Mĩbango Mĩerũ ya Kũhunjia Kũndũ kwa Mũingĩ
1. Akristiano a karine ya mbere maatũigĩire kĩonereria kĩrĩkũ?
1 Makĩria ma kũhunjia nyũmba kwa nyũmba, Akristiano a karine ya mbere nĩ maahunjagia nginya kũndũ kwa mũingĩ. (Atũm. 20:20) Kwa ngerekano, nĩ maathiaga hekarũ-inĩ kũrĩa andũ aingĩ monekaga. (Atũm. 5:42) Rĩrĩa mũtũmwo Paulo aarĩ Athene, nĩ aahunjagĩria andũ thoko-inĩ o mũthenya. (Atũm. 17:17) Njĩra ĩrĩa nene tũhũthagĩra ũmũthĩ kũhunjia nĩ gũthiĩ nyũmba kwa nyũmba. O na kũrĩ ũguo, nĩ tũhunjagia nginya biacara-inĩ, kũrĩa andũ mahurũkaga, kũrĩa andũ mahetũkagĩra, kũrĩa andũ marũgamagia ngaari, na kũngĩ kũingĩ kũrĩa andũ monekaga. O na gũtuĩka ahunjia othe nĩ marekĩrũo ngoro kũhunjia kũndũ kwa mũingĩ, aingĩ nĩ mekũgĩa na mweke wa kũhunjia makĩrũmĩrĩra mĩbango ĩĩrĩ mĩerũ ya kũhunjia kũndũ ta kũu.
2. Nĩ mũbango ũrĩkũ wa kũgeria waambĩrĩirio Novemba 2011?
2 Kũhunjia Kũndũ kwa Mũingĩ Taũni-inĩ Nene: Ta ũrĩa ibuku rĩa Kitabu cha Mwaka—2013 rĩonanĩtie karatathi-inĩ ga 16 na 17, mũbango mwerũ wa kũhunjia kũndũ kwa mũingĩ nĩ waambĩrĩirio taũni-inĩ ya New York Novemba 2011, ũrĩ wa kũgeria. Metha na tũkaari twa gũtindĩkwo ibangĩtwo wega mabuku ma thiomi cigana ũna nĩ ciaigĩtwo kũndũ gũtiganĩte kũrĩa andũ aingĩ mahĩtũkagĩra taũni-inĩ ĩyo. Andũ ngiri nyingĩ nĩ maahĩtũkagĩra kũu. Acio nĩ hamwe na arĩa maikaraga kũndũ kũrĩ na ũgitĩri mũnene na arĩa matatindaga mũciĩ. Moimĩrĩro maarĩ mega mũno. Ica ikuhĩ thĩinĩ wa mweri ũmwe tu nĩ kwaheanirũo ngathĩti 3,797 na mabuku 7,986. Andũ aingĩ nĩ moigire no mende kwĩruta Bibilia. Tondũ muoroto mũnene warĩ kwambĩrĩria kũruta andũ Bibilia, andirethi o ciothe iria ciatigĩirũo mapainia nĩ cianeanirũo o narua ciũngano-inĩ iria ciagĩrĩire nĩguo andũ acio makinyĩrũo.
3. Mũbango ũcio ũratheremio makĩria na njĩra ĩrĩkũ?
3 Tondũ mũbango ũcio nĩ wagĩire na moimĩrĩro mega, rĩu nĩ ũrahũthĩrũo kũndũ guothe thĩinĩ wa thĩ taũni-inĩ iria irĩ na andũ aingĩ. Wabici ya rũhonge nĩyo ĩrĩtuaga nĩ taũni irikũ mũbango ũcio ũkwagĩrĩra. Taũni icio kaingĩ nĩ iria ikoragwo na wabici nyingĩ kana nyũmba nyingĩ na ũndũ ũcio ũgatũma igĩe na andũ aingĩ. Thutha ũcio, wabici ya rũhonge nĩ ĩrĩmenyithagia ciũngano iria ikũhũthĩrũo mũbango-inĩ ũcio na ĩheane ũtaaro. Mapainia a hĩndĩ ciothe na mapainia a mwanya nĩo mahũthagĩrũo, o na gũtuĩka icigo-inĩ imwe mapainia a gũteithĩrĩria no mahũthĩrũo.
4. Mahunjio ma taũni-inĩ iria nene mekagwo atĩa?
4 Ũrĩa Mahunjio Macio Mekagwo: Mapainia arĩa mahũthagĩrũo mũbango-inĩ wa kũhunjia taũni-inĩ nene metagĩrĩra mũndũ oke metha-inĩ. Magacoka makamwĩtĩkĩria oe ibuku o rĩothe rĩrĩa rĩramũgucĩrĩria, na makamũcokeria ciũria o ciothe iria angĩkorũo nacio. Angĩkuua ibuku, mapainia matiagĩrĩirũo kũmũgwetera ũhoro wa mĩhothi. No angĩũria kana nĩ cia kwendio, no mamũtaarĩrie atĩ no atũme mũhothi wake kũgerera andirethi iria cionanĩtio ibuku-inĩ rĩu. Kũngĩhoteka no mamũrie ũũ: “Hihi no wende mũndũ agũceerere gwaku mũciĩ?” kana “Hihi nĩ ũĩ atĩ nĩ twĩrutagĩra gũthoma na andũ Bibilia hatarĩ marĩhi?”
5. Mũthuri ũmwe na mũtumia wake maakeneire atĩa mũbango ũcio mwerũ?
5 Kũhũthĩra mũbango ũcio nĩ kũrehaga gĩkeno kĩnene. Mũthuri ũmwe na mũtumia wake maandĩkire ũũ: “Rĩrĩa twerorera andũ aingĩ o mũthenya makĩhĩtũkĩra metha-inĩ itũ, nĩ tuonaga bata wa wĩra mũnene wa kũhunjĩria andũ ũrĩa ũrarutwo thĩ yothe. Kuona andũ aingĩ ũguo na gwĩciria ũrĩa Jehova arũmbũyagia o ũmwe wao, nĩ kuongereire hinya itua riitũ rĩa gũthiĩ na mbere gũthingata wĩra wa kũhunjia ũtũũro-inĩ witũ. Nĩ tũhũũraga mbica Jehova agĩthuthuria ngoro cia arĩa mahĩtũkagĩra hau agĩcaria arĩa magĩrĩire. Rĩu tuonaga tũkĩrutithania wĩra hakuhĩ mũno na araika.”
6. (a) Nĩ mũbango ũngĩ ũrĩkũ ũrahaarĩrio thĩinĩ wa ciũngano nyingĩ, na nĩ ngũrani atĩa na ũrĩa wa kũhunjia taũni-inĩ iria nene? (b) Ciũngano ingĩnyitanĩra atĩa rĩrĩa irahunjia kũndũ kwa mũingĩ?
6 Mahunjio ma Kũndũ kwa Mũingĩ Gĩcigo-inĩ gĩa Kĩũngano: Makĩria ma mahunjio ma taũni-inĩ iria nene, nĩ kũrĩ na mũbango ũngĩ mwerũ ũrahaarĩrio nĩ ciama nyingĩ cia athuri ciũngano-inĩ citũ. Mũbango-inĩ ũcio, ahunjia maigaga metha harĩa harĩ na andũ aingĩ gĩcigo-inĩ gĩa kĩũngano kĩao. Mũbango ũcio nĩ ngũrani na ũrĩa wa kũhunjia taũni-inĩ nene, ũrĩa ahunjia kuuma ciũngano-inĩ nyingĩ mahunjagia kũrĩa kũrĩ na andũ aingĩ kwamũrĩtwo nĩ wabici ya rũhonge.—Rora gathandũkũ “Bata wa Kwaranĩria.”
7. Kũrĩa kũngĩhoteka-rĩ, athuri marĩbangaga atĩa mahunjio ma kũndũ kwa mũingĩ ciũngano-inĩ ciao?
7 Athuri nĩ mekũrora kana gĩcigo gĩa kĩũngano nĩ kĩrĩ na kũndũ kũhĩtũkagĩra andũ aingĩ nĩguo mone kana nĩ kwagĩrĩire kũbanga mahunjio ma kũndũ kwa mũingĩ. Kũndũ kũrĩa kũngĩagĩrĩra kũigwo metha nĩ hamwe na kũrĩa andũ mahurũkaga, barabara iria irĩ na andũ aingĩ, matuka-inĩ, makorenji-inĩ, ihaaro-inĩ cia ndege, na kũrĩa andũ magomanaga hĩndĩ ya maambura mwanya mwanya. No kwagĩrĩre makĩria metha ĩngĩigwo handũ o harĩa, thikũ o iria, na mathaa o marĩa. Nĩ kuonekete moimĩrĩro mega rĩrĩa metha ciaigwo handũ harĩ na matuka maingĩ gũkĩra rĩrĩa ciaigwo nja ya nduka yakĩtwo ĩrĩ iki ĩrĩa andũ mathiaga marĩ na gĩtũmi kĩna. Kũndũ kũngĩ ta tũcĩra-inĩ tũrĩa tũhĩtũkagĩrũo nĩ andũ aingĩ no kwagĩrĩre kũigwo kametha kanini ka mabuku. Athuri no marute Rĩarĩro-inĩ riitũ bairo cia mwanya cia kuonania ngathĩti cia Mũrangĩri na Amkeni! na ibuku rĩa Bibilia Ĩrutanaga, rĩrĩa irĩoneka na rũthiomi rwa kwao. Bairo icio ihaarĩirio nĩ ũndũ wa kũhũthĩrũo mahunjio-inĩ ma kũndũ kwa mũingĩ tu. Arĩa mekũhũthĩrũo marĩkaga o ta ũrĩa arĩa marĩ mũbango-inĩ wa mwanya wa kũhunjia taũni-inĩ iria nene mekaga na magĩrĩirũo kũrũmĩrĩra biũ ũtaaro wa mũrori wa ũtungata. Mangĩheo andirethi nĩ mũndũ ũtaikaraga gĩcigo-inĩ gĩa kĩũngano kĩao, magĩrĩirũo kũiyũria narua fomu ya Tafadhali Fuatia Upendezi (S-43) na mamĩnengere mwandĩki.
8. Angĩkorũo kĩũngano kĩanyu gĩtirĩ mũbango wa kũhunjia kũndũ kwa mũingĩ-rĩ, nĩ njĩra irĩkũ ingĩ ingĩhũthĩrũo kũhunjia kuo?
8 Kũhunjia Kũndũ kwa Mũingĩ Ũrĩ Wiki: Ciũngano imwe no ikorũo itarĩ na kũndũ kũhĩtũkagĩra andũ aingĩ thĩinĩ wa gĩcigo kĩao kũngĩigwo metha ya mabuku. O na kũrĩ ũguo, nginya ciũngano-inĩ icio, ahunjia nĩ marekĩrũo ngoro mahunjagie kũndũ kwa mũingĩ rĩrĩa marahunjia marĩ oiki. Hihi gĩcigo-inĩ kĩanyu nĩ kũrĩ na thoko kana handũ harĩ na matuka maingĩ? Hihi nĩ kũrĩ handũ andũ mahurũkaga? Hihi nĩ kũrĩ mambura mekagwo mahinda mwanya mwanya gĩcigo-inĩ kĩanyu? Angĩkorũo nĩguo, no ũkenere mahunjio ma kũndũ kwa mũingĩ.
9. Twagĩrĩirũo kũhunjĩria andũ kũrĩa guothe mangĩoneka nĩkĩ?
9 Nĩ wendi wa Jehova “andũ othe mahonokio na matuĩke a kũmenya ũhoro-wa-ma.” (1 Tim. 2:4) Nĩ ũndũ ũcio, tũrerutanĩria gũtwarĩra andũ aingĩ o ũrĩa kwahoteka ndũmĩrĩri ya Ũthamaki mũico ũtanakinya. (Mat. 24:14) Kũndũ kũingĩ ti ũndũ mũhũthũ gũkora andũ mũciĩ. O na kũrĩ ũguo, no tũhote kũmaarĩria nginya marĩ kũndũ kwa mũingĩ. No kũhoteke atĩ kũhunjia kũndũ kwa mũingĩ noyo njĩra ĩrĩa ĩngĩhũthĩrũo gũtwarĩra andũ amwe ũhoro mwega. Nĩ ũndũ ũcio-rĩ, rekei tũhingie ũtungata witũ na njĩra ya kũhunjĩria andũ kũrĩa guothe mangĩoneka.—2 Tim. 4:5.
[Gathandũkũ karathathi ga 5]
Bata wa Kwaranĩria
Nĩ kuonekete atĩ rĩmwe na rĩmwe ahunjia a ciũngano iria iriganĩtie nĩ mekoraga makĩhunjia kũndũ kwa mũingĩ barabara-inĩ o iria, matuka-inĩ o marĩa, na gwa kũrũgamia ngaari o kũrĩa. Ahunjia a ciũngano mwanya mwanya nĩ mekoraga magĩtigĩra andũ ngathĩti icigo-inĩ o iria cia biacara na kũndũ kũngĩ ta kũu. Ũndũ ũcio nĩ ũtũmaga ahũũri biacara na aikari a kũu marakare o na akorũo ahunjia a ciũngano icio marahunjia kuo mahinda matiganĩte. Nĩ ũndũ ũcio, nĩ kwagĩrĩire makĩria ahunjia mahunjie o gĩcigo-inĩ gĩa kĩũngano kĩao rĩrĩa marahunjia kũndũ kwa mũingĩ.
Angĩkorũo ahunjia nĩ marenda kũhunjia kũndũ kwa mũingĩ gĩcigo-inĩ gĩa kĩũngano kĩrĩa mariganĩtie, magĩrĩire kwaranĩria na mũrori wa ũtungata wa kĩũngano kĩao. Nake nĩ ekwaranĩria na mũrori wa ũtungata wa kĩũngano kĩu nĩgetha maheo rũtha. Kũrĩa ciũngano cia thiomi mwanya mwanya igaĩirũo kũhunjia gĩcigo-inĩ kĩmwe, arori a cio a ũtungata magĩrĩirũo kwaranĩria nĩguo metheme kũhunjia na njĩra ĩngĩrakaria andũ a kũu. Nĩ ũndũ wa kwaranĩria, maũndũ mothe no mekĩke “na mwĩkĩre ũrĩa wagĩrĩire . . . na kĩhaarĩro kĩega.”—1 Kor. 14:40.
[Mbica karatathi ga 6]
[Mbica karatathi ga 6]