Wagĩrĩirũo Gũkorũo na Mĩikarĩre Ĩtariĩ Atĩa?

1, 2. Nĩguo twĩtĩkĩrĩke nĩ Ngai-rĩ, tũkũbatara ‘gũkorũo tũtariĩ atĩa’?

NĨ ŨNDŨ wa ndũire gũtangĩkĩra ũrĩa andũ matuonaga. O na kũrĩ ũguo-rĩ, githĩ tũrĩ Akristiano tũtiagĩrĩirũo nĩ gũtangĩkĩra makĩria ũrĩa Jehova atuonaga? Ningĩ-rĩ, Jehova nĩwe mũnene wa igũrũ na thĩ, na “itherũkĩro rĩa muoyo nĩ harĩ wee rĩrĩ.”—Thab. 36:9.

² Agĩtĩtĩrithia ũrĩa ‘mĩikarĩre itũ yagĩrĩirũo gũkorũo ĩtariĩ’ maitho-inĩ ma Jehova, mũtũmwo Petero atũhatagĩrĩria tũkoragwo na “mĩtũũrĩre ya ũtheru, na ya kwĩamũrĩra Ngai.” (Thoma 2 Petero 3:11.) Nĩguo twĩtĩkĩrĩke nĩ Ngai, no mũhaka “mĩtũũrĩre” itũ ĩkorũo ĩrĩ mĩtheru kĩĩmĩtugo, kĩĩmeciria, na kĩĩroho. Makĩria ma ũguo, wĩtigĩri Ngai na wĩhokeku witũ harĩ we nĩ wagĩrĩirũo gũtũtindĩka tũkoragwo na ciĩko cia “kwĩamũrĩra Ngai.” Nĩ ũndũ ũcio, gwĩtĩkĩrĩka nĩ Ngai gũtihutĩtie tu mĩthiĩre itũ, ĩndĩ ningĩ nĩ kũhutĩtie mũndũ witũ wa ngoro thĩinĩ. Tondũ Jehova nĩwe ‘ũtuĩragia ngoro-rĩ,’ nĩ amenyaga kana tũrĩ na mĩthiĩre mĩtheru na kana nĩ tũmwĩyamũrĩire na ngoro itũ yothe.—1 Maũ. 29:17.

3. Nĩ ciũria irĩkũ twagĩrĩirũo nĩ kwĩyũria ũhoro-inĩ wĩgiĩ ũrata witũ na Ngai?

³ Tondũ Mũcukani ndendaga tũkorũo na ũrata na Ngai-rĩ, ekaga o ũrĩa wothe angĩhota nĩguo athũkie ũiguano witũ na Jehova. Ndaconokaga akĩhũthĩra maheeni nĩguo atweherie harĩ Ngai ũrĩa tũhoyaga. (Joh. 8:44; 2 Kor. 11:13-15) Nĩ ũndũ ũcio, harĩ bata twĩyũrie ũũ: ‘Shaitani ahĩtithagia andũ atĩa? Ingĩka atĩa nĩguo ngitĩre ũrata wakwa na Jehova?’

SHAITANI AHĨTITHAGIA ANDŨ ATĨA?

4. Shaitani aceemaga kĩĩ akĩgeria gũthũkia ũrata witũ na Jehova, na nĩkĩ?

⁴ Mũtũmwo Jakubu aandĩkire atĩ, “o mũndũ nĩ kũgerio ageragio hĩndĩ ĩrĩa ekũgucĩrĩrio nĩ merirĩria make moru, akahenererio nĩmo. Namo merirĩria macio maagĩa ihu-rĩ, maciaraga wĩhia: naguo wĩhia wakũra-rĩ, ũgaciara gĩkuũ.” (Jak. 1:14, 15) Nĩguo Shaitani athũkie wĩhokeku witũ harĩ Jehova, aceemaga ngoro itũ tondũ nĩyo kĩhumo kĩa merirĩria.

5, 6. (a) Shaitani ahũthagĩra kĩĩ gũthũkia ngoro citũ? (b) Nĩ njĩra irĩkũ ithatũ Shaitani ahũthagĩra gũthũkia merirĩria ma ngoro citũ, na arĩ na ũmenyeru ũigana atĩa harĩ gũcihũthĩra?

⁵ Shaitani ahũthagĩra kĩĩ gũthũkia ngoro citũ? Bibilia yugaga atĩ, “kĩrĩndĩ gĩa thĩ gĩothe nĩgĩtũire kĩnyitĩtwo nĩ ũcio mũũru.” (1 Joh. 5:19) Mũtego ũmwe Shaitani ahũthagĩra nĩ “maũndũ marĩa me kuo gũkũ thĩ.” (Thoma 1 Johana 2:15, 16.) Kwa ihinda rĩa mĩaka mĩingĩ, Mũcukani akoretwo akĩhũthĩra na njĩra ya wara maũndũ marĩa matũthiũrũrũkĩirie. Tondũ tũratũũra thĩinĩ wa thĩ ĩno-rĩ, nĩ tũkũbatara kwĩhũga njĩra ciake iria ikoragwo ciĩhithĩte.—Joh. 17:15.

⁶ Shaitani ahũthagĩra njĩra ikoragwo irongoreirio gũthũkia merirĩria ma ngoro citũ. Mũtũmwo Johana nĩ aagwetire njĩra ithatũ iria Shaitani ahũthagĩra kũgucĩrĩria andũ nacio (1) “mwĩrirĩrio wa mwĩrĩ,” (2) “mwĩrirĩrio wa maitho,” na (3) ‘nguthi cia muoyo ũyũ tũrĩ.’ Shaitani nĩ aahũthĩrire njĩra icio kũgeria Jesu werũ-inĩ. Tondũ nĩ akoretwo akĩhũthĩra njĩra icio mĩaka mĩingĩ-rĩ, ũmũthĩ Shaitani nĩ agacĩrĩte mũno harĩ gũcihũthĩra. Acihũthagĩra kũringana na merirĩria ma o mũndũ. Mbere ya kwarĩrĩria ũrĩa tũngĩka nĩguo twĩgitĩre, rekei tuone ũrĩa Mũcukani aahotire kũheenia Hawa, ĩndĩ akĩremwo kũheenia Mũriũ wa Ngai.

“MWĨRIRĨRIO WA MWĨRĨ”

7. Shaitani aahũthĩrire “mwĩrirĩrio wa mwĩrĩ” atĩa kũheenia Hawa?

⁷ Nĩguo andũ matũũre, no mũhaka marĩe irio. Mũũmbi witũ ombire thĩ ũndũ ĩrĩciaraga irio nyingĩ. Shaitani no ahũthĩre merirĩria maitũ ma ndũire ma irio akĩgeria gũtũma tũtige gwĩka wendi wa Jehova. Ta ririkana ũrĩa eekire ũguo harĩ Hawa. (Thoma Kĩambĩrĩria 3:1-6.) Shaitani eerire Hawa atĩ, thutha wa kũrĩa “mũtĩ wa kũmenyithania wega o na ũũru,” handũ ha gũkua, angĩahanire ta Ngai. (Kĩam. 2:9) Na njĩra ĩyo akĩonania atĩ Hawa ndaabataraga gwathĩkĩra Ngai nĩguo atũũre. Na githĩ macio matiarĩ maheeni moru mũno! Rĩrĩa rĩciria rĩu rĩahandirũo meciria-inĩ ma Hawa, maũndũ marĩ o merĩ: Aregane narĩo, kana athiĩ na mbere na gwĩciria ũhoro warĩo, na nĩ ũndũ ũcio merirĩria ma kũrĩa itunda rĩu makũre ngoro-inĩ yake. O na gũtuĩka Hawa nĩ angĩarĩire matunda ma mĩtĩ mĩingĩ ĩrĩa yarĩ mũgũnda-inĩ ũcio-rĩ, aigire meciria make harĩ mũtĩ ũrĩa warĩ mũgũnda gatagatĩ, na nĩ ũndũ ũcio ‘agĩtua maciaro maguo, akĩmarĩa.’ Shaitani akĩhota kũhanda ngoro-inĩ ya Hawa merirĩria ma kĩrĩa Mũũmbi wake aamagirĩtie.

8. Shaitani aageririe kũhĩtithia Jesu atĩa akĩhũthĩra “mwĩrirĩrio wa mwĩrĩ,” na aaremirũo kũmũtooria nĩkĩ?

⁸ Shaitani aahũthĩrire njĩra o ĩyo rĩrĩa aageragia Jesu werũ-inĩ. Thutha wa Jesu kwĩhinga kũrĩa irio mĩthenya 40 na motukũ 40, Shaitani nĩ aageririe kũhũthĩra merirĩria ma Jesu ma irio. Eerire Jesu ũũ: “Ongorũo wee nĩwe Mũrũ wa Ngai, ĩra ihiga rĩrĩ rĩtuĩke mũgate.” (Luk. 4:1-3) Maũndũ marĩ o merĩ: Jesu ahũthĩre hinya wake wa kũringa ciama nĩguo ahingie mabataro make ma irio, kana arege kũũhũthĩra. Jesu nĩ aamenyaga atĩ ndaagĩrĩirũo nĩ kũhũthĩra hinya ũcio kũhingia merirĩria make. O na gũtuĩka aarĩ mũhũtu, ũrata wake na Jehova nĩguo warĩ wa bata gũkĩra merirĩria make. Jesu aacokeirie Shaitani ũũ: “Nĩ haandĩke atĩ, Ti mũgate wiki ũtũũragia mũndũ muoyo, no kiugo o gĩothe kĩrĩa kiumaga kanua ka Ngai.”—Mat. 4:4.

“MWĨRIRĨRIO WA MAITHO”

9. Ciugo “mwĩrirĩrio wa maitho” cionanagia atĩa, na Shaitani aahũthĩrire mwĩrirĩrio ũcio atĩa harĩ Hawa?

⁹ Ningĩ Johana nĩ aagwetire njĩra ĩngĩ Shaitani ahũthagĩra kũhĩtithia andũ, “mwĩrirĩrio wa maitho.” Ciugo icio cionanagia atĩ mũndũ no ambĩrĩrie kwĩrirĩria kĩndũ nĩ ũndũ wa gũkĩona tu. Shaitani aahũthĩrire njĩra ĩyo harĩ Hawa rĩrĩa aamwĩrire, “maitho manyu nĩmakahingũka.” O ũrĩa Hawa aathire na mbere kwĩrorera mũtĩ ũcio maagirĩtio, noguo aawĩriragĩria, na akĩona nĩ wa ‘kwendeka ũkĩonwo na maitho.’

10. Shaitani aahũthĩrire atĩa “mwĩrirĩrio wa maitho” kũgeria Jesu, na Jesu aamũcokeirie atĩa?

¹⁰ Shaitani aahũthĩrire njĩra ĩyo atĩa harĩ Jesu? ‘Aamuonirie mothamaki mothe ma thĩ o kahinda kanini ma, agĩcoka akĩmwĩra atĩrĩ, wathani wa gwathaga kũu guothe nĩ ngũkũhe.’ (Luk. 4:5, 6) Jesu ndangĩahotire kuona mothamaki macio mothe na maitho make ma mwĩrĩ o kahinda kanini. No mũhaka akorũo Shaitani eeciragia atĩ kuonia Jesu riri wa mothamaki macio na njĩra ya kĩoneki nĩ kũngĩamũgucĩrĩirie. Eerire Jesu ũũ: “Ũngĩĩtĩkĩra kũndurĩria ndu o haha ndĩ, ũ’hoe, ũcio wothe nĩũgũtuĩka waku.” (Luk. 4:7) Jesu ndeendaga o na hanini kũrũmĩrĩra wendi wa Shaitani. Aacokirie o na ihenya akiuga, “Ũhoro nĩwandĩkĩtwo atĩrĩ, Turagĩria Mwathani Ngai waku ndu ũmũhoyage, na ũmũtungatagĩre o we wiki.”—Luk. 4:8.

‘NGUTHI CIA MUOYO ŨYŨ TŨRĨ’

11. Shaitani aahenirie Hawa atĩa?

¹¹ Ningĩ mũtũmwo Johana nĩ aagwetire ũhoro wa ‘nguthi cia muoyo ũyũ tũrĩ.’ Ma nĩ atĩ, rĩrĩa Adamu na Hawa maarĩ oiki thĩinĩ wa thĩ gũtiarĩ mũndũ mangĩeyonanirie kũrĩ we indo iria maarĩ nacio. O na kũrĩ ũguo, nĩ moonanirie mwĩtĩo. Rĩrĩa Shaitani aageragia Hawa, onanirie ta harĩ kĩndũ kĩa bata mũno Ngai aamũimĩte. Mũcukani eerire Hawa atĩ mũthenya ũrĩa akaarĩa “mũtĩ ũrĩa wa kũmenyithania wega o na ũũru,” ‘agaatuĩka o ta Ngai, amenyage wega o na ũũru.’ (Kĩam. 2:17; 3:5) Na njĩra ĩyo Shaitani akĩonania atĩ Hawa ndangĩabatarire gwathagwo nĩ Jehova. No kũhoteke mwĩtĩo nĩ ũndũ ũmwe watũmire Hawa etĩkie maheeni macio. Akĩrĩa itunda rĩrĩa maakanĩtio arĩ na wĩtĩkio atĩ ndangĩakuire. Kaĩ nĩ eehenirie-ĩ!

12. Njĩra ĩngĩ Shaitani aahũthĩrire akĩgeria kũhĩtithia Jesu nĩ ĩrĩkũ, na Jesu eekire atĩa?

¹² Ngũrani na Hawa, Jesu nĩ kĩonereria kĩega mũno kĩa wĩnyihia! Shaitani aamwĩrire eke ũndũ wa kwĩyonania arĩ na muoroto wa kũgeria Ngai. Ĩndĩ Jesu akĩrega biũ gwĩka ũguo tondũ kĩu kĩngĩarĩ gĩĩko kĩa mwĩtĩo. Aamwĩrire ĩmwe kwa ĩmwe ũũ: “Nĩkwĩranĩtwo atĩrĩ, Ndũkanagerie Mwathani Ngai waku.”—Thoma Luka 4:9-12.

TŨNGĨGITĨRA ŨRATA WITŨ NA JEHOVA ATĨA?

13, 14. Taarĩria ũrĩa Shaitani ageragia kũhĩtithia andũ ũmũthĩ.

¹³ Mahinda-inĩ maya Shaitani ahũthagĩra njĩra o ta iria aahũthĩrire harĩ Hawa na harĩ Jesu. Kũgerera “mwĩrirĩrio wa mwĩrĩ,” ahũthagĩra maũndũ ma thĩ yake gũtũma andũ meingĩrie ngomanio-inĩ itagĩrĩire na makĩrie njano harĩ kũrĩa na kũnyua. Akĩhũthĩra mbica cia ũũra thoni makĩria thĩinĩ wa Intaneti, no ahote kũnyita arĩa maikaraga matehũgĩte na agucĩrĩrie ‘mwĩrirĩrio wao wa maitho.’ Ningĩ nĩ ahũthagĩra “nguthi cia muoyo ũyũ tũrĩ kana mwerekera wa mũndũ kwĩyonania indo iria arĩ nacio,” kũgeria gũtũma andũ meĩkĩrĩre na mende ũnene, igweta, na indo nyingĩ cia kĩĩmwĩrĩ.

¹⁴ “Maũndũ marĩa me kuo gũkũ thĩ” matariĩ ta kĩgunyũ kĩrĩa mũtegi wa thamaki ekagĩra ndwano-inĩ yake. Kĩgunyũ kĩu no kĩgucĩrĩrie thamaki, ĩndĩ gĩkoragwo kĩhithĩte ndwano. Na njĩra o ta ĩyo, Shaitani ahũthagĩra maũndũ o marĩa monekaga ta marĩ mega na marĩa tũbataraga nĩguo atũme twagarare watho wa Ngai. Ĩndĩ, maũndũ macio makoragwo na mĩtego ĩhithĩte ĩrongoreirio kwarahũra merirĩria maitũ na gũthũkia ngoro citũ. Muoroto wamo nĩ gũtũma twĩtĩkie atĩ mabataro maitũ na maũndũ ma gwĩkenia nĩ ma bata gũkĩra gwĩka wendi wa Ngai. Hihi wee nĩ ũkũhĩtithio nĩ maũndũ macio?

15. Tũngĩĩgerekania na Jesu atĩa harĩ kũregana na magerio ma Shaitani?

¹⁵ O na gũtuĩka Hawa nĩ aagũire magerio-inĩ ma Shaitani-rĩ, Jesu nĩ aamatoririe. Maita mothe agĩcokeria Shaitani aahũthĩrire Maandĩko. Aamwĩraga ũũ: “Ũhoro nĩwandĩkĩtwo” kana “Nĩ haandĩke.” Angĩkorũo nĩ twĩrutaga Bibilia na kĩyo, nĩ tũrĩkoragwo na ũmenyo mũingĩ wa Maandĩko na nĩ tũrĩhotaga kũririkana mĩhari ĩrĩa ĩngĩtũteithia rĩrĩa twacemania na magerio. (Thab. 1:1, 2) Kũririkana cionereria iria irĩ thĩinĩ wa Maandĩko cia andũ arĩa maarĩ ehokeku harĩ Ngai nĩ kũrĩtũteithagia kwĩgerekania nao. (Rom. 15:4) Wĩtigĩri Ngai, kwenda maũndũ marĩa endete na gũthũũra marĩa athũire nĩ kũrĩtũgitagĩra.—Thab. 97:10.

16, 17. ‘Ũũgĩ ũrĩa wagĩrĩire’ ũngĩkorũo na moimĩrĩro marĩkũ harĩ mĩthiĩre itũ?

¹⁶ Mũtũmwo Paulo atwĩkagĩra ngoro tũhũthagĩre ‘ũũgĩ ũrĩa wagĩrĩire’ nĩguo tũtongoragio nĩ Ngai handũ ha maũndũ ma thĩ. (Rom. 12:1, 2) Agĩtĩtĩrithia bata wa gwĩthema biũ gwĩciria maũndũ marĩa matagĩrĩire, Paulo oigire ũũ: ‘Tũtharũragia maũndũ ma mwĩĩro ma ngoro, o na kĩndũ o gĩothe gĩĩtũũgĩrĩtie ta rũgiri rũa kũgiria ũhoro wa Ngai ũmenyeke, na tũgataha meciria o mothe matuĩke mĩgwate ya gwathĩkĩra Kristo.’ (2 Kor. 10:5) Gũkorũo na mĩthiĩre ĩrĩa yagĩrĩire nĩ kwĩhocetie biũ harĩ mathugunda maitũ, nĩ ũndũ ũcio tũkũbatara gũthiĩ na mbere ‘gwĩciria’ maũndũ marĩa magĩrĩire.—Afil. 4:8.

¹⁷ Angĩkorũo nĩ tũgũkorũo tũrĩ atheru, no mũhaka tũregane biũ na mathugunda na merirĩria moru. No mũhaka twendage Jehova tũrĩ na “ngoro theru.” (1 Tim. 1:5) O na kũrĩ ũguo, ngoro nĩ ĩheenanagia, na nĩ ũndũ ũcio no twage kũmenya ũrĩa tũrathũkio nĩ “maũndũ marĩa me kuo gũkũ thĩ.” (Jer. 17:9) Kwoguo, twagĩrĩirũo nĩ gũikara ‘tũkĩĩgeragia kana no tũtũire twĩtĩkĩtie, tũgĩĩtuĩragia ithuĩ ene’ na njĩra ya gwĩthuthuria biũ tũkĩhũthĩra maũndũ marĩa tũrathoma Bibilia-inĩ.—2 Kor. 13:5.

18, 19. Nĩkĩ nĩ twagĩrĩirũo kwĩrutanĩria gũikara na mĩikarĩre ĩrĩa ĩkenagia Jehova?

¹⁸ Ũndũ ũngĩ ũtũteithagia gwĩthema “maũndũ marĩa me kuo gũkũ thĩ,” nĩ kũririkana ciugo ici cia mũtũmwo Johana: “Thĩ nĩ gũthira ĩrathira, o na mwĩrirĩrio wayo; no rĩrĩ, ũrĩa wĩkaga ũrĩa Ngai endaga, ũcio nĩ wa gũtũũra nginya tene o na tene.” (1 Joh. 2:17) Mũtabarĩre ũyũ wa Shaitani no woneke ta ũrĩ wa gũtũũra. Ĩndĩ, mũthenya ũmwe wa mĩthenya nĩ ũgaathira. Gũtirĩ ũndũ o na ũmwe wa thĩ ya Shaitani ũgũtũũra tene na tene. Kũririkana ũndũ ũcio, nĩ kũrĩtũteithagia tũtikaheenio nĩ Mũcukani.

¹⁹ Mũtũmwo Petero atwĩkagĩra ngoro tũikarage na mĩikarĩre ĩrĩa ĩkenagia Ngai o ‘tũgĩtanyaga na tũkĩĩriragĩria mũno mũthenya ũcio wa Ngai ũgĩgakinya, rĩrĩa igũrũ rĩkagwatio mwaki rĩthire, nacio ciũmbe iria itũire igũrũ ihĩe nĩ mwaki mũnene itweke.’ (2 Pet. 3:12) Ica ikuhĩ mũno, mũthenya ũcio nĩ ũgũkinya, na Jehova nĩ ekũniina mũtabarĩre wothe wa Shaitani. Ĩndĩ mũthenya ũcio ũtanakinya, Shaitani nĩ egũthiĩ na mbere kũhũthĩra “maũndũ marĩa me kuo gũkũ thĩ” gũtũgeria o ta ũrĩa aageririe Hawa na Jesu. Twagĩrĩirũo gwĩthema kũrũmĩrĩra merirĩria maitũ ta ũrĩa Hawa eekire. Tũngĩaga gwĩka ũguo tũngĩkorũo tũgĩthathaiya Shaitani. Tũkũbatara kũregana na magerio macio ta ũrĩa Jesu eekire, o na Shaitani angĩgeria atĩa gũtũma moneke marĩ mega. Rekei o mũndũ o mũndũ erutanĩrie gũikara na mĩikarĩre ĩrĩa ĩkenagia Jehova.