokia kuuma riiko-inĩ rĩarĩ na mwaki mũnene. Daudi mwandĩki wa Thaburi aandĩkire ũũ akĩonania bata wa gũtũũria wĩkindĩru harĩ Ngai: “Jehova nĩ agaatuĩra ikundi cia andũ. Atĩrĩrĩ Jehova, nduĩra ciira kũringana na ũthingu wakwa na kũringana na wĩkindĩru wakwa.” (Thab. 7:8) Ningĩ aacokire akĩandĩka ũũ: “Wĩkindĩru na ũrũngĩrĩru irongitagĩra.” (Thab. 25:21) Njĩra ĩrĩa njega biũ ya ũtũũro nĩ gũtũũria wĩhokeku witũ harĩ Jehova, tũtegũtiganĩria wĩkindĩru witũ. Tweka ũguo, tũrĩiguaga o ta mwandĩki wa Thaburi ũrĩa waugire ũũ: “Gũkena nĩ andũ arĩa matũũragia wĩkindĩru . . . , arĩa mathiaga kũringana na watho wa Jehova.”—Thab. 119:​1, kohoro ka magũrũ-inĩ. w22.10 17 ¶18-19

Ayubu nĩ aaragia na andũ aingĩ ũtũũro-inĩ wake, no ndeereti ĩrĩa yamũhutirie mũno nĩ ndeereti ĩrĩa aagĩire nayo hamwe na Jehova Ngai. Ndeereti-inĩ ĩyo, Jehova eerire Ayubu erorere indo imwe cia magegania iria Jehova oombĩte. Gwĩka ũguo nĩ kũngĩateithirie Ayubu kuona ũrĩa Jehova arĩ mũũgĩ, na kũmũteithie gũkorũo na ma atĩ Jehova no ahote kũhingĩria ndungata ciake mabataro ma cio mothe. Kwa ngerekano, Ngai nĩ aaririkanirie Ayubu atĩ nĩ arũmbũyagia mabataro ma nyamũ na kwoguo nĩ angĩahotire kũrũmbũiya Ayubu o nake. (Ayub. 38:​39-41; 39:​1, 5, 13-16) Thutha wa gwĩciria ũhoro wĩgiĩ ũũmbi, Ayubu nĩ eerutire maũndũ maingĩ megiĩ ngumo cia Ngai. O na ithuĩ no twĩrute maũndũ maingĩ megiĩ Ngai tũngĩthuthuria indo iria ombĩte. No rĩmwe na rĩmwe ti ũndũ mũhũthũ gwĩka ũguo. Angĩkorũo tũikaraga taũni-inĩ, no twage mĩeke mĩingĩ ya kuona indo iria Jehova ombĩte. Na o na angĩkorũo tũikaraga icagi-inĩ, no tuone ta tũtarĩ na mahinda maingĩ ma gũthuthuria indo iria Jehova ombĩte, no nĩ ũndũ wa bata kwĩrutanĩria kũhũthĩra mahinda gũthuthuria ũũmbi. w23.03 15 ¶1-2

Jesu aaugire atĩ “ithingithia nene” o hamwe na icanjama ingĩ nĩ ingĩgaakorũo kuo mũico ũtanakinya. (Luk. 21:11) Ningĩ aaugire atĩ ‘uuni-watho nĩ ũngĩkaingĩha,’ na ũndũ ũcio nĩ ũrekĩka mahinda maya. Kwa ngerekano nĩ tũrona wĩki-naĩ, maũndũ ma ũhinya, na tharĩkĩro cia itoi. (Mat. 24:12) Ndungata nyingĩ njĩhokeku cia Jehova nĩ ihutĩtio nĩ icanjama na moritũ ta macio. Jesu ndaaugire atĩ moritũ ta macio matũkoraga atĩ tondũ Jehova nĩ atũtiganĩirie. (Isa. 57:1; 2 Kor. 11:25) Tũtingĩrĩgĩrĩra Jehova atũgitĩre na njĩra ya kĩama kuumana na icanjama ciothe, no no atũhe kĩrĩa gĩothe tũngĩbatara nĩguo tũikare tũhooreire na tũrĩ na thayũ. No ũkorũo ũrĩ ũndũ mũhũthũ gwĩka ũguo, angĩkorũo nĩ tũrehaarĩirie ũrĩa tũngĩka ũndũ mũna ũtanaumĩra. Hihi kwĩhaarĩria nĩ kuuga atĩ tũtirĩ na wĩtĩkio harĩ Jehova? Aca. Ma nĩ atĩ, kwĩhaarĩria nĩ ũndũ wa gĩcanjama kuonanagia atĩ tũrĩ na wĩtĩkio harĩ ũhoti wa Jehova wa gũtũrũmbũiya. Na njĩra ĩrĩkũ? Kiugo kĩa Ngai gĩtwĩraga twĩhaarĩrie nĩ ũndũ wa icanjama iria ingiumĩra. w22.12 18 ¶9-10

Rĩrĩa Jusufu aarĩ njera, Jehova nĩ aatũmire mũthamaki wa Misiri arote iroto igĩrĩ iria ciamũthumbũrire mũno. Rĩrĩa mũthamaki ũcio aamenyire atĩ Jusufu aarĩ na ũhoti wa gũtaũra iroto, akiuga etwo. Agĩteithio nĩ Jehova, Jusufu nĩ aataũrire iroto icio na Firauni agĩkenio nĩ ũtaaro ũrĩa Jusufu aamũheire. Firauni nĩ oonire atĩ Jehova aarĩ hamwe na Jusufu na kwoguo akĩmũtua mũrũgamĩrĩri wa irio bũrũri-inĩ wothe wa Misiri. (Kĩam. 41:​38, 41-44) Thutha ũcio, nĩ kwagĩire ngʼaragu nene ĩrĩa yahutirie bũrũri wa Misiri, na bũrũri wa Kanaani ũrĩa famĩlĩ ya Jusufu yaikaraga. Jusufu rĩu aarĩ na mweke wa kũhonokia famĩlĩ yao na nĩ ũndũ ũcio agitĩre rũciaro rũrĩa Mesia angĩaumanire naruo. Hatarĩ nganja, Jehova nĩwe watũmaga maũndũ marĩa mothe Jusufu eekaga magaacĩre. O na gũtuĩka ariũ a ithe na Jusufu meendaga kũmũũraga, Jehova nĩ aagarũranirie njama ĩyo yao njũru nĩguo ahingie wendi wake. w23.01 16-17 ¶11-12

Mũndũ wĩmenyagĩrĩra nĩ amenyaga mogwati marĩa mangĩthũkia ũrata wake na Jehova na akoya makinya ma kũmethema. Na njĩra ĩyo, akeiga wendo-inĩ wa Ngai. (Thim. 22:3; Jud. 20, 21) Mũtũmwo Paulo nĩ eekĩrire Akristiano ngoro memenyagĩrĩre. Kwa ngerekano, eerire Akristiano a Efeso ũũ: “Mwĩroragei biũ atĩ ũrĩa mũthiaga ti ta andũ matarĩ ogĩ no nĩ ta andũ ogĩ.” (Ef. 5:​15, 16) Tondũ hĩndĩ ciothe Shaitani nĩ ageragia gũthũkia ũrata witũ hamwe na Jehova, Bibilia ĩtũtaaraga “[tũthiĩ] na mbere gũtaũkĩrũo wendi wa Jehova nĩ ũrĩkũ,” nĩguo tũhotage gwĩtiiria mĩtego o yothe ya Shaitani. (Ef. 5:17) Nĩguo tũtuage matua mega, nĩ twagĩrĩirũo gũtaũkĩrũo, kana kũmenya “wendi wa Jehova.” No tũhote gwĩka ũguo tũngĩthomaga Kiugo kĩa Ngai kaingĩ na tũgecũrania igũrũ rĩakĩo. O ũrĩa tũgũtaũkĩrũo nĩ wendi wa Jehova na tũkũrie “meciria ma Kristo,” noguo tũrĩhotaga gũthiaga “ta andũ ogĩ,” o na rĩrĩa gũtarĩ na watho wa ĩmwe kwa ĩmwe wa gũtũtongoria ũndũ-inĩ mũna.—1 Kor. 2:​14-16. w23.02 16-17 ¶7-9

Ũtheragia gwaku maita maigana? No kũhoteke ũtanathamĩra kuo nĩ wagũtheririe biũ. No kũngĩthiĩ atĩa angĩkorũo ndũrĩ wagũtheria rĩngĩ? No gũcoke gĩko na rũkũngũ rĩngĩ o na ihenya. Nĩguo gwaku gũikare kũrĩ gũtheru nĩ ũbataraga gũgũtheragia kaingĩ. Kĩyo o ta kĩu nĩ kĩbataranagia nĩguo tũtherie meciria maitũ o na ũmũndũ witũ. Hatarĩ nganja, tũtanabatithio nĩ twekĩrire kĩyo gwĩka mogarũrũku marĩa maabataranagia ũtũũro-inĩ witũ nĩguo “[twĩtherie] ũndũ o wothe ũrĩa ũngĩthahia mwĩrĩ na roho.” (2 Kor. 7:1) No rĩu no mũhaka twathĩkĩre ũtaaro wa mũtũmwo Paulo wa “gũthiĩ na mbere kwerũhio.” (Ef. 4:23) Gĩko gĩa thĩ ĩno no kĩingĩre thĩinĩ witũ o na ihenya. Nĩguo twĩtheme ũndũ ũcio na tũthiĩ na mbere gũkenia Jehova, no mũhaka tũikare tũgĩthuthuragia meciria maitũ, ũmũndũ witũ, o na merirĩria maitũ. w23.01 8 ¶1-2

Ta hũũra mbica ũrĩa mũndũ angĩkorũo aaiguaga agĩthikĩrĩria Jesu akĩrutana. Nĩ maita maingĩ mũno aagwetaga ciugo cia Maandĩko Marĩa Matheru ategũthoma handũ. Hĩndĩ ĩrĩa Jesu aabatithirio na agĩitĩrĩrio maguta kũgerera roho mũtheru, no kũhoteke nĩ aaririkanire ũtũũro ũrĩa aarĩ naguo kũrĩa igũrũ. Ciugo ciake cia mbere iria aaugire thutha wake kũbatithio, na ciugo imwe aaririe atanakua, ciaumĩte Maandĩko-inĩ. (Gũcok. 8:3; Thab. 31:5; Luk. 4:4; 23:46) Na kuuma hĩndĩ ĩrĩa aabatithirio nginya rĩrĩa aakuire, ihinda rĩa mĩaka ĩtatũ na nuthu, kaingĩ Jesu arĩ mbere ya andũ nĩ aagwetaga ciugo kuuma Maandĩko-inĩ, na agathoma Maandĩko agacoka agataarĩria. (Mat. 5:17, 18, 21, 22, 27, 28; Luk. 4:16-20) Mĩaka mĩingĩ mbere ya Jesu ambĩrĩirie ũtungata wake, nĩ aathomaga Kiugo kĩa Ngai, na akaigua gĩgĩthomwo maita maingĩ. Na hatarĩ nganja marĩ mũciĩ, nĩ aaiguaga Mariamu na Jusufu makĩgweta maũndũ kuuma Maandĩko-inĩ. (Gũcok. 6:6, 7) Ningĩ Jesu nĩ aathiaga thunagogi-inĩ hĩndĩ ciothe mũthenya wa Thabatũ hamwe na famĩlĩ yao. (Luk. 4:16) Arĩ kũu, no mũhaka akorũo nĩ aathikagĩrĩria na kinyi Maandĩko magĩthomwo. w23.02 8 ¶1-2

Kũrĩ na itũmi nyingĩ cia kwenda Jehova. Kwa ngerekano, nĩ ũmenyete atĩ nĩwe “kĩhumo kĩa muoyo” na atĩ nĩwe Mũheani wa “kĩheo o gĩothe kĩega na gĩkinyanĩru.” (Thab. 36:9; Jak. 1:17) Kĩndũ o gĩothe kĩega ũkenagĩra, kiumaga kũrĩ Ngai witũ mũtaana na ũrĩ wendo. Ũkũũri nĩ kĩheo kĩa magegania Jehova atũheete. Tũngiuga ũguo nĩkĩ? Ta wĩcirie ũhoro wa ũrata wa hakuhĩ ũrĩa Jehova na Mũrũwe makoragwo naguo. Jesu aaugire ũũ: “Awa [nĩ] anyendete,” na “nĩ nyendete Awa.” (Joh. 10:17; 14:31) Ũrata wao wathiire ũkũrĩte ihinda-inĩ rĩa mĩaka bilioni nyingĩ ĩrĩa maarĩ hamwe. (Thim. 8:22, 23, 30) Rĩu ta wĩcirie ruo rũrĩa Ngai aaiguire rĩrĩa eetĩkĩririe Mũrũ wake anyarirũo na akue. Jehova nĩ eehaarĩirie kũruta Mũrũwe arĩ igongona nĩguo wee hamwe na andũ arĩa angĩ mũgaatũũra tene na tene, tondũ nĩ endete andũ othe nginya wee. (Joh. 3:16; Gal. 2:20) Kĩu nĩkĩo gĩtũmi kĩrĩa kĩnene mũno gĩa kwenda Ngai. w23.03 4-5 ¶11-13

No mũhaka tũregane na morutani ma aregenyũki. Jesu nĩ aaheire andũ amwe mũkaana thĩinĩ wa kĩũngano kĩa Perigamo tondũ nĩ maatũmaga kũgĩe na nyamũkano. (Kũg. 2:14-16) Nĩ aagathĩrĩirie arĩa maarĩ kĩũngano-inĩ gĩa Thiatira nĩ ũndũ wa kũregana na “maũndũ marikĩru ma Shaitani,” na akĩmeera ‘marũmie’ ũhoro wa ma. (Kũg. 2:24-26) Akristiano arĩa mataarĩ na hinya kĩĩroho, arĩa meetĩkĩrĩte kũheenererio nĩ morutani ma maheeni, nĩ maabataraga kwĩrira. Ĩ na ithuĩ ũmũthĩ? Nĩ twagĩrĩirũo kũregana na ũrutani o wothe ũtaratwarana na mwĩcirĩrie wa Jehova. Aregenyũki no moneke “ta marĩ na wĩyamũrĩri Ngai no nĩ mareganaga na hinya waguo.” (2 Tim. 3:5) Nĩ ũndũ mũhũthũ gũkũũrana na kũregana na morutani ma maheeni angĩkorũo nĩ twĩrutaga Kiugo kĩa Ngai na kĩyo. (2 Tim. 3:14-17; Jud. 3, 4) Nĩ tũrabatara gũtigĩrĩra atĩ ũthathaiya witũ nĩ ũretĩkĩrĩka nĩ Jehova. Angĩkorũo harĩ ũndũ twĩkaga ũngĩtũma ũthathaiya witũ ndũgetĩkĩrĩke harĩ Jehova, nĩ twagĩrĩirũo kuoya ikinya rĩa na ihenya kũũrũnga.—Kũg. 2:5, 16; 3:3, 16. w22.05 4 ¶9; 5 ¶11