Oktomba

Ithuothe no tũnyitanĩre mĩcemanio-inĩ na njĩra ya kũina hamwe na kũruta macokio mahaarĩrie wega. Andũ amwe nĩ maritũhagĩrũo kũina kana kwaria mbere ya andũ. Hihi ũguo nĩguo ũiguaga? Angĩkorũo nĩ ũiguaga ũguo, ta wĩcirie ũrĩa andũ amwe mekaga nĩguo matoorie guoya wao. Ũhoro-inĩ wĩgiĩ kũina, andũ amwe nĩ monete atĩ kũina kuuma ngoro nĩ gũteithagia. Rĩrĩa tũraina nyĩmbo citũ cia Ũthamaki, gĩtũmi kĩrĩa kĩnene gĩkoragwo arĩ kũgooca Jehova. Kwoguo haaragĩria nyĩmbo iria ikũinwo mĩcemanio-inĩ ũrĩ mũciĩ, o ta ũrĩa ũhaaragĩria icunjĩ ingĩ cia mĩcemanio, na ũkageria kũrora ũrĩa ciugo cia nyĩmbo ciratwarana na kĩrĩa gĩkwarĩrĩrio. Ningĩ wĩciragie mũno ũhoro wa ciugo cia nyĩmbo na ndũgatindanĩre mũno na mũinĩre waku. Andũ amwe nĩ maritũhagĩrũo kũruta macokio. Nĩ kĩĩ kĩngĩgũteithia? Wĩrutanĩrie kũrutaga macokio kaingĩ. Ririkanaga atĩ hatirĩ thĩna angĩkorũo macokio maku megũkorũo me makuhĩ, me na ciugo hũthũ, na ma ĩmwe kwa ĩmwe. Jehova nĩ akenaga mũno rĩrĩa twerutanĩria kũmũgooca mĩcemanio-inĩ ya kĩũngano. w22.04 7-8 ¶12-15

Kiugo “mũndeithia” kana ‘mũteithia’ kĩonanagia mũndũ ũratengʼera nĩguo agateithie mũndũ ũrarĩra akĩhoya ũteithio. Ta hũũra mbica Jehova atengʼerete nĩguo agateithie mũndũ ũrahoya ũteithio. Hatarĩ nganja ũndũ ũcio ũronania atĩ Jehova nĩ akoragwo ehaarĩirie na arĩ na wendi mũnene wa gũtũteithia. Tũrĩ na ũteithio wa Jehova, no tũhote gũkirĩrĩria magerio tũrĩ na gĩkeno. Nĩ njĩra irĩkũ imwe Jehova atũteithagia nacio? Nĩguo tuone macokio, reke tũthome mĩhari ĩmwe thĩinĩ wa ibuku rĩa Isaia. Gĩtũmi nĩ tondũ morathi maingĩ marĩa Jehova aaguũrĩirie Isaia no mateithie ndungata cia Ngai ũmũthĩ. Ningĩ Isaia agĩtaarĩria ũhoro wa Jehova, kaingĩ ahũthagĩra ciugo tũngĩtaũkĩrũo nĩcio na njĩra hũthũ. Ngerekano ĩmwe nĩ Isaia mũrango wa 30. Thĩinĩ wa mũrango ũcio, Isaia ahũthĩrĩte ngerekano njega irataarĩria ũrĩa Jehova ateithagia andũ ake (1) na njĩra ya gũtũthikĩrĩria na kinyi na gũcokia mahoya maitũ, (2) na njĩra ya gũtũhe ũtongoria, na (3) na njĩra ya gũtũrathima mahinda-inĩ maya na mahinda marĩa maroka. w22.11 8 ¶2-3

Ndũmĩrĩri-inĩ cia Jesu kũrĩ kĩũngano gĩa Simurina na kĩa Filadefia, eerire Akristiano thĩinĩ wa ciũngano icio matigetigĩre kũnyarirũo, tondũ maikara marĩ ehokeku nĩ makaaheo ngerenwa. (Kũg. 3:10) No mũhaka twĩrĩgĩrĩre kũnyarirũo na tũkoragwo twĩhaarĩirie gũkirĩrĩria. (Mat. 24:​9, 13; 2 Kor. 12:10) Ibuku rĩa Kũguũrĩrio nĩ rĩonanagia atĩ andũ a Ngai nĩ mangĩkanyarirũo hĩndĩ ya “mũthenya wa Mwathani,” na nĩmo matukũ maya tũratũũra. (Kũg. 1:10) Ibuku rĩa Kũguũrĩrio mũrango wa 12 nĩ rĩgwetaga atĩ mbaara nĩ yaumĩrire kũrĩa igũrũ rĩrĩa Ũthamaki wa Ngai wahandirũo. Jesu Kristo, ũrĩa nĩwe Mikaeli, hamwe na mbũtũ ciake nĩ maarũire na Shaitani na ndaimono ciake. (Kũg. 12:​7, 8) Thũ icio cia Ngai nĩ ciahootirũo na ikĩharũrũkio gũkũ thĩ kũrĩa ithiaga na mbere kũrehera andũ mathĩna maingĩ.—Kũg. 12:​9, 12. w22.05 5 ¶12-13

Hingo ciothe Jehova atuanagĩra ciira na njĩra ya kĩhooto. Ndakoragwo na mũthutũkanio o na hanini. Jehova akĩohera mũndũ ndaroraga ũrĩa atariĩ, ũtonga wake, igweta, kana ũhoti wake. (1 Sam. 16:7; Jak. 2:​1-4) Gũtirĩ mũndũ ũngĩtindĩkĩrĩria Jehova gwĩka ũndũ o wothe kana amũhe ihaki. Matua make matiumanaga na marakara kana kũhingwo maitho nĩ tha ciake na wendo wake. (Tham. 34:7) Hatarĩ nganja, Jehova nĩwe Mũtuanĩri Ciira ũrĩa mwega biũ tondũ nĩ ataũkagĩrũo nĩ ũhoro wothe ũtwĩgiĩ na ũrĩa maũndũ maitũ mahaana. (Gũcok. 32:4) Andĩki a Maandĩko ma Kĩhibirania nĩ maataũkĩirũo atĩ wohanĩri wa Jehova ũkoragwo ũrĩ ngũrani na wa andũ. Kũndũ kũmwe mahũthĩrĩte kiugo gĩa Kĩhibirania kĩrĩa gĩtaarĩirio nĩ ibuku rĩmwe atĩ “kĩhũthĩkaga o rĩrĩa tu kĩrataarĩria wohanĩri wa Ngai harĩ mwĩhia, no gĩtingĩhũthĩrũo gũtaarĩria wohanĩri wa gĩkĩro gĩa thĩ ũrĩa mũndũ ohagĩra mũndũ ũrĩa ũngĩ naguo.” No Jehova tu ũrĩ na ũhoti wa kuohera mũndũ biũ angĩkorũo nĩ erirĩte. w22.06 4 ¶10-11

Angĩkorũo ũrarera ciana ciaku ũrĩ wiki kana thĩinĩ wa famĩlĩ ĩgayũkanĩte kĩndini, koragwo na ma atĩ kĩonereria gĩaku kĩa wĩhokeku nĩ gĩkĩraga arĩa angĩ ngoro. Ĩ ũngĩona mwana waku ta ataroya makinya marĩa magĩrĩire o na wĩrutanĩirie kũmũteithia? Ririkana atĩ kũmenyeria mwana nĩ kuoyaga ihinda. Rĩrĩa wahanda mbeũ, rĩmwe no ũrigwo kana kũrĩ hĩndĩ mbeũ ĩyo ĩgaakũra na ĩtuĩke mũmera ũraruta maciaro. O na gũtuĩka ndũngĩkorũo na ma kana mũmera ũcio nĩ ũgaakorũo na maciaro, no ũthiaga na mbere kũũitĩrĩria maĩ nĩguo ũũteithie gũthiĩ na mbere gũkũra. (Mar. 4:​26-29) Na njĩra o ta ĩyo, ũrĩ mũciari rĩmwe no ũrigwo kana kĩyo gĩaku nĩ gĩgũteithia ciana ciaku kwenda Jehova. Ndũngĩhota kũgirĩrĩria matua marĩa ciana ciaku igũtua. No ũngĩthiĩ na mbere gwĩka ũrĩa wothe ũngĩhota nĩguo ũcimenyerie, nĩ ũrĩciheaga mweke mwega wa gũkũra kĩĩroho. w22.04 19-20 ¶16-17

Rĩrĩa Suleimani aarĩ mwĩhokeku harĩ Jehova, nĩ aakoragwo na mawoni maigananĩru kwĩyerekera. Arĩ mũnini, nĩ eetĩkagĩra atĩ harĩ maũndũ atangĩhota kũhingia na akahoya ũteithio wa Jehova. (1 Ath. 3:​7-9) Ningĩ kĩambĩrĩria-inĩ kĩa wathani wake, nĩ oonire ũgwati wa mũndũ gũkorũo arĩ na mwĩtĩo. Ũndũ wa kĩeha nĩ atĩ, thutha ũcio Suleimani ndaarũmĩrĩire ũtaaro ũcio. Thutha wa gũthamaka kwa ihinda, nĩ aakũririe mwĩtĩo na akĩambĩrĩria kwaga gũtindanĩra na maathani ma Ngai. Kwa ngerekano, watho ũmwe waugĩte atĩ mũthamaki Mũhibirania “ndagĩrĩirũo kũhikia atumia aingĩ, nĩgetha ngoro yake ndĩkanagarũrũke.” (Gũcok. 17:17) Suleimani nĩ aagire gwathĩkĩra watho ũcio na akĩhikia atumia 700 na thuriya 300. (1 Ath. 11:​1-3) No kũhoteke Suleimani eeciragia atĩ gũtirĩ ũndũ ũngĩahĩtanire. No thutha-inĩ Suleimani nĩ aagĩire na maumĩrĩro moru nĩ ũndũ wa kwaga gwathĩkĩra Jehova.—1 Ath. 11:​9-13. w22.05 23 ¶12

Andũ othe ũmũthĩ marĩ na itua rĩa bata marabatara gũtua. Nĩ marabatara gũtua kana mekũnyita mbaru Jehova Ngai arĩ we ũrĩ na kĩhooto gĩa gũkorũo arĩ Mwathani igũrũ na thĩ, kana mekũnyita mbaru thũ yake, nĩwe Shaitani ũrĩa Mũcukani. O mũndũ no nginya athuure mwena ũmwe, no ndangĩikara hau gatagatĩ. Itua rĩrĩa megũtua, nĩrĩo rĩgaatũma mone muoyo wa tene na tene kana morũo nĩguo. (Mat. 25:​31-33, 46) Hĩndĩ ya ‘thĩna ũrĩa mũnene’ nĩrĩo andũ mageekĩrũo rũũri rwa kũhonoka kana rwa kũniinwo. (Kũg. 7:14; 14:​9-11; Ezek. 9:​4, 6) Angĩkorũo ũthuurĩte kũnyita mbaru wathani wa Jehova, nĩ ũtuĩte itua rĩa ũũgĩ. Rĩu ũrĩ na wendi wa gũteithia andũ arĩa angĩ gũtua itua rĩrĩa rĩega. Andũ arĩa manyitaga mbaru wathani wa Jehova marĩ na wĩhokeku nĩ makoona irathimo. Nĩ twagĩrĩirũo gũthuthuria ma ta icio cia bata. Gwĩka ũguo nĩ kũrĩkĩraga hinya itua ritũ rĩa gũthiĩ na mbere gũtungatĩra Jehova. Ningĩ no tũhũthĩre maũndũ marĩa twĩrutĩte gũteithia andũ arĩa angĩ gũtua itua rĩrĩa rĩagĩrĩire na kũrĩrũmia. w22.05 15 ¶1-2

Twagĩrĩirũo gũthikĩrĩria Jehova no ti thũ citũ. Ayubu nĩ aathikĩrĩirie rĩrĩa Jehova aamwaragĩria. Ngai nĩ ooririe Ayubu ciũria nĩguo amũteithie kuona ũrĩa aamũrũmbũyagia, ũrĩa aamenyaga maũndũ marĩa mothe Ayubu aageragĩra, na ũrĩa atangĩaremirũo nĩ kũmũrũmbũiya. Ayubu arĩ na wĩnyihia na arĩ na ngatho nyingĩ harĩ wega wa Jehova aaugire ũũ: “Matũ makwa nĩ maiguĩte ũhoro waku, no rĩu nĩ nguonete na maitho makwa.” (Ayub. 42:5) No kũhoteke Ayubu akiuga ciugo icio aaikarĩte thĩ o mũhu-inĩ, aiyũire ironda mwĩrĩ. O na kũrĩ ũguo, Jehova nĩ aatĩtĩrithirie wendo wake harĩ Ayubu na akĩmuonia atĩ no aamwĩtĩkĩrĩte. (Ayub. 42:​7, 8) O na ũmũthĩ andũ no matũrume na matwĩke maũndũ maronania ta tũtarĩ kĩene. No magerie gũtũthũkĩria rĩĩtwa tũrĩ mũndũ ũmwe ũmwe, kana tũrĩ ithondeka rĩa Jehova. Rũgano rwa Ayubu nĩ rũtũrutaga atĩ Jehova nĩ akoragwo na ma atĩ no tũtũũrie wĩhokeku witũ o na rĩrĩa tũrahĩtũkĩra magerio. w22.06 23-24 ¶15-16

O na gũtuĩka nĩ gũgaakorũo na mbugĩrĩrio nene ya gĩkeno kũrĩa igũrũ rĩrĩa Babuloni Ũrĩa Mũnene akaanangwo, nĩ harĩ ũndũ ũngĩ ũkaarehe gĩkeno kĩnene. (Kũg. 19:​1-3) Nĩguo ũndũ ũrĩa wa bata mũno ũgwetetwo thĩinĩ wa ibuku rĩa Kũguũrĩrio—“ũhiki wa Gatũrũme.” Arĩa 144,000 magaakorũo igũrũ ihinda inini mbere ya mbaara ya Hari–Magedoni kũrũo. O na kũrĩ ũguo, rĩu tirĩo ihinda rĩrĩa ũhiki wa Gatũrũme ũgeekĩka. (Kũg. 21:​1, 2) Ũhiki wa Gatũrũme ũgeekĩka thutha wa mbaara ya Hari–Magedoni kũrũo na thũ ciothe cia Ngai kũniinwo. (Thab. 45:​3, 4, 13-17) Gũgaathiĩ atĩa hĩndĩ ya ũhiki wa Gatũrũme? O ta ũrĩa ũhiki ũnyitithanagia mũthuri na mũtumia, no taguo ũhiki ũyũ wa mũhaano ũkaanyitithania Jesu Kristo arĩ we Mũthamaki na “mũhiki” wake, nĩwe arĩa 144,000. Kũnyitithanio kũu nĩkuo gũgaathondeka thirikari njerũ, ĩrĩa ĩgaathana gũkũ thĩ mĩaka 1,000.—Kũg. 20:6. w22.05 17 ¶11-13

Jesu aarathĩte atĩ matukũ-inĩ ma mũthia, nĩ angĩkaamũra “ngombo ĩrĩa njĩhokeku na njũgĩ” nĩguo ĩheanage irio cia kĩĩroho. (Mat. 24:45) Na ũguo nĩguo ĩkoretwo ĩgĩka. Mũtongoria witũ nĩ akoretwo akĩhũthĩra gakundi kanini ka arũme aitĩrĩrie maguta kũhe andũ a Ngai na andũ arĩa makenagio nĩ ũhoro “irio [cia kĩĩroho] ihinda rĩrĩa rĩagĩrĩire.” Arũme acio matiĩyonaga marĩ athani igũrũ rĩa wĩtĩkio wa andũ arĩa angĩ. (2 Kor. 1:24) Handũ ha ũguo, nĩ mamenyaga atĩ Jesu Kristo nĩwe “mũtongoria na mũnene” wa andũ ake. (Isa. 55:4) Kuuma mwaka wa 1919, ngombo ĩrĩa njĩhokeku nĩ ĩkoretwo ĩkĩhaarĩria mabuku matiganĩte ma gũteithia arĩa maroka ũhoro-inĩ wa ma kwambĩrĩria kwĩruta Bibilia. Mwaka-inĩ wa 1921, ngombo ĩyo nĩ yarutire ibuku rĩa The Harp of God rĩa gũteithia arĩa maakenagio nĩ ũhoro kũmenya morutani ma mũthingi ma Bibilia. O ũrĩa mahinda maathiaga, noguo kwarutirũo mabuku mangĩ. Nĩ ibuku rĩrĩkũ rĩagũteithirie kũmenya Ithe witũ wa igũrũ na kũmwenda? w22.07 10 ¶9-10

Gũtirĩ mũndũ ũngĩ mũtaana ta Jehova. Gũtekũmakania kĩrĩa gĩothe tũngĩmũhee, hingo ciothe atũrĩhaga na njĩra nene makĩria. (Mar. 10:​29, 30) No akũhe ũtũũro ũrĩa mwega biũ ũrĩ na gĩkeno na irathimo nginya thĩinĩ wa thĩ ĩno njũru. Na kĩu no kĩambĩrĩria. No ũtũũre ũtungatagĩra Ithe witũ wa igũrũ tene na tene. Ũrata wanyu na Jehova nĩ ũgũthiĩ na mbere kuongerereka, na no ũtũũre ihinda rĩrĩa rĩothe egũtũũra, ũguo nĩ kuuga tene na tene. Rĩrĩa woya ikinya rĩa kwĩyamũrĩra Jehova na kũbatithio, nĩ ũgĩaga na mweke wa kũmũhe kĩndũ kĩa goro mũno. Nĩ akũheete indo ciothe njega, na maũndũ marĩa mothe ũkenagĩra, na marĩa mothe wanakenera. O nawe no ũhe Mwene igũrũ na thĩ kĩndũ atakoragwo nakĩo—ũtungata waku wa kwĩyendera na wa kuuma ngoro. (Ayub. 1:8; 41:11; Thim. 27:11) Hatarĩ nganja, gũtirĩ ũndũ ũngĩ mwega gũkĩra ũcio ũngĩka na ũtũũro waku. w23.03 6 ¶16-17

Mĩaka-inĩ ya ũtinĩnja, merirĩria ma ngomanio makoragwo me na hinya mũno, na no ũhatĩkwo kwĩingĩria ngomanio-inĩ itagĩrĩire. Shaitani angĩenda ũhingie merirĩria macio. Nĩ kĩĩ kĩngĩgũteithia gũtooria igerio rĩu? (1 Thes. 4:​3, 4) Rĩrĩa ũrahoya, itũrũrĩra Jehova ngoro yaku. Mwĩre ũrĩa ũraigua, na ũmũrie akũhe hinya. (Mat. 6:13) Ririkanaga atĩ Jehova endaga gũgũteithia no ti gũgũtuĩra. (Thab. 103:​13, 14) Ndũkageragie kũhiũrania na mathĩna maku ũrĩ wiki. Aragia na aciari aku igũrũ rĩgiĩ maũndũ marĩa maratũma ũtangĩke. Ti ũndũ mũhũthũ kwaria igũrũ rĩgiĩ maũndũ ta macio, no nĩ ũndũ wa bata gwĩka ũguo. Ũngĩthomaga Bibilia na ũgecũrania motaaro mayo, nĩ ũrĩkoragwo ũrĩ ũndũ mũhũthũ harĩ we gũtua matua marakenia Jehova. Nĩ ũrĩonaga atĩ ndũrabatara mawatho megiĩ kaũndũ o gothe, tondũ nĩ ũrĩkoragwo ũtaũkĩirũo nĩ ũrĩa Jehova onaga maũndũ. w22.08 5 ¶10-12

Mũkristiano nĩ oyaga na ũritũ wĩra wa kũrũmbũiya mabataro ma famĩlĩ yake angĩkorũo nĩwe kĩongo kĩa famĩlĩ. Angĩkorũo ũrĩ kĩongo kĩa famĩlĩ, no ũkorũo ũgĩtangĩka nĩ ũndũ wa gwethera famĩlĩ yaku irio na handũ ha gũikara. Ningĩ no ũkorũo ũgĩtigĩra atĩ ũngĩũrũo nĩ wĩra waku, ndũngĩhota kuona ũngĩ. Kana ũkorũo ũgĩtigĩra gũcenjia wĩra ũgĩciria atĩ ũtũũro waku nĩ ũkũritũha. Ndungata nyingĩ cia Jehova nĩ itooretio nĩ Shaitani nĩ ũndũ wa gũkorũo na guoya ta ũcio. Shaitani endaga twĩtĩkie atĩ Jehova ndatũrũmbũyagia, na ndangĩtũteithia ũhoro-inĩ wĩgiĩ kũrũmbũiya famĩlĩ citũ. Nĩ ũndũ ũcio, no twĩcirie atĩ nĩ twagĩrĩirũo gwĩka ũrĩa wothe tũngĩhota nĩguo tũtũũrie wĩra ũrĩa tũrĩ naguo, o na angĩkorũo gwĩka ũguo gũgũtũma twage gwathĩkĩra motaaro ma Bibilia. w22.06 15 ¶5-6

Nĩ tũũĩ atĩ Ngai witũ nĩ “Ngai mũigua tha na mũcayanĩri, ndahiũhaga kũrakara na nĩ aiyũirũo nĩ wendo mwĩhokeku na ũhoro wa ma.” (Tham. 34:6) Jehova nĩ endete kĩhooto. (Isa. 61:8) Nĩ aiguaga ũũru ona tũgĩthĩnĩka, na nĩ ehaarĩirie gũgaatũniinĩra mathĩna mothe ihinda rĩake rĩakinya. (Jer. 29:11) O na ithuĩ nĩ twĩriragĩria mũno gũkoona ihinda rĩu. Kĩu nĩ gĩtũmi kĩmwe gĩtũmaga twende Jehova mũno. Nĩ gĩtũmi kĩrĩkũ kĩngĩ gĩtũmaga twende ũhoro ũrĩa wa ma? Ũhoro ũrĩa wa ma nĩ ũtũgunaga mũno. Kwa ngerekano, ũhoro ũrĩa wa ma ũrĩ thĩinĩ wa Bibilia nĩ ũtũheaga kĩĩrĩgĩrĩro kĩa ihinda rĩũkĩte. O ta ũrĩa nanga ĩnyitagĩrĩra meri ndĩkenyenyio, no taguo kĩĩrĩgĩrĩro kĩrĩa Bibilia ĩtũheaga kĩngĩtũnyitĩrĩra rĩrĩa tũrahiũrania na moritũ ũtũũro-inĩ. Mũtũmwo Paulo akiuga ciugo cia rĩandĩko rĩa ũmũthĩ, aaragia ũhoro wĩgiĩ kĩĩrĩgĩrĩro gĩa gũthiĩ igũrũ kĩrĩa Akristiano aitĩrĩrie maguta makoragwo nakĩo. No ciugo icio ningĩ nĩ ihutagia Akristiano arĩa marĩ na kĩĩrĩgĩrĩro gĩa gũgaatũũra thĩinĩ wa paradiso gũkũ thĩ tene na tene. (Joh. 3:16) Hatarĩ nganja, kwĩruta ũhoro wa kĩĩrĩgĩrĩro kĩa muoyo wa tene na tene nĩ gũtũmĩte tũkorũo na ũtũũro ũrĩ na muoroto. w22.08 14-15 ¶3-5

Wendo nĩguo ũtũteithagia kwĩhoka arĩa angĩ. Akorintho wa mbere mũrango wa 13 nĩ ĩtaaragĩria maũndũ maingĩ megiĩ wendo, marĩa matũteithagia kwĩhoka arĩa angĩ kana kũmehoka rĩngĩ angĩkorũo nĩ tũtigĩte kũmehoka. (1 Kor. 13:4-8) Kwa ngerekano, mũhari wa 4 uugaga atĩ “wendo nĩ ũrĩ wetereri [kana, ũkirĩrĩria] na ũtugi.” Jehova nĩ atũkiragĩrĩria o na rĩrĩa twamũhĩtĩria. Kwoguo o na ithuĩ no mũhaka tũkirĩrĩrie aarĩ na ariũ a Ithe witũ rĩrĩa moiga kana meka ũndũ ũngĩtũrakaria kana ũtũtuurithie. Naguo mũhari wa 5 uugaga: “[Wendo] ndũrakaraga na ihenya. Ndũtaraga maita marĩa ũhĩtĩirio.” Tũtingĩenda gũikara tũkĩririkanaga mahĩtia marĩa aarĩ na ariũ a Ithe witũ matwĩkĩte. Kohelethu 7:9 ĩtwĩraga “[tũtikahiũhage] kũrakara.” Geragia kuona aarĩ na ariũ a Ithe witũ ta ũrĩa Jehova amonaga. Ngai nĩ amendete na ndataraga maita marĩa mamũhĩtagĩria. O na ithuĩ tũtiagĩrĩirũo gwĩka ũguo. (Thab. 130:3) Handũ ha kũroraga mahĩtia mao, roraga ngumo ciao njega.—Mat. 7:​1-5. w22.09 3-4 ¶6-7

Ibuku rĩa Danieli nĩ rĩguũragia ũrĩa maũndũ makaarũmanĩrĩra ihinda-inĩ rĩa mũthia. Kwa ngerekano, Danieli 12:1 nĩ ĩguũragia atĩ Jesu Kristo, o we Mikaeli, nĩ ‘akaarũgama nĩ ũndũ wa andũ a Ngai.’ Ũrathi ũcio waambĩrĩirie kũhinga mwaka wa 1914 rĩrĩa Jesu aamũrirũo gũtuĩka Mũthamaki wa Ũthamaki wa Ngai kũrĩa igũrũ. O na kũrĩ ũguo, Danieli ningĩ nĩ eerirũo atĩ Jesu ‘angĩkarũgama’ hĩndĩ ya “ihinda rĩa mĩtangĩko rĩtarĩ rĩoneka kuuma rĩrĩa kwagĩire na rũrĩrĩ o nginya hĩndĩ ĩyo.” “Ihinda [rĩu] rĩa mĩtangĩko” nĩ “thĩna mũnene” ũrĩa ũgwetetwo thĩinĩ wa Mathayo 24:21. Jesu akaarũgama kana arũĩrĩre andũ a Ngai mũthia-inĩ wa ihinda rĩu rĩa mĩtangĩko, hĩndĩ ya Hari–Magedoni. Ibuku rĩa Kũguũrĩrio rĩĩtĩte andũ acio makaahonoka andũ kĩrĩndĩ kĩnene “arĩa moimĩte thĩna-inĩ ũrĩa mũnene.”—Kũg. 7:​9, 14. w22.09 21 ¶4-5

Marĩĩtwa marĩa mandĩkĩtwo ibuku-inĩ rĩa muoyo ihinda-inĩ rĩrĩ no mathario. Nĩ ta Jehova ambĩte kũmandĩka na benjũ. (Kũg. 3:​5, kohoro ka magũrũ-inĩ.) No mũhaka tũtigĩrĩre atĩ rĩĩtwa ritũ nĩ rĩaikara ibuku-inĩ rĩu, o nginya rĩrĩa rĩkaandĩkwo na rangi na njĩra ya mũhaano, ũndũ rĩtangĩthario. Gĩkundi kĩmwe kĩa arĩa marĩĩtwa mao mandĩkĩtwo ibuku-inĩ rĩa muoyo nĩ kĩa arĩa mathuurĩtwo a gũgaathana na Jesu kũrĩa igũrũ. Kũringana na ciugo iria mũtũmwo Paulo eerire ariũ a Ithe witũ arĩa ‘maarutithanagia wĩra’ nao thĩinĩ wa Filipi, marĩĩtwa ma arĩa aitĩrĩrie maguta magaathana na Jesu rĩu nĩ mandĩkĩtwo ibuku-inĩ rĩa muoyo. (Afil. 4:3) No nĩguo marĩĩtwa mao maikare ibuku-inĩ rĩu rĩa muoyo, no mũhaka matũũre marĩ ehokeku. Thutha ũcio, rĩrĩa makaahũũrũo mũhũũri wa mũico, hihi mbere ya makuĩte kana mbere ya thĩna ũrĩa mũnene kwambĩrĩria, marĩĩtwa mao nĩ makaandĩkwo ibuku-inĩ rĩu ũndũ matangĩthario.—Kũg. 7:3. w22.09 14 ¶3; 15 ¶5-6

Hihi nĩ ũrĩ wanyitwo ũgeni nĩ mũndũ agakũrugĩra irio wendete mũno? No tondũ warĩ na ihenya kana warĩ na maũndũ maingĩ meciria-inĩ, ũkĩrĩa ihenya ihenya ũtekuoya ihinda gũkenera mũcamo wacio. No thutha wa kũrĩa, ũkĩona atĩ nĩ warĩa na ihenya mũno na ũkĩĩrira naarĩ korũo ũkũrĩaga kahora nĩguo ũkenere mũcamo wa irio icio. No gũthiĩ o ta ũguo rĩrĩa tũrathoma Bibilia. Rĩmwe no tũmĩthome ihenya ihenya nginya twage gũtaũkĩrũo na gũkenera ndũmĩrĩri yayo. Hũthagĩra mahinda gũkenera gũthoma Kiugo kĩa Ngai; ũkahũũra mbica cia kĩrĩa ũrathoma, ũkageria kũigua mĩgambo, na ũgeciria igũrũ rĩa kĩrĩa ũrathoma. Gwĩka ũguo nĩ kũrĩtũmaga ũgĩe na gĩkeno makĩria. Jesu nĩ aamũrire “ngombo ĩrĩa njĩhokeku na njũgĩ” nĩguo ĩtũheage irio cia kĩĩroho ihinda-inĩ rĩrĩa rĩagĩrĩire, na nĩ tũhũnagio wega kĩĩroho. (Mat. 24:45) Maandĩko nĩmo makoragwo marĩ mũthingi wa indo iria ciothe tũhaaragĩrĩrio nĩ ngombo ĩrĩa njĩhokeku.—1 Thes. 2:13. w22.10 8 ¶6-8

Bibilia nĩ yaugĩte atĩ matukũ-inĩ ma kũrigĩrĩria nĩ kũngĩgaakorũo na anyũrũrania aingĩ. (2 Pet. 3:​3, 4) Matongoragio nĩ “merirĩria mao ma maũndũ matarĩ ma ũngai.” (Jud. 7, 17, 18) Tũngĩka atĩa nĩguo twĩtheme gũtuĩka anyũrũrania? Njĩra ĩmwe nĩ gwĩthema kũgĩa ũrata na arĩa makoragwo na mwerekera wa gũteta maũndũ-inĩ mothe. (Thab. 1:1) Ũguo nĩ kuuga atĩ tũtiagĩrĩirũo gũthikĩrĩria kana gũthoma kĩndũ o gĩothe kĩa aregenyũki. Nĩ tũririkanaga atĩ tũngĩaga kwĩmenyerera, no twĩkore tũgĩkũria mwerekera wa gũteta na njĩra hũthũ, na twambĩrĩrie gwĩkĩrĩra nganja matua ma Jehova na ũtongoria ũrĩa atũheaga kũgerera ithondeka rĩake. Kwoguo nĩ twagĩrĩirũo kwĩyũria, ‘Hihi nĩ ndetaga hingo ciothe rĩrĩa twamũkĩra ũtongoria kana twataarĩrio ũndũ mwerũ? Hihi nĩ ndĩ mwerekera wa kũruta arĩa maratongoria maũndũ mahĩtia?’ Tũngĩrũngaga mĩerekera ta ĩyo o na ihenya, Jehova nĩ arĩkenagio nĩ ithuĩ.—Thim. 3:​34, 35. w22.10 20 ¶9-10

Roho wa Ngai nĩ waheire Ezekieli hinya wa kũhingia wĩra wa kũhunjĩria andũ “[moomĩtie] ciongo na makomia ngoro.” Jehova eerire Ezekieli ũũ: “Nĩ ndũmĩte ũthiũ waku ũũme o ta mothiũ mao na thiithi waku ũũme o ta mathiithi mao. Nĩ ndũmĩte thiithi waku ũhaane arimathi, na ũũme gũkĩra ihiga rĩũmũ. Ndũkametigĩre o na kana ũmakio nĩ mothiũ mao.” (Ezek. 3:​8, 9) Nĩ ta Jehova eeraga Ezekieli ũũ: ‘Ndũkareke ũremi wao ũtũme ũkue ngoro. Nĩ ngũgwĩkĩra hinya.’ Thutha ũcio, roho wa Ngai nĩ wakuuire Ezekieli ũkĩmũtwara gĩcigo-inĩ kĩrĩa aahunjagia. Ezekieli aandĩkire ũũ: “Guoko kwa Jehova kwarĩ na hinya igũrũ rĩakwa.” Mũnabii ũcio aahũthĩrire kiumia kĩmwe nĩguo erute na ataũkĩrũo nĩ ndũmĩrĩri ĩrĩa aagĩrĩirũo kũhunjia. (Ezek. 3:​14, 15) Jehova agĩcoka akĩmwĩra athiĩ mũkuru-inĩ mwaraganu na arĩ kũu “roho ũkĩingĩra thĩinĩ [wake].” (Ezek. 3:​23, 24) Ũndũ ũcio nĩ wateithirie Ezekieli kwĩhaarĩria kwambĩrĩria ũtungata wake. w22.11 4-5 ¶8-9

Mũnabii Habakuku nĩ aacemanirie na moritũ maingĩ. Kũrĩ hĩndĩ ĩmwe oonaga ta Jehova ataamũrũmbũyagia. Kwoguo nĩ aaitũrũrĩire Jehova ngoro yake kũgerera mahoya. Jehova nĩ aacokeirie ndungata ĩyo yake njĩhokeku mahoya macio ma kuuma ngoro. (Hab. 2:​2, 3) Thutha wa Habakuku gwĩcũrania ũhoro wĩgiĩ ciĩko cia Jehova cia kũhonokania nĩ aacokereirũo nĩ gĩkeno. Nĩ aagĩire na ma atĩ Jehova nĩ aamũrũmbũyagia, na nĩ angĩamũteithirie gũkirĩrĩria igerio o rĩothe. (Hab. 3:​17-19) Tũreruta atĩa? Rĩrĩa wacemania na moritũ, hoyaga Jehova na ũkamwĩra ũrĩa ũraigua. Ũgacoka ũkamwĩhoka agũteithie. Weka ũguo, nĩ ũrĩkoragwo na ma atĩ Jehova nĩ arĩkũheaga hinya ũrĩa ũrabatara wa gũkirĩrĩria. Na rĩrĩa wona agĩgũteithia, wĩtĩkio waku nĩ ũrĩgĩaga na hinya makĩria. Kũrũmĩrĩra mũtaratara waku wa maũndũ ma kĩĩroho, no gũgũteithie kwaga kũreka moritũ na nganja igũtigithũkanie na Jehova.—1 Tim. 6:6-8. w22.11 15 ¶6-7

Jesu hamwe na eki-naĩ erĩ arĩa maacuurĩtio hakuhĩ nake nĩ maanyarirĩkire mũno marĩ mũtĩ-inĩ matanakua. (Luk. 23:​32, 33) Eki-naĩ acio erĩ maakoretwo makĩnyũrũria Jesu. (Mat. 27:44; Mar. 15:32) No ũmwe wao nĩ aacenjirie mwerekera wake. Aaugire ũũ: “Jesu, ũkaandirikana rĩrĩa ũkaaingĩra thĩinĩ wa Ũthamaki waku.” Nake Jesu akĩmũcokeria na ciugo cia rĩandĩko rĩa ũmũthĩ. (Luk. 23:​39-42) Ciugo cia Jesu kũrĩ mwĩki-naĩ ũcio nĩ ciagĩrĩire gũtũtindĩka twĩcirie igũrũ rĩgiĩ ũrĩa ũtũũro ũgaakorũo ũhaana thĩinĩ wa Paradiso. No twĩrute hanini ũhoro wĩgiĩ Paradiso kuumana na wathani wa thayũ wa Mũthamaki Suleimani. Na no twĩrĩgĩrĩre atĩ Jesu, tondũ nĩ mũnene gũkĩra Suleimani, nĩ akaarutithania wĩra hamwe na arĩa magaathana nake nĩguo mathondeke thĩ ĩtuĩke Paradiso. (Mat. 12:42) Hatarĩ nganja, arĩa a “ngʼondu ingĩ” nĩ magĩrĩirũo kũmenya maũndũ marĩa marabatara gwĩka nĩguo magĩrĩre gũgaatũũra thĩinĩ wa Paradiso tene na tene.—Joh. 10:16. w22.12 8 ¶1; 9 ¶4

Ciugo icio cia Isaia iratũhe ũũma wa atĩ Jehova nĩ arĩthikagĩrĩria na kinyi rĩrĩa twamũrĩrĩra atũteithie, na nĩ arĩcokagia o na ihenya mahoya maitũ. Isaia oongereire ũũ: “Nĩ agaagũcokeria o hĩndĩ ĩyo akũigua.” Ciugo icio nĩ itũririkanagia atĩ Ithe witũ wa igũrũ nĩ akoragwo ehaarĩirie na arĩ na wendi mũnene wa gũteithia arĩa mamũkayagĩra. Kũmenya ũguo no gũtũteithie gũkirĩrĩria moritũ tũrĩ na gĩkeno. Jehova nĩ athikagĩrĩria na kinyi mahoya ma o ũmwe witũ. Tũngiuga ũguo nĩkĩ? Gĩcunjĩ-inĩ kĩa mbere kĩa Isaia mũrango wa 30, Jehova ararĩria andũ ake marĩ gĩkundi. No thĩinĩ wa mũhari wa 19, ararĩria mũndũ kĩũmbe. Isaia aandĩkire ũũ: “Ndũrĩ hĩndĩ ũkaarĩra”; “nĩ agaakuonia ũtugi”; “nĩ agaagũcokeria.” Jehova arĩ Ithe witũ ũtwendete, arũmbũyanagia na ithuĩ tũrĩ mũndũ ũmwe ũmwe na agathikĩrĩria na kinyi mahoya maitũ.—Thab. 116:1; Isa. 57:15. w22.11 9 ¶5-6

Kũhunjia na kũrutana o na kũrĩ na ũkararia nĩ gũtũrehagĩra gĩkeno na thayũ. Karine-inĩ ya mbere rĩrĩa anene a Ayahudi maathire atũmwo matige kũhunjia, arũme acio ehokeku maathuurire gwathĩkĩra Ngai. Maathiire o na mbere kũhunjia, na wĩra ũcio nĩ wamarehagĩra gĩkeno. (Atũm. 5:​27-29, 41, 42) Hatarĩ nganja, rĩrĩa wĩra witũ wekĩrĩrũo mĩkaana, nĩ twagĩrĩire kwĩmenyagĩrĩra rĩrĩa tũrahunjia. No tũngĩka ũrĩa wothe tũngĩhota, nĩ tũrĩgĩaga na thayũ ũrĩa uumanaga na gũkenia Jehova o hamwe na kũhunjia ndũmĩrĩri ya kũhonokia mĩoyo. Korũo na ma atĩ o na rĩrĩa tũragerera moritũ manene, no tũgĩe na thayũ. Mahinda-inĩ ta macio, no mũhaka tũririkanage atĩ thayũ ũrĩa tũbataraga nĩ thayũ ũrĩa uumaga tu kũrĩ Jehova. Mwĩhokage rĩrĩa gwatuthũka mũrimũ mũũru, kwoimĩra gĩcanjama, kana o na rĩrĩa ũranyarirũo. Ikara hakuhĩ na ithondeka rĩake. Wĩrĩgagĩrĩre ihinda rĩega rĩrĩa rĩrĩ mbere. Weka ũguo, “Ngai wa thayũ nĩ arĩkoragwo hamwe [nawe].”—Afil. 4:9. w22.12 21 ¶17-18

No mũhaka twĩrutanĩrie gwĩka ũguo. Harĩ maũndũ marĩa mothe twagĩrĩirũo kũrutĩra wĩra, no mũhaka twĩrutanĩrie gũtooria ngumo njũru ta marũrũ manene, marakara, na mangʼũrĩ. (Ef. 4:​31, 32) Nĩkĩ ũndũ ũcio no ũkorũo ũrĩ mũritũ? Tondũ ngumo imwe njũru nĩ ikoragwo irikĩrĩte mũno thĩinĩ witũ. Kwa ngerekano, Bibilia yugaga atĩ andũ amwe nĩ “[mahiũhaga] kũrakara” na nĩ “[makoragwo] na mwerekera wa kũrakara.” (Thim. 29:22) Gũtooria ngumo ta icio njũru irikĩrĩte mũno no kũbatare kĩyo kĩnene o na thutha wa mũndũ kũbatithio. (Rom. 7:​21-23) Hoya Jehova igũrũ rĩgiĩ ngumo njũru ĩrĩa ũraremwo kweheria, na ũkorũo na ma atĩ nĩ ekũigua na nĩ egũgũteithia. (1 Joh. 5:​14, 15) O na gũtuĩka Jehova ndangĩkwehereria ngumo ĩyo njũru na njĩra ya kĩama, no akũhe hinya nĩguo ũhote kũmĩgirĩrĩria. (1 Pet. 5:10) Ĩka kũringana na mahoya maku na njĩra ya kwaga gwĩka maũndũ marĩa mangĩtũma ngumo ĩyo njũru ĩcoke. Na ndũkareke meciria maku maikare makĩĩriragĩria maũndũ matagĩrĩire.—Afil. 4:8; Kol. 3:2. w23.01 10 ¶7, 9-10

Njĩra ĩmwe tũngĩonania wendo witũ nayo nĩ kũnyitanĩra na kĩyo wĩra-inĩ wa kũhunjia. Twĩrutanagĩria kwaria na arĩa othe twacemania nao. Tũtithutũkanagia mũndũ o wothe nĩ ũndũ wa rangi wake, rũrĩrĩ rwake, ũhoti wa kĩĩmbeca, kana gĩthomo gĩake. Na njĩra ĩyo tũkoragwo tũgĩka kũringana na wendi wa Jehova wa atĩ “andũ a mĩthemba yothe mahonokio na magĩe na ũmenyo wa ma wĩgiĩ ũhoro wa ma.” (1 Tim. 2:4) Njĩra ĩngĩ tuonanagia nayo wendo witũ harĩ Ngai na Kristo nĩ kuonia aarĩ na ariũ a Ithe witũ wendo. Nĩ twĩciragia ũhoro wao, na tũkamateithia rĩrĩa marĩ na moritũ. Nĩ tũmomagĩrĩria rĩrĩa makuĩrũo nĩ mũndũ mendete, rĩrĩa marwara tũkamaceerera, na tũgeka ũrĩa wothe tũngĩhota kũmomĩrĩria rĩrĩa makuĩte ngoro. (2 Kor. 1:​3-7; 1 Thes. 5:​11, 14) Nĩ tũikaraga tũkĩmahoyagĩra, tondũ nĩ tũĩ atĩ “ithaithana rĩa mũndũ mũthingu nĩ rĩrĩ ũhoti mũnene.”—Jak. 5:16. w23.01 28-29 ¶7-8

O ta ũrĩa bundi athiaga na mbere kwagagĩria ũhoti wake, o na ithuĩ no tũhote gũthiĩ na mbere kwagagĩria ũhoti witũ wa gwaka arĩa angĩ. No tũteithie arĩa angĩ kũgĩa na hinya wa gũkirĩrĩria magerio na njĩra ya kũmahe ũhoro wa andũ manakirĩrĩria. (Ahib. 11:​32-35; 12:1) No tũthingate thayũ na njĩra ya kũgwetaga maũndũ mega ma andũ arĩa angĩ, na kwĩrutanĩria gũcokia thayũ rĩrĩa kwagĩa na ngarari kana twaga kũiguana na andũ arĩa angĩ. (Ef. 4:3) Ningĩ no tũthiĩ na mbere gwaka wĩtĩkio wa aarĩ na ariũ a Ithe witũ na njĩra ya kũmahe Maandĩko mangĩhũthĩra, kũmahe ũteithio ũrĩa marabatara, na gũteithia arĩa manyihĩirũo nĩ wĩtĩkio. No tũgĩe na gĩkeno na tũiganĩre tũngĩaka wĩtĩkio wa aarĩ na ariũ a Ithe witũ thĩinĩ wa kĩũngano. Nyũmba iria ciakagwo ititũũraga tene na tene, no maumĩrĩro ma wĩra witũ wa gwaka arĩa angĩ no matũũre tene na tene. w22.08 22 ¶6; 25 ¶17-18

Jesu nĩ oonanirie atĩ nĩ tũbataraga ngumo ya ũtaũku nĩguo tũtaũkĩrũo nĩ maũndũ marĩa tũrathoma Kiugo-inĩ kĩa Ngai. (Mat. 24:15) Ũtaũku nĩ kĩĩ? Nĩ ũhoti wa gũtaũkĩrũo nĩ ũrĩa rĩciria rĩmwe rĩkonainie na rĩrĩa rĩngĩ na ũrĩa rĩrĩ ngũrani na rĩrĩa rĩngĩ na gũtaũkĩrũo nginya nĩ ũndũ ũrĩa ũteyumĩrĩtie wega. Makĩria ma ũguo, o ta ũrĩa Jesu oonanirie, nĩ tũbataraga ũtaũku nĩguo tũkũũrane maũndũ marĩa maronania kũhinga kwa ũrathi wa Bibilia. Ningĩ nĩ tũbataraga ngumo ĩyo nĩguo tũgunĩke biũ kuumana na kĩrĩa gĩothe tũrathoma Bibilia-inĩ. Jehova nĩ aheaga ndungata ciake ũtaũku. Kwoguo mũhoyage agũteithie gũkũria ngumo ĩyo. Nĩ kĩĩ kĩngĩgũteithia gwĩka kũringana na mahoya maku? Thuthuragia na kinyi maũndũ marĩa wathoma, na ũkarora ũrĩa makonainie na maũndũ marĩa mangĩ ũĩ. Thuthuragia nĩguo ũgataũkĩrũo nĩ ũhoro mũna ũrĩa ũrathoma Bibilia-inĩ, na ũgeciria ũrĩa ũngĩũhũthĩra ũtũũro-inĩ waku. (Ahib. 5:14) Kũhũthĩra ũtaũku rĩrĩa ũrathoma, no gũgũteithie gũtaũkĩrũo nĩ Maandĩko makĩria. w23.02 10 ¶7-8

Ta hũũra mbica mũrata akũheete nyũmba. Nyũmba ĩyo ĩgakorũo yũnũkĩte rangi kũndũ kũmwe na ĩrĩ na kũndũ kũraura. O na gũtuĩka ĩrĩ na mathĩna macio, nĩ nyũmba ya mbeca nyingĩ. Hatarĩ nganja no ũcokie ngatho mũno nĩ ũndũ wa nyũmba ĩyo na ũmĩmenyerere. Ũndũ ũmwe na ũcio, Jehova nĩ atũheete kĩheo kĩa goro kĩa muoyo. Jehova nĩ onanĩtie atĩ nĩ onaga muoyo witũ wĩ wa goro na njĩra ya kũruta Mũrũwe arĩ ũkũũri nĩ ũndũ witũ. (Joh. 3:16) Jehova nĩwe Kĩhumo kĩa muoyo. (Thab. 36:9) Mũtũmwo Paulo nĩ oonanirie atĩ nĩ eetĩkĩtie ũguo rĩrĩa aaugire ũũ: “Nĩwe ũtũmaga tũkorũo muoyo, tũkahota gwĩtwara, na tũgakorũo ho.” (Atũm. 17:​25, 28) Kwoguo no tuuge atĩ muoyo witũ nĩ kĩheo kuuma kũrĩ Ngai. Nĩ atũheaga kĩrĩa tũrabatara nĩguo tũtũũre muoyo. (Atũm. 14:​15-17) No Jehova ndagitagĩra mĩoyo itũ na njĩra ya kĩama. Handũ ha ũguo, erĩgagĩrĩra twĩke ũrĩa wothe tũngĩhota kũmenyerera ũgima witũ wa mwĩrĩ na wa kĩĩroho.—2 Kor. 7:1. w23.02 20 ¶1-2

Nĩ tũcokagĩria Jehova Ngai ngatho nĩ ũndũ wa Bibilia. Thĩinĩ wayo, nĩ atũheete ũtaaro wa ũũgĩ ũngĩtũteithia kũhiũrania na mathĩna marĩa tũcemanagia namo ũmũthĩ. Ningĩ nĩ atũheete kĩĩrĩgĩrĩro kĩega kĩa mahinda mokĩte. Na ũndũ wa bata makĩria, Jehova nĩ atũguũrĩirie ngumo nyingĩ ciake thĩinĩ wa Bibilia. Rĩrĩa twecũrania igũrũ rĩgiĩ ngumo icio ciake njega, ngoro citũ nĩ ihutagio mũno na tũgatindĩkwo kũmũkuhĩrĩria na njĩra ya gũkũria ũrata wa hakuhĩ hamwe nake. (Thab. 25:14) Jehova nĩ endaga andũ mamũmenye. Mahinda-inĩ ma tene nĩ eeguũragia kũgerera iroto, cioneki, o na araika. (Ndar. 12:6; Atũm. 10:​3, 4) No tũtingĩamenyire ndũmĩrĩri ĩyo aaheanire kũgerera iroto, cioneki, na araika korũo ndaamĩandĩkithirie. Nĩkĩo Jehova aahũthĩrire andũ ‘kwandĩka ibuku-inĩ’ maũndũ marĩa eendaga tũmenye. Tondũ “njĩra ya Ngai ũrĩa wa ma nĩ nginyanĩru,” no tũkorũo na ma atĩ njĩra ĩrĩa ahũthagĩra ya gũtwarĩria kũgerera Bibilia nĩyo njega biũ na nĩ ĩtũgunaga.—Thab. 18:30. w23.02 2 ¶1-2

Wĩigĩre mĩoroto ĩrĩ na ũguni. Thuura mĩoroto ĩngĩgũteithia gwĩkĩra wĩtĩkio waku hinya, na gũthiĩ na mbere gũkũra kĩĩroho. (Ef. 3:16) Kwa ngerekano, no ũtue itua rĩa kwagagĩria mũtaratara wa wĩruti waku kĩũmbe na ũthomi waku wa Bibilia. (Thab. 1:​2, 3) Ningĩ no ũgerie kũhoyaga maita maingĩ makĩria, na kũhoyaga kuuma ngoro. No gũkorũo nĩ ũrabatara kwĩgirĩrĩria makĩria, harĩ maũndũ marĩa ũthuuraga ma gwĩkenia na ũrĩa ũhũthagĩra mahinda maku. (Ef. 5:​15, 16) Gũteithia andũ arĩa angĩ no gũgũteithie gũthiĩ na mbere gũkũra kĩĩroho. Kwa ngerekano, no wĩigĩre muoroto wa gũteithagia andũ arĩa akũrũ kĩũngano-inĩ, na arĩa marĩ na mathĩna ma mwĩrĩ. No wĩrutĩre kũmateithia rĩrĩa marabatara mũndũ wa gũtũma kũmagũrĩra indo, kana kũmateithia kũhũthĩra indo ta thimũ. Ningĩ no wonie arĩa marĩ nja ya kĩũngano atĩ nĩ ũmendete, na njĩra ya kũmahunjĩria ũhoro ũrĩa mwega wa Ũthamaki. (Mat. 9:​36, 37) Na kũngĩhoteka, wĩigĩre muoroto wa gũtungatĩra Jehova ũtungata-inĩ wa mahinda mothe. w22.08 6 ¶16-17