Hihi no Ũnyitanĩre Kũhunjia Hwaĩ-inĩ?
1. Kũringana na mũthomi ũmwe-rĩ, nĩ rĩ mũtũmwo Paulo aahunjagia nyũmba kwa nyũmba?
1 Kũringana na ibuku rĩtagwo Daily Life in Bible Times, mũtũmwo Paulo kaingĩ aahunjagia nyũmba kwa nyũmba “kuuma thaa 10:00 cia hwaĩ-inĩ nginya ũtuku mũno.” Tũtiũĩ kana ũcio nĩguo mũtaratara ũrĩa Paulo aarũmagĩrĩra, no nĩ tũĩ atĩ Paulo nĩ aakoragwo eeharĩirie ‘gwĩka maũndũ mothe nĩ ũndũ wa ũhoro-ũrĩa-mwega.’ (1 Kor. 9:19-23) Ũguo nĩ kuuga nĩ eebangaga nĩguo ahote kũhunjia nyũmba kwa nyũmba rĩrĩa angĩagĩire na moimĩrĩro mega makĩria.
2. Nĩkĩ hwaĩ-inĩ nĩ ihinda rĩega rĩa kũnyitanĩra ũtungata-inĩ?
2 Ahunjia kũndũ kũingĩ mamenyerete gũthiĩ nyũmba kwa nyũmba rũcinĩ gatagatĩ-inĩ ga kiumia. No hihi rĩu norĩo rĩkoragwo rĩrĩ ihinda rĩrĩa rĩega biũ gĩcigo-inĩ kĩanyu? Painia ũmwe oigire ũũ igũrũ rĩgiĩ gĩcigo kĩrĩa ahunjagia: “Nĩ hinya mũno gũkora mũndũ mũciĩ mathaa ma mũthenya. No andũ aingĩ makoragwo mũciĩ hwaĩ-inĩ.” Kũhunjia hwaĩ-inĩ no gũtũhe mweke mwega mũno wa gũkinyĩria arũme ũhoro ũyũ mwega. Kaingĩ ene nyũmba makoragwo makindĩirie na marĩ na wendi wa gũtereta. Angĩkorũo gwĩka ũguo no gũkorũo na ũguni, athuri nĩ magĩrĩirũo kũbanga mĩcemanio ya kũhunjia hwaĩ-inĩ.
3. Tũngĩonania ũtaũku atĩa rĩrĩa tũrahunjia hwaĩ-inĩ?
3 Hũthagĩra Ũtaũku: Ũkĩhunjia hwaĩ-inĩ, ũtaũku nĩ wa bata. Kwa ngerekano, ũngĩtonya kwa mũndũ ihinda rĩtamwagĩrĩire, ta hĩndĩ ya irio cia hwaĩ-inĩ, nĩ kaba kũmwĩra nĩ ũgũcoka hĩndĩ ĩngĩ. Angĩkorũo kwĩna nduma, rũgama handũ mwene nyũmba egũkuona wega, wĩmenyithanie narua na ũmwĩre gĩtũmi gĩa kũmũceerera. Ningĩ nĩ wega kũhunjia mũrĩ erĩ kana mũrĩ ikundi na mũikare kũrĩa kũrĩ na ũtheri wa kũigana na kũrĩ na andũ. Ndũgaceerage ũtukũ mũno nginya ũgathumbũra arĩa marehaarĩria gũthiĩ gũkoma. (2 Kor. 6:3) Angĩkorũo itũũra rĩanyu nĩ ũgwati gwatuka, hunjagia mathaa ma hwaĩ-inĩ nduma ĩtanaingĩra.—Thim. 22:3.
4. Nĩ irathimo irĩkũ ciumanaga na kũhunjia hwaĩ-inĩ?
4 Irathimo: Nĩ tũkenagĩra ũtungata makĩria rĩrĩa twahota kwaranĩria na andũ. Na o ũrĩa tũrahota kũhunjia, noguo tũkũgĩa na mĩeke mĩingĩ ya gũteithia andũ angĩ “mahonokio na matuĩke a kũmenya ũhoro-wa-ma.” (1 Tim. 2:3, 4) Hihi no ũbange maũndũ maku nĩguo ũnyitanĩre kũhunjia hwaĩ-inĩ?