Nĩ Kĩĩ Gĩatũmire Jesu Anyamarĩke Na Akue?

Ũngĩcokia atĩa ũngĩũrio ũũ: “Hihi no wende gũtũũra tene na tene?” Kwahoteka andũ aingĩ mangĩcokia ĩĩ, ĩndĩ mone ta ũndũ ũcio ũtangĩhotekeka. Moigaga atĩ gĩkuũ gĩtũũrĩte kuo na gũtirĩ mũndũ ũngĩhota gũgĩĩthema.

No kĩũria kĩu kĩngĩgarũrũo kĩũrio ũũ: “Hihi nĩ wĩhaarĩirie gũkua?” Andũ aingĩ mangĩcokia aca. Ũndũ ũcio ũronania atĩa? O na twacemania na magerio na moritũ, wendi witũ nĩ gũthiĩ na mbere na gũtũũra. Bibilia yonanagia atĩ Ngai ombire andũ marĩ na wendi wa gũtũũra. Yugaga ũũ: “Nĩekĩrĩte ũhoro wa tene na tene ngoro-inĩ cia andũ.”​—Kohelethu 3:​11, Holy Bible in Gĩkũyũ.

No ũhoro wa ma nĩ atĩ, andũ matitũũraga tene na tene. Kaĩ maũndũ maathũũkĩire kũ? Ningĩ-rĩ, hihi Ngai nĩ ekĩte ũndũ nĩguo athondeke maũndũ? Macokio ma Bibilia nĩ matwĩkagĩra ngoro, na nĩ mahutanĩtie ĩmwe kwa ĩmwe na kĩrĩa gĩatũmire Jesu anyamarĩke na akue.

MAŨNDŨ MAAHĨTANĨIRE KŨ?

Mĩrango ya mbere ĩtatũ ya ibuku rĩa Kĩambĩrĩria, ĩtwĩraga atĩ Ngai nĩ aahete mũthuri na mũtumia wa mbere, nĩo Adamu na Hawa, kĩĩrĩgĩrĩro gĩa gũtũũra tene na tene na akĩmeera ũrĩa maabatiĩ gwĩka nĩguo matũũre tene na tene. Ningĩ nĩ ĩtaaragĩria ũrĩa maagire gwathĩkĩra Ngai na magĩte kĩĩrĩgĩrĩro kĩu. Rũgano rũu rũkoragwo rũtaarĩirio na njĩra hũthũ ũũ atĩ andũ amwe maruonaga rũhaana ta rũgano rwa tene rwa gwĩtungĩra. No o ta mabuku ma Injiri, ibuku rĩa Kĩambĩrĩria rĩkoragwo na ũhoro wa ma wĩgiĩ historĩ.a

Moimĩrĩro ma kwaga gwathĩka kwa Adamu maarĩ marĩkũ? Bibilia ĩcokagia ũũ: “Kũgerera harĩ mũndũ ũmwe [Adamu] mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia, na kwoguo gĩkuũ gĩgĩtherema kũrĩ andũ othe tondũ nĩ meehĩtie othe.” (Aroma 5:12) Nĩ ũndũ wa Adamu kwaga gwathĩkĩra Ngai, nĩ eehirie. Kwoguo agĩte kĩĩrĩgĩrĩro gĩa gũtũũra tene na tene na mũico-inĩ agĩkua. Tondũ tũrĩ njiarũa ciake, nĩ twagaire mehia kuuma harĩ we. Nĩkĩo tũrũaraga, tũgakũra, na tũgakua. O ta ũrĩa ciana igayaga maũthĩ kuuma kũrĩ aciari ao, noguo kũrĩ ũhoro-inĩ wĩgiĩ kĩrĩa gĩtũmaga tũkue. No hihi Ngai harĩ ũndũ ekĩte nĩguo athondeke maũndũ?

ŨRĨA NGAI EEKIRE

Ngai nĩ aabangire ũrĩa egũkũũra kana acokie, kĩrĩa Adamu aateereire njiarũa ciake, na nĩkĩo kĩĩrĩgĩrĩro gĩa gũtũũra tene na tene. Aahingirie ũndũ ũcio atĩa?

Bibilia yugaga ũũ thĩinĩ wa Aroma 6:23: “Mũcara wa mehia nĩ gĩkuũ.” Ũguo nĩ kuuga atĩ gĩkuũ kiumanaga na mehia. Kwoguo Adamu aakuire nĩ ũndũ wa kwĩhia. O take, nĩ twĩhagia na kwoguo nĩkĩo tũkuaga. No tũciaragwo tũrĩ ehia, o na gũtuĩka ti mahĩtia maitũ. Nĩ ũndũ wa wendo, Ngai nĩ aatũmire Jesu, Mũrũ wake, nĩguo akue nĩ ũndũ witũ. Ũndũ ũcio ũngĩateithirie atĩa?

Tondũ nĩ mũndũ ũmwe mũkinyanĩru watũreheire mehia na gĩkuũ nĩ ũndũ wa kwaga gwathĩka, na nĩwe Adamu, nĩ kũngĩabataranirie mũndũ ũngĩ mũkinyanĩru ũrĩa ũngĩathĩkire nginya gũkua gwake nĩguo atũkũũre kuumana na thĩna ũcio. Bibilia ĩtaaragĩria ũũ: “Nĩ gũkorũo o ta ũrĩa kwaga gwathĩka kwa mũndũ ũcio ũmwe gwatũmire andũ aingĩ matuwo ehia, no taguo gwathĩka kwa mũndũ ũcio ũmwe gũgaatũma andũ aingĩ matuwo athingu.” (Aroma 5:19) Jesu nĩwe warĩ “mũndũ ũcio ũmwe.” Oimire igũrũ, agĩtuĩka mũndũ mũkinyanĩru,b na agĩkua nĩ ũndũ witũ. Ũndũ ũcio ũtũhotithagia gũkorũo na mũrũgamo mwega harĩ Ngai na tũkagĩa na kĩĩrĩgĩrĩro kĩa muoyo wa tene na tene.

KĨRĨA GĨATŨMIRE JESU ANYAMARĨKE NA AKUE

No nĩkĩ haarĩ bata Jesu akue nĩguo ahingie ũndũ ũcio? Na githĩ Ngai Mwene-Hinya-Wothe ndangĩarekereirie njiarũa cia Adamu itũũre tene na tene? Hatarĩ nganja nĩ angĩahotire gwĩka ũguo. No ũndũ ũcio ũngĩarĩ mũgarũ na watho ũrĩa oigĩte atĩ mũcara wa mehia nĩ gĩkuũ. Ũcio ndwarĩ watho o ũguo, atĩ nĩ ũngĩeheririo kana ũcenjio o ũrĩa aangĩendire. Warĩ wa bata mũno harĩ kĩhooto kĩa ma.​—Thaburi 37:28.

Korũo Ngai ndaarũmĩrĩire kĩhooto ũndũ-inĩ ũcio, andũ no makorũo na nganja kana no onanie kĩhooto maũndũ-inĩ mangĩ. Kwa ngerekano, hihi nĩ angĩhũthagĩra kĩhooto agĩthuura nũ harĩ njiarũa cia Adamu wagĩrĩire kũheo muoyo wa tene na tene? Hihi no ehokwo harĩ kũhingia ciĩranĩro ciake? Tondũ Ngai aarũmĩrĩire kĩhooto nĩguo atũhonokie, ũndũ ũcio ũtũheaga ũũma atĩ hĩndĩ ciothe ekaga ũrĩa kwagĩrĩire.

Kũgerera gĩkuũ kĩa Jesu, Ngai nĩ aahingũrire njĩra ya muoyo wa tene na tene thĩinĩ wa Paradiso gũkũ thĩ. Ta rora ciugo cia Jesu iria ciandĩkĩtwo thĩinĩ wa Johana 3:16: “Nĩ gũkorũo Ngai nĩ eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” Kwoguo gĩkuũ kĩa Jesu gĩtionanagia tu o kĩhooto kĩa Ngai, no makĩria nĩ kĩonanagia wendo wake mũnene kwerekera andũ.

O na kũrĩ ũguo-rĩ, nĩ kĩĩ gĩatũmire Jesu anyamarĩke na akue na njĩra ya ruo ta ũrĩa Maandĩko ma Injiri mataarĩirie? Nĩ ũndũ wa Jesu gũikara arĩ mwĩhokeku o na arĩ igerio-inĩ iritũ mũno, nĩ onanirie atĩ Mũcukani aarĩtie maheeni rĩrĩa oigire atĩ andũ matingĩikara marĩ ehokeku harĩ Ngai mangĩcemania na magerio. (Ayubu 2:​4, 5) Ũndũ ũcio nĩ ũngĩonekire ta ũrĩ wa ma rĩrĩa Shaitani aatũmire Adamu, ũrĩa warĩ mũkinyanĩru ehie. No Jesu, ũrĩa warĩ mũkinyanĩru ta Adamu, aaikarire arĩ mwathĩki o na rĩrĩa aacemanirie na magerio maritũ. (1 Akorintho 15:45) Kwoguo akĩonania atĩ o na Adamu nĩ angĩathĩkĩire Ngai korũo nĩ eendire gwĩka ũguo. Nĩ ũndũ wa Jesu gũkirĩrĩria arĩ magerio-inĩ, agĩtũtigĩra kĩonereria gĩa kũrũmĩrĩra. (1 Petero 2:21) Ngai nĩ aaheire Jesu kĩheo kĩa muoyo ũtangĩkua kũrĩa igũrũ nĩ ũndũ wa wathĩki wake.

ŨRĨA ŨNGĨGUNĨKA

Hatirĩ nganja atĩ Jesu nĩ aakuire. Rĩu andũ marĩ na kĩĩrĩgĩrĩro gĩa gũtũũra tene na tene. Hihi wee no wende gũgaatũũra tene na tene? Jesu nĩ onanirie ũrĩa tũbatiĩ gwĩka rĩrĩa oigire ũũ: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa watũmire, nĩwe Jesu Kristo.”​—Johana 17:3.

Arĩa macabĩte ngathĩti ĩno nĩ marakũnyita ũgeni wĩrute makĩria ũhoro wĩgiĩ Jehova, Ngai ũrĩa wa ma, na Mũrũwe, Jesu Kristo. Aira a Jehova arĩa marĩ hakuhĩ nawe no makene gũgũteithĩrĩria. Ningĩ no wone ũhoro ũngĩgũteithia Intaneti-inĩ thĩinĩ wa jw.org/ki.