Matitithagia Kũruta Ũira

¹ Gwĩtwo Aira a Jehova nĩ gũteithagia andũ mamenye ithuĩ tũrĩ a, na wĩra ũrĩa tũrutaga. Tũrutaga ũira atĩ Jehova Ngai witũ nĩwe mũnene. (Isa. 43:10, 12) Nĩguo mũndũ atuĩke Mũira wa Jehova no mũhaka akorũo na itemi wĩra-inĩ ũcio. Kaingĩ tũrutaga ũira ũcio kũgerera kũhunjia nyũmba kwa nyũmba, barabara-inĩ, gũcokera arĩa monanĩtie wendi wa kwĩruta Bibilia, na kũruta andũ Bibilia. Ithuothe nĩ tũrekĩrũo ngoro twĩrutanĩrie kũgĩa na itemi inene wĩra-inĩ ũcio.—1 Kor. 15:58.

² O na kũrĩ ũguo, andũ amwe thĩinĩ wa kĩũngano matingĩhota kũhingia maũndũ maingĩ. No maremwo nĩ kuumagara nĩ ũndũ wa ndwari nene kana wonje. Angĩ nao no makorũo nĩ maraingĩrĩrũo mũno nĩ andũ a famĩlĩ. Mũndũ mwĩthĩ no akorũo nĩ arekĩrĩrũo mĩhĩnga nĩ mũciari ũtarĩ Mũira wa Jehova. Ahunjia arĩa maikaraga kũndũ kũraya gũtarĩ na njĩra njega cia ũkuui no maigue maritũhĩirũo. Andũ arĩa marĩ thoni no maigue guoya. Ahunjia amwe arĩa mahiũranagia na maũndũ ta macio no meigue matingiarĩirũo tondũ matirahota kũhingia maũndũ maingĩ ta andũ arĩa angĩ kana ta ũrĩa mangĩenda kũhingia. Andũ ta acio matiagĩrĩirũo nĩ kuona ta wĩra wao ũrĩ wa tũhũ. (Gal. 6:4) No momĩrĩrio nĩ kũmenya atĩ Jehova nĩ akenaga mũno rĩrĩa maramũtungatĩra na ngoro yao yothe o na magĩcemanagia na mathĩna.—Luk. 21:1-4.

³ Gũcaria Mĩeke Ĩngĩ ya Kũhunjia: Kũrĩ na maũndũ maingĩ mũno monetwo marĩa monanagia ũrĩa andũ amwe mathiĩte na mbere na kũhunjia o na magĩcemanagia na maũndũ maritũ. Nĩ macarĩtie mĩeke ĩngĩ ya kũhunjia. Arĩa matahotaga kuuma mũciĩ nĩ mahũthĩrĩte thimũ kũhunjĩria andũ aingĩ. Ningĩ nĩ mahunjagĩria mũndũ o wothe woka kũmaceerera. O na angĩkorũo mũtumia ũingagĩrĩrũo mũno nĩ famĩlĩ yake ndangĩhota kũhunjia o na thĩinĩ wa famĩlĩ, no acarie mĩeke ya kũhunjĩria andũ a itũũra rĩake kana andũ angĩ arĩa acemanagia nao arĩ mĩhangʼo-inĩ ya o mũthenya.

⁴ Mũndũ mwĩthĩ ahota kũgirio gũthiĩ kũhunjia nĩ mũciari ũtarĩ Mũkristiano. Handũ ha kuona ũcio ũrĩ mũhĩnga mũnene, no ahunjagĩrie arutani na arutwo na rĩngĩ na rĩngĩ amwe mahota kwambĩrĩria kwĩruta Bibilia. Andũ aingĩ arĩa maikaraga kũndũ kũraya nĩ mahotaga kũhunjia na njĩra ya marũa. Andũ arĩa makoragwo na kĩyo ũtungata-inĩ wa Gĩkristiano, hingo ciothe nĩ marĩcaragia ũrĩa mangĩikara matarĩ ‘agũtaru kana mategũciara maciaro ũhoro-inĩ wa kũmenya Mwathani witũ Jesu Kristo.’—2 Pet. 1:8.

⁵ Jehova endaga ithuothe tũrutage na “ngoro” yothe wĩra wa kũhunjia. (Kol. 3:23) O na gũtuĩka mũigana wa mahinda na maũndũ marĩa tũrĩhotaga kũhingia nĩ ngũrani, ithuothe twagĩrĩirũo gũtindĩkwo nĩ wendo wa ma ũrĩa uumaga ‘ngoro-inĩ.’ (1 Maũ. 28:9; 1 Kor. 16:14) Angĩkorũo nĩ tũreka ũrĩa wothe tũngĩhota, tũtirĩonaga ta tũnyihĩirũo nĩ wĩtĩkio kana tũkeyagĩra kĩene atĩ tondũ tũtirahota kũhingia maũndũ maingĩ thĩinĩ wa kĩũngano. O ta Paulo, nĩ tũrĩhotaga kuuga tũtarĩ na nganja atĩ ‘tũtirĩ twatithia ta tũrĩ na guoya tũkĩmũheaga ũhoro o na ũrĩkũ wa kũmũguna, na tũkĩmũrutagĩra maũndũ harĩa andũ makoragwo monganĩte.’—Atũm. 20:20.