Ũrĩa Tũngĩhunjia Tũkĩhũthĩra Tũkaari Kana Tũmetha twa Mabuku

Njĩra ya kũhũthĩra tũkaari kana tũmetha twa mabuku nĩ ĩraakorũo na moimĩrĩro mega mũno harĩ gũteithia arĩa marĩ na ngoro njega mamenye ũhoro ũrĩa wa ma. (Joh. 6:44) Nĩ ũndũ ũcio, athuri nĩ mekĩrĩtwo ngoro mabange njĩra ĩyo yambĩrĩrie kũhũthĩrũo icigo-inĩ ciao cia kũhunjia kũrĩa kũhĩtũkagĩra andũ aingĩ. Tondũ tũtirabatara gwaka kĩndũ handũ hana, to mũhaka tũhoe rũtha wabici-inĩ cia thirikari. Nĩa mangĩagĩrĩra kũhunjia na njĩra ĩyo? Nĩ ahunjia arĩa marĩ ũtaũku, kĩhaarĩro kĩega, na ũhoti mwega wa kwaranĩria na andũ. Maũndũ maya nĩmo ahunjia magĩrĩirũo nĩ gwĩka kana gwĩthema nĩguo magĩe na moimĩrĩro mega.

Wagĩrĩirũo:

Gũkorũo na ũrata, ũcanjamũku, na kuonania atĩ nĩ wĩhaarĩirie gũteithia ahĩtũki. Ahunjia amwe macanjamũkagĩra mũhĩtũki, magacoka makamũgeithia na njĩra ya ũrata. Mũndũ angĩikia maitho gakaari-inĩ kana kametha-inĩ ka mabuku akĩhĩtũka, no ũmwĩre ũũ: “No woe ibuku angĩkorũo no wende.”
Kũrũgama makinya maigana ũna kuuma harĩa gakaari kana kametha karĩ. Kũndũ kũmwe ahunjia nĩ magĩaga na moimĩrĩro mega rĩrĩa meka ũguo. Angĩ nao nĩ monete atĩ gũikara hakuhĩ mũno nĩ gũtũmaga ahĩtũki metigĩre kũrũgama, na nĩ ũndũ ũcio makona arĩ wega kũrũgama handũ haraiharaihu mageterera nginya mũhĩtũki athiĩ hau gakaari-inĩ kana kametha-inĩ. Mũndũ akuhĩrĩria ho, geria kwambĩrĩria ndeereti, hihi na njĩra ya kũmwĩra ũũ: “Nĩ ũrĩ weyũria kĩũria gĩkĩ?”
Hũthĩra Bibilia maita maingĩ o ũrĩa ũngĩhota.
Mũndũ angĩoya rĩmwe rĩa mabuku marĩa tũhũthagĩra kũruta andũ Bibilia, ta Bibilia Ĩrutanaga, mũtaarĩrie ũrĩa twĩrutaga na andũ Bibilia. Mũthaakĩre video ya Wagĩrĩirũo Kwĩruta Bibilia Nĩkĩ?
Mũndũ angĩonania nĩ akenio nĩ ũhoro ũrĩa mwega, kũngĩhoteka no ũmũhoe namba ciake cia thimũ, e-mail, kana andirethi. Angĩkorũo mũndũ ũcio ndoimĩte gĩcigo-inĩ kĩrĩa mũhunjagia, ihũria fomu ya Tafadhali Fuatia Upendezi (S-43) na ũnengere mwandĩki na ihenya o ũrĩa kũngĩhoteka.