Kũgĩa na Moimĩrĩro Mega Tũkĩhunjia Barabara-inĩ
1. Nĩ na njĩra ĩrĩkũ tũngĩĩgerekania na Jesu?
1 Ihinda rĩa ũtungata wake gũkũ thĩ, Jesu ndaagire kwaria na arĩa othe acemanagia nao barabara-inĩ na kũndũ kũngĩ kũrĩa gwakoragwo na andũ. (Luk. 9:57-61; Joh. 4:7) Eendaga kũhunjĩria andũ aingĩ o ũrĩa kũngĩahotekire ndũmĩrĩri ĩyo ya bata mũno. Ũmũthĩ, kũhunjia barabara-inĩ nĩ njĩra njega ya gũteithia andũ magĩe na ũũgĩ wa Ngai. (Thim. 1:20) Nĩ tũkũgĩa na moimĩrĩro mega makĩria tuoya ikinya rĩa mbere kwaria na andũ na twahũthĩra ũtaũku.
2. Kuoya ikinya rĩa mbere gũkonainie atĩa na wĩra wa kũhunjia barabara-inĩ?
2 Oya Ikinya rĩa Mbere: Nĩ wega gũkora mũndũ na kũmwarĩria, handũ ha kũrũgama kana gũikara thĩ handũ hamwe wetereire ehĩtũkĩri magũkore na mambĩrĩrie gũkwarĩria. Onania ũthiũ mũkenu, na ũmũrore ũthiũ na njĩra ya ũrata, ũhoreire. Angĩkorũo mũrahunjia na ahunjia angĩ-rĩ, kaingĩ nĩ wega gũkora mũndũ ũrĩ wiki. Ningĩ nĩ ũkũbatara gwĩkĩra kĩyo gwetha njĩra ya kwaria rĩngĩ na andũ arĩa monania kũgucĩrĩrio nĩ ũhoro ũrĩa tũrahunjia. Ũngĩona nĩ kwagĩrĩire, mũthia-inĩ wa ndeereti yanyu mũũrie na njĩra ya gĩtĩo ũrĩa ũngĩmuona rĩngĩ. Ahunjia amwe mamenyerete kũhunjia marĩ handũ hana barabara-inĩ, ũndũ ũrĩa ũmahotithagia kwaria na o andũ arĩa arĩa kaingĩ, na makamateithia mathiĩ na mbere gũkũria wendo harĩ ũhoro ũrĩa mahunjagĩrio.
3. Tũngĩhũthĩra atĩa ũtaũku rĩrĩa tũrahunjia barabara-inĩ?
3 Hũthĩra Ũtaũku: Hũthĩra ũũgĩ ũgĩthuura harĩa ũkũrũgama barabara-inĩ na andũ arĩa ũkwarĩria. To mũhaka tũhunjĩrie o mũndũ wothe ũrahĩtũka. Korũo hĩndĩ ciothe ũrĩ maitho kũmenya ikinya rĩrĩa wagĩrĩirũo nĩ kuoya. Angĩkorũo mũndũ arĩ ihenya-inĩ, nĩ wega kũreka ethiĩre. Rĩrĩa ũrahunjia mbere ya nyumba ya mbiacara-rĩ, nĩ wega kũhũthĩra ũũgĩ nĩguo wĩtheme kũrakaria ũrĩa ũmĩrũgamĩrĩire. Kaingĩ nĩ wega kũhunjĩria andũ rĩrĩa maroima kũgũra indo nyũmba-inĩ ĩyo ya mbiacara handũ ha rĩrĩa maraingĩra. Ũkĩarĩria andũ, makuhĩrĩrie na njĩra ĩtekũmamakia kana kũmahahũra. Ningĩ, korũo na ũtaũku rĩrĩa ũraheana mabuku. Angĩkorũo mũndũ ndaronania kũgucĩrĩrio mũno, no ũmũhe trakti handũ ha ngathĩti.
4. Nĩkĩ kũhunjia barabara-inĩ kũrĩ ũguni na kũrehaga gĩkeno?
4 Kũhunjia barabara-inĩ gũtũhotithagia kũhura mbeũ nyingĩ cia ma kwa ihinda inini. (Koh. 11:6) Andũ amwe arĩa tũcemanagia nao no makorũo marĩ andũ tũtangĩhota gũkora mĩciĩ-inĩ yao rĩrĩa tũrahunjia nyũmba kwa nyũmba. Na githĩ ndũkĩagĩrĩirũo kũbanga kũhunjia barabara-inĩ, wĩra wa ũtungata ũrĩa ũrehaga gĩkeno na moimĩrĩro mega?