Septemba

Rĩrĩa twahũthĩra kĩheo gĩa kwaria na njĩra njega, tuonanagia atĩ tũrĩ athathaiya a Jehova. Nĩ tũteithagia andũ arĩa matwĩroragĩra kuona ngũrani “gatagatĩ ka [mũndũ] ũrĩa ũtungatagĩra Ngai na ũrĩa ũtamũtungatagĩra.” (Mal. 3:18) Ũguo nĩguo gwathiire harĩ mwarĩ wa Ithe witũ ũmwe wĩtagwo Kimberly. Arĩ sekondarĩ, nĩ maaheirũo wĩra wa cukuru marĩ na mũirĩtu ũngĩ marutithanie hamwe. Thutha wa kũrutithania wĩra hamwe, mũirĩtu ũcio nĩ oonire atĩ Kimberly aarĩ ngũrani na arutwo arĩa angĩ. Ndaaragia ũũru igũrũ rĩgiĩ andũ arĩa angĩ, aaragia na njĩra ya ũrata, na ndaahũthagĩra mĩario mĩũru. Mũirĩtu ũcio nĩ aagucĩrĩirio nĩ ũndũ ũcio na thutha-inĩ makĩambĩrĩria kwĩruta Bibilia na Kimberly. Jehova nĩ akenaga mũno rĩrĩa twaria na njĩra ĩratũma andũ magucĩrĩrio ũhoro-inĩ wa ma. Ithuothe tũngĩenda kwaragia na njĩra ĩratĩithia Jehova. w22.04 5-6 ¶5-7

Jesu nĩ eehereirie Mariamu Mũmagidali ndaimono mũgwanja iria ciamũthumbũraga! Nĩ aatindĩkirũo nĩ ngatho gũtuĩka ũmwe wa arũmĩrĩri a Jesu na gũteithĩrĩria Jesu ũtungata-inĩ. (Luk. 8:​1-3) O na gũtuĩka Mariamu nĩ aacokirie ngatho mũno nĩ ũrĩa Jesu aamwĩkĩire, no kũhoteke ndaamenyaga atĩ Jesu nĩ angĩamwĩkĩire maũndũ manene makĩria ihinda rĩũkĩte. Nĩ angĩkaaruta muoyo wake “nĩguo mũndũ o wothe ũrĩonanagia wĩtĩkio harĩ we” akaagĩa na muoyo wa tene na tene. (Joh. 3:16) O na kũrĩ ũguo, Mariamu nĩ oonanirie ngatho na njĩra ya gũkorũo arĩ mwĩhokeku harĩ Jesu. Rĩrĩa Jesu aanyarirĩkaga mũtĩ-inĩ, Mariamu aarũgamĩte hau hakuhĩ tondũ nĩ aarũmbũyagia Jesu, na nĩ eendaga kũũmĩrĩria arĩa angĩ. (Joh. 19:25) Thutha wa Jesu gũkua, Mariamu na atumia angĩ erĩ nĩ maarehire mahuti maanungaga wega harĩa Jesu aathikirũo. (Mar. 16:​1, 2) Mariamu nĩ aakeneire mweke wa gũcemania na kwaria na Jesu thutha wake kũriũka, mweke arutwo aingĩ mataagĩire naguo.—Joh. 20:​11-18. w23.01 27 ¶4

Tũtiagĩrĩirũo kũiganĩra tu na ũtungata ũrĩa twatungatĩire Jehova na hau kabere. O na gũtuĩka no tũremwo gwĩka maũndũ maingĩ ta marĩa twekaga na hau kabere, nĩ tũrabatara gũthiĩ na mbere gwĩkĩra kĩyo “wĩra-inĩ wa Mwathani,” na gũikara twarahũkĩte na twĩiguĩte nginya mũthia. (1 Kor. 15:58; Mat. 24:13; Mar. 13:33) No mũhaka tũthathayagie Ngai na kĩyo na ngoro itũ yothe. Ndũmĩrĩri ya Jesu nĩ yoonanirie thĩna ũngĩ warĩ na kĩũngano kĩa Laodikia. Ũthathaiya wao warĩ “mũraru.” Nĩ ũndũ wa kwaga gũcanjamũkĩra maũndũ ma kĩĩroho, Jesu aamerire atĩ maarĩ na “kĩeha na [maarĩ a] kũiguĩrũo tha.” Nĩ maabataraga kuonania kĩyo kĩnene harĩ Jehova na ũthathaiya wake. (Kũg. 3:​16, 17, 19) Tũreruta atĩa? Angĩkorũo kĩyo gitũ nĩ kĩnyihĩte, nĩ tũrabatara kuonania ngatho makĩria harĩ maũndũ mega marĩa twamũkagĩra kuuma kũrĩ Jehova na ithondeka rĩake. (Kũg. 3:18) Tũtingĩenda kũhũthĩra mahinda maitũ maingĩ tũkĩgeria kũgĩa na ũtũũro mwega nginya tũriganĩrũo nĩ maũndũ ma kĩĩroho. w22.05 3-4 ¶7-8

Ihinda-inĩ rĩa mĩaka ngiri nyingĩ, Jehova nĩ akoretwo akĩandĩka ibuku rĩa mwanya. Ibuku rĩu rĩkoragwo na marĩĩtwa ma andũ, mambĩrĩirie na rĩĩtwa rĩa Habili, ũrĩa warĩ mũira wa mbere mwĩhokeku. (Luk. 11:​50, 51) Kuuma hĩndĩ ĩyo, Jehova akoretwo akĩongerera marĩĩtwa ma andũ ibuku-inĩ rĩu, na gũkinyĩria rĩu rĩrĩ na marĩĩtwa milioni nyingĩ. Thĩinĩ wa Bibilia, ibuku rĩu rĩĩtĩtwo “ibuku rĩa kĩririkano,” ‘ibuku rĩa muoyo,’ na ‘gĩkũnjo kĩa muoyo.’ (Mal. 3:16; Kũg. 3:5; 17:8) Ibuku rĩu rĩkoragwo na marĩĩtwa ma andũ arĩa mathathayagia Jehova na gĩtĩo kĩnene na mendete rĩĩtwa rĩake. Nĩ makaagĩa na mweke wa kũheo muoyo wa tene na tene. O na ithuĩ ũmũthĩ, marĩĩtwa maitũ no mandĩkwo ibuku-inĩ rĩu rĩa muoyo tũngĩkũria ũrata wa hakuhĩ hamwe na Jehova, mũthingi-inĩ wa igongona rĩa ũkũũri rĩa Mũrũwe Jesu Kristo. (Joh. 3:​16, 36) Ithuothe, gũtekũmakania kana kĩĩrĩgĩrĩro gitũ nĩ gĩa gũgaathiĩ igũrũ kana nĩ gũgaatũũra gũkũ thĩ, no twende marĩĩtwa maitũ mandĩkwo ibuku-inĩ rĩu. w22.09 14 ¶1-2

Ibuku rĩa Kũguũrĩrio nĩ rĩarĩtie ũhoro wa “ndamathia nene yarĩ na rangi wa mwaki.” (Kũg. 12:3) Ndamathia ĩyo nĩ yarũire na Jesu na araika ake. (Kũg. 12:​7-9) Nĩ ĩtharĩkagĩra andũ a Ngai, na ĩkahe thirikari cia gĩũteti hinya. (Kũg. 12:17; 13:4) Ndamathia ĩyo nũũ? Nĩ “nyoka ĩrĩa ya tene, o we wĩtagwo Mũcukani na Shaitani.” (Kũg. 12:9; 20:2) Nĩwe ũtongoragia thũ icio ingĩ ciothe cia Jehova. Gũgaathiĩ atĩa harĩ ndamathia ĩyo? Kũguũrĩrio 20:​1-3 ĩtaaragĩria atĩ mũraika nĩ agaaikia Shaitani irima-inĩ rĩtarĩ gĩturi, rĩrĩa rĩngĩhaananio na njera. Hĩndĩ ya kĩoho kĩu, Shaitani ‘ndagacoka kũhĩtithia ndũrĩrĩ rĩngĩ o nginya mĩaka 1,000 ĩthire.’ Mũthia-inĩ Shaitani na ndaimono ciake nĩ magaaikio thĩinĩ wa “iria rĩa mwaki na ũbiriti,” na ũguo nĩ kuuga atĩ nĩ makaanangwo na matigacoka gũkorũo kuo rĩngĩ. Ta geria gwĩciria ũrĩa thĩ ĩgaakorũo ĩhaana Shaitani na ndaimono ciake matarĩ kuo! Na githĩ rĩtigaakorũo rĩrĩ ihinda rĩega mũno? w22.05 14 ¶19-20   

Jesu aarutaga wĩra na kĩyo. Rĩrĩa aarĩ mwĩthĩ aarĩ bundi wa mbaũ. (Mar. 6:3) No mũhaka akorũo aciari ake nĩ maakenaga mũno akĩmateithĩrĩria harĩ gũcaria mabataro ma famĩlĩ yao nene. Tondũ Jesu aarĩ mũkinyanĩru nĩ angĩarutire wĩra mũkinyanĩru, na kwoguo no kũhoteke andũ aingĩ nĩ meendaga gũthondekerũo indo nĩwe. No mũhaka akorũo Jesu nĩ aakenagĩra wĩra wake. No o na akĩĩrutanagĩria wĩra-inĩ ũcio, Jesu nĩ aacaragia mahinda ma kũhingia maũndũ ma kĩĩroho. (Joh. 7:15) Thutha ũcio rĩrĩa aahũthagĩra mahinda make mothe wĩra-inĩ wa kũhunjia, eerire athikĩrĩria ake ũũ: “Mũtikarutagĩre wĩra irio iria ithũkaga, ĩndĩ rutagĩrai wĩra irio iria itũũraga nĩ ũndũ wa muoyo wa tene na tene.” (Joh. 6:27) Na hĩndĩ ya Mahunjio ma Jesu ma Kĩrĩma-inĩ, aaugire ũũ: “Mwĩigĩrei mĩthithũ kũrĩa igũrũ.” (Mat. 6:20) Ũũgĩ ũrĩa uumaga kũrĩ Jehova no ũtũteithie gũkorũo na mawoni maigananĩru megiĩ wĩra. Tũrĩ Akristiano nĩ tũrutĩtwo kũruta “wĩra na kĩyo, [na kũrutaga] wĩra mwega.” w22.05 22 ¶9-10

Eunike nĩ aaigĩire Timotheo kĩonereria kĩega. Hatarĩ nganja, Timotheo nĩ oonaga atĩ ciĩko cia mami wao ciatindĩkagwo nĩ wendo wake mũnene harĩ Jehova, na nĩ oonaga atĩ gũtungatĩra Jehova nĩ gwatũmaga mami wao akorũo na gĩkeno. O na ũmũthĩ, atumia aingĩ nĩ mahotete gũteithia andũ a famĩlĩ ciao gũtungatĩra Jehova “hatarĩ kiugo.” (1 Pet. 3:​1, 2) O nawe no ũhote gwĩka ũguo. Nĩ kĩĩ kĩngĩgũteithia? Igaga ũrata waku hamwe na Jehova mbere. (Gũcok. 6:​5, 6) Nĩ wĩimaga maũndũ maingĩ, o ta ũrĩa atumia aingĩ mekaga. Ũkeima mahinda, mbeca, toro, na maũndũ mangĩ nĩguo ũrũmbũiye mabataro ma ciana ciaku. No ndwagĩrĩirũo kũhũthĩra mahinda maingĩ gwĩka maũndũ macio, nginya ũkaga mahinda ma kũrũmbũiya ũrata waku hamwe na Jehova. Ethaga mahinda ma kũhoya ũrĩ wiki, kwĩruta Bibilia, na gũthiĩ mĩcemanio. Ũngĩka ũguo, nĩ ũrĩkĩraga hinya ũrata waku hamwe na Jehova, na ũtuĩke kĩonereria kĩega harĩ famĩlĩ yaku na harĩ andũ arĩa angĩ. w22.04 16 ¶1; 19 ¶12-13

Nĩ tũiguaga tũhooreire ngoro-inĩ nĩ kũmenya atĩ ti ithuĩ twagĩrĩirũo gũtua ũrĩa andũ megũtuĩrũo. Tondũ Jehova nĩwe Mũtuanĩri Ciira Ũrĩa Mũnene, nĩ arutaga wĩra ũcio wa bata. (Rom. 14:​10-12) No tũkorũo na ma atĩ hingo ciothe nĩ arĩtuanagĩra kũringana na ithimi ciake nginyanĩru cia wega na ũũru. (Kĩam. 18:25) Gũtirĩ hĩndĩ angĩka ũndũ ũtarĩ wa ũthingu! Nĩ twĩriragĩria mũno ihinda rĩrĩa Jehova akeeheria biũ maũndũ moru marĩa marehetwo nĩ kwaga gũkinyanĩra kwa andũ na mehia mao. Hĩndĩ ĩyo, ruo ruothe rwa mwĩrĩ na rwa ngoro nĩ rũkaahonio biũ. (Thab. 72:​12-14; Kũg. 21:​3, 4) Rũtikaaririkanwo rĩngĩ. O twetereire ihinda rĩu rĩa magegania rĩkinye, nĩ tũcokagĩria Jehova ngatho nĩ ũndũ wa gũtũhe ũhoti wa kwĩgerekania nake harĩ kuohanĩra. w22.06 13 ¶18-19

Mũtuanĩri ciira ũrĩa mwega nĩ abataraga gũtaũkĩrũo nĩ watho wega. Nĩ agĩrĩirũo gũkorũo na ũmenyo mũnene wĩgiĩ wega na ũũru. Nĩ ũndũ ũrĩkũ ũngĩ mũtuanĩri ciira mwega abataraga kũmenya? Nĩ abataraga gũkorũo oĩ maũndũ mothe megiĩ ciira mũna atanatua itua. Kwoguo Jehova nĩwe Mũtuanĩri Ciira ũrĩa mwega biũ tondũ nĩ akoragwo oĩ maũndũ mothe. Ngũrani na atuanĩri ciira a gũkũ thĩ, Jehova hingo ciothe nĩ akoragwo oĩ ũhoro wothe wĩgiĩ ũndũ mũna. (Kĩam. 18:​20, 21; Thab. 90:8) Ndatuaga ciira kũringana na maũndũ marĩa andũ marona kana makaigua. Nĩ ataũkagĩrũo wega biũ nĩ ũrĩa ciĩko cia mũndũ ikoragwo ciĩhocetie harĩ maũndũ marĩa atũkĩtie kuuma kũrĩ aciari ake, na kuumana na mũrerere wake, gĩthomo, kũrĩa aumĩte, o hamwe na ũhoti wake wa kĩĩmeciria. Ningĩ Jehova nĩ ahotaga gũthoma ngoro. Nĩ ataũkagĩrũo biũ nĩ maũndũ mothe marĩa matũmaga mũndũ eke ũndũ mũna. Gũtirĩ ũndũ Jehova atonaga. (Ahib. 4:13) Kwoguo tondũ Jehova nĩ akoragwo oĩ ũhoro wothe wĩgiĩ ũndũ mũna, nĩ ahotaga kuohanĩra. w22.06 4 ¶8-9

Nĩ twagĩrĩirũo gwĩciria ũhoro wa njĩra iria Shaitani aahũthĩrire akĩgeria Ayubu tondũ nocio ahũthagĩra nginya ũmũthĩ. Shaitani eendaga kuonania atĩ tũtiendete Jehova kuuma ngoro, na atĩ no tũtiganĩrie Jehova angĩkorũo gwĩka ũguo no kũhonokie muoyo witũ. Ningĩ Shaitani oonanirie atĩ Ngai ndatwendete na atĩ ndatindanagĩra na maũndũ marĩa twĩkaga atĩ nĩguo tũmũkenie. Tondũ nĩ tũũĩ muoroto ũrĩa Shaitani akoragwo naguo, tũtiĩtĩkagia maheeni make. Twagĩrĩirũo kuona magerio marĩ mweke wa kwĩmenya wega. Magerio marĩa Ayubu aacemanirie namo, nĩ maamũteithirie kũmenya mawathe marĩa aarĩ namo na kũmarũnga. Ũndũ ũmwe aamenyire nĩ atĩ nĩ aabataraga gũkũria wĩnyihia na gĩkĩro kĩnene makĩria. (Ayub. 42:3) O na ithuĩ no tũmenye maũndũ maingĩ matwĩgiĩ rĩrĩa tũrahĩtũkĩra igerio. Thutha wa kũmenya mawathe maitũ no tũhote kũmarutĩra wĩra. w22.06 23 ¶13-14

Jehova nĩ atwĩrĩire atĩ nĩ arĩtũteithagia. Kwa ngerekano, mbere ya Jehova kuuga: “Inyuĩ nĩ inyuĩ aira akwa,” aambĩte kuuga ũũ: “Rĩrĩa ũkaagerera maĩ-inĩ, nĩ ngaakorũo hamwe nawe, o na wagerera njũũĩ-inĩ, itigagũthereria. Na rĩrĩa ũkaagerera mwaki-inĩ, ndũgaacinwo nĩguo, o na kana ũrĩrĩmbũkĩrũo nĩ rũrĩrĩmbĩ rwaguo.” (Isa. 43:2) Tũkĩhunjia, rĩmwe nĩ tũcemanagia na moritũ matariĩ ta mũiyũro na magerio matariĩ ta mwaki. O na kũrĩ ũguo, Jehova nĩ atũteithagia nĩguo tũthiĩ na mbere kũhunjia. (Isa. 41:13) Andũ aingĩ ũmũthĩ nĩ maregaga ũhoro ũrĩa tũramahunjĩria. No nĩ tũririkanaga atĩ matirarega tondũ tũtiũĩ kũhunjia. Nĩ tũũmagĩrĩrio na tũgekĩrũo hinya nĩ kũmenya atĩ Jehova nĩ akenaga rĩrĩa twathiĩ na mbere kũhunjia ndũmĩrĩri yake tũrĩ ehokeku. Mũtũmwo Paulo aandĩkire ũũ: “O mũndũ akaamũkĩra kĩheo gĩake kũringana na wĩra wake mwene.”—1 Kor. 3:8; 4:​1, 2. w22.11 4 ¶5-6

Mahinda-inĩ maya, nĩ tũrona morathi ma Bibilia makĩhinga. Andũ “kuuma harĩ thiomi ciothe cia ndũrĩrĩ” nĩ mareruta kwaria “rũthiomi rũtheru” rwa ma cia Bibilia. (Zek. 8:23; Zef. 3:9) Andũ makĩria ma 8,000,000 thĩinĩ wa mabũrũri 240 nĩ maranyitanĩra na ithondeka rĩa Jehova, na o mwaka andũ ngiri nyingĩ nĩ mabatithagio. No ũndũ wa bata makĩria o na gũkĩra mũigana ũcio, nĩ ngumo cia Gĩkristiano, kana “ũmũndũ mwerũ,” ũrĩa andũ acio mabatithagio mehumbaga. (Kol. 3:​8-10) Aingĩ ao nĩ maatigire mĩtugo ya ũũra thoni, ngũĩ, mũthutũkanio, na gũtũgĩria bũrũri wao. Ũrathi ũrĩa ũrĩ thĩinĩ wa Isaia 2:​4, ũrĩa uugaga atĩ “matikeruta mbaara rĩngĩ,” nĩ ũrahinga. O ũrĩa tũrerutanĩria kwĩhumba ũmũndũ mwerũ, nĩ tũteithagia andũ gũkuhĩrĩria ithondeka rĩa Jehova na tũkonania atĩ nĩ tũrarũmĩrĩra mũtongoria witũ Jesu Kristo. (Joh. 13:35) Maũndũ macio matiĩkĩkaga o ũguo, no Jesu nĩwe ũtũheaga ũteithio ũrĩa tũrabatara. w22.07 9 ¶7-8

Rĩrĩa tũrahoya Jehova twagĩrĩirũo kuonania gĩtĩo kĩnene. Ta wĩcirie ũhoro wĩgiĩ cioneki cia magegania iria Isaia, Ezekieli, Danieli, na Johana moonire. Ciothe cionanĩtie Jehova arĩ Mũthamaki mũtũũgĩru. Isaia “[oonire] Jehova aikarĩire gĩtĩ kĩa ũnene kĩrĩ handũ igũrũ na gĩtũũgĩrĩtio.” (Isa. 6:​1-3) Ezekieli oonire Jehova aikarĩire ngaari yake ya igũrũ, athiũrũrũkĩirio “nĩ ũtheri mũkengu watariĩ ta wa mũkũnga-mbura.” (Ezek. 1:​26-28) Danieli oonire “Ũrĩa Ũtũũraga Kuuma o Tene” ehumbĩte nguo cia rangi mwerũ, na nĩnĩmbĩ cia mwaki ikiuma gĩtĩ-inĩ gĩake kĩa ũnene. (Dan. 7:​9, 10) Nake Johana akĩona Jehova aikarĩire gĩtĩ kĩa ũnene, gĩthiũrũrũkĩirio nĩ kĩndũ kĩahaanaga ta mũkũnga-mbura watariĩ ta ihiga rĩa emeradi. (Kũg. 4:​2-4) Tũngĩĩcũrania ũrĩa riri wa Jehova ũrĩ mũnene na ũtangĩringithanio na ũngĩ o wothe, nĩ tũrĩririkanaga ũrĩa arĩ mweke wa mwanya kwaranĩria nake kũgerera mahoya na bata wa gwĩka ũguo tũrĩ na gĩtĩo kĩnene. w22.07 20 ¶3

Andũ ethĩ, Shaitani nĩ arĩgeragia gũtũma mũtigathiĩ na mbere gũkũra kĩĩroho. Ũndũ ũmwe angĩhũthĩra gwĩka ũguo, nĩ gũtũma mũgĩe nganja meciria-inĩ manyu igũrũ rĩgiĩ morutani mamwe ma Bibilia. Kwa ngerekano, andũ amwe no magerie kũmũiguithia atĩ indo nĩ kwĩyumĩria cieyumĩririe no ti kũũmbwo ciombirũo. No gũkorũo mũtiaiguĩte ũhoro wĩgiĩ ũrutani ũcio, no rĩu nĩ mũrarutwo mũrĩ cukuru. Maũndũ marĩa arimũ maugaga ma kũnyita mbaru ũrutani wa indo kwĩyumĩria no moneke ta marĩ ma ma. Ĩndĩ no kũhoteke matirĩ mageria gwĩciria na kinyi ũira wĩgiĩ atĩ nĩ kũrĩ Mũũmbi. Ririkanagai ũndũ ũyũ ũgwetetwo thĩinĩ wa Thimo 18:17: “Mũndũ wa mbere kũrehe ciira wake onekaga ta araria ma, o nginya rĩrĩa ũcio ũngĩ arĩũka amũthuthurie.” Handũ ha gwĩtĩkia maũndũ mothe marĩa mũrarutwo cukuru, mwĩrutagei na kinyi ũhoro wa ma ũrĩa ũrĩ Kiugo-inĩ kĩa Ngai o hamwe na mabuku-inĩ maitũ. w22.08 2 ¶2; 4 ¶8

Nĩ twendaga gũtaũkĩrũo nĩ maũndũ marĩa tũrathoma Kiugo-inĩ kĩa Ngai. Tũngĩaga gũtaũkĩrũo, tũtingĩgunĩka biũ kuumana na maũndũ marĩa twathoma. Kwa ngerekano, ta wĩcirie igũrũ rĩgiĩ ndeereti ya Jesu na “mũndũ ũmwe woĩ Watho wega.” (Luk. 10:​25-29) Rĩrĩa mũndũ ũcio aamũririe ũrĩa aabataraga gwĩka nĩguo akoona muoyo wa tene na tene, Jesu aamwerekeirie Kiugo-inĩ kĩa Ngai akĩmũũria: “Kwandĩkĩtwo atĩa thĩinĩ wa Watho? Ũthomaga atĩa?” Mũndũ ũcio nĩ aahotire kũruta macokio marĩa magĩrĩire na njĩra ya kũgweta maandĩko megiĩ kwenda Ngai na kwenda mũndũ ũrĩa mariganĩtie. (Alaw. 19:18; Gũcok. 6:5) No aacokire akĩũria ũũ: “Mũndũ ũrĩa tũriganĩtie nake kũna nũũ?” Mũndũ ũcio nĩ oonanirie atĩ ndaataũkĩirũo biũ nĩ maũndũ marĩa aathomete. Nĩ ũndũ ũcio, ndangĩamenyire ũrĩa angĩahũthĩrire maandĩko macio na njĩra ĩrĩa yagĩrĩire ũtũũro-inĩ wake. Nĩ tũbataraga ũteithio wa Jehova nĩguo tũtaũkĩrũo nĩ Maandĩko, kwoguo no tũmũhoe roho wake mũtheru nĩguo tũhote kũiga meciria maitũ harĩ kĩrĩa tũrathoma. w23.02 9 ¶4-5

“Wamenyire ũhoro wa ma atĩa?” No kũhoteke wanorio kĩũria kĩu maita maingĩ. Nĩ kĩmwe gĩa ciũria cia mbere iria tũragia mũrũ kana mwarĩ wa Ithe witũ rĩrĩa tũramenyana. Nĩ twendete kũigua ũrĩa aarĩ na ariũ a Ithe witũ maamenyire Jehova na makĩmwenda, na nĩ tũkenaga kũmeera ũrĩa twendete ũhoro wa ma. (Rom. 1:11) Tũkĩarĩrĩria maũndũ macio, nĩ tũririkanagio ũrĩa ũhoro wa ma ũrĩ wa bata harĩ ithuĩ. Ningĩ nĩ tũiguaga twĩhotorete o na makĩria “[gũthiĩ] na mbere kũrũmĩrĩra ũhoro ũrĩa wa ma,” na ũguo nĩ kuuga gũtũũra na njĩra ĩretĩkĩrĩka harĩ Jehova na ĩrĩtũrehagĩra irathimo ciake. Tũrĩ na itũmi nyingĩ cia kwenda ũhoro ũrĩa wa ma. Gĩtũmi kĩrĩa kĩnene nĩ atĩ nĩ twendete Jehova Ngai, o we Kĩhumo kĩa ũhoro ũrĩa wa ma. Kũgerera Kiugo gĩake Bibilia, nĩ tũmũmenyete arĩ we Mũũmbi wa igũrũ na thĩ ũrĩa ũrĩ hinya wothe, na arĩ Ithe witũ wa igũrũ ũtwendete, ũrĩa ũtũrũmbũyagia mũno.—1 Pet. 5:7. w22.08 14 ¶1, 3

Mũtũmwo Paulo eekĩrire ngoro aarĩ na ariũ a Ithe kuonanagia wendo kũregera “ciĩko njega.” (Ahib. 10:24) Ndaateithagia aarĩ na ariũ a Ithe o kũgerera ciugo tu, no nĩ nginya na ciĩko. Kwa ngerekano, rĩrĩa Akristiano thĩinĩ wa Judea maagũmĩirũo nĩ ngʼaragu, Paulo nĩ aanyitire itemi harĩ kũmahe ũteithio. (Atũm. 11:​27-30) O na gũtuĩka Paulo nĩ aakoragwo na kĩyo wĩra-inĩ wa kũhunjia na kũrutana, hingo ciothe nĩ aacaragia njĩra cia gũteithia arĩa maarĩ na thĩna wa kuona mabataro mao. Na njĩra ĩyo, nĩ aatũmaga Akristiano arĩa angĩ makorũo na ũũma atĩ Jehova nĩ arĩmarũmbũyagia. Rĩrĩa twerutĩra kũhũthĩra mahinda, hinya, na ũhoti witũ gũteithia arĩa marĩ na ũbataro, nĩ twakaga wĩtĩkio wa aarĩ na ariũ a Ithe witũ. Ningĩ nĩ twĩkaga ũguo na njĩra ya kũruta mĩhothi nĩ ũndũ wa wĩra wa thĩ yothe. Kũgerera njĩra icio na ingĩ, nĩ tũteithagia aarĩ na ariũ a Ithe witũ gũkorũo na mwĩhoko atĩ Jehova gũtirĩ hĩndĩ akaamatiganĩria. w22.08 24 ¶14

Bibilia nĩ ĩkoragwo na morathi maingĩ marĩa mahingĩte, na mamwe mamo maandĩkĩtwo mĩaka magana maingĩ mbere ya mahingĩte. Historĩ nĩ yonanagia atĩ morathi macio nĩ maahingire. Ũndũ ũcio ndũtũgegagia tondũ nĩ tũĩ atĩ Mũtungi wa morathi ma Bibilia nĩ Jehova. Ta wĩcirie ũhoro wĩgiĩ morathi megiĩ kwanagwo gwa itũũra rĩa tene rĩa Babuloni. Karine-inĩ ya kanana Mbere ya Mahinda Maitũ (M.M.M.), mũnabii Isaia nĩ aatongoririo nĩ roho kũratha atĩ itũũra rĩu rĩarĩ na hinya rĩa Babuloni nĩ rĩngĩatooririo. O na nĩ aaugire atĩ mũndũ wetagwo Kurusu nĩwe ũngĩatooririe itũũra rĩu na akĩonania ũrĩa angĩarĩtooririe. (Isa. 44:27–45:2) Ningĩ Isaia nĩ aarathĩte atĩ mũthia-inĩ itũũra rĩa Babuloni nĩ rĩngĩanangirũo biũ na rĩtingĩgaikarũo rĩngĩ. (Isa. 13:​19, 20) Babuloni nĩ yatooririo nĩ Amedi na Aperisia mwaka-inĩ wa 539 M.M.M., na harĩa itũũra rĩu inene rĩarĩ, rĩu no hĩba ya matigari ma itũũra rĩu ĩkoragwo ho. w23.01 4 ¶10

Jehova nĩ atũthuurĩte tũtuĩke a famĩlĩ yake ya athathaiya ya thĩ yothe. Ũcio nĩ mweke wa mwanya mũno na nĩ ũrĩ irathimo nyingĩ. (Mar. 10:​29, 30) Thĩinĩ wa thĩ yothe, nĩ tũkoragwo na aarĩ na ariũ a Ithe witũ arĩa mendete Jehova o ta ithuĩ, na merutanagĩria ũrĩa wothe mangĩhota gũtũũra kũringana na ithimi ciake. Rũthiomi rwitũ, ũndũire witũ, na mwĩhumbĩre witũ no ikorũo irĩ ngũrani, no tũiguaga tũmendete o na angĩkorũo nĩ hĩndĩ twacemania nao riita rĩa mbere. Nĩ tũkenagĩra mũno gũkorũo hamwe nao tũkĩgooca na tũgĩthathaiya Ithe witũ wa igũrũ ũtwendete na nĩ twagĩrĩirũo gũkorũo na ũrũmwe nao. (Thab. 133:1) Rĩmwe nĩ matũteithagia gũkuua mĩrigo itũ. (Rom. 15:1; Gal. 6:2) Ningĩ nĩ matwĩkĩraga ngoro gũthiĩ na mbere gũtungatĩra Jehova na gũikara tũrĩ na hinya kĩĩroho. (Ahib. 10:​23-25) Ta wĩcirie ũrĩa tũngĩigua korũo tũtirĩ na ũgitĩri wa kĩũngano ũrĩa ũtũteithagia gwĩtiiria thũ citũ, nĩcio Shaitani ũrĩa Mũcukani na thĩ yake njũru. w22.09 2-3 ¶3-4

No ũkorũo ũrĩ ũndũ mũritũ kwĩgirĩrĩria rĩrĩa tũrahũthĩra nenda cia ũkinyanĩria. Tũngĩaga kwĩmenyerera, no twĩkore tũkĩheana ũhoro wa hitho kũrĩ andũ aingĩ tũtekũmenya. Na tũngĩheana ũhoro Intaneti-inĩ tũtingĩhota kũgirĩrĩria ũrĩa andũ arĩa angĩ mekũhũthĩra ũhoro ũcio, kana mathĩna marĩa mangiumana na ũhoro ũcio. Kwĩgirĩrĩria ningĩ no gũtũteithie gũkira rĩrĩa akararia matũheenereria tũheane ũhoro ũngĩingĩria aarĩ na ariũ a Ithe witũ ũgwati-inĩ. Ũndũ ũcio no wĩkĩke rĩrĩa tũrahũngwo mahũri nĩ thigari tũrĩ bũrũri-inĩ wĩra witũ ũgirĩtio kana ũgekĩrĩrũo mĩkaana. Hĩndĩ ta ĩyo kana mahinda-inĩ mangĩ, no tũhũthĩre ũtaaro wa ‘kũgiragĩrĩria kanua gaitũ tũgakahumbĩra.’ (Thab. 39:1) Nĩ tũrabatara gũkorũo tũrĩ ehokeku harĩ andũ othe, makorũo marĩ andũ aitũ a famĩlĩ, arata, aarĩ na ariũ a Ithe witũ, kana mũndũ ũngĩ o wothe. Na nĩguo tũkorũo tũrĩ ehokeku nĩ tũrabatara kwĩgirĩrĩria. w22.09 13 ¶16

Nĩguo tũgĩe na gĩkeno kĩa ma, no mũhaka tũrĩage irio cia kĩĩroho. Na nĩ tũcibataraga. Nĩkĩo Jesu aaugire ũũ: “Mũndũ ndatũũragio nĩ mũgate wiki, no nĩ kiugo gĩothe kĩrĩa kiumaga kanua-inĩ ka Jehova.” (Mat. 4:4) Nĩ ũndũ ũcio, tũtiagĩrĩirũo kũreka mũthenya ũhĩtũke tũtarĩte irio cia kĩĩroho kuuma Kiugo-inĩ kĩa Ngai, Bibilia. Tondũ Jehova nĩ atwendete, nĩ atuonetie thĩinĩ wa Bibilia ũrĩa twagĩrĩirũo gwĩka nĩguo tũkorũo na gĩkeno ũtũũro-inĩ. Nĩ twĩrutaga aatũmbire arĩ na muoroto ũrĩkũ. Tũkeruta ũrĩa tũngĩmũkuhĩrĩria na ũrĩa tũrabatara gwĩka nĩguo atuohere mehia maitũ. Na tũkeruta ũhoro wĩgiĩ kĩĩrĩgĩrĩro kĩa magegania kĩrĩa atwĩrĩire kĩa ihinda rĩũkĩte. (Jer. 29:11) Ma icio twĩrutaga kuuma kũrĩ Bibilia nĩ itũmaga ngoro citũ ciyũrũo nĩ gĩkeno. Rĩrĩa rĩothe waigua ũritũhĩirũo nĩ mathĩna ma ũtũũro, hũthagĩra mahinda makĩria gũthoma Kiugo kĩa Jehova na gwĩcũrania igũrũ rĩakĩo. w22.10 7-8 ¶4-6

Bibilia ĩkoragwo na gĩtũmi kĩega gĩa gũtwĩkĩra ngoro tũtigaikare tũtarĩ na ũmenyeru. Tũgĩaga na ũmenyeru ũrĩa wagĩrĩire na njĩra ya kũhũthĩra ithimi cia Bibilia ũtũũro-inĩ witũ. Kahora kahora tũkeyonera ũrĩa ithimi icio iratũteithia gwĩthema mathĩna na igatũteithia gũtua matua mega. Nĩ wega gũthuthuria ũrĩa tũrathiĩ na mbere ũhoro-inĩ ũcio. Angĩkorũo nĩ tũkoretwo tũkĩĩruta Bibilia na gũthiĩ mĩcemanio kwa ihinda, no twĩyũrie kĩrĩa gĩtũmĩte twage gũkorũo tuoete ikinya rĩa kwĩyamũrĩra Jehova na kũbatithio. Angĩkorũo nĩ tũbatithĩtio-rĩ, hihi nĩ tũrerutanĩria gũtuĩka ahunjia ega na arutani ega a ũhoro ũrĩa mwega? Hihi matua maitũ nĩ monanagia atĩ nĩ tũratongorio nĩ ithimi cia Bibilia? Hihi nĩ tuonanagia ngumo cia Gĩkristiano rĩrĩa tũrarũmbũyania na arĩa angĩ? Tũngĩona handũ tũrabatara kwagagĩria, twagĩrĩirũo gwĩciria na njĩra ndikĩru ũhoro wĩgiĩ iririkania cia Jehova iria ‘itũmaga mũndũ ũtarĩ na ũmenyeru agĩe na ũũgĩ.’—Thab. 19:7. w22.10 20 ¶8

Ezekieli nĩ eeyoneire ũrĩa roho wa Ngai ũrĩ hinya mũingĩ. Kũgerera kĩoneki nĩ oonire roho mũtheru ũgĩtongoria ciũmbe irĩ hinya cia roho na ũgĩtongoria magũrũ manene ma ngaari ya igũrũ. (Ezek. 1:21) Hihi Ezekieli eekire atĩa? Aandĩkire ũũ: “Rĩrĩa ndawonire, ngĩĩgũithia ngĩturumithia ũthiũ thĩ.” Ezekieli nĩ aamakire mũno nginya akĩĩgũithia thĩ. (Ezek. 1:28) Thutha ũcio, rĩrĩa rĩothe Ezekieli eecũranagia kĩoneki kĩu kĩa magegania, no mũhaka gũkorũo ũndũ ũcio nĩ wamũteithagia kũgĩa na ma atĩ no ahote kũhingia ũtungata wake agĩteithio nĩ roho wa Ngai. Jehova eerire Ezekieli ũũ: “Mũrũ wa mũndũ, rũgama na magũrũ maku nĩguo njarie nawe.” Ciugo icio o hamwe na roho wa Ngai nĩ ciekĩrire Ezekieli hinya ũrĩa aabataraga nĩguo ahote kũrũgama. (Ezek. 2:​1, 2) Thutha ũcio na hĩndĩ ya ũtungata wake wothe, Ezekieli aatongoragio nĩ “guoko” kwa Ngai, na nĩ kuo roho mũtheru wa Ngai.—Ezek. 3:22; 8:1; 33:22; 37:1; 40:1. w22.11 4 ¶7-8

Mũhari-inĩ ũcio, mũnabii Isaia onanĩtie Jehova atariĩ ta mũrutani ũrĩ maitho ũrathiĩ arĩ thutha wa arutwo ake akĩmonereria njĩra ĩrĩa magĩrĩirũo kũgera. Mahinda-inĩ maya nĩ tũiguaga mũgambo wa Ngai ũrĩ thutha witũ. Na njĩra ĩrĩkũ? Ngai aandĩkithirie ciugo ciake iria irĩ thĩinĩ wa Bibilia tene, ihinda iraihu ihĩtũku. Kwoguo rĩrĩa tũrathoma Bibilia nĩ ta tũkoragwo tũkĩigua mũgambo wa Ngai ũkiuma thutha witũ. (Isa. 51:4) Tũngĩka atĩa tũgunĩke biũ kuumana na ũtongoria ũrĩa Jehova atũheaga? Ta rora maũndũ maya merĩ Isaia aagwetire. Wa mbere nĩ, “ĩno nĩyo njĩra.” Wa kerĩ nĩ, “gerai thĩinĩ wayo.” Kwoguo kũmenya “njĩra” ti kũiganu. Nĩ tũrabatara “kũgera thĩinĩ wayo.” Kũgerera Kiugo kĩa Jehova na ũrĩa gĩtaaragĩrio nĩ ithondeka rĩake, nĩ tũhotaga kũmenya maũndũ marĩa Jehova endaga twĩke. Ningĩ nĩ twĩrutaga ũrĩa tũngĩhũthĩra maũndũ marĩa twathoma. Nĩguo tũhote gũkirĩrĩria tũrĩ na gĩkeno tũgĩtungatĩra Jehova, nĩ tũrabatara gwĩka maũndũ macio merĩ. Tũngĩka ũguo, norĩo tu tũngĩamũkĩra irathimo cia Jehova. w22.11 10-11 ¶10-11

Kahinda kanini thutha wa atũmwo aingĩ a Jesu gũkua, nĩ kwagĩire na Akristiano a maheeni thĩinĩ wa kĩũngano. (Mat. 13:​24-27, 37-39) Maaragia “maũndũ mahĩtanu nĩguo magucĩrĩrie arutwo mamarũmĩrĩre.” (Atũm. 20:30) ‘Ũndũ ũmwe mũhĩtanu’ Akristiano acio a maheeni maambĩrĩirie kũrutana, nĩ atĩ Jesu ndaarutire mwĩrĩ wake “riita rĩmwe rĩa kũigana nĩguo akuue mehia ma andũ aingĩ,” ta ũrĩa Bibilia yugaga. Handũ ha ũguo, maarutanaga atĩ igongona rĩake rĩagĩrĩirũo kũrutagwo maita maingĩ. (Ahib. 9:​27, 28) Andũ aingĩ ũmũthĩ nĩ metĩkĩtie ũrutani ũcio wa maheeni. Mathiaga kanitha-inĩ o kiumia, na rĩngĩ magathiĩ o mũthenya nĩguo makũngũĩre igongona rĩa Jesu rĩrĩa kanitha ya Gatoreki ĩtaga “Igongona rĩa Mitha.” Ndini ingĩ nacio itikũngũyagĩra gĩkuũ kĩa Jesu maita maingĩ, no arũmĩrĩri aingĩ a ndini icio matitaũkagĩrũo wega nĩ ũguni wa igongona rĩa Jesu. w23.01 21 ¶5

Hĩndĩ ya Wathani wa Mĩaka Ngiri wa Jesu, andũ arĩa akuũ nĩ makaariũkio, na andũ arĩa athĩki nĩ magaateithio gũtuĩka akinyanĩru. Andũ arĩa Jehova akauga atĩ nĩ athingu “nĩ makaagaya thĩ, na magaatũũra thĩinĩ wayo tene na tene.” (Thab. 37:​10, 11, 29) Na ũndũ wa gũcanjamũra nĩ atĩ ‘thũ ya mũico, nĩyo gĩkuũ, nĩ ĩkaaniinwo.’ (1 Kor. 15:26) Kĩĩrĩgĩrĩro gitũ gĩa gũtũũra tene na tene kĩĩhocetie biũ harĩ Kiugo kĩa Ngai. Kĩĩrĩgĩrĩro kĩu nĩ gĩtũteithagia gũikara tũrĩ ehokeku matukũ-inĩ maya maritũ ma kũrigĩrĩria. Ĩndĩ nĩguo tũkenie Jehova, tũtiagĩrĩirũo kũmũtungatĩra nogetha tũgaatũũra tene na tene. Wendo witũ mũnene harĩ Jehova na Jesu, nĩguo ũndũ ũrĩa mũnene ũbatiĩ gũtũma tũkorũo tũrĩ ehokeku harĩ o. (2 Kor. 5:​14, 15) Wendo ũcio nĩguo ũtũmaga twĩgerekanie nao na ũgatũtindĩka kũhunjĩria andũ arĩa angĩ igũrũ rĩgiĩ kĩĩrĩgĩrĩro gitũ. (Rom. 10:​13-15) Rĩrĩa tweruta gũkorũo tũtarĩ na mwĩyendo na tũrĩ ataana, nĩ tũtuĩkaga andũ arĩa Jehova angĩenda matuĩke arata ake tene na tene. w22.12 6-7 ¶15-16

Kũnyarirũo no gũtwehererie maũndũ maingĩ marĩa matũrehagĩra thayũ. No tũigue tũgĩtangĩka, na tũrigwo nĩ ũndũ ũrĩa ũgũcoka ũrũmĩrĩre. Ti ũũru kũigua ũguo. No nĩ twagĩrĩirũo kwĩmenyerera. Jesu oonanirie atĩ kũnyarirũo no gũtũme arĩa mamũrũmagĩrĩra mahĩngĩke. (Joh. 16:​1, 2) O na gũtuĩka Jesu nĩ aatwĩrire no twĩrĩgĩrĩre kũnyarirũo, nĩ aatũheire ũũma wa atĩ no tũhote gũikara tũrĩ ehokeku. (Joh. 15:20; 16:33) Wĩra witũ ũngĩhũũrũo marubuku kana wĩkĩrĩrũo mĩkaana, no twamũkĩre motaaro kuuma kũrĩ wabici ya rũhonge na kuuma kũrĩ athuri a kĩũngano. Muoroto wa motaaro macio nĩ gũtũgitĩra, gũtigĩrĩra atĩ nĩ tũramũkĩra irio cia kĩĩroho, na gũtũteithia tũthiĩ na mbere kũhunjia o na kũrĩ na moritũ. Ĩka ũrĩa wothe ũngĩhota wathĩkĩre ũtongoria ũrĩa tũraheo. (Jak. 3:17) Ningĩ ndũkanaheane ũhoro wĩgiĩ aarĩ na ariũ a Ithe witũ kũrĩ andũ arĩa matagĩrĩire kũheo ũhoro ũcio.—Koh. 3:7. w22.12 20-21 ¶14-16

Ihinda-inĩ rĩrĩ, Jesu no arathiĩ na mbere gũtongoria arutwo ake makĩhunjia ũhoro wa Ũthamaki wa Ngai thĩinĩ wa thĩ yothe. Nĩ arahingia kĩĩranĩro gĩake. Kũgerera ithondeka rĩa Jehova, Jesu nĩ atũmenyeragia ũrĩa tũngĩhunjia, na agatũhe indo iria tũrabatara cia kũhunjia ũhoro ũrĩa mwega. (Mat. 28:​18-20) Tũhingagia itemi ritũ na njĩra ya kwĩrutanĩria kũhunjĩria andũ na kũmaruta, na gũikara twĩiguĩte o twetereire Jehova arehe mũthia wa mũtabarĩre ũyũ mũũru wa maũndũ. Tũngĩrũmĩrĩra ũtaaro wa Ahibirania 6:​11, 12, nĩ tũrĩhotaga kũrũmia kĩĩrĩgĩrĩro gitũ “o nginya mũthia.” Jehova nĩ atuĩte mũthenya na thaa iria akaaniina mũtabarĩre ũyũ wa Shaitani. Rĩrĩa mũthenya ũcio ũgaakinya, Jehova hatarĩ nganja nĩ akaahingia morathi marĩa andĩkithĩtie Kiugo-inĩ gĩake. Ihinda-inĩ rĩrĩ, rĩmwe na rĩmwe no tuone ta mũthia wa mũtabarĩre ũyũ ũikarire mũno ũgĩgakinya. O na kũrĩ ũguo, mũthenya wa Jehova ‘ndũgaacererũo!’ (Hab. 2:3) Kwoguo rekei tũtue itua rĩa ‘gũikaraga tũcũthĩrĩirie Jehova,’ na kuonanagia “mwerekera wa gweterera Ngai wa ũhonokio” witũ.—Mik. 7:7. w23.02 19 ¶15-16

Mũndũ akĩambata kĩrĩma, muoroto wake ũkoragwo ũrĩ gũkinya gacũmbĩrĩ. O na kũrĩ ũguo, o akĩambataga nĩ kũrĩ kũndũ kũingĩ angĩamba kũrũgama erorere ũthaka wa ũũmbi. O ũndũ ũmwe na ũcio, caragia ihinda rĩa gũtithia na gwĩciria ũrĩa Jehova agũteithĩtie ũgaacĩre o na rĩrĩa ũragerera ũndũ mũritũ. Hĩndĩ ciothe mũthenya wathira, wĩyũragie ũũ: ‘Jehova andathimĩte atĩa ũmũthĩ? Jehova arandeithia atĩa gũkirĩrĩria o na ngĩgeragĩra ũndũ mũritũ?’ Roraga wone kana no ũkũũrane ũrĩa Jehova ekĩte gũgũteithia, o na angĩkorũo no ũndũ ũmwe. Nĩ ma, no ũkorũo ũkĩhoya wehererio ũndũ mũna mũritũ ũragerera. (Afil. 4:6) No ningĩ nĩ twagĩrĩirũo kũroraga irathimo iria tũrĩ nacio rĩu. Jehova nĩ atwĩrĩire atĩ nĩ arĩtũheaga hinya na agatũteithia gũkirĩrĩria. Kwoguo hĩndĩ ciothe koragwo na ngatho tondũ Jehova nĩ aragũteithia. Weka ũguo nĩ ũrĩonaga ũrĩa Jehova aragũteithia ũgaacĩre o na rĩrĩa ũragerera moritũ.—Kĩam. 41:​51, 52. w23.01 19 ¶17-18

Wĩyũrie ũũ: ‘Hihi mũtũũrĩre wakwa nĩ wonanagia atĩ nĩ ndĩrataũkĩrũo mũthia wa mũtabarĩre ũyũ wa maũndũ wĩ hakuhĩ mũno? Hihi matua makwa megiĩ gĩthomo na wĩra nĩ monanagia atĩ gũtungatĩra Jehova nĩkuo ũndũ ũrĩa wa bata makĩria ũtũũro-inĩ wakwa? Hihi nĩ ngoragwo na wĩtĩkio atĩ Jehova nĩ ekũhingĩria mabataro makwa na ma famĩlĩ yakwa?’ Jehova nĩ akenaga mũno rĩrĩa ona nĩ tũrerutanĩria gwĩka wendi wake maũndũ-inĩ mothe. (Mat. 6:​25-27, 33; Afil. 4:​12, 13) Nĩ tũrabatara gũikara tũgĩthuthuragia mwĩcirĩrie witũ kaingĩ na tũgeka mogarũrũku marĩa mangĩbatarania. Paulo eerire Akorintho ũũ: “Ikaragai mũkĩĩgeragia kana mũrĩ thĩinĩ wa wĩtĩkio; ikaragai mũgĩĩthuthuragia ũrĩa mũtariĩ kũna.” (2 Kor. 13:5) Kwoguo nĩ twagĩrĩirũo gũthiĩ na mbere kũgarũrĩra meciria maitũ na njĩra ya gũthoma Kiugo kĩa Ngai, tũkeruta gwĩciria ta ũrĩa Jehova eciragia, na tũgacoka tũgeka mogarũrũku marĩa marabatarania nĩguo tũmũkenie.—1 Kor. 2:​14-16. w23.01 9-10 ¶5-6