Agosti

Ũgwĩciria nĩ kĩĩ kĩngĩtũma Jehova andĩke thĩinĩ wa “ibuku [rĩake] rĩa kĩririkano,” marĩĩtwa ma andũ arĩa monanagia kũgerera mĩario yao atĩ nĩ mamwĩtigĩrĩte na nĩ mecũranagia igũrũ rĩgiĩ rĩĩtwa rĩake? Tondũ mĩario itũ nĩ ĩguũragia maũndũ marĩa marĩ ngoro-inĩ citũ. Jesu aaugire ũũ: “Kanua karagia kĩrĩa kĩiyũire ngoro.” (Mat. 12:34) Jehova endaga andũ arĩa mamwendete magaatũũra tene na tene thĩinĩ wa thĩ njerũ. Njĩra ĩrĩa twaragia nayo no ĩtũme Jehova etĩkĩre ũthathaiya witũ kana aũrege. (Jak. 1:26) Andũ amwe arĩa matendete Ngai maragia na njĩra ĩtarĩ ya ũtugi, marakarĩte, na marĩ na mwĩtĩo. (2 Tim. 3:​1-5) Tũtingĩenda kũhaana tao. Nĩ twendaga mũno gũkenia Jehova kũgerera mĩario itũ. No hihi Jehova no akenio nĩ ithuĩ angĩkorũo tũkũhũthĩra mĩario mĩega na ya ũtugi rĩrĩa tũrĩ mĩcemanio-inĩ ya kĩũngano na ũtungata-inĩ, no rĩrĩa tũrĩ na andũ aitũ a famĩlĩ tũkamarĩria na njĩra ĩtarĩ ya wendo?—1 Pet. 3:7. w22.04 5 ¶4-5

Ngai nĩ ageekĩra rĩciria rĩa kũniina Babuloni Ũrĩa Mũnene ngoro-inĩ cia hĩa iria ikũmi na nyamũ ĩrĩa ya gĩthaka. Kwoguo Jehova nĩ agaatũma ndũrĩrĩ ihũthĩre nyamũ ĩrĩa ndune ya gĩthaka, nĩyo Ũrũmwe wa Mabũrũri, gũtharĩkĩra ndini ciothe cia maheeni na ĩcianange biũ. (Kũg. 18:21) Ũndũ ũcio ũtũhutagia atĩa? Nĩ tũrabatara gũtigĩrĩra atĩ ‘ũthathaiya witũ nĩ mũtheru na ndũrĩ thahu kũringana na mawoni ma Ngai.’ (Jak. 1:27) Tũtingĩenda kũnyitanĩra na morutani ma maheeni, ikũngũĩro iria itakenagia Ngai, kana kwĩingĩrania na mĩthiĩre ĩtarĩ mĩtheru kana maũndũ ma ndaimono ma Babuloni Ũrĩa Mũnene. Ningĩ nĩ twagĩrĩirũo gũthiĩ na mbere kwĩra andũ ‘moime thĩinĩ wake,’ nĩguo matikanyitanĩre na mehia make.—Kũg. 18:4. w22.05 11 ¶17; 14 ¶18

Aciari, caragiai mĩeke ya kũruta ciana cianyu ũhoro wĩgiĩ Jehova na maũndũ maingĩ mega marĩa amwĩkĩire. (Gũcok. 6:​6, 7) Ũndũ ũcio nĩ wa bata, makĩria angĩkorũo ndũhotaga kwĩruta na ciana ciaku kaingĩ mũrĩ mũciĩ nĩ ũndũ wa gũkorũo thĩinĩ wa famĩlĩ ĩgayũkanĩte kĩĩndini. Mwarĩ wa Ithe witũ wĩtagwo Christine aaugire ũũ: “Tũtioonaga mĩeke mĩingĩ ya kwarĩrĩria maũndũ ma kĩĩroho, kwoguo ndahũthagĩra mweke o ũrĩa wothe ndona.” Makĩria ma ũguo, aragia maũndũ mega megiĩ ithondeka rĩa Jehova na megiĩ aarĩ na ariũ a Ithe witũ. Ndũkaragie maũndũ moru megiĩ athuri a kĩũngano. Maũndũ marĩa ũrĩaragia mamegiĩ no matũme ciana ciaku ciagĩa thĩna imahoe ũteithio kana ciage. Wĩrutanagĩrie kũiga mũciĩ waku ũrĩ na thayũ. Onagia mũthuri waku na ciana ciaku kaingĩ atĩ nĩ ũmendete. Aragia ũhoro wĩgiĩ mũthuri waku na njĩra ĩronania atĩ nĩ ũmwendete na nĩ ũmũheete gĩtĩo, na ũrute ciana ciaku o nacio gwĩka ũguo. Na njĩra ĩyo, nĩ ũrĩtũmaga mũciĩ waku ũkorũo na thayũ, na ũgakorũo ũrĩ ũndũ mũhũthũ kũruta ciana ciaku ũhoro wĩgiĩ Jehova.—Jak. 3:18. w22.04 18 ¶10-11

Ndũmĩrĩri ya Jesu kũrĩ andũ arĩa maarĩ kĩũngano-inĩ kĩa Efeso, yonanagia atĩ nĩ maarĩ na ũkirĩrĩria na atĩ nĩ maathiaga na mbere gũtungatĩra Jehova o na magĩcemanagia na moritũ matiganĩte. O na kũrĩ ũguo, nĩ maatigĩte wendo ũrĩa maarĩ naguo kĩambĩrĩria-inĩ. Mangĩagire kũrurumũra wendo ũcio rĩngĩ, ũthathaiya wao ndũngĩetĩkĩrĩkire. O na mahinda-inĩ maya, gũkirĩrĩria gwiki ti kũiganu. Nĩ tũrabatara gũkirĩrĩria tũrĩ na gĩtũmi kĩega. Ngai witũ ndaroraga o maũndũ marĩa tũreka, no nĩ aroraga nginya kĩrĩa kĩratũma tũmeke. Nĩ aroraga muoroto ũrĩa ũratũma tũmũtungatĩre tondũ endaga ũthathaiya witũ ũkorũo wĩhocetie harĩ wendo witũ mũnene harĩ we na ngatho citũ kũmwerekera. (Thim. 16:2; Mar. 12:29) No mũhaka tũthiĩ na mbere gũikara twĩiguĩte. Kĩũngano gĩa Sadisi kĩarĩ na thĩna ngũrani. O na gũtuĩka nĩ maatungatagĩra Jehova na kĩyo hau kabere, nĩ maatigĩte gwĩka ũguo. Jesu aamerire ‘marahũke.’ (Kũg. 3:​1-3) Hatarĩ nganja, Jehova ndangĩriganĩrũo nĩ wĩra witũ.—Ahib. 6:10. w22.05 3 ¶6-7

Suleimani eetire gĩkeno kĩrĩa tũgĩaga nakĩo kuumana na wĩra mũritũ “kĩheo kuuma kũrĩ Ngai.” (Koh. 5:​18, 19) Suleimani nĩ eeyoneire ũũma wa ciugo icio tondũ aarĩ mũruti wĩra wĩ kĩyo. Nĩ aakire nyũmba nyingĩ, akĩhanda mĩgũnda ya mĩthabibũ, agĩthondeka mĩgũnda mĩthaka na tũria twa maĩ, na agĩaka matũũra. (1 Ath. 9:19; Koh. 2:​4-6) Hatarĩ nganja nĩ aagĩire na gĩkeno kuumana na wĩra ũcio mũritũ. No Suleimani nĩ aamenyaga atĩ nĩguo akorũo na gĩkeno kĩa ma, harĩ ũndũ ũngĩ aabataraga gwĩka. Nĩ aathingataga nginya maũndũ ma kĩĩroho. Kwa ngerekano, nĩ aarũgamĩrĩire wĩra wa gwaka hekarũ thaka ya ũthathaiya wa Jehova ũrĩa wooire mĩaka mũgwanja. (1 Ath. 6:38; 9:1) Thutha wa Suleimani kũhingia maũndũ macio mothe ma kĩĩroho na ma kĩĩmwĩrĩ, nĩ aamenyire atĩ ũndũ ũrĩa wa bata mũno mũndũ angĩka nĩ gũtungatĩra Jehova. Aandĩkire ũũ: “Thutha wa maũndũ mothe kũiguo, kĩrĩkĩrĩro kĩa ũhoro nĩ gĩkĩ: Wĩtigĩre Ngai ũrĩa wa ma na wathĩkagĩre maathani make.”—Koh. 12:13. w22.05 22 ¶8

Bibilia nĩ ĩkoragwo na ngerekano cia andũ aingĩ mooheirũo nĩ Jehova. Ũngĩririkana arĩkũ? No kũhoteke nĩ weciria ũhoro wa Mũthamaki Manase. Nĩ eehĩirie Jehova na njĩra nene. Nĩ aathathairie ngai cia maheeni, o na agĩkĩra arĩa angĩ ngoro meke ũguo. Nĩ ooragire ciana ciake na njĩra ya gũciruta magongona kũrĩ ngai cia maheeni. O na gũthũkia mũno, nĩ aaigire mũhianano wa gwacũhio thĩinĩ wa hekarũ theru ya Jehova. Bibilia yugaga ũũ igũrũ rĩmwĩgiĩ: “Agĩka maũndũ moru maitho-inĩ ma Jehova na gĩkĩro kĩnene nĩguo amũrakarie.” (2 Maũ. 33:​2-7) O na kũrĩ ũguo, rĩrĩa Manase eeririre kuuma ngoro, Jehova nĩ aamuoheire. (2 Maũ. 33:​12, 13) Ningĩ no kũhoteke nĩ weciria ũhoro wa Mũthamaki Daudi ũrĩa wekire mehia maritũ, ta ma gũtharia na ma kũũragana. No rĩrĩa Daudi eeririre kuuma ngoro na agĩtĩkĩra mahĩtia make, Jehova nĩ aamuoheire o nake. (2 Sam. 12:​9, 10, 13, 14) Kwoguo no tũkorũo na ma atĩ Jehova nĩ akoragwo ehaarĩirie kuohanĩra. w22.06 3 ¶7

Ndũkoragwo ũrĩ ũndũ mũhũthũ hingo ciothe kũiga kĩĩrĩgĩrĩro gitũ kĩrĩ na hinya. Rĩmwe no tuone ta Ngai aikarĩte mũno agĩkaahingia ciĩranĩro ciake. O na kũrĩ ũguo, tondũ Jehova atũũrĩte tene na tene, muonere wake wa mahinda nĩ ngũrani na witũ. (2 Pet. 3:​8, 9) Akaahingia ciĩranĩro ciake na njĩra ĩrĩa njega biũ, ĩndĩ no age gũcihingia rĩrĩa tũrerĩgĩrĩra. Nĩ kĩĩ kĩngĩtũteithia kũiga kĩĩrĩgĩrĩro gitũ kĩrĩ na hinya o tũgĩetagĩrĩra tũkirĩrĩirie Ngai ahingie ciĩranĩro ciake? (Jak. 5:7) Thiĩ na mbere gũikara hakuhĩ na Jehova tondũ nĩwe ũkaahingia kĩĩrĩgĩrĩro kĩu. Nĩguo tũkorũo na kĩĩrĩgĩrĩro, no mũhaka tũkorũo na wĩtĩkio atĩ Jehova arĩ kuo na atĩ “nĩ aheaga arĩa mamũcaragia na kĩyo ngerenwa.” (Ahib. 11:​1, 6) Angĩkorũo nĩ twĩtĩkĩtie biũ atĩ Jehova arĩ kuo, nĩ tũrĩkoragwo na ma biũ atĩ nĩ akaahingia maũndũ mothe marĩa atwĩrĩire. Nĩguo tũthiĩ na mbere kũiga kĩĩrĩgĩrĩro gitũ kĩrĩ na hinya no mũhaka tũhoyage Jehova na tũgathoma Kiugo gĩake. O na gũtuĩka tũtingĩona Jehova, no tũhote kũmũkuhĩrĩria. No twarie nake na njĩra ya mahoya tũrĩ na ma atĩ nĩ egũtũthikĩrĩria.—Jer. 29:​11, 12. w22.10 26-27 ¶11-13

Ta hũũra mbica Ayubu aikarĩte thĩ mũhu-inĩ arĩ na ruo rũingĩ. (Ayub. 2:8) Arata ake maaikaraga makĩmwĩraga ũrĩa arĩ mũũru na atĩ gũtirĩ ũndũ o na ũmwe wa bata arĩ eka. Aaiguaga aritũhĩirũo nĩ magerio marĩa aageragĩra na akaiyũrũo nĩ kĩeha nĩ ũndũ wa kũũrũo nĩ ciana ciake. Ayubu ndambire kũmacokeria ũndũ. (Ayub. 2:13) Angĩkorũo arata acio a Ayubu meeciragia atĩ aakirĩte tondũ nĩ eendaga gũtiganĩria Jehova, nĩ maahĩtĩtie mũno. Nĩ haakinyire handũ Ayubu akĩaria, hihi ainamũrĩte mũtwe na akarora arata acio ake a maheeni, na akiuga: “O nginya rĩrĩa ngaakua, gũtirĩ hĩndĩ ngaatiganĩria wĩkindĩru wakwa!” (Ayub. 27:5) Nĩ kĩĩ gĩateithirie Ayubu gũkorũo na ũmĩrĩru ũguo na gũkorũo na hinya o na akĩhĩtũkagĩra moritũ macio mothe? Nĩ tondũ o na hĩndĩ ĩyo aakuĩte ngoro ũguo, ndaateire mwĩhoko atĩ mũthenya ũmwe Ngai nĩ akaamũrehera kĩhonia tondũ nĩ amwendete. Nĩ aamenyaga atĩ o na angĩakuire, Jehova nĩ angĩkaamũriũkia.—Ayub. 14:​13-15. w22.06 22 ¶9

Nĩ tũheetwo kĩheo kĩa mwanya mũno gĩa kwaranĩria na Mũũmbi wa igũrũ na thĩ kũgerera mahoya. Ta wĩcirie ũndũ ũyũ: No tũitũrũrĩre Jehova ngoro citũ ihinda o rĩothe tũkĩhũthĩra rũthiomi o ruothe. No tũmũhoe rĩrĩa tũkomete thibitarĩ kana rĩrĩa tuohetwo njera, tũrĩ na ma atĩ Ithe witũ ũrĩ wendo nĩ egũtũthikĩrĩria. Nĩ tũcokagia ngatho mũno nĩ ũndũ wa kĩheo kĩu atũheete. Mũthamaki Daudi nĩ aakenaga nĩ ũndũ wa kĩheo kĩa mahoya. Aaugire ũũ akĩinĩra Jehova: “Reke ihoya rĩakwa rĩkorũo rĩtariĩ ta ũbumba mũhaarĩrie mbere yaku.” (Thab. 141:​1, 2) Matukũ-inĩ ma Daudi, ũbumba mũtheru ũrĩa wahũthagĩrũo nĩ athĩnjĩri-Ngai wakoragwo ũhaarĩrĩirio na ũbacĩrĩru mũnene. (Tham. 30:​34, 35) Gũkorũo atĩ Daudi aaringithanirie mahoya na ũbumba kũronania atĩ nĩ eendaga gwĩcũrania igũrũ rĩgiĩ maũndũ marĩa ekũgweta akĩhoya Jehova. Ũguo nĩguo o na ithuĩ tũngĩenda gwĩkaga nĩguo mahoya maitũ makenagie Jehova. w22.07 20 ¶1-2; 21 ¶4

Kũrĩhanĩria nĩ kwa Jehova. Jehova ndatũheete rũtha rwa kwĩrĩhĩria rĩrĩa mũndũ atũhĩtĩria. (Rom. 12:20, 21) Tondũ tũtikoragwo na ũhoro wothe wĩgiĩ ũndũ mũna na tũtirĩ akinyanĩru, tũtingĩhota gũtua ciira na njĩra ĩrĩa yagĩrĩire ta ũrĩa Ngai angĩhota. (Ahib. 4:13) Ningĩ rĩmwe no tũremwo nĩ gũtua itua rĩrĩa rĩagĩrĩire nĩ ũndũ wa ũrĩa tũraigua ngoro-inĩ. Jehova aatongoririe Jakubu kwandĩka ũũ: “Marakara ma mũndũ matirehaga ũthingu wa Ngai.” (Jak. 1:20) No tũkorũo na ma atĩ Jehova nĩ arĩkaga ũndũ ũrĩa mwagĩrĩru, na nĩ arĩtigĩrĩra atĩ kĩhooto nĩ kĩoneka. Kuohanĩra nĩ kuonanagia nĩ tũretĩkia atĩ Jehova nĩ arĩ kĩhooto. Rĩrĩa twatigĩra Jehova maũndũ nĩguo atue ciira na kĩhooto, tuonanagia atĩ tũrĩ na ma nĩ akeeheria maũndũ mothe moru marĩa mareheetwo nĩ mehia. Maũndũ marĩa mothe matũrehagĩra ruo rwa ngoro “matikaaririkanwo, o na kana maikare ngoro-inĩ” rĩngĩ thĩinĩ wa thĩ yake njerũ.—Isa. 65:17. w22.06 10-11 ¶11-12

Gũkorũo atĩ nĩ tũthũirũo na njĩra ĩyo nĩ ũira wa kuonania atĩ nĩ twĩtĩkĩrĩkĩte nĩ Jehova. (Mat. 5:​11, 12) Mũcukani nĩwe ũcogagĩra ũkararia ũcio. No Jesu arĩ na hinya mũingĩ kũmũkĩra. Nĩ ũndũ wa ũteithio wa Jesu, ũhoro ũrĩa mwega nĩ ũrahunjio kũrĩ andũ a ndũrĩrĩ ciothe. Rekei tuone ũira ũronania ũndũ ũcio. Ũndũ ũngĩ mũritũ ahunjia a Ũthamaki macemanagia naguo nĩ gũkorũo atĩ andũ maragia thiomi nyingĩ ngũrani. Thĩinĩ wa ũhoro ũrĩa Jesu aaguũrĩirie mũtũmwo Johana, nĩ oonanirie atĩ matukũ-inĩ maitũ ũhoro ũrĩa mwega nĩ ũngĩgatooria mũhĩnga ũcio. (Kũg. 14:​6, 7) Na njĩra ĩrĩkũ? Nĩ tũrahe andũ aingĩ o ũrĩa kũngĩhoteka mweke wa kũigua ũhoro wa Ũthamaki. Ũmũthĩ, andũ thĩinĩ wa thĩ yothe no mahote gũthoma ũhoro wa Bibilia thĩinĩ wa website itũ ya jw.org, tondũ ũhoro ũcio ũkoragwo ũtaũrĩtwo na thiomi makĩria ma 1,000. Kĩama Kĩrĩa Gĩtongoragia nĩ kĩaheanire rũtha rwa gũtaũra ibuku rĩrĩa tũhũthagĩra kwĩruta na andũ Bibilia rĩa Kenera Ũtũũro Tene na Tene! na thiomi makĩria ma 700. w22.07 9 ¶6-7

Jesu nĩ aaiguagĩra andũ tha. Mũtũmwo Mathayo aandĩkire ũũ: “Rĩrĩa oonire kĩrĩndĩ, agĩkĩiguĩra tha tondũ kĩarĩ kĩnyamarie na gĩkahurunjwo ta ngʼondu itarĩ na mũrĩithi.” (Mat. 9:36) Ĩ nake Jehova aiguaga atĩa? Jesu ooigire ũũ: “Awa ũrĩa ũrĩ igũrũ [ndangĩenda] o na ũmwe wa aya matariĩ ta twana ore.” (Mat. 18:14) Na githĩ ciugo icio ti cia gũtũũmĩrĩria mũno! O ũrĩa tũgũthiĩ na mbere kũmenya Jesu wega, noguo tũkwenda Jehova makĩria. Ũndũ ũngĩ ũngĩgũteithia kwenda Jehova makĩria na gũtuĩka Mũkristiano mũgimaru kĩĩroho, nĩ kũhũthagĩra mahinda hamwe na aarĩ na ariũ a Ithe witũ arĩa agimaru kĩĩroho kĩũngano-inĩ nĩgetha ũmamenye wega. Nĩ ũkuona atĩ nĩ makoragwo na gĩkeno, na matiĩriraga nĩ ũndũ wa itua rĩao rĩa gũtungatĩra Jehova. Meere magũtaarĩrie maũndũ mamwe mega marĩa meyoneire ũtungata-inĩ wa Jehova. Mahoe ũtaaro ũngĩkorũo na itua rĩa bata ũrenda gũtua. Ririkana atĩ, “ataarani aingĩ nĩ matũmaga kũgĩe na ũgaacĩru.” w22.08 3 ¶6-7

Ithuothe nĩ tũrĩcemanagia na magerio matiganĩte. No tũtirĩhiũranagia namo tũrĩ oiki. O ta mũciari ũrĩ wendo, Jehova atũroraga hingo ciothe. Akoragwo hakuhĩ na ithuĩ, ehaarĩirie gũthikĩrĩria tũkĩmũhoya, na ehaarĩirie gũtũteithia. (Isa. 43:2) Tũrĩ na ma atĩ no tũhote kũhiũrania na magerio tondũ nĩ atũheaga kĩrĩa gĩothe tũrabatara nĩguo tũhote gũkirĩrĩria. Nĩ atũheete kĩheo kĩa mahoya, Bibilia, irio nyingĩ cia kĩĩroho, na aarĩ na ariũ a Ithe witũ, nĩguo atũteithie rĩrĩa tũrĩ na mathĩna. Nĩ tũcokagia ngatho mũno nĩ ũndũ wa gũkorũo na Ithe witũ wa igũrũ ũrĩa ũtũroraga. “Ngoro citũ nĩ ikenaga nĩ ũndũ wake.” (Thab. 33:21) No tuonie Jehova atĩ nĩ tũcokagia ngatho nĩ ũndũ wa wendo ũrĩa atuonagia, na njĩra ya kũhũthĩra wega ũteithio wothe ũrĩa atũheaga. Ningĩ nĩ tũrabatara kũhingia itemi ritũ nĩguo Jehova athiĩ na mbere gũtũrũmbũiya. Na njĩra ĩngĩ, twathiĩ na mbere kwĩrutanĩria gwathĩkĩra Jehova na gwĩka maũndũ marĩa magĩrĩire maitho-inĩ make, egũtũũra atũroraga tene na tene! w22.08 13 ¶15-16

Andũ aingĩ ũmũthĩ nĩ marigagwo nũũ mangĩĩhoka. Matikoragwo na ma kana no mehoke andũ arĩa maheetwo gĩtĩo, ta ateti, athuthuria a sayansi, na ahũũri biacara, tondũ nĩ mekagĩrĩra nganja kana nĩ mamarũmbũyagia. Makĩria ma ũguo, matitĩĩte atongoria a ndini iria ciĩĩtaga cia Gĩkristiano. Kwoguo ti ũndũ wa kũgegania kuona atĩ matiĩhokete Bibilia, ibuku rĩrĩa atongoria acio a ndini maugaga atĩ nĩrĩo mararũmĩrĩra. Tũrĩ ndungata cia Jehova, nĩ tũkoragwo na ma atĩ we nĩ “Ngai wa ũhoro wa ma” na hĩndĩ ciothe nĩ atwendagĩra mawega. (Thab. 31:5; Isa. 48:17) Nĩ tũĩ atĩ no twĩhoke ũhoro ũrĩa tũthomaga thĩinĩ wa Bibilia. Nĩ twĩtĩkanagia na mũthomi ũmwe wa maũndũ ma Bibilia ũrĩa waugire ũũ: “Hatirĩ ũndũ o na ũmwe Ngai augĩte ũngĩkorũo ũrĩ wa maheeni kana ũkaaga kũhinga. Andũ a Ngai no mehoke maũndũ marĩa augĩte tondũ nĩ mehokete Ngai ũcio ũmaugĩte.” w23.01 2 ¶1-2

Nĩ twakaga aarĩ na ariũ a Ithe witũ rĩrĩa twekĩra hinya wĩtĩkio wao harĩ Jehova. Amwe nĩ manyũrũragio nĩ andũ arĩa matetĩkĩtie. Angĩ nao nĩ mahiũranagia na mathĩna manene ma mwĩrĩ kana magakorũo marĩ na ruo rũnene rwa ngoro. Nao angĩ makoretwo metereire ihinda iraihu mũtabarĩrĩre ũyũ wa maũndũ ũthire. Maũndũ macio no makorũo marĩ igerio harĩ wĩtĩkio wa Akristiano. O na Akristiano a karine ya mbere nĩ maacemanirie na moritũ ta macio. Mũtũmwo Paulo nĩ aahũthagĩra Maandĩko gwaka wĩtĩkio wa aarĩ na ariũ a Ithe. Kwa ngerekano, no kũhoteke Akristiano Ayahudi nĩ maaiguaga ta matangĩhota gũcokeria andũ a famĩlĩ arĩa maaugaga atĩ ndini ya Kĩyahudi yarĩ ya bata gũkĩra ya Ũkristiano. Hatarĩ nganja marũa marĩa Paulo aandĩkĩire Ahibirania, nĩ meekĩrire hinya Akristiano acio na njĩra nene. (Ahib. 1:​5, 6; 2:​2, 3; 9:​24, 25) Marũa macio nĩ mangĩamateithirie kuona ũrĩa mekwĩra acio maamakararagia. w22.08 23-24 ¶12-14

Andũ thĩinĩ wa thĩ ĩno ya Shaitani nĩ marigagwo nũũ mangĩĩhoka. Mĩtugo ya andũ a biacara, ateti, na atongoria a ndini, nĩ ĩtũmaga andũ maremwo nĩ kũmehoka. Kwaga kwĩhokana kũhutagia nginya arata, andũ a itũũra, na andũ a famĩlĩ. Ũndũ ũcio ndwagĩrĩirũo gũtũgegia. Bibilia yarathĩte ũũ: “Matukũ-inĩ ma kũrigĩrĩria . . . , andũ nĩ [magaakorũo] matarĩ ehokeku, . . . acambania, . . . akunyanĩri.” Ũguo nĩ kuuga atĩ andũ nĩ mangĩkaahanana na Shaitani, ngai wa mũtabarĩre ũyũ wa maũndũ, ũrĩa ũtangĩĩhokeka. (2 Tim. 3:​1-4; 2 Kor. 4:4) No tondũ tũrĩ Akristiano, nĩ tũĩ atĩ no twĩhoke Jehova biũ. Tũrĩ na ma atĩ nĩ atwendete, na atĩ “gũtirĩ hĩndĩ [agaatiganĩria]” arata ake. (Thab. 9:10) Ningĩ no twĩhoke Jesu Kristo tondũ nĩ aarutire muoyo wake nĩ ũndũ witũ. (1 Pet. 3:18) Na nĩ twĩyoneire atĩ Bibilia nĩ ĩheanaga ũtaaro wa kwĩhokeka.—2 Tim. 3:​16, 17. w22.09 2 ¶1-2

Gĩkeno kĩa ma to gĩkeno kĩa ihinda inini kĩrĩa mũndũ agĩaga nakĩo rĩmwe gĩgacoka gĩgathira. Ĩndĩ nĩ gĩkeno mũndũ angĩtũũra nakĩo ũtũũro wake wothe. Ũndũ ũcio ũngĩhoteka atĩa? Jesu nĩ aataarĩirie nĩ na njĩra ĩrĩkũ hĩndĩ ya Mahunjio Make ma Kĩrĩma-inĩ rĩrĩa aaugire ũũ: “Gũkena-rĩ, nĩ arĩa marũmbũyagia mabataro mao ma kĩĩroho.” (Mat. 5:3) Jesu nĩ aamenyaga atĩ andũ mombĩtwo marĩ na wendi mũnene wa kũmenya Jehova Ngai, o we Mũũmbi wao na kũmũthathaiya. Macio nĩmo “mabataro [maitũ] ma kĩĩroho.” Na tondũ Jehova nĩ ‘Ngai mũkeni,’ arĩa mamũthathayagia o nao no makorũo na gĩkeno. (1 Tim. 1:11) Hihi no mũhaka maũndũ maitũ makorũo magĩthiĩ wega ũtũũro-inĩ atĩ nĩguo tũkorũo na gĩkeno? Aca. Mahunjio-inĩ Make ma Kĩrĩma-inĩ, Jesu aaugire atĩ o na “arĩa macakayaga,” no magĩe na gĩkeno. Na Jesu aaugire atĩ ũguo noguo kũrĩ harĩ “arĩa manyarirĩtwo nĩ ũndũ wa ũthingu.” (Mat. 5:​4, 10, 11) Jesu eendaga gũtũruta atĩ gĩkeno gĩtiumanaga na ũrĩa maũndũ mahaana ũtũũro-inĩ witũ, ĩndĩ kiumanaga na kũrũmbũiya mabataro maitũ ma kĩĩroho na gũkuhĩrĩria Ngai.—Jak. 4:8. w22.10 6-7 ¶1-3

Ũtaũku no ũteithie Mũkristiano kũmenya “hĩndĩ ya gũkira na hĩndĩ ya kwaria.” (Koh. 3:7) Kũrĩ andũ maugaga atĩ, “Kwaria nĩ kwega, no gũkira nĩ kwega makĩria.” Na njĩra ĩngĩ, ũguo nĩ kuuga atĩ nĩ kũrĩ hĩndĩ arĩ wega makĩria gũkira handũ ha kwaria. Harĩ mũthuri ũmwe wa kĩũngano ũrĩ na ũmenyeru, na kaingĩ nĩ oragio ateithie ciũngano ingĩ rĩrĩa irĩ na mathĩna maritũ. Mũthuri ũngĩ wa kĩũngano akĩaria ũhoro wĩgiĩ mũthuri ũcio aaugire ũũ: “Hingo ciothe nĩ emenyagĩrĩra ndakaheane ũhoro wa hitho wĩgiĩ ciũngano ingĩ.” Gũkorũo arĩ na ũtaũku nĩ gũtũmaga aheo gĩtĩo nĩ athuri arĩa angĩ matungataga nao kĩũngano-inĩ kĩao. Nĩ makoragwo na ma atĩ ndangĩheana ũhoro wao wa hitho harĩ andũ arĩa angĩ. Ũndũ ũngĩ ũngĩtũteithia gũtuĩka andũ mangĩĩhokwo nĩ kwaragia ma. Nĩ twĩhokaga mũndũ waragia ma tondũ nĩ tũmenyaga atĩ gũtirĩ hĩndĩ angĩheenania.—Ef. 4:25; Ahib. 13:18. w22.09 12 ¶14-15

Rĩrĩa ũũgĩ wa ma ‘ũranĩrĩra barabara-inĩ,’ andũ aingĩ nĩ maregaga gũthikĩrĩria. (Thim. 1:20) Kũringana na Bibilia, kũrĩ na ikundi ithatũ cia andũ maregaga ũũgĩ: ‘arĩa matarĩ ũmenyeru,’ ‘anyũrũrania,’ na ‘irimũ.’ (Thim. 1:​22-25) Andũ ‘arĩa matarĩ na ũmenyeru’ nĩ arĩa metĩkagia ũndũ o wothe maigua, kana makaheeneka na ihenya. (Thim. 14:​15, kohoro ka magũrũ-inĩ.) Kwa ngerekano, ta wĩcirie ũhoro wa andũ milioni nyingĩ arĩa mahĩtithagio nĩ atongoria a ndini kana a gĩũteti. Amwe ao nĩ mamakaga mũno rĩrĩa mamenya atĩ atongoria acio makoretwo makĩmaheenia. No andũ arĩa magwetetwo thĩinĩ wa Thimo 1:​22, mathuuraga gũikara matarĩ na ũmenyeru tondũ ũguo nĩguo marenda gũikara. (Jer. 5:31) Matiendaga kwĩruta ũrĩa Bibilia yugaga o na kana gwathĩkĩra mawatho mayo. Hatarĩ nganja tũtingĩenda kwĩgerekania na andũ arĩa mathuuraga gũikara matarĩ na ũmenyeru.—Thim. 1:32; 27:12. w22.10 19 ¶5-7

Ithondeka rĩa Ngai nĩ rĩtũheaga ũtongoria wa gũtũgitĩra. Kaingĩ nĩ tũririkanagio kũhe athuri a kĩũngano namba citũ cia thimũ iria mangĩtũhũũrĩra nacio kũngiumĩra ũndũ wa hinahi. Ningĩ no tũheo ũtongoria twĩrũo tũtikaume mĩciĩ itũ, tũthamĩre handũ hangĩ, ũrĩa tũngĩona ũteithio wa indo iria tũrabatara, kana ũrĩa tũngĩteithia arĩa angĩ na nĩ rĩ tũngĩka ũguo. Tũngĩaga gwathĩka, no tũige muoyo witũ na wa athuri a kĩũngano ũgwati-inĩ arĩa maikaraga meiguĩte nĩ ũndũ witũ. (Ahib. 13:17) Aarĩ na ariũ a Ithe witũ aingĩ arĩa mabatarĩte gũthaama nĩ ũndũ wa icanjama kana ngũĩ, nĩ merutanĩirie kũmenyera ũtũũro wao mwerũ na makongerera kĩyo wĩra-inĩ wa Jehova. O ta Akristiano a karine ya mbere arĩa maahurunjũkire nĩ ũndũ wa kũnyarirũo, aarĩ na ariũ a Ithe witũ acio nĩ mathiaga na mbere ‘kũhunjia ũhoro ũrĩa mwega wa kiugo.’ (Atũm. 8:4) Kũhunjia nĩ kũmateithagia kũiga meciria mao Ũthamaki-inĩ handũ ha gwĩciria moritũ marĩa maragerera. Ũndũ ũcio nĩ ũtũmĩte matũũrie gĩkeno kĩao na thayũ. w22.12 19-20 ¶12-13

Jehova nĩ onaga o ũmwe witũ arĩ wa bata. Jesu atanatũma arutwo ake mathiĩ makahunjie, nĩ aamateithirie gũtooria guoya ũrĩa mangĩkorũo maarĩ naguo wa gũũkĩrĩrũo. (Mat. 10:​29-31) Eekire ũguo na njĩra ya kwaria igũrũ rĩgiĩ tũnyoni tuoĩkaine mũno thĩinĩ wa Isiraeli. Tũnyoni tũu tũtioonagwo tũrĩ twa bata matukũ-inĩ macio ma Jesu. No Jesu eerire arutwo ake ũũ: “Gũtirĩ o na kamwe ga tuo kangĩgwa thĩ na Ithe wanyu age kũmenya.” Agĩcoka akĩongerera ũũ: “Inyuĩ mũrĩ a bata gũkĩra tũnyoni tũingĩ.” Na njĩra ĩyo, Jesu nĩ aateithirie arutwo ake gũkorũo na ma atĩ Jehova nĩ oonaga o ũmwe wao arĩ wa bata, na kwoguo matiabataraga gwĩtigĩra kũnyarirũo. No mũhaka arutwo a Jesu makorũo nĩ maaririkanaga ciugo icio cia Jesu hĩndĩ ciothe mangĩonire tũnyoni tũu makĩhunjia taũni-inĩ na icagi-inĩ. Rĩrĩa rĩothe wona kanyoni kanini, ririkanaga atĩ Jehova nĩ akwendete tondũ ‘ũrĩ wa bata gũkĩra tũnyoni tũingĩ.’ No agũteithie, kwoguo ndũrabatara gwĩtigĩra rĩrĩa arĩa angĩ maragũũkĩrĩra. w23.03 18 ¶12

Rĩmwe na rĩmwe nĩ tũcemanagia na moritũ, ta hihi gũũkĩrĩrũo nĩ andũ a famĩlĩ kana hihi kũrũo nĩ wĩra. Rĩrĩa twagerera maũndũ maritũ kwa ihinda iraihu, no tũigue tũtarĩ na mwĩhoko na tũkuĩte ngoro. Shaitani ahũthagĩra mĩeke ta ĩyo gũtũma tuone Jehova ta atatwendete. Mũcukani endaga tuone ta mathĩna marĩa tũrĩ namo maraumana na Jehova kana ithondeka rĩake. Ũndũ ta ũcio nĩ wekĩkire harĩ Aisiraeli amwe marĩ bũrũri-inĩ wa Misiri. Kĩambĩrĩria-inĩ nĩ meetĩkĩtie atĩ Jehova nĩwe waamũrĩte Musa na Haruni mamakũũre ũkombo-inĩ. (Tham. 4:​29-31) No thutha-inĩ rĩrĩa Firauni aatũmire ũtũũro wao ũritũhe makĩria, nĩ maamenereirie Musa na Haruni nĩ ũndũ wa mathĩna mao. (Tham. 5:​19, 20) Warĩ ũndũ wa kĩeha kuona atĩ maaugaga atĩ ndungata icio njĩhokeku cia Ngai nĩcio ciatũmĩte mathĩnĩke ũguo. Angĩkorũo nĩ ũkoretwo ũgĩkirĩrĩria moritũ kwa ihinda iraihu, itũũrũragĩra Jehova ngoro yaku kũgerera mahoya na ũkamwĩhoka agũteithie. w22.11 15 ¶5-6

Jehova nĩwe Mũheani wa Muoyo na arĩ na hinya wa gũcokia andũ muoyo. Nĩ aaheire mũnabii Elija hinya wa kũriũkia mũriũ wa mũtumia wa ndigwa wa Zarefathu. (1 Ath. 17:​21-23) Thutha ũcio, mũnabii Elisha agĩteithio nĩ Ngai nĩ aahotire kũriũkia kahĩĩ ka mũtumia Mũshunami. (2 Ath. 4:​18-20, 34-37) Ngerekano icio cia andũ maariũkirio o hamwe na ingĩ, nĩ cionanagia atĩ Jehova arĩ na hinya wa gũcokia andũ muoyo. Rĩrĩa Jesu aarĩ gũkũ thĩ, nĩ oonanirie atĩ Ithe nĩ aamũheete hinya wa kũriũkania. (Joh. 11:​23-25, 43, 44) Rĩu Jesu arĩ kũrĩa igũrũ na nĩ aheetwo “wathani wothe kũrĩa igũrũ o na gũkũ thĩ.” Nĩ ũndũ ũcio, arĩ na ũhoti wa kũriũkia “arĩa othe marĩ thĩinĩ wa mbĩrĩra” marĩ na kĩĩrĩgĩrĩro gĩa gũtũũra tene na tene.—Mat. 28:18; Joh. 5:​26-29. w22.12 5 ¶10

Rĩrĩa Aisiraeli maaregire gũthikĩrĩria Ezekieli, nĩ Jehova maaregaga. Ciugo icio cia rĩandĩko rĩa ũmũthĩ nĩ ciaheire Ezekieli ũũma atĩ o na akorũo andũ nĩ maaregire gũthikĩrĩria ndũmĩrĩri yake, ti kuonania atĩ nĩ aaremetwo nĩ wĩra wake arĩ mũnabii. Ningĩ Jehova nĩ aaheire Ezekieli ũũma atĩ rĩrĩa matuĩro make mangĩgakinyĩra andũ acio, nĩ “[mangĩkaamenya] atĩ nĩ kwarĩ na mũnabii gatagatĩ-inĩ kao.” (Ezek. 2:5; 33:33) Hatarĩ nganja, kũmenya maũndũ macio merĩ nĩ kwaheire Ezekieli hinya ũrĩa aabataraga nĩguo ahote kũhingia ũtungata wake. O na ithuĩ nĩ tũgĩaga na hinya nĩ ũndũ wa kũmenya atĩ tũtũmĩtwo nĩ Jehova. Nĩ atuonetie gĩtĩo kĩnene na njĩra ya gũtwĩta “aira” ake. (Isa. 43:10) O ta ũrĩa Jehova eerĩte Ezekieli ‘ndagetigĩre,’ o na ithuĩ atwĩrĩte ũũ: “Mũtigetigĩre.” (Ezek. 2:6) Nĩkĩ tũtiagĩrĩirũo gwĩtigĩra arĩa matũũkagĩrĩra? Tondũ o ta Ezekieli, tũtũmĩtwo nĩ Jehova, na nĩ arĩtũteithagia.—Isa. 44:8. w22.11 3-4 ¶4-5

Nĩ tũcokagia ngatho mũno tondũ ariũ a Ithe witũ arĩa matungataga marĩ athuri a kĩũngano na ndungata cia kĩũngano makoragwo marĩ andũ mangĩĩhokwo. Nĩ tũrũmbũyagio wega nĩ ariũ a Ithe witũ acio ehokeku na nĩ tũcokagĩria Jehova ngatho nĩ ũndũ wao. No nĩ na njĩra irĩkũ tũngĩonania atĩ no twĩhokwo? Tondũ nĩ twendete aarĩ na ariũ a Ithe witũ, nĩ twendaga kũmenya ũrĩa marathiĩ na mbere. O na kũrĩ ũguo, no mũhaka tũkoragwo na ũigananĩru na tũtĩage maũndũ mao ma thĩinĩ. Akristiano amwe thĩinĩ wa kĩũngano gĩa karine ya mbere nĩ “[maaheanaga] mũcene, na makaingĩrĩra maũndũ ma andũ arĩa angĩ, makaaragia maũndũ matagĩrĩirũo kwaria.” (1 Tim. 5:13) Tũtingĩenda kũhaana tao. No ĩ mũndũ angĩtwĩra ũhoro wake wa thĩinĩ na atwĩre tũtikeere andũ angĩ? Kwa ngerekano, mwarĩ wa Ithe witũ no atwĩre igũrũ rĩgiĩ thĩna mũna wa mwĩrĩ arĩ naguo kana igerio rĩngĩ aracemania narĩo, na atwĩre tũtikeere mũndũ ũngĩ ũhoro ũcio. Nĩ twagĩrĩirũo gũtĩa wendi wake. w22.09 10 ¶7-8

Kiugo gĩa Kĩngiriki kĩrĩa gĩtaũrĩtwo “kũgarũrĩra meciria manyu” no kĩhũthĩrũo kuuga “gũthondeka meciria manyu.” Ũguo nĩ kuonania tũtiagĩrĩirũo o gwĩka ciĩko nini tu njega. Handũ ha ũguo, no mũhaka twĩthuthurie ũrĩa tũtariĩ ngoro-inĩ na twĩke mogarũrũku o mothe marĩa marabatarania, nĩguo tũtigĩrĩre atĩ ũtũũro witũ nĩ ũratwarana na ithimi cia Jehova ũrĩa wothe kũngĩhoteka. Twagĩrĩirũo gũthiĩ na mbere gwĩkaga ũguo. Rĩrĩa tũgaatuĩka akinyanĩru, nĩ tũkaahotaga gũkenia Jehova hĩndĩ ciothe maũndũ-inĩ mothe marĩa tũgeekaga. No ihinda-inĩ rĩrĩ nĩ tũrabatara gũthiĩ na mbere kwĩrutanĩria mũno nĩguo tũkenie Jehova. Thĩinĩ wa Aroma 12:​2, mũtũmwo Paulo oonanirie atĩ nĩguo tũmenye wendi wa Ngai nĩ tũrabatara kũgarũrĩra meciria maitũ. No mũhaka twĩthuthurie nĩguo tuone kana nĩ tũrekaga mwĩcirĩrie wa Ngai ũtongorie mĩoroto itũ na matua maitũ, handũ ha gwĩtĩkĩra gũtongorio nĩ mũtabarĩre ũyũ mũũru wa maũndũ. w23.01 8-9 ¶3-4

Hihi Jehova nĩ aingagĩrĩra maũndũ mothe marĩa tũcemanagia namo? Hihi atongoragia maũndũ mothe ma ũtũũro witũ nĩguo maũndũ mothe moru mahaanĩke nĩ ũndũ wa gĩtũmi kĩega? Aca. Bibilia ndĩnyitaga mbaru ũndũ ũcio. (Koh. 8:9; 9:11) O na kũrĩ ũguo, nĩ tũĩ ũndũ ũyũ: Rĩrĩa twacemania na igerio, Jehova nĩ onaga ũndũ ũcio na nĩ athikagĩrĩria kĩrĩro gitũ gĩa kũhoya ũteithio. (Thab. 34:15; Isa. 59:1) Makĩria ma ũguo, Jehova no atũteithie tũkirĩrĩrie moritũ. Na njĩra ĩrĩkũ? Njĩra ĩmwe Jehova atũteithagia nayo nĩ gũtũũmĩrĩria na gũtwĩkĩra ngoro, na kaingĩ ekaga ũguo ihinda rĩrĩa rĩagĩrĩire. (2 Kor. 1:​3, 4) Hihi no wĩcirie ũhoro wa ihinda rĩna ũtũũro-inĩ waku rĩrĩa Jehova aagũteithirie na njĩra ya gũkũũmĩrĩria na gũgwĩkĩra ngoro o hĩndĩ ĩrĩa wabataraga ũndũ ũcio mũno? Kaingĩ rĩrĩa twatooria ũndũ mũna mũritũ tũrageragĩra, nĩrĩo tuonaga atĩ Jehova nĩ aratũteithagia. w23.01 17-18 ¶13-15

Nyamũ ĩyo ya gĩthaka ĩthiĩte kũhaana biũ nyamũ ĩrĩa ya gĩthaka ya ciongo mũgwanja, o tiga atĩ yo nĩ ya rangi mũtune. Ĩĩtĩtwo “mũhianano wa nyamũ ya gĩthaka” na ĩkerũo atĩ nĩyo “mũthamaki wa kanana.” (Kũg. 13:​14, 15; 17:​3, 8) “Mũthamaki” ũcio erĩtwo atĩ aarĩ kuo, agĩcoka agĩkorũo atarĩ kuo, na thutha-inĩ agĩkorũo kuo rĩngĩ. Mũthamaki ũcio arũgamĩrĩire kĩama kĩa Ũrũmwe wa Mabũrũri kĩrĩa gĩkaga wendi wa thirikari cia gĩũteti cia thĩ yothe. Mbere kĩarĩ kuo kĩrĩ Ngwatanĩro ya Mabũrũri. Gĩgĩcoka gĩgĩtiga gũkorũo kuo hĩndĩ ya Mbaara ya Kerĩ ya Thĩ. Thutha ũcio gĩkiumĩra rĩngĩ kĩrĩ Ũrũmwe wa Mabũrũri. Nyamũ icio cia gĩthaka, kana thirikari cia thĩ, nĩ igaacogera andũ mokĩrĩre Jehova na andũ ake. Na njĩra ya ngerekano, igaacokanĩrĩria “athamaki a thĩ yothe ĩrĩa ĩikaragwo” nĩ ũndũ wa mbaara ya Hari–Magedoni, na nĩyo “mũthenya ũrĩa mũnene wa Ngai Mwene-Hinya-Wothe.”—Kũg. 16:​13, 14, 16. w22.05 10 ¶10-11

Rĩrĩa Jesu aahotire gwĩthomera Maandĩko Matheru, nĩ aahotire kũmenya Maandĩko wega na o na kũmenda na kũreka matongorie ciĩko ciake. Kwa ngerekano, ta ririkana ũrĩa gwathiire hĩndĩ ĩmwe hekarũ-inĩ rĩrĩa Jesu aarĩ na mĩaka 12. Arutani arĩa mooĩ Watho wa Musa wega, nĩ maagegirio mũno nĩ “ũhoti wa [Jesu] wa gũtaũkĩrũo nĩ maũndũ na macokio make.” (Luk. 2:​46, 47, 52) O na ithuĩ no tũmenye Kiugo kĩa Ngai na tũkĩende tũngĩgĩthomaga kaingĩ. No twĩrute kuumana na ũrĩa Jesu eerire andũ arĩa mooĩ Watho, andũ ta andĩki-watho, Afarisai, na Asadukai. Atongoria acio a ndini nĩ maathomaga Maandĩko kaingĩ, no matiagunĩkaga kuumana na maũndũ marĩa mathoma. Jesu nĩ oonanirie maũndũ matatũ andũ acio mateekaga, marĩa mangĩamateithirie kũgunĩka kuumana na Maandĩko. Ciugo iria aameerire nĩ igũtũteithia kwagagĩria ũhoti witũ (1) wa gũtaũkĩrũo nĩ maũndũ marĩa tũrathoma, (2) wa gũcaria maũndũ ma bata rĩrĩa tũrathoma, na (3) wa gwĩtĩkĩria Kiugo kĩa Ngai gĩtũgarũre. w23.02 8-9 ¶2-3

Mogwati mamwe arĩ o mũhaka twĩtheme nĩ ta gũthakĩra andũ arĩa angĩ kĩĩwendo, kũnyua na kũrĩa gũkĩria gĩthimi, kũhũthĩra mĩario ĩngĩtuurithia arĩa angĩ, o hamwe na kwĩrorera maũndũ ma gwĩkenia marĩ na ũhinya, ponografĩ, na maũndũ mangĩ ta macio. (Thab. 101:3) Mũcukani aikaraga agĩcaragia mĩeke ya gũthũkia ũrata witũ hamwe na Jehova. (1 Pet. 5:8) Tũngĩaga kwĩmenyerera, Shaitani no ahande thĩinĩ wa meciria na ngoro citũ mbegũ cia ũiru, kwaga wĩhokeku, ũkoroku, rũmena, mwĩtĩo, na marakara. (Gal. 5:​19-21) Tũngĩaga gũcieheria o na ihenya, no ithiĩ na mbere gũkũra o ta mũmera ũrĩ thumu na itũrehere thĩna. (Jak. 1:​14, 15) Ũgwati ũmwe wĩhithanĩtie nĩ thiritũ njũru. Nĩ twagĩrĩirũo kũririkanaga atĩ nĩ tũhutagio mũno nĩ andũ arĩa tũrahũthĩra mahinda hamwe nao. (1 Kor. 15:33) Tũngĩĩmenyagĩrĩra, nĩ tũrĩĩthemaga kũgĩa thiritũ itagĩrĩire na andũ arĩa matarũmagĩrĩra ithimi cia Jehova. (Luk. 21:34; 2 Kor. 6:15) Nĩ tũrĩhotaga kuona ũgwati na tũkawĩthema. w23.02 16 ¶7; 17 ¶10-11

Wendo waku harĩ Jehova nĩ wongererekete o ũrĩa wĩrutĩte makĩria igũrũ rĩmwĩgiĩ. Hatarĩ nganja no wende kũmũkuhĩrĩria makĩria, ihinda-inĩ rĩrĩ na tene na tene. Na no ũhote gwĩka ũguo. Agwĩkĩrĩte ngoro ũkenagie ngoro yake. (Thim. 23:​15, 16) No ũhote gwĩka ũguo kũgerera ciugo o hamwe na ciĩko ciaku. Kũgerera ũtũũro waku, no wonanie atĩ nĩ wendete Jehova biũ. Ũcio nĩguo muoroto ũrĩa mwega biũ ũngĩĩigĩra ũtũũro-inĩ. Ũngĩonania atĩa atĩ nĩ wendete Jehova? Mũndũ ambagĩrĩria na kũhoya ihoya rĩa mwanya rĩa kwĩyamũrĩra Ngai ũrĩa ũmwe wa ma. (Thab. 40:8) Agacoka akonania wĩyamũrĩri ũcio kũrĩ andũ arĩa angĩ na njĩra ya kũbatithio. Rĩu nĩ ikinya rĩa bata mũno ũtũũro-inĩ waku na nĩ rĩrehaga gĩkeno. Wambagĩrĩria ũtũũro mwerũ wa gũtũũra nĩ ũndũ wa Jehova no ti tondũ waku mwene. (Rom. 14:8; 1 Pet. 4:​1, 2) Rĩu no rĩoneke rĩrĩ ikinya inene, na nĩguo kũrĩ. No nĩ rĩkũhingũragĩra njĩra ya kũgĩa na ũtũũro ũrĩa mwega biũ. w23.03 6 ¶14-15