Njĩra Njerũ na ya Gũcanjamũra ya Kũhunjia Kũndũ kwa Mũingĩ
1. Ciũngano iria ikoragwo na kũndũ kũhĩtũkagĩra andũ aingĩ ikoretwo igĩkĩrũo ngoro igĩe na mũbango ũrĩkũ?
1 Ciũngano iria ikoragwo na kũndũ kũhĩtũkagĩra andũ aingĩ nĩ ikoretwo igĩkĩrũo ngoro igĩe na mũbango wa kũhunjia kũndũ kwa mũingĩ, ikĩhũthĩra metha kana tũkaari twa gũtindĩkwo tũigĩrĩirũo mabuku. Angĩkorũo gakaari ga gũtindĩkwo nĩko karahũthĩrũo, mũhunjia ũmwe no arũgame kana aikare thĩ hakuhĩ nako. No angĩkorũo nĩ metha ĩrahũthĩrũo, ahunjia erĩ nĩo magĩrĩirũo gũkorũo ho. Arĩa marũgamĩrĩire metha ĩyo kana gakaari, magĩrĩirũo gũkorũo makĩarĩria andũ na njĩra ya ũrata, na ĩramagucĩrĩria. Hangĩgĩa mũndũ ũkwĩrorera mabuku marĩa maigĩtwo hau, mũhunjia ũmwe no ambĩrĩrie kwaria nake, hihi na njĩra ya kũmũũria kĩũria ta, “Hihi nĩ ũrĩ weyũria ũrĩa Bibilia yugĩte igũrũ rĩgiĩ ũhoro ũcio?” Mũhunjia ũngĩ ũmwe kana erĩ no makorũo marĩ handũ hatarĩ haraihu mũno na metha kana gakaari kau, makĩgeria gwetha mĩeke ya kwambĩrĩria ndeereti ciĩgiĩ Bibilia hamwe na andũ.
2. Heana ũndũ wonetwo ũrĩa ũronania bata wa kũhunjia kũndũ kwa mũingĩ tũkĩhũthĩra metha kana tũkaari tũigĩrĩirũo mabuku.
2 Mũbango ũyũ nĩ ũteithĩtie andũ aingĩ mambĩrĩrie kwĩruta Bibilia. Mũrutwo ũmwe wa korenji nĩ aathurire gwĩka ũthuthuria na kwandĩka ũhoro wa Aira a Jehova, no ndaahotire kũmenya harĩa Nyũmba ya Ũthamaki yaarĩ. Kiumia kĩrĩa kĩarũmĩrĩire, akĩona metha ĩigĩrĩirũo mabuku cukuru-inĩ yao. Akĩambĩrĩria kwĩruta Bibilia, na rĩu mũrutwo ũcio nĩ mũhunjia mũbatithie na we mwene nĩ ahunjagia kũgerera njĩra ĩno.
3. Ahunjia amwe maiguaga atĩa igũrũ rĩgiĩ kũhũthĩra njĩra ĩno ya kũhunjia kũndũ kwa mũingĩ?
3 Mwarĩ wa Ithe witũ ũmwe ũkenagĩra mũno kũhunjia na njĩra ĩno oigire ũũ: “Andũ amwe mokaga metha-inĩ nĩguo moe ngathĩti cia ica ikuhĩ. Angĩ nao matirĩ maigua ũhoro wa Aira a Jehova rĩngĩ. Rĩu nĩ nyonete atĩ andũ aingĩ no mahunjĩrio, tũngĩhũthĩra njĩra ĩno.” Mwarĩ wa Ithe witũ ũngĩ nake oigire ũũ: “Ĩno nĩ njĩra ya kũhunjia njerũ na ya gũcanjamũra tondũ andũ nĩo maroka kũrĩ ithuĩ, na makĩria ma ũguo, marĩ na wendi mũnene wa kũmenya.”
4. Nĩkĩ nĩ harĩ bata kwaga gũcenjagia mũthenya, thaa, kana harĩa tũigaga metha kana gakaari ka mabuku o kiumia?
4 No tũkorũo na moimĩrĩro mega angĩkorũo tũtirĩcenjagia mũthenya, thaa, kana harĩa tũigaga metha kana gakaari ka mabuku o kiumia. Tondũ tũngĩaga gũcenjia, andũ nĩ mekũmenyera mabuku macio, na nĩ ũndũ ũcio maiguage marĩ na wĩyathi wa gũka harĩ ithuĩ nĩguo morie ciũria kana mahoe mabuku. Hihi kĩũngano kĩanyu nĩ gĩkoragwo na mũbango wa kũhunjia kũndũ kwa mũingĩ? Angĩkorũo nĩguo, no ũgerie kũnyitanĩra na njĩra ĩno ya ‘kũhunjia ũhoro wa Ũthamaki wa Ngai,’ ĩrĩ na moimĩrĩro mega na gĩkeno.—Luk. 9:60.